Прадакса® №60 (110 мг)

• русский
• қазақша

• Скачать инструкцию медикамента

Саудалық атауы

ПРАДАКСА®

Халықаралық патенттелмеген атауы

Дабигатран этексилаты

Дәрілік түрі

110 мг капсулалар

Құрамы

Бір капсуланың құрамында

белсенді зат – 126,83 мг дабигатран этексилаты месилаты, 110 мг дабигатран этексилатының бос негізіне сәйкес,

қосымша заттар: гуммиарабик, ірі түйіршікті шарап қышқылы; шарап қышқылы, ұнтақ; кристалды шарап қышқылы; гипромеллоза, диметикон, тальк, гидроксипропилцеллюлоза

капсула қабығының құрамы

корпус: каррагинан (Е407), калий хлориді, титанның қостотығы (Е171), сары сансет (Е110), гипромеллоза

қақпақшасы: каррагинан (Е407), калий хлориді, титанның қостотығы (Е171), индигокармин (Е132), гипромеллоза

қара сия құрамы: шеллак, бутил спирті, изопропил спирті, темірдің қара тотығы бояғышы (Е172), тазартылған су, пропиленгликоль, сусыз этил спирті, калий гидроксиді, концентрацияланған аммиак ерітіндісі.

Сипаттамасы

№ 1 өлшемді, мөлдір емес көгілдір түсті қақпақшасы мен мөлдір емес крем түсті корпусы бар, қақпақшасында қара сиямен Берингер Ингельхайм фирмасының логотипі және корпусында «R 110» деген жазуы бар ұзынша пішінді капсулалар.

Капсуланың ішінде – сарғыш түйіршіктер.

Фармакотерапиялық тобы

Антикоагулянттар. Тромбиннің тікелей (тура) тежегіштері.

Дабигатран этексилаты.

АТХ коды: В01АЕ07

Фармакологиялық қасиеттері

Фармакокинетикасы

Ішу арқылы қолданудан кейін дабигатран этексилаты қан плазмасындағы заттың белсенді түрі болып табылатын дабигатранға тез және толық айналады. Гидролиз арқылы эстеразалармен белсенді дабигатранға катализденетін дабигатран этексилатының белсенді түр ізашарының түзілуі негізгі метаболизм реакциясы болып табылады. ПРАДАКСА препаратын ішке қабылдау кезінде дабигатран этексилатының абсолютті биожетімділігі 6,5% жуық құрайды. Ішке қабылдаудан кейін дені сау еріктілердің қан плазмасындағы дабигатран этексилатының фармакокинетикалық бейіні концентрациясының тез ұлғайып, 0.5-2.0 сағат шегінде ең жоғары концентрацияға (Смакс) жетуімен сипатталады.

Сіңуі. Плазмадағы жоғары шекті концентрацияларына препаратты қолданудан кейін 6 сағаттан соң жетеді. Анестезия, асқазан-ішектің салдануы және операциялық араласулар сияқты факторлар емделушілердің белгілі бір топтарында ішке қабылданатын түріне қарамастан баяу сіңуін туындатуы мүмкін. Баяу сіңуі, әдетте, тек операция күні ғана білінеді. Келесі күндері дабигатран сіңуі тез жүріп, плазмадағы жоғары шекті концентрацияларына препаратты қолданудан кейін 2 сағат өткенде жетеді. Ас ішу препарат биожетімділігіне әсер етпейді, бірақ плазмадағы жоғары шекті концентрациясына жету уақытын 2 сағат кідіртеді. Капсула қабығынсыз дабигатран этексилатын қабылдағанда, капсуладағы дәрілік түрмен салыстырғанда, биожетімділігі 75% артуы мүмкін. Осыған орай, препаратты қолданғанда дабигатран этексилаты биожетімділігінің көздеусіз артуын болдырмас үшін капсулаларды үнемі бүтін күйде сақтау керек. Сондықтан емделушілерге капсуланы ашпауға және оның ішіндегісін таза түрде (мысалы, оны тамаққа немесе сусынға себуге) қолданбауға кеңес беріледі.

Таралуы. Дабигатранның плазма ақуыздарымен байланысу қабілеті препарат концентрациясына тәуелденусіз төмен (34-35%). Дабигатран таралу көлемі 60-70 л құрады, бұл организмдегі сұйықтықтың жалпы көлемінен асып кетіп, оның тіндерде орташа таралатынын көрсетті.

Смакс және «концентрация-уақыт» қисығы астындағы аудан (AUC) дозаға пропорционалды. Смакс мәніне жеткен соң дабигатран этексилатының плазмадағы концентрациясы биоэкспоненциальді төмендейді. Жасы үлкен топтардағы дені сау еріктілерде жартылай шығарылу кезеңі, орта есеппен, 11 сағатқа жуық құрайды. Бірнеше рет қолданудан кейін соңғы жартылай шығарылу кезеңі шамамен 12-14 сағат құрайды. Жартылай шығарылу кезеңі дозаға байланысты емес және бүйрек функциясының бұзылуында ұзарады (1 кесте).

Биотрансформациясы. Дабигатран метаболизмі мен шығарылуы дені сау ерлерде радиобелсенді таңбаланған дабигатранның бір реттік көктамырішілік дозасын енгізуден кейін зерттелген. Дозаны көктамыр ішіне енгізгеннен кейін радиобелсенді таңбаланған дабигатран көбінесе бүйрек арқылы шығарылды (85%). Ішек арқылы экскрециясы енгізілген дозаның 6% жуығын құрады. Препарат радиобелсенділігінің шығарылу деңгейі оны қабылдаудан кейін 168 сағат өткен соң дозаның 88-94% бөлігін құрады.

Дабигатран фармакологиялық белсенді 4 изомер – 1-O, 2-O, 3-O, 4-O ацилглюкуронидтерін түзумен конъюгацияланады, олардың әрқайсысы плазмадағы дабигатранның жалпы мөлшерінен 10-дан аз құрайды. Басқа метаболиттерінің іздері тек сезімталдығы жоғары талдамалық әдістермен анықталған. Дабигатран негізінен бүйрек арқылы өзгеріссіз күйде шығарылады. Шығарылу жылдамдығы шамамен 100 мл/мин құрайды, бұл шумақтық сүзілу жылдамдығына сәйкес келеді.

Емделушілердің ерекше топтары.

Бүйрек функциясының бұзылуы: бүйрек функциясының орташа бұзылуында (креатинин клиренсі [КК] 30-50 мл/мин) дабигатран АUС мәні ішке қабылдағаннан кейін бүйрек функциясы қалыпты кездегіден шамамен 2,7 есе жоғары.

Ауыр бүйрек жеткіліксіздігінде (креатинин клиренсі 10-30 мл/мин) дабигатран АUС мәні 6 есе артады, жартылай шығарылу кезеңі бүйрек жеткіліксіздігі жоқ тұлғалармен салыстырғанда шамамен 2 есе ұзарады.

Бауыр жеткіліксіздігі: Бауыр функциясының бұзылуы орташа (Child Pugh бойынша В сатысы) емделушілерде, бақылау тобымен салыстырғанда, дабигатран мөлшерінде өзгерістер анықталмаған.

Дене салмағы: Дене салмағы >100 кг емделушілерде дабигатранның қалдықтық концентрациялары салмағы 50-100 кг емделушілермен салыстырғанда шамамен 20% төмен болды. Дене салмағы 50-ден 100 кг дейінгі емделушілердің көпшілігінде (80,8%) өзгерістер анықталмаған. Дене салмағы < 50 кг емделушілер жөніндегі деректер шектеулі.

Демографиялық ерекшеліктері: Жас емделушілермен салыстырғанда, егде жастағы емделушілерде АUС мәні 40-60, ал Смакс 25-дан аса жоғары. Байқалған өзгерістері креатинин клиренсінің жасқа байланысты төмендеуімен өзара байланысты болды.

