Пирэф-4

• русский
• қазақша

• Скачать инструкцию медикамента

Саудалық атауы

ПИРЭФ-4

Халықаралық патенттелмеген атауы

Жоқ

Дәрілік түрі

Үлбірлі қабықпен қапталған таблеткалар

Құрамы

Бір таблетканың құрамында:

белсенді заттар – 0.400 г пиразинамид, 0.075 г изониазид, 0.150 г рифампицин, 0.275 г этамбутол гидрохлориді;

қосымша заттар - микрокристалды целлюлоза, кросповидон, прежелатинделген крахмал, натрий кроскармелозасы, сусыз коллоидты кремнийдің қостотығы (аэросил), магний стеараты, желатин, бифендат, аскорбин қышқылы.

қабықша - Opadry 80 W Brown 56578 (поливинил спирті, тальк, макрогол/ПЭГ 3000, титанның қостотығы Е171, темірдің тотығы Е172).

Сипаттамасы

Үлбірлі қабықпен қапталған, сызығы мен ойығы бар қызыл-қоңыр немесе бозғылт-қызыл түсті капсула тәріздес таблеткалар.

Фармакотерапиялық тобы

Туберкулезге қарсы біріктірілген препараттар.

АТЖ коды J04AМ06.

Фармакологиялық қасиеттері

Туберкулезге қарсы біріктірілген препарат. Құрамында туберкулезге қарсы І қатардағы препараттар (рифампицин, этамбутол гидрохлориді, изониазид пен пиразинамид) бар. Туберкулезге қарсы препараттардың аталған біріктірілімі (оның ішінде персистирленетін микобактерияларға қатысты) туберкулоцидті әсерді, сондай-ақ туберкулез микобактериялары төзімділігінің едәуір баяу дамуын қамтамасыз етеді.

Фармакокинетикасы

Рифампицин асқазан-ішек жолынан жақсы сіңеді. Ішу арқылы қабылдағанда препарат плазмадағы ең жоғары концентрациясына 2 - 4 сағат өткеннен кейін жетеді, ол орташа алғанда 10 мкг/мл (4 - тен 32 мкг/мл дейін) құрайды, жартылай шығарылу кезеңі 3 – 5 сағат аралығында ауытқып отырады және бауыр қызметінің бұзылуында арта түседі. Ағза тіндері мен сұйықтықтарының көпшілігіне таралады. Плацентарлық бөгет арқылы өтеді. Бауырда метаболизденеді. Рифампицин несеппен, нәжіспен және өтпен, ішінара сілекеймен және көз жасы сұйықтығымен шығарылады, осы мөлшердің жартысынан азы өзгермеген антибиотик түрінде көрініс беруі мүмкін.

Изониазид асқазан-ішек жолынан жылдам сіңеді және барлық биологиялық сұйықтықтар мен тіндерге оңай өтеді. Тамақпен қабылдаған кезде сіңуі мен биожетімділігі төмендейді. Плазмадағы 3-5 мкг/мл құрайтын ең жоғары концентрациясына 1 - 2 сағат өткенде жетеді, одан кейінгі 6 сағаттың ішінде 50 %-ға және одан да көбірек төмендейді. Дегенмен, қан мен тіндерде тиімді концентрациялары 12 - 24 сағат бойы сақталуы ықтимал .

Препарат организмде біркелкі тарайды, жасушаларға, оның ішінде макрофагтарға, сондай-ақ некроз аймағына өтеді. Бауырда метаболизденеді.

Организмнен негізінен бүйрек арқылы, көбінесе белсенділігі жойылған метаболиттер түрінде 24 сағаттың ішінде шығарылады.

Пиразинамид ішу арқылы қабылдаудан кейін асқазан - ішек жолынан жылдам сіңеді. Қан плазмасындағы ең жоғары концентрациясына 2 сағат өткеннен кейін жетеді және 1,5 г дозада 35 мкг/мл жуық және 2 г. дозада 66 мкг/мл құрайды. Пиразинамид тіндерде және организмнің сұйық ортасында кеңінен тарайды, гемато-энцефалдық бөгет арқылы өтеді.

Біртіндеп 5-гидроксипиразин қышқылына дейін гидроксилденетін негізгі метаболит – пиразин қышқылын түзе отырып, негізінен бауырда метаболизденеді.

Қан плазмасынан жартылай шығарылу кезеңі 9 - 10 сағатқа жуықты құрайды.

