Ретровир® (10 мг/мл)

• русский
• қазақша

• Скачать инструкцию медикамента

Саудалық атауы

Ретровир®

Халықаралық патенттелмеген атауы

Зидовудин

Дәрілік түрі

Ішуге арналған 10 мг/мл, 200 мл ерітінді

Құрамы

5 мл ерітіндінің құрамында

белсенді зат – 50 мг зидовудин,

қосымша заттар : гидрогенизирленген глюкоза шәрбаты, глицерин, сусыз лимон қышқылы1, натрий бензоаты, натрий сахарині, құлпынай хош иістендіргіші, «ақ қант» хош иістендіргіші,тазартылған су.

1 – сусыз лимон қышқылы орнына лимон қышқылы моногидраты пайдаланылуы мүмкін

Сипаттамасы

Мөлдір ақшыл-сары құлпынайға тән иісі бар ерітінді.

Фармакотерапиялық тобы

Вирусқа қарсы жүйелі қолдануға арналған препараттар. Нуклеозидтер –кері транскриптаза тежегіштері. Зидовудин.

АТХ коды J05AF01

Фармакологиялық қасиеттері

Фармакокинетикасы

Ересектердегі фармакокинетикасы

Сіңуі

Зидовудин ішектен жақсы сіңеді. Биожетімділігі 60-70% құрайды. Зидовудин ерітіндісін 5мг/кг дозада ішке қабылдағаннан кейін орташа тепе тең ең жоғары Css max және Css min концентрациясы әрбір 4 сағат сайын тиісінше 7.1 және 0.4 мкМ (немесе 1.9 және 0.1 мкг/мл) құрайды.

Зидовудин жасушалық тимидинкиназа көмегімен жұқпаланған жасушаларда және жұқпаланбаған жасушаларда да монофосфатты (МФ) туындыларға дейін фосфорланады.

Таралуы

Ересектерде ішу арқылы қабылдағаннан кейін 2-4 сағат өткеннен соң жұлын сұйықтығы мен қан плазмасындағы зидовудин концентрациясының орташа арақатынасы 0,5 құрайды, ал балаларда 0,5-4 сағаттан соң ол көрсеткіш 0,52-0,85-ке теңеседі. Зидовудин плацента арқылы өтіп және амниотикалық сұйықтықтан және ұрықтың қанынан табылады. Зидовудин сондай-ақ спермадан және емшек сүтінен табылды. Препараттың қан плазмасындағы ақуыздармен байланысуы – 34 – 38 % құрайды, тиісінше басқа препараттармен орын басу механизмі бойынша бәсекелес байланысуы болжанбайды.

Метаболизм

5'-глюкуронид зидовудиннің негізгі метаболиті болып саналады, ол плазмадан да және несептен де табылады, оның мөлшері бүйрек арқылы шығарылатын препарат дозасының шамамен 50-80 %-ын құрайды.

Шығарылуы

Жартылай шығарылудың орташа кезеңі, орташа жалпы клиренсі және таралу көлемі, тиісінше, 1.1 сағат, 27.1 мл/мин/кг және 1.6 л/кг құрайды.

Зидовудиннің бүйректік клиренсі креатинин клиренсінен әлдеқайда жоғары, бұл оның шығарылуы негізінен өзекшелік секреция көмегімен жүретіндігін көрсетеді.

Балалардағы фармакокинетикасы

Жасы 5-6 айлықтан асқан балалардағы фармакокинетикалық көрсеткіштері ересектердегі осындай көрсеткіштерге ұқсас.

Зидовудин ішектен жақсы сіңеді, биожетімділігі 60-74%, орташа алғандағы мәні 65 % құрайды.

Зидовудин ертіндісін дене беткейінің әр 120 мг/ м2 және 180 мг/ м2 дозада ішке қабылдағаннан кейін Css max деңгейі тиісінше 1.19 мкг/ мл (4.45 мкМ) және 2.06 мкг/мл (7.7мкМ) құрайды.

Негізгі метаболиті 5'-глюкуронид болып табылады. Зидовудиннің бүйректік клиренсі креатинин клиренсінен әлдеқайда жоғары, бұл оның шығарылуы негізінен өзекшелік секрецияның көмегімен жүретіндігін көрсетеді. Жасы 14 күнге толмаған жаңа туған нәрестелерде зидовудиннің глюкуронизациялануы төмендеп, бұдан әрі оның биожетімділігінің артуына, клиренсінің төмендеуіне және жартылай шығарылу кезеңінің ұзаруына ұласады. Жасы 14 күннен асқан балаларда зидовудиннің фармакокинетикасы ересектердікіне ұқсас.

Ересектер

Жасы 65 жастан асқан емделушілерде фармакокинетикасын тексеру бойынша зерттеулер жүргізілмеген.