Дабигатран әсеріне жас шамасының ықпал етуі RE-LY зерттеуінде расталған. ≥75 жастағы емделушілерде қалдық концентрациясы шамамен 31% жоғары, ал <65 жастағыларда 65-75 жастағы емделушілердегіден шамамен 22% төмен болды.

Әйелдерде препарат мөлшері 40-50% жоғары, алайда бұл деректердің клиникалық мәні жоқ.

Нәсілдік тегі дабигатран фармакокинетикасына клиникалық мәнді ықпалын тигізбеген.

Фармакодинамикасы

Дабигатран этексилаты фармакологиялық белсенділігі жоқ дабигатранның белсенді түрінің төмен молекулалы ізашары болып табылады. Ішке қабылдағаннан кейін дабигатран этексилаты тез сіңеді және гидролиз арқылы қан плазмасында және бауырда эстеразалармен катализденетін дабигатранға айналады. Дабигатран қан плазмасындағы негізгі белсенді зат - тромбиннің белсенді, бәсекелес, қайтымды тікелей тежегіші болып табылады.

Тромбин (серинді протеаза) коагуляциялық каскад үдерісінде фибриногеннің фибринге айналуын қамтамасыз ететіндіктен, оның тежелісі тромб түзілуін кедергілейді.

Дабигатран фибринмен байланысқан бос тромбинді және тромбинмен индукцияланған тромбоциттер агрегациясын тежейді.

Қан плазмасындағы дабигатран концентрациясы мен антикоагулянттық әсер дәрежесінің арасында тікелей өзара байланыс анықталды.

ПРАДАКСА ішінара белсендірілген тромбопластин уақытын (ІБТУ), тромбин уақытын (ТУ) және экариндік ұйынды уақытын (ЭҰУ) ұзартады.

ІБТУ тестісі кең қолданыста және дабигатранның антикоагулянтты әсер ету қарқындылығының шамамен бағалануын қамтамасыз етеді. Дегенмен де, ІБТУ тестісінің сезімталдығы шектеулі және, әсіресе, плазмадағы дабигатранның жоғары концентрацияларында антикоагулянттық әсерін сандық тұрғыда дәл анықтауға сай келмейді.

ТУ тестісінде қан плазмасында дабигатранның күтілетін концентрациясымен салыстырылатын қан плазмасындағы дабигатран концентрациясы бағаланады.

ЭҰУ тромбиннің тура тежегіштері белсенділігінің тікелей анықталуын қамтамасыз етеді.

Жорамалды түрде, осы антикоагулянттық белсенділікті өлшеу шамалары дабигатран концентрациясын көріністейді және қан кету қаупін бағалауға арналған нұсқау қызметін атқарады (мысалы, ІБТУ талдауы ең төмен концентрациясында жоғары қан кету қаупімен астасады).

RE-MODEL (тізе буынын алмастыру) және RE-NOVATE (ұршық буынын алмастыру) клиникалық зерттеулерінің нәтижелері күніне бір рет қолданылатын дабигатран этексилатының екі дозасының да (150 мг немесе 220 мг) тромбозға қарсы тиімділігін растаған.

Қатар топтардағы рандомизацияланған салыстырмалы жасырын плацебо-бақыланатын зерттеуде дабигатран этексилаты 75 мг немесе 110 мг дозаларда (операциядан кейін 1-4 сағат ішінде) кейіннен 150 мг немесе 220 мг қабылдаумен тізе және ұршық буындарын түгелдей жоспарлы эндопротездеуден кейінгі келесі күні қолданылды.

RE-LY клиникалық зерттеуінде (көп орталықтық, халықаралық, рандомизацияланған, қатар топтарда) жүрекшелер фибрилляциясынан зардап шегетін, инсульт немесе жүйелі тромбоэмболиялардың (ЖТЭ) даму қаупі орташа немесе жоғары емделушілерде дабигатран этексилатының екі жасырын әдісті дозасын (күніне екі рет 110 мг және күніне екі рет 150 мг) қолданғанда жүрекшелер фибрилляциясы бар емделушілерде тәулігіне екі рет 110 мг дозадағы дабигатран этексилатының инсульт пен жүйелі эмболиялардың алдын алу емінде тиімділігі көріністелген. Тәулігіне екі рет 150 мг жоғарырақ дозасы ишемиялық және геморрагиялық инсульт, жүрек-қантамыр ауруларынан болатын өлім, бассүйекішілік қан кету қаупін және жалпы қан кету жиілігін едәуір төмендетеді.

Тереңдегі көктамырлар тромбозы мен өкпе артериясының тромбоэмболиясын емдеу. Қатар топтармен жүргізілген көп орталықтық рандомизацияланған салыстырмалы жасырын екі RE-COVER және RE-COVER II зерттеуінде тиімділігі мен қауіпсіздігі зерттелген. Тәулігіне 2 рет 150 мг дибагатран этексилаты қайталанатын симптоматикалық тереңдегі көктамырлар тромбозы және/немесе өкпе артериясы тромбоэмболиясының бастапқы нүкте жиілігін төмендетеді.

Қайталанған тереңдегі көктамырлар тромбозы мен өкпе артериясы тромбоэмболиясының алдын алу. Рандомизацияланған салыстырмалы жасырын екі RE-MEDY және RE-SONATE зерттеуі бұрын антикоагулянттық ем қабылдаған емделушілердің қатысуымен жүргізілді.

Клиникалық RE-MEDY зерттеуінде ұзақ уақыт емдеу кезіндегі тәулігіне екі рет 150 мг дабигатран этексилатының қауіпсіздігі мен тиімділігі көріністелді. Клиникалық RE-SONATE зерттеуінде дабигатран этексилаты қайталанған тереңдегі көктамырлар тромбозы және/немесе өкпе артериясы тромбоэмболиясының алдын алу емінде плацебодан артық болды. Салыстырмалы қауіп төмендеуі 92% құрады.

Қолданылуы

- ұршық немесе тізе буындарын түгелдей эндопротездеу бойынша жоспарлы операциялардан кейін науқастардағы көктамыр тромбоэмболияларының бастапқы алдын алу емінде

- бір немесе бірнеше қауіп факторлары: өткерілген инсульт, транзиторлы ишемиялық шабуыл, ≥ 75 жас, жүрек-қантамыр жеткіліксіздігі (Нью-Йорк кардиологиялық қауымдастығының (NYHA) жіктеуіне сай ≥ II класы), қант диабеті, гипертониясы бар клапансыз жүрекшелер фибрилляциясына шалдыққан науқастарда инсульт пен жүйелі тромбоэмболияның алдын алуда

- тереңдегі көктамырлар тромбозы және өкпе артериясының тромбоэмболиясын емдеуде

- қайталанған тереңдегі көктамырлар тромбозы және өкпе артериясы тромбоэмболиясының алдын алуда.

Қолдану тәсілі және дозалары

Препаратты ас ішуге байланыссыз қабылданады. Капсуланы сумен ішіп, бүтіндей жұтады.

Капсуланы ашуға рұқсат етілмейді!

Капсулаларды қаптамадан босату кезіндегі айрықша нұсқаулар

– капсулаларды фольга арқылы қыспаңыз,

– фольганы ажыратып, блистерден капсулаларды шығарып алыңыз (фольганың ажыратылатын жері мен бағыты бағыттағыштармен көрсетілген)

Ұршық немесе тізе буындарын түгелдей эндопротездеу бойынша жоспарлы операциялардан кейін науқастардағы көктамыр тромбоэмболияларының (КТ) бастапқы алдын алу емі.

