РАДА

Рада

Жоқ

Таблеткалар

Бір таблетканың құрамында

белсенді заттар: 0,02 мг этинилэстрадиол

0,075 мг гестоден

қосымша заттар: лактоза моногидраты, микрокристалды целлюлоза, повидон К-30, калий полакрилині, магний стеараты

Дөңгелек пішінді, бір жағында «С» және екінші жағында «34» өрнегі бар, ақ немесе ақ дерлік түсті таблеткалар.

Жыныс гормондары және жыныс жүйесінің модуляторлары.

Гестоден және эстрогендер

АТХ КОДЫ G03AA10

Фармакокинетикасы

• Гестоден

Сіңірілуі

Ішу арқылы қабылданған гестоден тез және толық сіңеді. Бір Рада таблеткасын қабылдаудан кейін гестоден сарысудағы 4 нг/мл тең ең жоғары концентрациясына 1 сағаттан соң жетеді. Гестоден биожетімділігі қабылданған дозаның 99% жуығын құрайды.

Таралуы

Гестоден сарысулық альбуминмен және жыныс гормондарын байланыстыратын глобулинмен (ЖГБГ) байланысады. Гестоденнің жалпы сарысулық деңгейінің 1-2% жуығы бос күйде болады, шамамен 50-70% ЖГБГ-мен спецификалық байланысқан.

Ақуыз байланыстыру синтезінің этинилэстрадиолмен индукциялануы нәтижесінде ЖГБГ-мен байланысқан фракция артады, ал альбуминмен байланысқан фракция төмендейді. Гестоденнің болжамды таралу көлемі 0,7 л/кг тең.

Метаболизмі

Гестоден стероидтарға тән метаболиздену жолынан өтіп, толық метаболизденеді. Сарысудан клиренс жылдамдығы 0,8 мл/мин/кг құрайды.

Шығарылуы

Қан сарысуындағы гестоден мөлшері екі фазалы төмендеуге ұшырайды. Жартылай шығарылу кезеңі терминалдық фазада 12-15 сағатқа жуық құрайды. Гестоден өзгеріссіз күйде шығарылмайды, тек метаболиттер түрінде ғана 24 сағатқа жуық жартылай шығарылу кезеңімен шамамен 6:4 арақатынасында несеппен және өтпен шығарылады.

Тепе-тең концентрациясы

Гестоден фармакокинетикасына этинилэстрадиол бір мезгілде қабылданғанда шамамен екі есе ұлғаятын қан сарысуындағы ЖГБГ деңгейіне ықпал етеді. Препаратты күнделікті қабылдау нәтижесінде сарысудағы заттар мөлшерінің деңгейі шамамен төрт есе артады, aл тепе-тең концентрациясына курстың екінші жартысында жетеді. Этинилэстрадиол

Сіңірілуі

Ішке қабылдаудан кейін этинилэстрадиол тез және толық сіңеді. Қан сарысуындағы шамамен 80 пг/мл тең ең жоғары концентрациясына 1-2 сағатта жетеді. Сіңуі және бауыр арқылы алғашқы пассаж кезінде этинилэстрадиол экстенсивті метаболизденеді, соның нәтижесінде ішке қабылдау кезіндегі оның биожетімділігі орта есеппен 60% жуық құрайды.

Метаболизмі

Этинилэстрадиол жіңішке ішектің шырышты қабығында және бауырда жүйе алдындағы конъюгациялануға ұшырайды. Этинилэстрадиол бастапқыда хош иісті гидроксилдену арқылы метаболизденеді, осы орайда бос метаболиттер түрінде де, глюкурон және күкірт қышқылымен конъюгаттар түрінде де болатын әр алуан гидроксилденген және метилденген метаболиттер түзіледі. Этинилэстрадиолдың метаболизмдік клиренс жылдамдығы 5 мл/мин/кг.

Тепе-тең концентрациясы

Тепе-тең концентрациясына 3-4 күн өткенде жетеді, осы уақыт ішінде сарысудағы этинилэстрадиол деңгейі, бір реттік дозаны қабылдаудан кейінгі деңгеймен салыстырғанда, 30-40% артады.

Фармакодинамикасы

Рада препаратының контрацептивтік әсері әр алуан факторлардың өзара әрекеттесуіне негізделеді, олардың ең маңыздылары – овуляция тежелуі және мойын шырышы секрециясының өзгеруі. Контрацептивтік әсерінен тыс, біріктіріп ішуге арналған контрацептивтер оң әсерін көрсетеді, бұл тууды бақылау әдісін таңдағанда ескерілу керек. Оралым жүйелі бола түседі, ауырсынулы етеккірлер сирек байқалады, қан кету қарқындылығы азаяды, соның нәтижесінде темір тапшылықты анемия қаупі төмендейді.

- ішуге арнаған контрацепция

Біріктіріп ішуге арналған контрацептивтер, соның ішінде Рада препараты да, жоғары контрацептивтік беріктігімен ерекшеленеді. «Сәтсіз әдіс» көрсеткіші жылына 1%-дан аспайды. Контрацептивтік беріктігі таблетканы өткізіп алғанда немесе оларды дұрыс қабылдамағанда төмендеуі мүмкін.

Таблетканы қаптамада көрсетілген ретпен, күн сайын шамамен белгілі бір уақытта аздаған су мөлшерімен ішке қабылдау керек. Үзіліссіз 21 күн бойы тәулігіне бір таблеткадан қабылданады. Әр келесі қаптаманы қабылдау тоқтату қан кетуі (етеккір тәрізді қан кету) байқалатын 7-күндік үзілістен соң басталады. Ол әдетте соңғы таблетканы қабылдаудан кейінгі 2-3 күні басталып, жаңа қаптаманы қабылдау басталғанша бітпеуі мүмкін.

