ПегИнтрон® (150 мкг/0,5 мл, МСД Интернешнл ГмбХ (филиал в Сингапуре))

• русский
• қазақша

• Скачать инструкцию медикамента

Саудалық атауы

ПегИнтрон®

Халықаралық патенттелмеген атауы

Пегинтерферон альфа-2b

Дәрілік түрі

Инъекция үшін ерітінді дайындауға арналған 50 мкг/0.5 мл, 80 мкг/0.5 мл, 100 мкг/0.5 мл, 120 мкг/0.5 мл және 150 мкг/0.5 мл лиофилизацияланған ұнтақ еріткішпен (инъекцияға арналған су) жиынтықта.

Құрамы

Бір еккіш-қаламның (CLEARCLICK) ішінде

белсенді зат - 50 мкг/0.5 мл, 80 мкг/0.5 мл, 100 мкг/0.5 мл, 120 мкг/0.5 мл немесе 150 мкг/0.5 мл пегинтерферон альфа-2b

қосымша заттар: сусыз динатрий гидрофосфаты, натрий дигидрофосфаты, сахароза, полисорбат 80

еріткіш - инъекцияға арналған су.

Сипаттамасы

Ақ немесе ақ дерлік түсті лиофилизацияланған ұнтақ.

Еріткіш - иісі мен дәмі жоқ мөлдір түссіз сұйықтық.

Қалпына келтірілген ерітінді - көзге көрінетін механикалық қосылыстардан бос мөлдір түссіз ерітінді.

Фармакотерапиялық тобы

Иммуностимуляторлар. Интерферондар. Пегинтерферон альфа-2b.

АТХ коды L03AB10

Фармакологиялық қасиеттері

Фармакокинетикасы

Пегинтерферон альфа-2b (PegIFN) жақсы зерттелген пегилирленген (яғни, полиэтиленгликольмен қосылған) интерферон альфа-2b туындысы болып табылады, негізінен, монопегилирленген молекулалардан тұрады. Қан плазмасынан PegIFN жартылай шығарылу кезеңі пегилирленбеген интерферон альфа-2b жартылай шығарылу кезеңінен асып кетеді. PegIFN интерферон альфа-2b босап шығуымен депегилирленуі мүмкін. Пегилирленген изомерлердің биологиялық белсенділігі сапалық тұрғыда бос интерферон альфа-2b биологиялық белсенділігіне ұқсас, бірақ одан біршама әлсіздеу. Теріастына енгізгеннен кейін сарысулық концентрациясы жоғары шегіне 15-44 сағат өткенде жетеді және 48-72 сағат бойы сақталады. PegIFN қан плазмасындағы ең жоғары концентрациясы (Cmax) және «концентрация-уақыт» қисығы астындағы ауданы (AUC) дозаға пропорционал артады. Таралу көлемі, орта есеппен, 0.99 л/кг құрайды. Қайталап қолданғанда иммунореактивті интерферондар жинақталуы жүреді. Алайда биологиялық белсенділігінің артуы болымсыз. PegIFN жартылай шығарылу кезеңі, орта есеппен, 40 сағатқа жуық (диапазоны 22-60 сағат), жалпы клиренсі – 22.0 мл/сағ./кг. Интерферондардың клиренс механизмдері толық сипатталмаған. Дегенмен, бүйрек клиренсі бөлігі PegIFN жалпы клиренсінің 30% жуығын құрайтыны белгілі.

Бүйрек функциясы Бүйрек функциясы бұзылған емделушілерде бір рет қолданғанда (1.0 мкг/кг) Cmax, AUС және жартылай шығарылу кезеңінің бүйрек жеткіліксіздігі дәрежесіне пропорционал артуы анықталды. PegIFN бірнеше рет енгізілгенде (1 мкг/кг, теріастына, 4 апта бойы аптасына 1 рет) препарат клиренсі ауырлығы орташа бүйрек жеткіліксіздігі (креатинин клиренсі 30-49 мл/мин) бар емделушілерде орта есеппен 17%, ал бүйрек жеткіліксіздігі ауыр (креатинин клиренсі 10-29 мл/мин) емделушілерде, бүйрек функциясы қалыпты тұлғалармен салыстырғанда, 44% төмендеген. Клиренс бүйрек жеткіліксіздігі ауыр, гемодиализде жүрмеген емделушілерде және гемодиализ алған емделушілерде бірдей күйде қалған. Осы деректерді ескеріп, бүйрек жеткіліксіздігі орташа және ауыр емделушілерде монотерапия кезінде PegIFN дозасын азайту қажет.

PegIFN және рибавирин (RBV) препараттарымен біріктірілген ем креатинин клиренсі 50 мл/мин аз емделушілерге қарсы көрсетілімді («Қолдануға болмайтын жағдайлар» бөлімін қараңыз).

Бауыр функциясы. PegIFN фармакокинетикасы ауырлығы орташа және ауыр дәрежедегі бауыр жеткіліксіздігінде зерттелмеген.

65 жастан асқан егде жастағы емделушілер. PegIFN фармакокинетикасы 1.0 мкг/кг дозада теріастына бір рет қолданылғанда жас ерекшелігіне тәуелденбеген, сондықтан егде жастағы адамдарда дозаны түзету қажет емес.

Балалар жасы. Теріастына аптасына 60 мкг/м² дозада PegIFN қабылдайтын, созылмалы С гепатитінен (ССГ) зардап шеккен 3-тен 17 жасқа дейінгі балаларда белсенді зат пен метаболиттер экспозициясы, тері астына аптасына 1.5 мкг/кг қабылдайтын ересек емделушілердегіден 50% жоғары екені анықталған.

Фармакодинамикасы

ПегИнтрон® – бұл рекомбинантты интерферон альфа-2b және монометоксиполиэтиленгликоль ковалентті коньюгаты. Рекомбинантты интерферон альфа-2b құрамында адам лейкоциттерінің альфа-2b интерферонын кодтайтын генді-инженерлік плазмидті гибрид болатын E.coli клонынан алынады. ПегИнтрон® препаратының биологиялық белсенділігін PegIFN жүзеге асырады. Интерферондардың жасушалық әсерлері жасушалар беткейіндегі спецификалық рецепторлармен байланысуымен шартталған. Жасуша қабығымен байланысып, интерферон жасушаішілік реакциялар тізбегіне, соның ішінде белгілі бір ферменттер индукциясына түрткі болады. Бұл үдеріс интерферондардың әртүрлі жасушалық әсерлеріне ұйытқы болады, бұған жұқпаланған жасушалардағы С гепатиті вирусы (СГВ) репликациясының бәсеңдеуі, жасушалардың пролиферация тежелісі және макрофагтардың фагоцитарлық белсенділігі мен лимфоциттердің нысана-жасушаларға қатысты спецификалық цитоуыттылығының күшеюі сияқты иммунитет түрлендіргіш қасиеттер қосылады. Осы әсерлердің кез келгені немесе барлығы интерферонның емдік белсенділігіне ұйытқы бола алады. Рекомбинантты интерферон альфа-2b вирусқа қарсы әсер етуінің нақты механизмі белгісіз болса да, препарат вирусы бар жасушалар метаболизмін өзгертеді деп жорамалданады. Бұл СГВ репликациясының бәсеңдеуіне әкеледі, соның нәтижесінде түзілген вириондар жасушадан шығып кетуге қабілетсіз.

