ПегИнтрон® (80 мкг/0,5 мл, Шеринг-Плау (Бринни) Компани)

• русский
• қазақша

• Скачать инструкцию медикамента

Саудалық атауы

ПегИнтрон®

Халықаралық патенттелмеген атауы

Пэгинтерферон альфа-2b

Дәрілік түрі

Инъекция үшін ерітінді дайындауға арналған лиофилизацияланған ұнтақ еріткішімен жиынтықта (инъекцияға арналған су) 50 мкг/0.5 мл, 80 мкг/0.5 мл, 100 мкг/0.5 мл, 120 мкг/0.5 мл және 150 мкг/0.5 мл

Құрамы

Бір құтының ішінде

белсенді зат - 50 мкг/0.5 мл, 80 мкг/0.5 мл, 100 мкг/0.5 мл, 120 мкг/0.5 мл немесе 150 мкг/0.5 мл пэгинтерферон альфа-2b

қосымша заттар: сусыз динатрий гидрофосфаты, натрий дигидрофосфаты, сахароза, полисорбат 80

еріткіш - инъекцияға арналған су

Сипаттамасы

Ақ немесе ақ дерлік түсті лиофилизацияланған ұнтақ.

Еріткіш - иісі мен дәмі жоқ мөлдір түссіз сұйықтық.

Қалпына келтірілген ерітінді - көрінетін механикалық қосылыстардан бос мөлдір түссіз ерітінді

Фармакотерапиялық тобы

Иммуностимуляторлар. Интерферондар. Пэгинтерферон альфа-2b.

АТХ коды L03AB10

Фармакологиялық қасиеттері

Фармакокинетикасы

Пэгинтерферон альфа-2b (PegIFN) жақсы зерттелген пегилирленген (яғни, полиэтиленгликольмен қосылған) интерферон альфа-2b туындысы болып табылады, негізінен, монопегилирленген молекулалардан тұрады. Қан плазмасынан PegIFN жартылай шығарылу кезеңі пегилирленбеген интерферон альфа-2b жартылай шығарылу кезеңінен асып кетеді. PegIFN интерферон альфа-2b босап шығуымен депегилирленуі мүмкін. Пегилирленген изомерлердің биологиялық белсенділігі сапалық тұрғыда бос интерферон альфа-2b биологиялық белсенділігіне ұқсас, бірақ одан біршама әлсіздеу. Тері астына енгізуден кейін сарысулық концентрациясы жоғары шегіне 15-44 сағат өткенде жетеді және 48-72 сағат бойы сақталады. PegIFN қан плазмасындағы ең жоғары концентрациясы (Cmax) және «концентрация-уақыт» қисығы астындағы ауданы (AUC) дозаға пропорционал артады. Таралу көлемі, орта есеппен, 0.99 л/кг құрайды. Қайта қолданғанда иммунореактивті интерферондар жинақталуы жүреді. Алайда биологиялық белсенділігінің артуы болымсыз. PegIFN жартылай шығарылу кезеңі, орта есеппен, 40 сағатқа жуық (диапазоны 22-60 сағат), жалпы клиренсі – 22.0 мл/сағ./кг. Интерферондардың клиренс механизмдері толық сипатталмаған. Дегенмен, бүйрек клиренсінің үлесі PegIFN жалпы клиренсінің 30% жуығын құрайтыны белгілі.

Бүйрек функциясы Бүйрек функциясы бұзылған пациенттерде бір рет қолданғанда (1.0 мкг/кг) Cmax, AUС және жартылай шығарылу кезеңінің бүйрек жеткіліксіздігі дәрежесіне пропорционал артуы анықталды. PegIFN бірнеше рет енгізілгенде (1 мкг/кг, тері астына, 4 апта бойы аптасына 1 рет) препарат клиренсі ауырлығы орташа бүйрек жеткіліксіздігі (креатинин клиренсі 30-49 мл/мин) бар пациенттерде орта есеппен 17%, ал бүйрек жеткіліксіздігі ауыр (креатинин клиренсі 10-29 мл/мин) пациенттерде, бүйрек функциясы қалыпты тұлғалармен салыстырғанда, 44% төмендеген. Клиренс бүйрек жеткіліксіздігі ауыр, гемодиализде жүрмеген пациенттерде және гемодиализ алған пациенттерде бірдей күйде қалған. Осы деректерді ескеріп, бүйрек жеткіліксіздігі орташа және ауыр пациенттерде моноем кезінде PegIFN дозасын азайту қажет.

PegIFN және рибавирин (RBV) препараттарымен біріктірілген ем креатинин клиренсі 50 мл/мин аз пациенттерге қарсы көрсетілімді («Қолдануға болмайтын жағдайлар» бөлімін қараңыз).

Бауыр функциясы. PegIFN фармакокинетикасы бауыр жеткіліксіздігінің орташа және ауыр дәрежесінде зерттелмеген.

65 жастан асқан егде пациенттер. PegIFN фармакокинетикасы 1.0 мкг/кг дозада тері астына бір рет қолданылғанда жас ерекшелігіне тәуелденбеген, сондықтан егде жастағы адамдарда дозаны түзету қажет емес.

Балалар жасы. Тері астына 60 мкг/м²/апта дозада PegIFN қабылдайтын, созылмалы С гепатитінен (ССГ) зардап шеккен 3-тен 17 жасқа дейінгі балаларда белсенді зат пен метаболиттер экспозициясы, тері астына 1.5 мкг/кг/апта қабылдайтын ересек пациенттердегіден 50% жоғары екені анықталған.

Фармакодинамикасы

ПегИнтрон® – бұл рекомбинантты интерферон альфа-2b және монометоксиполиэтиленгликоль ковалентті коньюгаты. Рекомбинантты интерферон альфа-2b құрамында адам лейкоциттерінің альфа-2b интерферонын кодтайтын генді-инженерлік плазмидті гибрид болатын E.coli клонынан алынады. ПегИнтрон® препаратының биологиялық белсенділігіне PegIFN себеп болады. Интерферондардың жасушалық әсерлері жасушалар беткейіндегі спецификалық рецепторлармен байланысуымен жүзеге асады. Жасуша қабығымен байланысып, интерферон жасушаішілік реакциялар тізбегіне, соның ішінде белгілі бір ферменттер индукциясына түрткі болады. Бұл үдеріс интерферондардың әртүрлі жасушалық әсерлеріне ұйытқы болады, бұған жұқпаланған жасушалардағы С гепатиті вирусы (СГВ) репликациясының бәсеңдеуі, жасушалардың пролиферация тежелісі және макрофагтардың фагоцитарлық белсенділігі мен лимфоциттердің нысана-жасушаларға қатысты спецификалық цитоуыттылығының күшеюі сияқты иммунитет түрлендіргіш қасиеттер қосылады. Осы әсерлердің кез келгені немесе бәрі интерферонның емдік белсенділігіне ұйытқы бола алады. Рекомбинантты интерферон альфа-2b вирусқа қарсы әсер етуінің нақты механизмі белгісіз болса да, препарат вирусы бар жасушалар метаболизмін өзгертеді деп жорамалданады. Бұл СГВ репликациясының бәсеңдеуіне әкеледі, соның нәтижесінде түзілген вириондар жасушадан шығып кетуге қабілетсіз.

Қолданылуы

Рибавиринмен біріктірілген ем

- клиникалық ағымы тұрақты, компенсацияланған циррозы және/немесе адамның иммунитет тапшылығы вирусының (АИТВ) ко-инфекциясын жұқтырған пациенттерді қоса, С гепатиті вирусы РНҚ (СГВ-РНҚ) оң ересектер мен 3 жастан асқан балалардағы созылмалы С гепатитінде, сонымен қатар осының алдында интерферон альфамен (пегилирленбеген немесе пегилирленген интерферонмен) және рибавиринмен біріктіріп емдеу тиімсіз болғанда немесе интерферон альфамен моноем тиімсіз болғанда

Моноем (тек рибавирин жақпаушылығында немесе оны қолдануға қарсы көрсетілімдерде)

- бұрын интерферон альфамен ем алмаған ересектердегі созылмалы С гепатитінде

Қолдану тәсілі және дозалары

Созылмалы С гепатиті

ПегИнтрон® тері астына инъекция салумен аптасына бір рет енгізілу керек. Ересектерге енгізілген доза препараттың RBV-мен біріктіріліп немесе моноем ретінде пайдаланылуына байланысты.

