Ретинола ацетат (витамин А) 33000 МЕ (Retinol (vit A))

• русский
• қазақша

• Скачать инструкцию медикамента

Саудалық атауы

Ретинол ацетаты (А витамині) 33000 ХБ

Халықаралық патенттелмеген атауы

Ретинол

Дәрілік түрі

Капсулалар 33000 ХБ

Құрамы

Бір капсуланың құрамында

белсенді зат - ретинол ацетатына шаққанда ретинол ацетатының майлы ерітіндісі - 33000 ХБ (11.35 мг),

қосымша зат: күнбағыс майы,

қабығының құрамы: глицерин, метилпарагидроксибензоат, тазартылған су, хинолинді сары Е-104, желатин.

Сипаттамасы

Шар тәрізді пішінді, жұмсақ, желатинді сары түсті капсулалар.

Капсулалардың ішіндегісі – ашық сарыдан күңгірт сары түске дейінгі майлы сұйықтық. Ашыған иістің болуына жол берілмейді

Фармакотерапиялық тобы

Витаминдер. А және Д витаминдері және олардың біріктірілімдері. А витамині. Ретинол

АТХ коды А11СА01

Фармакологиялық қасиеттері

Фармакокинетикасы

Сіңуі

Өт қышқылдарымен эмульгацияланғаннан кейін асқазан-ішек жолынан сіңеді. Ішектің микротүктеріне түскен ретинол эстерификацияға ұшырайды. Түзілген ретинилпальмитат спецификалық липопротеидтерге қосылады, лимфа жолдарына өтеді және хиломикрондар құрамында бауырға түседі, бұл жерде жұлдызшалы ретикулоэндотелиоциттермен, ал сосын гепатоциттермен қармалады, мұнда хиломикрондар ретинилпальмитатты, ретинол мен ретинальді және одан түзілген ретиной қышқылын босата отырып ыдырайды. Ретинол спецификалық ақуызбен байланысады, қанға түседі, альбуминдермен жалғанады және түрлі ағзаға тасымалданады.

Таралуы

Ағзада біркелкі таралмайды: көп мөлшері бауыр мен торқабықта, аз мөлшері – бүйректе, жүректе, май деполарында, өкпеде, лактациялаушы сүт безінде, бүйрекүсті бездерінде және басқа ішкі сөлініс бездерінде болады. Жинақталуының басым түрі ретинолпальмитат болып табылады, оның қоры баяу, бірақ тұрақты жаңарып отырады. Тіндерде ретинол көбінесе микросомальді фракцияда, митохондрияларда, лизосомаларда, жасуша және органелла жарғақшаларында орналасады.

Шығарылуы

Ретинол, ретиналь, ретиной қышқылы өт құрамында гепатоциттермен бөлініп шығады, ретинилглюкуронид несеппен шығарылады. Ретинолдың шығарылуы баяу жүзеге асырылады, сондықтан ұзақ уақыт қайталап қабылдау жинақталуына, ары қарай А гипервитаминозына өтуіне алып келеді.

Фармакодинамикасы

Препарат ағзадағы А витаминінің тапшылығының орнын толтыруға арналған. Ретинолда қанықпаған байланыстар мөлшері көп, тотығу-тотықсыздану үдерісін белсенділендіреді, пуриндік және пиримидиндік негіздердің синтезін көтермелейді, аденозинтрифосфат синтезі үшін жағымды жағдай жасай отырып метаболизмді энергиямен қамтамасыз етуге қатысады.

Препарат шеміршек және сүйек тініндегі ақуыз синтезін жоғарылатады, бұл сүйектер ұзындығының өсуін анықтайды. Эпителизацияны көтермелейді және эпителийдің шамадан тыс мүйізденуінің (гиперкератоз) алдын алады. Эпителий жасушаларындағы митоздар мөлшерін жоғарылатады, оларда кератогиалиннің жинақталуына кедергі жасайды, жасушалық, субжасушалық және әсіресе лизосомалық жарғақшалардың өткізгіштігінде рөлі бар РНҚ мен сульфатталған мукополисахаридтер синтезіне ықпал етеді. Липофильділігінің арқасында, жарғақшалардың липидті қабығының ішіне орналасады, жарғақша липидтеріне модифицикациялаушы әсер етеді, липидті фазада тізбектік реакциялардың жылдамдығын бақылап отырады және түрлі тіндердің тотықтануға қарсы потенциалын тұрақты деңгейде демейді.