Қолданылуы

Рибавиринмен біріктіріп емдеу

- клиникалық ағымы тұрақты, компенсацияланған циррозы және/немесе адамның иммунитет тапшылығы вирусының (АИВ) ко-жұқпасын жұқтырған емделушілерді қоса, С гепатиті вирусы РНҚ (СГВ-РНҚ) позитивті ересектер мен 3 жастан асқан балалардағы созылмалы С гепатитінде, сонымен қатар осының алдында интерферон альфамен (пегилирленбеген немесе пегилирленген интерферонмен) және рибавиринмен біріктіріп емдеу тиімсіз болғанда немесе интерферон альфамен монотерапия тиімсіз болғанда

Монотерапия (тек рибавирин көтере алмаушылықта немесе оны қолдануға қарсы көрсетілімдерде)

- бұрын интерферон альфамен емделмеген ересектердегі созылмалы С гепатитінде

 

Қолдану тәсілі және дозалары

Созылмалы С гепатиті

ПегИнтронды® теріастына инъекция салумен аптасына бір рет енгізген жөн. Ересектерге енгізілген доза препараттың RBV-мен біріктіріліп немесе монотерапия ретінде пайдаланылуына байланысты.

ПегИнтрон® + RBV біріктірілген емі

RBV екі қабылданатын (таңертең және кешке) ас ішумен бірге күнделікті қабылдану қажет. Креатинин клиренсі <50 мл/мин емделушілерді емдеу үшін RBV қабылдауға болмайды.

Ересектер

ПегИнтрон® препаратының ұсынылатын дозасы 800-1400 мг мөлшеріндегі RBV-мен біріктірілген теріастына инъекция түрінде аптасына 1.5 мкг/кг құрайды. Біріктірілген емде RBV тәуліктік дозасы дене салмағына қарай есептеледі (1 кесте).

1 кесте. Ересектерге арналған біріктірілген емде ұсынылатын ПегИнтрон® + RBV препаратының дозалары

Алғашқы емделушілердің (бұрын PegIFN қабылдамаған) емдеу ұзақтығы. Тұрақты вирусологиялық жауап (ТВЖ) предикторлары

1 генотипті вирус жұқтырған емделушілерде ем тиімділігі жеткіліксіз болғанда (емдеудің 4-ші және 12-ші аптасында қандағы СГВ-РНҚ деңгейінің төмендеуі <2 log құраған), ТВЖ жету ықтималдығы төмен. Мұндай жағдайларда емдеуді тоқтату мәселесін қарастыру мақсатқа сай.

1 генотип

- оң динамика болғанда (емдеудің 12-ші аптасында СГВ-РНҚ қанда анықталмайды) емдеу курсын 48 аптаға дейін жалғастыру қажет.

- емдеудің 12-ші аптасында СГВ-РНҚ деңгейі бастапқысынан 2 log төмендегенде, емдеудің 24-ші аптасында теріс тест нәтижелерінде толық емдеу курсын 48 апта бойы жалғастыру қажет. Егер СГВ-РНҚ емдеудің 24-ші аптасында анықталса, емдеу курсын тоқтату мүмкіндігін қарастыру керек.

- емдеудің 4-ші және 24-ші аптасында СГВ-РНҚ анықталмайтын бастапқы вирус жүктемесі төмен (< 600 000 ХБ/мл) 1 генотипті СГВ жұқтырған емделушілерде 24 апталық курспен шектелуге немесе емді 48 аптаға дейін жалғастыруға болады. Алайда, 24 апта бойы емделу ұзақтығы, 48 апталық емдеу курсымен салыстырғанда, қайталанудың жоғары қаупімен байланысты болуы мүмкін.

2 немесе 3 генотиптері

24 апталық емдеу курсы 2 немесе 3 генотипті СГВ жұқтырған емделушілерге ұсынылады.

48 апталық емдеу курсы СГВ (2 немесе 3 генотип) және АИВ ко-жұқпасын жұқтырған емделушілерге ұсынылады.

4 генотип

4 генотипті СГВ жұқтырғанда емдеу едәуір қиын болады деп саналады. Шектеулі клиникалық зерттеулер негізінде (n = 66) 1 генотипті вирус жұқтырған емделушілерге арналғандай емдеу нысанасын ұстануға кеңес беріледі.

СГВ/АИВ ко-жұқпасы бар емделушілерді емдеу ұзақтығы

СГВ/АИВ ко-жұқпасын жұқтырған емделушілерге ұсынылатын емдеу ұзақтығы генотипіне байланыссыз 48 аптаға тең.

СГВ/АИВ ко-жұқпасы бар емделушілерді емдеудің тиімділік/тиімсіздік предикторлары

РНҚ концентрациясының анықталмауымен немесе вирустық жүктеменің бастапқысынан 2 log аса төмендеуімен сипатталатын ерте вирусологиялық жауап (ЕВЖ) жағымды болжамалы ТВЖ факторы болып табылады.

Алдыңғы ем тиімсіз болғанда ПегИнтрон® + RBV біріктірілімімен қайталап емдеу ұзақтығы

Емдеудің 12-ші аптасында СГВ-РНҚ тестісінің теріс нәтижесіне жеткен емделушілердің бәрі, вирус генотипіне қарамастан, қайталанатын 48 апталық емдеу курсынан өтуі тиіс.

Қайта емдеу курсын алатын ауруы қайталанатын емделушілердегі ем тиімділігінің предикторлары

- ЕВЖ (12 апта өткенде вирустық жүктеменің кем дегенде 2 log төмендеуі немесе СГВ-РНҚ элиминациясы) ТВЖ болжануына мүмкіндік береді. Алдыңғы пегилирленбеген интерферон емінен кейінгі қайталануымен, 1 және 4 генотипті вирусқа шалдыққан емделушілерде, ПегИнтрон® препаратымен қайта емдеу курсының 12-ші аптасында ЕВЖ жету шартымен, ТВЖ 73% жиілікке жетті.

- емнің 12-ші аптасында вирустық жүктеменің анықталмайтын деңгейі 37% емделушіге тән. Емделушілердің осы тобында ТВЖ жету жиілігі 57% құрады.

- емнің 12-ші аптасында ЕВЖ жетпеген емделушілердің ТВЖ жету мүмкіндігі тіптен төмен. Мұндай емделушілерге PegIFN + RBV емдеу курсын тоқтату және емдік әдісін ауыстыру мәселесін қарастыру керек.

Стандартты емге жауап бермеген 1 генотипті емделушілер үшін 48 аптадан асып кететін PegIFN + RBV біріктірілген емінің ұзақтығы зерттелмеген.

Педиатрияда қолдану

ПегИнтрон® препаратының дозасын есептеу 3-тен 17 жасқа дейінгі балаларда дене беткейі ауданына сәйкес, ал RBV – дене салмағына сәйкес жүргізіледі. ПегИнтрон® препаратының ұсынылатын дозасы ас ішумен 2 қабылданатын (таңертең және кешке) тәулігіне 15 мкг/кг RBV ішке қабылдаумен біріктіріліп аптасына теріастына 60 мкг/м2 құрайды.

ПегИнтрон® + RBV препараттарымен емделу кезінде 18 жасқа толған емделушілер препаратты педиатриялық дозаларда қабылдауды жалғастыруы тиіс.

Емдеу ұзақтығы

1 генотип

Ұсынылатын емдеу ұзақтығы 48 аптаға тең. 12 аптада ЕВЖ болмаса, ТВЖ ықтималдығы төмен. Егер СГВ-РНҚ мөлшері 12-ші аптада бастапқы деңгейінен 2 log10 мәнінен аз төмендеген жағдайда немесе емнің 24 аптасында позитивті СГВ-РНҚ тестісінде балалар мен жасөспірімдердегі ПегИнтрон® + RBV біріктірілген емін тоқтату ұсынылады.

2 немесе 3 генотип

Ұсынылатын емдеу ұзақтығы 24 апта құрайды.

4 генотип

Ұсынылатын емдеу ұзақтығы 48 аптаға тең. 12 аптада ЕВЖ болмаса, ТВЖ ықтималдығы төмен. Егер СГВ-РНҚ мөлшері 12-ші аптада бастапқы деңгейінен 2 log10 мәнінен аз төмендеген жағдайда немесе егер емдеудің 24 аптасында СГВ-РНҚ әлі анықталмаған болса, балалар мен жасөспірімдердегі ПегИнтрон® + RBV препаратымен біріктіріп емдеуді тоқтату ұсынылады.

