Полидекса с фенилэфрином

• русский
• қазақша

• Скачать инструкцию медикамента

Саудалық атауы

Полидекса фенилэфринмен

Халықаралық патенттелмеген атауы

Жоқ

Дәрілік түрі

Мұрын спрейі

Құрамы

100 мл препараттың құрамында:

белсенді заттар: 1,0 г (650 000 ХБ) неомицин сульфаты

1 000 000 ХБ полимиксин В сульфаты

0,025 г дексаметазон натрий метасульфобензоаты

0,250 г фенилэфрин гидрохлориді,

қосымша заттар: метилпарагидроксибензоат, литий хлориді, лимон қышқылының моногидраты, литий гидроксиді, макрогол 4000, полисорбат 80, тазартылған су.

Сипаттамасы

Мөлдір түссіз сұйықтық

Фармакотерапиялық тобы

Микробтарға қарсы препараттармен біріктірілген глюкокортикостероидтар. Микробтарға қарсы препараттармен біріктірілген дексаметазон.

АТЖ коды S02CA06

Фармакологиялық қасиеттері

Фармакокинетикасы

Жергілікті қолданған кезде препараттың жүйелік сіңуі төмен болғандықтан, фармакокинетикасы жөнінде деректер берілмеген

Фармакодинамикасы

Отоларингологияда жергілікті қолдану үшін қабынуға қарсы біріктірілген препарат.

Неомицин және В полимиксин бактерияларға қарсы әсер етеді. Аталған антибиотиктерді біріктірген кезде мұрынның және оның қосалқы қуыстарының жұқпалы-қабыну ауруларын тудыратын грамоң және грамтеріс микроорганизмдердің көбіне антибактериялық әсер ету өрісі кеңейеді.

В полимиксин сульфаты грамоң және грамтеріс микроорганизмдерге бактерицидті әсер етеді. Антибиотиктің өте бағалы ерекшелігі оның көкіріңді таяқшаларға тиімділігі болып табылады. Кокктік аэробтық (стафило-, стрепто-, пневмо-, гоно- және менингококктар) және анаэробтық микроорганизмдерге, сондай-ақ Proteus штаммдарының көпшілігіне, туберкулез, күл қоздырғыштарына, клостридийлерге және саңырауқұлақтарға да әсер етпейді.

Неомицин грамоң да, грамтеріс те микроорганизмдерге (стафилококк, Proteus, Enterobacter, Klebsiella, Shigella, Haemophilus influenzae, Salmonella, Campilobacter, Cornebacterium, Listeria monocytogenes, Escherichia coli және басқалар) әсер етеді. Микоплазмаға, көкіріңді таяқшаларға, стрептококтерге, анаэробтық микроорганизмдерге төзімді.

Дексаметазон глюкокортикостероид болып табылады, жергілікті қолданған кезде қабынуға қарсы, аллергияларға қарсы және экссудатқа қарсы әсер етеді.

Фенилэфрин гидрохлориді симпатомиметик болып табылады, постсинаптикалық α-адренорецепторларды стимуляциялайды және қантамырларды тарылтатын әсері бар. Вазоконстриктор ретінде мұрынның және мұрын қосалқыларының шырышты қабықтарының ісінуін, экссудативтік біліністерінің айқындылығын азайтады, еркін тыныс алуды қалпына келтіреді.

Қолданылуы

Мұрын қуысының, мұрынның қосалқы қуыстарының қабыну және жұқпалы ауруларында:

- жедел және созылмалы ринитте

- синуситте.

Қолдану тәсілі және дозалары

Ересектерге: әрбір танауға тәулігіне 3-5 рет бір бүрку керек.

12 жастан асқан балаларға: әрбір танауға тәулігіне 3 рет бір бүрку керек.

Емдеу ұзақтығы – 5-10 күн.

Құтыны тік ұстаңыз, басты артқа қарай шалқайтыңыз және бүрку үшін тетікті басыңыз.

Жағымсыз әсерлері

Жергілікті реакциялар:

- мұрынның құрғау синдромы

- аллергиялық реакциялардың терілік біліністері

Жалпы реакциялар: ұзақ уақыт немесе жоғары дозаларда қолданғанда:

- бас ауыру, ұйқысыздық

- артериялық қысымның жоғарылауы, жүрек лүпілінің жиілеуі

- діріл, терінің бозаруы

- антибиотиктерді жүйелі қолданудан препараттың құрамына кіретін антибиотиктерге жергілікті немесе жүйелік асқын сезімталдық және сенсибилизация.