Шумақтық сүзілу жолымен негізінен бүйрек арқылы шығарылады. Енгізілген дозасының 70%-ға жуығы 24 сағаттың ішінде негізінен метаболиттер түрінде және 4 - 14%-ы - өзгермеген зат түрінде несептен табылады.

Этамбутол гидрохлориді ішу арқылы қабылдаудан кейін 80 % асқазан-ішек жолынан сіңеді, дозаның қалған бөлігі өзгермеген күйінде нәжіспен бірге шығарылады. Ас ішу сіңуіне болымсыз ғана әсер етеді. Бір рет қабылданатын 25 мг/кг дозада, этамбутол гидрохлоридінің қан плазмасындағы ең жоғары концентрациясына 4 сағат өткенде жетеді және 5 мкг/мл құрайды 24 сағат өткенде концентрациясы 1 мкг/мл төменді құрайды.

Этамбутол гидрохлориді өкпені, бүйректі, эритроциттерді қоса көптеген тіндерге таралады. Ми қыртыстарының қабынуында жұлын сұйықтығына өтеді. Ішінара бауырда белсенді емес альдегидтік және дикарбоксильді туындыларға дейін метаболизденеді, бұлар несеппен бірге шығарылады. Жартылай шығарылу кезеңі 3 - 4 сағатты құрайды. Негізінен өзгермеген күйінде несеппен, 8-15%-ы - белсенді емес метаболиттер түрінде шығарылады.

Фармакодинамикасы

Рифампицин бактериостатикалық, ал жоғары концентрацияларда бактерицидті әсер етеді. Оның әсер ету механизмі M.tuberculosis рибонуклеин қышқылының синтезін тежеуімен сипатталады.

M.tuberculosis жөнінде белсенділігі жоғары, туберкулезге қарсы бірінші қатардағы препарат болып табылады. E. coli, Pseudomonas, Indole-оң және Indole-теріс, Proteus, Klebsiella, St.aureus, Coagulase-теріс staphylococci, N.meningitides, H.influenzae, Legionella түрлері, M.kansassi, M.scrofulaceum, M. intracellulare және M. аvium-ге қатысты белсенді.

Туберкулезге қарсы басқа препараттармен айқаспалы төзімділігі байқалмаған.

Изониазид M.tuberculosis белсенді бөлінетін жасушаларына бактерицидті әсер етеді. Оның әсер ету механизмі микобактериялар жасушалары қабырғаларының компоненті болып табылатын микол қышқылдарының синтезін бәсеңдетумен айқындалады. Препараттың қандағы ең жоғары концентрациясы ішу арқылы қабылдағаннан кейін 1 - 4 сағат өткенде байқалады, бір реттік дозасын қабылдағаннан кейін 6 - 24 сағат бойы ол қанда бактериостатикалық концентрацияда болады. Жұқпалы аурулардың басқа кең таралған қоздырғыштарына ол айқын химиотерапиялық әсер етпейді.

Пиразинамид Оның концентрациясына және микроорганизмнің сезімталдығына байланысты, әсіресе макрофагтардың ішінде және қабыну ошағында M.tuberculosis-ке бактериостатикалық немесе бактерицидті, «стерилизациялаушы» әсер етеді. Туберкулезді зақымдану ошағына жақсы өтеді. Баяу көбейетін, оның ішінде жасуша сыртында - және жасуша ішінде орналасқан микобактерияларға әсер етеді. Персистирленетін түрлерге қышқылды ортада көбірек әсер етеді.

Этамбутол гидрохлориді M.tuberculosis-ке бактерияға қарсы және бактериостатикалық әсер етеді. Бактериялық жасушаның ішіне жылдам өтеді, рибосомалардың құрылымын, РНҚ мен ақуыздың синтезін, липидтік алмасуды бұзады, магний мен мыс иондарын байланыстырады. Микобактериялар қабырғаларының синтезіне қатысатын ферменттерді тежейді. Тек қарқынды бөлінетін, жасуша сыртында-және ішінде орналасқан микобактерияларға әсер етеді (жасуша ішілік концентрациялары жасуша сыртындағы концентрацияларынан екі есе артық болады). M.tuberculosis, оның ішінде стрептомицинге, изониазидке, ПАСК, канамицинге, этионамидке төзімділер, сондай-ақ M.kansasii, M.avium, M.xenopi-ге қатысты тиімді. Этамбутол гидрохлоридіне алғашқы төзімділікке қоздырғыштардың тек 1 % жуығы ие. Монотерапия кезінде этамбутолға қатысты төзімділік баяу дамиды. Тиімділігі 1 - 2 тәуліктен кейін дамиды. Туберкулезге қарсы басқадай препараттарға төзімділіктің дамуын тежейді, айқаспалы төзімділігі байқалмайды. Қан сарысуындағы несеп қышқылының деңгейін арттыруы мүмкін.