Рада препаратын қалай қабылдау керек

Алдыңғы айда қандай бір гормональді контрацептивтер қабылдау болмағанда

Препарат қабылдау етеккір оралымының бірінші күні (соның ішінде етеккірлік қан кетудің бірінші күні) басталады. Етеккір оралымының 2-5 күні қабылдауды бастауға болады, бірақ бұл жағдайда бірінші қаптамадан таблетка қабылдаудың алғашқы 7 күнінде контрацепциялық бөгеу әдісін қосымша пайдалану ұсынылмайды.

Біріктірілген гормональді контрацептивтерден (біріктірілген ішуге арналған контрацептив, қынаптық сақина, трансдермальді бұласырдан) ауысқанда

Препарат қабылдауды алдыңғы қаптамадан құрамында гормон бар соңғы таблетканы қабылдаудан кейін келесі күні, бірақ ешбір жағдайда қабылдаудағы әдеттегі 7-күндік үзілістен кейінгі (құрамында 21 таблетка бар препараттар үшін) немесе құрамында гормон жоқ соңғы таблетканы қабылдаудан кейінгі (қаптамасында 28 таблетка болатын препараттар үшін) келесі күннен кешіктірмей бастаған дұрыс. Қынаптық сақинадан немесе трансдермальді бұласырдан ауысқанда препарат қабылдауды соңғы сақинаны немесе оралымдық қаптама бұласырын алып тастаған күні, бірақ ешбір жағдайда қынаптық сақина мен бұласыр қолданылуы тиіс күннен кешікпей қолданылуы тиіс.

Құрамында тек гестагендер бар контрацептивтерден (мини-пили, инъекциялық түрлері, имплантант) немесе гестагенді босатып шығаратын жатыр ішіндегі құралдан (ЖІҚ) ауысқанда.

Әйел мини-пилиден Рада препаратына кез келген күні (үзіліссіз), гестагені бар ЖІЖ немесе имплантаттан оны алып тастаған күні, инъекциялық түрден келесі инъекция жасалуы тиіс күннен бастап ауысуға болады. Барлық жағдайларда таблетка қабылдаудың алғашқы 7 күні ішінде контрацепцияның қосымша бөгеу әдісін пайдалану қажет.

Жүктіліктің бірінші триместріндегі аборттан кейін

Әйел препарат қабылдауды дереу бастауына болады. Осы шарт қадағаланса, әйелге қосымша контрацептивтік қорғаныс қажет болмайды.

Босанудан соң немесе жүктіліктің екінші триместріндегі аборттан кейін

Босанудан соң немесе жүктіліктің екінші триместрінде орын алған аборттан кейін препарат қабылдауды 21-28 күні бастау ұсынылады. Егер қабылдау кешірек басталса, таблетка қабылдаудың алғашқы 7 күні ішінде қосымша контрацепциялық бөгеу әдісін пайдалану қажет. Алайда, егер әйел жыныстық қатынаста болып үлгерсе, Рада препаратын қабылдау басталғанша жүктілік жоққа шығарылуы тиіс немесе алғашқы етеккірді күте тұру қажет.

Өткізіп алған таблеткаларды қабылдау

Егер таблетка қабылдаудағы кешігу 12 сағаттан аз болса, контрацептивтік қорғаныс төмендемейді. Әйел таблетканы мүмкіндігінше тезірек қабылдауы тиіс, келесі таблетка әдеттегі уақытта қабылданады.

Егер таблетка қабылдаудағы кешігу 12 сағаттан көп болса, контрацептивтік қорғаныс төмендеуі мүмкін. Бұл орайда келесі екі негізгі қағиданы жетекшілікке алуға болады:

• таблетка қабылдау ешқашан 7 күннен көпке үзілмеуі тиіс,

• таблетканы 7 күн үздіксіз қабылдау гипоталамус-гипофиз-аналық без жүйесінің талапқа сай бәсеңдеуіне жету үшін қажет болады.

Егер таблетка қабылдаудағы кешігу 12 сағаттан көп болса (соңғы таблетканы қабылдау сәтінен бастап аралық 36 сағаттан көп), тиісінше, мынадай кеңестер беруге болады.

Препарат қабылдаған алғашқы аптаның ішінде

Әйел өткізіп алған соңғы таблетканы бұл жөнінде еске түсірген бойда мүмкіндігінше тезірек (егер тіпті бұл екі таблетканы бір мезгілде қабылдауға тура келсе де) қабылдауы тиіс. Келесі таблетка әдеттегі уақытта қабылданады. Келесі 7 күн ішінде қосымша контрацепциялық бөгеу әдісі (мысалы, мүшеқап) пайдаланылуы тиіс. Егер жыныстық қатынастар таблетканы өткізіп алу алдындағы аптаның ішінде орын алса, жүкті болып қалу ықтималдығын ескеру қажет.

Қанша көп таблетканы өткізіп алса және олар белсенді заттар қабылдаудағы үзіліске жақын болған сайын, жүкті болу ықтималдығы сонша зор.

Препарат қабылдаған екінші аптаның ішінде

Әйел өткізіп алған соңғы таблетканы бұл жөнінде еске түсірген бойда мүмкіндігінше тезірек (егер тіпті бұл екі таблетканы бір мезгілде қабылдауға тура келсе де) қабылдауы тиіс. Келесі таблетка әдеттегі уақытта қабылданады.