ПегИнтрон® препаратымен монотерапия

ПегИнтрон® 1 жыл бойы аптаның белгілі бір күнінде аптасына бір рет 0.5 немесе 1.0 мкг/кг дозада теріастына енгізіледі. ПегИнтрон® препаратының еккіш-қаламдағы ең төмен қолжетімді концентрациясы 50 мкг/0.5 мл құрайды, сондықтан егер емделушіге аптасына 0.5 мкг/кг дозада тағайындалса, оны 2 кестеде көрсетілген көлемге дейін жеткізген жөн. 1.0 мкг/кг дозаны алу үшін осыған ұқсас көлеммен түзетуге немесе 2 кестеде көрсетілгендей препараттың басқа дозалануын пайдалануға болады. ПегИнтрон® препаратымен монотерапия СГВ/АИВ ко-жұқпасын жұқтырған емделушілерде зерттелмеген.

2 кеcте. Монотерапияда ұсынылатын ПегИнтрон® дозалары.

Емдеу ұзақтығы

12 аптада ЕВЖ жеткен емделушілерде емдеуді тағы үш ай бойы (24 апта) жалғастырған жөн. Емдеу курсын бір жылға дейін жалғастыру туралы шешім болжамалы факторлар (мысалы, генотип, 40-тан асқан жас, ер жыныс, көпір түріндегі бауыр фиброзы) негізделіп қабылдану керек.

Дозаны түзету туралы нұсқаулар

ПегИнтрон® препаратын немесе ПегИнтрон® + RBV қолдану кезінде күрделі жағымсыз құбылыстар немесе зертханалық көрсеткіштердегі ауытқулар пайда болғанда препараттар дозасын түзету немесе жағымсыз құбылыстар басылғанша қабылдауды тоқтату керек.

3 кестеде зертханалық көрсеткіштер негізінде дозалануын өзгертуге немесе емдеуді тоқтатуға қатысты нұсқаулар берілген.

3 кесте. RBV біріктіріп емдеу кезінде зертханалық параметрлеріне қарай дозаларын азайтудың негізгі қағидалары

4 кесте. Балалар мен жасөспірімдер үшін RBV дозасын азайту

Балалар мен жасөспірімдер үшін ПегИнтрон® препаратының дозасын бірінші азайту аптасына 40 мкг/м2 құрайды, дозаны екінші азайту аптасына 20 мкг/м2 құрайды.

ПегИнтрон® препаратының дозасын азайтуды ересектерде тағайындалған көлемді азайту арқылы немесе 5 кестеде көрсетілгендей модификациялау жолымен ең төмен дозалық концентрациясын пайдаланып атқаруға болады.

5 кесте. Ересектердегі біріктірілген емде ПегИнтрон® препаратының дозасын екі сатылы азайту

* Құтыны пайдалану қажет. Еккіш-қаламмен (CLEARCLICK) енгізуге арналған ең төмен дозасы 0.2 мл тең

6 кестеде ересектердегі ПегИнтрон® препаратымен монотерапияда дозаны азайту туралы нұсқаулар берілген.

6 кесте. Ересек емделушілер монотерапиясында зертханалық параметрлерге қарай ПегИнтрон® препаратының дозасын азайтуға қатысты нұсқаулар

ПегИнтрон® препаратымен монотерапияда 0.5 мкг/кг дозаны пайдаланатын ересек емделушілерде доза бастапқысынан 50% азайтылуы тиіс. Мүмкіндігінше, 50 мкг/0.5 мл құтыны пайдалану қажет, өйткені еккіш-қаламмен (CLEARCLICK) ең төмен 0.2 мл көлемді ғана енгізуге болады.

ПегИнтрон® препаратымен монотерапияда 1.0 мкг/кг дозаны пайдаланатын ересек емделушілерде доза 50% азайтылуы немесе 7 кестеде көрсетілген төмендеу концентрациядағы дозалары пайдаланылуы тиіс.

7 кесте. Ересектердегі монотерапияда 1.0 мкг/кг қабылдау кезінде ПегИнтрон® препаратының дозасын азайту

Инъекцияға арналған ерітінді дайындау жөніндегі нұсқаулық

Еккіш-қаламдардағы (CLEARCLICK) ПегИнтрон®

Еккіш-қалам белсенді затқа арналған камерада стерильді лиофилизацияланған PegIFN және еріткішке арналған камерасында инъекция үшін стерильді суы бар екі камералы шыны картриджден құралады. Сыртынан қарағанда, шыны картриджде болатын ПегИнтрон® препараты таблетка пішінді немесе кесектер әлде ұнтақ түріндегі ақтан ақ дерлік түске дейінгі қатты зат сипатында болады.

Еккіш-қаламды (CLEARCLICK) пайдалану жөніндегі толық және иллюстрациялық нұсқауды медицинада қолданылуы жөніндегі нұсқаулықтың Қосымшасынан қараңыз.

Пайдаланар алдында ПегИнтрон® препаратын (алдын ала толтырылған еккіш-қалам (CLEARCLICK) тоңазытқыштан шығарып, еріткіш бөлме температурасында (25°С-ден аспайтын) болғанша күте тұру керек.

АРАЛАСТЫРУ ҮШІН ЕККІШ-ҚАЛАМДЫ СІЛКІМЕҢІЗ! Ішіндегіні араластыру үшін еккіш-қаламды жоғары-төмен екі рет абайлап аударыстырыңыз.

Қалпына келтірілген ерітінді бір теріастылық инъекцияға арналған 50 мкг/ 0.5 мл, 80 мкг/0.5 мл, 100 мкг/0.5 мл, 120 мкг/0.5 мл немесе 150 мкг/0.5 мл концентрацияда болады.

Препаратты енгізер алдында ерітіндінің қатты қоспалары немесе түс өзгерісінің бар-жоғын қарап тексеріңіз. Қалпына келтірілген ерітінді мөлдір және түссіз болуы тиіс. Егер ол мөлдір болмаса, түсі өзгерсе немесе көрінетін бөлшектері болса, ерітіндіні пайдаланбаңыз.

Қаламды тігінен төмен қарата ұстап, қоса берілген инені бекітіңіз және препараттың қажетті дозалануын таңдаңыз, дискісін күңгірт жолақтар пайда болғанша бұрап, күңгірт жолақ қажетті дозасымен тұспа-тұс келгенше дискіні бұрыңыз. ПегИнтрон® препаратының дайындалған ерітіндісі дененің кез келген бөлігіне – іш, сан, қол терісінің астына енгізіледі.

ПегИнтрон® еккіш-қаламы (CLEARCLICK) бір рет қолдануға арналған және құрамында консерванттар жоқ. Қалпына келтірілген ерітінді дереу пайдаланылуы тиіс және 2 °С-ден 8 °С-ге дейінгі температурада 24 сағаттан асырмай сақтауға болады.

ЕККІШ-ҚАЛАМ (CLEARCLICK) ҚАЙТА ПАЙДАЛАНЫЛМАЙДЫ. ЕККІШТЕГІ ПРЕПАРАТТЫҢ ПАЙДАЛАНЫЛМАҒАН ҚАЛДЫҒЫН ТАСТАУ КЕРЕК.

Жағымсыз әсерлері

Жиілігі өте жиі (≥1/10), жиі (≥1/100-ден <1/10 дейін), жиі емес (≥1/1000-нан <1/100 дейін), сирек (≥1/10000-нан <1/1 000 дейін), өте сирек (<1/10000) немесе белгісіз (қолжетімді деректер бойынша бағалауға келмейтін) болып белгіленген.