Бүйрек функциясы бұзылғанда

Бүйректің ауыр жеткіліксіздігіне шалдыққан емделушілерде зидовудиннің қан плазмасындағы ең жоғарғы концентрациясы бүйрек функциясы бұзылмаған емделушілердегі концентрациясымен салыстырғанда 50 %-ға жоғарылаған. Препараттың жүйелік экспозициясы (уақыт-концентрация арақатынасы қисығы астындағы аудан арқылы анықталады) 100 %-ға жоғарылаған, препараттың жартылай шығарылу кезеңі елеулі өзгермейді. Бүйрек қызметінің жеткіліксіздігі жағдайында негізгі метаболит глюкуронидтің едәуір жиналып қалғаны байқалады, бірақ мұндайда уытты әсер ету белгілері білінбейді. Гемодиализ және перитонеальді диализ зидовудиннің шығарылуына ықпал етпейді, дегенмен мұндайда глюкуронидтердің шығарылуы күшейеді.

Бауыр функциясы бұзылғанда

Бауыр қызметінің жеткіліксіздігі кезінде глюкуронизацияның төмендеуі салдарынан зидовудиннің жинақталып қалғаны байқалады, бұл препараттың дозасын түзетуді қажет етуі мүмкін, бірақ деректердің шектеулі болуына байланысты емделушілердің бұл категорияларына нақты ұсыныстар жоқ.

Жүкті әйелдер

Жүктіліктің соңғы триместріндегі әйелдердегі зидовудин фармакокинетикасы бойынша деректер бар. Жүктілік мерзімі ұлғайған сайын зидовудиннің кумуляциясының тиімділігі байқалмады. Зидовудин фармакокинетикасы жүкті емес әйелдердегі деректерге сәйкес болды. Зидовудиннің плацента арқылы пассивті өту механизміне байланысты оның ұрық плазмасындағы концентрациясы анасының плазмасындағы концентрациясына сәйкес болады.

Фармакодинамикасы

Ретровир® – адамның иммунитет тапшылығы вирусын (АИВ) қоса есептегенде, ретровирустарға қатысты белсенділігі жоғары, вирустарға қарсы препарат.

Зидовудин-монофосфаттың одан әрі ди және трифосфатқа (ТФ) дейін фосфорлануы жасушалық тимидинкиназа және спецификалық емес киназалармен тиісінше катализденеді.

Зидовудин трифосфаты (ТФ) вирустың кері транскриптазасы үшін тежегіш және субстрат ретінде әсер етеді. Вирустық ДНҚ-ның түзілуі оның тізбегіне зидовудин-ТФ енгізу арқылы бөгеледі, бұл тізбектің үзілуіне әкеледі. АИВ кері транскриптазасы үшін зидовудин-ТФ бәсекелесуі адамның жасушалық ДНҚ α-полимеразасымен салыстырғанда шамамен 100 есе күшті. Ретровир® басқа вирустарға қарсы препараттарға қатысты (ламивудин, диданозин, интерферон-альфа, абакавир) антагонизмге ие емес.

АИВ жанасудан кейінгі профилактика

АИВ-жұқтырылған қанмен кездейсоқ әсерінің АИВ жұқпасы берілуінің профилактикасы бойынша халықаралық қағидалары, мысалы, инемен шаншығанда, зидовудинмен және ламивудинмен (Эпивир™) біріктірілген емді әсер етуден кейін 1-2 сағат ішінде бастау ұсынылады.

Жұқтырудың тым жоғары қаупі жағдайында емдеу режиміне протеаза тежегіштерін қосу керек. Төрт апта бойы антиретровирустық профилактиканы жалғастыру ұсынылады. Аталған ұсынысты демеу үшін бақыланатын клиникалық зерттеулер шектеулі. Антиретровирустық препараттармен тиісінше емдеуге қарамастан сероконверсиялау жүргізілуі мүмкін.

Қолданылуы

- балалар мен ересектерде АИВ-жұқпасын емдеу үшін біріктірілген антиретровирустық ем құрамында

- АИВ-тің АИВ-позитивті жүкті анадан ұрыққа трансплацентарлы берілу жиілігін азайту үшін

Қолдану тәсілі және дозалары

Ретровир® препаратымен емдеуді АИВ жұқтырған емделушілерді емдеу тәжірибесі бар дәрігер жүргізуі тиіс.

Ересектер және салмағы 30 кг-дан жоғары жасөспірімдер

Басқа антиретровирусты препараттармен біріктірілімде ұсынылатын препарат дозасы тәулігіне екі рет 250-300 мг құрайды.

Салмағы 9 кг-дан 30 кг дейін болатын балалар

Басқа антиретровирусты препараттармен біріктірілімде ұсынылатын препарат дозасы 9 мг/кг-дан тәулігіне екі ретті құрайды. Ең жоғары доза тәулігіне екі рет 300 мг аспауы тиіс.

Салмағы4 кг-дан 9 кг дейін болатын балалар

Басқа антиретровирусты препараттармен біріктірілімде ұсынылатын препарат дозасы 12 мг/кг-дан тәулігіне екі ретті құрайды.

Дене салмағы 4 кг-дан аз балаларға ұсыныстар жоқ.

АИВ жұқпасының анадан ұрыққа берілуінің алдын алуға

Аурудың алдын алудың 2 сызбасы тиімді.

