Резорба

• русский
• қазақша

• Скачать инструкцию медикамента

Саудалық атауы

Резорба

Халықаралық патенттелмеген атауы

Золедрон қышқылы

Дәрілік түрі

Көктамыр ішіне енгізу үшін ерітінді дайындауға арналған 4 мг лиофилизацияланған ұнтақ еріткішімен - 5 мл инъекцияға арналған сумен жиынтықта

Құрамы

Бір құтының ішінде:

белсенді зат: 4,26 мг золедрон қышқылының моногидраты (4,00 мг сусыз золедрон қышқылына баламалы)

қосымша заттар: D-Маннитол, натрий цитраты.

Сипаттамасы

Ақ немесе ақ дерлік түсті лиофилизацияланған ұнтақ.

Фармакотерапиялық тобы

Сүйек ауруларын емдеуге арналған препараттар. Сүйектер құрылымына және минералдануына әсер ететін препараттар. Бисфосфонаттар.

АТХ коды М05ВА08

 

Фармакологиялық қасиеттері

Фармакокинетикасы

Фармакокинетикалық параметрлері дозаға байланысты емес. Инфузия басталғаннан кейін қан сарысуындағы концентрациясы инфузия соңында ең жоғарғы концентрациясына (Смах) жетумен жылдам ұлғаяды, кейіннен концентрацияның 4 сағаттан кейін 10% және 24 сағаттан соң Смах-тан 1%-дан да аз тез азайып, 28-ші күні қайталанатын инфузияға дейін Смах-тың 0,1%-нан аспайтын төмен концентрацияларының әріқарай ұзару кезеңіне ұласады.

Қан плазмасының ақуыздарымен байланысы – 56%. Метаболизмге ұшырамайды.

Бүйрекпен өзгермеген күйде 3 сатыда шығарылады: 1 және 2 фазалары –препараттың жүйелі қан ағымынан жылдам шығарылуы, тиісінше, 1,24 сағат және 1,87 сағат жартылай шығарылу кезеңдерімен, және 3 фазасы – ұзақ, 146 сағат жартылай шығарылу кезеңімен. Әр 28 күн сайын қайта енгізген кездерде препараттың жинақталуы болмаған. Алғашқы 24 сағат ішінде 23- 55%-ы несептен табылады. Препараттың қалған мөлшері сүйек тінімен байланысады, сонан соң оның жүйелі қан ағымында баяу кері босап шығуы және бүйрекпен шығарылуы жүреді; нәжіспен 3%-дан азы шығарылады. Жалпы плазмалық клиренсі – 2.54-7.54 л/сағ. Ол препараттың дозасына, емделушінің жынысына, жасына, нәсіліне және дене салмағына байланысты емес. Инфузия ұзақтығын 5-тен 15 минутқа дейін ұзарту золедрон қышқылы концентрациясының инфузия соңында 30% азаюына әкеледі, бірақ AUC-на әсер етпейді.

Бүйрек клиренсі креатинин клиренсімен (КК) оң байланысқа түседі және орташа 55-113% құрайтын КК-нің 42-108%-ын құрайды. Ауыр (КК 20 мл/мин) және орташа (КК 50 мл/мин) бүйрек жеткіліксіздігі бар емделушілердегі золедрон қышқылының клиренсі, тиісінше, КК 84 мл/мин емделушілердегі препарат клиренсі мәндерінің 37 және 72%-ын құрайды.

Фармакодинамикасы

Резорба препараты сүйек тініне таңдамалы әсері бар бисфосфонаттардың жаңа класына жатады. Остеокластар белсенділігін бәсеңдетеді, сүйек тінінің түзілуіне, минералдануына және механикалық қасиеттеріне қолайсыз әсер көрсетпейді. Бисфосфонаттардың сүйек тініне селективті әсер етуі минералданған сүйек тінімен жоғары тектестігіне негізделген, бірақ остеокластар белсенділігін тежеуді қамтамасыз ететін нақты молекулалық механизмі осы уақытқа дейін түсініксіз күйде қалумен келеді.

Золедрон қышқылы адам эндотелийі жасушаларының пролиферациясын да басады. Ісіктен туындаған гиперкальциемияда қан сарысуындағы кальций концентрациясын төмендетеді.