ПегИнтрон® + RBV біріктірілген емі

RBV екі қабылданатын (таңертең және кешке) ас ішумен бірге күнделікті қабылдану қажет. Креатинин клиренсі <50 мл/мин пациенттерді емдеу үшін RBV қабылдауға болмайды.

Ересектер

ПегИнтрон® препаратының ұсынылатын дозасы 800-1400 мг мөлшеріндегі RBV-мен біріктірілген тері астына инъекция түрінде 1.5 мкг/кг/апта құрайды. Біріктірілген емде RBV тәуліктік дозасы дене салмағына қарай есептеледі (1 кесте).

1 кесте. Ересектерге арналған біріктірілген емде ұсынылатын ПегИнтрон® + RBV препаратының дозалары

Алғашқы пациенттердің (бұрын PegIFN қабылдамаған) емдеу ұзақтығы. Тұрақты вирусологиялық жауап (ТВЖ) предикторлары

1 генотипті вирус жұқтырған пациенттерде ем тиімділігі жеткіліксіз болғанда (емдеудің 4-ші және 12-ші аптасында қандағы СГВ-РНҚ деңгейінің төмендеуі <2 log құраған), ТВЖ жету ықтималдығы төмен. Ондай жағдайларда емдеуді тоқтату мәселесін қарастыру мақсатқа сай.

1 генотип

- оң динамика болғанда (емдеудің 12-ші аптасында СГВ-РНҚ қанда анықталмайды) емдеу курсын 48 аптаға дейін жалғастыру қажет.

- емдеудің 12 аптасында СГВ-РНҚ деңгейі бастапқысынан 2 log төмендегенде, емдеудің 24 аптасында теріс тест нәтижелерінде толық емдеу курсын 48 апта бойы жалғастыру қажет. Егер СГВ-РНҚ емдеудің 24-ші аптасында анықталған жағдайда, емдеу курсын тоқтату мүмкіндігін қарастыру керек.

- емдеудің 4-ші және 24 аптасында СГВ-РНҚ анықталмайтын бастапқы вирус жүктемесі төмен (< 600 000 ХБ/мл) 1 генотипті СГВ жұқтырған пациенттерде 24 апталық курспен шектелуге немесе емді 48 аптаға дейін жалғастыруға болады. Алайда, 24 аптаға созылатын емдеу ұзақтығы, 48 апталық емдеу курсымен салыстырғанда, қайталанудың жоғары қаупімен байланысты болуы мүмкін.

2 немесе 3 генотиптері

24-апталық емдеу курсы 2 немесе 3 генотипті СГВ жұқпасын жұқтырған пациенттерге ұсынылады.

48-апталық емдеу курсы СГВ (2 немесе 3 генотип) және АИТВ ко-инфекциясын жұқтырған пациенттерге ұсынылады.

4 генотип

4 генотипті СГВ жұқтырғанда емдеу едәуір қиындап кетеді деп саналады. Шектеулі клиникалық зерттеулер негізінде (n = 66) 1 генотипті вирус жұқтырған пациенттерге арналғандай емдеу нысанасын ұстануға кеңес беріледі.

СГВ/АИТВ ко-инфекциясы бар пациенттерді емдеу ұзақтығы

СГВ/АИТВ ко-инфекциясын жұқтырған пациенттерге ұсынылатын емдеу ұзақтығы генотипіне байланыссыз 48 аптаға тең.

СГВ/АИТВ ко-инфекциясы бар пациенттерді емдеудің тиімділік/тиімсіздік предикторлары

РНҚ концентрациясының анықталмауымен немесе вирустық жүктеменің бастапқысынан 2 log аса төмендеуімен сипатталатын ерте вирусологиялық жауап (ЕВЖ) жағымды болжамалы ТВЖ факторы болып табылады.

Алдыңғы ем тиімсіз болғанда ПегИнтрон® + RBV біріктірілімімен қайталап емдеу ұзақтығы

Емдеудің 12-ші аптасында СГВ-РНҚ тестісінің теріс нәтижесіне жеткен пациенттердің бәрі, вирус генотипіне қарамастан, қайталанатын 48 апталық емдеу курсынан өтуі тиіс.

Қайта емдеу курсын алатын ауруының қайталануы болған пациенттердегі ем тиімділігі предикторлары

- ЕВЖ (12 апта өткенде вирустық жүктеменің кем дегенде 2 log төмендеуі немесе СГВ-РНҚ элиминациясы) ТВЖ болжануына мүмкіндік береді. Алдыңғы пегилирленбеген интерферон емінен кейінгі қайталануымен, 1 және 4 генотипті вирусқа шалдыққан пациенттерде, ПегИнтрон® препаратымен қайта емдеу курсының 12-ші аптасында ЕВЖ жету шартымен, ТВЖ 73% жиілікке жетті.

- емнің 12-ші аптасында вирустық жүктеменің анықталмайтын деңгейі 37% пациентке тән. Пациенттердің осы тобында ТВЖ жету жиілігі 57% құрады.

- емнің 12-ші аптасында ЕВЖ жетпеген пациенттердің ТВЖ жету мүмкіндігі тіптен төмен. Ондай пациенттерге PegIFN + RBV емдеу курсын тоқтату және емдік әдісін ауыстыру мәселесін қарастыру керек.

Стандартты емге жауап бермеген 1 генотипті пациенттер үшін 48 аптадан асып кететін PegIFN + RBV біріктірілген емінің ұзақтығы зерттелмеген.

Педиатрияда қолдану

ПегИнтрон® препаратының дозасын есептеу 3-тен 17 жасқа дейінгі балаларда дене беткейі ауданына сәйкес, ал RBV – дене салмағына сәйкес жүргізіледі. ПегИнтрон® препаратының ұсынылатын дозасы ас ішумен 2 қабылданатын (таңертең және кешке) 15 мкг/кг/тәулік RBV ішке қабылдаумен біріктіріліп тері астына 60 мкг/м2/апта құрайды.

ПегИнтрон® + RBV препараттарымен емделу кезінде 18 жасқа толған пациенттер препаратты педиатриялық дозаларда қабылдауды жалғастыруы тиіс.

Емдеу ұзақтығы

1 генотип

Ұсынылатын емдеу ұзақтығы 48 аптаға тең. 12 аптада ЕВЖ болмаса, ТВЖ ықтималдығы төмен. Егер СГВ-РНҚ мөлшері 12-ші аптада бастапқы деңгейінен 2 log10 мәнінен аз төмендеген жағдайда немесе емнің 24 аптасындағы оң СГВ-РНҚ тестісінде балалар мен жасөспірімдердегі ПегИнтрон® + RBV біріктірілген емін тоқтату ұсынылады.

2 немесе 3 генотип

Ұсынылатын емдеу ұзақтығы 24 апта құрайды.

4 генотип

Ұсынылатын емдеу ұзақтығы 48 аптаға тең. 12 аптада ЕВЖ болмаса, ТВЖ ықтималдығы төмен. Егер СГВ-РНҚ мөлшері 12-ші аптада бастапқы деңгейінен 2 log10 мәнінен аз төмендеген жағдайда немесе егер емдеудің 24 аптасында СГВ-РНҚ әлі анықталмаса, балалар мен жасөспірімдерде ПегИнтрон® + RBV препаратымен біріктіріп емдеуді тоқтату ұсынылады.

ПегИнтрон® препаратымен моноем

ПегИнтрон® 1 жыл бойы аптаның белгілі бір күнінде аптасына бір рет 0.5 немесе 1.0 мкг/кг дозада тері астына енгізіледі. ПегИнтрон® препаратының құтыдағы ең төмен қолжетімді концентрациясы 50 мкг/0.5 мл құрайды, сондықтан егер пациентке аптасына 0.5 мкг/кг доза тағайындалса, оны 2 кестеде көрсетілген көлемге дейін жеткізген жөн. 1.0 мкг/кг дозаны алу үшін осыған ұқсас көлеммен түзетуге немесе 2 кестеде көрсетілгендей препараттың басқа дозасын пайдалануға болады. ПегИнтрон® препаратымен моноем СГВ/АИТВ ко-инфекциясын жұқтырған пациенттерде зерттелмеген.