Әйел бірінші өткізіп алған таблетканың алдындағы 7 күн ішінде таблетканы дұрыс қабылдаған жағдайда қосымша контрацептивтік шаралар пайдалану қажет емес. Керісінше жағдайда, сондай-ақ екі және одан көп таблетканы өткізіп алғанда қосымша контрацепциялық бөгеу әдістерін (мысалы, мүшеқап) пайдалану қажет.

Препарат қабылдаған үшінші аптаның ішінде таблеткалар қабылдауда болатын үзіліс салдарынан сенімділігінің төмендеу қаупі кепілді.

Әйел келесі екі нұсқаның біреуін қатаң түрде ұстануы тиіс. Бұл орайда егер бірінші өткізіп алған таблетканың алдындағы 7 күнде таблетка дұрыс қабылданған жағдайда қосымша контрацептивтік әдістер пайдалану қажеттілігі жоқ.

1. Әйел өткізіп алған соңғы таблетканы бұл жөнінде еске түсірген бойда мүмкіндігінше тезірек (егер тіпті бұл екі таблетканы бір мезгілде қабылдауға тура келсе де) қабылдауы тиіс. Келесі таблеткаларды ағымдағы қаптамадан таблеткалар біткенше әдеттегі уақытта қабылданады. Екінші қаптама біткенше тоқтату қан кету ықтималдығы аз, бірақ таблеткалар қабылдау кезінде жағынды бөліністер немесе құйылған қан кетулер білінуі мүмкін.

2. Әйел таблеткаларды ағымдағы қаптамадан қабылдағанда да үзіліс жасай алады. Артынан ол таблеткалар өткізіп алған күнді қоса, 7 күндік үзіліс жасап, жаңа қаптама қабылдауды бастауы тиіс.

Егер әйел таблеткалар қабылдауды өткізіп алса, ал артынан таблеткалар қабылдаудағы үзіліс кезінде онда тоқтату қан кетуі болмаса, жүктілікті жоққа шығару қажет.

Асқазан-ішек бұзылыстары жағдайындағы кеңестер.

Ауыр асқазан-ішек бұзылыстарында препараттың сіңуі толық болмауы мүмкін. Бұл жағдайда қосымша контрацепция шараларын қабылдау керек.

Егер әйелде препарат қабылдаудан кейін 3-4 сағат ішінде құсу байқалса, таблеткаларды өткізіп алуға қатысты кеңестерді бағдарға алу қажет. Егер әйел препарат қабылдаудың қалыпты режимін өзгерткісі келмесе, ол қажет болғанда басқа қаптамадан қосымша таблеткалар (немесе бірнеше таблетка) қабылдауы тиіс.

Етеккір оралымының басталу күнін өзгерту.

Етеккірдің басталуын кейінге шегеру үшін әйел препараттың жаңа қаптамасынан таблеткалар қабылдауды алдыңғысының барлық таблеткаларын қабылдап біткен соң бірден қабылдаудағы үзіліссіз жалғастыруы тиіс. Осы жаңа қаптамадан таблеткаларды әйел қанша қаласа, сонша ұзақ (қаптама бітетін сәтке дейін) қабылдануына болады. Екінші қаптамадан препарат қабылдау аясында әйелде жағынды бөліністер немесе жатырдан құйылған қан кетулер білінуі мүмкін. Жаңа қаптамадан Рада препаратын қабылдауды әдеттегі 7-күндік үзілістен соң жаңғыртқан жөн.

Етеккірдің басталу күнін аптаның басқа күніне ауыстыру үшін әйел таблеткалар қабылдаудағы жуық үзілісті өзі қанша қаласа, сонша күнге қысқарту керек. Аралық қанша қысқа болса, онда тоқтату қан кетуінің болмау қаупі сонша жоғары, ал әріқарай, екінші қаптамадан қабылдау кезінде жағынды қанды бөліністер және құйылған қан кетулер (ол етеккірдің басталуын кейінге шегергісі келетін жағдайдағы сияқты) болады.

Пациенттердің ерекше санаттарына арналған қосымша ақпарат

Балалар және жасөспірімдер

Рада препараты менархе басталуынан кейін ғана көрсетілімді.

Егде жастағы пациенттер

Қолданылмайды. Рада препараты менопауза басталуынан кейінгі әйелдерге көрсетілмеген.

Бауыр тарапынан бұзылулары бар пациенттер

Рада препараты бауырының ауыр аурулары бар әйелдерге қарсы көрсетілімді («Қолдануға болмайтын жағдайлар» бөлімін де қараңыз).

Бүйрек тарапынан бұзылулары бар пациенттер

Рада препараты бүйрек аурулары бар әйелдерде арнайы зерттелмеген. Қолда бар деректерде осындай пациенттерде емдеуді өзгерту көзделмейді.

Рада препаратымен емделу үдерісінде жүрек айну, іштің ауыруы, дене салмағын қосу, бас ауырулары, көңіл-күйдің түсіп кетуі, көңіл-күй өзгерістері, сүт бездерінің ауыруы және кернелуі сияқты жағымсыз реакциялар ең көп жиі хабарланған. Олар ≥1% жиілікте кездесті. Күрделі жағымсыз реакциялар артериялық және веналық тромбоэмболияны қамтиды.