Тізе буынының эндопротезделуінен кейінгі КТЭ алдын алу: ПРАДАКСА препаратының ұсынылатын дозасы – тәулігіне бір рет 220 мг, яғни 110 мг-ден 2 капсула. ПРАДАКСА препаратымен емдеуді операция аяқталғаннан кейін 1-4 сағаттан соң бір капсула (110 мг) қабылдаудан бастау керек, кейіннен 10 күн бойы тәулігіне бір рет 2 капсула қабылданады. Егер гемостаз көрсеткіштері тұрақсыз болса, емдеуді кейінге қалдыру керек. Егер емдеу операция күні басталмаса, емді тәулігіне бір рет 2 капсуладан бастаған дұрыс.

Ұршық буынының эндопротезделуінен кейінгі КТЭ алдын алу: ПРАДАКСА препаратының ұсынылатын дозасы – тәулігіне бір рет 220 мг, яғни 110 мг-ден 2 капсула. ПРАДАКСА препаратымен емдеуді операция аяқталғаннан кейін 1-4 сағаттан соң бір капсула (110 мг) қабылдаудан бастау керек, кейіннен 28-35 күн бойы тәулігіне бір рет 2 капсула қабылданады. Егер гемостаз тұрақсыз болса, емдеуді кейінге қалдыру керек. Егер емдеу операция күні басталмаса, емді тәулігіне бір рет 2 капсуладан бастаған дұрыс.

Емделушілердің келесі топтарына ұсынылатын ПРАДАКСА препаратының тәуліктік дозасы тәулігіне бір рет 150 мг құрайды (75 мг-ден 2 капсула):

- бүйрек жеткіліксіздігі орташа емделушілер [КК 30-50 мл/мин]

- верапамил, амиодарон, хинидин препараттарымен қатарлас ем алған емделушілер

- 75 жастағы және одан асқан емделушілер.

Емдеуді операция аяқталғаннан кейін 1-4 сағаттан соң 75 мг бір капсула қабылдаудан бастау керек, кейіннен 10 күн бойы (тізе буынын эндопротездеу) немесе 28-35 күн бойы (ұршық буынын эндопротездеу) тәулігіне бір рет 2 капсула қабылданады.

Өткізіп алған доза. ПРАДАКСАНЫҢ өткізіп алған дозасын келесі күні әдеттегі уақытта қабылдау ұсынылады.

Өткізіп алған дозаның орнын толтыру үшін екі есе дозаны қабылдауға болмайды.

Бір немесе одан көп қауіп факторымен клапансыз жүрекшелер фибрилляциясы бар емделушілерде инсульттің және жүйелі тромбоэмболияның алдын алу.

ПРАДАКСА препаратының ұсынылатын тәуліктік дозасы 300 мг құрайды (күніне екі рет 150 мг 1 капсуладан). Ұзаққа созылатын ем ұсынылған.

Тереңдегі көктамырлар тромбозын және өкпе артериясының тромбоэмболиясын емдеу, қайталанған тереңдегі көктамырлар тромбозының және өкпе артериясың тромбоэмболиясының алдын алу.

ПРАДАКСАНЫҢ ұсынылатын тәуліктік дозасы 300 мг (тәулігіне екі рет 150 мг бір капсуладан) құрап, кем дегенде 5 күн бойы парентеральді антикоагулянттар қолданудан кейін тағайындалады.

Ем ұзақтығы емдеудің пайдасы мен қан кету қаупін мұқият бағалаудан кейін жекеше белгіленеді. Транзиторлы қауіп факторлары болғанда (таяудағы хирургиялық араласу, жарақат, иммобилизация) қысқа емдеу курсы (ең кемі 3 ай) көзделеді, ал тереңдегі көктамырлар идиопатиялық тромбозының немесе өкпе эмболиясының тұрақты қаупінде емдеу ұзақтығы жалғасады.

Келесі топтарға ұсынылатын ПРАДАКСА препаратының тәуліктік дозасы 220 мг (тәулігіне екі рет 110 мг бір капсуладан) құрайды.

- 80 жастағы және одан асқан емделушілер,

- бір мезгілде верапамил қабылдайтын емделушілер.

Емделушілердің келесі топтары үшін, дәрігердің тромбоэмболиялық құбылыстар қатерін және қан кету қаупін жекеше бағалауына қарай, ПРАДАКСА препаратының тәуліктік дозасы 300 мг немесе 220 мг құрауы тиіс:

- 75-тен бастап 80 жасқа дейінгі емделушілер

- бүйрек функциясы орташа бұзылған емделушілер

- гастрит, эзофагит немесе гастроэзофагеальді рефлюксі бар емделушілер

- қан кету қаупі жоғары басқа да емделушілер.

Дабигатранды көтере алмаған жағдайда жүрекшелер фибрилляциясымен астасқан инсульт пен жүйелі эмболиядан сақтануға немесе тереңдегі көктамырлар тромбозы/өкпе артериясының тромбоэмболиясы үшін баламалы ем тағайындау үшін шұғыл дәрігерге қаралу керек.

Кардиоверсия. Емделушілер кардиоверсия өткізу кезінде дабигатран этексилатын қабылдауды жалғастыра алады.

Өткізіп алған доза. Егер дәрілік затты келесі қабылдауға дейін 6 сағат қалса, дабигатран этексилатының өткізіп алған дозасын қабылдауға болады. Егер келесі қабылдауға дейін 6 сағаттан аз қалса, өткізіп алған дозаны қабылдауға болмайды.

Өткізіп алған дозаның орнын толтыру үшін екі есе дозаны қабылдауға болмайды.

Препаратты ауыстыру

Парентеральді антикоагулянттармен емдеуден ПРАДАКСА препаратын қабылдауға ауысу. Парентеральді антикоагулянт енгізуді тоқтатады және алмастырылатын парентеральді антикоагулянттың кезекті дозасын енгізгенше 0-2 сағат бұрын немесе ұзаққа созылатын ем жағдайында (мысалы, көктамыр ішіне фракцияланбаған гепарин қолданылмағанда) оны тоқтату кезінде дабигатран этексилатын қабылдауды бастайды.

ПРАДАКСА препаратымен емдеуден парентеральді антикоагулянттар енгізуге ауысу. Ұршық немесе тізе буындарын түгелдей эндопротездеу бойынша жоспарлы операциялардан кейін науқастарда көктамыр тромбоэмболияларының (КТЭ) бастапқы алдын алу мақсатында ПРАДАКСА препаратымен емдеуден антикоагулянттарды парентеральді енгізуге ПРАДАКСА препаратының соңғы дозасын қабылдағаннан кейін 24 сағаттан соң ауыстырылады.

Клапансыз жүрекшелер фибрилляциясымен науқастарда инсульт пен жүйелі эмболиядан сақтану, тереңдегі көктамырлар тромбозы мен өкпе артериясы тромбоэмболиясын емдеу, қайталанған тереңдегі көктамырлар тромбозының және өкпе артериясы тромбоэмболиясының алдын алу үшін парентеральді антикоагулянттарды дабигатран этексилатының соңғы дозасын қабылдағаннан кейін 12 сағаттан соң енгізуге болады.

ПРАДАКСАМЕН емдеуден К витамині антагонистерін қабылдауға ауысу.

К витамині антагонистерін қабылдаудың басталуы емделушінің креатинин клиренсін ескерумен мына үлгіде түзетілуі тиіс:

• Егер КК ≥50 мл/мин болса, К витамині антагонистерін қабылдау дабигатран этексилатын қабылдауды тоқтатудан 3 күн бұрын басталу керек.

• Егер КК ≥30 - <50 мл/мин болса, К витамині антагонистерін қабылдау дабигатран этексилатын қабылдауды тоқтатудан 2 күн бұрын басталу керек.

