Роноцит (500мг/4мл)
Инструкция
-
русский
-
қазақша
Дәрілік затты медициналық қолдану жөніндегі нұсқаулық
РОНОЦИТ
Саудалық атауы
Роноцит
Халықаралық патенттелмеген атауы
Цитиколин
Дәрілік түрі
Инъекцияға арналған ерітінді, 500 мг және 1000 мг, 4 мл
Құрамы
1 ампуланың ішінде
белсенді зат – натрий цитиколині 522.52 мг және 1045.04 мг
(500.0 және 1000.0 цитиколинге баламалы),
қосымша заттар: 1 М хлорсутек қышқылы** немесе
1 М натрий гидроксиді ерітіндісі**, инъекцияға арналған су
** - 1 М натрий гидроксиді ерітіндісі немесе 1 М хлорсутек қышқылы пайдаланылады.
Сипаттамасы
Мөлдір түссіз немесе қоңырлау сары түсті ерітінді.
Фармакотерапиялық тобы
Жүйке жүйесі. Психоаналептиктер. Зейін тапшылығы және аса жоғары белсенділік кезінде қолданылатын психостимуляторлар (ADHD -Attention deficit hyperactivity disorder) және ноотропты дәрілер. Басқа психостимуляциялаушы және ноотропты дәрілер. Цитиколин.
АТХ коды N06ВХ06
Фармакологиялық қасиеттері
Фармакокинетикасы
Цитиколин вена ішіне және бұлшықет ішіне енгізгенде жақсы сіңіріледі. Холин мен цитидиннің түзілуімен бауырда метаболизденеді. Парентеральді енгізгеннен кейін қан плазмасында холин концентрациясы едәуір жоғарылайды.
Цитиколин ми құрылымдарында холин фракциясын құрылымдық фосфолипидтерге және цитидин фракциясын цитидин нуклеотидтеріне және нуклеин қышқылдарына жылдам енгізуімен елеулі дәрежеде таралады. Цитиколиннің енгізілген дозасының тек 15%-ы адам ағзасынан шығарылады: 3%-дан кемі-бүйрекпен және 12%-ға жуығы-шыққан деммен көмірқышқыл газымен шығарылады.
Фармакодинамикасы
Цитиколин, жасушалық жарғақшаның (негізінен фосфолипидтердің) негізгі ультрақұрылымдық компоненттері ізашары бола отырып, кең ауқымды әсерге ие: жасушалардың зақымданған жарғақшаларының қалпына келуіне ықпал етеді, фосфолипаза әсерін тежейді, бос радикалдардың артық түзілуіне кедергі етіп, сондай-ақ апоптоз механизміне әсер етіп жасушалар қырылуының алдын алады. Инсульттің жедел кезеңінде цитиколин ми тіндерінің зақымдану көлемін азайтады, холинергиялық берілісті жақсартады. Бас сүйек-ми жарақатында жарақаттан кейінгі команың ұзақтығын және неврологиялық симптомдар айқындығын азайтады.
Мидың созылмалы гипоксиясы кезінде цитиколин жадының нашарлауы, жігерсіздік, күнделікті әрекеттер жасаудағы және өзіне-өзі қызмет көрсетудегі қиындықтар сияқты когнитивті бұзылыстарды емдеу кезінде тиімді. Препаратпен ұзақ емдеуге болады, өйткені цитиколин тыныс алуға, пульс және артериялық қысымға әсер етпейді.
Қолданылуы
- инсульт, жедел фаза және оның неврологиялық асқынулары
- мидың жарақаттық зақымдануы және оның неврологиялық асқынулары
Қолдану тәсілі және дозалары
Препаратты бұлшықет ішіне, вена ішіне баяу (дозаға байланысты 3-тен 5 минутқа дейін) немесе вена ішіне тамшылатып инфузия түрінде енгізуге болады.
Вена ішіне тамшылатып инфузия түрінде енгізген кезде перфузия жылдамдығы минутына 40-тан 60 тамшыға дейін болуы тиіс.
Бұл препараттың құрамы қажет болған жағдайда пероральді қабылдауға мүмкіндік береді. Ампуланың ішіндегісін тікелей қабылдауға немесе стақан судың (120 мл) жартысында ерітуге болады.
Ампуладағы инъекцияға арналған ерітінді бір рет қолдануға арналған. Ампула ашылғаннан кейін ерітіндіні дереу пайдалану керек. Пайдаланылмаған препарат лақтырып тасталуы тиіс. Препарат венаішілік изотониялық ерітінділердің барлық түрлерімен үйлесімді. Оны глюкозаның гипертониялық ерітіндісімен араластыруға болады.