• Жүкті әйелдерге Ретровир® препаратын жүктіліктіктің 14 аптасынан бастап босану басталғанға дейін тәулігіне 500 мг дозада (100 мг-нан тәулігіне 5 рет) ішуге тағайындау ұсынылады. Босану кезінде Ретровир® препаратын көктамыр ішіне 1 сағат бойына дене салмағының әр кг-на 2 мг дозада тағайындайды, содан соң кіндікке қысқыш салған кезге дейін 1мг/кг/сағат дозасында көктамырішілік инфузияны жалғастыру керек. Жаңа туған балаларға туылғаннан кейін алғашқы 12 сағаттан 6 аптаға дейін әрбір 6 сағатта Ретровир® ерітінді түрінде 2 мг/кг есебімен ішке қабылдауға тағайындалады. Дозаны дәл анықтау үшін дозалағыш еккіштің қолайлы өлшемін пайдалану керек. Егер жаңа туған балалар Ретровир® препаратын ішке қабылдай алмаса, онда оларға Ретровирді® әрбір 6 сағатта дене салмағына 1.5 мг/кг дозада көктамыр ішіне 30 минуттық инфузия түрінде тағайындау керек.

• Жүктіліктің 36 аптасынан бастап босану басталғанға дейін Ретровир® препаратының дозасын 300 мг-нан тәулігіне 2 рет беріп, содан соң босану аяқталғанға дейін әрбір 3 сағат сайын 300 мг-дан қолдану ұсынылады.

  Қолдану бойынша нұсқаулық

  Дәлірек дозалау үшін қаптамаға салынған дозалағыш- еккішті пайдаланыңыз.

• Құтыны ашыңыз және қақпақты қоя тұрыңыз.

• Құтыны мықты ұстап тұрып, пластик адаптерді құты мойнына бекітіңіз.

• Дозалағыш еккішті адаптерге тығыз кигізіңіз.

• Құтыны төңкеріңіз.

• Еккіштің поршенін кейін тартыңыз және Сізге ұсынылған дозаның бірінші бөлігін тартып жинаңыз.

• Құтыны төңкеріңіз және еккішті адаптерден ажыратыңыз.

• Еккіш поршенін оның негізіне қарай баяу қозғай отырып, еккіштен тікелей ауыз қуысындағы беттің ішкі беткейіне бағыттап препараттың барлығын енгізіңіз. Бұл манипуляция Сіздің жұтынғанда қиналыс туындатпай ерітіндіні жұтуыңызға мүмкіндік береді. Поршеньді өте қатты баспаңыз және препаратты жұтқыншақтың артқы қабырғасына қарай өте тез енгізбеңіз, бұл жөтел рефлексі туындауына алып келуі мүмкін.

• Осылайша барлық ұсынылған доза қабылданып біткенше 3-7 қадам жасаңыз.

• Еккішті құтыға қалдырмаңыз. Адаптер мен еккішті құтыдан алып шығыңыз және оларды таза сумен мұқият жуыңыз. Еккіш пен адаптердің оларды қайта пайдаланғанға дейін құрғағанына көз жеткізіңіз.

• Құтыны қақпақпен мұқият жабыңыз.

  Бүйрек жеткіліксіздігі

  Бүйрек қызметінің ауыр жеткіліксіздігінде тәулігіне ұсынылатын препарат дозасы 300-400 мг құрайды. Шеткергі қан тарапынан болатын реакцияларға және клиникалық әсерлеріне қарай дозаға бұдан әрі де түзету енгізілуі талап етілуі мүмкін. Гемодиализ және перитонеальді диализ зидовудиннің элиминациясына әсер етпейді, сонымен бірге глюкуронидтің шығарылуы күшейеді. Бүйрек қызметі жеткіліксіздігінің терминальді сатысындағы, гемодиализде немесе перитонеальді диализдегі емделушілер үшін Ретровир® препаратының ұсынылатын дозасы – әрбір 6-8 сағат сайын 100мг құрайды.

  Бауыр жеткіліксіздігі

  Бауыр циррозы бар емделушілерден алынған деректер глюкуронизация төмендеуі салдарынан зидовудиннің жинақталуы мүмкіндігін болжайды, бұл препарат дозасын түзетуді талап етуі мүмкін, бірақ деректердің шектеулі болуына байланысты емделушілердің аталған категориясы үшін нақты ұсыныстар жоқ. Егер плазмада зидовудиннің деңгейіне бақылау жасау мүмкін болмаса, онда дәрігер аурудағы препарат жақпауының клиникалық белгілеріне ерекше көңіл бөлгені жөн және қажет болған жағдайда дозаға түзету енгізу және/немесе дозаларды енгізу аралығын ұзарту керек.

  Қан түзу ағзалары тарапынан болатын жағымсыз реакциялар.

  Ретровир® препаратының дозасын өзгерту немесе оны қабылдауды тоқтату қан түзу ағзалары тарапынан болатын жағымсыз реакциялары бар, мысалы, гемоглобин мөлшері 7.5-9.0 г/дл-ге (4.65-5.59 ммоль/л) азайған немесе нейтрофилдердің саны 0.75-1.0 х 109/л-ге дейін төмендейтін емделушілерде қажет етілуі мүмкін.

  Егде жастағы емделушілерде

  65 жастан асқан емделушілерде зидовудиннің фармакокинетикасы зерттелген жоқ. Алайда жасқа байланысты бүйрек функциясының төмендеуін, шеткергі қан көрсеткіштерінде болуы мүмкін өзгерістерді есепке ала отырып, мұндай емделушілерге Ретровир® препаратын тағайындаған кезде аса сақтық танытып және препаратпен емдеуді бастарда және емдеу кезінде тиісті бақылау жасалуы керек.

