Преднизолон-Дарница
Инструкция
-
русский
-
қазақша
Саудалық атауы
Преднизолон-Дарница
Халықаралық патенттелмеген атауы
Преднизолон
Дәрілік түрі
5 мг таблеткалар
Құрамы
Бір таблетканың құрамында
белсенді зат - 5мг преднизолон,
қосымша заттар: лактоза моногидраты, картоп крахмалы, кальций стеараты.
Сипаттамасы
Жалпақ цилиндр пішінді, ойығы бар ақ түсті таблеткалар.
Фармакотерапиялық тобы
Жүйелі пайдалануға арналған кортикостероидтар.
Глюкокортикостероидтар. Преднизолон.
АТХ коды Н02АВ06
Фармакологиялық қасиеттері
Фармакокинетикасы
Асқазан-ішек жолынан жылдам сіңеді. Биожетімділігі жоғары. Қан плазмасындағы ең жоғарғы концентрациясына жету уақыты – 1–1,5 сағат. Препараттың көп бөлігі (90%) кортизолбайланыстырғыш глобулин – транскортинмен және альбуминмен байланысады. Бауырда, бүйректе, аш ішекте, бронхтарда метаболизденеді. Преднизолонның тотыққан түрлері глюкурондалады немесе сульфатталады.
Жартылай шығарылу кезеңі (T1/2) – 2–4 сағат. Бүйрекпен негізінен метаболиттер түрінде, 20%-ға дейінгісі өзгеріссіз күйде шығарылады.
Фармакодинамикасы
Преднизолон – гидрокортизонның дегидратталған аналогы. Қабынуға қарсы, аллергияға қаррсы, десенсибилизациялаушы, шокқа қарсы және иммунодепрессивтік әсер береді.
Преднизолонды қолданғанда препараттың әсерлері жасуша жарғақшаларын тұрақтандыру, макрофагтардың жинақталуын тежеу, лейкоциттер миграциясын азайту, қылтамырлардың өткізгіштігін төмендету арқылы жүзеге асырылады, бұл ісінулердің түзілуіне кедергі келтіреді. Преднизолон фагоцитозды бәсеңдетеді, арахидон қышқылының метаболизміне, сондай-ақ қабыну медиаторларының синтезі мен босап шығуына әсер етеді. Преднизолонның иммуносупрессивтік әсеріне Т- және В-лимфоциттердің белсенділігін бәсеңдеуі, қандағы комплемент мөлшерінің азаюы, сондай-ақ интерлейкин-2 өндірісі мен әсерлерінің бәсеңдеуі негіз болады. Катаболитикалық әсер береді, қандағы глюкоза деңгейін арттырады. Бірқатар минералкортикоидтық белсенділік танытады, бүйрек өзекшелеріндегі Na+ мен судың реабсорбциясын арттырады, организмнен К+ мен Са+ шығарылуын, әсіресе олардың қан плазмасындағы деңгейі жоғарылаған кезде арттырады. Преднизолон гипофизбен адренокортикотроптық гормондардың және салдарлы бүйрекүсті бездерімен – глюкокортикостероидтардың синтезделуін және сөлінісін бәсеңдетеді.
