Пласеп

• русский
• қазақша

• Скачать инструкцию медикамента

Саудалық атауы

Пласеп

Халықаралық патенттелмеген атауы

Клопидогрел

Дәрілік түрі

Үлбірлі қабықпен қапталған 75 мг таблеткалар

Құрамы

Бір таблетканың құрамында

белсенді зат – 98.00 мг клопидогрел бисульфаты (75 мг клопидогрелге

баламалы),

қосымша заттар: микрокристалды целлюлоза (РН 113), маннитол (DC категориялы), L-гидроксипропилцеллюлоза (LH-21), кросповидон (полиплосдон XL), полиэтиленгликоль 6000, L-гидроксипропилцеллюлоза (LН-11), гидрогенизделген майсана майы (кутина HR PH),

қабық: опадрай II қызғылт 03В 84566: гипромеллоза 2910, титанның қостотығы (Е 171), макрогол 400, темірдің (III) қызыл тотығы (E 172).

Сипаттамасы

Дөңгелек пішінді, екі беті дөңес, қызғылт түсті қабықпен қапталған, екі жағы тегіс таблеткалар.

Фармакотерапиялық тобы

Антикоагулянттар. Тромбоциттер агрегациясының тежегіштері. Клопидогрел

АТХ коды В01АС04

Фармакологиялық қасиеттері

Фармакокинетикасы

Клопидогрел 75 мг дозада ішке қабылдағаннан кейін жылдам сіңеді. Алайда қан плазмасындағы концентрациясы елеусіз жоғарылайды және ішке қабылдағаннан кейін 2 сағаттан соң анықталатын деңгейге (0.025 мкг/л) жетпейді. Препараттың 50% тамақ қабылдауға байланыссыз сіңеді. Клопидогрелдің және оның басты метаболиттерінің үлкен бөлігі плазма протеиндерімен (98% және 94% тиісінше) қайтымды байланысады.

Клопидогрел бауырда метаболизденеді. Негізгі метаболит – плазма айналымындағы қосылыстардың 85% жуығын карбоксил қышқылының белсенді емес туындылары құрайды. АДФ (аденозиндифосфат) тромбоциттер рецепторларымен байланысуын селективті және қайтымсыз бөгейді, олардың белсенділенуін бәсеңсітеді, қызмет жасайтын АДФ-рецепторлар мөлшерін азайтады, фибриноген сіңуіне кедергі келтіреді және тромбоциттер агрегациясын тежейді. Қан плазмасындағы бұл метаболиттің ең жоғары концентрациясы (Сmax) препарат қабылдағаннан кейін 45 мин соң анықталады және клопидогрелді қайта қабылдағаннан кейін 3 мг/л жуықты құрайды. Айналымдағы басты метаболиттің фармакокинетикасы – 50-ден 150 мг дейінгі клопидогрел шегінде дозаға байланысты (плазмадағы концентрация деңгейі дозаға байланысты ұлғаяды).

Бір рет және қайталап қабылдағаннан кейін жартылай шығарылу кезеңі (Т1/2) 8 сағатты құрайды.

Препараттың 50% жуығы несеппен және шамамен 46% нәжіспен 5 күн ішінде шығарылады.

Фармакодинамикасы

Клопидогрел аденозин дифосфаттың (АДФ) тромбоциттер беткейінде орналасқан рецепторлармен байланысуын және GP IIb/IIIa кешенінің белсенділенуін тойтарады. Бұл тромбоциттердің АДФ-тәуелді агрегациясының тежелуіне алып келеді. Сондай-ақ бұл тромбоциттердің басқа көтермелеу әсерімен тежелуіне алып келеді. Әрбір белсенділендірілген тромбоцитте өндірілетін АДФ әсері төмендейді және қалған тромбоциттердің агрегациясы стимуляцияланады. Клопидогрелдің әсері тромбоциттің бүкіл өмір сүру уақыты бойына жүреді, тромбоцитарлық қызмет клопидогрелді тоқтатқаннан кейін 7-10 күннен соң қалпына келеді.

Клопидогрелдің (тәулігіне 75 мг) емдік дозасын ұзақ уақытқа тағайындағанда тромбоциттер агрегациясының елеулі тежелуі емнің бірінші күні-ақ анықталады, содан соң антиагрегантты әсері біртіндеп өседі және препаратты ұдайы қабылдағанда ең жоғары мәніне 3-7 күнде жетеді. Емдік дозаны ұзақ уақыт қабылдағанда тежеудің орташа деңгейі 40 және 60% арасында болады. Ем аяқталғаннан кейінгі клопидогрелдің агрегацияға әсері және қан кету уақыты әдетте 5 күн бойына төмендейді.