Қолдануға болмайтын жағдайлар

- препарат компоненттеріне, әсіресе парабендерге немесе аминогликозидтерге жоғары сезімталдық

• жабық бұрышты глаукомаға күдіктену

• уретропростатикалық бұзылуларға байланысты, несептің шығарылуының іркілуіне күдіктену

• белдемелі теміреткі, желшешек, герпес сияқты жұқпалардың мұрынға орнығуы

• жүктілік және лактация кезеңі

- 12 жасқа дейінгі балалар

Дәрілермен өзара әрекеттесуі

Құрамында фенилэфриннің болуына байланысты дәрілердің өзара әрекеттесуі

Біріктіруге ұсынылмайтын препараттар:

Бромокриптин – вазоконстрикция және/немесе гипертензивті кризис қаупін арттырады.

Гуанетидин және гуанетидин тобының препараттары – симпатикалық тонустың төмендеуіне байланысты фенилэфриннің гипертензивтік әсерін арттырады, ұзақ мидриаз болуы мүмкін.

Селективті емес МАОТ – гипертензивті кризді тудыруы мүмкін (аминдер метаболизмінің басылуы).

Бір мезгілде қолданған кезде сақтықты қажет ететін препараттарды біріктіру:

Селективті МАОТ (толоксатон және моклобемид) – дәрілік өзара әрекеттесу жөнінде деректер жоқ, алайда аналогтары бойынша селективті емес МАОТ-мен бірге қолданғанда дәрігердің сақ болғаны және құрамында фенилэфрині бар препаратты, емдеу үшін тек осы топтың препараттарын қажет ететін жағдайларда, тағайындаған жөн, ал емделуші белгіленген дозаны қатаң орындауы тиіс.

Құрамында дексаметазонның болуына байланысты дәрілердің өзара әрекеттесуі

Біріктіруге ұсынылмайтын препараттар:

Пируэттік қарыншалық тахикардияны тудыратын препараттар (астемизол, бепридил, IV эритромицин, халофантрин, пентамидин, спарфлоксацин, сультоприд, терфенадин, винкамин) гипокалиемияның пайда болу қаупін арттырады.

Бір мезгілде қолданған кезде сақтықты қажет ететін препараттарды біріктіру:

Ацетилсалицил қышқылы және басқа да салицилаттар – кортикостероидтық емделу кезінде салицилемияны азайтады және оны тоқтатқаннан кейін, салицилаттарды организмнен кортикостероидтармен бірге бөлініп шығуының артуына байланысты, салицил қышқылының артық дозалану қаупін күшейтеді. Бір мезгілде қолданған кезде және кортикостероидтармен емдеуді аяқтағаннан кейін салицилаттардың тиісті дозаларын таңдап алу қажет.

Аминоглутетимид – бауырлық метаболизмінің артуына байланысты дексаметазонның тиімділігін төмендетеді. Дексаметазонның дұрыс дозасын таңдап алу қажет.

Пируэттік қарыншалық тахикардияны тудыратын антиаритмиялық препараттар (амиодарон, бретилий, дизопирамид, В-хинин, дериваттар, соталол). Гипокалиемияға жол бермеу үшін QT аралығын бақылау қажет. Пируэттік қарыншалық тахикардияларда аритмияға қарсы препараттарды қолданбау керек.

Ішу арқылы қабылданатын антикоагулянттар – кортикостероидтармен жоғары дозаларда немесе ұзақ (10 күннен астам) емдеуге тән қан құйылулар (дигестивтік мукоза, васкулярлы әлсіздік) қаупін күшейтеді. Препараттарды дұрыс біріктірген кезде қан көрсеткіштерін 8-күні, содан кейін кортикостероидпен емдеу кезінде және оны тоқтатқаннан кейін әрбір 15 күн сайын ұдайы бақылап отыру қажет.

Басқа да гипокалиемиялық дәрілер (диуретиктер, іш жүргізетін дәрілер, IV В амфотерицин) – гипокалиемия қаупін арттырады. Қандағы калий деңгейін бақылап отыру қажет.

Оймақгүл туындылары – оймақгүл туындыларының уыттық әсерлері гипокалиемияны күшейтеді. Қандағы калий деңгейін бақылап отыру қажет.

Парентеральді түрде қолданылатын гепарин - кортикостероидтармен жоғары дозаларда немесе 10 күннен астам ұзақ емдеуге тән қан құйылулар (дигестивтік мукоза, васкулярлы әлсіздік) қаупін арттырады. Препараттарды біріктіру дұрыс болуы және реттелуі тиіс.