Қолданылуы
- ревматизмдік қызбада, ревматизмдік кардитте, кіші хореяда
- дәнекер тіндердің жүйелі ауруларында (жүйелі қызыл жегі, склеродермия, түйінді периартериит, дерматомиозит)
- буындардың жедел және созылмалы қабыну ауруларында (ревматоидтық артрит, ювенильді артрит, шорбуынданатын спондилоартрит, подагралық және псориаздық артриттер)
- бронх демікпесі
- өкпенің интерстициальді ауруларында (жедел альвеолит, өкпе фиброзы, II-III дәрежелі саркоидоз); өкпе обырында (цитостатиктермен біріктіріп), бериллиоз, аспирациялық пневмонияда (арнайы еммен бірге), Леффлердің эозинофильді пневмониясында, туберкулезде (өкпе туберкулезі, туберкулездік менингит) – арнайы еммен бірге
- бүйрекүсті бездерінің бастапқы және салдарлы жеткіліксіздігі (соның ішінде бүйрекүсті бездерін алып тастағаннан кейінгі жағдайларда), бүйрекүсті бездерінің туа біткен гиперплазиясында, адреногенитальді синдромда, баяу өрбитін тиреоидитте
- жедел және созылмалы аллергиялық ауруларда (ауыр ағымды және басқа емдеу әдістеріне бағынбайтын: дәрілік аллергия, сарысу құю ауруы, поллиноз, атопиялық дерматит, дененің ауқымды беткейін қамтитын жанаспалы дерматит, Квинке ісінуі, Стивенс-Джонсон синдромы, токсикодермия)
- гепатитте
- аутоиммундық ауруларда (соның ішінде жедел гломерулонефритте)
- нефротикалық синдромда
- АІЖ қабыну ауруларында (спецификалық емес ойық жаралы колит, Крон ауруы, жергілікті энтерит)
- қан және қан түзетін ағзалардың ауруларында (миеломдық ауру, жедел лимфо- және миелоидтық лейкоз, лимфогранулематоз, тромбоцитопениялық пурпура, аутоиммундық гемолитикалық анемия, туа біткен эритроидтық гипопластикалық анемия)
- аутоиммундық және басқа тері ауруларында (экзема, себореялық дерматит, псориаз, Лайелл синдромы, буллездік герпес формалы дерматит, сулыбөртпе, эксфолиативтік дерматит)
- трансплантаттың ажырау реакцияларының алдын алуда
- онкологиялық аурулар аясындағы гиперкальциемияда
- цитостатиктік ем кезінде жүрек айнуын, құсудың алдын алу және басу үшін.
Қолдану тәсілі және дозалары
Дозасы әр адамға жекелей белгіленеді. Тағайындаған кезде глюкокортикоидтар секрециясының циркадтық ырғағын ескеру керек: дозасының көп бөлігін (2/3) немесе барлық дозасын таңертеңгі уақыттарда, таңғы сағат 8 шамасында және 1/3-ін – кешке қабылдау қажет.
Препаратты ішке, шайнамай және аздаған мөлшерде сумен іше отырып қолданады. Емдеуді баяу, дозасын біртіндеп тоқтата отырып төмендетеді.
Ересектерге.
Жедел жағдайларда және орынбасушы ем ретінде препаратты тәулігіне 20-30 мг дозада тәуліктік демеуші 5-10 мг дозасына біртіндеп ауыстыра отырып тағайындайды. Қажет болса бастапқы дозасы тәулігіне 15-100 мг, ал демеуші дозасы – тәулігіне 5-15 мг құрауы мүмкін.
Балаларға.
Ересектерге арналған дозасының сәйкесінше фракцияларын (мысалы, 12 жаста 75%, 7 жаста 50% және 1 жаста 25%) пайдалануға болатын болса да, дозасы әдетте емдеуге клиникалық реакциясымен анықталады. Емдеу, мүмкін жағдайларда, бір реттік дозасы түрінде күн ара жүргізілуі тиіс. Тәуліктік дозасын таңертеңгілік таңғы астан кейін қабылдау керек.
Жағымсыз әсерлері
Жағымсыз әсерлерінің даму жиілігі мен айқындығы қолданылу ұзақтығына, пайдаланылатын дозасының шамасы мен циркадтық тағайындалу ырғағының сақталу мүмкіндігіне байланысты.