Жағымсыз әсерлері

Жағымсыз әсерлерінің профилі ересектер мен балаларда ұқсас.

Өте жиі (>1/10), жиі (>1/100, <1/10), жиі емес (>1/1,000, <1/100), сирек (>1/10,000, <1/1,000), өте сирек (<1/10,000).

Өте жиі

- бас ауруы

- жүрек айнуы

Жиі

- анемия (гемотрансфузияны қажет етуі мүмкін), нейтропения және лейкопения; бұл жағдайлар Ретровирдің® жоғарғы дозасын қабылдаған кезде (тәулігіне 1200-1500 мг) және ауыр дәрежелі АИВ жұқпасы бар емделушілерде (әсіресе, емді бастағанға дейін сүйек кемігінің қоры азайған емделушілерде), көбіне CD4 жасушаларының саны 100/мм3 кем болғанда; мұндай жағдайда Ретровирдің® дозасын төмендету немесе оны тоқтату талап етілуі мүмкін; нейтропенияның даму жиілігі емдеудің басында сарысудағы нейтрофилдер санының, гемоглобин мен B12 витамині мөлшерінің азаюы байқалған емделушілерде арта түседі

- гиперлактатемия

- бас айналуы, дімкәстік

- құсу, іш аумағының ауыруы, диарея

- билирубин деңгейінің және бауыр ферменттерінің жоғарылауы

- миалгия

Жиі емес

- тромбоцитопения және панцитопения (сүйек кемігінің гипоплазиясымен)

- ентігу

- метеоризм

- тері бөртпесі, тері қышымасы

- миопатии

- қызба, ауыру синдромы, астения

Сирек

- қызыл өскіннің аплазиясы

- сүт қышқылды ацидоз

- анорексия

- май қабаттарының жинақталуы/ қайта таралуы (мультифакторлық этиологияға ие, ішінара антиретровирустық препараттармен біріктірілген емді пайдалану)

- ұйқысыздық, парестезиялар, ұйқышылдық, ойлау жылдамдығының төмендеуі, құрысулар

- кардиомиопатия

- ауыз қуысының шырышты қабатының пигментациясы, дәм сезінудің бұзылуы, диспепсия, панкреатит

- стеатозды айқын гепатомегалия

- тырнақтардың және терінің пигментациясы, есекжем және терлеудің күшеюі

- кіші дәреттің жиілеуі

- гинекомастия

- қалтырау, кеуде қуысының ауыруы, тұмауға ұқсас симптомдар

- жөтел

-мазасыздық, депрессия

Өте сирек

- апластикалық анемия

Бірнеше апта емдеуден кейін Ретровирге® жүректің айнуы және өте кең таралған басқа да жағымсыз әсерлердің пайда болуы азаяды.

АИВ жұқпасының анадан ұрыққа берілуінің алдын алу үшін Ретровирді® қолданғанда пайда болатын жағымсыз реакциялар

Балаларда гемоглобиннің төмендегені байқалады, алайда бұл гемотрансфузия жүргізуді қажет етпейді. Ретровир® препаратымен емдеуді аяқтағаннан кейін 6 апта ішінде анемия жоғалады. Ретровир® препаратын жаңа туған нәрестелердегі және in utero қолданудың кейіннен білінетін зардаптары белгісіз.

Қолдануға болмайтын жағдайлар

- зидовудинге немесе препараттың кез келген басқа компонентіне өте жоғары сезімталдық

- нейтропения (нейтрофилдер саны 0.75х 109/ л-ден аз болса)

- гемоглобин деңгейінің төмендеуі (7.5 г/дл немесе 4.65 ммоль/ л-ден аз болса)

- дене салмағы 4 кг төмен және 3 айға дейінгі балаларға

- лактация кезеңі

Сақтықпен: бауыр жеткіліксіздігі

Дәрілермен өзара әрекеттесуі

Зидовудин көбіне белсенді емес метаболит түрінде бауыр метаболизмі арқылы шығарылатындықтан әсер ету механизмі (глюкоронизация) осыған ұқсас препараттар Ретровир® метаболизмін потенциалды бәсеңсіте алады.

Төменде көрсетілген препараттардың өзара әрекеттесуі тізімінен бәрі де көрсетілді деп санамаған жөн, алайда олар зидовудинмен бірге қолданылғанда сақтық танытуды қажет ететін препараттарға тән.

Атоваквон: зидовудин атоваквонның фармакокинетикасын бұзбайды. Алайда, фармакокинетика деректері атоваквон зидовудиннің оның 5'-глюкуронид метаболитіне метаболиздену жылдамдығын төмендететінін көрсетеді (AUC зидовудин мақсатты концентрациясына жеткенде 33% жоғарылады, глюкуронидтің плазмалық шыңдық концентрациясы 19% төмендеді). Зидовудинді тәулігіне 500 немесе 600 мг дозада жедел пневмоцистік пневмонияны емдеу үшін атоваквонмен бір уақытта үш апталық емге қолдану зидовудиннің плазмалық концентрациясының жоғарылауына байланысты жағымсыз реакциялар жылдамдығын жоғарылатуға алып келу ықтималдығы аз. Атоваквонмен ұзақ уақыт емдеу аясында аса сақ болу керек.