Ересектерде

ПегИнтрон® препаратымен монотерапия және RBV біріктірілімінде

Жағымсыз құбылыстардың көпшілігі жеңіл немесе орташа ауырлықта болды және емді өзгертуді талап етпеді.

Өте жиі (≥1/10)

- қажу, қалтырау, гипертермия, астения, тұмау тәрізді жағдай

- артралгия, миалгия, бұлшықет-қаңқа ауруы

- вирустық жұқпа*, фарингит*

- бас ауыру, бас айналу, зейін шоғырландырудың төмендеуі, депрессия, үрейлену, ашушаңдық, эмоциялық құбылу*, ұйқысыздық, ауырулар

- ауыз кеберсуі*, құсу*, жүрек айну, іш тұсындағы ауыру, диарея

- анорексия, дене салмағының кемуі

- диспноэ*, жөтел*

- алопециялар, қышыну*, терінің құрғауы*, бөртпе*

- анемия, нейтропения

- қабыну және инъекция жасалған жердегі реакциялар

Жиі (≥1/100, <1/10)

- дімкәстану, шөлдеу, әдеттен тыс сезімдер

- бактериялық жұқпа (сепсисті қоса), зеңді жұқпа, тұмау, қарапайым герпес, бронхит, жоғарғы тыныс жолдарының жұқпалары

- озбыр мінез-құлық, ажитация, ызақорлық, көңіл-күй өзгерістері, мінез-құлық бұзылысы, күйгелектік, ұйқының бұзылуы, либидо төмендеуі, апатия, шым-шытырық түстер көру, жылауықтық, амнезия, есте сақтаудың төмендеуі, естен танулар, бас сақинасы, атаксия, сананың шатасуы, невралгия, парестезия, гипостезия, гиперстезия, ұйқышылдық, зейіннің нашарлауы, тремор, дисгевзия

- тіс аурулары, қызыл иектердің қанағыштығы және қабынуы, стоматит, ауыз қуысының ойық жаралануы, глоссит, глоссалгия, хейлит

- диспепсия, гастроэзофагеальді рефлюкс ауруы, іш қату, метеоризм, геморрой, іштің кебуі

- дисфония, мұрыннан қан кету, респираторлық бұзылулар, тыныс жолдарының обструкциясы, синус бітелісі, мұрынның бітелуі, ринорея, кеуде қуысы аумағындағы жайсыздану мен ауыру, жоғарғы тыныс жолдарында секрецияның ұлғаюы, тамақтың немесе көмейдің ауыруы, синусит, ортаңғы отит, ринит

- гипотиреоз, гипертиреоз

- гипокальциемия, гиперурикемия, дегидратация, гемолитикалық анемия, лейкопения, тромбоцитопения, лимфаденопатия

- тәбеттің артуы

- көрудің нашарлауы, анық көрмеу, жарықтан қорқу, конъюнктивит, көздің тітіркенуі, көз жасы бездері функциясының бұзылуы, көздің ауыруы, көздің құрғауы

- естудің нашарлауы/естімей қалу, құлақтың шыңылдауы, вертиго

- пальпитация, тахикардия, гипотензия, гипертензия, тері жабындарын қан кернеу

- гипербилирубинемия, гепатомегалия

- псориаз, фотосезімталдық реакциялары, макулопапулезді бөртпе, дерматит, эритематозды бөртпе, экзема, түнгі тер, гипергидроз, акне, фурункулдар, эритема, есекжем, шаш құрылымының бұзылуы, тырнақ құрылымының бұзылуы

- артрит, арқаның ауыруы, бұлшықеттердің түйілуі, аяқ-қолдың ауыруы

- несеп шығарудың жиілеуі, полиурия, несеп құрамының өзгеруі

- аменорея, сүт бездеріндегі ауыру, меноррагия, етеккір оралымының бұзылыстары, аналық бездер аурулары, қынап аурулары, жыныстық дисфункция, простатит, эректильді дисфункция

- инъекция жасалған жердің ауыруы, беттің ісінуі, шеткергі ісінулер

Жиі емес (≥1/1 000, <1/100)

- инъекция жасалған жердегі жұқпа, төменгі тыныс жолдарының жұқпасы

- дәрілік препараттарға аса жоғары сезімталдық реакциясы

- қант диабеті, гипертриглицеридемия

- психоз, елестеулер, үрейлі ұстама, суицидтік ойлау, суицид әрекеті, суицид

- невропатия, шеткергі невропатия, құлақтың ауыруы

- ретинальді экссудаттар

- миокард инфарктісі

- панкреатит, ауыз қуысындағы ауыру

- сүйектердің ауыруы, бұлшықет әлсіздігі

Сирек (≥1/10000, <1/1000)

- саркоидоз, тері саркоидозы

- іркілісті жүрек жеткіліксіздігі, кардиомиопатия, аритмия, перикардит, васкулит

- ишемиялық колит

- торқабыққа қан құйылу, ретинопатия, торқабық артериялары немесе көктамырларының тромбозы, көру өткірлігінің төмендеуі немесе көру ауқымының шектелуі, көру жүйкесінің невриті, көру жүйкесі дискісінің ісінуі, макула ісінуі

- биполярлы бұзылыстар, конвульсиялар

- рабдомиолиз, миозит, ревматоидты артрит

- бүйрек жеткіліксіздігі

- диабеттік кетоацидоз

- инъекция жасалған жердегі некроз

Өте сирек (<1/10000)

- апластикалық анемия

- цереброваскулярлы қан кету, цереброваскулярлы ишемия, энцефалопатия

- жүрек ишемиясы

- интерстициальді пневмония

- спецификалық емес ойық жаралы колит

- Стивенс-Джонсон синдромы, уытты эпидермалық некролиз, полиморфты эритема

Белгісіз (жиілігі қолда бар деректер бойынша анықталмайды)

- шынайы эритроцитарлы аплазия, идиопатиялық тромбоцитопениялық пурпура, тромбоздық тромбоцитопениялық пурпура, жүйелі қызыл жегі

- аса жоғары сезімталдықтың жедел реакциялары, ангионевротикалық ісінуді, анафилаксияны, анафилактикалық реакцияларды, анафилактикалық шокты қоса

- гомицидті ойлау, маниялар, бет жүйкесінің салдануы, мононевропатиялар

- экссудаттық перикардит

- торқабықтың серозды ажырауы

- өкпе фиброзы

*Аталған жағымсыз реакциялар монотерапияда ПегИнтрон® алған емделушілер тобындағы клиникалық сынақтарда жиі (≥1/100-ден <1/10 дейін) байқалды.

Ұсынылған дозаларында ПегИнтрон® препаратымен монотерапия қолданылғанда нейтропения мен тромбоцитопения жағдайларының көпшілігі жеңіл дәрежеде сипатталды, бірақ RBV біріктірілімінде нейтропенияның аса ауыр жағдайлары байқалды.

Суицидтік ойларға және суицид әрекеттеріне дейін апаратын өмірге қатерлі психикалық бұзылыстар жағдайлары ПегИнтрон® препаратымен монотерапия кезінде де, ПегИнтрон® препараты + RBV біріктірілімінде де шамамен 1.2% емделушідегі клиникалық зерттеулер барысында байқалды.

Аритмия жағдайлары осының алдында болған жүрек-қантамыр ауруымен және кардиоуытты препараттармен алдыңғы емдеумен өзара байланысты болды.

Кардиомиопатияның сирек жағдайлары сыртартқыдағы жүрек-қантамыр аурулары бар емделушілерде байқалған.

Альфа интерферондар пайдаланылғанда тиреоидит, жүйелі қызыл жегі, ревматоидты артрит, идиопатиялық немесе тромбоздық тромбоцитопениялық пурпура, васкулит, нейропатия, мононейропатия мен Фогт-Койянаги-Харада синдромын қоса, әртүрлі аутоиммундық және иммунитетке байланысты аурулар болды.