- аритмия, брадикардия, артериялық гипертензия, жүректің созылмалы жеткіліксіздігі белгілерінің дамуы немесе күшеюі, гипокалиемияға тән ЭКГ өзгерістері. Жедел және жеделге жуық миокард инфарктісі бар науқастарда – некроз ошағының жайылуы, тыртық тіндер түзілуінің баяулауы, бұл жүрек бұлшықетінің жыртылуына алып келуі мүмкін
- тромбоздарға және тромбоэмболияларға алып келетін лейкоцитурия, гиперкоагуляция
- бас ауыруы, бас айналуы, мишықтың жалған ісігі, бассүйекішілік қысымның жоғарылауы, құрысулар
- артқы субкапсулярлық катаракта, көзішілік қысымның жоғарылауы көру жүйкесінің зақымдалу мүмкіндігімен, көздің салдарлы бактериялық, зеңдік немесе вирустық жұқпаларының дамуына бейімділік, мөлдір қабықтың трофикалық өзгерістері, экзофтальм
- жүрек айнуы, құсу, эпигастрийдің ауыруы, диарея, панкреатит, асқазан мен он екі елі ішектің «стероидтық» ойық жарасы, эрозиялы эзофагит, асқазан-ішек жолынан қан кетуі немесе тесілуі, тәбеттің артуы немесе төмендеуі, метеоризм, ықылықтау. Сирек жағдайларда – «бауыр» трансаминазалары мен сілтілік фосфатаза белсенділігінің жоғарылауы
- регенерация үдерісінің баяулауы, петехиялар, қанталаулар, гематомалар, экхимоздар, стриялар, терінің жұқаруы, гипер- немесе гипопигментация, безеулер, пиодермия дамуына бейімділік
- балаларда өсу және сүйектену үдерістерінің баяулауы (эпифизарлық өсу аймақтарының мерзімінен бұрын жабылу), остеопороз, өте сирек – сүйектің патологиялық сынуы, тоқпан жілік және ортан жілік сүйегі бастиегінің асептикалық некрозы, бұлшықет сіңірлерінің үзілуі, «стероидтық» миопатия, бұлшықет массасының кемуі (атрофия)
- глюкозаға төзімділіктің төмендеуі, «стероидтық» қант диабеті немесе жасырын қант диабетінің манифестациясы, гипоталамус-гипофиз-бүйрекүсті безі жүйесінің бәсеңдеуі, етеккір оралымының бұзылуы, балаларда жыныстық жетілудің тежелуі, Иценко-Кушинг синдромы (ай тәріздес бет, гипофизарлық типті семіздік, гирсутизм, артериялық қысымның жоғарылауы, дисменорея, аменорея, миастения, стриялар)
- гипокальциемия, теріс азотты баланс (ақуыздар ыдырауының жоғарылауы), дене салмағының жоғарылауы.
Преднизолонның минералокортикостероидтық белсенділігінен болатын жағымсыз әсерлері: сұйықтықтың және Na+ іркілуі (шеткергі ісінулер), гипернатриемия, гипокалиемиялық синдром
– аритмия, миалгия немесе бұлшықеттердің түйілуі, әдеттен тыс әлсіздік және қажығыштық
- организмнің жұқпаларға төзімділігінің төмендеуі
- бөртпе, қышыну, гиперемия, есекжем, Квинке ісінуі, анафилактикалық шок
- делирий, бағдарсыздық, эйфория, елестеулер, маниакальді-депрессиялық психоз, депрессия, паранойя, күйгелектік, мазасыздық, ұйқысыздық
- тоқтату синдромы, ісінулер, афтоздық ойық жаралар, уролиттердің туындау қаупінің жоғарылауы
Қолдануға болмайтын жағдайлар
- препарат компоненттеріне аса жоғары сезімталдық
- шығу тегі вирустық, зеңдік немесе бактериялық қазіргі кезде бар немесе жуырда бастан өткерген паразитарлық және жұқпалы аурулар: қарапайым герпес, офтальмологиялық герпес, белдемелі герпес (виремиялық фаза), желшешек, қызылша; амебиаз, стронгилоидоз (анықталған немесе күмәнді); жүйелі микоз; белсенді және жасырын туберкулез
- поствакцинальді кезең (ұзақтығы 10 апта: 8 апта, вакцинация алдындағы және кейіннен 2 апта), БЦЖ екпесінен кейінгі лимфаденит
- АИВ жұқпасы тудырған иммунитет тапшылығы жағдайлары
- асқазан-ішек жолының аурулары: асқазан мен он екі елі ішектің ойық жара ауруы, эзофагит, гастрит, жедел немесе жасырын пептидтік ойық жара, жақында пайда болған ішек анастамозы, спецификалық емес ойық жаралы колит тесілу немесе абсцесс қаупімен, дивертикулит
- жүрек-қантамыр жүйесінің аурулары: жуырда бастан өткерген миокард инфарктісі, жүректің декомпенсацияланған созылмалы жеткіліксіздігі, артериялық гипертензия, тромбоэмболиялық ауруға бейімділік
- эндокриндік жүйе аурулары: қант диабеті және көмірсуларға толеранттылықтың бұзылуы, тиреотоксикоз, гипотиреоз, Иценко-Кушинг ауруы
- бүйректің және/немесе бауырдың ауыр созылмалы жеткіліксіздігі, нефроуролитиаз
- гипоальбуминемия
- жүйелік остеопороз
- gravis миастениясы
- жедел психоз
- семіздік (III-IV дәрежелі)
- полиомиелит (бульбарлық энцефалит түрін қоспағанда)
- ашық- және жабықбұрышты глаукома