Кларитромицин: кларитромицин таблеткалары зидовудин сіңуін төмендетеді. Зидовудин мен кларитромицинді кемінде екі сағат аралықпен жеке-жеке қабылдау жолымен бұны болдырмауға болады.

Ламивудин: ламивудинмен бірге тағайындағанда зидовудиннің С max (28 %) орташа жоғарылауы байқалады, алайда жалпы экспозициясы (AUC) мұндайда бұзылмайды. Зидовудин ламивудиннің фармакокинетикасына ықпалын тигізбейді.

Фенитоин: қанда фенитоинның концентрациясын төмендетеді, бұл оны Ретровирмен® бірге тағайындағанда қандағы фенитоинның деңгейін бақылап отыруды қажет етеді.

Пробеницид: зидовудиннің глюкуронизациясын төмендетеді және оның AUC мен орташа жартылай шығарылу кезеңін арттырады. Пробеницидтің қатысуымен глюкуронидтің және зидовудиннің өзінің бүйрек арқылы экскрециялануы төмендейді.

Рифампицин: Рифампицинмен біріктіру зидовудиннің AUC 48 %+34 % төмендеуіне алып келеді, бірақ бұл өзгерістің клиникалық мәні белгісіз.

Ставудин: Зидовудин ставудиннің жасушаішілік фосфорлануын төмендетуі мүмкін, осыған байланысты препараттарды үйлестіре қолдану ұсынылмайды.

Басқалары: мынандай дәрілік заттар: аспирин, кодеин, метадон, морфин, индометацин, кетопрофен, напроксен, оксазепам, лоразепам, циметидин, клофибрат, дапсон, изопринозин бауырда глюкуронизацияны бәсекелі түрде тежеу немесе микросомальді метаболизмді тікелей басу арқылы, зидовудиннің метаболизмін бұзуы мүмкін. Осы препараттарды Ретровирмен® бірге қолдану мүмкіндігіне, әсіресе ұзақ уақыт қолданғанда, сақтық танытқан жөн. Ретровирді® әсіресе потенциалды түрде нефроуытты және миелоуытты деп саналатын препараттармен (мысалы, пентамидинмен, дапсонмен, пириметаминмен, ко-тримоксазолмен, амфотерицинмен, флюцитозинмен, ганцикловирмен, интерферонмен, винкристинмен, винбластинмен, доксорубицинмен) бірге шұғыл ем кезінде біріктіру Ретровирге® жағымсыз реакциялардың даму қаупін арттырады. Бүйрек функциясын және қан көрсеткіштерін қадағалап, егер керек болса, препараттың дозасын төмендету қажет.

Оппортунистік жұқпаларды ко-тримоксазол, аэрозол түріндегі пентамидин, пириметамин және ацикловир препараттарымен емдеу Ретровирдің® жағымсыз реакцияларының пайда болу жиілігінің елеулі қаупімен қатар жүрмейді.

Резистенттілігі

Тимидин аналогтарына (зидовудин – олардың бірі) резистенттіліктің дамуы АИВ кері транскриптазаның 6 кодонындағы (41, 67, 70, 210, 215 и 219) спецификалық мутацияның біртіндеп пайда болуы нәтижесінде жүреді. Вирустар 41 және 215 кодондарындағы мутация біріктірілімі немесе ең кемі 6 мутацияның 4 бойынша жинақталу нәтижесінде тимидин аналогтарына фенотиптік резистенттілікке ие болады. Мутациялар басқа нуклеозидтарға айқаспалы резистенттілік туындатпайды, бұл АИВ жұқпаларын емдеу үшін кері транскриптазаның басқа тежегіштерін қолдануға мүмкіндік береді.

Мутацияның екі түрі көптеген дәрілік резистенттілік дамуына алып келеді.

Мутацияның бір жағдайында 62, 75, 77, 116 және 151 кодондарында АИВ кері транскриптазасы жүреді, және екінші жағдайда сөз азотты негіздің 6-шы жұбы қалпына осы позицияға сәйкес кірістірмесі бар T69S мутация туралы, бұл зидовудинге, сондай-ақ кері транскриптазаның басқа нуклеозидті тежегіштеріне фенотиптік резистенттілік пайда болуымен қатарлас жүреді.

Осы мутациялардың екі түрі де АИВ жұқпасындағы емдеу мүмкіндіктерін елеулі шектейді. Зидовудинге сезімталдықтың төмендеуі Ретровирмен® АИВ жұқпасын ұзақ емдеуде байқалды. Қолда бар деректер АИВ жұқпасының ерте сатыларында сезімталдықтың жиілігі мен дәрежесі төмендеуі аурудың кешеуілдеген сатыларына қарағанда in vitro едәуір аздығын көрсетеді.