Қолданылуы

- ишемиялық инсульт өткерген немесе окклюзия элементтерімен шеткергі қан айналымының анықталған аурулары бар миокард инфарктісімен науқастарда атеротромбоздық бұзылулардың алдын алуға

Қолдану тәсілі және дозалары

Ересектерге. Пласеп үшін ұсынылатын доза ас қабылдауға байланыссыз тәулігіне 1 таблетканы (75 мг) құрайды.

Ең жоғары бір реттік және тәуліктік доза – 75 мг.

Ең жоғары емдеу курсының ұзақтығы 12 айға дейінгі уақытты құрайды, және оны емдеуші дәрігер әр емделуші үшін жеке анықтайды.

Егде емделушілер үшін дозаны ерекше таңдаудың қажеті жоқ.

Бүйрек қызметінің бұзылуы

Бүйрек қызметінің бұзылуы бар науқастарда емдеу тәжірибесі шектеулі.

Жағымсыз әсерлері

Клиникалық зерттеулерде тіркелген, сондай-ақ постмаркетингтік кезеңдерде негізінен емнің бірінші айында тіркелген ең жиі реакция қан кету болып табылады.

Клиникалық зерттеулерде немесе өздігінен болған мәлімдемелерде анықталған жағымсыз реакциялар төменде келтірілген.

Жиі (≥1/100, 1/10)

- гематома және жарақаттық соғылу

- мұрыннан қан кету

- асқазан-ішектен қан кету, диарея, іштің ауыруы, диспепсия

- пункция орнындағы қан кету

Жиі емес (≥1/1000,<1/100)

- тромбоцитопения, лейкопения, эозинофилия

- бассүйекішілік қан құйылу (өліммен аяқталған бірнеше жағдайлар туралы хабарланған), бас ауыруы, парестезия, бас айналуы

- көзге қан құйылу (конъюнктивальді, окулярлық, ретинальді)

- асқазанның және он екі елі ішектің ойық жарасы, гастрит, құсу, жүрек айнуы, іш бітелуі, метеоризм

- бөртпе, қышыну, терінің қанталауы (пурпура)

- гематурия

- қан кету уақытының ұзаруы, нейтрофилдер санының төмендеуі,

тромбоциттер санының төмендеуі

Сирек (≥1/10000, <1/1000)

- нейтропения, оның ішінде ауыр

- вертиго (вестибулярлық бас айналуы)

- ретроперитонеальді қан кету

Өте сирек (<1/10000)

- тромбоздық тромбоцитопениялық пурпура (ТТП), апластикалық анемия, панцитопения, агранулоцитоз, ауыр тромбоцитопения, гранулоцитопения, анемия

- сарысу құю ауруы, анафилактоидты реакциялар

- галлюцинациялар, сананың шатасуы

- дәм сезудің бұзылуы

- ауыр қан кету, операциялық жарақаттан қан кету, васкулит,

гипотензия

- респираторлық жолдан қан кету (қан қақыру, өкпеден қан кету), бронх түйілуі, интерстициальді пневмонит

- өліммен аяқталатын асақазан-ішек және ретроперитонеальді қан кету, панкреатит, колит (оның ішінде ойық жаралы және лимфоцитарлық), стоматит

- жедел бауыр жеткіліксіздігі, гепатит, бауыр қызметі талдауларының патологиялық көрсеткіштері

- буллёзді дерматит (уытты эпидермальді некролиз, Стивенс-Джонсон синдромы, көп формалы эритема), ангиоэдема, эритематозды бөртпе, есекжем, экзема және жалпақ теміреткі

- қаңқа-бұлшық-еттік қан кету (гемартроз), артрит, артралгия, миалгия

- гломерулонефрит, қандағы креатинин деңгейінің жоғарылауы

- қызба

Қолдануға болмайтын жағдайлар

• клопидогрелге және препараттың басқа компоненттеріне жоғары сезімталдық

• патологиялық қан кету немесе қанағыштықтың белсенді фазасы (асқазан және он екі елі ішектің ойық жарасы, бассүйекішілік қан құйылу)