- галактозаны көтере алмаушылықтың, лактаза тапшылығы немесе глюкоза-галактоза мальабсорбциясы синдромы сирек тұқым қуалайтын түрлері бар емделушілер
Дәрілермен өзара әрекеттесуі
Преднизолонды басқа дәрілік заттармен бір мезгілде қолданғанда болуы мүмкін:
қалқанша без гормондарымен, бауыр ферменттері индукторларымен, атап айтқанда барбитураттармен, фенитоинмен, пиримидонмен, карбамазепинмен, рифампицинмен – оның жүйелі клиренсінің артуы нәтижесінде преднизолон әсерлерінің әлсіреуі;
эстрогендермен (құрамына эстроген кіретін пероральді контрацептивтерді қоса), циклоспоринмен, CYP3A4 тежегіштерімен, атап айтқанда эритромицинмен, кларитромицинмен, кетоконазолмен, дилтиаземмен, апрепитантпен, итраконазолмен, олеандомицинмен, ритонавирмен – преднизолонның емдік және уытты әсерлерінің күшеюі;
мифепристонмен – мифепристонды қабылдағаннан кейін 3-4 күн бойы кортикостероидтар әсерінің азаюы;
антацидтермен – сіңуінің төмендеуі;
глициризинмен – преднизолон клиренсінің кідіруі;
антикоагулянттармен – соңғыларының әсерінің төмендеуі немесе жоғарылауы; препараттарды бір мезгілде қолданғанда протромбиндік уақыт көрсеткіштерін бақылап отыру керек;
этопозидпен – оның метаболизмін in vitro бәсеңдетудің салдарынан соңғысының әсері мен уыттылығының артуы;
салицил қышқылының туындыларымен және басқа қабынуға қарсы стероидты емес дәрілермен – асқазанның шырышты қабығы ойық жараларының түзілуі ықтималдығының артуы; преднизолон қан сарысуындағы салицил қышқылы туындыларының деңгейін, олардың бүйректік клиренсін арттыра отырып төмендетеді; препарат «бауыр» ферменттерін индукциялаудың және оның уытты метаболиті түзілуінің нәтижесінде парацетамолдың гепатоуытты реакцияларының даму қаупін арттырады;
жүрек гликозидтерімен – соңғыларының уыттылығының күшеюі, ал гипокалиемияның нәтижесінде туындайтыны –аритмиялар дамуы қаупінің жоғарылауы;
гипогликемиялық дәрілермен – қантты төмендететін пероральді дәрілер мен инсулиннің гипогликемиялық әсерінің бәсеңдеуі;
гипотензиялық препараттармен – соңғыларының тиімділігінің төмендеуі;
үшциклдық антидепрессанттармен – преднизолонды қабылдаудан туындайтын депрессия белгілерінің күшеюі, және көзішілік қысымның жоғарылауы;
иммуносупрессанттармен – Эпштейн-Барр вирусымен байланысты жұқпалар мен лимфома немесе басқа лимфопролиферациялық бұзылулардың даму қаупінің жоғарылауы;
метотрексатпен – гематологиялық уыттылығы қаупінің артуы;
диуретиктермен, симпатомиметиктермен, іш жүргізгіш дәрілермен, амфотерицин В, теофиллинмен, ацетазоламидпен, карбеноксолонмен –гипокалиемияның даму қаупінің жоғарылауы; преднизолон амфотерицинмен және карбоангидраза тежегіштерімен бір мезгілде қолданғанда остеопороздың даму қаупін күшейтеді, сондай-ақ диуретиктердің әсерін азайтады;
м-холиноблокаторлармен, антигистаминдік дәрілік заттармен, нитраттармен – көзішілік қысымның жоғарылауы және антигистаминдік препараттар белсенділігінің төмендеуі;
нейролептиктермен, карбутамидпен, азатиопринмен – катарактаның даму қаупінің артуы;
эстрогендермен, анаболикалық препараттармен, пероральді контрацептивтермен – гирсутизм мен безеулердің пайда болуы;
вирусқа қарсы тірі вакциналармен және иммунизацияның басқа түрлері аясында – вирустардың белсенділенуі мен жұқпалардың даму қаупінің жоғарылауы;
гипокалиемия аясында миорелаксанттармен – миорелаксанттарды қолдану аясында бұлшықет блокадасының белгілері мен ұзақтығының күшеюі;
антихолинестеразалық дәрілермен – миастениямен науқастарда бұлшықет әлсіздігінің туындауы (әсіресе gravis миастениясы бар емделушілерде);
митотанмен және басқа бүйрекүсті безі қыртысы функциясының тежегіштерімен – препарат дозасының арттырылуына түрткі болу мүмкін;
құсуға қарсы дәрілермен – құсуға қарсы әсерінің күшеюі;
изониазидпен, мексилетинмен, празиквантелмен – олардың плазмадағы концентрацияларының төмендеуі;
соматотропинмен (жоғары дозаларда) – соңғысының әсерінің төмендеуі;
фторхинолондармен – сіңірлердің зақымдалуы;
циклоспоринмен – құрысулар туындаған жағдайлар білінген. Бұл препараттарды бір мезгілде қолдану метаболизмнің өзара тежелуін туғызатындықтан, құрысулар мен бұл препараттардың әрқайсысын монотерапия кезінде де, оларды бір мезгілде қолданумен байланысты басқа жағымсыз әсерлері жиірек туындауы мүмкін. Бірге қолдану қан плазмасындағы басқа препараттардың концентрациясының артуын туғызуы мүмкін.
