Рамиприл комби (10 мг/10 мг)

Рамиприл комби

Жоқ

5 мг/5 мг, 10 мг/10 мг капсулалар

Бір 5 мг/5мг капсуланың құрамында

белсенді заттар: амлодипин бесилаты 6.934 13.868

(амлодипинге баламалы) (5.000) (10.000)

рамиприл 5.000 10.000

қосымша заттар: микрокристалды целлюлоза, сусыз кальций гидрофосфаты, желатинделген жүгері крахмалы, ылғал мөлшері төмен желатинделген жүгері крахмалы, натрий крахмал гликоляты (А типі), натрий стеарилофумараты

желатин капсулалар

корпусы: титан қостотығы (Е 171), желатин

қақпақша: қызыл темір (III) тотығы (Е 172), сары темір (III) тотығы (Е172), қара темір (III) тотығы (Е 172), титан қостотығы (Е 171), желатин

Ақ түсті мөлдір емес корпусы және қызғылт түсті мөлдір емес қақпақшасы бар №1 желатин капсулалар (5 мг/5 мг доза үшін).

Ақ түсті мөлдір емес корпусы және қоңыр түсті мөлдір емес қақпақшасы бар №1 желатин капсулалар (10 мг/10 мг доза үшін).

Капсуланың ішінде – ақ немесе ақ дерлік түсті ұнтақ.

Ренин-ангиотензин жүйесіне әсер ететін препараттар. «Баяу» кальций өзекшелерінің блокаторларымен біріктірілген АКФ тежегіштері. Рамиприл және амлодипин.

АТХ коды C09BB07

Фармакокинетикасы

Ішке қабылдаудан кейін рамиприл асқазан-ішек жолынан тез сіңеді. Плазмада рамиприл жоғары шекті концентрациясына 1 сағат ішінде жетеді. Несеп шығарылу есебімен, сіңірілу деңгейі кемінде 56% құрайды және ас ішуге байланысты емес. Белсенді метаболит – рамиприлат биожетімділігі ішке 2,5 мг және 5 мг рамиприл қабылдаудан кейін 45% құрайды.

Рамиприлдің бірден бір белсенді метаболиті – рамиприлат плазмалық концентрациясының жоғары шегіне рамиприл қабылдаудан кейін 2-4 сағаттан соң жетеді. Рамиприлат плазмалық концентрациясының тепе-тең күйіне рамиприлді емдік дозада қабылдаудың шамамен 4-ші күні жетеді. Қан сарысуы ақуыздарымен рамиприлдің байланысуы 73% жуық, ал рамиприлатта 56% жуық құрайды. Рамиприл рамиприлат пен дикетопиперазин эфиріне, дикетопиперазин қышқылына және рамиприл мен рамиприлат глюкуронидтеріне толық дерлік метаболизденеді. Метаболиттер экскрециясы негізінен бүйрек арқылы жүзеге асады. Рамиприлаттың плазмалық концентрациялары полифазалы режимде төмендейді. Өзінің АӨФ-мен қаныққан байланысуына және ферментпен әлсіз диссоциациялануына орай, препараттың плазмадағы өте төмен концентрациясында рамиприлат ұзаққа созылатын элиминацияның соңғы фазасын көріністейді. Күніне бір дозадан рамиприлді көп рет қабылдаудан кейін рамиприлаттың тиімді жартылай шығарылу кезеңі 13-17 сағат (5-10 мг дозасында) құрап, ал дозасын 1,25-2,5 мг дейін азайтудан кейін осы кезең ұзарды. Бұл айырмашылық рамиприлатпен байланысатын ферменттің қанықтыру қабілетіне байланысты.

Рамиприл дозасын бір рет қабылдаудан кейін рамиприл мен оның метаболиттерінің емшек сүтіндегі мөлшері анықталмаған. Алайда, препарат дозаларын көп рет енгізгенде рамиприлдің емшек сүтіне әсері түсініксіз күйде қалады.

Бүйрек жеткіліксіздігі бар пациенттер

Бүйрек функциясының бұзылулары бар пациенттерде рамиприлаттың бүйректік экскрециясы төмендейді, ал рамиприлаттың бүйректік клиренсі креатинин клиренсіне пропорционалдық тұрғыда тәуелді. Бұл бүйрек функциясы қалыпты пациенттердегіден баяуырақ азаятын плазмалық рамиприлат концентрацияларының жоғарылауына алып келеді.

Бауыр жеткіліксіздігі бар пациенттер

Бауыр функциясының бұзылуы бар пациенттерде, бауыр эстеразалары белсенділігінің төмендеуі салдарынан рамиприлдің рамиприлатқа метаболизмдік айналуы баяулайды, ал осы пациенттерде плазмалық рамиприл деңгейлері жоғарылайды. Бұл пациенттерде рамиприлат концентрацияларының жоғары шекті мәндері, дегенмен, бүйрек функциясы қалыпты пациенттердегі ұқсас көрсеткіштерден ерекшеленбейді.