 

Қолданылуы

- аумақты ісіктердің остеолитикалық, остеобласттық және аралас сүйек

метастаздарында; көптеген миелома кезіндегі остеолитикалық ошақтарда

- қатерлі ісіктен туындаған гиперкальциемияда

Қолдану тәсілі және дозалары

Инъекцияға арналған золедрон қышқылын көктамырішілік бисфосфонаттар қолдану тәжірибесі бар дәрігерлер қолдануы тиіс.

Көктамыр ішіне тамшылатып, ең кемі, 15 минут ішінде.

Сүйек метастаздарында және остеолитикалық ошақтарда көптеген миелома кезінде, ұсынылатын доза әр 3-4 апта сайын 4 мг құрайды.

Кальцийді тәулігіне 500 мг дозада және D витаминін тәулігіне 400ХБ дозада ішке қосымша тағайындау ұсынылады.

Қатерлі ісіктерден болатын гиперкальциемияда (≥ 12 мг/дл немесе 3 ммоль/л альбумин деңгейі бойынша реттелген кальций концентрациясы) ұсынылатын дозасы бір реттік 4 мг құрайды.

Инфузия емделушіні талапқа сай гидратациялау шартымен жүргізіледі.

Бүйрек қызметі бұзылған емделушілер

Қатерлі ісіктерден болатын гиперкальциемия

Бүйрек қызметінің айқын бұзылулары бар емделушілерді золедрон қышқылымен емдеу туралы шешімді қауіп/пайда арақатынасын мұқият бағалағаннан кейін ғана қабылдау керек. Қан сарысуындағы креатининнің

< 400 мкмоль/л немесе < 4.5 мг/дл концентрациясында дозалау режимін реттеу қажет емес.

Таралған қатерлі ісіктердің сүйектегі метастаздары және миелома ауруы

Золедрон қышқылының дозасы Cockcroft – Gault формуласымен есептелген креатинин клиренсінің (КК) бастапқы деңгейіне байланысты. Бүйрек қызметінің ауыр бұзылуларында (КК < 30 мл/мин) золедрон қышқылын қолдануға болмайды.

Бүйрек қызметінің жеңіл немесе орташа бұзылуларында (креатинин клиренсінің мәндері 30-60 мл/мин) ұсынылатын дозалар төменде келтірілген.

Сарысулық креатинин концентрациясын препараттың әр дозасын енгізер алдында анықтау керек. Бүйрек қызметінің бұзылуы анықталғанда золедрон қышқылының кезекті енгізілуін кейінге қалдырған дұрыс.

Бүйрек қызметінің бұзылулары келесі параметрлер бойынша анықталады:

- креатининнің бастапқы мәндері қалыпты ( > 1,4 мг/дл) емделушілер үшін – қан сарысуындағы креатинин мөлшерінің 0,5 мг/дл жоғарылауы.

- креатининнің бастапқы мәндері ауытқымалы ( > 1,4 мг/дл) емделушілер

үшін – қан сарысуындағы креатинин мөлшерінің 1 мг/дл жоғарылауы.

Золедрон қышқылымен емдеу креатининнің деңгейі емді үзгенше қолданылған бастапқы шамадан 10%-дан артық аспайтын мәнге жеткеннен кейін ғана жаңғыртылады.

Инъекциялық ерітінді дайындау

Ерітіндіні асептикалық жағдайларда әзірлейді; инъекцияға арналған 5 мл суда 4 мг-ні ерітіп, толық ерігенше абайлап сілкиді. Қажетті дозада алынған ерітіндіні 0,9% натрий хлориді ерітіндісінің немесе 5% декстроза ерітіндісінің 100 мл-інде сұйылтады. Құрамында кальций бар ерітінділерді пайдалануға болмайды. Дайындалған ерітіндіні әзірлегеннен кейін дереу пайдаланған дұрыс. Пайдаланылмаған ерітіндіні тоңазытқышта +2- +8°С температурада 24 сағаттан асырмай сақтауға болады. Тоңазытқышта сақталған ерітіндіні енгізер алдында бөлме температурасына дейін жылытып алған жөн.

Жағымсыз әсерлері

Қолайсыз реакциялар ағзалар мен жүйелер бойынша, олардың пайда болу жиілігінің көрсетілуімен, төменде тізбеленген. Жиілік өлшемдері: өте жиі

(≥ 1/10), жиі (≥ 1/100, < 1/10), жиі емес (≥ 1/1000, < 1/100), сирек (≥ 1/10000, < 1/1000), өте сирек (< 1/10000), жекелеген хабарламаларды қоса.

