Пирацетам (раствор для инъекций, 20%, Борисовский завод медицинских препаратов ОАО)

• русский
• қазақша

• Скачать инструкцию медикамента

Саудалық атауы

Пирацетам

Халықаралық патенттелмеген атауы

Пирацетам

Дәрілік түрі

Инъекцияға арналған 20 % ерітінді

Құрамы

Бір ампуланың (5 мл) ішінде

белсенді зат: пирацетам – 1,0 г;

қосымша заттар: натрий ацетат тригидраты, сұйылтылған сірке қышқылы, инъекцияға арналған су.

Сипаттамасы

Мөлдір түссіз немесе аздап боялған сұйықтық.

Фармакотерапиялық тобы

Басқа да психостимуляторлар және ноотропты препараттар. Пирацетам

АТХ коды N06BX03

Фармакологиялық қасиеттері

Фармакокинетикасы

Биожетімділігі шамамен 95 % жуықты құрайды. Препарат қан плазмасындағы ең жоғары концентрациясына (Cmax) 0,5 - 1 сағаттан кейін жетеді. Жұлынми сұйықтығынан басқа тіндерге қарағанда айтарлықтай баяу шығарылады.

Іс жүзінде метаболизденбейді. Препараттың жартылай шығарылу кезеңі (T1/2) - 4,5 сағат (мидан 7,7 сағаттан кейін). 30 сағат ішінде өзгермеген күйінде 2/3 бүйректермен шығарылады.

Фармакодинамикасы

Ноотропты дәрі. Мидағы зат алмасу үдерісіне оң ықпал көрсетеді: ми тіндерінде АТФ концентрациясын жоғарылатады, РНҚ және фосфолипидтер синтезін күшейтеді, гликолитикалық үдерісті көтермелейді, глюкозаның утилизациясын күшейтеді.

Мидың интегративті қызметін жақсартады, жадының консолидациясына ықпал етеді, оқыту үдерісін жеңілдетеді.

Мида қантамырларына кеңейткіш әсер етпей-ақ микроайналымын жақсартады, белсенділенген тромбоциттердің агрегациясын басады, мидағы қозудың таралу жылдамдығын өзгертеді.

Гипоксия, интоксикация, электрошокпен туындаған мидың зақымдануында қорғағыш әсер көрсетеді; альфа- және бета-белсенділікті күшейтеді, электроэнцефалографияда дельта-белсенділікті төмендетеді, вестибулярлық нистагмның айқындығын азайтады.

Ми жартышарлары арасындағы байланысты және неокортикальді құрылымдарда синаптикалық өткізгіштікті жақсартады, мидың жұмысқа қабілетін жоғарылатады, ми қан айналымын жақсартады. Әсері біртіндеп дамиды.

Қолданылуы

- деменция диагнозы болмаған жағдайда жадының бұзылуын немесе интеллектуальді бұзылыстарды симптоматикалық емдеуде (созылмалы психоорганикалық синдромды симптоматикалық емдеу)

- кортикальді миоклонияны монопрепараттармен немесе кешенді ем құрамында емдеуде

Қолдану тәсілі және дозалары

Көктамыр ішіне (к\і) немесе бұлшықет ішіне (б\і) 30 - 160 мг/кг (3 - 12 г/тәулік) тәуліктік дозада тағайындалады, енгізу жиілігі тәулігіне – 2 - 4 рет.

Созылмалы психоорганикалық синдромды симптоматикалық емдеуде симптомдарының айқындығына байланысты тәулігіне 1,2 –  2,4 г тағайындайды, алғашқы апта ішінде тәулігіне – 4,8 г.

Созылмалы психоорганикалық синдромдар мен кортикальді миоклонияда емді тәулігіне 7,2 г дозадан бастайды, тәулігіне 24 г ең жоғары дозаға жеткенше әрбір 3 - 4 күнде дозаны тәулігіне 4,8 г-ға жоғарылатады.

Емді аурудың барлық кезеңі бойы жалғастырады. Әрбір 6 айда ұстаманың алдын алу мақсатында дозаны азайту немесе әрбір 2 күнде біртіндеп дозаны 1,2 г –ға азайта отырып препаратты қабылдауды тоқтатуды ойластыру керек.