Келесі жағымсыз әсерлер біріктірілген ішуге контрацептивтер қабылдайтын әйелдерде сипатталған, ал олардың препаратпен өзара байланысы әрі расталмаған, әрі жоққа шығарылмаған:

Жиі (≥1/100)

- жүрек айну, іштің ауыруы

- дене салмағын қосу

- бас ауыру, көңіл-күйдің түсіп кетуі, көңіл-күй өзгерістері

- сүт бездерінің ауыруы және кернелуі

Жиі емес (≥1/1000, 1/100)

- жүрек айну, диарея

- сұйықтық іркілісі

- бас сақинасы

- либидо төмендеуі

- сүт бездерінің ұлғаюы

- бөртпе, есекжем

Сирек (1/1000)

- жанаспалы линзалардың нашар жағымдылығы

- аса жоғары сезімталдық реакциялары

- дене салмағының төмендеуі

- либидо жоғарылауы

- қынаптық бөліністер, сүт бездерінің бөліністері

- түйінді эритема, мультиформалы эритема

- веналық және артериялық тромбоэмболиялық бұзылулар**

** - Біріктірілген ішуге арналған контрацептивтер қолданатын топтың эпидемиологиялық зерттеулер деректеріне негізделген болжамды жиілігі

- «Веналық және артериялық тромбоэмболиялық бұзылулар» келесі аурулар мен жай-күйлерді жиынтықтайды:

терең шеткері веналар окклюзиясы, өкпе тамырларының тромбозы және эмболиясы /окклюзиясы, тромбоз, эмболия және миокард инфарктісі/ми инфарктісі және геморрагиялық емес сипаттағы инсульт

• Жекелеген жағымсыз реакциялар сипаттамасы.

Біріктірілген ішуге арналған контрацептивтер тобының препараттарымен өзара байланысты болуы мүмкін деп қарастырылатын жиілігі өте төмен немесе симптомдар дамуының басталуы кешіккен жағымсыз реакциялар төменде тізбеленген.

Ісіктер

- сүт безі обырының диагноз жиілігі ішуге арналған контрацептивтер қабылдайтын әйелдер арасында сәл жоғары. Сүт безінің обыры 40 жасқа толмаған әйелдерде сирек білінетіндіктен, осы аурудың жалпы даму қаупіне қатысты диагноздар санының көбеюі мардымсыз. Оның біріктірілген ішуге арналған контрацептивтер қабылдаумен байланысы дәлелденбеген

- бауыр ісіктері (қатерсіз және қатерлі).

Басқа жағдайлар

- гипертриглицеридемиясы бар әйелдер біріктірілген ішуге арналған контрацептивтерді пайдаланғанда панкреатиттің даму қаупі жоғары болады

- артериялық гипертензия

- біріктірілген ішуге арналған контрацептивтер қабылдаумен өзара байланысы дәлелденбеген жай-күйлердің білінуі немесе нашарлауы: холестазбен байланысты сарғаю және/немесе қышыну; өт қалтасында тастардың түзілуі; порфирия; жүйелі қызыл жегі; гемолиздік уремиялық синдром; Сиденгам хореясы; жүктілер герпесі; отосклерозбен байланысты естімей қалу

- тұқым қуалайтын ангионевроздық ісінуі бар әйелдерде экзогенді эстрогендер аталған аурудың симптомдарына түрткі болуы немесе оны өршітуі мүмкін

- бауыр функциясының бұзылулары

- глюкозаға төзімділіктің өзгеруі немесе шеткері инсулинге төзімділік әсерлері

- Крон ауруы және спецификалық емес ойық жаралы колит

- хлоазма.

Өзара әрекеттесулер

Рада препараты әйелде төменде тізбеленген жай-күйлердің қандай да бірі болғанда қолданылмауы тиіс. Егер осы жағдайлардың қандай да бірі қабылдау аясында алғаш дамыса, препарат дереу тоқтатылуы тиіс.

- препарат компоненттерінің кез келгеніне аса жоғары сезімталдық

- қазіргі уақыттағы немесе анамнездегі тромбоздар/тромбоэмболиялар (веналық және артериялық) (терең веналар тромбозы, өкпе артериясының тромбоэмболиясы, миокард инфарктісі)

- қазіргі уақыттағы немесе анамнездегі тромбоздың алдында болатын жай-күйлер (транзиторлы ишемиялық шабуылдар, стенокардия)

- қазіргі уақыттағы немесе анамнездегі цереброваскулярлық бұзылулар (инсульт)

- анамнезде ошақтық неврологиялық симптомдармен болатын бас сақинасы

- веналық немесе артериялық тромбоздың жоғары даму қаупі:

• тамыр асқынуларымен болатын қант диабеті

• айқын артериялық гипертензия

• айқын дислипопротеинемия

- қазіргі уақыттағы немесе анамнездегі бауырдың ауыр аурулары (бауыр тестілері қалыпқа түскенше)

- веналық немесе артериялық тромбозға тұқым қуалау себебінен болатын немесе жүре пайда болатын бейімділік (мысалы, белсендірілген С протеиніне төзімділік, антитромбин III, протеин С немесе протеин S тапшылығы, гипергомоцистеинемия және фосфолипидке қарсы антиденелер (кардиолипинге антиденелер және жегілік антикоагулянт))

- қазіргі уақыттағы немесе анамнездегі айқын гипертриглицеридемиямен болатын панкреатит

- қазіргі уақыттағы немесе анамнездегі бауыр ісіктері (қатерсіз немесе қатерлі)

- верификацияланған гормонға тәуелді қатерлі аурулар (жыныс мүшелерінің немесе сүт бездерінің) немесе олардан күдіктену

- шығу тегі түсініксіз қынаптан қан кету

- жүктілік немесе одан күдіктену

Дәрілермен өзара әрекеттесуі

Басқа дәрілік заттардың Рада препаратына әсерлері.

Бауыр ферменттерін индукциялайтын дәрілік заттармен өзара әрекеттесуі мүмкін, бұл жыныс гормондары клиренсінің арта түсуіне ықпал етіп, құйылған қан кетулерге және/немесе препараттың контрацептивтік тиімділігінің төмендеуіне әкелуі мүмкін.