ПРАДАКСА ХҚҚ (халықаралық қалыптасқан қатынас) арттыруы мүмкін екендіктен, ПРАДАКСА қабылдауды кем дегенде 2 күнге тоқтатқаннан кейін К витамині антагонистерінің әсерін ХҚҚ сенімді көріністейтін болады. Бұған дейін ХҚҚ абайлап түсіндірілу керек.

К витамині антагонистерімен емделуден ПРАДАКСА қабылдауға ауысу. К витамині антагонистерін қабылдау тоқтатылуы тиіс. ХҚҚ 2.0-ден аз болған бойда дабигатран этексилатын қолдануға болады.

Жағымсыз әсерлері

Жағымсыз реакциялар ұршық буынына немесе тізе буынына жасалған операциядан кейінгі 9% емделушіде (42 күнге дейінгі уақытта қысқа мерзімді емдеу), инсульт немесе жүйелі эмболиялардан сақтану емінен өткен жүрекшелер фибрилляциясы бар 22% емделушіде (3 жылға дейінгі уақытта ұзақ мерзімді емдеу), тереңдегі көктамырлар тромбозын/өкпе эмболиясын емдеу үшін дәрілік зат қабылдаған 14% емделушіде және тереңдегі көктамырлар тромбозы/өкпе эмболиясының алдын алу мақсатында емнен өткен 15% емделушіде байқалды.

Қан кету ПРАДАКСАНЫҢ ең маңызды жағымсыз құбылысы болып табылады. Клиникалық зерттеулерде аталған ауқымды немесе күрделі қан кету жиілігінің көп еместігіне қарамастан, бұл қан кетулер (кез келген жерден) орын алуы мүмкін. Олар емделушілердің еңбекке жарамдылығын шектеуі, өміріне қатер төндіруі немесе өліммен аяқталуға әкелуі мүмкін. 2 кестеде жағымсыз әсерлері беріліп, мына жіктеу пайдаланылады: өте жиі ≥1/10, жиі ≥1/100-ден <1/10 дейін, жиі емес ≥1/1000-нан <1/100 дейін, сирек ≥1/10000-нан <1/1000 дейін, өте сирек <10000.

2 кесте. Клиникалық зерттеулер нәтижесінде білінген жағымсыз әсерлер

 

Қолдануға болмайтын жағдайлар

• препарат компоненттерінің біріне аса жоғары сезімталдық

• ауыр бүйрек жеткіліксіздігі (КК < 30 мл/мин аз)

• клиникалық мәні бар белсенді қан кету

• ауқымды қан кетудің жоғары даму қаупімен байланысты жай-күй: бұрыннан бар немесе таяуда өткерген асқазан-ішек жолының ойық жарасы, қан кету қаупі жоғары қатерлі жаңа түзілімдердің болуы, таяуда өткерген ми немесе омыртқа жарақаты, миға немесе жұлынға жуырда жасалған хирургиялық операция немесе офтальмологиялық операция, таяуда өткерген бассүйекішілік қан құйылу, өңеш көктамырларының белгілі немесе күдік тудыратын варикозды кеңеюі, артериялық-көктамырлық мальформациялар, тамырлық аневризмалар немесе ірі омыртқаішілік немесе миішілік тамырлар аномалиялары)

• геморрагиялық синдром (геморрагиялық диатез, өздігінен болған немесе дәрілер әсерінен бұзылған гемостаз)

• клиникалық мәнді қан кету нәтижесінде ішкі ағзалардың зақымдануы,

соңғы 6 ай ішіндегі геморрагиялық инсультті қоса

• жұлын-ми өзегіне немесе эпидуральді кеңістікте катетер қойғанда және оны алып тастаған соң алғашқы сағат ішінде

• емделушіде протезделген жүрек клапанының болуы

• Кез келген басқа антикоагулянттарды, соның ішінде, фракцияланбаған гепаринді, төмен молекулалы гепариндерді (ТМГ) (эноксапарин, дальтепарин және т.б.), гепарин туындыларын (фондапаринукс және т.б.), ішуге арналған антикоагулянттарды (варфарин, ривароксабан, апиксабан және т.б.) бір мезгілде қолдану, ПРАДАКСА препаратынан немесе сол препаратқа ауысу жағдайларын қоспағанда немесе орталық көктамырлық немесе артериялық катетерді ұстап тұруға қажетті дозаларда фракцияланбаған гепарин қолданылған жағдайда

• Бауыр жеткіліксіздігі немесе бауыр аурулары немесе бауыр ферменттерінің жоғарғы қалып шегінен 2 есе және одан көп жоғарылауы

• бір мезгілде кетоконазол, циклоспорин, интраконазол, дронедаронды жүйелі қолдану

• жүктілік және лактация кезеңі

• 18 жасқа дейінгі балалар мен жасөспірімдерге.

Дәрілермен өзара әрекеттесуі

Антикоагулянттар және антиагреганттар. ПРАДАКСА препаратын мына препараттармен бірге қолдану зерттелмеген және бұл қан кету қаупін арттыруы мүмкін: антикоагулянттар: фракцияланбаған гепариндер (ФГ), төмен молекулалы гепариндер, гепарин туындылары (фондапаринукс, дезирудин), тромболитикалық дәрілер, К витамині антагонистері, ривароксабан немесе ішуге арналған басқа антикоагулянттар; антиагреганттар - IIb/IIIa гликопротеин рецепторларының антагонистері, тиклопидин, прасугрел, тикагрелор, декстран және сульфинпиразон.

Дабигатран этексилаты мен дабигатран P450 циотохромы жүйесінің қатысуымен метаболизденбейді және адамның P450 цитохромы ферменттеріне in vitro ықпалын тигізбейді. Сондықтан дабигатран этексилатын немесе дабигатранды тиісті препараттармен бірге қолданған жағдайда дәрілік өзара әрекеттесу күтілмейді.

Клопидогрел: Дабигатран этексилаты мен клопидогрелді бір мезгілде қолдану, клопидогрел монотерапиясымен салыстырғанда, қылтамырдан қан кету уақытының әріқарай ұзаруына әкелмейді. Бұдан басқа, дабигатран AUCτ,ss және Cmax,ss мәндері, дабигатран әсеріне байланысты қан ұю параметрлері немесе клопидогрелдің әсер ету дәрежесі ретіндегі тромбоциттер агрегациясының тежелісі, біріктірілген емді сәйкесті монотерапиямен салыстырғанда, мүлде өзгеріссіз қалды. Клопидогрелдің 300 немесе 600 мг жүктеме дозаларын қабылдағанда дабигатран AUC және Cmax шамамен 1,3-1,4 есе (+ 30 - 40 %) есе жоғарылады.

Ацетилсалицил қышқылы: Қан кету қаупі, дабигатран этексилаты мен ацетилсалицил қышқылын бірге қабылдаудың әсері ретінде, жүрекшелер фибрилляциясы бар емделушілерде зерттелді, олар ацетилсалицил қышқылын рандомизациялы қабылдады. Талдау ацетилсалицил қышқылы мен 150 мг дабигатран этексилатын тәулігіне екі рет бірге қолданудың 81 мг және 325 мг ацетилсалицил қышқылын қабылдағанда кез келген қан кету қаупін, тиісінше, 12%-дан 18% дейін және 24% арттыруы мүмкін екенін көріністеді. Ұсынылған дозаларда ПРАДАКСА препаратын және 81-325 мг дозаларда ацетилсалицил қышқылын бірге қолдану қан кетудің даму қаупін арттырады.