2 кеcте. Моноемдеұсынылатын ПегИнтрон® дозалары.

Емдеу ұзақтығы

12 аптада ЕВЖ жеткен пациенттерде емдеуді тағы 3 ай бойы (24 апта) жалғастырған жөн. Емдеу курсын бір жылға дейін жалғастыру шешімі болжамалы факторларға (мысалы, генотип, 40-тан асқан жас, ер жыныс, көпір түріндегі бауыр фиброзы) негізделіп қабылдану керек.

Дозаны түзету бойынша нұсқаулар

ПегИнтрон® препаратын немесе ПегИнтрон® + RBV қолдану кезінде күрделі жағымсыз құбылыстар немесе зертханалық көрсеткіштердегі ауытқулар туындалғанда препараттар дозасын түзету немесе жағымсыз құбылыстар басылғанша қабылдауды тоқтату керек.

3 кестеде зертханалық көрсеткіштер негізінде дозалануын өзгертуге немесе емдеуді тоқтатуға қатысты нұсқаулар берілген.

3 кесте. RBV-мен біріктірілген ем кезінде зертханалық параметрлеріне қарай дозаларын азайтудың негізгі қағидалары

4 кесте. Балалар мен жасөспірімдерге RBV дозасын азайту

Балалар мен жасөспірімдер үшін ПегИнтрон® препаратының дозасын бірінші азайту 40 мкг/м2/апта құрайды, дозаны екінші азайту 20 мкг/м2/апта құрайды.

ПегИнтрон® препаратының дозасын азайтуды ересектерде тағайындалған көлемді азайту арқылы немесе 5 кестеде көрсетілгендей модификациялау жолымен ең төмен дозалық концентрациясын пайдаланып орындауға болады.

5 кесте. Ересектердегі біріктірілген емде ПегИнтрон® препаратының дозасын екі сатылы азайту

6 кестеде ересектердегі ПегИнтрон® препаратымен моноемде дозаны азайту туралы нұсқаулар берілген.

6 кесте. Ересек пациенттер моноемінде зертханалық параметрлерге қарай ПегИнтрон® препаратының дозасын азайтуға қатысты нұсқаулар

ПегИнтрон® препаратымен моноемде 0.5 мкг/кг дозаны пайдаланатын ересек пациенттерде доза бастапқысынан 50% азайтылуы тиіс.

ПегИнтрон® препаратымен моноемде 1.0 мкг/кг дозаны пайдаланатын ересек пациенттерде доза 50% немесе 7 кестеде көрсетілгендей төмендеу концентрациядағы дозаларын пайдаланып азайтылуы тиіс.

7 кесте. Ересектердегі моноемде 1.0 мкг/кг қабылдау кезінде ПегИнтрон® препаратының дозасын азайту

Инъекцияға арналған ерітінді дайындау жөніндегі нұсқаулық

Құтылардағы ПегИнтрон®

ПегИнтрон® препараты лиофилизатын қоса берілген еріткішпен ғана сұйылту керек. ПегИнтрон® басқа дәрілік заттармен араластыруға болмайды. Стерильді еккіш көмегімен инъекцияға арналған 0.7 мл су ПегИнтрон® препараты бар құтыға енгізіледі. Құтыны ұнтақ толық ерігенше абайлап сілкиді. Еріту уақыты 10 минуттан аспауы тиіс; әдетте, ұнтақ тез еріп кетеді. Қажетті дозаны стерильді еккішке жинайды. Енгізуге 0.5 мл ерітінді пайдаланылады. Парентеральді қолдануға арналған кез келген басқа препараттар сияқты, енгізер алдында дайын ерітіндіні қарап тексеру керек. Ерітінді мөлдір, түссіз болуы және көрінетін бөлшектері болмауы тиіс. Ерітіндінің түсі өзгерген немесе көрінетін бөлшектері білінген жағдайда қолдануға жарамсыз.Дайын ерітіндіні дереу пайдалану керек. Дайындалған ерітіндіні бірден пайдалану мүмкін болмаса, оны 2 °С-ден 8 °С дейінгі температурада 24 сағаттан асырмай сақтауға болады. Енгізуден кейін қалған ерітінді әріқарай қолдануға жатпайды және оны ресми талаптарға сай жою қажет.

Жағымсыз әсерлері

Постмаркетингтік кезеңде өздігінен қаралу негізінде жиілігі өте жиі (≥1/10), жиі (≥1/100, <1/10), жиі емес (≥1/1000, <1/100), сирек (≥1/10000, <1/1000), өте сирек (<1/10000) немесе белгісіз (қолжетімді деректер бойынша бағалауға келмейтін) болып белгіленген.

Ересектерде

ПегИнтрон® препаратымен моноем және RBV-мен біріктірілімде

Өте жиі (≥1/10)

- қажу, астения, ашушаңдық, қалтырау, гипертермия, тұмау тәрізді жағдай

- артралгия, миалгия, бұлшықет-қаңқа ауруы

- вирустық инфекция*, фарингит*

- бас ауыру, бас айналу, депрессия, үрейлену*, зейінділіктің төмендеуі, эмоциялық құбылу*, ұйқысыздық, ауырулар

- ауыз кеберсуі*, құсу*, жүрек айну, іш тұсындағы ауыру, диарея

- анорексия, дене салмағының кемуі

- диспноэ*, жөтел*

- алопециялар, қышыну*, терінің құрғауы*, бөртпе*

- анемия, нейтропения

- инъекция жасалған жердегі қабыну және реакциялар

Жиі (≥1/100, <1/10)

- шөлдеу, әдеттен тыс сезімдер

- бактериялық инфекция (сепсисті қоса), зеңдік инфекция, тұмау, қарапайым герпес, бронхит, жоғарғы тыныс жолдарының инфекциялары

- озбыр мінез-құлық, ажитация, ызақорлық, көңіл-күй өзгерістері, мінез-құлық бұзылысы, күйгелектік, ұйқының бұзылуы, либидо төмендеуі, апатия, қорқынышты түстер көру, жылауықтық

- амнезия, есте сақтаудың төмендеуі, естен танулар, бас сақинасы, атаксия, сананың шатасуы, невралгия, парестезия, гипостезия, гиперестезия, гипертония, ұйқышылдық, зейіннің нашарлауы, тремор, дисгевзия

- тіс аурулары, қызыл иектердің қанағыштығы және қабынуы, стоматит, ауыз қуысының ойық жаралануы, глоссит, глоссодиния, хейлит

- диспепсия, гастроэзофагеальді рефлюкс ауруы, іш қату, метеоризм, геморрой, іштің кебуі

- дисфония, мұрыннан қан кету, респираторлық бұзылулар, тыныс жолдарының обструкциясы, қойнаулар бітелісі, мұрынның бітелуі, ринорея, кеуде қуысы аумағындағы жайсыздану мен ауыру, жоғарғы тыныс жолдарында секрецияның ұлғаюы, тамақтың немесе көмейдің ауыруы, синусит, ортаңғы отит, ринит

- гипотиреоз, гипертиреоз

- гипокальциемия, гиперурикемия, дегидратация, гемолиздік анемия, лейкопения, тромбоцитопения, лимфаденопатия

- тәбеттің артуы

- көрудің нашарлауы, анық көрмеу, көздің қарығуы, конъюнктивит, көздің тітіркенуі, көз жасы бездері функциясының бұзылуы, көздің ауыруы, көздің құрғауы

- естудің нашарлауы/естімей қалу, құлақтың шыңылдауы, вертиго

- пальпитация, тахикардия, гипотензия, гипертензия, тері жабындарын қан кернеу

- гипербилирубинемия, гепатомегалия

- псориаз, фотосезімталдық реакциялары, макулопапулезді бөртпе, дерматит, эритематозды бөртпе, экзема, түнгі тер, гипергидроз, акне, фурункулдар, эритема, есекжем, шаш құрылымының бұзылуы, тырнақ құрылымының бұзылуы