Осындай препараттарды қабылдау кезінде, әйел препаратқа толықтыру ретінде контрацепциялық бөгеу әдісін қосымша пайдалану немесе контрацепцияның басқа әдісін таңдау керек. Бұл орайда, контрацепциялық бөгеу әдісін препараттарды қатарлас қабылдау кезеңі бойына және оларды тоқтатудан кейін 28 күн пайдалану керек. Егер қалаусыз жүктіліктен сақтанудың бөгеттік әдісін пайдалану кезеңі қаптамадағы таблеткалардан кешірек аяқталса, Рада препараты таблеткасын қабылдаудағы әдеттегі үзіліссіз келесі қаптамаға көшу керек.

Жыныс гормондары клиренсін арттыратын (бауыр ферменттерінің индукциясы салдарынан біріктірілген гормональді контрацептивтер тиімділігін төмендететін) заттар, мысалы:

фенитоин, барбитураттар, примидон, карбамазепин және рифампицин; окскарбазепин, топирамат, фелбамат, гризеофульвин және құрамында шайқурай бар препараттарға қатысты да болжамдар бар.

Біріктірілген гормональді контрацептивтер клиренсіне әртүрлі әсерлері бар заттар.

Біріктірілген ішуге арналған контрацептивтермен біріктіріп қолданғанда көптеген АИТВ/HCV-протеаза тежегіштері және нуклеозидті емес кері транскриптаза тежегіштері қан плазмасында эстрогендер немесе прогестиндер концентрациясын арттыруы немесе төмендетуі мүмкін. Атап көрсетілген өзгерістер кейбір жағдайларда релевантты мәнге ие болуы мүмкін.

Біріктірілген гормональді контрацептивтер клиренсін төмендететін заттар (ферменттер тежегіштері).

Зеңге қарсы препараттар (мысалы, итраконазол, вориконазол, флуконазол), верапамил, макролидтер (мысалы, кларитромицин, эритромицин), дилтиазем және грейпфрут шырыны сияқты CYP3A4 күшті және орташа тежегіштері қан плазмасында эстрогеннің немесе прогестиннің немесе екі заттың да концентрациясын арттыруы мүмкін.

Эторикоксиб күніне 60-тан 120 мг дейінгі дозада құрамында 0,035 мг этинилэстрадиол бар біріктірілген гормональді контрацептивтермен бір мезгілде қабылдағанда плазмадағы этинилэстрадиол концентрациясын 1,4-1,6 есе арттырады.

Біріктірілген гормональді контрацептивтердің басқа препараттарға әсері

Біріктірілген ішуге арналған контрацептивтер кейбір басқа препараттар метаболизміне ықпал етуі мүмкін, бұл олардың қан плазмасында және тіндерде концентрациясының артуына (мысалы, циклоспорин) немесе азаюына (мысалы, ламотриджин) алып келеді.

Сақтану шаралары және сақтандырулар.

Егер төменде көрсетілген жағдайлардың/қауіп факторларының қандай да бірі қазіргі уақытта бар болса, әрбір жеке жағдайда Рада препаратымен емделудің ықтималды қаупі мен күтілетін пайдасын мұқият таразылап, оны әйелмен ол препарат қабылдай бастауды шешкенше талқылап алу керек. Осы жай-күйлер мен қауіп факторларының кез келгені күшейген немесе бірінші білінген жағдайда препаратты тоқтату шешімін қабылдау қажет.

Жүрек-қантамыр жүйесінің аурулары.

Зерттеулер нәтижелері біріктірілген ішуге арналған контрацептивтер қолдану мен веналық және артериялық тромбоздар және миокард инфарктісі, терең веналар тромбозы, өкпе артериясының тромбоэмболиясы сияқты тромбоэмболиялық үдерістер және цереброваскулярлық бұзылулар арасында өзара байланыс бар екенін көрсетеді. Аталған аурулар сирек білінеді.

Біріктірілген ішуге арналған контрацептивтер қабылдаған алғашқы жылы веналық тромбоэмболияның (ВТЭ) даму қаупі барынша жоғары. Жоғары қауіп біріктірілген ішуге арналған контрацептивтерді бастапқы пайдаланудан немесе бір ғана немесе әртүрлі біріктірілген ішуге арналған контрацептивтер пайдалануды жаңғыртудан кейін (препаратты 4 апта және одан көп қабылдаулар арасындағы үзілістен соң) болады. Пациенттердің 3 тобы қатысқан ірі клиникалық зерттеу деректері осы жоғары қауіптің көбінесе алғашқы 3 ай бойы сақталатынын көрсетеді.

Эстроген дозасы төмен (50 мкг этинилэстрадиолдан аз) біріктірілген ішуге арналған контрацептивтер қабылдайтын пациент әйелдерде веналық тромбоэмболияның жалпы қаупі жүкті болмағанда оларды пайдаланбайтын әйелдердегіден 2-3 есе жоғары, дегенмен де, вена тромбоэмболиясының жүктілік және босану кезіндегі қаупімен салыстырғанда, бұл қауіп төменірек күйде қалады.

Веналық тромбоэмболия өмірге қатерлі болуы немесе 1-2% жағдайда өліммен аяқталуға әкелуі мүмкін.

Терең веналар тромбозы және/немесе өкпе артериясының эмболиясы ретінде көрініс беретін веналық тромбоэмболия біріктірілген ішуге арналған контрацептивтердің кез келгенін пайдалану кезінде болуы мүмкін.

Біріктірілген ішуге арналған контрацептивтер қабылдайтын әйелдерде басқа қан тамырларының, мысалы, бауыр, мезентериальді, бүйрек, церебральді артериялар мен веналардың, сонымен бірге торқабық тамырлары тромбозының аса сирек жағдайлары сипатталған.