Әсері болмаған жағдайда немесе емдік әсері мардымсыз болғанда емді тоқтатады.

Бүйрек функциясының бұзылуымен емделушілерде креатинин клиренсі (КК) көрсеткіштеріне байланысты дозалау режимін түзету керек.

Егде жастағы емделушілерде бүйрек жеткіліксіздігі болған жағдайда дозаны түзетеді және ұзақ уақыт емдегенде бүйректің функциональдік жағдайын бақылау қажет.

Бауыр функциясының бұзылуымен емделушілерде дозалау режимін түзету қажет емес.

Бүйрек және бауыр функциясының бұзылуымен емделушілерде дозаны жоғарыда көрсетілгендей КК байланысты түзетеді.

Пирацетамның инъекциялық түрі дәрілік затты ішу арқылы қабылдауға мүмкіндік болмаған жағдайда тағайындалады.

Жағымсыз әсерлері

- ашушаңдық, ұйқышылдық, депрессия, астения

- гиперкинезия

- дене салмағының жоғарылауы

Постмаркетингтік кезең

- гемморагиялық бұзылыстар

- бас айналуы

- іштің ауыруы, іштің жоғары тұсының ауыруы, диарея, жүрек айнуы, құсу

- анафилактоидты реакциялар, жоғары сезімталдық

- атаксия, қимыл үйлесімінің бұзылуы, эпилепсияның өршуі

- бас ауыруы, ұйқысыздық

- қозу, мазасыздық, сананың шатасуы, елестеулер

- ангионевротикалық ісіну, дерматит, қышыну, есекжем

- инъекцияда ауыру, тромбофлебит, гипертермия немесе гипотензия көктамыр ішіне енгізгеннен кейін анықталды

Қолдануға болмайтын жағдайлар

- пирацетамды немесе пирролидон туындыларын, сондай-ақ басқа да препарат компоненттерін жекелей көтере алмаушылық

- препаратты тағайындау кезінде психомоторлық қозу

- Гентингтон хореясы

- ми қанайналымының жедел бұзылуы (геморрагиялық инсульт);

- созылмалы бүйрек жеткіліксіздігінің соңғы сатысы (креатинин клиренсі

20 мл/минуттан кем)

- жүктілік және лактация кезеңі

- 18 жасқа дейінгі балаларға

Дәрілермен өзара әрекеттесуі

Пирацетам мен қалқанша без гормондарын бір мезгілде қолданғанда сананың шатасуы, ашуланшақтық және ұйқының бұзылуы дамуы мүмкін.

Орталық жүйке жүйесін (ОЖЖ) стимуляциялайтын дәрілік заттармен бір мезгілде қолданғанда ОЖЖ шамадан тыс стимуляциялануы мүмкін.

Нейролептиктермен тағайындағанда экстрапирамидалық бұзылыстардың пайда болу қаупі төмендейді.

Клоназепам, фенитоин, фенобарбитал, натрий вальпроатымен өзара әрекеттесуі байқалмаған.

Пирацетам жоғары дозаларда (тәулігіне 9,6 г) көктамыр тромбозымен емделушілерде аценокумаролдың тиімділігін жоғарылатады (тек аценокумаролды қабылдаумен салыстырғанда тромбоциттер агрегациясы деңгейінің, фибриноген, Виллебранд факторлары деңгейінің, қан мен плазма тұтқырлығының айқын төмендеуі байқалған).

Пирацетам фармакодинамикасының басқа дәрілік препараттар әсерімен өзгеру мүмкіндігі төмен, препараттың 90 % өзгермеген күйінде несеппен шығарылады.

Пирацетам Р450 цитохром изоферменттерін бәсеңдетпейді. Басқа препараттармен метаболикалық өзара әрекеттесу мүмкіндігі төмен.

Айрықша нұсқаулар

Бүйрек функциясының көрсеткіштерін – қалдық азот пен креатининді (әсіресе созылмалы бүйрек жеткіліксіздігімен науқастарда) ал бауыр ауруларымен науқастарда – бауырдың функциональдік жағдайын үнемі бақылау ұсынылады.

Пирацетаммен емдеу қажет болғанда психобелсенді, жүрек-қантамырлық және басқа да дәрілік заттарды қолданумен бірге жүреуі мүмкін.