- артрит, арқаның ауыруы, бұлшықеттердің түйілуі, аяқ-қолдың ауыруы

- несеп шығарудың жиілеуі, полиурия, несеп құрамының өзгеруі

- аменорея, сүт бездерінің ауыруы, меноррагия, етеккір оралымының бұзылыстары, аналық бездер аурулары, қынап аурулары, жыныстық дисфункция, простатит, эректильді дисфункция

- инъекция жасалған жердің ауыруы, беттің ісінуі, шеткері ісінулер

Жиі емес (≥1/1 000, <1/100)

- инъекция жасалған жердегі инфекция, төменгі тыныс жолдарының инфекциясы

- дәрілік препараттарға аса жоғары сезімталдық реакциясы

- қант диабеті, гипертриглицеридемия

- психоз, елестеулер, үрей ұстамасы, суицидтік ойлау, суицидке әрекеттену, суицид

- нейропатия, шеткері нейропатия, құлақтың ауыруы

- ретинальді экссудаттар

- миокард инфарктісі

- панкреатит, ауыз қуысындағы ауыру

- сүйектердің ауыруы, бұлшықет әлсіздігі

Сирек (≥1/10000, <1/1000)

- саркоидоз, тері саркоидозы

- іркілісті жүрек жеткіліксіздігі, кардиомиопатия, аритмия, перикардит, васкулит

- ишемиялық колит

- торқабыққа қан құйылу, ретинопатия, торқабық артериялары немесе көктамырларының тромбозы, көру өткірлігінің төмендеуі немесе көру ауқымының шектелуі, көру жүйкесінің невриті, көру жүйкесі дискісінің ісінуі, макула ісінуі

- биполярлы бұзылыстар, конвульсиялар

- рабдомиолиз, миозит, ревматоидты артрит

- бүйрек жеткіліксіздігі

- диабеттік кетоацидоз

- инъекция жасалған жердегі некроз

Өте сирек (<1/10000)

- апластикалық анемия, жүрек ишемиясы, цереброваскулярлы қан кету, цереброваскулярлы ишемия, энцефалопатия

- спецификалық емес ойық жаралы колит

- интерстициальді пневмония, Стивенс-Джонсон синдромы, уытты эпидермалық некролиз, полиморфты эритема

Белгісіз (жиілігі қолда бар деректер бойынша анықталмайды)

- шынайы эритроцитарлы аплазия, идиопатиялық тромбоцитопениялық пурпура, тромбоздық тромбоцитопениялық пурпура, жүйелі қызыл жегі

- аса жоғары сезімталдықтың жедел реакциялары, ангионевроздық ісінуді, анафилаксияны, анафилаксиялық реакцияларды, анафилаксиялық шокты қоса

- гомицидті ойлау, маниялар, бет жүйкесінің салдануы, мононейропатиялар

- экссудаттық перикардит

- торқабықтың серозды ажырауы

- өкпе фиброзы

*Аталған жағымсыз реакциялар моноемде ПегИнтрон® алған пациенттер тобындағы клиникалық сынақтарда жиі (≥1/100-ден <1/10 дейін) байқалды.

Ұсынылған дозаларында ПегИнтрон® препаратымен моноем қолданылғанда нейтропения мен тромбоцитопения жағдайларының көпшілігі жеңіл дәрежеде сипатталды, бірақ RBV біріктірілімінде нейтропенияның аса ауыр жағдайлары байқалды.

Суицидтік ойларға және суицид әрекеттеріне дейін апаратын өмірге қатерлі психикалық бұзылыстар жағдайлары ПегИнтрон® препаратымен моноем кезінде де, ПегИнтрон® препараты + RBV біріктірілімінде де пациенттердің 1.2% шамасындағы клиникалық зерттеулер барысында байқалды.

Аритмия жағдайлары осының алдында болған жүрек-қантамыр ауруымен және кардиоуытты препараттармен алдыңғы емдеумен өзара байланысты болды.

Интерферон альфамен емді тоқтатудан кейін қайтымды болуы мүмкін кардиомиопатия бұрын жүрек аурулары болмаған пациенттерде сирек білінді.

Интерферон альфа пайдаланылғанда тиреоидит, жүйелі қызыл жегі, ревматоидты артрит, идиопатиялық немесе тромбоздық тромбоцитопениялық пурпура, васкулит, нейропатия, мононейропатия мен Фогт-Койянаги-Харада синдромын қоса, әртүрлі аутоиммундық және иммунитетке байланысты аурулар болды.

СГВ/АИТВ ко-инфекциясын жұқтырған пациенттер

СГВ/АИТВ ко-инфекциясын жұқтырған және ПегИнтрон® + RBV алған пациенттер үшін, моноинфекция жұқтырған пациенттерде білінген жағымсыз әсерлерімен қатар, 5%-дан көп жиілікте мыналар байқалды:

- ауыз қуысының кандидозы (14%)

- жүре пайда болған липодистрофия (13%)

- CD4 лимфоциттер санының азаюы (8%)

- тәбеттің төмендеуі (8%)

- гамма-глутамилтранспептидаза белсенділігінің жоғарылауы (9%)

- арқаның ауыруы (5%)

- қан амилазасы деңгейінің артуы (6%)

- қанда сүт қышқылы деңгейінің жоғарылауы (5%)

- цитолиздік гепатит (6%)

- липаза деңгейінің жоғарылауы (6%)

- аяқ-қолдардың ауыруы (6%)

Митохондриялық уыттылық. Митохондриялық уыттылық және сүт қышқылды ацидоз сызба бойынша кері транскриптазаның нуклеозидті тежегіштерімен (КТНТ) ем алған СГВ/АИТВ ко-инфекциясын жұқтырған пациенттерде ПегИнтрон® + RBV препаратымен емделу кезінде байқалды.

СГВ/АИТВ ко-инфекциясын жұқтырған пациенттердегі клиникалық-зертханалық тестілер деректері. СГВ/АИТВ ко-инфекциясын жұқтырған пациенттерде нейтропения, тромбоцитопения мен анемия жағдайлары жиірек кездессе де, дозаны түзету емді мерзімінен бұрын тоқтатпауға мүмкіндік берді. Гематологиялық ауытқулар ПегИнтрон® + RBV алатын пациенттерде, интерферон альфа-2b + RBV алатын пациенттермен салыстырғанда, жиірек білінді.

CD4 лимфоциттер санының азаюы. ПегИнтрон® + RBV препаратымен емделу алғашқы 4 апта ішінде CD4+ жасушалардың пайыздық арақатынас төмендеуінсіз CD4+ жасушалар абсолютті санының азаюына әкелді. CD4+ жасушалар санының төмендеуі дозаны азайтудан немесе емді тоқтатудан соң қайтымды болады. ПегИнтрон® + RBV емделу кезінде немесе кейінгі медициналық бақылау кезеңінде АИТВ вирусемия деңгейіне елеулі ықпалын тигізбейді.

Уыттылығы туралы ақпарат алу үшін тиісті антиретровирустық препараттарды қолдану жөніндегі нұсқаулықты меңгеру қажет.

Балалар мен жасөспірімдерде

Жалпы, балалар мен жасөспірімдердегі жағымсыз реакциялар бейіні ересектерде байқалуымен ұқсас болды, дегенмен балалардағы өсудің баяулау әсері қазіргі уақытта жеткіліксіз зерттелген, осы жағымсыз әсердің қайтымдылығы белгісіз. Кідірістің пубертатты жастағы балаларда көбірек байқалуы болды.