Ұзақ уақыт емдеу кезінде преднизолон фолий қышқылының мөлшерін арттырады.
Препарат D витаминінің ішек қуысындағы Ca2+ сіңуіне әсерін төмендетеді.
Айрықша нұсқаулар
Емдеуді бастар алдында науқаста болуы мүмкін қарсы көрсетілімдердің бар-жоқтығына тексеру жүргізу қажет. Клиникалық тексеруге жүрек-қантамыр жүйесін тексеру, өкпені рентгенологиялық тексеру, асқазан мен он екі елі ішекті; несеп шығару жүйесін, көру мүшелерін тексеру кіруі тиіс. Зертханалық тексерулерге мыналар кіруі тиіс: жалпы қан талдауы, қан мен несептегі глюкоза, қан плазмасындағы электролиттер концентрациясына талдау.
Глюкокортикоидтармен ұзақ уақыт бойы емдеуде артериялық қысымды ұдайы бақылап отыру, несеп пен қандағы глюкоза деңгейін анықтау, нәжісті жасырын қанға талдау, қан ұюының көрсетіштеріне талдаулар жүргізу, омыртқаның рентгенологиялық бақылауы, офтальмологиялық тексеру жүргізу (3 айда 1 рет) ұсынылады.
Емдеу кезінде иммунизациялауды жүргізбеген дұрыс.
Егер глюкокортикоидтармен емдеу кезінде емделушілерде әдеттен тыс стресс жағдайлары туындаса, жылдам әсер ететін кортикостероидтардың дозаларын, стресс жағдайларына дейін, кезінде және стресс жағдайынан кейін арттыру ұсынылады.
Преднизолонмен емдеу кезінде алкогольді қолданбаған жөн.
Емдеудің ұзақтығына және дозасына байланысты, препарат кальций метаболизміне теріс әсер етуі мүмкін. Остеопороздың алдын алу ұсынылады, бұл әсіресе, емделушілерде қауіп факторлары бар болғанда маңызды (соның ішінде – отбасылық бейімділік, егде жастағылар, постменопауза, ақуыз бен кальцийдің жеткіліксіз тұтынылуы, шамадан тыс шылым шегу, алкогольді шамадан тыс тұтыну, сондай-ақ дене белсенділігінің төмендеуі). Алдын алу кальций мен D витаминін жеткілікті тұтынуға негізделген, сондай-ақ дене белсенділігі де кіреді.
Преднизолонмен емдеудің жағымсыз әсерлерін азайту үшін сәйкесінше емдәм тағайындау дұрыс болып табылады.
Преднизолонның ұзақ уақыт бойы жоғары дозаларын пайдаланғанда (кемінде 4 апта бойы тәулігіне 30 мг) дәрілік затты қабылдауды тоқтатқаннан кейін бірнеше ай бойы сақталатын сперматогенездің қайтымды бұзылулары туындауы мүмкін.