Ішке қабылдаудан кейін амлодипин асқазан-ішек жолынан баяу сіңіріледі. Қан сарысуында ең жоғары концентрациясы 6-12 сағаттан соң байқалады. Ас ішу амлодипин биожетімділігіне ықпал етпейді. Абсолютті биожетімділігі 64-80% құрайды. Таралу көлемі 21 л/кг (дене салмағына) құрайды. Қан плазмасында тепе-тең концентрациясына (5-15 нг/мл) препаратты күнделікті қабылдаудан кейін 7-8 күннен соң жетеді. Іn vitro зерттеулері қан ағымында айналатын 93-98% амлодипиннің қан плазмасы ақуыздарымен байланысатынын көрсетті. Амлодипин бауырда тез метаболизденіп (шамамен 90%), белсенді емес метаболиттер түзеді. Бастапқы қосылыстан 10% жуық және белсенді емес метаболиттерден 60% несеппен, 20-25% нәжіспен экскрецияланады. Қан плазмасында концентрациясының төмендеуі екі фазалы сипатта болады. Тәулігіне 1 рет қабылдағанда қан плазмасынан соңғы элиминациялық жартылай шығарылу кезеңі 35-50 сағатқа жуық құрайды. Жалпы клиренс 7 мл/мин/кг тең (пациенттің 60 кг салмағында - 25 л/сағат). Егде жастағы пациенттерде бұл мән 19 л/сағат құрайды.

Амлодипин фармакокинетикасы бүйрек жеткіліксіздігінде және пациенттердің жас ұлғаюымен елеулі өзгерістерге ұшырамайды.

Егде жастағы пациенттер

Егде және жас пациенттерде плазмадағы амлодипиннің жоғары шекті концентрацияларға жету уақыты сәйкес келеді. Егде жастағы пациенттерде амлодипин клиренсі, әдетте, AUC көрсеткішінің және жартылай шығарылу кезеңінің ұзаруымен азаяды. Іркілісті жүрек жеткіліксіздігі бар пациенттерде AUC көрсеткішінің және жартылай шығарылу кезеңінің ұзаруы егде жастағы пациенттердегі сияқты болды.

Бүйрек функциясының бұзылулары бар пациенттер

Амлодипин экстенсивті метаболизденіп, белсенді емес метаболиттер түзеді. Бастапқы қосылыстан 10% өзгеріссіз күйде несеппен шығарылады. Амлодипиннің плазмалық концентрацияларының өзгерістері бүйрек жеткіліксіздігі дәрежесіне байланысты емес. Ондай пациенттерге амлодипиннің әдеттегі дозаларын қабылдауға болады. Амлодипин диализі тиімсіз болып есептеледі.

Бауыр функциясының бұзылулары бар пациенттер

Бауыр функциясының бұзылуы бар пациенттерде амлодипиннің жартылай шығарылу кезеңі ұзарады.

Фармакодинамикасы

Рамиприл Комби – құрамына баяу кальций өзекшелерінің блокаторы (амлодипин) мен АӨФ тежегіші (рамиприл) кіретін гипертензияға қарсы біріктірілген препарат.

Рамиприлат, рамиприлдің белсенді метаболиті, ангиотензин-өзгертуші фермент (АӨФ) белсенділігін бәсекелі тежейді, ангиотензин I-дің ангиотензин II-ге айналу жылдамдығын төмендетеді. Ангиотензин II концентрациясының азаюы нәтижесінде рениннің босап шығуы кезінде теріс кері байланыстың жойылуы есебінен плазма ренині белсенділігінің салдарлы артуы және альдостерон секрециясының тікелей төмендеуі жүреді. Брадикинин деградациясын азайтады және простагландиндер синтезін арттырады. Ангиотензин II түзілуінің азаюы және брадикинин белсенділігінің жоғарылауы тамырлардың кеңеюіне әкеліп, рамиприлдің кардиопротективті және эндотелиопротективті әсеріне өз үлесін қосады.

АӨФ тежегіші тағайындалатын монотерапияға жауаптың орташа деңгейі артериялық гипертензиясы бар қара нәсілді (афро-кариб) пациенттер қауымында (гипертензияға шалдыққан, әдетте, ренин мөлшері төмен пациенттер қауымы), басқа нәсілді пациенттерге қарағанда, төмен болды.

Тамыр кеңейтетін әсеріне орай, жалпы шеткері тамыр кедергісін (кейінгі жүктемені), өкпе капиллярларындағы қысымды (алдыңғы жүктемені) және өкпе тамырларындағы кедергіні төмендетеді. Әдетте, бүйрек қан ағымында (бірқатар жағдайларда ол артады) және шумақтық сүзіліс жылдамдығында елеулі өзгерістер туындатпайды. Препарат пациенттің тік тұрған күйінде де, жатқан қалпында да жүректің жиырылу жиілігінің компенсаторлық артуынсыз гипертензияға қарсы әсер туындатады.

Гипертензияға қарсы әсері препараттың бір реттік дозасын ішке қабылдаудан кейін 1-2 сағаттан соң басталады, ең жоғары әсері қабылдаудан кейін 3-6 сағат өткенде дамиды және 24 сағат бойы сақталады. Күнделікті қолданғанда гипотензиялық белсенділігі 3-4 апта ішінде біртіндеп жоғарылап, ұзақ уақыт емделгенде сақталады. Қысқа мерзімге тоқтатқанда артериялық қысымның айқын көтерілуі байқалмайды (тоқтату синдромы болмайды).

Амлодипин миокардиальді және тегіс бұлшықет тамырларының жасушаларына кальций иондарының жарғақша аралық ауысуын тежейді (баяу кальций өзекшелерінің блокаторы немесе кальций иондарының антагонисі). Гипертензияға қарсы әсер ету механизмі тамырлардың тегіс бұлшықеттерін тікелей босаңсыту әсерімен байланысты, бұл шеткері тамыр кедергісінің төмендеуіне әкеледі.

Стенокардия симптомдарын жеңілдетуге болатын нақты механизм толық анықталмаған және мыналарды қамтуы мүмкін:

1) шеткері артериолаларды кеңейту, осылайша, жалпы шеткері кедергіні (кейінгі жүктемені) азайту. Бұл рефлекторлы тахикардияға әкелмейтіндіктен, миокардтың энергия шығындауы мен оттегіні қажетсінуі төмендейді.