Өте жиі

- гипофосфатемия

Жиі

- анемия

- бас ауыру

- конъюнктивит

- жүрек айну, құсу, анорексия

- сүйектердің ауыруы, миалгия, артралгия, жайылған ауырулар

- бүйрек қызметінің бұзылулары, креатининнің және мочевинаның сарысулық концентрацияларының артуы

- гипокальциемия

- қызба, тұмау тәрізді синдром (жалпы дімкәстану, қалтырау, ауырсыну ахуалын, ыстық көтерілуін қоса)

Жиі емес

- тромбоцитопения

- лейкопения

- бас айналу

- парестезиялар, дәм сезудің бұзылуы, гипестезия, гиперестезия, тремор, үрейлену сезімі, ұйқы бұзылыстары, көрудің «буалдырлануы»

- диарея, іш қату, іш қуысының ауырулары, диспепсия, стоматит,

ауыздың кеберсуі

- ентігу, жөтел

- қышыну, бөртпе (эриматозды және макулярлы түрлерін қоса)

- қатты тершеңдік

- бұлшықеттердің құрысуы

- артериялық қысымның айқын көтерілуі немесе төмендеуі

- жедел бүйрек жеткіліксіздігі, гематурия, протеинурия

- жоғары сезімталдық реакциялары

- гипомагниемия, гипокалиемия

- астения

- шеткергі ісінулер

- кеуде қуысының ауыруы

- дене салмағының артуы

- остеонекроз

Сирек

- панцитопения

- сананың шатасуы

- брадикардия

- ангионевротикалық ісіну

- гиперкалиемия, гипернатриемия

Өте сирек

- увеит, эписклерит

- естен тану, коллапс

жергілікті реакциялар: препаратты енгізген жердегі ауыру, тітіркену, ісіну, инфильтрат түзілуі.

Қолдануға болмайтын жағдайлар

- золедрон қышқылына, басқа бисфосфонаттарға немесе препарат құрамына кіретін кез келген басқа компонентке жоғары сезімталдық

- айқын бүйрек жеткіліксіздігі (креатинин клиренсі < 30 мл/мин)

- жүктілік және лактация кезеңі

- 18 жасқа дейінгі балалар мен жасөспірімдерге.

Дәрілермен өзара әрекеттесуі

Еріткіштер ретінде құрамында кальций бар ерітінділерді, атап айтқанда, Рингер ерітіндісін пайдалануға болмайды.

Ісікке қарсы дәрілік заттармен, диуретиктермен, антибиотиктермен, анальгетиктермен бір мезгілде қолданғанда клиникалық мәні бар өзара әрекеттесулер болмаған.

Бисфосфонаттар мен аминогликозидтер қан сарысуындағы кальций концентрациясына бір бағытта әсер етеді, сондықтан оларды бір мезгілде тағайындағанда гипокальциемия мен гипомагниемияның даму қаупі артады.

Золедрон қышқылын нефроуытты әсері зор препараттармен бір мезгілде қолданғанда сақ болу қажет.

Көптеген миеломасы бар емделушілерде талидомидпен біріктірілген бисфосфонаттар көктамыр ішіне енгізілгенде бүйрек қызметі бұзылуларының даму қаупі артуы мүмкін.

Препаратты басқа дәрілік заттармен араластыруға болмайды.

Айрықша нұсқаулар

Инфузия алдында емделушідегі талапқа сай гидратациялануға көз жеткізген жөн. Қажет болғанда, золедрон қышқылы инфузиясының алдында, онымен қатар немесе сонан соң физиологиялық ерітінді енгізу ұсынылады. Жүрек-қантамыр жүйесі жағынан асқынулардың пайда болу қаупіне орай, емделушінің гипергидратациялаудан аулақ болған дұрыс.

Препарат енгізілгеннен кейін қан сарысуында кальций, магний, фосфор және креатинин концентрациясын үнемі бақылау қажет.

Сақтықпен: препаратты бүйрек қызметі бұзылғанда, айқын бауыр жеткіліксіздігінде (қолданылуы жөнінде деректер жоқ), ацетилсалицил қышқылына сезімтал бронх демікпесі бар емделушілерде қолдану керек.