Қазіргі кезде зидовудинге in vitro сезімталдығы мен емнің клиникалық әсері арасындағы байланыс әлі зерттелмеген. Зидовудинді ламивудинмен біріктірілімде қолдану, егер емделушіге бұрын антиретровирусты терапия жүргізілмесе, сондай жағдайда ғана зидовудинге вирустың резистентті штамдарының пайда болуын іркеді. Зидовудин біріктірілген антиретровирусты терапияда кері транскриптазаның басқа нуклеозидты тежегіштерімен және басқа топтың препараттарымен (протеаза тежегіштерімен, кері транскриптазаның нуклеозидты емес тежегіштерімен) бірге қолданылады.

Айрықша нұсқаулар

Емделушілер Ретровир® препаратын емдеуші дәрігерді хабардар етпей басқа препараттармен бір мезгілде қолданудың қауіптілігі жөнінде және Ретровир® препаратын қолдану АИВ жұқпасының жыныстық қатынас немесе жұқпаланған қан арқылы жұғуының алдын ала алмайтындығы жөнінде хабардар болуы тиіс. Мұндайда тиісті қауіпсіздік шаралары қажет болады.

Ретровир® АИВ жұқпасын емдеп жаза алмайды, және иммунитетті бәсеңсіте отырып, емделушілер арасында оппортунистік жұқпалар мен қатерлі ісіктер пайда болатын аурудың толық көрінісінің даму қаупі қоса сақталады. Препараттың оппортунистік жұқпалардың даму қаупін төмендететіні көрсетілген, алайда лимфоманы қоса, жаңа түзілімдер дамуы бойынша деректер шектеулі. АИВ жұқпасының кешеуілдеген сатысында ем қабылдаған емделушілерде бар деректер лимфома дамуы емделмеген емделушілердегіге ұқсас екенін көрсетеді. Ұзақ уақыттық терапияда жүрген АИВ ауруының ерте сатысындағы емделушілерде лимфома дамуының қаупі белгісіз. Халықаралық нұсқауларға сай, АИВ-жұқтырған қан арқылы абайсызда жұқтырған кезде шұғыл түрде, жұқтырғаннан кейінгі алғашқы 1-2 сағаттың ішінде, Ретровир® және Эпивир препараттарымен біріктірілген ем тағайындау керек. Жұқтыру қаупі жоғары болған жағдайда емдеу үлгісіне протеаза тежегіштері тобына жататын препараттар енгізілуі тиіс. Алдын алу емін 4 апта бойы жүргізу керек. Емнің осындай антиретровирустық препараттармен тез басталғанына қарамай-ақ, серологиялық конверсия бәрібір болуы мүмкін. Ретровирдің® жағымсыз реакциялары ретінде қабылданатын симптомдар негізгі аурулардың белгісі немесе АИВ жұқпаларын емдеу үшін қолданылатын басқа препараттарды қабылдағанға реакциялар болуы мүмкін. Дамыған симптомдар мен Ретровирдің® әсерінің өзара байланысын, әсіресе АИВ жұқпаларының клиникалық толық картинасында анықтау өте қиын. Бұндай жағдайларда препараттың дозасын төмендету немесе оның тоқтатылуы мүмкін.

Қан тарапынан болатын жағымсыз реакцялар

Анемия (әдетте Ретровир® препаратын бастап қолданғаннан кейін 6 аптадан соң байқалады, бірақ кейде одан да ерте пайда болуы мүмкін); нейтропения (әдетте Ретровир® препаратымен емдеуді бастағаннан кейін 4 аптадан соң дамиды, кейде одан да ерте пайда болады); лейкопения Ретровирді®, әсіресе жоғарғы дозада (тәулігіне 1200 мг - 1500 мг), қабылдап жүрген және емді бастағанға дейін сүйек кемігінде қанның түзілуі төмендеген, АИВ жұқпасының клиникалық көрінісі толық емделушілер арасында кездесуі мүмкін.

Ретровирді® қабылдау кезінде АИВ -жұқпасының толық клиникалық көрінісі бар емделушілерде емнің алғашқы 3 айы ішінде 2 аптада кем дегенде бір рет, содан кейін ай сайын қан талдауларын қадағалап отыру қажет. ЖИТС-тің бастапқы сатыларында (сүйек кемігінің қан түзуі әлі де қалыпты жағдайда болғанда) қан тарапынан жағымсыз реакциялардың дамуы сирек, сондықтан қан талдауы емделушінің жалпы жағдайына байланысты сирек, 1-3 айда бір рет жүргізіледі. Егер гемоглобиннің мөлшері 75-90 г/л-ге (4.65-5.59 ммоль/л) дейін төмендесе, нейтрофильдер саны 0.75x109/л -1.0x109/л төмендейді, онда Ретровирдің® тәуліктік дозасы қан көрсеткіштері қалпына келгенше азайтылуы тиіс, немесе Ретровир® қабылдауды қан көрсеткіштері қалпына келгенше 2-4 аптаға тоқтатады. Әдетте қан көрінісі 2 аптадан кейін қалпына келеді, одан соң Ретровир® препараты төмен дозаларда қайтадан тағайындалуы мүмкін. Ретровирдің® дозасын төмендеткенге қарамастан, айқын анемиясы болған емделушілер қан құюды қажет етеді.

Сүтқышқылды ацидоз және стеатозды айқын гепатомегалия.