2) әрі қалыпты, әрі ишемияланған аумақтарда негізгі коронарлық артериялар мен артериолаларды кеңейту есебінен оттегі жеткізілуінің жақсаруы жүреді. Соның есебінен, тіпті коронарлық артериялардың түйілу жағдайында да (нұсқалық стенокардия немесе Принцметалл стенокардиясы) миокардқа оттегінің жеткізілуі артады.

Артериялық гипертензиясы бар пациенттерде препаратты бір рет қабылдау тәулік бойына жатқан қалыпта да, тік тұрған күйде де артериялық қысымның клиникалық мәнді төмендеуін қамтамасыз етеді. Әсерінің баяу басталуына орай, кенеттен болатын артериялық гипотензия тән емес.

Стенокардиясы бар пациенттерде, тәулігіне бір рет қабылдағанда дене жүктемелеріне жалпы төзімділік уақыты, стенокардия ұстамасының дамуына дейінгі уақыт және ST сегментінің елеулі депрессиясына дейінгі уақыт ұзарады, сондай-ақ стенокардия ұстамаларының жиілігі және тринитрат глицерил таблеткаларының тұтынылатын саны азаяды. Бұл жағымсыз метаболизмдік әсерлермен байланысты болмаған: препарат қан плазмасындағы липидтер деңгейіне, қандағы қанттың және қан сарысуындағы несеп қышқылының деңгейіне әсер етпеген және бронх демікпесі бар пациенттерде пайдалы болды.

- емдік дозаларда рамиприл мен амлодипинді бір мезгілде қолдану біріктірілгенде де, жекелей де талапқа сай әсер көрсететін пациенттерде артериялық гипертензияда, орын басу препараты ретінде.

Препарат қатаң түрде дәрігердің тағайындауы бойынша қолданылады!

Препаратты емдеу курсы бойына күн сайын тамақтануға дейін де, одан кейін де тәуліктің белгілі бір уақытында қабылдау керек. Капсуланы жаншуға немесе шайнауға болмайды.

Ұсынылатын тәуліктік доза – белгілі бір дозадағы 1 капсула.

Белгілі бір дозада біріктірілген препарат емнің бастапқы сатысына сай емес.

Егер дозаны түзету қажеттілігі туындаса, препарат дозасын өзгертуге болады немесе олардың еркін біріктірілімінде жекелеген компоненттердің дозаларын қайта қарауға болады.

Препаратты ересек пациенттер тобында қолдану

Препаратты несеп айдайтын дәрілер қабылдайтын пациенттерге абайлап тағайындау ұсынылады, өйткені осы пациенттерде су-электролит теңгерімінің бұзылуы болуы мүмкін. Бүйрек функциясын зерттеу және қан сарысуындағы калий деңгейін анықтау қажет.

Бауыр функциясының бұзылулары бар пациенттер

Бауыр функциясы бұзылған пациенттерде рамиприлмен емдеу тек мұқият дәрігерлік қадағалаумен басталуы тиіс, осы орайда ең жоғары тәуліктік доза 2,5 мг рамиприл құрайды.

Рамиприл дозасын таңдау кезінде ұтымды демеуші доза ретінде 2,5 мг рамиприл дозасына көшірілген пациенттерге ғана тағайындау ұсынылады.

Бауыр жеткіліксіздігі жағдайында амлодипиннің элиминация кезеңі ұзаруы мүмкін. Амлодипинге қатысты дозалау жөнінде нақты нұсқаулар жоқ, сондықтан препарат бұл пациенттерге сақтықпен тағайындалуы тиіс.

Бүйрек функциясының бұзылулары бар пациенттер

Бүйрек функциясы бұзылған пациенттерде бастапқы және демеуші дозаның ұтымды біріктірілімін айқындау үшін препарат дозасы рамиприл мен амлодипин дозаларын әркімге жеке белгілеу жолымен таңдалады.

Тәуліктік рамиприл дозасы бүйрек жеткіліксіздігі бар пациенттерде креатинин клиренсі есебімен белгіленуі тиіс.

- креатинин клиренсі ≥ 60 мл/мин пациенттерде бастапқы дозаны түзету қажет емес; ең жоғары тәуліктік доза - 10 мг;

- креатинин клиренсі < 60 мл/мин пациенттерде, сондай-ақ гемодиализ емшарасынан өтетін артериялық гипертензиясы бар пациенттерде, егер пациент ұтымды демеуші доза ретінде (рамиприлді дозалау барысында белгіленген) 2,5 мг немесе 5 мг құрайтын рамиприлді дозалау режиміне көшірілген жағдайда ғана тағайындау ұсынылады. Гемодиализ емшарасынан өтетін пациенттер препаратты гемодиализ жүргізуден кейін бірнеше сағаттан соң қабылдауы тиіс.

Бүйрек функциясының бұзылулары бар пациенттерде амлодипин дозасын түзету қажет емес.

Амлодипин диализ үдерісінде шығарылмайды. Диализ емшарасынан өтетін пациенттерге амлодипин ерекше сақтықпен тағайындалу керек.

Препаратпен емделу кезеңінде бүйректің функционалдық қабілетін және қан сарысуындағы калий мөлшерін бақылау талап етіледі. Бүйрек функциясы нашарлаған жағдайда препаратты қолдану тоқтатылуы тиіс, ал оның компоненттері тиісті үлгіде түзетілген дозаларда тағайындалу керек.

Егде жастағы пациенттерде қолдану

Рамиприлдің бастапқы дозасы әдеттегіден төмен болуы тиіс, ал келесіде жағымсыз әсерлерінің туындау қаупі жоғары екендіктен, дозасын түзету жеңілірек болуы тиіс. Өте кәрі және қауқарсыз пациенттерге тағайындау ұсынылмайды.