Жасушалық дифференциация үдерістерінің деңгейін анықтайтын жасушалардың беткейлік жарғақшалары гликопротеидтерінің биосинтезін реттейді.

Ағзаның жұқпаға төзімділігін арттырады. Антиденелердің түзілуін күшейтеді және фагоцитозды белсенділендіреді.

Ретинол көздің тор қабығының қалыпты қызметі үшін қажетті компонент болып табылады: ол қараңғыда көруге бейімделу үшін қажетті родопсин көру пурпураларын түзе отырып, опсинмен байланысады (торлы қабықтың қызыл пигментімен).

Бүйрекүсті безі қыртыстары гормондарының синтезін көтермелейді.

Май және тер бездерінің қалыпты қызмет атқаруын қамтамасыз етеді.

Қолданылуы

- А-гиповитаминозы және авитаминозында

- қызылшада, пневмонияда, дизентерияда, тұмауда, трахеитте, бронхитте

- үсуде, күйікте, жарада, ихтиозда, фолликулярлық дискератозда, кәрілік кератозда, тері туберкулезінде, экземаның кейбір түрлерінде, псориазда

- пигменттік ретинитте, ксерофтальмияда

- рахитте, гипотрофияда, жедел респираторлық ауруларында, созылмалы бронхөкпе ауруларында, асқазан-ішек жолының эрозиялы-ойық жаралы және қабынған зақымдануларында, бауыр циррозы, эпителиальді ісіктер мен лейкоздарда (қан түзетін тіндердің цитостатиктер әсеріне төзімділігін арттыру үшін) кешенді ем құрамында.

Қолдану тәсілі және дозалары

Ішке, тамақтан кейін 10-15 минуттан соң тағайындайды.

Жеңіл және орташа дәрежелі авитаминоздардағы емдік дозалары: ересектерге – тәулігіне 33000 ХБ, гемералопияда, ксерофтальмияда, пигменттік ретинитте - тәулігіне 50000 - 100000 ХБ. Тері ауруларында ересектерге тәулігіне 50000 - 100000 ХБ тағайындайды.

Ересектерге арналған жоғарғы бір реттік емдік дозасы 50000 ХБ, жоғарғы тәуліктік дозасы - 100000 ХБ. А витаминінің жоғарырақ дозаларын қолданғанда А гипервитаминозының даму мүмкіндігін ескеру керек.

Емдеу ұзақтығын патология сипатына қарай дәрігер белгілейді.

Жағымсыз әсерлері

- ұйқышылдық

- сылбырлық

- бас ауыруы

- температураның қысқа мерзімге жоғарылауы

- терінің қабыршақтануы

- жүрістің бұзылуы

- А витаминінің көп дозаларын ұзақ уақыт қолданғанда аяқ сүйектерінің ауыруы

- жүрек айну, құсу

Қолдануға болмайтын жағдайлар

- препарат компоненттеріне жекелей жоғары сезімталдық

- өт-тас ауруы

- созылмалы панкреатит

- жүктілік және лактация кезеңі

- 18 жасқа дейінгі балалар мен жасөспірімдер.

Сақтықпен: маскүнемдік, бауыр циррозы, вирустық гепатит, бүйрек жеткіліксіздігі, егде жаста

Дәрілермен өзара әрекеттесуі

Эстрогендер және ішу арқылы қабылданатын контрацептивтер, олардың құрамындағылар ретинолдың сіңуін күшейтеді, бұл А- гипервитаминозының дамуына әкелуі мүмкін.

Ретинол глюкокортикоидтардың қабынуға қарсы әсерін төмендетеді, Са2+ препараттарының әсерін әлсіретеді, гиперкальциемияның даму қаупін ұлғайтады.

Изотретиноин уытты әсерінің туындау қаупін ұлғайтады.

Тетрациклин мен А витаминін жоғары дозаларда бір мезгілде қолдану (50 мың/ӘБ және одан жоғары) бассүйекішілік гипертензияның даму қаупін ұлғайтады.

Ретинолдың сіңуін нитриттер, холестирамин бұзады. Ретинолды холестираминді қабылдаудан 1 сағат бұрын немесе қабылдағаннан кейін 4-6 сағаттан соң қолдану керек.

D гипервитаминозы (өзара) қаупін азайтады.

Кортикостероидтар және алкоголь препараттың емдік әсерін төмендетеді.

Токоферол бауырда ретинолдың уыттылығын, сіңуін, жинақталуын төмендетеді, токоферолдың жоғары дозалары организмдегі ретинол қорын азайтуы мүмкін.