Преднизолонның физиологиялық дозалардан асатын (преднизолонның немесе баламасының 7,5 мг жуығы) дозаларын 3 аптадан астам қабылдаған емделушілерде, преднизолонмен емдеуді біртіндеп тоқтату қажет. Емдеуді тіпті, ол 3 аптадан аспайтын уақытқа созылса да, емделушілердің мұндай топтарында біртіндеп тоқтату керек:
-
преднизолонмен емдеудің қайталанған курсынан өтіп жатқан емделушілер;
-
емдеудің қайталанатын курсы ұзақ уақыт емдеуден кейін (айлар, жылдар) жыл бойы тағайындалған емделушілер;
-
преднизолонды немесе баламасын тәулігіне 40 мг артық қабылдаған емделушілер;
-
себебі кортикостероидтарды экзогендік қабылдау болып табылмайтын бүйрекүсті безі жеткіліксіздігі бар емделушілер.
Емдеу тоқтатылғаннан кейін тоқтату синдромы, бүйрекүсті безі жеткіліксіздігі, сондай-ақ преднизолон тағайындалған аурудың өршуі туындауы мүмкін. Егер преднизолонмен емдеу аяқталғаннан кейін бүйрекүсті бездерінің функционалдық жеткіліксіздігі байқалса, препаратты қабылдауды дереу қайта жаңғырту, ал дозасын азайтуды өте баяу және сақтықпен жүргізу керек (мысалы, тәуліктік дозасын 7-10 күн ішінде 2-3 мг-ге азайтуға болады).
Бүйрекүсті безі қыртыстарының атрофиясы ұзақ уақыт емдеу кезінде дамиды және емдеу тоқтатылғаннан кейін бірнеше жыл байына сақталуы мүмкін.
Стероид-индукциялаған салдарлы бүйрекүсті безі жеткіліксіздігін дозасын біртіндеп азайтудың нәтижесінде аса төменгісіне дейін төмендетуге болады. Жеткіліксіздіктің бұл түрі емдеу тоқтатылғаннан кейін бірнеше жыл бойына сақталуы мүмкін, сондықтан бұл кезде туындаған кез-келген стресс жағдайында, кортикостероидтармен емдеуді қайта жаңғырту қажет.
Күрт тоқтатқан кезде, әсіресе алдында жоғары дозаларын қолданған жағдайда, тоқтату синдромы туындайды, ол қызбамен, тәбеттің төмендеуімен, жүрек айнуымен, құсумен, диареямен, мәңгірумен, бас айналуымен, жайылған сүйек-бұлшықет ауруларымен, астениямен білінеді.
Гиперкортицизмнің даму қаупіне байланысты преднизолонмен бұрын жүргізілген бірнеше ай бойы ұзақ емдеуден кейін кортизонмен емдеудің жаңа курсын үнемі төмен бастапқы дозаларынан бастау керек (өмірге қауіпті жедел жағдайлардан басқа).
Интеркурренттік жұқпаларда, сепсис жағдайларында және туберкулезде бір мезгілде антибиотикпен ем жүргізу қажет.
Пероральді гипогликемиялайтын препараттарды немесе антикоагулянттарды қабылдау аясында қолдану қажет болса, соңғыларының дозалау режимін түзету қажет.
Препаратты бас сақинасы, эпилепсиясы, бүйрек және/немесе бауыр жеткіліксіздігі, жедел немесе белсенді гепатиті, циррозы бар, тұқым қуалайтын сыртартқысында глаукома және/немесе қант диабеті бар, сыртарқысында стероидтық миопатия және/немесе туберкулез бар емделушілерде, бұрыннан бар немесе сыртартқысында ауыр аффективті бұзылыстар болған (әсіресе стероидтық психоздары бар) емделушілерге, эмоционалдық орнықсыздықта немесе психозға бейімділікте емделушілер жағдайына тұрақты мониторинг жүргізе отырып, сақтықпен қолдану керек.
Кортикостероидтардың қабыну реакциясы мен иммунитет функциясын бәсеңдетуі жұқпаға резистенттіліктің төмендеуіне, олардың ауырлығының күшеюіне, латенттік жұқпаның белсенділенуіне немесе интеркурренттік жұқпаның өршуіне, сондай-ақ олардың симптомдарының бүркемеленуіне алып келуі мүмкін.
Қызылша, желшешек сияқты аурулар преднизолонды қолданғанда ауырырақ түрде жүреді. Сондықтан, мұндай аурулармен ауырмаған адамдарға жұқпа жұқтырудың барынша болдырмауы үшін сақ болу керек. Науқаспен байланыста болған жағдайда, дереу дәрігерге қаралу қажет. Иммуноглобулинмен профилактикалық ем жүргізу ұсынылады.
