Протопик® (мазь, 0.1%)
Инструкция
-
русский
-
қазақша
Саудалық атауы
Протопик®
Халықаралық патенттелмеген атауы
Такролимус
Дәрілік түрі
Сыртқа қолдануға арналған 0.03% және 0.1% жақпамай
Құрамы
100 г жақпамайдың құрамында
белсенді зат - 0,03 г немесе 0,1 г такролимус (такролимус моногидратына баламалы)
қосымша заттар: ақ жұмсақ парафин, сұйық парафин, пропиленкарбонат, араның ақ балауызы, қатты парафин.
Сипаттамасы
Ақтан сәл сарғыштау түске дейінгі жақпамай
Фармакотерапиялық тобы
Кортикостероидтардан басқа, тері ауруларын емдеуге арналған басқа да препараттар. Такролимус.
ATХ коды D11AH01
Фармакологиялық қасиеттері
Фармакокинетикасы
Сіңірілуі. Жергілікті қолданғанда такролимустың жүйелі қан ағымына сіңуі өте төмен болып табылады. Атопиялық дерматиті бар емделушілердің көпшілігінде (ересектер мен балаларда) 0,03-0,3% такролимус жақпамайын бір рет жаққанда да, қайта қолданғаннан кейін де оның қан сарысуындағы концентрациясы < 1,1 нг/мл құраған. Жүйелі сіңірілуі зақымдану аумағына тәуелді және атопиялық дерматиттің клиникалық белгілерінің жойылуына қарай азаяды. Ұзақ уақыт бойы қолданғанда препараттың жинақталуы балалар (1 жасқа дейінгі) мен ересектерде білінбеген.
Организмде таралуы. Такролимус жақпамайының жүйелі сіңірілуі төмен болуына байланысты, плазма ақуыздарымен байланысу қабілетінің жоғарылығы (> 98,8%) клиникалық елеусіз деп қарастырылады. Такролимус жақпамайын қолданғанда препарат жергілікті әсер етеді және жүйелі қан ағымына сіңірілуінің төмендігімен сипатталады.
Метаболизмі. Такролимус теріде метаболизденбейді. Жүйелі қан ағымына түскен кезде такролимус елеулі дәрежеде CYP3A4 арқылы бауырда метаболизденеді.
Шығарылуы. Такролимус жақпамайын бірнеше рет жергілікті қолданғанда жартылай шығарылу кезеңі ересектерде 75 сағат және балаларда 65 сағатты құрайды. Көктамыр ішіне енгізген кезде препараттың жалпы клиренсі орташа алғанда 2,25 л/сағатты құрайды, жүйелі қан ағымына сіңірілген препараттың бауыр клиренсі бауырдың ауыр жеткіліксіздігі бар емделушілерде және CYP3A4 тежегіштерін бір мезгілде қабылдағанда азаюы мүмкін.
Фармакодинамикасы
Такролимус кальцинейрин тежегіштері тобына жатады. Спецификалық цитоплазмалық ақуыз иммунофилинмен (FKBP12) байланысу арқылы такролимус T-лимфоциттермен кальцийге тәуелді сигнал берілісін тежейді, олардың белсенділенуі мен ИЛ-2, ИЛ-3, ИЛ-4, ИЛ-5 және ГМКСФ, ФНО және ИФН-γ сияқты басқа цитокиндердің ары қарайғы синтезіне кедергі жасайды.
In vitro зерттеулерде дені сау адам терісіне жүргізілген такролимус Лангерганс жасушалары түрткі болған T-лимфоциттердің стимуляциясын тежеген. Сондай-ақ, такролимустың жуан жасушалардан, базофилдер мен эозинофилдерден қабыну медиаторларының босап шығуына кедергі жасайтыны да көрінген.
Атопиялық дерматитпен науқастарда такролимус жақпамайымен емдеу кезінде теріні тазарту Лангерганс жасушаларындағы Fc рецепторының экспрессиясының төмендеуімен және T-лимфоциттерге көтермелегіштік әсерінің тежелуімен қатар жүрді. Такролимус жақпамайы коллаген синтезіне әсер етпейді және осылайша, тері атрофиясын туғызбайды.
Қолданылуы
- басқа сыртқа қолданылатын дәрілермен дәстүрлі емдеуге жауап жеткіліксіз болған (соның ішінде, глюкокортикостероидтармен) немесе ондайларға қарсы көрсетілімдер болған жағдайда ересектер мен 2 жастан асқан балалардағы атопиялық дерматиттің асқынуларын емдеуде (ауырлық дәрежесі орташа және ауыр түрлерінде).