Сүтқышқылды ацидоз және бауырдың майлы дистрофиясы бар айқын гепатомегалия, оның ішінде өліммен аяқталатыны бар, нуклеозидтардың антиретровирустық аналогтарын моноем режимінде, сондай-ақ Ретровир® препаратымен біріктірілімде қолданғанда тіркелген. Мұндай асқынулардың даму қаупі әйелдерде арта түседі. Гепатиті бар немесе гепатиті жоқ (бұған гепатомегалию және стеатоз кіруі мүмкін, тіпті трансаминаз-маркерлер деңгейі жоғарылауы болмаған жағдайда да) сүтқышқылды ацидоздың клиникалық (жалпы әлсіздік, анорексия, дене салмағын күрт және түсініксіз жоғалту, гастроинтестинальді симптомдар, ентігу, тахипноэ) немесе зертханалық белгілері пайда болған барлық жағдайларда Ретровирді® қолдануды тоқтатқан жөн.

Бауыр жеткіліксіздігі дамуы үшін белгілі қауіп факторлары бар емделушілерге Ретровир® препаратын сақтықпен қолдану керек.

Май қабаттарының қайта таралуы

Біріктірілген антиретровирусты ем қабылдаушыларда май қабатының жинақталуы/қайта таралуы, орталықтық семіруді қоса алғанда, дорсоцервикальді типті (буйвол өркеші) семіру, бет аумағын қоса шеткергі жиналуы, гинекомастия, қанда липидтер және глюкоза деңгейінің жоғарылауы кейбір емделушілерде жеке түрде немесе бірге бақыланды

Сонымен қатар протеаза тежегіштері және кері транскриптазаның нуклеозидты тежегіштері тобының барлық препараттары липодистрофияның жалпы синдромына біріктірілген жоғарыда аталған жағымсыз әсерлердің біреуінде немесе одан көбінде ассоцияланатындықтан деректер тиісті терапевтік кластардың жеке топтары арасында қауіп дәрежесінің айырмашылығы бар екенін көрсетеді.

Бұдан басқа липодистрофия синдромына көп факторлық тән: АИВ ауруы статусы, жасының үлкендеу болуы және антиретровирусты терапия жүргізілу уақытының ұзақтығы, бәрі жиналып синергетикалық рөл атқаруы мүмкін.

Қазіргі уақытта бұл әсерлердің ұзақ мерзімдік салдары анықталмаған. Майдың қайта таралу белгілерін физикальді бағалау клиникалық зерттеуге енуі тиіс. Қандағы сарысулық липидтер мен глюкоза деңгейін анықтау туралы мәселені шешу керек. Липидтер деңгейінің бұзылуы тиісті клиникалық шешімді талап етеді.

Иммунитеттің қалпына келуінің қабыну синдромы

Күрделі иммунитет тапшылығы бар АИВ жұқтырған емделушілерде антиретровирусты терапия (АРТ) басында симптомсыз немесе қалдық шартты-патогенді жұқпаларға қабыну реакциялары қатарлас аурулардың клиникалық симптомдарының төмендеуін туындатуы мүмкін. Әдетте АРТ басталған бастапқы бірнеше апта немесе ай ішінде цитомегаловирусты ринит, жайылған және/немесе ошақты микобактериялық жұқпа және пневмоцистті пневмония байқалған. Кез келген қабыну симптомдары мезгілінде анықталуы тиіс және қажет болғанда қабынуға қарсы тиісті ем тағайындалғаны жөн.

Иммунитеттің қалпына келуінің қабыну синдромында аутоиммундық бұзылулар (полимиозит, Джуллиан-Барр синдромы, диффузды уытты зоб) туындау жағдайлары туралы хабарланған, алайда аурудың басталу уақыты жеткілікті түрде вариабельді және ем басталғаннан кейін бірнеше айларға дейін және атипиялық симптомдар қатысуымен жүруі мүмкін.

Қатарлас жүретін С гепатиті вирусы жұқпасы бар емделушілер

АИВ емдеуде АРТ құрамында Ретровирмен® үйлестіре емдеу аясында рибавирин қабылдауға байланысты анемия асқынуы бақыланған; өзара әрекеттесудің дәл механизмі анықталмаған. Рибавирин мен Ретровирді® бір мезгілге тағайындау ұсынылмайды, бұл арада АРТ режимі құрамында зидовудинді алмастыру туралы мәселені шешу керек.

Бұл сыртартқысында зидовудинмен емдеу аясында анемиясы болған емделушілерде ерекше маңызды.

Жүктілік және лактация кезеңі

Фертильділік

Ретровир® препаратының әйелдің бала туу функциясына әсері туралы деректер жоқ. Еркектерде Ретровир® препаратын қабылдау шәуһет құрамына, морфологиясына және сперматозоидтардың қозғалғыштығына әсер етпейді.

Жүктілік

Зидовудин плацента арқылы өтеді. Егер анаға келетін потенциалды пайда ұрық үшін болуы мүмкін қауіптен басым болса ғана, Ретровир® препаратын жүктіліктің 14 аптасына дейін қолдануға болады.

Жүктілік кезінде АИВ ұрыққа берілуінің алдын алу үшін Ретровир® препаратын қолдануды ойластырған жүкті әйелдер жүргізілген емге қарамастан ұрықтың жұқтыру қаупі болатыны туралы хабардар болуы тиіс.