СГВ/АИВ ко-жұқпасын жұқтырған емделушілер

СГВ/АИВ ко-жұқпасын жұқтырған және ПегИнтрон® + RBV алған емделушілер үшін, моножұқпа жұқтырған емделушілерде білінген жағымсыз әсерлерімен қатар, 5%-дан көп жиілікте мыналар байқалды:

- ауыз қуысының кандидозы (14%)

- жүре пайда болған липодистрофия (13%)

- CD4 лимфоциттер санының азаюы (8%)

- тәбеттің төмендеуі (8%)

- гамма-глутамилтранспептидаза белсенділігінің жоғарылауы (9%)

- арқаның ауыруы (5%)

- қан амилазасы деңгейінің артуы (6%)

- қанда сүт қышқылы деңгейінің жоғарылауы (5%)

- цитолитиктік гепатит (6%)

- липаза деңгейінің жоғарылауы (6%)

- аяқ-қолдардың ауыруы (6%)

Митохондриялық уыттылық

Митохондриялық уыттылық және сүт қышқылды ацидоз сызба бойынша кері транскриптазаның нуклеозидті тежегіштерімен (КТНТ) ем алған СГВ/АИВ ко-жұқпасын жұқтырған емделушілерде ПегИнтрон® + RBV препаратымен емделу кезінде байқалды.

СГВ/АИВ ко-жұқпасын жұқтырған емделушілердегі клиникалық-зертханалық тестілер деректері

СГВ/АИВ ко-жұқпасын жұқтырған емделушілерде нейтропения, тромбоцитопения мен анемия жағдайлары жиірек кездессе де, дозалануын түзету емді мерзімінен бұрын тоқтатпауға мүмкіндік берді. Гематологиялық ауытқулар ПегИнтрон® + RBV алған емделушілерде, интерферон альфа-2b + RBV алатын емделушілермен салыстырғанда, жиірек білінді.

CD4 лимфоциттер санының азаюы

ПегИнтрон® + RBV препаратымен емделу алғашқы 4 апта ішінде CD4+ жасушалардың пайыздық арақатынас төмендеуінсіз CD4+ жасушалардың абсолютті санының азаюына әкелді. CD4+ жасушалар санының төмендеуі дозаны азайтудан немесе емді тоқтатудан соң қайтымды болады. ПегИнтрон® + RBV емделу кезінде немесе кейінгі медициналық бақылау кезеңінде АИВ вирусемиясы деңгейіне елеулі ықпалын тигізбейді.

Уыттылығы туралы ақпарат алу үшін тиісті антиретровирустық препараттарды қолдану жөніндегі нұсқаулықты меңгеру қажет.

Балалар мен жасөспірімдерде

Жалпы, балалар мен жасөспірімдердегі жағымсыз реакциялар бейіні ересектерде байқалуымен ұқсас болды, дегенмен балалардағы өсудің баяулау әсері қазіргі уақытта жеткіліксіз зерттелген, осы жағымсыз әсердің қайтымдылығы белгісіз. Кідіріс пубертатты жастағы балаларда көбірек байқалымды болды

Өте жиі (≥1/10)

- анемия, лейкопения, нейтропения

- анорексия, тәбеттің төмендеуі

- бас ауыру, бас айналу

- іш аумағындағы ауыру, іштің жоғарғы бөлігінің ауыруы, құсу,

жүрек айну

- алопециялар, терінің құрғауы

- миалгия, артралгия

- инъекция жасалған жердің қызаруы

- қажу, гипертермия, қалтырау, тұмау тәрізді синдром, ауыру, астения, дімкәстану, ашушаңдық

- өсудің баяулауы (өзінің жасына бойы/салмағының төмен болуы)

Жиі (≥1/100, <1/10)

- зеңді жұқпа, тұмау, ауыз қуысы шырышының ұшығы, ортаңғы отит, стрептококкты фарингит, ринофарингит, синусит

- тромбоцитопения, лимфаденопатия

- құлақтың ауыруы

- вертиго

- гипотиреоз

- қандағы тиреостимуляциялаушы гормонның жоғары деңгейі, тиреоглобулин деңгейінің жоғарылауы

- суицидтік ойлар§, суицид әрекеттері§, депрессия, озбыр мінез-құлық, аффектілі құбылу, ызақорлық, ажитация, үрейлену, көңіл-күйдің өзгеруі, мазасыздық, күйгелектік, ұйқысыздық, дисгевзия, естен тану, зейін шоғырландырудың төмендеуі, ұйқының нашар сапасы

- бас айналу

- жүректің жиі соғуы, тахикардия

- тері жабындарын қан кернеу

- жөтел, мұрыннан қан кету, тамақ пен көмейдің ауыруы

- афтозды стоматит, хейлит, ауыз қуысының ойық жаралануы, асқазан аумағындағы жайсыздық, ауыз қуысының ауыруы, диарея

- қышыну, бөртпе, эритематозды бөртпе, экзема, акне, эритема

- қаңқа-бұлшықет ауыруы, аяқ-қолдың ауыруы, арқаның ауыруы

- инъекция орнындағы реакция, қышыну, бөртпе, құрғау, ауыру, салқын сезінуді қоса

Жиі емес (≥1/1000, <1/100)

- аскаридоз, энтеробиоз, белдемелі герпес, панникулит, несеп-жыныс жолдарының жұқпасы, гастроэнтерит, пневмония

- мінез-құлық бұзылыстары, депрессиялық көңіл-күй, эмоциялық орнықсыздық, қорқыныштар, түнгі шым-шытырық түстер, соғылуға бейімділік

- невралгия, летаргия, парестезия, гипостезия, психомоторлық аса жоғары белсенділік, тремор, бұлшықеттердің түйілуі, бұлшықеттердің тартылуы

- конъюнктиваға қан құйылу, көздердің қышуы, кератит, анық көрмеу, жарықтан қорқу

- гипотензия, тері жабындарының бозаруы

- ысқырып дем алу, мұрын қуысындағы жайсыздық, ринорея

- диспепсия, гингивит, гепатомегалия

- жарыққа сезімталдық реакциясы, макула-папулезді бөртпе, терінің қабыршақтануы, пигментация бұзылуы, атопиялық дерматит, тері түсінің өзгеруі

- қыздардағы дисменорея

- кеуденің ауыруы, кеуденің жайсыздануы, бет аумағындағы ауыру

- тиреоидқа қарсы антиденелердің пайда болуы, протеинурия

§Аталған жағымсыз реакциялар ересектер мен балаларда құрамында интерферон альфа бар препараттарға туындаған.

Қолдануға болмайтын жағдайлар

• белсенді немесе қосымша компоненттерге немесе кез келген интерферонға жоғары сезімталдық

• сыртартқыдағы ауыр жүрек ауруы, соңғы алты ай ішінде қайталанған немесе бақыланбайтын жүрек ауруын қоса

• сыртартқыдағы аутоиммундық гепатит немесе аутоиммундық аурулар

• орташа және ауыр сипатты бауыр жеткіліксіздігі немесе декомпенсация сатысындағы бауыр циррозы

• Чайлд-Пью бойынша ≥6 балл бауыр циррозы бар СГВ/АИВ ко-жұқпасы

• сыртартқыдағы дәстүрлі еммен бақыланбайтын қалқанша без ауруы

• эпилепсия және/немесе орталық жүйке жүйесі функциясының бұзылуы

• ұзаққа созылатын ауыр аурулар

• тұқым қуалайтын галактоза көтере алмаушылық, Лапп лактаза тапшылығы және глюкоза-галактоза мальабсорбциясы

• жүктілік және лактация кезеңі

Балалар

• қазіргі уақыттағы немесе сыртартқыдағы ауыр депрессиялармен, суицидтік ойлаумен немесе суицид әрекеттерімен қатар жүретін психикалық жай-күйлер

Рибавиринмен біріктірілген ем

• рибавиринді медицинада қолдану жөніндегі нұсқаулықты қараңыз

Дәрілермен өзара әрекеттесуі

Метадон

ПегИнтрон® метадон концентрациясын арттыруы мүмкін. Осы құбылыстың клиникалық мәні зерттелмеген. Сондықтан метадонның есірткілік әсерінің күшеюіне байланысты белгілер мен симптомдарды анықтау үшін емделушілерге мониторинг өткізген жөн.