- асқынулар жиі болып тұратын (жылына 4 көріністен жоғары) емделушілерде атопиялық дерматитке демеуші емде (ауырлық дәрежесі орташа және ауыр түрлерінде) жаңа асқынулардың алдын алу және ремиссия кезеңін ұзарту мақсатында. Бұрын Протопикпен күніне 2 рет ұзақтығы 6 аптадан аспайтын сызба бойынша емдеуге жауабы байқалған (яғни, емдеу тері үдерісінің толық немесе толық дерлік жазылуына алып келген) емделушілерге ғана көрсетілген.
Қолдану тәсілі мен дозалары
Ересектер мен 2 жастан үлкендерге Протопик® жақпамайын терінің зақымдалған бөліктеріне жұқа қабатпен жағады. Препаратты бет пен мойынды қоса, дененің кез-келген бөліктеріне, шырышты қабықтарды қоспағанда, тері қыртыстары аймағына қолдануға болады. Препаратты окклюзиялық таңғыштардың астына жақпау керек, өйткені қолданудың бұл тәсілі зерттелмеген.
Асқынуларды емдеу
Протопик® жақпамайын қысқа мерзімге немесе жүйелі түрде қайталанып тұратын емдеу курстары түрінде ұзақ уақыт пайдалануға болады. Емдеуді ұзақ уақыт бойы асқынуларды басу үшін қарастырылған сызба бойынша жүргізу ұсынылмайды. Емдеуді ауру симптомдары алғаш пайда болғанда бастау керек. Терінің зақымдалған бөліктерін емдеу атопиялық дерматиттің клиникалық көріністері толық жойылғанға немесе едәуір жақсарғанға дейін жүргізіледі. Әдетте, жақсару емдеудің бірінші аптасы ішінде байқалады. Егер жақсару белгілері жақпамайды пайдалануды бастаған сәттен екі апта ішінде байқалмаса, ары қарай емдеудің басқа нұсқаларын қарастыру қажет. Емдеуді атопиялық дерматиттің асқыну белгілері пайда болған кезде қайта жаңғырту қажет.
Ересектер мен 16 жастағы және одан үлкен жасөспірімдерге қолданылуы
Емдеуді 0,1% Протопик® жақпамайын тәулігіне екі рет қолданудан бастау және зақымдану ошағы толық тазарғанға дейін жалғастыру қажет. Ауру симптомдары қайта туындаған жағдайда 0,1% Протопик® жақпамайымен күніне екі қайтара емдеуді қайта жаңғырту керек. Егер клиникалық көрінісі мүмкіндік берсе, препаратты қолдану жиілігін төмендетуге тырысып көру немесе азғантай дозасын – 0,03% Протопик® жақпамайын пайдалану керек.
Егде жастағы адамдарда қолданылуы (65 жастағы және одан үлкен)
Аталған жас тобындағыларда Протопик® препаратын пайдалануға арнайы зерттеулер жүргізілген жоқ, алайда аталған препараттың егде жастағы тұлғаларда клиникалық қолданудың қолда бар тәжірибесінен оны қолдану сызбасын өзгерту қажеттілігі анықталған жоқ.
Балаларда (2 жастағы және одан үлкен) және 16 жасқа дейінгі жасөспірімдерде қолданылуы
Емдеуді 0,03% Протопик® жақпамайын тәулігіне екі рет жағудан бастау қажет. Аталған сызба бойынша емдеудің ұзақтығы үш аптадан аспауы тиіс. Ары қарай қолданылу жиілігі тәулігіне бір ретке дейін азайтылады, емдеу зақымдалу ошақтары толық тазарғанға дейін жалғасады.
Асқынулардың алдын алу
Асқынулардың алдын алу және ремиссия ұзақтығын арттыру үшін, сыртартқысында ауру асқынулары жиі (жылына 4 реттен артық) кездесетін емделушілерде Протопик® жақпамайымен демеуші ем ұсынылады. Демеуші емді тағайындаудың талапқа сай екендігі алдыңғы стандартты сызба бойынша (күніне 2 рет) ұзақтығы 6 аптадан аспайтын емдеудің тиімділігіне байланысты анықталады.
Демеуші ем кезінде Протопик® жақпамайын аптасына 2 рет (мысалы, дүйсенбі және бейсенбі күндері) терінің әдетте асқынулар кезінде зақымданатын бөліктеріне жағу керек. Препаратты жағу арасындағы уақыт аралығы кемінде 2-3 күнді құрауы тиіс.