Егде жастағы пациенттерге амлодипиннің әдеттегі дозаларын қабылдауға болады, дегенмен, препарат дозасын абайлап арттыру керек.

Балалар мен жасөспірімдер жасындағы пациенттерде қолдану

Балаларға және 18 жасқа толмаған жасөспірімдерге тағайындау ұсынылмайды, өйткені пациенттердің осы тобында препаратты қолдану қауіпсіздігі мен тиімділігі анықталмаған.

Рамиприлге қатысты:

Жиі (≥ 1/100-ден < 1/10 дейін)

- бас ауыру, бас айналу, шаршау

- гиперкалиемия

- артериялық гипотензия, ортостатикалық гипотензия, естен танулар

- құрғақ тітіркендіретін жөтел, бронхит, синусит, ентігу

- асқазан-ішек жолының қабынуы, ас қорытудың бұзылуы, іш аумағындағы жайсыздану сезімдері, диспепсия, диарея, жүрек айну, құсу

- бөртпе, макулопапулёзді дерматит

- бұлшықеттердің түйілуі, миалгиялар

- кеуденің ауыруы

Жиі емес (≥ 1/1000-нан < 1/100 дейін);

- эозинофилия

- жабырқау көңіл-күй, үрей, күйгелектік, мазасыздық, ұйқының бұзылуы, ұйқышылдықты қоса

- анорексия, тәбеттің төмендеуі

- вертиго, парестезиялар, дәм сезбей қалу, дәм сезудің бұрмалануы

- көрудің нашарлауы, көрудің бұлыңғырлануын қоса

- миокард ишемиясы, стенокардия немесе миокард инфарктісін қоса, тахикардия, аритмия, жүрек қағу, шеткері ісінулер

- бетке қан тебу

- бронх түйілуі, демікпе ағымының өршуін қоса, мұрынның бітелуі

- панкреатит (АӨФ тежегіштерін қолданумен байланысты өліммен аяқталған өте сирек жағдайлар хабарланған), ұйқы безі ферменттері деңгейінің жоғарылауы, ішектің мардымсыз ангионевроздық ісінуі, іштің жоғарғы тұсының ауыруы, гастритті қоса, іш қатулар, ауыздың кеберсуі

- бауыр ферменттерінің және/немесе билирубин деңгейінің жоғарылауы

- айрықша жағдайларда, тыныс алу жолдары өткізгіштігінің бұзылуын туындатып, өліммен аяқталуға ұласатын ангионевроздық ісіну, қышыну, тершеңдік

- артралгия

- бүйрек жеткіліксіздігі, соның ішінде, жедел бүйрек жеткіліксіздігі, жиі несеп шығару, протеинурияның ауыр түрі, қанда мочевина деңгейінің артуы, қандағы креатинин деңгейінің көтерілуі

- либидо төмендеуі, өтпелі эректильді импотенция

- гипертермия

Сирек (≥ 1/10000-нан < 1/1000 дейін);

- лейкопения (соның ішінде, нейтропения немесе агранулоцитоз), эритропения, гемоглобин деңгейінің төмендеуі, тромбоциттер санының азаюы

- сананың шатасуы

- тремор, тепе-теңдік бұзылуы

- конъюнктивит

- естудің нашарлауы, құлақтың шуылдауы

- глоссит

- тамыр стенозы, гипоперфузия, васкулит

- холестаздық сарғаю, гепатоцеллюлярлы зақымданулар

- эксфолиативті дерматит, есекжем, онихолизис

- астения

Өте сирек (< 1/10000, соның ішінде жекелеген хабарламалар)

- фотосезімталдық реакциялары

Белгісіз (қолда бар деректер негізінде бағалау мүмкін емес).

- сүйек кемігінің зақымдануы, панцитопения, гемолиздік анемия

- анафилаксиялық немесе анафилактоидтық реакциялар, ядроға қарсы антиденелер санының көбеюі

- қандағы натрий мөлшерінің азаюы

- зейін қою қабілетінің бұзылуы

- ми ишемиясы, ишемиялық инсультті қоса және транзиторлы ишемиялар, психомоторлық реакциялардың бұзылуы, ашытуды сезіну, паросмия

- Рейно синдромы

- афтозды стоматит

- жедел бауыр жеткіліксіздігі, холестаздық немесе цитолиздік гепатит (айрықша жағдайларда өліммен аяқталу байқалды)

- гинекомастия

- уытты эпидермалық некролиз, Стивенс-Джонсон синдромы, мультиформалы эритема, сулы бөртпе, ауыр дәрежедегі псориаз, псориаз пішінді дерматит, пемфигоидты немесе лихеноидты экзантема және энантема, алопеция

Амлодипинге қатысты:

Жиі (≥ 1/100-ден < 1/10 дейін);

- бас ауыру, бас айналу, ұйқышылдық (әсіресе, емдеудің басында), шаршау

- жүрек қағу

- бетке қан тебу

- жүрек қағу, іштің ауыруы

- ісінулер, сирақ-аяқ ұшы буынының ісінуі

Жиі емес (≥ 1/1000-нан < 1/100 дейін);

- гипергликемия

- көңіл-күйдің өзгеруі (үрейді қоса), ұйқысыздық, депрессия

- тремор, дәм сезудің бұрмалануы, естен тану, гипестезия, парестезиялар

- көрудің нашарлауы (соның ішінде, диплопия)