Қабынуға қарсы стероидты емес препараттар (ҚҚСП): операцияның алдында қысқа мерзімді ауыруды басу үшін бірге ҚҚСП қолдану қан кетудің даму қаупінің жоғарылауына әкелмейді. Ұзақ уақыт ҚҚСП қолданғанда қан кету қаупі шамамен 50 % артады. Осылайша, қан кетудің даму қаупіне байланысты, әсіресе, 12 сағаттан көп жартылай шығарылу кезеңімен ҚҚСП қабылдау кезінде қан кету белгілерін мұқият бақылау қажет.

Төмен молекулалы гепариндер: бір мезгілде төмен молекулалы гепариндер, мысалы, эноксапарин мен дабигатран этексилатын қолдану арнайы зерттелмеген. Тері астына тәулігіне бір рет 40 мг эноксапаринді 3-күндік қолданудан ауысқанда эноксапариннің соңғы дозасынан кейін 24 сағаттан соң дабигатран әсері тек 220 мг дабигатран этексилатын бір рет қабылдаудан кейінгіден аздап төмен болды. Алдын ала эноксапарин енгізумен дабигатран этексилатын қолданудан кейін, дабигатран этексилатының монотерапиясымен салыстырғанда, едәуір жоғары анти-FXa/FIIa белсенділігі байқалды. Мұны эноксапарин қолданудан кейінгі әсерімен түсіндіруге болады және клиникалық мәнді болып табылмайды. Дабигатран қолданумен байланысты басқа антикоагулянттық тестілер эноксапарин алдын ала енгізілгенде елеулі өзгермеген.

P-гликопротеинмен өзара әрекеттесуі

P-гликопротеин (P-gp) тежегіштері: дабигатран этексилаты – P-gp эффлюксті тасымалдағышына тән субстрат. Бір мезгілде амиодарон, верапамил, хинидин, кетоконазол, дронедарон, тикагрелор, кларитромицин сияқты P-gp тежегіштерін қабылдау плазмалық дабигатран концентрацияларының ұлғаюына алып келеді.

Жүйелі қолданылатын кетоконазолмен бір мезгілде циклоспорин, итраконазол, дронедарон қолдану қарсы көрсетілімді! Бір мезгілде такролимус қолдану ұсынылмайды. Басқа P-gp тежегіштерін (мысалы, амиодарон, позаконазол, хинидин немесе верапамил) қабылдау кезінде сақ болу керек.

Кетоконазол: бір реттік 400 мг дозасын қабылдағанда дабигатранның AUC0-∞ және Cmax мәндері, тиісінше, 138 % және 135 %, ал кетоконазолды тәулігіне бір рет 400 мг дозада бірнеше рет қабылдаудан кейін, тиісінше, 153 % және 149 % артады. Кетоконазол жоғары шекті концентрациясына жетуге дейінгі уақытта дабигатранның жартылай шығарылу кезеңіне және оның организмде орташа ұсталу уақытына әсерін тигізбейді. Жүйелі қолданылатын кетоконазолды бір мезгілде қабылдау қарсы көрсетілімді!

Дронедарон: Бір мезгілде дабигатран этексилаты мен дронедаронды тәулігіне екі рет 400 мг-ден бірнеше рет қабылдағанда дабигатран AUC0-∞ және Cmax мәндері, тиісінше, 2,4 және 2,3 есе (+136% және 125%); 400 мг дронедаронды бір рет қабылдаудан кейін, тиісінше, 2,1 және 1,9 есе (+114% және 87%) ұлғаяды. Дронедарон дабигатранның соңғы жартылай шығарылу кезеңіне және бүйрек клиренсіне ықпалын тигізбейді. Дабигатран этексилатынан кейін 2 сағаттан соң дронедаронды бір рет және бірнеше рет қабылдағанда дабигатран AUC0-∞, тиісінше, 1,3 және 1,6 есе ұлғаяды. Дронедаронды бір мезгілде қолдану қарсы көрсетілімді.

Амиодарон: бір мезгілде ПРАДАКСА препараты мен амиодарон 600 мг дозада ішу арқылы бір рет қолданылғанда амиодарон мен оның белсенді метаболитінің сіңу дәрежесі мен жылдамдығы елеулі өзгермейді. Дабигатран AUC0-∞ және Cmax, тиісінше, 60 және 50 жоғарылады. Осы өзара әрекеттесу механизмі соңына дейін түсіндірілмеген. Амиодаронның жартылай шығарылу кезеңінің ұзаққа созылуына орай, дәрілік заттар арасындағы өзара әрекеттесу мүмкіндігі амиодарон қабылдауды тоқтатқаннан кейін бірнеше апта бойы сақталуы мүмкін.

Хинидин: хинидин 200 мг дозада әр 2 сағат сайын жалпы 1000 мг дозаға дейін қабылданды. Дабигатран этексилаты 3 күн бойы тәулігіне екі рет, үшінші күні хинидинмен немесе онсыз қабылданды. Хинидинмен бір мезгілде қабылдағанда дабигатран AUCτ,ss және Cmax,ss, тиісінше, 53 % және 56 % жоғарылады.

Дабигатран этексилатын амиодаронмен және хинидинмен біріктіріп қабылдағанда, әсіресе, жоғары қан кету қаупінде, сондай-ақ ауырлығы жеңіл және орташа дәрежеде бүйрек функциясы бұзылған емделушілерде мұқият клиникалық қадағалау ұсынылады.

Верапамил: ПРАДАКСА препараты (150 мг) мен верапамилді бір мезгілде қабылдайтын емделушілерде дабигатран Сmax және AUC верапамилдің дәрілік түріне және қабылдау уақытына қарай жоғарылайды. Дабигатран этексилатын қабылдауға дейін бір сағат бұрын дереу босап шығатын верапамилдің бірінші дозасын қабылдағанда дабигатран әсерінің ең көп артуы байқалады (дабигатран Сmax және AUC, тиісінше, 180% және 150% ұлғайған). Ұзақ әсер ететін дәрілік түрін қабылдағанда (дабигатран Cmax және AUC, тиісінше, 90% және 70% ұлғайған) немесе верапамилдің бірнеше реттік дозаларын қабылдағанда (дабигатран Cmax және AUC, тиісінше, 60% және 50% ұлғайған) әсері біртіндеп азаяды. Дабигатран этексилатын верапамилмен біріктіріп қабылдау кезінде мұқият клиникалық бақылау ұсынылады (қан кету немесе анемия белгілері).

Дабигатран этексилатынан кейін 2 сағаттан соң верапамил қабылдау кезінде елеулі өзара әрекеттесуі байқалмаған (дабигатран Cmax және AUC, тиісінше, 10% және 20% ұлғайған). Бұл дабигатран сіңуінің 2 сағаттан соң аяқталуымен түсіндіріледі.

Кларитромицин: ПРАДАКСА препараты мен кларитромицинді бір мезгілде қабылдайтын емделушілерде дабигатран концентрациясы 19 дейін жоғарылайды. Емделушілерге, әсіресе, жоғары қан кету қаупінде, сондай-ақ ауырлығы жеңіл және орташа дәрежедегі бүйрек функциясының бұзылуында мұқият клиникалық бақылау ұсынылады.

Тикагрелор: бір реттік 75 мг дозадағы дабигатран этексилаты мен 180 мг тикагрелордың екпінді дозасын бір мезгілде қолданғанда дабигатран AUC және Cmax, тиісінше, 1,73 және 1,95 есе (+73 және 95) жоғарылады. Тәулігіне екі рет 90 мг тикагрелорды бірнеше рет қабылдаудан кейін дабигатран Смакс және AUC, тиісінше, 1,56 немесе 1,46 есе (+56% немесе 46%) жоғарылады.