Ересектер мен 16 жастағы және одан үлкен жасөспірімдерде 0,1% Протопик® жақпамайы, балаларда (2 жасар және одан үлкен) – 0,03% Протопик® жақпамайы пайдаланылады. Асқыну белгілері пайда болса, Протопик® жақпамайымен емдеудің әдеттегі режиміне көшу керек («Асқынуларды емдеу» бөлімін қараңыз).
Демеуші емнің 12 айынан кейін клиникалық динамикасын бағалау және Протопик® жақпамайының профилактикалық пайдаланылуының талапқа сай келетіндігі жөніндегі мәселені шешу қажет. Балаларда клиникалық динамикасын бағалау үшін препаратты уақытша тоқтату және содан кейін демеуші емді жалғастыру қажеттілігі туралы мәселені шешу қажет.
Қолдануға болмайтын жағдайлар
- такролимусқа, макролидтер тобының кез-келген басқа заттарына немесе препараттың қосымша заттарына аса жоғары сезімталдық
- жүктілік және лактация кезеңі
- 2 жасқа дейінгі балаларға
Жағымсыз әсерлері
Анағұрлым жиі кездесетін жағымсыз реакциялар жаққан жердегі терінің тірікену симптомдары болып табылады (күйдіру және қышыну сезімі, қызару, ауыру, парестезиялар және бөртпе). Әдетте, олардың айқындығы орташа немесе елеусіз және емдеуді бастағаннан кейінгі бірінші апта ішінде кетеді.
Алкогольді көтере алмаушылық жиі кездеседі (беттің қызаруы немесе спиртті ішімдіктерді пайдаланғаннан кейін терінің тітіркену симптомдары).
Протопик® жақпамайын қолданатын емделушілерде фолликулиттің, акне мен герпес жұқпасының даму қаупінің жоғарылағаны байқалады.
Кездесу жиілігіне қарай жағымсыз реакциялар өте жиі (> 1/10), жиі (> 1/100, < 1/10) және сирек (> 1/1,000, < 1/100) болып бөлінеді. Әр топ шегінде жағымсыз реакциялар маңыздылығының төмендеу тәртібі бойынша келтірілген.
Өте жиі (> 1/10)
- қолданған жердің шымылдатуы және қышынуы
Жиі (> 1/100, < 1/10)
- ысыну сезімі, қолданған жердің қызаруы, ауыруы, тітіркенуі, бөртуі
- герпес жұқпасы (Herpes simplex, герпестік Капоши экземасы), фолликулит
- парестезиялар және дизестезиялар
- алкогольді көтере алмаушылық (спирттік ішімдіктерді пайдаланғаннан кейін терінің тітіркену симптомдары)
Сирек (> 1/1,000, < 1/100)
- акне
Бірен-саран жағдайлар
- розацеа, малигнизация (лимфомалардың терідегі және басқа түрлері, тері обыры), жаққан жердің ісінуі
Дәрілермен өзара әрекеттесуі
Такролимус теріде метаболизденбейді, бұл терідегі, оның метаболизміне әсер етуі мүмкін дәрілік өзара әрекеттесулер қаупін жоққа шығармайды.
Такролимустың жүйелі сіңірілуі жақпамай түрінде пайдаланғанда аса төмен, белгілі CYP3A4 тежегіштерін (эритромицин, итраконазол, кетоконазол, дилтиазем) бір мезгілде қолданғанда өзара әрекеттесу ықтималдығы аз, алайда зақымдалған бөліктері көлемді және/немесе эритродермиясы бар емделушілерде толығымен жоққа шығарылмауы мүмкін.
Балалар популяциясы
2-11 жастағы балалардың қатысуымен ақуыз конъюгаты негізіндегі Neisseria menigitidis C серотобына қарсы вакцинамен өзара әрекеттесуіне зерттеу жүргізілді. Вакцинациялауға дереу жауап беруіне ешқандай әсері жоқ, иммундық жады мен гуморальді немесе жасуша түрткі болған иммунитеттің генерациялануы байқалмаған.
Айрықша нұсқаулар
Протопик® жақпамайын туа біткен немесе жүре пайда болған иммунитет тапшылығы бар науқастарда немесе иммуносупрессивтік препараттарды қабылдап жүрген емделушілерде пайдалануға болмайды.
Протопик® жақпамайын қолдану кезінде теріге күн сәулесінің түсуін азайту, солярийде ультракүлгін сәулеленуден, Б немесе А УК сәулелерімен псораленмен (PUVA-терапия) біріктіріп емделуден аулақ болу қажет.
Протопик® жақпамайы қатерлілік қаупі зор немесе қатерліге жуық деп қарастырылатын зақымдалған бөліктерді емдеу үшін қолданылмауы тиіс.