Дәрілік препараттармен бірге PegIFN тағайындау

PegIFN теофиллин мен тиоридазин метаболизмін бәсеңдетеді және қан плазмасындағы осы препараттардың концентрациясын арттырады, сондықтан P450 CYP1A2 және CYP2D6 цитохромы жүйесі арқылы метаболизденетін препараттармен бірге PegIFN тағайындауды алдын ала сақтанумен жүргізу қажет. PegIFN кофеин мен дезипрамин әсерін орташа күшейтеді.

Интерферондардың кез келгенін теофиллинмен, антипиринмен және варфаринмен бірге тағайындағанда да сақтану шараларын қадағалау ұсынылады, өйткені интерферондар бауыр метаболизмін бәсеңдетеді және қан плазмасындағы осы препараттардың концентрациясын арттырады. Зидовудин қолдану аясында интерферон емін тағайындағанда механизмі аяғына дейін зерттелмеген сүйек кемігі функциясының бәсеңдеуі салдарынан лейкоциттер саны азаюы мүмкін. Бұдан басқа, интерферонмен емдеу иммуносупрессиялық ем тиімділігін төмендетеді, трансплантат ажырауының даму қаупі мүмкін болғандықтан, бұл ағзалар (бүйрек, сүйек кемігі және т.б.) трансплантациясынан кейін ерекше маңызды.

RBV-мен пайдалану

Көптеген дозасының фармакокинетикалық зерттеуінде ПегИнтрон® препараты мен RBV арасында ешбір фармакокинетикалық өзара әрекеттесулер болмаған.

СГВ/АИВ ко-жұқпасы

Нуклеозидтік аналогтар. Нуклеозидтік аналогтарды бөлек немесе басқа нуклеозидтермен біріктіріп пайдалану лактоацидозға әкелуі мүмкін. RBV пуриндік нуклеозидтердің фосфорланған метаболиттерінің мөлшерін in vitro арттырады. Осы белсенділік пуриндік нуклеозидтер аналогтарымен (мысалы, диданозинмен немесе абакавирмен) индукцияланған лактоацидоз қаупін күшейтуі мүмкін. Бір мезгілде RBV мен диданозин енгізу ұсынылмайды. Кейбіреулері өлімге әкелген митохондриялық уыттылық, әсіресе, лактоацидоз және панкреатит жағдайлары болды.

Зидовудин АИВ еміне пайдаланылатын емдеу режимінің бір бөлігі болса, RBV-мен кешенді ем кезінде анемия өршуі мүмкін. Сондықтан зидовудинмен бір мезгілде RBV пайдалану анемия қаупінің артуы салдарынан ұсынылмайды. Біріктірілген антиретровирустық ем (АРВЕ) режимінде зидовудинді ауыстыру мүмкіндігін қарастыру керек. Бұл зидовудинмен индукцияланған анемия сыртартқысы белгілі емделушілер үшін айрықша маңызды болар еді.

Айрықша нұсқаулар

Психикалық жағдайға және орталық жүйке жүйесіне (ОЖЖ) әсер етуі ПегИнтрон® препаратымен емделу кезінде және тіпті ем аяқталғаннан кейін, ең алдымен, 6 ай ішінде кейбір емделушілерде психикалық статустың күрделі бұзылулары, атап айтқанда, депрессиялар, суицидтік ойлар және суицид әрекеттері байқалды. Озбыр мінез-құлық (кейде басқа адамдарға өлтіру ниеті сипатында бағытталған), биполярлы бұзылыстар, мания, ойлау үдерістерінің бағдардан адасуы мен ментальді статус өзгерісін альфа интерферондарымен емделу кезінде байқауға болады. Осындай жағдайда емделушіге психикалық аурулардың қандай да бір белгілері немесе симптомдары тұрғысынан тұрақты бақылау орнатылуы тиіс. Егер мұндай симптомдар пайда болса, емдеуші дәрігер ондай қолайсыз жағымсыз әсерлердің аса күрделілігін ескеріп, талапқа сай емдік күтіммен қамту қажеттілігін қарастыруы тиіс. Егер психикалық симптомдар басылмаса немесе күшейсе, суицидтік және гомоцидтік ойлар немесе озбыр мінез-құлық білінсе, емдеуді тоқтатуға және емделушіге тиісті психиатриялық көмек көрсетуге кеңес беріледі.

Қазіргі уақыттағы психикалық аурулары немесе сыртартқыдағы бұзылыстары бар емделушілер

Қазіргі уақыттағы психикалық аурулары немесе сыртартқыдағы бұзылыстары бар балалар мен жасөспірімдерде PegIFN қолдану қарсы көрсетілімді («Қолдануға болмайтын жағдайлар» бөлімін қараңыз).

Егер қазіргі уақыттағы психикалық аурулары немесе сыртартқыдағы бұзылыстары бар ересек емделушілерге ПегИнтрон® препаратымен ем қажет деген шешім қабылданған болса, оны тек тиісті жекеше диагностика жасалған соң және психикалық жағдайын тұрақты бақылаумен бастаған дұрыс.

Интерферондармен емдеу ағымдағы немесе сыртартқысында болған психикалық аурулары, сондай-ақ алкогольдік және есірткілік тәуелділігі бар, СГВ жұқтырған емделушілерде психикалық бұзылыстар симптомдарының өршуіне ықпал етуі мүмкін. Егер интерферондармен емдеу осындай бұзылулары бар емделушілер үшін қажет болса, интерферондармен сәтті емдеуге жету үшін психикалық бұзылыстарға тиісінше ем жүргізіледі. Бұдан басқа, емделушілердің мінез-құлқына және психикалық бұзылулар симптомдарының жиілігіне жекеше скрининг жасау талабы міндетті болып табылады. Мұндай емделушілерге психикалық бұзылыстардың пайда болуына немесе дамуына дейін алдын ала ем жүргізу ұсынылады.

Өсу және даму (балалар мен жасөспірімдер үшін)

ПегИнтрон® + RBV біріктірілген емінде көпшілік жағдайларда 3-тен 17 жасқа дейінгі балаларда, болжамалы деректермен салыстырғанда, бойы мен салмағында артта қалу байқалды. Біріктірілген емде интерферон/RBV стандартты дозаларының бой мен салмаққа ықпал етуіне ұзақ мерзімді жүргізілген зерттеулерде бой өсу кідірісі де айғақталады.

Балалар үшін пайда/қауіп арақатынасын жекеше бағалау

Емдеу басталғанша емнен күтілетін пайда клиникалық зерттеулер кезінде балалар мен жасөспірімдер үшін алынған қауіпсіздік деректерімен сәйкестік тұрғысынан тиянақты таразылануы тиіс. Біріктірілген емнің өсу кідірісін туындататынын ескеру маңызды, оның қайтымдылығы әлі күнге түсініксіз. Біріктірілген емді бастау шешімі әрбір жеке жағдайда емдеуді бастар алдында пайда/қауіп арақатынасын бағалап барып қабылдану керек. Ауру ағымына теріс әсер етуі мүмкін сәбидегі ауру сипаттамасын, аурудың үдеуін (бауырдағы қабыну үдерісінің белсенділігі мен фиброздың даму мүмкіндігі), ко-жұқпаны (мысалы, АИВ), сондай-ақ вирусологиялық жауапты дамытатын болжамалы факторларды, СГВ генотипін және вирустық жүктемені бағалау керек. Мүмкіндігінше, сәбидің келешекте аласа бойлы болу қаупін азайту үшін өсудің пубертаттық күрт өзгерісінен соң емдеген жөн. Емдеудің жыныстық жетілуге ұзақ мерзімді әсер ету деректері жоқ.