Ферментативтік индукторлар (карбамазепин, фенобарбитал, фенитоин, примидон, рифабутин, рифампицин) – бауырлық метаболизмінің артуына байланысты, қан плазмасының деңгейін және кортикостероидтардың тиімділігін төмендетеді. Зардаптары әсіресе аддисонизмі бар науқастарда және трансплантат кезінде күшті білінеді. Препараттарды бір мезгілде қолданған кезде және ферментативтік индукторларды тоқтатқаннан кейін клиникалық және биологиялық бақылау, кортикостероидтың дозасын реттеу қажет.

Инсулин, метформин, гипогликемиялық сульфамидтер – гликемияны арттырады, кейде ол кетозбен қатар жүреді. Емнің бас кезінде қан және несеп көрсеткіштерін ұдайы бақылап отыру, сондай-ақ кортикостеродтармен емдеу кезінде және оны тоқтатқаннан кейін диабетке қарсы препараттың тиімді дозасын таңдап алу қажет.

Изониазид – изониазидтің бауырлық метаболизмінің артуына және глюкокортикостероидтардың метаболизмінің азаюына байланысты, қан плазмасында изониазидтің концентрациясын төмендетеді. Емделушінің жағдайына клиникалық және биологиялық бақылау жасау қажет.

Жергілікті асқазан-ішектік дәрілер: магнезий, алюминий және кальций тұздары, тотықтар және гидроксидтер (преднизолон, дексаметазон үшін сипатталған) глюкокортикостероидтардың дигистивтік сіңуінің азаюына мүмкіндік береді.

Ерекше көңіл бөлу қажет деп табылған препараттарды біріктіру:

Гипертензияға қарсы дәрілер: бір мезгілде қолдану гипертензияға қарсы әсерінің төмендеуіне мүмкіндік береді.

Әлсіздендірілген тірі вакциналар: жүйелік аурулардың пайда болу қаупін арттырады, өлім-жітіммен аяқталуы мүмкін. Бұл қауіп иммунитеті нашарлаған негізгі ауруы бар емделушілерде арта түседі. Мұндай жағдайда, егер бар болса, белсенді емес вакциналарды (полиомиелит) пайдалану қажет.

Празиквантел: қан плазмасында празиквантелдің концентрациясы азаюы мүмкін.

Айрықша нұсқаулар

Жұтпау керек.

Мұрынның қосалқы қуыстарын жуып-шаю үшін қолдануға болмайды.

Бүйрек қызметінің жеткіліксіздігі бар науқастарға қолданбау керек.

Кортикостероидтың бар болуы жергілікті аллергиялық реакциялардың алдын ала алмайды, бірақ олардың клиникалық көрінісін өзгертуі мүмкін.

Тиісті жалпы клиникалық симптомдар бар болған кезде жүйелік емдеу курсы қарастырылуы тиіс.

Артериялық гипертензиясы, ЖИА, гипертиреозы бар емделушілерде препаратты абайлап қолдану керек.

Спортшылардың назарына: препараттың құрамында дексаметазон бар, ол допинг-бақылау жасаған кезде оң нәтиже беруі мүмкін.

Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері

Ықпал етпейді

Артық дозаланғанда

Жүйелік қан ағысына сіңу дәрежесі төмен болғандықтан, артық дозалану мүмкіндігі аз.

Шығарылу түрі және қаптамасы

Тығыздығы төмен ақ полиэтиленнен жасалған ұштығы, тығыздығы төмен полиэтиленнен жасалған мөлдір түссіз түтігі және тығыздығы төмен полиэтиленнен жасалған бұралатын қақпағы бар тығыздығы төмен полиэтиленнен жасалған, жарықты өткізбейтін ақ құтыда препарат 15 мл-ден. Құтыға заттаңбалық қағаздан жасалған заттаңба жапсырылады.

Құты медицинада қолданылуы жөнінде мемлекеттік және орыс тілдеріндегі нұсқаулықпен бірге картон қорапқа салынған.

Сақтау шарттары

25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды

Дәріханадан босатылу шарттары

Рецепт арқылы

Өндіруші

«СОФАРТЕКС»

21 рю дю Прессо, 28500 Вернуйе, Франция

Тіркеу куәлігінің иесі

«Лаборатории БУШАРА-РЕКОРДАТИ»

68 рю Маржолен, 92300 Леваллуа-Перре, Франция

Тұтынушылардан өнім сапасы жөнінде шағымдарды Қазақстан Республикасы аумағында қабылдайтын ұйымның мекенжайы:

Қазақстан Республикасындағы «FIC MEDICAL» (ФИК МЕДИКАЛЬ) ЖШС өкілдігі, Төле би к-сі 69, кеңсе 33, 050000, Алматы қ-сы, Қазақстан Республикасы

тел.: +7 (727) 272 93 08, факс: +7 (727) 272 90 25

e-mail: fic_kz@ficmedical.kz