Өте жиі (≥1/10)

- анемия, лейкопения, нейтропения

- анорексия, тәбеттің төмендеуі

- бас ауыру, бас айналу

- іш аумағындағы ауыру, іштің жоғарғы бөлігінің ауыруы, құсу,

жүрек айну

- алопециялар, терінің құрғауы

- миалгия, артралгия

- инъекция жасалған жердің қызаруы

- қажу, гипертермия, қалтырау, тұмау тәрізді синдром, ауыру, астения, дімкәстану, ашушаңдық

- өсудің баяулауы (өзінің жасына бойы/салмағының төмен болуы)

Жиі (≥1/100, <1/10)

- зеңдік инфекция, тұмау, ауыз қуысының шырышты қабық ұшығы, ортаңғы отит, стрептококкты фарингит, ринофарингит, синусит

- тромбоцитопения, лимфаденопатия

- құлақтың ауыруы, вертиго

- гипотиреоз

- қандағы тиреостимуляциялаушы гормонның жоғары деңгейі, тиреоглобулин деңгейінің жоғарылауы

- суицидтік ойлар§, суицидке әрекеттену§, депрессия, озбыр мінез-құлық, аффектілі құбылу, ызақорлық, ажитация, үрейлену, көңіл-күйдің өзгеруі, мазасыздық, күйгелектік, ұйқысыздық, дисгевзия, естен тану, зейінділіктің төмендеуі, нашар ұйқы сапасы

- жүректің жиі соғуы, тахикардия

- тері жабындарын қан кернеу

- жөтел, мұрыннан қан кету, тамақ пен көмейдің ауыруы

- афтозды стоматит, хейлит, ауыз қуысының ойық жаралануы, асқазан аумағындағы жайсыздық, ауыз қуысының ауыруы, диарея

- қышыну, бөртпе, эритематозды бөртпе, экзема, акне, эритема

- қаңқа-бұлшықет ауыруы, аяқ-қолдың ауыруы, арқаның ауыруы

- инъекция орнындағы реакция, қышыну, бөртпе, құрғау, ауыру, салқын сезінуді қоса

Жиі емес (≥1/1000, <1/100)

- аскаридоз, энтеробиоз, белдемелі герпес, панникулит, несеп-жыныс жолдарының инфекциясы, гастроэнтерит, пневмония

- мінез-құлық бұзылыстары, депрессиялық көңіл-күй, эмоциялық орнықсыздық, қорқыныштар, түнгі қорқынышты түстер, соғылуға бейімділік

- невралгия, летаргия, парестезия, гипостезия, психомоторлық аса жоғары белсенділік, тремор, бұлшықеттердің түйілуі, бұлшықеттердің тартылуы

- конъюнктиваға қан құйылу, көздердің қышуы, кератит, анық көрмеу, көздің қарығуы

- гипотензия, тері жабындарының бозаруы

- ысқырып дем алу, мұрын қуысындағы жайсыздық, ринорея

- диспепсия, гингивит, гепатомегалия

- жарыққа сезімталдық реакциясы, макула-папулезді бөртпе, терінің қабыршақтануы, пигментацияның бұзылуы, атопиялық дерматит, тері түсінің өзгеруі

- қыздардағы дисменорея

- кеуденің ауыруы, кеуденің жайсыздануы, бет аумағындағы ауыру

- тиреоидқа қарсы антиденелердің пайда болуы, протеинурия

§Аталған жағымсыз реакциялар ересектер мен балаларда құрамында интерферон альфа бар препараттарға туындаған.

Қолдануға болмайтын жағдайлар

• белсенді немесе қосымша компоненттерге немесе кез келген интерферонға жоғары сезімталдық

• анамнездегі ауыр жүрек ауруы, соңғы алты ай ішінде қайталанған немесе бақыланбайтын жүрек ауруын қоса

• анамнездегі аутоиммундық гепатит немесе аутоиммундық аурулар

• орташа және ауыр сипатты бауыр жеткіліксіздігі немесе декомпенсация сатысындағы бауыр циррозы

• Чайлд-Пью бойынша ≥6 балл бауыр циррозы бар СГВ/АИТВ ко-инфекциясы

• анамнездегі дәстүрлі еммен бақыланбайтын қалқанша без ауруы

• эпилепсия және/немесе орталық жүйке жүйесі функциясының бұзылуы

• ұзаққа созылатын ауыр сипатты аурулар

• тұқым қуалайтын галактоза жақпаушылығы, Лапп лактаза тапшылығы және глюкоза-галактоза мальабсорбциясы

• жүктілік және лактация кезеңі

Балалар

• қазіргі уақыттағы немесе анамнездегі ауыр депрессиялармен, суицидтік ойлаумен немесе суицид әрекеттерімен қатар жүретін психикалық жай-күйлер

Рибавиринмен біріктірілген ем

• рибавиринді медициналық қолдану жөніндегі нұсқаулықты қараңыз

Дәрілермен өзара әрекеттесуі

Дәрілік өзара әрекеттесу зерттеулері ересек пациенттерде жүргізілген.

Телбивудин. Телбивудиннің (600 мг/тәулік) пегилирленген альфа-2a интерферонымен (тері астына 180 мкг 1 рет/апта) біріктірілген емінің клиникалық зерттеуінде шеткері нейропатияның жоғары даму қаупі анықталды. Аталған реакция механизмі соңына дейін зерттелмеген. Интерферондармен біріктірілген телбивудиннің созылмалы В гепатитін емдеу тиімділігі мен қауіпсіздігі анықталмаған. Сондықтан ПегИнтрон® препараты мен телбивудинді бірге тағайындау қарсы көрсетілімді.

Метадон. ПегИнтрон® препараты қосымша тағайындалғанда (4 апта бойы тері астына аптасына 1.5 мкг/кг) метадонмен тұрақты демеуші ем алған және бұрын пэгинтерферон альфа-2b алмаған ССГ бар пациенттерде R-метадон AUC көрсеткішінің шамамен 15% артуы байқалды (95% СА AUC үшін 103-128% құрады). Осы құбылыстың клиникалық мәні зерттелмеген. Сондықтан тыныштандыру әсерінің, сондай-ақ тыныс тарылуының күшею белгілері мен симптомдарын анықтау үшін пациенттерге мониторинг өткізу керек. Метадонның жоғары дозаларын алатын пациенттерде QTc аралығының ұзару қаупін ескеру керек.

Бір мезгілде қолданылатын препараттарға пэгинтерферон альфа-2b әсері. Клиникалық фармакологиялық үш зерттеу барысында ПегИнтрон® препаратын С гепатиті бар пациенттерде (1.5 мкг/апта доза) және дені сау еріктілерде (1 мкг/апта немесе 3 мкг/апта доза) бірнеше рет қолданудан кейін ферменттер метаболизмі субстраттарымен ПегИнтрон® препаратының өзара әрекеттесу мүмкіндігі зерттелді. ПегИнтрон® препараты мен толбутамид, мидазолам немесе дапсон арасында клиникалық мәнді фармакокинетикалық өзара әрекеттесу байқалмаған; сондықтан CYP2C9, CYP3A4 арқылы метаболизденетін препараттармен және N-ацетилтрансферазамен бір мезгілде қолданғанда ПегИнтрон® препаратының дозасын түзету қажеттілігі жоқ. ПегИнтрон® препаратын кофеинмен немесе дезипраминмен бір мезгілде қолдану кофеин мен дезипрамин экспозициясын орташа күшейтті. ПегИнтрон® препаратын CYP1A2 немесе CYP2D6 арқылы метаболизденетін дәрілік заттармен қолдану кезінде, емдік әсер ету диапазоны тар препараттарды қоспағанда, P 450 цитохромы белсенділігі төмендеуінің клиникалық мәнді болу ықтималдығы аз (7 кесте).

7 кесте. Бірге тағайындалған препараттарға пэгинтерферон альфа-2b әсері

* 48 сағат ішінде жиналған несеп талдауының деректері

** 24 сағат ішінде жиналған несеп талдауының деректері

Бір мезгілде қолдану кезінде алдын ала сақтану шаралары (Төменде аталатын препараттармен бірге қолданғанда ПегИнтрон® сақтықпен қолданылу керек)

Теофиллин. ПегИнтрон® препаратымен бір мезгілде теофиллин қолдану қандағы теофиллин концентрациясын арттыруы мүмкін. Осы біріктірілімді абайлап қолдануға кеңес берілген. Теофиллин препаратын қолдану жөніндегі нұсқаулықпен танысу керек. Теофиллин метаболизмі ПегИнтрон® препаратының CYP1A2 тежеу әсерімен бәсеңдейді.