Қолданылуы

Туберкулезде (өкпеде және өкпеден тыс үдерістердің бастапқы сатысында).

Қолдану әдістері және дозасы

ПИРЭФ-4 препаратымен емдеу курсы: 2 ай бойы күн сайын. Тамақтануға дейін 1 - 2 сағат бұрын аш қарынға сумен іше отырып, қабылдайды. Барлық тәуліктік дозаны бір рет қабылдау арқылы ішкен дұрыс.

Ең жоғары емдік тиімділігіне қол жеткізу үшін аш қарынға қабылдау керек. Препаратты тамақтан кейін тағайындау көптеген жағдайларда олардың фармакологиялық белсенділігіне әсер етеді. Емделушілер препаратты нашар көтерген жағдайда ғана айрықша жеңілдікке жол беріледі. Осы себептерге байланысты препаратты тамақтан кейін 1 - 2 сағат өткенде қабылдауға болады. Ең жоғары дозасы – 5 таблетка.

Дәрігердің тағайындауы бойынша қолдану керек.

Жағымсыз әсерлері

ПИРЭФ-4 препаратымен емдеу кезіндегі жағымсыз әсерлері оның құрамына енетін белсенді компонентері арқылы айқындалады.

Ас қорыту жүйесі тарапынан: ауыздың темір татуы, қыжыл, эпигастрия аймағындағы жайсыздықты сезіну, анорексия, жүректің айнуы, құсу, іштің ауыруы, ішектің шаншуы, диарея; бауыр зақымдануының, сары ауру және шұғыл гепатиттің (препараттың құрамына енетін пиразинамидке байланысты) дамуы мүмкін. Дозаның арттырылуына және емдеудің ұзақтығына байланысты бауырдың уытты зақымдану ықтималдығы арта түседі. Пиразинамидтің тәулігіне 3 г дозасында шамамен емделушілердің 15 % - да бауыр зақымдануының белгілері байқалады. Тоқтату бауыр ферменттері деңгейінің жылдам қалпына келуін туындатады. Сонымен бірге изониазидтің монотерапия немесе туберкулезге қарсы препараттармен біріктірілімі түрінде алдын алу және емдеу ретінде қолданылуы бауырдың уытты зақымдану қаупінің едәуір артуымен байланысты екенін ескеру керек.

ОЖЖ және шеткергі жүйке жүйесі тарапынан: бас ауыруы, ұйқышылдық, әлсіздік, атаксия, бас айналуы, сананың шатасуы, бағдардан жаңылу, елестеулер, көрудің бұзылуы, шеткергі невропатия (препараттың құрамында изониазид пен этамбутол гидрохлоридтің болуына байланысты). Бұлар ұзақ қолдану кезінде емделушілердің 3.5 - 17 % пайда болады. Қол мен аяқ саусақтарының шаншуы мен ұюын сезіну, кейбір емделушілерде бұлшық ет әлсіздігі; көру өткірлігінің төмендеуімен, көру аймағының таралуымен, орталық және шеткергі скотомамен және әсіресе (препараттың құрамында этамбутол гидрохлоридтің болуына байланысты) жасыл мен қызыл түстерді ажыратудың бұзылуымен көрініс беретін ретробульбарлы неврит пайда болады.

Аллергиялық реакциялар: қызба, қышу, есекжем, тері бөртпесі, эозинофилия.

Басқалары: аяқ-қолдың ауыруы, тамақтың ауыруы және тілдің ауырсынуы, еркектердегі гинекомастия және әйелдердегі меноррагия.

Қолдануға болмайтын жағдайлар

• препараттың компоненттеріне жоғары сезімталдық;

• көрудің бұзылуы (диабеттік ретинопатия, көру жүйкесінің зақымдануы, көздің қабыну ауруы);

• эпилепсия;

• құрысу ұстамаларына бейімділік;

• бұрын өткерген полиомиелит;

• бауыр қызметінің бұзылуы;

• бүйрек қызметінің бұзылуы;

• подагра;

• тромбофлебит;

• айқын атеросклероз;

• жүктілік пен лактация (бала емізу) кезеңі

• 13 жасқа дейінгі балаларға.

