Пиросан-Baby (100 мг)

• русский
• қазақша

• Скачать инструкцию медикамента

Саудалық атауы

Пиросан-Baby

Халықаралық патенттелмеген атауы

Парацетамол

Дәрілік түрі

100 мг, 250 мг ректальді суппозиторийлер

Құрамы

Бір суппозиторийдің құрамында

белсенді зат – 100 мг, 250 мг парацетамол

қосымша заттар - витепсол. W 35, витепсол. Н 15.

Сипаттамасы

Пішіні торпедо тәрізді, ақ немесе крем тәріздес немесе сарғыш реңді ақ түсті суппозиторийлер.

Фармакотерапиялық тобы

Басқа да анальгетиктер-антипиретиктер. Анилиндер.

АТЖ коды N02BE01

Фармакологиялық қасиеттері

Фармакокинетикасы

Ректальді қабылдағаннан кейін парацетамол 68-88 % сіңеді. Плазмадағы концентрация шыңына тек 3-4 сағаттан кейін жетеді.

Парацетамол майлы тіндер мен жұлын сұйығынан басқа барлық тіндерге, негізінен, ағзаның сұйық ортасына тез тарайды. Қандағы, плазмадағы және сілекейдегі концентрациясы шамамен бірдей.

Плазмада ақуызбен байланысу деңгейі төмен және 10 %-дан аздау және артық дозаланғанда мардымсыз ғана ұлғаяды.

Парацетамол бауырда негізінен глюкуронидпен конъюгациялану, сульфатпен конъюгациялану және бауыр аралас оксидазасы мен Р450 цитохромның қатысуымен тотығу арқылы метаболизденеді. Гидроксилденген метаболит аралас оксидаз әсерінен бауыр мен бүйректе өте аз мөлшерде пайда болатын N - ацетил-р-бензохинониминнің негативті әсерімен және әдетте глютатионмен байланысу жолымен детоксифицияланады, парацетамолды артық дозалағанда қатты қызып, тіндердің зақымдануын туындатуы мүмкін. Парацетамолдың көп бөлігі глюкурон қышқылымен және аз дәрежеде күкірт қышқылымен метаболиттер түзе отырып байланысатын ересектерге қарағанда, күні жетпей туған, жаңа туған балаларда және өмірінің бірінші жылында сульфатты метаболит басым болады.

Жартылай шығарылу кезеңі (Т ½ ) 1-3 сағатты құрайды, әрі бауыр мен бүйрек жеткіліксіздігі жағдайында, сондай-ақ артық дозаланғаннан кейін ұлғаяды.

Бауыр мен бүйрек жеткіліксіздігімен емделушілерде, жаңа туылғандарда артық дозаланғанда жартылай шығарылу кезеңі біршама ұлғаяды. Несеппен, негізінен глюкуронидті және сульфатты конъюгаттар түрінде шығады. 5 %-дан азырағы өзгеріссіз парацетамол түрінде шығады.

Фармакодинамикаcы

Пиросан-Baby - ауруды басатын, қызуды түсіретін және қабынуға қарсы әлсіз әсер ететін қасиетке ие. Ауыру және жылу реттеу орталығына әсер ете отырып, орталық жүйке жүйесінде циклооксигеназаны бөгейді. Қабынған тіндерде жасушалық пероксидазалар парацетамолдың циклооксигеназаға әсер етуін бейтараптандырады, бұл өз кезегінде қабынуға қарсы елеулі әсерінің жоқтығын білдіреді.

Шеткергі тіндерде простагландиндер синтезін бөгейтін ықпалының болмауы онда су-тұз алмасуына (натрий мен су кідірісі) және асқазан-ішек жолы шырышты қабатына жағымсыз әсерінің болмауына себепші болады.

Қолданылуы

- шығу тегі әртүрлі әлсіз және орташа қарқындылықтағы ауыру синдромында (бас ауыруы, бас сақинасы, тіс ауыру, невралгия, миалгия, алгодисменорея, жарақат алғандағы ауыру, күю, жұқпалы қабыну ауруларындағы қызба)

Қолдану тәсілі және дозалары

Ректальді.

Препараттың дозасы жасы мен дене салмағына байланысты кестеге сәйкес есептеп шығарылады.

Бір реттік доза бала денесінің әр кг салмағына 10-15 мг/кг құрайды, тәулігіне 2-3рет, 4-6 сағат сайын.

Парацетамолдың ең жоғары тәуліктік дозасы бала денесінің әр кг салмағына 60 мг/кг аспауы тиіс.

Емдеу курсының ұзақтығы: қызуды түсіретін және ауруды басатын дәрі ретінде 3 күн.

Жағымсыз әсерлері

- агранулоцитоз, тромбоцитопения, анемия, панцитопения, нейтропения

- бүйрек шаншуы

- асептикалық пиурия

- интерстициальді гломерулонефрит

- тері бөртпесі, қышыма, есекжем, Квинке ісінуі, шок

- жүрек айнуы, құсу

- тік ішек шырышты қабатының тітіркенуі, тенезм, диспепсия

- бронх түйілуі

Қолдануға болмайтын жағдайлар

- парацетамолға немесе кез келген басқа компонентке асқын сезімталдықта

- бауыр мен бүйрек функциясының бұзылуында

- тік ішекте таяуда болған қабыну немесе қан кетуде

- глюкозо-6-фосфатдегидрогеназа ферменті тапшылығында

- қан ауруларында (анемия, тромбоцитопения, лейкопения)

- жасы 3 айға дейінгі балаларға.