Тиоридазин. ПегИнтрон® препаратымен бір мезгілде тиоридазин қолдану қандағы тиоридазин концентрациясын арттыруы мүмкін. Осы біріктірілімді абайлап қолдануға кеңес берілген. Тиоридазин препаратын қолдану жөніндегі нұсқаулықпен танысу керек. Тиоридазин метаболизмі ПегИнтрон® препаратының CYP2D6 тежеу әсерімен бәсеңдейді.

Теофиллин, антипирин, варфарин. Интерферондармен бір мезгілде қолданғанда осы препараттардың қандағы концентрациясының жоғарылауы хабарланған; абайлап қолдану керек. Бауырда басқа препараттар метаболизмінің бәсеңдеуі орын алуы мүмкін.

Зидовудин. Интерферондармен біріктіріп қолданғанда сүйек кемігін бәсеңдету әсері күшейіп, сондай-ақ қан жасушаларының саны жағынан төмендеуі үдей түсуі (мысалы, лейкоциттер санының азаюы) мүмкін. Әсер ету механизмі белгісіз, бірақ екі препарат та сүйек кемігіне бәсеңдету әсерін көрсетеді деп саналады.

Иммуносупрессиялық ем. Интерферондармен біріктіріп қолданғанда бүйрегі, сүйек кемігі немесе басқа ағзасының трансплантаты бар пациенттерде иммунитет бәсеңдетуші ем тиімділігінің төмендеуін байқауға болады. Трансплантат ажырауын индукциялау мүмкіндігі бар деп саналады.

Рибавирин. Көбейтілген дозасының фармакокинетикалық зерттеуінде ПегИнтрон® препараты мен RBV арасында ешбір фармакокинетикалық өзара әрекеттесулер болмаған.

СГВ/АИТВ ко-инфекциясы

Нуклеозидтік аналогтар. Нуклеозидтік аналогтарды бөлек немесе басқа нуклеозидтермен біріктіріп пайдалану лактоацидозға әкелуі мүмкін. RBV пуриндік нуклеозидтердің фосфорланған метаболиттерінің мөлшерін in vitro арттырады. Осы белсенділік пуриндік нуклеозидтер аналогтарымен (мысалы, диданозин немесе абакавирмен) индукцияланған лактоацидоз қаупін күшейтуі мүмкін. Бір мезгілде RBV және диданозин енгізу ұсынылмайды. Кейбіреулері өлімге әкелген митохондриялық уыттылық, әсіресе, лактоацидоз және панкреатит жағдайлары болды. Зидовудин АИТВ еміне пайдаланылатын емдеу режимінің бір бөлігі болса, RBV-мен кешенді ем кезінде анемия өршуі мүмкін. Сондықтан зидовудинмен бір мезгілде RBV пайдалану анемия қаупінің артуы салдарынан ұсынылмайды. Біріктірілген антиретровирустық ем (АРВЕ) режимінде зидовудинді ауыстыру мүмкіндігін қарастыру керек. Бұл зидовудинмен индукцияланған анемия анамнезімен белгілі пациенттер үшін айрықша маңызды болар еді.

Айрықша нұсқаулар

Психикалық жағдайға және орталық жүйке жүйесіне (ОЖЖ) әсер етуі. ПегИнтрон® препаратымен емделу кезінде және тіпті ем аяқталған соң, әсіресе, 6 ай ішінде кейбір пациенттерде психикалық статустың күрделі бұзылулары, атап айтқанда, депрессиялар, суицидтік ойлар және суицид әрекеттері байқалды. Озбыр мінез-құлық (кейде басқа адамдарға өлтіру ниеті сипатында бағытталған), биполярлы бұзылыстар, мания, ойлау үдерістерінің бағдардан адасуы мен ментальді статус өзгерісін альфа интерферондарымен емделу кезінде байқауға болады. Осындай жағдайда пациентке психикалық аурулардың қандай да бір белгілері немесе симптомдары тұрғысынан тұрақты бақылау орнатылуы тиіс. Егер ондай симптомдар білінсе, емдеуші дәрігер ондай қолайсыз жағымсыз әсерлердің аса күрделілігін ескеріп, талапқа сай емдік күтіммен қамту қажеттілігін қарастыруы тиіс. Егер психикалық симптомдар басылмаса немесе күшейсе, суицидтік және гомоцидтік ойлар немесе озбыр мінез-құлық білінсе, емдеуді тоқтатуға және пациентке тиісті психиатриялық көмек көрсетуге кеңес беріледі.

Қазіргі уақыттағы психикалық аурулары немесе анамнездегі бұзылыстары бар пациенттер

Қазіргі уақыттағы психикалық аурулары немесе анамнездегі бұзылыстары бар балалар мен жасөспірімдерде PegIFN пайдалану қарсы көрсетілімді («Қолдануға болмайтын жағдайлар» бөлімін қараңыз).

Егер қазіргі уақыттағы психикалық аурулары немесе анамнездегі бұзылыстары бар ересек пациенттерге ПегИнтрон® препаратымен ем қажет деген шешім қабылданса, оны тек тиісті жекеше диагностика жасалған соң және психикалық жағдайын тұрақты бақылаумен бастаған дұрыс.

Интерферондармен емдеу бұрыннан бар немесе анамнезде болған психикалық аурулары, сондай-ақ алкогольдік және есірткілік тәуелділігі бар, СГВ инфекциясын жұқтырған пациенттерде психикалық бұзылыстар симптомдарының өршуіне ықпал етуі мүмкін. Егер осындай бұзылулары бар пациенттерге интерферондармен емдеу қажет болса, сәтті емдеуге жету үшін психикалық бұзылыстарға тиісті ем жүргізіледі. Бұдан бөлек, пациенттердің мінез-құлқына және психикалық бұзылулар симптомдарының жиілігіне жекеше скрининг жасау талабы міндетті болып табылады. Ондай пациенттерге психикалық бұзылыстардың білінуіне немесе дамуына дейін алдын ала ем жүргізу ұсынылады.

Өсу және даму (балалар мен жасөспірімдер үшін). Көпшілік жағдайларда ПегИнтрон® + RBV біріктірілген емінде 3-тен 17 жасқа дейінгі балаларда, болжамалы деректермен салыстырғанда, бой мен салмақ жағынан артта қалу байқалды. Біріктірілген емде интерферон/RBV стандартты дозаларының бой мен салмаққа ықпал етуіне ұзақ мерзімді жүргізілген зерттеулерде бой өсу кідірісі де айғақталады.

Балалар үшін пайда/қауіп арақатынасын жекеше бағалау. Емдеу басталғанша емнен күтілетін пайда клиникалық зерттеулер кезінде балалар мен жасөспірімдер үшін алынған қауіпсіздік деректерімен сәйкестік тұрғысынан тиянақты таразылануы тиіс. Біріктірілген емнің өсу кідірісін туындататынын ескеру маңызды, оның қайтымдылығы әлі күнге түсініксіз. Біріктірілген емді бастау шешімі әрбір жеке жағдайда емдеуді бастар алдында пайда/қауіп арақатынасын бағалап барып қабылдану керек. Ауру ағымына теріс әсер етуі мүмкін сәбидегі ауру сипаттамасын, аурудың үдеуін (бауырдағы қабыну үдерісінің белсенділігі мен фиброздың даму мүмкіндігі), ко-инфекцияны (мысалы, АИТВ), сондай-ақ вирусологиялық жауапты дамытатын болжамалы факторларды, СГВ генотипін және вирустық жүктемені бағалау керек. Мүмкіндігінше, сәбидің келешекте аласа бойлы болу қаупін азайту үшін өсудің пубертаттық күрт өзгерісінен соң емдеген жөн. Емдеудің жыныстық жетілуге ұзақ мерзімді әсер ету деректері жоқ.

Жедел аса жоғары сезімталдық. Аса жоғары сезімталдықтың жедел реакциялары (мысалы, уртикарлы бөртпе, ангионевроздық ісіну, бронх түйілу, анафилаксиялық реакция) интерферон альфа-2b емі кезінде сирек байқалды. Егер ондай реакция ПегИнтрон® препаратымен емделу кезінде туындаса, емдеуді дереу тоқтатып, тиісті ем тағайындау қажет. Уақытша бөртулер емді үзуге себеп бола алмайды.