Золедрон қышқылымен емдеу аясында бүйрек қызметін мұқият қадағалау керек. Бүйрек қызметінің бұзылуы пайда болуының қауіп факторларына дегидратация, осының алдындағы бүйрек жеткіліксіздігі, золедрон қышқылын немесе басқа бисфосфонаттарды бірнеше рет енгізу, сондай-ақ нефроуытты дәрілік заттарды қолдану және препаратты тым жылдам енгізу жатады.

Золедрон қышқылының әр дозасының алдында емделушілерде сарысулық креатинин деңгейлерін анықтау керек. Сүйектерінде метастаздары бар емделушілерге емдеу тағайындалған жағдайда золедрон қышқылының дозасын азайту ұсынылады.

Қатерлі ісік туғызған гиперкальциемиясы бар емделушілердің ахуалын тиісті түрде бағалап, золедрон қышқылымен емдеудің әлеуетті пайдасы мен болжамды қатерін салыстыру керек.

Сүйек метастаздары бар емделушілерді емдеу жөнінде оң шешілгенде, сүйек тінімен байланысты белгілер дамуының алдын алу мақсатында ем әсерінің білінуі 2-3 ай ішінде жүретінін есепке алған дұрыс.

Золедрон қышқылын қамтитын бисфосфонаттармен емдеу аясында, онкологиялық науқастарда жақ сүйек остеонекрозының даму жағдайлары сипатталған, осыған орай, бисфосфонаттармен емделу басталғанша стоматологиялық тексеруден өтуді алдын ала қарастырып, әлі қауіп факторлары болған жағдайда (анемия, коагулопатия, жұқпалар, нашар гигиена немесе ауыз қуысының ауруы, қатарлас химиялық немесе сәулелі ем, кортикостероидтармен емдеу) тиісінше алдын алу емшараларын жүргізу қажет. Золедрон қышқылымен емделу аясында қауіп факторлары бар науқастарға, мүмкіндігінше, стоматологиялық шұғыл араласулардан аулақ болған дұрыс.

Дәрілік заттың көлікті немесе қауіптілігі зор механизмдерді басқару қабілетіне әсер ету ерекшеліктері

Автокөлік жүргізгенде немесе қауіптілігі зор механизмдермен жұмыс істегенде сақтық шарасын қадағалау керек (бас айналу, сананың шатасуы сияқты жағымсыз реакциялардың пайда болуы мүмкін екеніне орай).

Артық дозалануы

Симптомдары: гипокальциемия

Емі: кальций глюконаты көктамырішілік инфузиясын жүргізу.

Шығарылу түрі және қаптамасы

Көктамыр ішіне енгізу үшін ерітінді дайындауға арналған лиофилизацияланған ұнтақ.

4 мг-ден алюминий-пластик қалпақшалармен жабылған, резеңке тығындармен тығындалған бейтарап күңгірт шыныдан жасалған құтыларда.

5 мл еріткіштен сындыру нүктесімен немесе онсыз, немесе ашуға арналған тарту сақинасы бар бейтарап шыныдан жасалған ампулаларда.

Пішінді ұяшықты қаптамадағы препараты бар 1 құтыдан және еріткіші бар 1 ампуладан ампуланы ашуға арналған пышақпен немесе ампулалық скарификатормен және медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеде.

Ерітінді дайындауға арналған еріткішті ашуға арналған тарту сақинасы бар импортты ампулаларға немесе сындыру нүктесі бар ампулаларға құйғанда ампулалық пышақ немесе скарификатор салынбайды.

Сақтау шарттары

Құрғақ, жарықтан қорғалған жерде, 25 С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

Көктамыр ішіне енгізу үшін ерітінді дайындауға арналған лиофилизацияланған ұнтақ - 2 жыл

Еріткіш - 4 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

«Деко» компаниясы» ЖШҚ

129344, Мәскеу, Енисей к-сі, 3 үй, 4 корпус

Тіркеу куәлігінің иесі

«Фарм-Синтез» ЖАҚ

111024, Мәскеу, Кабельная 2 к-сі, 2 үй, 9 құрылым.

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы

«Raifarm» (Райфарм) ЖШС

КАЗАҚСТАН РЕСПУБЛИКАСЫ, Алматы қ., Тимирязев к-сі 42, 15/3 В корпус.

Телефон нөмірі: 8-(727-2) 66-92-78.

Факс нөмірі: 8-(727-2) 66-92-78

Электронды поштасы: lyubov.tsoy@raifarm.com