180 мг тикагрелордың екпінді дозасы мен 110 мг дабигатран этексилаты бір мезгілде тағайындалғанда (стационар жағдайында) дабигатран AUCτ,ss және Cmax,ss, дабигатран этексилатының монотерапиясымен салыстырғанда, тиісінше, 1,49 және 1,65 есе (+49% және 65%) ұлғайды. 110 мг дабигатран этексилатынан кейін 2 сағаттан соң 180 мг тикагрелордың екпінді дозасын қабылдағанда (стационар жағдайында) дабигатран AUCτ,ss және Cmax,ss, дабигатран этексилатының монотерапиясымен салыстырғанда, тиісінше, 1,27 және 1,23 есе (+27% және 23%) төмендеген. Күніне екі рет 90 мг тикагрелор (демеуші доза) мен 110 мг дабигатран этексилатын бір мезгілде қабылдау, дабигатран этексилатының монотерапиясымен салыстырғанда, дабигатран AUCτ,ss және Cmax,ss мәндерін, тиісінше, 1,26 және 1,29 есе арттырды.

Клиникалық жағдайларда интраконазол, такролимус және циклоспорин сияқты P-гликопротеин (P-gp) қуатты тежегіштері зерттелмеген, бірақ in vitro алынған нәтижелер негізінде олардың кетоконазолмен ұқсас әсерін күтуге болады. Бұл препараттарды дабигатран этексилатымен бір мезгілде қабылдау қарсы көрсетілімді.

Позаконазол біршама дәрежеде P-гликопротеинді тежейді, алайда оның әсері клиникалық тұрғыда зерттелмеген. ПРАДАКСА препаратын позаконазолмен бір мезгілде абайлап қолдану керек.

P-гликопротеин (P-gp) индукторлары: ПРАДАКСА препаратын P-гликопротеинді индукторлармен (мысалы, рифампицин, шайқурай препараттары (Hypericum perforatum), карбамазепин немесе фенитоин) бір мезгілде қолданбау керек, өйткені аталған біріктірілімдер қан плазмасындағы дабигатран концентрациясының төмендеуіне әкелуі мүмкін.

Рифампицин: рифампицинді 600 мг дозада 7 күн бойы тәулігіне бір рет алдын ала қабылдау дабигатранның жалпы жоғары шегі мен жалпы әсерін, тиісінше, 65,5 және 67% азайтады. Индуктор әсері азаяды, нәтижесінде дабигатран әсері рифампицинмен емдеуді тоқтатқаннан кейін 7-ші күні қалпына келеді. Әріқарай биожетімділігінің артуы 7 күн өткен соң байқалмайды.

Р гликопротеинге (P-gp) әсер етуші өзге дәрілік заттар: протеаза тежегіштері, соның ішінде ритонавир және оның басқа протеаза тежегіштерімен біріктірілімдері не тежеуші, не индукциялаушы әсерін көрсете отырып, P-gp-ге ықпал етеді. Бұл препараттар зерттелмеген, сондықтан оларды ПРАДАКСА препаратымен бірге қабылдау ұсынылмайды.

Р гликопротеин (P-gp) субстраты

Дигоксин. Дабигатран этексилатын дигоксинмен бір мезгілде қолданғанда фармакокинетикалық өзара әрекеттесуі байқалмаған. Дабигатран да, дабигатран этексилаты да клиникалық мәнді P-gp тежегіштері болып табылмайды.

Серотонинді кері қармайтын селективті тежегіштер (СКҚСТ).

ПРАДАКСА препараты мен СКҚСТ немесе норадреналинді кері қармайтын селективті тежегіштерді (НКҚСТ) бір мезгілде қолданғанда қан кету қаупі артады.

Асқазан сөлі рН-ын арттыратын препараттар.

Пантопразол: ПРАДАКСА препараты мен пантопразол бірге қолданылғанда дабигатранның «концентрация-уақыт» қисығы астындағы ауданының шамамен 30 төмендеуі анықталған. Пантопразол немесе протон сорғысының басқа тежегіштері мен ПРАДАКСА препараты біріктірілімінің қан кетудің дамуына немесе салыстырылатын дәрілердің фармакологиялық әсерлеріне ықпалы анықталмаған.

Ранитидин: бір мезгілде ранитидин қабылдау ПРАДАКСА препаратының сіңу дәрежесіне ықпал етпейді.

Айрықша нұсқаулар

Қан кетудің даму қаупі. ПРАДАКСА препараты, барлық антикоагулянттар сияқты, қан кету қаупінің жоғарылауымен сипатталатын жағдайларда сақтықпен қолданылуы тиіс. Оларға: ≥ 75 жас, бүйрек функциясының төмендеуі (КК 30-50 мл/мин), дене салмағы < 50 кг, плазмада дабигатран деңгейін арттыратын P-gp тежегіштерін бір мезгілде қабылдау, антиагрегантты дәрілер қабылдау жатады.

ПРАДАКСА препаратымен ем кезінде қан кетудің кез келген көзі болуы мүмкін. Гемоглобиннің және/немесе гематокриттің немесе артериялық қысымның түсініксіз төмендеуінде қан кету көзін іздестіру қажет және емдеуді тоқтату керек.

Клапансыз жүрекшелер фибрилляциясымен науқастарда инсульт пен жүйелі эмболиялардың алдын алуға қатысты зерттеулерде дабигатран этексилаты, әсіресе, егде жастағы емделушілер (≥75 жас) тәулігіне екі рет 150 мг дабигатран этексилатын қабылдағанда асқазан-ішектен қан кетумен аса жиі астасқан. Ацетилсалицил қышқылын, клопидогрел немесе ҚҚСП қолдану, эзофагит, гастрит немесе гастроэзофагеальді рефлюкстің болуы асқазан-ішектен қан кету қаупін арттырады. Клапансыз жүрекшелер фибрилляциясы бар емделушілерге дабигатран этексилатын 220 мг тәуліктік дозада (тәулігіне екі рет 110 мг бір капсуладан) қолдану мүмкіндігін қарастырып, дозалау режимі бойынша нұсқауларды қадағалау керек. Асқазан-ішектен қан кетуді болдырмау үшін протон помпасы тежегіштерін қолдануды қарастыру керек.

Серотонинді кері қармайтын селективті тежегіштерді (СКҚСТ) немесе серотонин мен норадреналинді кері қармайтын селективті тежегіштерді (СжНКҚТ) бір мезгілде алатын емделушілерде қан кету қаупі артуы мүмкін.

Емделу кезеңі бойына, әсіресе, бірнеше қауіп факторлары болғанда емделушілерді мұқият клиникалық бақылау (қан кету белгілері немесе анемиялар) ұсынылады.

Қан кету қаупі ерекше аурулар/емшаралар: туа біткен немесе жүре пайда болған қан ұюының бұзылулары, тромбоцитопения немесе тромбоциттердің функционалдық ақаулары, таяуда жасалған биопсия немесе күрделі жарақат, бактериялық эндокардит, эзофагит, гастрит немесе гастроэзофагеальді рефлюкс.

Жоғарыда аталған ауқымды қан кету қаупін елеулі арттыратын жағдайлар болғанда пайда/қауіп арақатынасын тиянақты бағалау қажет болады. Егер дәрілік затты қолданудың пайдасы қан кету қаупінен басым болса, ПРАДАКСА тағайындалу керек.

ПРАДАКСА препаратымен емдеуде антикоагулянттық мониторинг жасау қажет емес. ХҚҚ тестісі ПРАДАКСА препаратын қабылдап жүрген емделушілердің сенімді деректерін қамтамасыз етпейді, әрі жалған оң нәтиже беруі мүмкін. Дабигатранның шектен тыс белсенділігі тромбин уақыты (TУ), экариндік ұйынды уақыты (ЭҰУ) және ішінара белсендірілген тромбопластин уақыты (ІБТУ) сияқты антикоагулянттық белсенділік тестілерінің көмегімен бағаланады.