Дәрілермен өзара әрекеттесуі

Бауырдың микросомальды ферменттері индукторларымен, гепатоуытты әсер ететін дәрілермен бір мезгілде қолданғанда парацетамолдың гепатоуытты әсерінің күшею қаупі туындайды.

Антикоагулянттармен бір мезгілде қолданғанда протромбин уақытының аздап орташа айқындықта жоғарылауы мүмкін.

Антихолинергиялық препараттармен бір мезгілде қолданғанда парацетамолдың сіңуі төмендеуі мүмкін.

Белсенділендірілген көмірді бір мезгілде қолданғанда парацетамолдың биожетімділігі төмендейді.

Изониазидпен біріктіре қолдану парацетамолдың уыттылық әсерінің туындау ықтималдығын жоғарылатады.

Карбамазепинмен, фенитоинмен, фенобарбиталмен, примидонмен бір мезгілде қолданғанда парацетамолдың тиімділігі азаяды, бұл оның метаболизмінің жоғарылауы (глюкуронизация мен тотығу үдерісі) мен организмнен шығарылуына байланысты. Метоклопрамид парацетамолдың сіңу жылдамдығын жоғарылатады, ал колестирамин төмендетеді.

Парацетамол салицил қышқылының, пиразолонның, кодеин мен кофеиннің емдік әсерін күшейтеді.

Парацетамол мен пробенецидті бір мезгілде қолдану парацетамолдың глюкурон қышқылымен конъюгациясын тежейді. Пробенецид сыртқа шығаруды бұзады, осылайша парацетамолдың қан плазмасындағы концентрациясын ұлғайтады. Құрамында пробенецид бар препараттарды қолданған кезде препарат дозасы төмендетілуі тиіс.

Салациламид бір мезгілде қолданғанда парацетамолдың жартылай шығарылу кезеңін ұлғайтуы мүмкін.

Айрықша нұсқаулар

Қатерсіз гипербилирубинемиясы және ауыр сипатты бауыр мен бүйректің аурулары бар емделушілерге сақтықпен қолдану керек.

Шеткергі қан көрінісі мен бауыр мен бүйректің қызметі жағдайын бақылап отыру қажет.

Пиросан Baby препаратын құрамында парацетамол бар басқа дәрілермен, оның ішінде біріктірілген дәрілермен бір мезгілде қолдануға болмайды.

Жүктілік және лактация

Парацетамол плаценталық кедергі арқылы енеді. Осы уақытқа дейін парацетамолдың адам ұрығына теріс әсері белгіленген жоқ. Парацетамол емшек сүтімен бөлінеді: сүттегі құрамы анасы қабылдаған дозаның 0,04- 0,23 % құрайды.

Парацетамолды жүктілік және лактация (емшек емізу ) кезеңінде қабылдау қажеттілігінде емнің күтілетін нәтижесі мен ұрық немесе бала үшін ықтимал қауіпті мұқият таразылап алу керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препарат психомоторлы реакциялардың жылдамдығына және зейінді шоғырландыру қабілетіне әсер етпейді.

Артық дозаланғанда

Симптомдары: көбіне препаратты қолданғаннан кейінгі алғашқы 24 сағат бойы дамитын бозару, жүрек айнуы, құсу және абдоминальді аумақтың ауыруы. Дене салмағына 140 мг/кг дозасын бір рет қолданғаннан кейінгі артық дозалану некротикалық гепатит туғызуы, ол қайтымсыз некрозға, өлім-жітімге апаратын команың даму мүмкіндігі бар метаболикалық ацидоз бен энцефалопатияға ұштасуы мүмкін.

Протромбиннің жоғарылауымен біріккен бауыр трансаминазалары (АЛТ, АСТ), лактатдегидрогеназалар мен билирубин деңгейлерінің жоғарылауы артық дозаланудан кейін 12 - 48 сағат ішінде басталады.

Емі: препаратты тоқтату, метионинді, белсенділендірілген көмірді тағайындау. Ауруханаға жатқызу, қан сарысуында парацетамол деңгейін анықтау үшін қан талдауы. N-ацетилцистеин у қайтарғысын қолданғаннан кейінгі 10-48 сағат ішінде көктамырішіне немесе ішке енгізуге болады. Парацетамолмен артық дозаланудың келесі емі ауырлығына, сатысына және клиникалық симптомдарына байланысты тағайындалады.

Шығарылу түрі және қаптамасы

PVC «Rotoplast» поливинилхлоридті үлбірден жасалған пішінді ұяшықты қаптамаға 5 суппозиторийден салынған.

Екі пішінді қаптама қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Құрғақ, жарықтан қорғалған жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін препаратты қолдануға болмайды.

Дәріханалардан босатылу шарттары

Рецептісіз

Өндіруші

«ХИМФАРМ» АҚ, ҚАЗАҚСТАН РЕСПУБЛИКАСЫ

Шымкент қ., Рашидов к-сі, н/ж, т/ф: 560882.

Тіркеу куәлігінің иесі

«Химфарм» АҚ, ҚАЗАҚСТАН РЕСПУБЛИКАСЫ

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

«Химфарм» АҚ, Шымкент қ., ҚАЗАҚСТАН РЕСПУБЛИКАСЫ,

Рашидов к-сі, н/ж, т/ф: 560882

Телефон нөмірі 7252 (561342)

Факс нөмірі 7252 (561342)

Электронды поштасы standart@santo.kz