- құлақтың шыңылдауы

- артериялық гипотензия

- ентігу, ринит

- құсу, диспепсия, ішек моторикасының өзгеруі (диарея мен іш қатуларды қоса), ауыз кеберсуін сезіну

- алопеция, пурпура, тері түсінің өзгеруі, қатты тершеңдік, қышыну, бөртпе, экзантема

- артралгиялар, миалгиялар, бұлшықеттердің түйілуі, арқаның ауыруы

- несеп шығару бұзылысы, никтурия, несеп шығару жиілігінің артуы

- потенцияның бұзылуы, гинекомастия

- кеуденің ауыруы, әлсіздік, ауыру, дімкәстану

- дене салмағының артуы немесе кемуі

Сирек (≥ 1/10000-нан < 1/1000 дейін);

- сананың шатасуы

Өте сирек (< 1/10000, соның ішінде жекелеген хабарламалар)

- лейкопения, тромбоцитопения

- артериялық гипертензия, шеткері нейропатия

- миокард инфарктісі, аритмиялар (соның ішінде, брадикардия, қарыншалық тахикардия және жүрекшелер фибрилляциясы)

- васкулит

- жөтел

- панкреатит, гастрит, қызылиектер гиперплазиясы

- сарғаю*, гепатит*

- ангионевроздық ісіну, мультиформалы эритема, есекжем, эксфолиативті дерматит, Стивенс-Джонсон синдромы, фотосенсибилизация

- бауыр ферменттері деңгейінің жоғарылауы*

* Көпшілік жағдайларда холестазбен.

• рамиприлге (немесе АӨФ тежегіштеріне), амлодипинге, дигидропиридин туындыларына және/немесе қосымша заттардың кез келгеніне жоғары сезімталдық

• анамнезде ангионевроздық ісінудің болуы (АӨФ тежегіштерін немесе ангиотензин II рецепторларының антагонистерін (AРАТ II) қолданудан туындайтын алдыңғы ангионевроздық ісіну негізінде туындаған немесе идиопатиялық)

• теріс зарядталған беткейлермен қанның жанасуымен қатар жүретін экстракорпоральді емдеу

• бүйрек артерияларының екі жақты айқын стенозы немесе жалғыз жұмыс істейтін бүйректің бүйректік артерия стенозы

• жүктілік және лактация кезеңінде

• рамиприлді гипотензиялық немесе гемодинамикалық тұрақсыз жай-күйлері бар пациенттерге тағайындауға болмайды

• гипотензияның ауыр түрі

• шок (соның ішінде, кардиогенді шок)

• сол жақ қарыншадан қанның ағып шығуын бөгейтін тамырлардың тарылуы (мысалы, ауыр дәрежедегі қолқа стенозы)

• жедел миокард инфарктісін өткеруден кейінгі гемодинамикалық тұрақсыз жүрек жеткіліксіздігі

Ауыр анафилаксиялық немесе анафилактоидтық реакциялардың жоғары даму қауіптілігі салдарынан, өткізгіштігі жоғары жарғақша (мысалы, полиакрилонитрилді қосылыстардан жасалған жарғақшалар) арқылы гемодиализ, гемофильтрация немесе декстран сульфаты пайдаланылатын тығыздығы төмен липопротеиндер аферезі сияқты теріс зарядталған беткейлермен қанның жанасуымен қатар жүретін экстракорпоральді емшаралар. Егер осындай емдеу қажет болса, диализге арналған басқа типті жарғақшалар немесе басқа санаттағы гипертензияға қарсы дәрілер пайдалану мәселесін қарастыру керек.

Калий препараттарымен, калий жинақтаушы диуретиктермен және плазмалық калий деңгейлерін арттыратын басқа белсенді заттармен (соның ішінде, ангиотензин II рецепторлары антагонистері, триметоприм, такролимус, циклоспоринмен) бір мезгілде қабылдағанда гиперкалиемия дамуы мүмкін, сондықтан қан сарысуында калий деңгейін мұқит бақылау қажет.

Гипертензияға қарсы препараттармен (мысалы, диуретиктермен) және артериялық қысымды түсіре алатын басқа заттармен (мысалы, нитраттар, үш циклды антидепрессанттар, ауыруды басатын дәрілер, алкоголь, баклофен, альфузозин, доксазозин, празозин, тамсулозин, теразозинмен) бір мезгілде қабылдағанда гипотензия қаупі күшейіп кетуі мүмкін.

Вазопрессорлық симпатомиметиктермен және басқа да препараттармен (мысалы, изопротеренол, добутамин, допамин, адреналинмен) бір мезгілде қабылдағанда рамиприлдің гипертензияға қарсы әсері төмендеуі мүмкін, сондықтан артериялық қысымға мониторинг өткізу ұсынылады.

Аллопуринол, иммунодепрессанттар, кортикостероидтар, прокаинамид, цитостатиктермен және қан жасушаларының санын өзгерте алатын басқа препараттармен гематологиялық реакциялардың даму ықтималдығы артады.

АӨФ тежегіштерін литий препараттарымен бір мезгілде қабылдағанда оның бөлінуінің азаюы және, тиісінше, қандағы литий концентрациясы жоғарылап, оның уыттылығының артуына ұласуы мүмкін. Литий деңгейін жүйелі бақылау қажет.

Диабетке қарсы дәрілермен (инсулинді қоса) бір мезгілде қабылдағанда гипогликемиялық реакциялар дамуы мүмкін. Қандағы глюкоза деңгейін қатаң бақылап отыру ұсынылады.