Дабигатран антикоагулянттық белсенділігін ЭҰУ немесе TУ тестілерімен бағалауға болады. Егер олар қолжетімді болмаса, дабигатран антикоагулянттық белсенділігіне жуық шамада баға беретін ІБТУ тестісі ұсынылады. 3 кестеде қан кетудің жоғары даму қаупімен астасуы мүмкін препараттың ең төмен концентрацияларында антикоагулянттық белсенділікті анықтау нәтижелері беріледі.

3 кесте. Препараттың ең төмен концентрациясында антикоагулянттық белсенділікті анықтау нәтижелері

Ауқымды қан кету дамығанда емдеуді тоқтатып, қан кету көзін табу керек.

Қан кету қаупін арттыруы мүмкін дәрілік заттар бір мезгілде қабылданбауы тиіс немесе ПРАДАКСА препаратымен абайлап қабылдануы тиіс.

Жедел ишемиялық инсультті емдеуге фибринолитикалық дәрілерді қолдану: Егер емделушінің ТУ, ЭҰУ немесе ІБТУ көрсеткіштері жоғарғы қалып шегінен асып кетпесе, жедел ишемиялық инсультті емдеуге фибринолитикалық дәрілерді қолдануға болады.

Хирургиялық операциялар мен араласулар. Қан кетудің даму қаупінің артуымен байланысты ПРАДАКСА препаратын қабылдау инвазиялық емшаралар немесе хирургиялық операциялар өткізу алдында уақытша тоқтатылуы тиіс. Операциялық араласулармен байланысты емдеу уақытша тоқтатылғанда сақ болу керек, ондай жағдайларда антикоагулянттық емге мониторинг жасау ұсынылады. Бүйрек жеткіліксіздігі бар емделушілерде

дабигатран клиренсі артуы мүмкін, оны кез келген емшара тағайындалғанда ескеру қажет. Гемостаздың бұзылуын анықтау антикоагулянттық белсенділікті анықтауға көмектесе алады.

Операцияның алдындағы кезең. ПРАДАКСА препаратын қабылдау хирургиялық араласулар немесе операциялар жасаудан, кем дегенде, 12 сағат бұрын тоқтатылуы тиіс. Қан кету қаупі жоғары емделушілерде немесе толық гемостаз талап етілетін ауқымды операция жасалар алдында ПРАДАКСА препаратын қабылдауды операцияға дейін 2-4 күн бұрын тоқтату ұсынылады. Бүйрек жеткіліксіздігі бар емделушілерде дабигатран клиренсі артуы мүмкін. Оны кез келген емшараның алдында ескеру керек. 4 кестеде инвазиялық емшаралар немесе хирургиялық операциялар жасау алдында емді тоқтату ережелеріне шолу берілген.

 

4 кесте. Инвазиялық емшаралар немесе хирургиялық операциялар жасау алдында емді тоқтату ережелеріне шолу

Жұлын анестезиясы/ Эпидуральді анестезия/ Люмбальді пункция: Жарақаттайтын немесе қайталанған пункциялар жағдайларында, сондай-ақ операциядан кейін эпидуральді катетер ұзақ уақыт пайдаланылғанда жұлындық немесе эпидуральді гематоманың даму қаупі арта түседі. ПРАДАКСА препаратының алғашқы дозасын катетерді алып тастағаннан кейін 1 сағат өткен соң барып қабылдаған жөн. Неврологиялық симптомдарды болжамды анықтау мақсатында ондай емделушілерді бақылау қажет.

Қан кету қаупі жоғары операциялардан кейінгі емделушілер. Қан кетудің даму қаупі бар емделушілерге немесе дабигатран әсерінің жоғарылау қаупі бар емделушілерге, әсіресе, ауырлығы орташа дәрежеде бүйрек функциясы бұзылған (креатинин клиренсі 30-50 мл/мин) емделушілерге ПРАДАКСА препаратын сақтықпен тағайындау керек. Емдеу гемостазға жеткен соң жаңғыртылады.

Операция кезінде өліммен аяқталу қаупі жоғары және тромбоэмболиялық асқынулардың қауіп факторлары бар емделушілер. Мұндай емделушілер үшін дабигатран тиімділігі мен қауіпсіздігіне қатысты деректер шектеулі, ПРАДАКСА препаратын сақтықпен тағайындау керек.

Жамбас сынуы кезіндегі операциялар. Жамбас сынуы кезінде операция жасалған емделушілерде ПРАДАКСА препаратын қолдану жөнінде деректер жоқ. ПРАДАКСА препаратын қолдану ұсынылмайды.

Егде жастағы емделушілер: жас ұлғаюымен бүйрек функциясының төмендеуі байқалатын егде жастағы (>75 жас) емделушілерде организмдегі препарат мөлшерінің көбеюі анықталған. Бүйрек жеткіліксіздігінің жиілігі жас ұлғаюымен артатындықтан, ПРАДАКСА препаратымен ем басталғанша егде жастағы емделушілер ауыр бүйрек жеткіліксіздігінің бар-жоғын анықтау үшін (КК 30 мл/мин аз) бүйрек функциясын тексеруден (креатинин клиренсі бойынша) өткізуі тиіс. Әріқарай ПРАДАКСА препаратын алатын емделушілерде, егер бүйрек функциясының нашарлауы (гиповолемия, сусыздану) күдік тудырса, жылына 1 реттен сирек емес немесе одан жиірек бүйрек функциясын тексерту керек.

Жедел бүйрек жеткіліксіздігі дамитын емделушілер ПРАДАКСА препаратын қабылдауды тоқтатуы тиіс.

Бүйрек функциясы бұзылған емделушілер. ПРАДАКСА препаратын қабылдау басталғанша дәрілік заттың бүйрек функциясының ауыр бұзылуы бар (креатинин клиренсі < 30 мл/мин) емделушілерге тағайындалуына жол бермеу үшін креатинин клиренсін есептеу қажет. Бүйрек жеткіліксіздігінің дамуы (мысалы, гиповолемия, дегидратация, кейбір дәрілік заттарды бір мезгілде қабылдау) күдік тудырғанда емделу кезінде бүйрек функциясын бағалау қажет.

Ауырлығы орташа дәрежеде бүйрек функциясы бұзылған емделушілерде (креатинин клиренсі 30-50 мл/мин) ұршық және тізе буындарын түгелдей эндопротездеу бойынша жоспарлы операциялар жасалғанда көктамыр тромбоэмболиясының бастапқы алдын алу үшін дабигатранды клиникалық қолдану тәжірибесі шектеулі. Ондай емделушілерді абайлап емдеу керек. Ұсынылатын дозасы – тәулігіне бір рет 150 мг (75 мг-лік 2 капсула).

Клапансыз жүрекшелер фибрилляциясына шалдыққан емделушілерде инсульт пен жүйелі эмболиядан сақтану, тереңдегі көктамырлар тромбозы мен өкпе артериясының тромбоэмболиясын емдеу, қайталанған тереңдегі көктамырлар тромбозы мен өкпе артериясы тромбоэмболиясының алдын алу үшін ауырлығы жеңіл дәрежеде бүйрек функциясы бұзылған (креатинин клиренсі 50-≤80 мл/мин) емделушілерге дозалау режимін түзету қажет емес. Ауырлығы орташа дәрежеде бүйрек функциясы бұзылған (креатинин клиренсі 30-50 мл/мин) емделушілерге де ПРАДАКСАНЫ 300 мг тәуліктік дозада (тәулігіне екі рет 150 мг бір капсуладан) ішке қабылдау керек. Алайда қан кету қаупі жоғары емделушілерге тәуліктік дозаны 220 мг дейін (тәулігіне екі рет 110 мг бір капсуладан) азайтуды қарастыру керек. Бүйрек функциясы бұзылған емделушілерге мұқият клиникалық бақылау ұсынылады.