Кортикальді миоклониямен науқастарды емдеуде препаратты дереу тоқтатудан аулақ болу керек (ұстамалардың жаңғыру қаупі).

Ұйқының бұзылуы пайда болған жағдайда ол дозаны күндізгі қабылдауға қосып, кешкі қабылдауды тоқтату ұсынылады.

Гемодиализге арналған аппараттардың сүзетін жарғақшасы арқылы өтеді.

Пирацетамның тромбоциттер агрегациясына әсеріне байланысты пирацетамды асқазанның және он екі елі ішектің ойық жарасы, бұрын өткерген миішілік қан құйылу, жақын арада өткерген хирургиялық араласым (оның ішінде стоматологиялық), антикоагулянттар немесе антиагреганттар, оның ішінде аспириннің төмен дозаларын қабылдайтын қан кетудің даму қаупі факторларымен емделушілерге тағайындағанда сақтық шараларын сақтау керек.

Дәрілік заттың көлік құралдарын немесе әлеуетті қауіптті механизмамдерді басқару қабілетіне әсер ету ерекшеліктері

Емделу кезінде зейінді жоғары жұмылдыру және психомоторлық реакциялар жылдамдығын талап ететін автокөлікті жүргізу мен басқа да әлеуетті қауіпті қызмет түрлерімен айналысқанда сақтық шараларын сақтау керек.

Артық дозалануы

Симптомдары: болуы мүмкін жағымсыз әсерлерінің күшеюі.

Емі: асқазанды шаю, белсенділенген көмірді қабылдау, симптоматикалық ем, гемодиализ жүргізілуі мүмкін (тиімділігі – 50-60 %).

Арнайы у қайтарғысы жоқ.

Шығарылу түрі және қаптамасы

5 мл-ден шыныдан жасалған ампулаларда.

Ампулаларды ашуға арналған пышақ және скарификатормен бірге қағаздан жасалған гофрланған қосымшасымен картоннан жасалған корапқа 10 ампуладан салынған.

Қорапқа офсетті қағаздан немесе көпбояулы баспаға арналған қағаздан жасалған заттаңба-бандерольды айналдыра жапсырады.

Қораптар медицинада қолданылуы жөніндегі мемлекеттік және орыс тілдеріндегі нұсқаулықпен бірге топтық қаптамаға салынған.

Медицинада қолданылуы жөніндегі нұсқаулықтар саны қаптамалар санына сәйкес болуы керек.

Немесе 5 ампуладан поливинилхлоридті үлбірден жасалған қосымшаға салады. 2 қосымшадан ампулаларды ашуға арналған пышақ немесе скарификатор және медицинада қолданылуы жөніндегі мемлекеттік және орыс тілдеріндегі нұсқаулық бірге хром-эрзац картоннан жасалған пәшкеге салынған.

Немесе 10 ампуладан ампулаларды ашуға арналған пышақ немесе скарификатор және медицинада қолданылуы жөніндегі мемлекеттік және орыс тілдеріндегі нұсқаулық бірге ампулаларды бекітуге арналған картон қосымшамен картонннан жасалған пәшкеге салынған.

Пәшкелерді топтық қаптамамен қаптайды.

Сындыруға арналған сақинасы немесе сындыруға арналған кертігі мен нүктесі бар ампуланы пайдаланған жағдайда ампулаларды ашуға арналған пышақ немесе скарификаторды салу қарастырылмайды.

Сақтау шарттары

Жарықтан қорғалған жерде, 25ºС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

«Борисов медициналық препараттар зауыты» ашық акционерлік қоғамы, Беларусь Республикасы, Минск обл., Борисов қаласы, Чапаев көшесі, 64/27 тел/факс 8(10375177)744280.

Тіркеу куәлігінің иесі

«Борисов медициналық препараттар зауыты» ашық акционерлік қоғамы, Беларусь Республикасы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

«Борисов медициналық препараттар зауыты» ашық акционерлік қоғамы, Беларусь Республикасы, Минск обл., Борисов қаласы, Чапаев көшесі, 64/27 тел/факс 8(10375177)744280.

Электрондық поштасы: market@borimed.com