Терең веналар тромбозының симптомдары: аяқтың біржақты немесе аяқтағы венаны бойлай ісінуін, тік тұрған қалыпта немесе жүрген кезде ғана болатын аяқтың ауыруы немесе жайсыздануын, зақымданған аяқ-қол температурасының жергілікті көтерілуін, аяқтағы тері жабындарының қызаруы немесе реңінің өзгеруін қамтиды.

Өкпе артериясы тромбоэмболиясының симптомдарына: түсініксіз ентігудің немесе жиі тыныс алудың кенеттен басталуы, қан түкірумен қатар жүруі мүмкін күрт жөтел шабуылы, терең тыныс алғанда күшеюі мүмкін кеуде қуысының жедел ауыруы, үрейлену сезімі, қатты бас айналу; жүректің жиілеген немесе жүйесіз соғуы жатады. Осы симптомдардың кейбірі (мысалы, «ентігу» және «жөтел») спецификалық емес және осыған орай едәуір жиі және ауырлығы аз бұзылулардың белгілері (мысалы, тыныс алу жолдарының инфекциялары) ретінде қате түсіндірілуі мүмкін.

Артериялық тромбоэмболия өзінде цереброваскулярлық бұзылуларды, тамырлар окклюзиясын немесе миокард инфарктісін қамтуы мүмкін.

Цереброваскулярлық бұзылулар симптомдары кенеттен әлсіреу немесе беттің, әсіресе, дененің бір жағында қол мен аяқтың ұйып қалуы, кенеттен сананың шатасуы, сөйлеудің бұзылуы немесе қабылдау қабілетінің қиындықтары; бір немесе екі көздің күрт нашарлауы, жүріс-тұрыстың кенет бұзылуы, бас айналу, тепе-теңдікті немесе қозғалыс үйлесімін жоғалту, көрінетін себепсіз кенеттен ауыр немесе ұзаққа созылатын бас ауыру, ұстамамен немесе онсыз санадан айрылу немесе естен тану болуы мүмкін. Тамырлар окклюзиясының басқа белгілері кенеттен ауыру, аяқ-қолдың ісінуі немесе әлсіз көгеруі, «жедел іштеспе» симптомдары да болуы мүмкін.

Миокард инфарктісінің симптомдарына: ауыру, жайсыздану, қысым, ауырлық, кеудедегі, қолдағы немесе төс артындағы қысылу немесе кернелу сезімі, арқаға, бет сүйегіне, көмейге, қолға, асқазанға берілетін жайсыздық сезімі, асқазандағы толып кету немесе кернеп кету сезімі, тұншығу сезімі, суық тер, жүрек айну немесе бас айналу, қатты әлсіреу, үрей сезімі, ентігу, жүректің жиілеген немесе жүйесіз соғуы жатады.

Артериялық тромбоэмболиялық үдерістер өмірге қатерлі болуы немесе өліммен аяқталуы мүмкін.

Қауіп факторларының бірнешеуі біріккен немесе қауіп факторларының біреуінің айқындылығы аса жоғары әйелдерде тромбоздың жоғары синергиялық қауіп ықтималдығын ескеру керек.

Ондай жағдайларда жоғарылаған қауіп барлық факторларды есепке алатын жай жиынтық қауіптен жоғары болуы мүмкін. Рада препаратын қауіп/ артықшылық арақатынасы теріс бағаланған жағдайда тағайындауға болмайды («Қолдануға болмайтын жағдайлар» бөлімін қараңыз).

Тромбоздың (веналық және/немесе артериялық), тромбоэмболиялық немесе цереброваскулярлық бұзылулардың даму қаупі артады:

- жас ұлғаюымен;

- шылым шегушілерде (темекілер санының көбеюімен немесе жас ұлғаюымен қауіп әріқарай, әсіресе, 35 жастан асқан әйелдерде артады);

- отбасылық анамнез болғанда (яғни, жақын туыстарының немесе ата-анасының жасырақ кезінде қашан болса да болған веналық немесе артериялық тромбоэмболия), егер тұқым қуалайтын бейімділік белгілі болса немесе жорамалданса, әйел біріктірілген ішуге арналған контрацептивтер қабылдау мүмкіндігінің мәселесін шешу үшін дәрігермен кеңесу қажет;

- семіздікте (дене салмағы индексі 30 кг/м2 көп);

- дислипопротеинемияда;

- артериялық гипертензияда;

- бас сақинасында;

- жүрек клапандарының ауруларында;

- жүрекшелер фибрилляциясында;

- ұзаққа созылатын иммобилизацияда, күрделі хирургиялық араласуда, аяқтарға жасалатын кез келген операцияда немесе ауқымды жарақатта. Осы жағдайларда біріктірілген ішуге арналған контрацептивтер пайдалануды тоқтатып (жоспарланған операция жағдайында, кем дегенде, одан төрт апта бұрын), иммобилизация аяқталған соң екі апта ішінде қабылдауды жаңғыртпаған дұрыс.

Веналық тромбоэмболиялар дамуында веналардың варикозды кеңеюінің және беткейлік тромбофлебиттің атқаруы мүмкін рөлі туралы мәселе таласты күйінде қалады. Босанудан кейінгі кезеңде тромбоэмболияның жоғары даму қаупін ескеру керек.

Айналымдық бұзылулар қант диабеті, жүйелі қызыл жегі, гемолиздік-уремиялық синдром, ішектің созылмалы қабыну аурулары (Крон ауруы немесе спецификалық емес ойық жаралы колит) және орақша пішіндес-жасушалы анемия кезінде де білінуі мүмкін.