Қабынуға қарсы стероидты емес препараттармен және ацетилсалицил қышқылымен бір мезгілде қабылдағанда рамиприлдің гипертензияға қарсы әсері төмендеуі мүмкін. Бұдан бөлек, ҚҚСП және АӨФ тежегіштерін біріктіріп қолдану гиперкалиемияның дамуын туындатып, бүйрек функциясының бұзылу қаупін арттыруы мүмкін.

Препараттың тиазидті диуретиктермен, β-блокаторлармен, ұзақ әсер ететін нитраттармен, нитроглицериннің тіл астына салатын дәрілік түрлерімен, қабынуға қарсы стероидты емес препараттармен, антибиотиктермен және ішуге арналған гипогликемиялық препараттармен үйлесуі қауіпсіз.

Препаратты жас пациенттерде CYP3A4 тежегіші – эритромицинмен және егде жастағы пациенттерде дилтиаземмен бір мезгілде қабылдағанда плазмалық амлодипин концентрациясы, тиісінше, 22% және 50% артады. Алайда, осы жағдайдың клиникалық мәні түсініксіз күйде қалады. CYP3A4 қуатты тежегіштерінің (мысалы, кетоконазол, итраконазол, ритонавир), дилтиаземге қарағанда, амлодипиннің плазмалық концентрацияларын көп дәрежеде арттыра алатынын жоққа шығаруға болмайды. Амлодипин CYP3A4 тежегіштерімен бірге тағайындалғанда сақтықпен пайдаланылу керек. Алайда, осындай өзара әрекеттесумен байланысты қандай да бір жағымсыз әсерлері жөнінде хабарламалар түспеген.

CYP3A4 индукторлары: CYP3A4 индукторларының амлодипинге әсер ету деректері жоқ. Препаратты CYP3A4 индукторларымен (мысалы, рифампицинмен немесе шілтерленген шайқураймен) біріктіріп қолдану плазмалық амлодипин концентрациясын төмендетуі мүмкін. Амлодипин CYP3A4 индукторларымен бірге тағайындалғанда сақтықпен пайдаланылу керек.

Дәрілік заттармен өзара әрекеттесуінің клиникалық зерттеулері барысында амлодипинді грейпфрут шырынымен, циметидин, алюминий/магний (антацидті препараттар) және силденафилмен бір мезгілде қолдану амлодипин фармакокинетикасына ықпал етпеген.

Амлодипинді гипертензияға қарсы басқа дәрілермен бір мезгілде қолдану олардың емдік тиімділігін күшейтеді.

Дәрілік заттармен өзара әрекеттесуінің клиникалық зерттеулері барысында амлодипин аторвастатин, дигоксин, этанол (этил спирті), варфарин немесе циклоспорин фармакокинетикасына ықпалын тигізбеген.

Амлодипиннің зертханалық зерттеулер көрсеткіштерін өзгертетін ықпалы анықталмаған.

Гипотензияның туындау қаупі жоғары пациенттер:

- Ренин-ангиотензин-альдостерон жүйесі аса зор белсенділенген пациенттер, әсіресе, АӨФ тежегіштері немесе қатарлас несеп айдаушы дәрілер алғаш тағайындалғанда немесе олардың дозалары бірінші рет арттырылғанда, АӨФ тежелісі салдарынан бүйрек функциясын нашарлататын және артериялық қысымды жедел түсіретін елеулі қауіпке ұшырайды.

Егер ренин-ангиотензин-альдостерон жүйесінің аса зор белсенділенуінің көрініс беруі мүмкін болса, қажет болғанда, медициналық қадағалау, соның ішінде артериялық қысымға мониторинг ұйымдастырылу керек:

• ауыр гипертензиясы бар пациенттерде;

• декомпенсацияланған іркілісті жүрек жеткіліксіздігі бар пациенттерде;

• сол жақ қарыншаға ағып келуі гемодинамикалық айқын білінетін немесе одан ағып шығуы қиындаған пациенттерде (мысалы, қолқа немесе митральді клапан стенозы);

• жалғыз жұмыс істейтін бүйректің бүйректік артериясының бір жақты стенозы бар пациенттерде;

• су-электролит теңгерімінің елеулі (немесе болжамды) бұзылулары бар пациенттерде (несеп айдаушы дәрілер қабылдайтын пациенттерді қоса);

• бауыр циррозы және/немесе асциті бар пациенттерде;

• күрделі хирургиялық операция жасалған немесе гипотензияны туындататын препараттар қолданумен анестезия жасалатын пациенттерде;

Жалпы, емдеу басталғанша сусыздану, гиповолемия немесе тұз тапшылығы жағдайларын түзетуге кеңес беріледі (жүрек жеткіліксіздігі бар науқастарда, дегенмен, көлемдік артық жүктеме қаупін ескерумен, осындай шаралардың артықшылығы мен кемшілігі мұқият таразылануы тиіс).

• миокард инфарктісін өткеруден кейінгі транзиторлы (өтпелі) немесе тұрақты жүрек жеткіліксіздігі бар пациенттерде;

• кардиальді немесе церебральді ишемияның даму қаупі бар пациенттерде немесе жедел гипотензия жағдайларында.

Емдеудің бастапқы сатысында мұқият медициналық қадағалау талап етіледі.

Гипертониялық кризде амлодипин қауіпсіздігі мен тиімділігі анықталмаған.

Препарат жүрек жеткіліксіздігі бар пациенттерге сақтықпен тағайындалу керек. Ауыр жүрек жеткіліксіздігі бар (NYHA бойынша III және IV класс) пациенттердің қатысуымен ұзаққа созылатын плацебо-бақыланатын зерттеу барысында өкпенің ісіну жағдайлары тіркелген, олардың туындау жиілігі амлодипин тағайындалған топта, плацебо тобымен салыстырғанда, жоғары болды, бірақ бұл одан да ауыр жүрек жеткіліксіздігімен қатар жүрмеген.