АИВ жұқпасының анадан ұрыққа берілуінің алдын алу

Ретровирді жүктіліктің 14 аптасынан кейін қолдану, содан соң жаңа туған нәрестеге тағайындау АИВ жұқпасының анадан балаға берілу жиілігін төмендетеді. Ұрық сарысуында сүт қышқылы деңгейінің елеусіз және өтпелі жоғарылауы анықталды, бұл митохондриальді дисфункциядан туындауы мүмкін. Бұл фактінің клиникалық мәні белгісіз. Сондай-ақ аналары Ретровир® қабылдаған балаларда өте сирек жағдайларда дамуында іркіліс, құрысулар дамуы және басқа да неврологиялық бұзылулар туындауы туралы деректер бар, алайда препарат қабылдау мен аталған патология арасында тікелей өзара байланыс анықталмаған. Алынған деректер АИВ жұқпасының вертикальді берілуін болдырмау үшін Ретровирді® қолдану ұсыныстарына әсер етпейді. Ретровирді® жатыр ішінде немесе неонатальді кезеңде қабылдаған балаларда оның кейінгі зардаптары белгісіз. Канцерогендік әсерін толық жоққа шығаруға болмайды, жүкті әйелдер бұдан хабардар болуы тиіс.

Лактация

Вирусты жұқтырудан аулақ болу үшін, АИВ жұқпасы бар әйелдерге бала емізу ұсынылмайды, алайда басқаша тамақтандыру мүмкін болмағанда антиретровирусты емде жүрген әйелдердің бала емізу мүмкіндігін қарастыруда ресми ұсыныстарға жүгіну керек.

Ретровир® препаратын 200 мг дозада тағайындауда емшек сүтіндегі зидовудин концентрациясы плазма сарысуындағыға сәйкес болатынын ескеру керек. Зидовудинді тәулігіне екі рет 300 мг дозада қабылдағанда зидовудиннің плазмадағы және емшек сүтіндегі концентрациясының арақатынасы 0.4-3.2 құрады. Зидовудиннің сарысудағы орташа концентрациясы 24 нг/мл құрады. Еметін нәрестелердегі зидовудин трифосфатының (зидовудиннің белсенді метаболиті) жасуша ішілік құрамы анықталмағандықтан берілген заттың сарысудағы концентрациясының клиникалық мәні белгісіз.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Ретровир® препаратының автомобильді және басқа да механизмдерді басқару қабілетіне ықпалы зерттелген жоқ. Алайда осы қабілеттерге жағымсыз ықпалын тигізуі неғайбыл. Сонда да, автомобилді және басқа да механизмдерді басқару жөнінде мәселені шешкен кезде, Ретровир® препаратын қабылдаған кездегі емделушінің жағдайын және жағымсыз әсерлердің (бас айналу, ұйқышылдық, есеңгіреу, құрысулар) пайда болуы мүмкін екендігін ескерген жөн.

Артық дозалануы

Симптомдары: Ретровир® препаратымен артық дозалануда белгіленген қажығыштық, бас ауыруы, құсу және қан көрсеткіштері тарапынан сирек өзгерістер сияқты жағымсыз реакциялардан басқа спецификалық симптомдары немесе белгілері анықталмады.

Емдік концентрациялармен салыстырғанда зидовудиннің плазмадағы деңгейінің 16 есе артуы тіркелген, бұл қандай да бір клиникалық, биохимиялық немесе гематологиялық салдарлармен қатарлас жүрмеген.

Емі: емделушіде уыттану белгілерінің дамуына бақылау жасау және симптоматикалық демеуші ем. Зидовудинді ағзадан шығару үшін гемодиализ бен перитональді диализдің тиімділігі жоғары емес, бірақ оның метаболиті глюкуронидтің шығарылуын күшейтеді.

Шығарылу түрі және қаптамасы

Ішуге арналған 10 мг/мл, 200 мл ерітінді.

200 мл препараттан сары шыныдан жасалған шыны құтыларға салынады.

1, 5 немесе 10 мл көлемдегі дозалағыш еккішпен бірге 1 құтыдан, адаптермен және медицинада қолданылуы жөніндегі мемлекеттік және орыс тілдеріндегі нұсқаулықпен картон қорапқа салынған.

Сақтау шарттары

30 °С -ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

ГлаксоСмитКляйн Инк., Канада

(7333 Mississauga Road North, Mississauga, Ontario, Canada, L5N 6L4)

Қаптаушы

ГлаксоСмитКляйн Инк., Канада

(7333 Mississauga Road North, Mississauga, Ontario, Canada, L5N 6L4)

Тіркеу куәлігінің иесі

ViiV Healthcare ULC, Канада

(8455 Route Transcanadienne, Montreal, Quebec, Canada, H4S 1Z1)

Ретровир ViiV Healthcare компаниясы тобының тіркелген сауда белгісі болып табылады

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

Қазақстандағы ГлаксоСмитКляйн Экспорт Лтд өкілдігі

050059, Алматы қ., Фурманов к-сі, 273

Телефон нөмірі: +7 7019908566, +7 727 258 28 92, +7 727 259 09 96

Факс нөмірі: + 7 727 258 28 90

Электрондық поштасы: kaz.med@gsk.com