Біріктірілген ішуге арналған контрацептивтер қолдану кезінде бас сақинасы жиілігі мен ауырлығының артуы (бұл цереброваскулярлық бұзылуларға жол ашуы мүмкін) осы препараттар қабылдауды дереу тоқтатуға негіз болуы мүмкін.

Қауіп/артықшылық арақатынасын бағалағанда дәрігер сәйкесті жай-күйді талапқа сай емдеудің сонымен байланысты тромбоздың даму қаупін азайтуы мүмкін екенін ескеру керек. Жүктілік кезінде тромбоздар мен тромбоэмболиялар қаупінің де төмен дозаланған біріктірілген ішуге арналған контрацептивтер (0,05 мг этинилэстрадиолдан аз) қабылдау кезіндегіден жоғары екенін ескеру қажет.

Ісіктер.

Жатыр мойны обырын дамытатын ең елеулі қауіп факторы вирустық инфекция – персистирлеуші адам папилломасы (HPV) болып табылады. Біріктірілген ішуге арналған контрацептивтерді ұзақ уақыт қолданғанда жатыр мойны обырының даму қаупінің сәл жоғарылауы жөнінде хабарлама бар, алайда оның басқа факторлармен, соның ішінде жатыр мойнын қарап тексеру жиілігімен және, контрацепциялық бөгеу әдістерін пайдалануды қоса, жыныстық мінез-құлық ерекшеліктерімен қандай дәрежеде байланысты болуы мүмкін екені туралы деректер қарама-қайшы күйде қалады.

Жүргізілген зерттеулерде зерттеу сәтінде біріктірілген ішуге арналған контрацептивтерді пайдаланған әйелдерде диагностикаланған сүт безі обыры дамуының біршама жоғары салыстырмалы қаупі бар екені көріністелді (RR=1.24). Жоғары қауіп осы препараттарды қабылдау тоқтатылған соң 10 жыл ішінде біртіндеп басылады. Сүт безі обырының 40 жасқа толмаған әйелдерде сирек білінуіне байланысты, қазіргі уақытта біріктірілген ішуге арналған контрацептивтер қабылдап жүрген немесе таяуда қабылдаған әйелдерде сүт безі обырының диагноздар санының көбеюі осы ауру дамуының жалпы қаупіне қатысты болымсыз. Оның біріктірілген ішуге арналған контрацептивтер қабылдаумен байланысы дәлелденбеген. Байқалған қауіп жоғарылауы біріктірілген ішуге арналған контрацептивтер қолданатын әйелдерде сүт безі обырын ертерек диагностикалау, біріктірілген ішуге арналған контрацептивтердің биологиялық әсерлері немесе екі фактордың да бірігуі салдарынан болуы мүмкін. Біріктірілген ішуге арналған контрацептивтер пайдаланған әйелдерде оларды ешқашан қолданбаған әйелдердегіден клиникалық тұрғыда аз білінетін сүт безінің обыры анықталады.

Біріктірілген ішуге арналған контрацептивтер қолдану аясындағы сирек жағдайларда бауырдың қатерсіз ісіктерінің дамуы, тағы одан да сирек жағдайларда бауырдың қатерлі ісіктерінің дамуы байқалған. Жекелеген жағдайларда бауыр ісіктері өмірге қатерлі интраабдоминальді қан кетулерге әкелуі мүмкін. Іштің жоғарғы тұсының қатты ауыруы, бауыр ұлғаюы немесе интраабдоминальді қан кету белгілері білінген жағдайда дифференциациялық диагноз жүргізілгенде бауырдың ісігін ескеру керек.

Қатерлі ісіктер өмірге қатерлі болуы немесе өліммен аяқталуы мүмкін.

Басқа жағдайлар.

Гипертриглицеридемиясы бар әйелдерде (немесе отбасылық анамнезде осы жағдай болғанда) біріктірілген ішуге арналған контрацептивтер қабылдау кезінде панкреатиттің даму қаупі артуы мүмкін.

Тұқым қуалайтын ангионевроздық ісіну бар әйелдерде экзогенді эстрогендер аталған аурудың симптомдарына түрткі болуы немесе оларды өршітуі мүмкін.

Бауыр функциясының жедел немесе созылмалы аурулары болғанда бауыр функциясы көрсеткіштерінің қалып шегіне оралуына дейін біріктірілген ішуге арналған контрацептивтер пайдалануды тоқтату мәселесін шешу қажет.

Жүктілік немесе жыныс гормондарын алдыңғы қабылдау кезінде алғаш дамитын қайталамалы холестаздық сарғаю дамуында біріктірілген ішуге арналған контрацептивтер қабылдауды тоқтату керек.

Біріктірілген ішуге арналған контрацептивтер қабылдау инсулинге төзімділікке және глюкозаға төзімділікке ықпалын тигізуі мүмкін болса да, төмен дозаланған біріктірілген ішуге арналған контрацептивтер (<0,05 мг этинилэстрадиол) пайдаланатын қант диабетімен науқастарда емдік режимді өзгерту қажеттілігі жоқ. Дегенмен де, қант диабеті бар әйелдер біріктірілген ішуге арналған контрацептивтер қабылдау кезінде мұқият қадағалануы тиіс.

Біріктірілген ішуге арналған контрацептивтер қолдану аясында Крон ауруының және спецификалық емес ойық жаралы колит көріністері байқалған.

Біріктірілген ішуге арналған контрацептивтер қабылдау кезінде хлоазмаға бейімділігі бар әйелдер күн астында ұзақ аялдау және ультракүлгінді сәулелену әсерінен сақтануы тиіс.

Лактоза.