Ересектер
Ұсынылатын доза жағдайдың ауырлығына байланысты тәулігіне 500 мг бастап 2000 мг дейін болады.
Егде пациенттер
Осы жас тобы үшін дозаны қандай да бір нақты түзету қажет емес.
Балалар
Балаларда қолдану тәжірибесі шектеулі. Сондықтан, егер күтілетін пайда кез келген ықтимал қаупінен асып түскенде ғана препаратты қолдану керек.
Жағымсыз әсерлері
Жағымсыз реакция жиілігі өте сирек (< 1/10000) (жекелеген жағдайларды қоса):
- елестеулер
- бас ауыруы, бас айналуы
- артериялық гипертензия, артериялық гипотензия
- ентігу
- жүрек айнуы, құсу, диарея
- қызару, есекжем, экзантема, пурпура
- қалтырау, ісіну
Күдікті жағымсыз реакциялар туралы хабарламалар
Дәрілік затты тіркегеннен кейінгі күдікті жағымсыз реакциялар туралы хабарламалар маңызды болып табылады. Пациентте дәрілік затқа елеулі жағымсыз реакция анықталған немесе осы бөлімде сипатталмаған жаңа жағымсыз реакция пайда болған кезде Ұлттық фармакологиялық қадағалау жүйесіне сәйкес хабарлауды сұраймыз.
Қолдануға болмайтын жағдайлар
- цитиколинге немесе препараттың қосымша компоненттерінің кез келгеніне аса жоғары сезімталдық
- парасимпатикалық жүйке жүйесінің гипертониясы бар пациенттер
Дәрілермен өзара әрекеттесуі
Цитиколин құрамында леводопа бар препараттардың әсерін күшейтеді.
Препаратты құрамында центрофеноксин немесе меклофеноксат бар дәрілік заттармен бір мезгілде тағайындауға болмайды.
Айрықша нұсқаулар
Вена ішіне баяу (дозаға байланысты 3-тен 5 минутқа дейін) енгізілуі тиіс.
Вена ішіне тамшылатып инфузия түрінде енгізген кезде перфузия жылдамдығы минутына 40-тан 60 тамшыға дейін болуы тиіс.
Персистирлеуші бас сүйек ішіне қан құйылу жағдайында вена ішіне өте баяу енгізе отырып (минутына 30 тамшы) күніне 1000 мг дозадан аспауы керек.
Педиатрияда қолдану
Балаларда қолдану тәжірибесі шектеулі. Сондықтан, күтілетін пайдасы кез келген ықтимал қаупінен асып түскенде ғана препаратты қолдану керек.
Жүктілік және лактация кезінде қолдану
Жүктілік кезінде препаратты қолдану анаға пайдасы шарана үшін ықтимал қаупінен асып түскен жағдайда ғана мүмкін болады.
Лактация кезеңінде препаратты қолдану қажет болғанда бала емізуді тоқтату туралы мәселені шешу керек.
Автокөлікті жүргізу және механизмдерді басқару қабілетіне әсері: препарат автокөлікті жүргізу және психомоторлық реакциялардың жоғары жылдамдығын талап ететін механизмдерді басқару қабілетіне әсер етпейді.
Артық дозалануы
Препараттың уыттылығы төмен болғандықтан, тіпті емдік дозадан асып түскен жағдайда да уыттану жағдайлары күтілмейді.
Кездейсоқ артық дозаланғанда симптоматикалық ем тағайындалады.
Шығарылу түрі және қаптамасы
4.0 мл препараттан түссіз шыны ампулаларға құйылады.
5 ампуладан поливинилхлоридтен жасалған пішінді ұяшықты қаптамаға салынады.
1 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.
Сақтау шарттары
25 °С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
5 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші
Идол Илач Долум Сан. ве Тидж. А.Ш
Топкапы, Давутпаша Джад., Джебеалибей Сок., №20, Стамбул, Түркия
Тіркеу куәлігінің ұстаушысы
РОТАФАРМ ИЛАЧЛАРЫ ЛИМИТЕД ШИРКЕТИ
Стамбул, Түркия
Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері
«TROKA-S PHARMA» ЖШС,
ҚР, Алматы, Түрксіб ауданы, Сүйінбай даңғ., 222 б
Тел/факс: 8(7272) 529090
www.worldmedicine.kz
Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері
«TROKA-S PHARMA» ЖШС, Алматы, Сүйінбай даңғ., 222б
Ұялы тел +7 701 786 33 98, (24 сағат бойы).
e-mail: pvpharma@worldmedicine.kz