Ауыр жұқпалы аурулары кезінде тек спецификалық микробқа қарсы емдеу аясында ғана қолдануға болады.
Кортикостероидтарды қолданған кезде қызу дене белсенділігінен кейін рабдомиолиз және миоглобинурия туындауы мүмкін. Бұған кортикостероидтарды қабылдаудың немесе дене белсенділігінің жоғарылауының түрткі болатындығы белгісіз.
Орталықтық сероздық хориоретинопатиясы бар емделушілерде кортикостероидтармен емдеу торқабықтың экссудативтік ажырауының елеулі өршуіне және ұзақ уақыт көрмей қалуға алып келуі мүмкін.
Кортикостероидтардың тікелей ісік түзуші әсері туралы айтылмаған, бірақ иммуносупрессанттармен ем жүргізілген емделушілерде малигнизацияның қарқынды таралу қаупі бар.
Преднизолонды диуретиктермен біріктіріп қолданғанда әсіресе электролиттік теңгерімді тиісінше бақылауға алу керек. Преднизолонмен ұзақ уақыт емдегенде гипокалиемияның алдын алу мақсатында және көзішілік қысымның жоғарылауы мүмкіндігіне және субкапсулярлық катаракта даму қабілеттілігіне байланысты калий препараттарын және сәйкесінше емдәм тағайындау керек.
Менопауза кезіндегі әйелдерге сақтықпен қолдану керек, сондай-ақ остеопороздың туындау мүмкіндігіне қатысты тексеруден өту қажет.
Аддисон ауруы кезінде бүйрекүсті безінің жедел жеткіліксіздігінің (аддисон кризисі) даму қаупіне байланысты, барбитураттардың бір мезгілде тағайындалуын болдырмау керек.
Егер сыртартқыда псориаз, құрысулар болса, преднизолонды тек ең төменгі тиімді дозаларында қолдану керек.
Бұрыннан немесе сыртартқысында депрессиялық, маниакальді-депрессиялық психоздан, алдыңғы стероидтық психоздан тұратын ауыр аффективті бұзылыстары бар науқастарда жүйелі кортикостероидтарды қолдану ерекше көңіл бөлуді қажет етеді. Емделушілер және/немесе қамқоршылары психика тарапынан күрделі жағымсыз әсерлердің даму мүмкіндігінен құлағдар болуы тиіс. Симптомдары әдетте емдеу басталғаннан кейін бірнеше күн немесе апта ішінде білінеді. Мұндай жағымсыз әсерлердің туындау қаупі жоғары дозаларын қолданғанда анағұрлым жоғары. Реакциялардың көпшілігі дозасын азайтқаннан немесе препаратты тоқтатқаннан кейін жоғалады, әйтсе де кейде спецификалық ем қажет болып табылады. Мұндай симптомдар дамыса, дәрігерге қаралу қажет. Сондай-ақ глюкокортикоидтарды тоқтатқан кезде психикалық бұзылыстар да байқалуы мүмкін.
Балалар
Кортикостероидтар сәбилерде, балалар мен жасөспірімдерде өсудің баяулауын туғызады, олар қайтымсыз болуы мүмкін және сондықтан, препараттың ұзақ уақыт қолданылуын болдырмау керек. Егер ұзақ емдеу қажет болса, емдеу гипоталамус-гипофиз-бүйрекүсті безі жүйесінің және өсудің тежелуінің ең төменгі бәсеңдеуімен шектелуі тиіс. Сәбилер мен балалардың өсуі мен дамуын мұқият бақылау керек. Өсу кезеңінде глюкокортикостероидтарды тек абсолюттік көрсетілімдер бойынша және емдеуші дәрігердің аса мұқият қадағалауымен қолдануға болады.
Емдеу кезінде қызылша немесе желшешекпен ауырған науқастармен байланыста болған балаларға, алдын алу ретінде спецификалық иммуноглобулиндерді тағайындау керек (қарым-қатынастан кейін 10 күн бойы).