Бауыр функциясының бұзылулары бар пациенттерде амлодипиннің жартылай шығарылу кезеңі ұзарады; дозаны өзгерту жөнінде нұсқаулар жоқ. Осы топтың пациенттері амлодипинді сақтықпен қабылдауы тиіс.

Егде жастағы пациенттер амлодипинді абайлап қабылдауы тиіс.

Бүйрек функциясының бұзылулары бар пациенттерге амлодипинді әдеттегі дозаларда қабылдауға болады. Амлодипиннің плазмалық концентрацияларының өзгерістерінде концентрациялар бүйрек жеткіліксіздігі дәрежесімен өзара байланысты емес. Амлодипин диализ кезінде шығарылмайды.

Рамиприл сияқты АӨФ тежегіштерін қолдануды, мүмкіндігінше, хирургиялық араласу өткізуден бір күн бұрын тоқтату ұсынылады.

Бүйрек функциясын емдеу басталғанша және ем кезінде зерттеу қажет, ал препараттың дозалануы, әсіресе, емнің алғашқы апталарында түзетіледі. Бүйрек жеткіліксіздігі бар пациенттерге ерекше мұқият бақылау жүргізу қажет. Бүйрек функциясының, әсіресе, іркілісті жүрек жеткіліксіздігі бар пациенттерде немесе бүйрек трансплантациясынан кейін бұзылу қаупі болады.

Сирек жағдайларда АӨФ тежегіштерін, соның ішінде, рамиприл қабылдаған пациенттерде ангионевроздық ісінудің туындауы хабарланған.

Ангионевроздық ісіну туындағанда рамиприл қолдану тоқтатылуы тиіс. Бұл жағдайда шұғыл ем дәрілері мен әдістері дереу пайдаланылады. Пациент симптомдар толық басылғанша, кем дегенде, 12-24 сағат бойы қадағалауда болуы тиіс. АӨФ тежегіштерін, соның ішінде, рамиприл қабылдаған пациенттерде ішектік ангионевроздық ісінудің туындауы хабарланған. Бұл пациенттер іш аумағындағы ауыруға (жүрек айну немесе құсу симптомдарымен немесе оларсыз) шағымданды.

Сирек жағдайларда жәндіктердің шағып алуына болатын аллергиялық реакцияның профилактикасы немесе емдеу мақсатындағы десенсибилизация емінде препаратты қабылдаған пациенттерде ауыр, өмірге қатерлі анафилаксиялық реакциялар дамыды. Сондықтан десенсибилизация аяқталғанша рамиприл қабылдауды уақытша тоқтату мәселесін қарастыру керек.

АӨФ тежегіштерін, соның ішінде рамиприл қабылдаған кейбір пациенттерде гиперкалиемия байқалды. Гиперкалиемияның даму қаупі жоғары пациенттер тобына бүйрек жеткіліксіздігі бар пациенттер, егде жастағы (70 жастан асқан) пациенттер, қант диабеті бақыланбайтын пациенттер немесе калий тұздарын, құрамында калий бар диуретиктер және қан плазмасында калий деңгейінің жоғарылауына ықпал ететін басқа белсенді заттар қабылдайтын пациенттер, сондай-ақ сусыздану, жедел жүрек жеткіліксіздігі немесе метаболизмдік ацидоз сияқты жай-күйдегі пациенттер кіреді. Егер жоғарыда аталған дәрілік заттарды бір мезгілде қолдану мақсатқа сай болып табылса, қан сарысуындағы калий деңгейін жүйелі бақылау ұсынылады.

Нейтропения/агранулоцитоз, тромбоцитопения және анемия жағдайлары жөнінде, сондай-ақ сүйек кемігінің депрессиясы туралы сирек хабарламалар бар. Лейкопенияны мүмкіндігінше ертерек анықтау үшін лейкоциттер санын бақылау ұсынылады. Емдеудің бастапқы сатысында және бүйрек функциясының бұзылулары бар пациенттердің, сондай-ақ қатарлас коллагеноздары (мысалы, қызыл жегі немесе склеродермия) бар пациенттердің арасында және қан көрінісін өзгертуі мүмкін басқа дәрілік заттар қабылдаған пациенттердің бәрінде жиірек бақылау ұсынылады.

АӨФ тежегіштерін қабылдайтын қара нәсілді пациенттерде ангионевроздық ісіну басқа пациенттердегіден жиірек дамиды. Басқа АӨФ тежегіштері сияқты, рамиприл қара нәсілді пациенттерде, нәсілдік тегі басқа тұлғалармен салыстырғанда, аз гипотензиялық әсер көрсетуі мүмкін, бұл артериялық гипертензиясы бар қара нәсілді пациенттер қауымында ренин деңгейі төмен тұлғалар жиілігінің аса жоғары салдарынан болуы ықтимал.

Препаратты қабылдау жөтелу рефлексін тұрақты арттыратын құрғақ жөтелмен қатар жүруі мүмкін. Препаратты тоқтатқан соң жөтел басылуы мүмкін. Препарат қабылдаудан болатын жөтелді дифференциациялық-диагностикалық белгі деп санау керек.

Жүктілік және лактация кезеңі

Рамиприл сияқты АӨФ тежегіштері немесе ангиотензин II рецепторларының антагонистері (AРАТ II) жүктілік кезеңінде қарсы көрсетілімді. Егер АӨФ тежегіштері/AРАТ II қолданылатын емді жалғастыру қажет болса, жүктілікті жоспарлайтын пациент әйелдер емдік режимді оның жүктілік кезінде тағайындалуы кезінде қауіпсіздік талаптарына жауап беретін гипертензияға қарсы баламалы емге өзгертуі тиіс. Жүктілік расталғанда АӨФ тежегіштері/AРАТ II қолданылатын ем дереу тоқтатылуы тиіс ал қажет болса, баламалы ем қолдану басталуы тиіс.