Терінің Протопик® жақпамайы жағылған бөліктеріне 2 сағат бойы жұмсартатын дәрілерді пайдалануға болмайды.
Протопик® жақпамайын басқа сыртқа қолданылатын препараттармен, жүйелі кортикостероидтармен және иммунодепрессанттармен бірге қолдану мүмкіндігі зерттелмеген.
Протопик® жақпамайын жұқпаланған атопиялық дерматитті емдеуде қолданудың тиімділігі мен қауіпсіздігі бағаланған жоқ. Жұқпалану белгілері бар болса, Протопик® жақпамайын тағайындағанға дейін спецификалық ем жүргізу қажет. Атопиялық дерматиті бар емделушілер терінің беткейлік жұқпаларына бейім келеді. Протопик® жақпамайын қолдану герпестік жұқпаның даму қаупінің жоғарылығымен байланысты болуы мүмкін. Герпестік жұқпа белгілері бар болса, Протопикті® қолданудың пайдасы мен қаупінің арақатынасын жеке-жеке бағалау керек.
Трансплантациядан кейінгі науқастарда такролимус кальцинейрині тежегішін ұзақ уақыт қолдану лимфомалардың дамуы мен тері малигнизациясының қаупінің артуымен астасуы мүмкін.
Лимфаденопатия бар болса, емделушіні емдеу басталғанға дейін тексеру және оны жақпамайды жағу кезінде қадағалау қажет. Лимфаденопатияның көзге көрініп тұратын себебі болмаса немесе жедел жұқпалы мононуклеоз симптомдары бар болса, Протопик® жақпамайын қолдануды тоқтату қажет.
Жақпамайдың көзге және шырышты қабықтарға түсуін болдырмау қажет (байқаусызда тиіп кеткен жағдайда жақпамайды мұқият кетіріп тастау және/немесе сумен жуып тастау қажет).
Жақпамайды пайдалану кезінде тығыз, ауа өткізбейтін киім кию ұсынылмайды.
Такролимус елеулі дәрежеде бауырда метаболизденеді және оның қандағы концентрациясы сыртқа қолданылған кезде өте төмен болса да, жақпамайды бауыр жеткіліксіздігі бар науқастарда сақтықпен пайдаланады.
Такролимустың жүйелі сіңірілуінің үдемелі артуы қаупіне байланысты, Протопикті® Нетертон синдромы сияқты, эпидермальді бөгеттің генетикалық ақаулары бар емделушілерде қолдану ұсынылмайды.
Протопикті® терінің ұзақ уақыт бойғы ауқымды зақымдануы бар науқастарда, әсіресе балаларда сақтықпен қолдану керек.
Дәрілік заттың көлік құралдарын немесе қауіпті механизмдерді басқару қабілетіне әсер ету ерекшеліктері
Жақпамайдың автокөлікті басқару және жоғары зейін аударуды талап ететін күрделі техникамен жұмыс жасау кезіндегі әсеріне зерттеулер жүргізілген жоқ. Протопик® жақпамайы жергілікті қолданылады және оның көлік құралдарын немесе қауіптілігі зор механизмдерді басқару қабілетіне әсер етуі мүмкін деп жорамалдауға негіз жоқ.
Артық дозалануы
Жергілікті қолданылғанда артық дозаланған жағдайлары сипатталмаған.
Ішке түсіп кеткен кезде, емі симптоматикалық. Өмірлік маңызы бар қызметтерге мониторинг жүргізу. Құстыру және асқазанды шаю ұсынылмайды.
Шығарылу түрі мен қаптамасы
10 г немесе 30 г препараттан бұралатын қалпақшасы бар пластик сықпаларда.
1 сықпадан медицинада қолданылуы жөніндегі нұсқаулықпен бірге картон қорапшаға салады.
Сақтау шарттары
25С-ден аспайтын температурада сақтау керек.
Балалардың қолы жетпейтін жерде сақтау керек.
Сақтау мерзімі
3 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші
Астеллас Ирланд Ко. Лтд., Киллорглин, Керри округі, Ирландия
Тіркеу куәлігінің иесі
Астеллас Фарма Юроп Б.В., Нидерланды
Сильвиусвег 62, 2333 ВЕ Лейден, Нидерланды
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы
Астеллас Фарма Юроп Б.В. ҚР өкілдігі
Алматы қ., 050559, Әл-Фараби д-лы 15, «Нұрлы Тау» ПФО, 4В ғимараты, №20 кеңсе
Телефон (727) 311-13-89 Факс (727) 311-13-90 e-mail astellas@com.kz