Жүктілік және лактация кезеңі
Кортикостероидтардың плацента арқылы өту қабілеті жекелеген препарат тар арасында ауытқып тұрады. Преднизолон плацента арқылы өтеді, алайда преднизолонның 88%-ының белсенділігі плацента арқылы өткеннен кейін жойылады. Кортикостероидтарды буаз жануарларға қолдану таңдай жырығын, құрсақішілік өсудің тежелуін қоса, ұрық дамуындағы аномалияларды туғызуы мүмкін және мидың өсуі мен ұрық дамуына әсер етеді. Кортикостероидтардың адамда таңдай жырығы /қоянжырық сияқты туа біткен аномалиялардың артуына алып келетініне дәлелдер жоқ. Дегенмен, жүктілік кезінде ұзақ уақыт бойы немесе бірнеше рет енгізгенде, кортикостероидтар ұрықтың құрсақішілік өсуінің тежелу қаупін арттыруы мүмкін. Теориялық тұрғыдан, кортикостероидтардың пренатальді әсерінен кейін жаңа туған сәбилерде гипоадренализм дамуы мүмкін, бірақ ол әдетте туғаннан кейін өздігінен кетеді және клиникалық маңыздылығы сирек. Жүктілік кезінде преднизолонды ұзақ уақыт қолданған аналардан туған сәбилерде катаракта жағдайлары байқалған. Кортикостероидтар жүкті әйелдерге тек, анасы үшін қолданудың пайдасы ұрық үшін болатын қауіптен асып түсетін болса, аса қажет жағдайларда ғана тағайындалуы тиіс. Преэклампсиясы немесе организмде сұйықтықтың іркілуі бар емделуші әйелдер мұқият мониторинг бақылауында болуы тиіс.
Кортикостероидтар азғантай мөлшерлерде емшек сүтіне бөлініп шығады. Преднизолонның күнделікті 40 мг дейінгі дозалары балада жүйелі әсерлерді туғызуы екіталай. Аналары преднизолонның жоғары дозаларын (тәулігіне 40 мг астам) қабылдаған балалар бүйрекүсті бездері функциясының бәсеңдеуі белгілерінің бар-жоқтығына тексерілуі тиіс. Препаратты бала емізетін аналарға тек, егер емдеудің артықшылықтары бала үшін ықтимал қауіптерден асып түсетін болса ғана тағайындау керек. Егер дәрілік затты ұзақ қолдану міндетті болып табылса, онда бала емізуді тоқтату қажет.
Егде жастағы емделушілер
Егде жастағы емделушілерді, әсіресе, ұзаққа созылатын емдеу, кортикостероидтардың жалпылама жағымсыз әсерлерінің күрделірек салдарларын, атап айтқанда остеопорозды, диабетті, гипертонияны, гипокалиемияны, жұқпаларға сезімталдықты, терінің жұқаруын ескере отырып жоспарлануы тиіс. Емделушінің жағдайына мониторинг жүргізу қажет.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Емдеу кезінде автокөлік жүргізгенде және жоғары зейін шоғырландыру мен психомоторлық реакциялардың жылдамдығын қажет ететін басқа қауіптілігі зор қызмет түрлерімен шұғылдану кезінде сақ болу қажет.
Артық дозалануы
Артық дозалану қаупі препаратты ұзақ уақыт, әсіресе жоғары дозаларда қолданғанда арта түседі.
Симптомдары: артериялық қысымның жоғарылауы, шеткергі ісінулер, жағымсыз әсерлердің артуы.
Жедел артық дозалануын емдеу: дереу асқазанды шаю немесе құстыру. Арнайы у қайтарғысы жоқ.
Созылмалы артық дозалануын емдеу: препарат дозасын азайту.
Шығарылу түрі және қаптамасы
10 таблеткадан поливинилхлоридті үлбір мен баспалы лакталған алюминий фольгадан жасалған пішінді ұяшықты қаптамаға салынған.
Төрт пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге корапшаға салынады.
Сақтау шарттары
Түпнұсқалық қаптамасында, 25°С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін пайдалануға болмайды
Дәріханалардан босатылу шарттары
Рецепт арқылы
Өндіруші
«Фармацевтикалық фирма «Дарница» ЖАҚ.
Украина, 02093, Киев қ., Борисполь к-сі, 13.
Тіркеу куәлігінің иесі
«Фармацевтикалық фирма «Дарница» ЖАҚ, Украина
Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы -
телефон/факс: (+ 380 44) 207 73 27
е-mail: vigilance@darnitsa.kiev.ua
http://www.darnitsa.ua