Дәрілермен өзара әрекеттесуі

ПИРЭФ-4-ті оның гомологтары фтивазидпен, метазидпен бір мезгілде қолданғанда жағымсыз реакцияларының даму ықтималдығы жоғарылайды. ПИРЭФ-4-ті стрептомицинмен бір мезгілде тағайындағанда стрептомицин мен изониазидтің несеппен шығарылуы баяулап, жағымсыз нейроуыттылық реакциялар жиілігінің ұлғаюы жүреді. Циклосеринмен бір мезгілде тағайындағанда орталық жүйке жүйесі тарапынан болатын жағымсыз реакцияларының жиілігі мен айқындығы артады. ПИРЭФ-4-ті антацидтермен бір мезгілде қолданған кезде изониазидтің сіңуі мен оның қандағы концентрациясы төмендейді. Кумариндік типтегі антикоагулянттармен бір мезгілде қолданғанда геморрагияның туындау қаупі жоғарылайды. Барбитураттармен бір мезгілде қолданғанда изониазидтің гепатоуыттылығы күшейеді. ПИРЭФ-4 инсулинмен бір мезгілде қолданылғанда изониазидтің сіңуі күшейеді, қандағы инсулин концентрациясының артуы пайда болады. Нейролептиктермен бір мезгілде қолданғанда олардың қандағы концентрациясы жоғарылайды. Парацетамолмен бір мезгілде қолданғанда оның уыттылығы артуы мүмкін.

ПИРЭФ-4-ті антацидтермен бір мезгілде қолданғанда рифампициннің сіңуі нашарлайды, оның қандағы концентрациясы төмендейді. Кальций антагонистерімен, артимияға қарсы дәрілермен, барбитураттармен, нейролептиктермен, транквилизаторлармен, бета-адренобөгегіштермен, ішу арқылы қабылдайтын гормональді контрацептивтермен, зеңге қарсы препараттармен бір мезгілде қолданғанда олардың қандағы концентрациясы төмендейді. ПИРЭФ-4 препараты холецистографияда қолданылатын контрастты препараттармен өзара әрекеттеседі. Соның әсерінен рентгенографиялық зерттеулер нәтижелері бұрмалануы мүмкін. ПИРЭФ-4 пен басқа дәрілік заттарды бір мезгілде тағайындағанда, бұл препараттардың дозаларын түзету керек. Рифампицин мен көрсетілген дәрілік заттардың қабылдау аралықтарын ұзарту қажет. Олардың қабылдау аралықтары 6 сағаттан кем болмағаны дұрыс. Рифампицинді тоқтатқаннан кейін де осы препараттардың дозасын қайталап түзету керек.

ПИРЭФ-4 ацетилсалицил және аскорбин қышқылымен, пробенецидпен, құрамында йод бар контрастты заттармен іс жүзінде үйлесімсіз. Кортикостероидтармен үйлестіре қолданғанда пиразинамидтің туберкулезге қарсы белсенділігінің төмендеуіне байланысты оларды біріктіріп қолданбаған дұрыс.

ПИРЭФ-4-ті дисульфираммен (тетураммен) бір мезгілде тағайындауға болмайды. Оларды үйлестіру этамбутол гидрохлоридінің қандағы концентрациясының шұғыл жоғарылауын және уытты жағымсыз әсерлерінің пайда болуын туғызады. ПИРЭФ-4 препараты сонымен бірге сперминмен, спермидинмен, магний препараттарымен де үйлесімсіз, аминогликозидтердің, аспарагиназаның, карбамазепиннің, ципрфлоксациннің, литий тұздарының, метотрексаттың, хининнің жағымсыз әсерлері мен нейроуыттылығын күшейтеді.