Жедел аса жоғары сезімталдық

Аса жоғары сезімталдықтың жедел реакциялары (мысалы, уртикарлы бөртпе, ангионевротикалық ісіну, бронх түйілу, анафилактикалық реакция) интерферон альфа-2b емі кезінде сирек байқалды. Егер мұндай реакция ПегИнтрон® препаратымен емделу кезінде пайда болса, емдеуді дереу тоқтатып, тиісінше ем тағайындау қажет. Уақытша бөртулер емді үзуге себеп бола алмайды.

Жүрек-қантамыр жүйесі

ПегИнтрон® препаратымен емделгенде сыртартқысында іркілісті жүрек жеткіліксіздігі, миокард инфарктісі және/немесе аритмиясы бар немесе солардан зардап шегетін емделушілер дәрігердің тұрақты бақылауында болуы тиіс. Осының алдында жүрек бұзылулары болған емделушілерге емге дейін және емдеу курсы кезінде ЭКГ-диагностикасынан өтуге кеңес беріледі. Жүрек аритмиялары (әсіресе, қарыншаүстілік), әдетте, дәстүрлі емдеуге келеді, бірақ ПегИнтрон® препаратымен емдеуді тоқтату қажет болуы мүмкін.

Сыртартқысында жүрек аурулары бар балалар мен жасөспірімдерде ПегИнтрон® препаратын қолдану жөнінде деректер жоқ.

Сыртартқысында ауыр (күрделі) немесе тұрақсыз кардиологиялық аурулары бар емделушілерге ПегИнтрон® + RBV біріктірілген емі қарсы көрсетілімді.

Бауыр жеткіліксіздігі

ПегИнтрон® бауыр декомпенсациясының даму қаупін және бауыр циррозына шалдыққан емделушілердегі өлімді арттырады. Басқа интерферондармен емделу кезіндегідей, бауыр ауруының декомпенсациясын көрсетуі мүмкін гемостаздың бұзылу белгілері білінгенде ПегИнтрон® препаратымен емді тоқтату қажет. ПегИнтрон® препаратымен ем басталған соң 2, 8 және 12 аптада және әр 6 ай сайын сарысулық билирубин, аланинаминотрансфераза (АЛТ), аспартатаминотрансфераза (АСТ), сілтілік фосфатаза (СФ) және лактатдегидрогеназа (ЛДГ) деңгейлерін өлшеу арқылы бауыр функциясын бақылап отыру керек. Ауырлығы ауыр дәрежедегі бауыр жеткіліксіздігі (3 дәреже) немесе бауыр декомпенсациясы (В және С класы, Чайлд-Пью бойынша >6) дамыған жағдайда ПегИнтрон® препаратымен емді тоқтату керек.

Гипертермия

Сонымен қатар, әдетте, интерферондармен емделу кезінде білінетін тұмау тәрізді синдроммен байланысты болуы мүмкін гипертермия сияқты, персистирлеуші гипертермияның басқа да болжамды себептерінің бар-жоғын анықтау қажет.

Гидратация

ПегИнтрон® препаратымен емнен өтетін емделушілерде тиісті гидратациямен демеу көрсетілуі тиіс, өйткені альфа интерферондарымен емдеген кейбір емделушілерде сұйықтық жоғалтумен байланысты гипотония байқалды. Жоғалтқан сұйықтық орнын толтыру қажет болуы мүмкін.

Өкпедегі өзгерістер

Қызба, жөтел, ентігу және басқа да респираторлық симптомдар білінген бойда барлық науқастарға кеуде қуысының рентгенографиясын жасау керек. Өкпе рентгенограммасында инфильтраттар немесе өкпе функциясының бұзылу белгілері болса, ондай науқастарға аса тиянақты бақылау орнату және, қажет болса, емді тоқтату керек. Емді дереу тоқтату және кортикостероидтармен емдеу өкпе тарапынан жағымсыз құбылыстардың жойылуына алып келеді.

Аутоиммундық аурулар

Интерферон альфамен емделгенде аутоантиденелер пайда болуы білінді. Интерферонмен емделу кезіндегі аутоиммундық аурулардың клиникалық көріністері аутоиммундық бұзылулардың даму қаупі жоғары науқастарда айқын түрде жиірек пайда болады.

Интерферонмен емделгенде ССГ бар емделушілерде Фогт-Коянаги-Харада синдромы жағдайлары болды. Осы синдром көзді, есту жүйесін, ми қабығын және теріні зақымдайтын гранулематозды қабыну ауруы болып табылады. Фогт-Коянаги-Харада синдромының симптомдары білінгенде вирусқа қарсы емдеуді тоқтатып, кортикостероидты ем жүргізу мүмкіндігін талқыға салу керек.

Көру мүшелері тарапынан бұзылулар

ПегИнтрон® препаратымен ем кезіндегі кейбір жағдайларда офтальмологиялық бұзылулар, соның ішінде торқабыққа қан құйылу, торқабықтың ошақтық өзгерістері, торқабықтың ажырауы және торқабық артериясының немесе көктамырының тарылуы дамыған. Емделушілердің бәрі ем басталғанша офтальмологиялық тексеруден өтуі тиіс. Офтальмологиялық шағымдары бар, соның ішінде көру өткірлігі төмендеген немесе көру өрісі шектелген барлық емделушілерді шұғыл түрде толық офтальмологиялық тексеруден өткізу қажет. Торқабық тарапынан осындай жағымсыз реакциялар қатарлас аурулар болғанда жиірек туындайды, сондықтан қант диабетімен немесе артериялық гипертензиямен науқастарға ПегИнтрон® препаратымен ем кезінде мерзім сайын офтальмологиялық тексеруден өту ұсынылады. Офтальмологиялық бұзылулардың бұрынғылары өршігенде немесе жаңалары пайда болғанда ПегИнтрон® препаратымен емді тоқтату керек.

Эндокриндік бұзылулар

Дәрі-дәрмектік заттармен емдеуге келмейтін гипотиреоз және гипертиреоз, қант диабеті сияқты жай-күйлері бар емделушілер ПегИнтрон® препаратын қабылдауды бастамауы тиіс. Емделу кезінде осындай ахуалдары дамыған емделушілер препарат қабылдауды тоқтатуы тиіс.

Метаболизмдік бұзылулар

Ауыр жағдайларға дейін апаратын гипертриглицеридемияның дамуы/үдеуі жөнінде мәліметтер бар, осыған орай, липидограмманы тұрақты бақылау ұсынылады.

АИВ жұқтырған емделушілерде қолдану

Митохондриялық уыттылық және лактоацидоз. АИВ ко-жұқпасын жұқтырған және белсенділігі жоғары антиретровирустық ем (БЖAРЕ) алатын емделушілерде лактоацидоздың даму қаупі жоғары. БЖAРЕ еміне ПегИнтрон® + RBV қосылғанда алдын ала сақтану шараларын қадағалау керек (Ребетол® препаратын медицинада қолдану жөніндегі нұсқаулықты қараңыз).

Үдемелі циррозы бар, СГВ/АИВ ко-жұқпасын жұқтырған емделушілердегі бауыр декомпенсациясы

Үдемелі циррозға шалдыққан және БЖAРЕ курсын алатын СГВ/АИВ ко-жұқпасын жұқтырған емделушілер бауыр функциясының декомпенсациясы мен өлім қаупі жоғары топта болады. Бір ғана интерферон альфамен немесе RBV-мен біріктіріп қосымша емдеу емделушілердің осы қосалқы тобындағы қауіпті арттырады. Ко-жұқпасын жұқтырған емделушілерде бауыр декомпенсациясының қаупін арттыратын басқа факторлар диданозинмен емдеу және сарысу билирубинінің жоғары концентрациясы болып табылады.