• бауыр қызметінің ауыр бұзылуы

• жүктілік және лактация кезеңі

• 18 жасқа дейінгі балалар және жасөспірімдерге

Дәрілермен өзара әрекеттесуі

Пероральді антикоагулянттар

Аталған біріктірілім қан кетуді күшейтуі мүмкіндігінен клопидогрелді пероральді антикоагулянттармен бір уақытта қолдану ұсынылмайды. Ұзақ уақыт варфаринмен ем қабылдаған науқастарда тәулігіне 75 мг клопидогрел қабылдау S-варфарин фармакокинетикасын және халықаралық қалыптастырылған (ХҚҚ) қатынасты өзгертпегендігіне қарамастан клопидогрел мен варфаринді бір мезгілде қолдану екі препараттың гемостазына тигізетін әсерінен қан кету қаупін жоғарылатады.

Ацетилсалицил қышқылы (АСҚ)

Ацетилсалицил қышқылы АДФ индукцияланған тромбоциттер агрегациясының клопидогрел арқылы бәсеңсітілуін өзгертпейді, алайда клопидогрел коллагенмен индукцияланған тромбоциттер агрегациясына АСҚ әсерін күшейтеді. Дегенмен тәулік бойына күніне екі рет 500 мг АСҚ бір уақытта қабылдау клопидогрелді қабылдаудан болатын қан кету уақытының елеулі ұлғаюын туындатпады. Клопидогрел және ацетилсалицил қышқылының арасында қан кетудің жоғары қаупіне алып келетін фармакодинамикалық өзара әрекеттесу болуы мүмкін. Сондықтан бұл препараттарды бір мезгілде сақтықпен қолдану керек. Дегенмен клопидогрел және АСҚ бірге бір жылға дейін тағайындала береді.

Гликопротеин IIb/IIIа тежегіштері

Пласеппен бірге тағайындау сақтықты талап етеді.

Гепарин

Пласеп гепарин дозасы әсерінің коагуляцияға өзгерістерін туындатпайды, гепаринді бір мезгілде қолдану клопидогрелден туындаған тромбоциттер агрегациясы тежелуіне әсер етпеген, алайда Пласеп пен гепаринді қоса қолдану қан кетудің жоғары қаупіне алып келетіндіктен сақтықпен қаралуы тиіс.

Тромболитикалық дәрілер

Клопидогрелді фибринспецификалық және фибринспецификалық емес тромболитикалық дәрілермен және гепаринмен қоса қолданудың қауіпсіздігі жедел миокард инфарктісі бар науқастарда зерттелген. Клиникалық елеулі қан кету жиілігі тромболитикалық дәрілер және гепаринмен АСҚ қоса қолданғанда бақыланғанға ұқсас болған.

Қабынуға қарсы стероидты емес дәрілер

Қабынуға қарсы стероидты емес дәрілермен (ҚҚСД), оның ішінде напроксенмен үйлестіре қолдану этиологиясы асқазан-ішектік жасырын қан жоғалтудың жоғарылауын туындатады. ҚҚСД және Пласеп үйлестірілгенде сақтықпен тағайындалуы тиіс.

Бір мезгілде басқа да жүргізілетін ем

Клопидогрел өзінің белсенді метаболитіне ішінара CYP2С19 көмегімен метаболизденетіндіктен, бұл энзимнің белсенділігін бәсеңсітетін дәрілік заттарды қолдану клопидогрелдің белсенді метаболиті дәрілік концентрациясының төмендеуіне алып келеді. Бұл өзара әрекеттесудің клиникалық мәні түсініксіз. Сақтық шаралары ретінде CYP2С19 бәсеңдететін дәрілік заттарды бір мезгілде қолданудан бас тарту керек.

Цитохром Р450 2С19 (CYP2С19)

Фармакогенетикасы

CYP2С19 баяу метаболизаторы болып табылатын науқастар жағдайында ұсынылған дозалардағы клопидогрелде белсенді метаболиттер аз түзіледі, және ол тромбоциттер қызметіне аздау әсер етеді. Науқастардағы CYP2С19 генотипін анықтау үшін тесттер бар.

CYP2С19 бәсеңдететін дәрілік препараттарға омепразол және эзомепразол, флувоксамин, флуоксетин, моклобемид, вориконазол, флуконазол, тиклопидин, ципрофлоксацин, циметидин, карбамазепин, окскарбазепин және хлорамфеникол жатады.