Лактозасыз диетада жүрген галактоза жақпаушылығы, Lapp лактаза тапшылығы немесе глюкоза-галактоза мальабсорбциясы сияқты сирек тұқым қуалайтын бұзылулары бар пациент әйелдер препарат құрамындағы лактоза мөлшерін ескеру керек.

Медициналық тексерулер

Әйелге препарат қолдануды бастар алдында, сондай-ақ препаратты қолдану үдерісінде мезгіл-мезгіл мұқият жалпы медициналық және гинекологиялық тексеруден (артериялық қысымды өлшеуді, сүт бездерін, құрсақ қуысы және кіші жамбас ағзаларын зерттеуді, соның ішінде цервикальді шырыштың цитологиялық зерттеуін қоса) өтуге, жүктіліктің бар-жоғын анықтауға кеңес беріледі. Мезгіл-мезгіл медициналық тексеру өткізу маңызды, өйткені қарсы көрсетілімдер (мысалы, транзиторлы ишемиялық шабуылдар және басқалары) немесе қауіп факторлары (мысалы, тұқым қуалайтын веналық немесе артериялық тромбоздарға бейімділік) препаратты қолдану үдерісінде көрініс беруі мүмкін.

Әйелге Рада типті препараттардың АИТВ инфекциясынан (ЖИТС) және жыныс жолымен берілетін басқа аурулардан қорғамайтынын ескерту керек!

Тиімділіктің төмендеуі

Біріктірілген ішуге арналған контрацептивтік препараттар тиімділігі таблеткаларды өткізіп алғанда, құсу және диарея кезінде немесе дәрілік өзара әрекеттесу нәтижесінде төмендеуі мүмкін.

Етеккір оралымына ықпалы

Біріктірілген ішуге арналған контрацептивтер қабылдау аясында, әсіресе, қолданудың алғашқы айларының ішінде жүйесіз қан кетулер (жағынды қанды бөліністер немесе құйылған қан кетулер) білінуі мүмкін. Сондықтан, кез келген жүйесіз қан кетулерге шамамен үш оралыммен болатын дағдылану кезеңінен кейін бағалау жүргізілуі тиіс.

Егер жүйесіз қан кетулер алдыңғы жүйелі оралымдардан кейін қайталанса немесе дамыса, қатерлі жаңа түзілімдерді немесе жүктілікті жоққа шығару үшін мұқият тексеру жүргізген жөн.

Кейбір әйелдерде таблетка қабылдаудағы үзіліс кезінде тоқтату қан кету дамымауы мүмкін. Егер біріктірілген ішуге арналған контрацептивтер нұсқауларға сай қабылданса, әйелдің жүкті болу ықтималдығы аз. Дегенмен де, егер осыған дейін біріктірілген ішуге арналған контрацептивтер жүйесіз қабылданса немесе егер тоқтату қан кетуі қатарынан екі рет болмаса, препарат қабылдауды жалғастырғанша жүктілік жоққа шығарылуы тиіс.

Балалар мен жасөспірімдерде қолдану

Рада препаратын тек етеккір басталуынан кейін қолдану керек.

Жүктілік және лактация кезеңі

Рада препараты жүктілік кезінде тағайындалмайды. Егер препарат қабылдау кезінде жүктілік анықталса, бірден оны қабылдауды тоқтату қажет. Алайда, ауқымды эпидемиологиялық зерттеулерде жүктілікке дейін біріктірілген ішуге арналған контрацептивтер қабылдаған әйелдерден туған балаларда даму ақауларының ешқандай жоғары қаупі немесе жүктіліктің ерте мерзімдерінде біріктірілген ішуге арналған контрацептивтер абайсыз қабылданғанда болған тератогенді әсерлері анықталмаған.

Біріктірілген ішуге арналған контрацептивтер қабылдау емшек сүтінің мөлшерін азайтып, оның құрамын өзгертуі мүмкін, сондықтан, бала емізуді тоқтатқанша жалпы оларды пайдаланбауға кеңес беріледі. Жыныс стероидтарының және/немесе олардың метаболиттерінің аздаған мөлшері сүтпен шығарылуы мүмкін.

Дәрілік заттың автокөлікті және қауіптілігі зор механизмдерді басқару қабілетіне әсер ету ерекшеліктері.

Препараттың автокөлікті және аса қауіпті механизмдерді басқару қабілетіне әсері байқалмаған.

Артық дозалануы кезінде күрделі жағымсыз әсерлері хабарланбаған. Симптомдары: жүрек айну, құсу және, жас қыз балаларда, болымсыз қынаптық қан кету.

Емі: арнайы антидоты жоқ; симптоматикалық ем жүргізген жөн.

Шығарылу түрі және қаптамасы

ПВХ/ПВДХ/алюминий фольгадан жасаған пішінді ұяшықты қаптамада 21 таблеткадан.

Пішінді ұяшықты 1 қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

30 °С-ден аспайтын температурада сақтау керек.

Балалардың қолы жетпейтін жерде сақтау керек!

3 жыл

Жарамдылық мерзімі өткеннен кейін қолдануға болмайды.

Рецепт арқылы

Өндіруші

Лабораториос Леон Фарма С.А., Испания

Алвоген ИПКо С.ар.Л, Люксембург

Қазақстан Республика аумағындағы тұтынушылардан дәрілік заттар сапасына қатысты шағымдар қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы

«Алвоген Фарма Трейдинг Юроп ЕООД» өкілдігі

050026, Алматы қ., Бөгенбай батыр к-сі 241,

«Ордабасы» бизнес орталығы, 507 кеңсе,

тел.: 378 22 82, факс: 378 21 55

Электронды пошта: drugsafety.kz@alvogen.com;

сайт: www.alvogen.com