Жүктіліктің I триместрі кезінде АӨФ тежегіштерінің әсерінен кейінгі тератогенділік қаупін айғақтайтын эпидемиологиялық деректердің жете сенімді емес, дегенмен, осындай қауіптің мардымсыз артуын жоққа шығаруға болмайды.

Жүктіліктің II және III триместрі кезінде АӨФ тежегіштерінің экспозициясы, белгілі болғандай, адамдарда фетоуыттануды (шаранада бүйрек дамуының бұзылуы, олигогидрамнион, бассүйек сүйектерінің баяу бітуі) және неонатальді уыттануды (бүйрек жеткіліксіздігі, гипотензия, гиперкалиемия) туындатады. Егер АӨФ тежегіштерінің экспозициясы жүктіліктің II триместрінде жүрсе, бүйрек функциясына және бассүйек сүйектерінің дамуына УДЗ өткізу ұсынылады. Аналары АӨФ тежегіштерін қабылдаған жаңа туған нәрестелер гипотензия, олигурия және гиперкалиемияның даму мүмкіндігі тұрғысынан мұқият қадағалануы тиіс.

Лактация кезеңі

Лактация кезеңінде рамиприл мен амлодипин қолдану жөнінде жеткілікті ақпарат болмағандықтан, осы кезеңде оларды қолдану қарсы көрсетілімді, әсіресе, лактация кезеңінде қауіпсіздік бейіндері айқын анықталған баламалы емдеу әдістерін таңдаған дұрыс.

Дәрілік заттың көлік құралдарын және қауіптілігі зор механизмдерді басқару қабілетіне әсер ету ерекшеліктері

Кейбір жағымсыз әсерлер (мысалы, бас айналу сияқты артериялық қысымның төмендеу симптомдары) пациенттің зейін қою және дер мезгілінде реакция беру қабілетін бұзуы мүмкін, демек, осы қабілеттер ерекше маңызды болатын жағдайларда (көлік құралдарын және аса қауіпті механизмдерді басқарғанда) қауіп дәрежесін арттырады. Әсіресе, бұл емдеудің басында немесе басқа препараттарды алмастырғанда орын алуы мүмкін. Препараттың бірінші дозасын қабылдаудан немесе келесіде оның дозалануын арттырудан кейін бірнеше сағат бойы көлік құралдарын және аса қауіпті механизмдерді басқаруға кеңес берілмейді.

Симптомдары: артық дозалану дәрежесіне қарай: шектен тыс шеткері вазодилатацияны (айқын гипотензиямен және шок көрінісімен), брадикардия, электролит теңгерімінің бұзылуын және бүйрек жеткіліксіздігін байқауға болады.

Емі: пациент жағдайы тұрақты бақылануы тиіс, ал тағайындалған ем симптоматикалық және демеуші сипатта болуы тиіс. Ұсынылатын шараларда бастапқы уытсыздандыру (асқазанды шаю, адсорбенттер қабылдау) және гемодинамикалық көрсеткіштер тұрақтылығын қалыпқа келтіру шаралары, соның ішінде альфа-1-адренергиялық агонистер немесе ангиотензин II (ангиотензинамид) тағайындау қамтылады. Рамиприлат жалпы қан ағымы арнасынан гемодиализ арқылы нашар шығарылады. Амлодипиннің артық дозалануынан туындайтын клиникалық айқын гипотензияда пациентті аяқтарын жоғары көтеріп жату қалпына көшіріп, жүрек функциясын және тыныс алу жүйесін, АҚК және бөлінетін несеп көлемін жүйелі бақылауды қоса, жүрек-қантамыр жүйесінің қызметіне қолдау көрсететін белсенді шаралар қабылдау керек. Тамыр тонусын және артериялық қысымды қалыпқа келтіру мақсатында, қарсы көрсетілімдері болмаса, тамыр тарылтатын дәрілер қолдануға (сақтықпен) болады. Кальций өзекшелерінің бөгелісін жою үшін кальций глюконатын вена ішіне енгізу тиімді болуы мүмкін. Кейбір жағдайларда асқазанды шаю пайдалы болуы мүмкін. Амлодипин ақуыздармен тығыз байланысатындықтан, гемодиализ жүргізу тиімділігі аз.

Шығарылу түрі және қаптамасы

Полиамидті/алюминий/поливинилхлоридті ламинацияланған үлбірден және алюминий фольгадан жасалған пішінді ұяшықты қаптамаға 6 капсуладан салады.

Пішінді 5 қаптамадан қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

3 жыл

Жарамдылық мерзімі өткеннен кейін пайдалануға болмайды.

Түпнұсқалық қаптамасында, 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Өтінім беруші

Adamed Limited Liability Company

Pienków 149, 05-152, Czosnów, Польша

Өндіруші

Pharmaceutical Works Adamed Pharma Joint Stock Company

33, Szkolna Str., 95-054 Ksawerów, Польша

Adamed Limited Liability Company

Pienków 149, 05-152, Czosnów, Польша

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы

«Пабьяницкий фармацевтикалық зауыты Польфа» АҚ ҚР өкілдігі 059000, Алматы қ., Абай даңғылы, 109В үй, «Глобус» бизнес орталығы, 13 қабат, 13-2 кеңсе. Тел./факс: +7(727) 2776977. E-mail: info.kz@adamed.com.pl