Протондық помпалар тежегіштері (ППТ)

Омепразол 80 мг дозада тәулігіне бір рет, клопидогрелмен бір уақытта қабылданғанда, болмаса екі дәрілік препаратты қабылдаудың 12 сағаттық аралығы сақталып қабылданғанда белсенді метаболит экспозициясын 45% (жүктеме доза) және 40% (демеуші доза) төмендетті. Төмендеу тромбоциттер агрегациясын бәсеңдетудің 39% (жүктеме доза) және 21% (демеуші доза) төмендеуімен байланысты болды. Клопидогрелді бір уақытта эзомепразолмен қабылдаудың да белсенді метаболит экспозициясының төмендеуіне алып келуі күтіледі.

Бұл фармакокинетикалық (ФК)/фармакодинамикалық (ФД) өзара әрекеттесулерінің маңызды кардиоваскулярлық жағдайлармен білінетін клиникалық мәні туралы қарама-қайшы деректер бақылау зерттеулерінде, сондай-ақ клиникалық зерттеулерде де көрсетілген. Сақтық шаралары ретінде клопидогрелді бір мезгілде омепразол немесе эзомепразолмен қолдануға болмайды.

Метаболит экспозициясының айқындығы аз төмендеуі пантопразол және лансопразол жағдайында бақыланған.

Пантопразолмен 80 мг дозада күніне бір рет емдеу уақытында белсенді метаболиттің плазмалық концентрациясы 20% (жүктеме доза) және 14% (демеуші доза) дейін төмендеген. Тромбоциттер агрегациясы орташа тежелуінің тиісінше 15% және 11% төмендеуімен қатар жүреді. Бұл нәтиже клопидогрелді пантопразолмен бірге қолдану мүмкіндігі бар дегенді білдіреді.

Н2-рецепторларының блокаторлары (CYP2С19 тежегіші болып табылатын циметидинді қоспағанда) және антацидтер сияқты асқазан қышқылдығын төмендететін басқа да дәрілік заттардың клопидогрелдің антитромбоцитарлық белсенділігіне әсері барлығын дәлелдейтін айғақ жоқ.

Басқа да дәрілік препараттар

Клопидогрел атенололмен немесе нифедипинмен қоса қолданылғанда, немесе осы екі заттың екеуімен де үйлестіре қолданылғанда клиникалық маңызды фармакодинамикалық өзара әрекеттесу анықталған жоқ. Фенобарбитал немесе эстрогенді бір уақытта қолданғанда клопидогрелдің фармакодинамикалық белсенділігіне елеулі әсер етпеген.

Клопидогрелмен бір уақытта қолданғанда дигоксин және теофиллиннің фармакокинетикасы өзгермеген.

Антацидтік дәрілер клопидогрелдің сіңу дәрежесін өзгертпеді.

CYP2С9 көмегімен метаболизденетін фенитоин және толбутамидті клопидогрелмен бір уақытта қауіпсіз қолдана беруге болады.

Көрсетілген өзара әрекеттесулерге қосымша

Науқастар Пласеп және диуретиктер, бета-бөгегіш агенттер, ангиотензин конвертирлейтін фермент тежегіштері, кальций өзекшелерінің антагонистері, қандағы холестерин төмендететін препараттар, антидиабеттік препараттар (инсулинді қоса), орын басушы ем гормондары, антиэпилепсиялық дәрілер, GPIIb/IIIa антагонистері сияқты дәрілік заттарды қоса алғандағы әртүрлі біріктірілімдерін қабылдаған. Пласеппен өзара әрекеттесуде клиникалық елеулі жағымсыз реакциялар жағдайы анықталған жоқ.

Айрықша нұсқаулар

Қан кету және гематологиялық бұзылулар

Емдеу уақытындағы қан кету және гематологиялық жағымсыз реакциялардың қаупінен қан кетуді көрсететін клиникалық симптомдар пайда болғанда дереу қанның жалпы талдауын және/немесе басқа да тиісті талдауларды жүргізу керек. Басқа да антитромбоцитарлық дәрілер сияқты, клопидогрелді жарақатқа, хирургиялық немесе басқа да патологиялық жай-күйлерге байланысты күшті қан кету қаупіне ұшырауы мүмкін науқастарда, сондай-ақ ЦОГ-2 тежегіштерін қоса, гликопротеин IIb/IIIа тежегіштерімен немесе қабынуға қарсы стероидты емес дәрілермен (ҚҚСД), АСҚ, гепаринмен емделіп жүрген науқастар жағдайында сақтықпен қолдану керек.