Айрықша нұсқаулар

Жекелеген жағдайларда бірінші күні қолданғанда қышытатын теңбілді-папулезді бөртулер туындауы мүмкін, бұл препаратты тоқтатуды қажет етеді.

Дозаны азайтқанда немесе препаратты уақытша тоқтатқанда жағымсыз құбылыстар өздігінен қайтады. Тері ауруларында жоғары дозалар тағайындаған кезде емдеудің 7-10 күнінен кейін жергілікті қабыну реакцияларының өршуі байқалады, бұл қосымша емдеуді қажет етпейді және осыдан әрі қарай азая береді. Мұндай әсері препараттың миело- және иммунитет көтермелеуші әсерімен байланысты.

Препаратты жедел және созылмалы нефритпен науқастарда, жүрек қызметінің декомпенсациясы кезінде сақтықпен қолдану керек.

Препараттың жоғары дозаларын қабылдаған жағдайда, өт-тас ауруы мен созылмалы панкреатиттің өршуі байқалуы мүмкін.

Ретинолдың жоғары дозаларының тератогендік әсері оны қабылдауды тоқтатқаннан кейін де сақталады, сондықтан препаратты қолдану кезінде жүктілікті тек 6-12 айдан соң жоспарлау ұсынылады.

Педиатрияда қолданылуы

Препарат педиатриялық тәжірибеде қолданылмайды.

Дәрілік заттың көлік құралын және қауіптілігі зор механизмдерді басқару қабілетіне әсер ету ерекшеліктері

Ықтимал жағымсыз әсерлерін ескере отырып, көлік құралын және қауіптілігі зор механизмдерді басқару кезінде сақ болған жөн.

Артық дозалануы

А витаминімен жедел артық дозалану белгілері - А гипервитаминозы (енгізгеннен кейін 6 сағаттан соң дамиды): ересектерде – ұйқышылдық, сылбырлық, диплопия, бас айналуы, бастың қатты ауыруы, жүрек айнуы, ауыр құсу; диарея, ашушаңдық, остеопороз, қызыл иектен қан кету, ауыздың шырышты қабығының құрғауы мен ойық жаралануы, еріннің, терінің қабыршақтануы (әсіресе алақандардың), қозу, сананың шатасуы.

А витаминімен созылмалы уыттану белгілері: анорексия, сүйектердің ауыруы, терінің, еріннің жарылуы мен құрғауы, ауыздың шырышты қабығының құрғауы, гастралгия, құсу, гипертермия, астения, бас ауыруы, фотосенсибилизация, поллакиурия, никтурия, полиурия, ашушаңдық, шаштың түсуі, табандарда, алақандарда, мұрын-ерін үшбұрышында сары-қызыл-сары дақтардың пайда болуы, гепатоуыттылық құбылыстары, көзішілік қан қысымының жоғарылауы, олигоменорея, портальді гипертензия, гемолитикалық анемия, құрысулар; фетоуыттылықтың байқалуы (несеп шығару жүйесі дамуының ақаулары, өсудің тежелуі, эпифизарлық өсу аймақтарының ерте жабылуы).

Емі: препаратты тоқтату, антагонист ретінде L-тироксин, сондай-ақ аскорбин қышқылын, манитті (бассүйекішілік қан қысымын төмендетеді және менингизм симптомдарын жояды), глюкокортикоидтарды (бауырдағы А витаминінің метаболизмін жеделдетеді) тағайындайды.

Шығарылу түрі мен қаптамасы

10 капсуладан поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамада.

2 пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады.

100 пішінді ұяшықты қаптамадан (блистерден) медицинада қолданылуы жөніндегі мемлекеттік және орыс тілдеріндегі нұсқаулықтың сәйкес санымен қораптық картоннан жасалған пеналға салынады.

Сақтау шарттары

Ылғалдан және жарықтан қорғалған жерде, 15 ºС-ден 25 ºС-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Минскинтеркапс» УК, Беларусь Республикасы,

220075, Минск қ., а/ж 112, Инженерная к-сі, 26 үй

Тел./факс (+ 37517) 344-18-66

Тіркеу куәлігі иесінің атауы мен елі

«Минскинтеркапс» УК, Беларусь Республикасы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы.

«Рахметова» ЖК, ҚР, 050026, Алматы қ., Байзақов к-сі, 116 үй, 35 пәтер

тел.: +7 777324-23-37

e-mail: al.rakhmetova@yandex.kz