Жүрек-қантамыр жүйесі. ПегИнтрон® препаратымен емделгенде анамнезінде іркілісті жүрек жеткіліксіздігі, миокард инфарктісі және/немесе аритмиясы бар немесе солардан зардап шегетін пациенттер дәрігердің тұрақты бақылауында болуы тиіс. Осының алдында жүрек бұзылулары болған пациенттерге емге дейін және емдеу курсы кезінде ЭКГ-диагностикасынан өтуге кеңес беріледі. Жүрек аритмиялары (әсіресе, қарыншаүстілік), әдетте, дәстүрлі емдеуге келеді, бірақ ПегИнтрон® препаратымен емдеуді тоқтату қажет болуы мүмкін.

Анамнезінде жүрек аурулары бар балалар мен жасөспірімдерде ПегИнтрон® препаратын қолдану жөнінде деректер жоқ.

Анамнезінде ауыр (күрделі) немесе тұрақсыз кардиологиялық аурулары бар пациенттерге ПегИнтрон® + RBV біріктірілген емі қарсы көрсетілімді.

Бауыр жеткіліксіздігі. ПегИнтрон® бауыр декомпенсациясының даму қаупін және бауыр циррозына шалдыққан пациенттерде өлімді арттырады. Басқа интерферондармен емделу кезіндегідей, бауыр ауруының декомпенсациясын көрсетуі мүмкін гемостаздың бұзылу белгілері білінгенде ПегИнтрон® препаратымен емді тоқтату қажет. ПегИнтрон® препаратымен ем басталған соң 2, 8 және 12 аптада және ем кезінде әр 6 ай сайын сарысулық билирубин, аланинаминотрансфераза (АЛТ), аспартатаминотрансфераза (АСТ), сілтілік фосфатаза (СФ) және лактатдегидрогеназа (ЛДГ) деңгейлерін өлшеу арқылы бауыр функциясын бақылап отыру керек. Ауыр дәрежедегі бауыр жеткіліксіздігі (3 дәреже) немесе бауыр декомпенсациясы (Чайлд-Пью бойынша >6, В және С класы) дамыған жағдайда ПегИнтрон® препаратымен емді тоқтату керек.

Гипертермия. Гипертермияның, әдетте, интерферондармен емделу кезінде білінетін тұмау тәрізді синдроммен байланысты болуы мүмкін кезінде персистирлеуші гипертермияның басқа да болжамды себептерінің бар-жоғын анықтау қажет.

Гидратация. ПегИнтрон® препаратымен емнен өтетін пациенттерде тиісті гидратацияға демеу көрсетілуі тиіс, өйткені альфа интерферондарымен емдеген кейбір пациенттерде сұйықтық жоғалтумен байланысты гипотония байқалды. Жоғалтқан сұйықтық орнын толтыру қажет болуы мүмкін.

Өкпедегі өзгерістер.Қызба, жөтел, ентігу және басқа да респираторлық симптомдар білінген бойда барлық науқастарға кеуде қуысының рентгенографиясын жасаған жөн. Өкпе рентгенограммасында инфильтраттар немесе өкпе функциясының бұзылу белгілері болса, ондай науқастарға аса тиянақты бақылау орнатып, қажет болса, емді тоқтату керек. Емді дереу тоқтату және кортикостероидтармен емдеу өкпе тарапынан болатын жағымсыз құбылыстардың жойылуына алып келеді.

Аутоиммундық аурулар. Интерферон альфамен емделгенде аутоантиденелер пайда болуы білінді. Интерферонмен емделу кезіндегі аутоиммундық аурулардың клиникалық көріністері аутоиммундық бұзылулардың даму қаупі жоғары науқастарда айқын түрде жиірек туындайды.

Интерферонмен емделгенде ССГ бар пациенттерде Фогт-Коянаги-Харада синдромы жағдайлары болды. Осы синдром көзді, есту жүйесін, ми қабығын және теріні зақымдайтын гранулематозды қабыну ауруы болып табылады. Фогт-Коянаги-Харада синдромының симптомдары білінгенде вирусқа қарсы емдеуді тоқтатып, кортикостероидты ем жүргізу мүмкіндігін талқыға салу керек.

Көру мүшелері тарапынан бұзылулар. ПегИнтрон® препаратымен ем кезіндегі кейбір жағдайларда офтальмологиялық бұзылулар, соның ішінде торқабыққа қан құйылу, торқабықтың ошақтық өзгерістері, торқабықтың ажырауы және торқабық артериясының немесе көктамырының обструкциясы дамыған. Пациенттердің бәрі ем басталғанша офтальмологиялық тексеруден өтуі тиіс. Офтальмологиялық шағымдары бар, соның ішінде көру өткірлігі төмендеген немесе көру өрісі шектелген барлық пациенттерді шұғыл түрде толық офтальмологиялық тексеруден өткізу қажет. Торқабық тарапынан осындай жағымсыз реакциялар қатарлас аурулар болғанда жиірек туындайды, сондықтан қант диабетімен немесе артериялық гипертензиямен науқастарға ПегИнтрон® препаратымен ем кезінде мерзім сайын офтальмологиялық тексеруден өту ұсынылады. Офтальмологиялық бұзылулардың бұрынғылары өршігенде немесе жаңалары пайда болғанда ПегИнтрон® препаратымен емді тоқтату керек.

Эндокриндік бұзылулар. Дәрі-дәрмектік заттармен емдеуге келмейтін гипотиреоз және гипертиреоз, қант диабеті сияқты жай-күйлері бар пациенттер ПегИнтрон® препаратын қабылдауды бастамауы тиіс. Емделу кезінде осындай жағдайлары дамыған пациенттер препарат қабылдауды тоқтатуы тиіс.

Метаболизмдік бұзылулар. Ауыр жағдайларға дейін апаратын гипертриглицеридемияның дамуы/үдеуі жөнінде мәліметтер бар, осыған орай, липидограмманы тұрақты бақылау ұсынылады.

АИТВ инфекциясын жұқтырған пациенттерде қолдану

Митохондриялық уыттылық және лактоацидоз. АИТВ ко-инфекциясын жұқтырған және белсенділігі жоғары антиретровирустық ем (БЖAРЕ) алатын пациенттерде лактоацидоздың даму қаупі жоғары. БЖAРЕ еміне ПегИнтрон® + RBV қосылғанда алдын ала сақтану шараларын қадағалау керек (Ребетол® препаратын медициналық қолдану жөніндегі нұсқаулықты қараңыз).

Үдемелі циррозы бар, СГВ/АИТВ ко-инфекциясын жұқтырған пациенттердегі бауыр декомпенсациясы. Үдемелі циррозға шалдыққан және БЖAРЕ курсын алатын СГВ/АИТВ ко-инфекциясын жұқтырған пациенттер бауыр функциясының декомпенсациясы мен өлім қаупі жоғары топта болады. Бір ғана интерферон альфамен немесе RBV-мен біріктіріп қосымша емдеу пациенттердің осы қосалқы тобында қауіпті арттырады. Ко-инфекция жұқтырған пациенттерде бауыр декомпенсациясы қаупін арттыратын басқа факторлар диданозинмен емдеу және сарысу билирубинінің жоғары концентрациясы болып табылады.

АРВЕ де, С гепатиті емін де алатын ко-инфекция жұқтырған пациенттерге мұқият бақылау жүргізіп, Чайлд-Пью шкаласы бойынша бауыр жеткіліксіздігінің ауырлығын бағалау (емделу кезінде) керек. Үдемелі бауыр декомпенсациясы бар пациенттерде С гепатитін вирусқа қарсы емдеуді дереу тоқтатып, ал АРВЕ қайта қарастырылуы тиіс.