Айрықша нұсқаулар

Ұзақ емдеу кезінде бүйрек, бауыр, қан түзу жүйесінің қызметін ұдайы бақылау қажет. Препаратты қабылдауды дәрігермен келіспей (кездейсоқ немесе әдейі) тоқтатуға болмайды. Емдеу кезеңінде әйелдер контрацепцияның гормональді емес тәсілдерін қолдануға тиіс. Терінің түсін өзгертеді, қақырықты, терді, нәжісті, көз жасы сұйықтығын, несепті, жұмсақ жанаспалы линзаларды қызыл-сары, қызыл түске бояйды. Емдеу кезеңінде қан сарысуындағы фолий қышқылы мен цианокобаламин концентрациясын анықтаудың микробиологиялық тәсілдерін қолданбайды. Емдеудің алдында, сондай-ақ емдеу кезінде ұдайы (этамбутол гидрохлоридтің дозасы 15 мг/кг/тәуліктен жоғары болғанда – ай сайын) емделушіні толықтай офтольмологиялық тексеруден өткізу (көру өткірлігін, түстерді қабылдауын, көру аясын анықтау, офтальмокопия) керек. Емдеу кезінде көру өткірлігінің өршуін этамбутол гидрохлоридтің жағымсыз әсері ретінде есептеу керек. Егер зерттеуге дейін түзеткіш көзілдірік қолданылса, онда оны көру өткірлігін бағалау кезінде киіп алу керек. Емдеудің 1 - 2 жылы ішінде рефракция қателігі өршуі мүмкін, оны зерттеудің дәл нәтижесін алу үшін түзету керек. Көру өткірлігін стенопикалық тесік арқылы тексеру рефракция қателігін жояды. Әдетте препаратты тоқтатқаннан кейін аптадан немесе айлардан кейін көру өткірлігінің қалпына келуі байқалады. Уытты құбылыстардың пайда болу қаупі жоғары болатындықтан егде адамдарға абайлап тағайындау керек. Емдеу кезінде гепатоуытты әсерден аулақ болу үшін этанолды қабылдамау керек. Емдеу кезінде ірімшіктің белгілі бір (швейцариялық, чеширлік) немесе балықтың (тунец, сардиндер) сорттарын тамақпен жеу тері жабындарының қышымасы, жүрек қағуы, қалтырау мен бас ауыруы пайда болуын туғызуы мүмкін (изониазид плазмадағы моноаминоксидазаны және диаминооксидазаны тежейді, бұл балық пен ірімшіктен табылған тирамин мен гистаминнің метаболизміне әсер етеді). Пиразинамид подаграның және қант диабетінің ағымын нашарлатады, бүйрек қызметін, несеп қышқылын бақылау қажет. Несеп қышқылы деңгейінің тұрақты жоғарылауы мен подагралық артриттің өршуі жағдайында емдеуді тоқтатады.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Емдеу кезеңінде жоғары зейін шоғырландыру мен психомоторлық реакциялар жылдамдығын қажет ететін қауіптілігі зор қызмет түрлерімен шұғылданудан бас тарту керек.

Артық дозалануы

Белгілері: жүрек айнуы, құсу, ұйқышылдық, естен тану, бауыр көлемінің ұлғаюы, сарғаю, несептің, тердің, сілекейдің, көз жасы мен нәжістің қоңыр-қызыл немесе қызыл-сары түске боялуы; ауыр жағдайларда – кома дамуы.

Емдеу: асқазанды шаю (белсенділендірілген көмірмен), құсуға қарсы дәрілер, қарқынды диурез, билиарлық дренаж, экстракорпоральді гемодиализ.

Шығарылу түрі және қаптамасы

10 таблеткадан поливинилхлоридті немесе ұқсас импорттық үлбірден және және баспалы лакталған немесе ұқсас импорттық алюминий фольгадан жасалған пішінді ұяшықты қаптамада.

30, 500 таблеткадан дәрілік заттарға арналған тартылатын немесе бұралатын пластмасса қақпағы бар және ашылуы бақыланатын, полимерлік материалдардан жасалған контейнерлерге салынған.

Біріншілік қаптамалар медициналық қолданылуы жөніндегі мемлекеттік және орыс тілдеріндегі нұсқаулықтардың сәйкесінше санымен бірге гофрланған картон жәшікке салынған.

Сақтау шарттары

Құрғақ, жарықтан қорғалған жерде, 25 ºС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Босатылу шарттары

Рецепт арқылы.

Өндіруші

«Павлодар фармацевтикалық зауыты» ЖШС.

Қамзин көшесі, 33, Павлодар қаласы, Қазақстан Республикасы, 140011.

Тіркеу куәлігінің иесі

«Павлодар фармацевтикалық зауыты» ЖШС, Қазақстан Республикасы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«Павлодар фармацевтикалық зауыты» ЖШС, Қамзин көшесі, 33, Павлодар қаласы, Қазақстан Республикасы, 140011, тел./факс: 8 (7182) 50-04-01/50-10-25, farmzavod@romat.kz