Науқастарды әсіресе емнің бірінші аптасында және/немесе жүрекке жасалатын инвазивті шаралардан кейін немесе хирургиялық араласулардан соңғы жасырын қан кетуді қоса, қан кетудің кез келген белгісін мұқият бақылау керек. Қан кетуді күшейту мүмкіндігіне байланысты клопидогрелді пероральді антикоагулянттармен бір уақытта қолдану ұсынылмайды. Егер науқасқа элективті хирургиялық араласулар жасау керек болса, және антитромбоцитарлық әсер уақытша керек болмаса, клопидогрел қабылдауды операцияға дейін 7 күн бұрын тоқтату керек.

Жоспарланған кез келген операцияның және кез келген жаңа дәрілік препарат қабылдау алдында науқастар терапевтке және стоматологына клопидогрел қабылдап жүргенін ескертуі тиіс.

Клопидогрел қан кету уақытын ұзартады және қан кетуге бейім (әсіресе асқазан-ішектік және көзішілік) патологиялық өзгерістері бар науқастарда сақтықпен қолданылуы тиіс.

Пласеп (бір өзін немесе АСҚ біріктірілімде) қабылдағанда қан тоқтату үшін көп уақыт талап етілуі мүмкіндігін науқастарға ескерту керек, егер оларда күтпеген жерден қан кету бола қалса (оқшаулау бойынша немесе ұзартылуына орай) олар өздерінің емдеуші дәрігерін хабардар етуі тиіс.

Тромбоздық тромбоцитопениялық пурпура (ТТП)

Өте сирек, Пласепті қолданудан кейін, ал кейде және шамалы экспозициядан соң тромбоздық тромбоцитопениялық пурпура (ТТП) жағдайлары анықталды. Ол неврологиялық өзгерістермен, бүйрек қызметі дисфункциясы немесе қызбамен қатар жүретін тромбоцитопениямен және микроангиопатиялық гемолитикалық анемиямен сипатталады. Плазмаферезді қоса, ТТП дереу емдеуді талап ететін, өмірге қауіп төндіретін жай-күй болып табылады.

Жедел ишемиялық инсульт

Деректер жоқ болуына байланысты Пласеп жедел ишемиялық инсульттан кейінгі бастапқы 7 күнде ұсынылуы мүмкін емес.

Бүйрек қызметі бұзылуы

Бүйрек қызметі бұзылуы бар науқастардағы Пласеппен емдеу тәжірибесі шектеулі. Осыған орай бұндай науқастар жағдайында препаратты сақтықпен қолдану керек.

Бауыр қызметі бұзылуы

Препаратты геморрагиялық диатезге бейім, бауыр қызметінің ауырлығы орташа дәрежедегі бұзылуы бар науқастардағы қолдану бойынша тәжірибе шектеулі. Сондықтан бұл популяцияда Пласеп сақтықпен қолданылуы тиіс.

Қосымша заттар

Бұл дәрілік препараттың құрамында асқазан бұзылыстарын және диареяны туындатуы мүмкін гидрогенизделген майсана майы бар.

Фертильділік

Клиникаға дейінгі зерттеулерде клопидогрелдің фертильділікке әсер ететіні дәлелденбеген.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Кейде болатын бас айналуларынан немесе өте сирек кездесетін жағымсыз әсерлерінен препаратты автомобиль және жұмыс механизмдерін басқарғанда сақтықпен қолдану керек.

Артық дозалануы

Симптомдары: қан кету уақытының ұзаруы және кейіннен болатын асқынулар.

Емі: егер қан кету уақытын жылдам түзету қажет болса, тромбоцитарлық массаны құю ұсынылады. Спецификалық у қайтарғысы жоқ.

Шығарылу түрі және қаптамасы

Үлбірлі қабықпен қапталған 75 мг таблеткалар

Бір жағынан алюминий фольгадан және екінші жағынан баспалы алюминий фольгадан жасалған пішінді ұяшықты қаптамаға 10 таблеткадан салынған.

3 пішінді ұяшықты қаптамадан медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Құрғақ, жарықтан қорғалған жерде, 250С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

MSN Laboratories Limited

Plot No 42, Anrich Industrial Estate, Bollaram,

Medak District - 502 325. A. P., Үндістан

Тіркеу куәлігі иесінің атауы мен елі

MSN Laboratories Limited, Үндістан

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

050046, Алматы қ-сы, Солодовников к-сі, 21/289

Тел. (727) 392-74-05, электрондық поштасы: irina.volovnikova@gmail.com