Бір мезгілде ПРАДАКСА препараты мен Р-гликопротеин тежегіштерін, мысалы, амиодарон, хинидин немесе верапамил қолдану. Амиодарон немесе хинидин бір мезгілде қабылданғанда дозалау режимін түзету қажет емес. Ұршық және тізе буындарын түгелдей эндопротездеу бойынша жоспарлы операция жасалған соң бір мезгілде дабигатран этексилаты мен амиодарон, хинидин немесе верапамил қабылдаған емделушілерге ПРАДАКСА препаратының дозасын тәулігіне 150 мг дейін (75 мг-ден 2 капсула) азайту керек.

Прадакса (клапансыз жүрекшелер фибрилляциясымен инсульттен және жүйелі эмболиядан сақтану, тереңдегі көктамырлар тромбозы мен өкпе артериясы тромбоэмболиясын емдеу, қайталанған тереңдегі көктамырлар тромбозы мен өкпе артериясы тромбоэмболиясының алдын алу) препаратын қабылдайтын емделушілер үшін доза 220 мг (тәулігіне екі рет 110 мг бір капсуладан) дейін азайтылуы тиіс.

Бұл жағдайда ПРАДАКСА мен жоғарыда аталған дәрілік заттар бір мезгілде қабылдануы тиіс.

Дене салмағы. Қолда бар клиникалық және кинетикалық деректерге сай, дозалау режимін түзету қажет емес. Дене салмағы 50 кг-ден аз емделушілерге мұқият клиникалық бақылау ұсынылады.

Жынысы. Қолда бар клиникалық және кинетикалық деректерге сай, дозалау режимін түзету қажет емес.

Жасанды жүрек клапандары бар емделушілер. Жүрек клапандары протезделген емделушілерде ПРАДАКСА препаратын қолдану тиімділігі және қауіпсіздігі анықталмаған. Сол себепті ПРАДАКСА препаратын емделушілердің осы тобында қолдануға болмайды.

Миокард инфарктісі (клапансыз жүрекшелер фибрилляциясы бар ересек емделушілерде инсульт пен жүйелі эмболиядан сақтану). Миокард инфарктісінің (МИ) жиілігі тәулігіне екі рет 110 мг және 150 мг дабигатран этексилатын қабылдағанда, тиісінше, 0,82 және 0,81 %/жыл құрады. Емге қарамастан, ең үлкен МИ абсолютті қаупі, салыстырмалы қауіп сияқты, мына қосалқы топтарда байқалды: сыртартқысында МИ бар емделушілер, қант диабеті немесе ишемиялық жүрек ауруы бар ≥65 жастағы емделушілер, сол жақ қарынша лықсыту фракциясы < 40% болатын емделушілер және ауырлығы орташа дәрежеде бүйрек функциясы бұзылған емделушілер. Бұдан басқа, жоғары МИ қаупі бір мезгілде ацетилсалицил қышқылы мен клопидогрел немесе тек клопидогрел қабылдаған емделушілерде болады.

Миокард инфарктісі (ересектерде тереңдегі көктамырлар тромбозын және өкпе артериясы тромбоэмболиясын емдеу, қайталанған тереңдегі көктамырлар тромбозы мен өкпе артериясы тромбоэмболиясының алдын алу). Дабигатран этексилатын қабылдаған емделушілерде аса жоғары МИ қаупі анықталған. Дабигатран этексилаты мен плацебоға салыстыру жүргізілген RE-SONATE сынағында МИ қаупі дабигатран этексилатын қабылдаған 0,1% емделушіні және плацебо қабылдаған 0,2% емделушіні құрады.

Бояғыш. Капсула құрамында аллергиялық реакциялар туғызуы мүмкін сары сансет қосымша заты бар.

Жүктілік. Жүктілік кезінде дабигатран этексилатын қолдану туралы клиникалық деректер жоқ. Әйелге әлеуетті қатері белгісіз.

Бала туу жасындағы әйелдер ПРАДАКСА препаратын қолдану кезінде жүкті болып қалмауы тиіс. Жүктілік басталған жағдайда, күтілетін пайдасы қауіптен асып түсетін жағдайларды қоспағанда, ПРАДАКСА препаратын қолдану ұсынылмайды.

Бала емізу. Клиникалық деректер жоқ. ПРАДАКСА препаратын қолданған жағдайда, емшекпен қоректендіруді тоқтату керек (алдын ала сақтану шарасы ретінде).

Фертильділік. Клиникалық деректер жоқ. Репродуктивтік жүйенің клиникадан тыс зерттеулерінде фертильділікке немесе жаңа туған сәбидің постнатальді дамуына қандай да бір жағымсыз әсерлері анықталмаған.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері. Препараттың автокөлікті және механизмдерді басқару қабілетіне әсер етуіне арнайы зерттеулер жүргізілмеген.

Артық дозалануы

ПРАДАКСА препаратын қолдану кезіндегі артық дозалану геморрагиялық асқынулармен қатар жүруі мүмкін, бұл препараттың фармакодинамикалық ерекшеліктеріне байланысты. Қан кету пайда болғанда препаратты қолдануды тоқтатып, қан кету көзін анықтау қажет.

Дабигатран көбінесе бүйрекпен шығарылатындықтан, талапқа сай диурезді қамтамасыз ету ұсынылады.

Симптоматикалық ем көрсетілген. Арнайы у қайтарғысы жоқ. Қажет болса, хирургиялық гемостаз жасалады және айналымдағы қан көлемі (АҚК) толықтырылады. Дабигатранның қан плазмасы ақуыздарымен байланысу қабілеті төмен болғандықтан, препарат гемодиализ кезінде шығарылуы мүмкін, алайда, бұл жағдайларда диализ пайдалануға қатысты клиникалық тәжірибе шектеулі.

ПРАДАКСА препараты артық дозаланғанда белсендірілген протромбин кешенінің немесе рекомбинатты VІІа фактор концентраттарын немесе ІІ, ІХ немесе Х ұю факторларының концентраттарын пайдалануға болады.

Тромбоцитопения дамыған жағдайда немесе ұзақ әсер ететін антиагреганттар қолданылғанда тромбоцитарлық масса қолдану мәселесін қарастыруға болады.

Шығарылу түрі және қаптамасы

Баспалы күңгірт лакталған алюминий фольгадан жасалған саңылауы бар пішінді ұяшықты қаптамада 10 капсуладан. Немесе алғашқы ашылуы бақыланатын бұрандалы пластик қақпақпен тығындалған және ылғалтартқышы бар полипропилен құтыда 60 капсуладан.

Бір құты немесе пішінді ұяшықты 1, 3 немесе 6 қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Сақтау шарттары

Құрғақ жерде, 25оС-ден аспайтын температурада сақтау керек.

Құтыны ылғалдан қорғау үшін тығыздап жауып сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Құтыны ашқаннан кейін препаратты 4 ай ішінде пайдалану керек.

Қаптамасында көрсетілген жарамдылық мерзімі өткеннен кейін препаратты пайдалануға болмайды.

Дәріханалардан босатылу шарттары

Рецепт арқылы

Өндіруші

Берингер Ингельхайм Фарма ГмбХ және Ко.КГ,

Бингер Штрассе 173, 55216 Ингельхайм, Германия.

Тіркеу куәлігінің иесі

Берингер Ингельхайм Фарма ГмбХ және Ко.КГ, Германия.

Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы

«Берингер Ингельхайм Фарма Гес мбХ» ҚР өкілдігі

мекенжайы: Алматы қ., 050008, Абай д-лы 52

«Innova Tower» бизнес орталығы, 7ші қабат

тел: +7 (727) 250 00 77 факс: +7 (727) 244 51 77

e-mail: PV_local_Kazakhstan@boehringer-ingelheim.com