СГВ/АИТВ ко-инфекциясын жұқтырған пациенттердегі гематологиялық өзгерістер. СГВ/АИТВ ко-инфекциясын жұқтырған және ПегИнтрон® + RBV емдеу курсын және БЖAРЕ алатын пациенттер, СГВ ғана жұқтырған пациенттермен салыстырғанда, гематологиялық өзгерістердің (нейтропения, тромбоцитопения және анемия) даму қаупі жоғары топта болады. Гематологиялық параметрлердің басым көпшілігінің дозаны азайту жолымен қалыпқа түсуіне қарамастан, пациенттердің осы тобында гематологиялық параметрлерді ұқыпты қадағалап отыру керек.

ПегИнтрон® + RBV пайдаланылатын біріктірілген ем курсынан, сондай-ақ зидовудинмен емдеу курсынан өтетін, анемияның даму қаупі жоғары пациенттерде зидовудинмен осылай біріктіруді бір мезгілде пайдалану ұсынылмайды.

CD4 жасушалар саны төмен пациенттер. СГВ/АИТВ ко-инфекциясын жұқтырған, CD4 жасушалар саны 200 мкл/жасушадан аз пациенттерде вирусқа қарсы біріктірілген ем қолдану тиімділігі мен қауіпсіздігі туралы деректер шектеулі. Сондықтан CD4 жасушалар саны төмен пациенттерді емдегенде алдын ала сақтану шараларын қадағалау ұсынылады. ПегИнтрон® препараты мен RBV уыттылығының күшеюі мен әр препараттың уыттылығын төмендету туралы ақпарат алу үшін С гепатитін вирусқа қарсы емдеу кезінде қабылдауға болатын антиретровирустық дәрілік заттарды медициналық қолдану жөніндегі нұсқаулықты қарау қажет.

Дентальді және периодонтальді бұзылулар. ПегИнтрон® + RBV біріктірілген емін алған пациенттер арасында дентальді және периодонтальді бұзылулардың дамуы хабарланған. Бұл орайда, ұзақ уақыт біріктірілген ем кезінде ауыздың кеберсуі тістерге және ауыздың шырышты қабығына зақымдау әсерін тигізуі мүмкін. Пациенттерге күніне 2 рет тісін мұқият тазалап, стоматологиялық тексеруден жүйелі өтуге кеңес беру керек. Бұдан бөлек, кейбір пациенттерде құсу болуы мүмкін, одан кейін олар ауыз қуысын мұқият шаюы тиіс.

Трансплантаттардың ажырауы. Бауыры немесе басқа ағзаларын ауыстырып салған пациенттерде С гепатитін емдеу үшін ПегИнтрон® + RBV моно- немесе біріктірілген емін қолданудың қауіпсіздігі мен тиімділігі туралы деректер жоқ.

Зертханалық зерттеулер. Барлық пациенттер үшін вирусқа қарсы ем басталғанша стандартты тексерулер: жалпы қан талдауын, биохимиялық қан көрсеткіштерін және қалқанша бездің қызмет атқару тестісін өткізу қажет. ПегИнтрон® препаратымен емдеуді бастауға болатын рұқсатты көрсеткіштер:

Емдеудің 2-ші және 4-ші апталарында, одан кейін клиникалық қажеттілікке қарай мезгіл-мезгіл міндетті түрде зертханалық тексеру өткізілуі тиіс. Емделу кезінде клиникалық көрсетілімдер бойынша СГВ-РНҚ зерттеуін мезгіл-мезгіл жүргізу қажет.

Тұзсыз диетаны қажет ететін пациенттерге арналған ақпарат

ПегИнтрон® құрамында 0.7 мл-ге 1 ммоль-ден аз натрий (23 мг) бар, яғни түптеп келгенде «натрийсіз» болып табылады.

Жүктілік және лактация кезеңі

Егер олар бүкіл емдеу барысында тиімді контрацепция әдістерін пайдаланған жағдайда, ұрпақ өрбіту жасындағы әйелдерде ПегИнтрон® қолдануға болады.

Рибавиринмен біріктірілген ем. RBV-мен біріктіріп ПегИнтрон® қабылдайтын пациент әйелдерде немесе пациент ерлердің жұптастарында жүктіліктен қорғану үшін жоғары алдын ала сақтану шараларын қабылдау қажет. Бала туу жасындағы әйелдер және олардың жұптастары емделу кезінде және ем аяқталған соң 4 ай бойы тиімді контрацепция әдісін пайдалануы тиіс.

Пациент ерлер және олардың жұптас әйелдері емделу кезінде және ем аяқталған соң 7 ай бойы тиімді контрацепция әдісін пайдалануы тиіс (Ребетол® препаратын медициналық қолдану жөніндегі нұсқаулықты қараңыз).

Жүкті әйелдерде интерферон альфа-2b пайдалану жөнінде жан-жақты клиникалық деректер жоқ. Жануарларға жүргізілген зерттеулер тұқым өрбіту функциясына уытты әсер етуін көрсетеді. Интерферон альфа-2b приматтарда түсік туғызатыны анықталған, бұл ПегИнтрон® препараты үшін де жоққа шығарылмайды.

Жүктілік кезінде ПегИнтрон® пайдалануға болмайды. RBV ауыр даму ақауларын туындатады, сондықтан ПегИнтрон® + RBV біріктірілген емі жүктілік кезінде қарсы көрсетілімді.

RBV емшек сүтіне өтуі туралы ақпарат жоқ. Емдеу басталғанша бала емізуді тоқтату керек.

Дәрілік заттың көлік құралын және қауіптілігі зор механизмдерді басқару қабілетіне әсер ету ерекшеліктері

ПегИнтрон® препаратымен емделгенде қалжырау, ұйқышылдық немесе сананың шатасуы болуы мүмкін екеніне байланысты, көлік құралы мен күрделі техниканы басқаруға кеңес берілмейді.

Артық дозалануы

Ұсынылған дозасынан 10.5 есе асып кететін артық дозалану туралы хабарламалар алынған. Артық дозаланудың ауыр симптомдары туралы деректер алынбаған. Жағымсыз құбылыстар өздігінен басылған және емдеу курсын тоқтатуды талап етпеген.

Артық дозалану жағдайында тұрақты дәрігерлік бақылаумен симптоматикалық ем жүргізіп, өмірлік маңызды ағзалар функциясына мониторинг өткізу керек.

Шығарылу түрі және қаптамасы

Инъекция үшін ерітінді дайындауға арналған лиофилизацияланған ұнтақ еріткішпен жиынтықта (инъекцияға арналған су) 50 мкг/0.5 мл, 80 мкг/0.5 мл, 100 мкг/0.5 мл, 120 мкг/0.5 мл және 150 мкг/0.5 мл .

Сұр бутилденген каучук тығынмен және сырт ететін полипропилен дискісі бар алюминий қалпақшамен герметикалық тығындалған сыйымдылығы 2 мл 1 типті шыны құтыдағы ұнтақ.

Еріткіш (инъекцияға арналған су) 0.7 мл ампулада.

1 құтыдан және еріткіші бар ампуладан фольгасыз ПВХ-дан жасалған пішінді ұяшықты қаптамаға салынады.

Ұяшықты 1 қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапқа салады.

Сақтау мерзімі және шарттары

2 °С-ден 8 °С-ге дейінгі температурада сақтау керек.

Дайындалған ерітіндіні бірден пайдалану мүмкін болмағанда, оны 24 сағаттан асырмай 2 °С-ден 8 °С-ге дейінгі температурада сақтауға болады.

Балалардың қолы жетпейтін жерде сақтау керек.

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Шеринг-Плау (Бринни) Компани, Ирландия

Қаптаушы

Шеринг-Плау Лабо Н.В., Бельгия

Тіркеу куәлігінің иесі

Шеринг-Плау Сентрал Ист АГ, Швейцария

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын, дәрілік заттың тіркеуден кейінгі қауіпсіздігін қадағалауға жауапты ұйымның мекенжайы:

Қазақстандағы Шеринг-Плау Сентрал Ист АГ компаниясының өкілдігі, Алматы қ., Достық д-лы, 38, «Кең дала» бизнес орталығы, 3 қабат

Тел. +7 (727) 330-42-66, +7 (727) 259-80-84

Факс +7 (727) 259-80-90

е-mail: dpoccis2@merck.com, pharmacovigilance.ukraine&cis@merck.com