АРВЕ де, С гепатиті емін де алатын ко-жұқпасын жұқтырған емделушілерді мұқият бақылауға алып, Чайлд-Пью шкаласы бойынша бауыр жеткіліксіздігінің ауырлығын бағалау (емделу кезінде) керек. Үдемелі бауыр декомпенсациясы бар емделушілерде С гепатитін вирусқа қарсы емдеуді дереу тоқтатып, ал АРВЕ қайта қарастырылуы тиіс.

СГВ/АИВ ко-жұқпасын жұқтырған емделушілердегі гематологиялық өзгерістер

СГВ/АИВ ко-жұқпасын жұқтырған және ПегИнтрон® + RBV емдеу курсын және БЖAРЕ алатын емделушілер, СГВ ғана жұқтырған емделушілермен салыстырғанда, гематологиялық өзгерістердің (нейтропения, тромбоцитопения және анемия) даму қаупі жоғары топта болады. Гематологиялық параметрлердің басым көпшілігінің дозаны азайту жолымен қалыпқа түсуіне қарамастан, емделушілердің осы тобында гематологиялық параметрлерді ұқыпты бақылап отыру керек.

ПегИнтрон® + RBV препараты пайдаланылатын біріктірілген ем курсынан, сондай-ақ зидовудинмен емдеу курсынан өтетін, анемияның даму қаупі жоғары емделушілерде зидовудинмен осылай біріктіруді бір мезгілде пайдалану ұсынылмайды.

CD4 жасушалар саны төмен емделушілер

СГВ/АИВ ко-жұқпасын жұқтырған, CD4 жасушалар саны 200 мкл/жасушадан аз емделушілерде вирусқа қарсы біріктірілген ем қолдану тиімділігі мен қауіпсіздігі туралы деректер шектеулі. Сондықтан CD4 жасушалар саны төмен емделушілерді емдегенде алдын ала сақтану шараларын қадағалау ұсынылады. ПегИнтрон® препараты мен RBV уыттылығының әлеуеттенуі мен әр препараттың уыттылығын төмендету туралы ақпарат алу үшін С гепатитін вирусқа қарсы емдеу кезінде қабылдауға болатын антиретровирустық дәрілік заттарды медицинада қолдану жөніндегі нұсқаулықты қарау қажет.

Дентальді және периодонтальді бұзылулар

ПегИнтрон® + RBV біріктірілген емін алған емделушілер арасында дентальді және периодонтальді бұзылулардың дамуы хабарланған. Бұл орайда, ұзақ уақыт біріктірілген ем кезінде ауыздың кеберсуі тістерге және ауыздың шырышты қабығына зақымдау әсерін тигізуі мүмкін. Емделушілерге күніне 2 рет тісін мұқият тазалап, стоматологиялық тексеруден жүйелі өтуге кеңес беру керек. Бұдан басқа, кейбір емделушілерде құсу болуы мүмкін, одан кейін олар ауыз қуысын мұқият шаюы тиіс.

Трансплантаттардың ажырауы

Бауыры немесе басқа ағзаларын ауыстырып салған емделушілерде С гепатитін емдеу үшін ПегИнтрон® + RBV моно- немесе біріктірілген емін қолданудың қауіпсіздігі мен тиімділігі туралы деректер жоқ.

Зертханалық зерттеулер

Барлық емделушілер үшін вирусқа қарсы ем басталғанша стандартты тексерулер: жалпы қан талдауын, биохимиялық қан көрсеткіштерін және қалқанша бездің қызмет атқару тестісін өткізу қажет. ПегИнтрон® препаратымен емдеуді бастауға болатын рұқсатты көрсеткіштер:

Емдеудің 2-ші және 4-ші апталарында, одан кейін клиникалық қажеттілікке қарай мезгіл-мезгіл міндетті түрде зертханалық тексеру өткізілуі тиіс. Емделу кезінде клиникалық көрсетілімдер бойынша СГВ-РНҚ зерттеуін мезгіл-мезгіл жүргізу қажет.

Тұзсыз емдәмді қажет ететін емделушілерге арналған ақпарат

ПегИнтрон® құрамында 0.7 мл-ге 1 ммоль-ден аз натрий (23 мг) бар, яғни түптеп келгенде «натрийсіз» болып табылады.

Жүктілік және лактация кезеңі

Егер олар бүкіл емдеу барысында контрацепцияның тиімді әдістерін пайдаланған жағдайда, ұрпақ өрбіту жасындағы әйелдерде ПегИнтрон® қолдануға болады.

Рибавиринмен біріктірілген ем

RBV-мен біріктіріп ПегИнтрон® қабылдайтын емделуші әйелдерде немесе емделуші ерлердің жұптастарында жүктіліктен қорғану үшін жоғары алдын ала сақтану шараларын қабылдау қажет. Бала туу жасындағы әйелдер және олардың жұптастары емделу кезінде және ем аяқталғаннан кейін 4 ай бойы контрацепцияның тиімді әдісін пайдалануы тиіс.

Емделуші ерлер және олардың жұптас әйелдері емделу кезінде және ем аяқталғаннан кейін 7 ай бойы контрацепцияның тиімді әдісін пайдалануы тиіс (Ребетол® препаратын медицинада қолдану жөніндегі нұсқаулықты қараңыз).

Жүкті әйелдерде интерферон альфа-2b пайдалану жөнінде объективті клиникалық деректер жоқ. Жануарларға жүргізілген зерттеулер репродуктивтік функцияға уытты әсер етуін көрсетеді. Интерферон альфа-2b приматтарда түсік туғызатыны анықталған, бұл ПегИнтрон® препараты үшін де жоққа шығарылмайды.

ПегИнтрон® препаратын жүктілік кезінде пайдалануға болмайды. RBV ауыр даму ақауларын туындатады, сондықтан ПегИнтрон® + RBV біріктірілген емі жүктілік кезінде қарсы көрсетілімді.

RBV емшек сүтіне өтуі туралы ақпарат жоқ. Емдеу басталғанша бала емізуді тоқтату керек.

Дәрілік заттың көлік құралын және қауіптілігі зор механизмдерді басқару қабілетіне әсер ету ерекшеліктері

ПегИнтрон® препаратымен емделгенде қалжырау, ұйқышылдық немесе сананың шатасуы болуы мүмкін екеніне байланысты, көлік құралы мен күрделі техниканы басқаруға кеңес берілмейді.

Артық дозалануы

Ұсынылған дозасынан 10.5 есе асып кететін артық дозалану туралы хабарламалар алынған. Артық дозаланудың ауыр симптомдары туралы деректер алынбаған. Жағымсыз құбылыстар өздігінен басылған және емдеу курсын тоқтатуды талап етпеген.

Артық дозалану жағдайында тұрақты дәрігерлік бақылаумен симптоматикалық ем жүргізіп, өмірлік маңызды ағзалар функциясына мониторинг жасаған жөн.

Шығарылу түрі және қаптамасы

Инъекция үшін ерітінді дайындауға арналған 50 мкг/0.5 мл, 80 мкг/0.5 мл, 100 мкг/0.5 мл, 120 мкг/0.5 мл және 150 мкг/0.5 мл лиофилизацияланған ұнтақ еріткішпен (инъекцияға арналған су) жиынтықта.

Еккіш-қаламдар (CLEARCLICK) екі камералы, бір камерасында - лиофилизацияланған ұнтақ және екінші камерасында – еріткіш бар. Еккіш-қаламның екі камералы бөлігі бромбутил каучуктен жасалған сұр түсті екі плунжермен (бірі ортасында, екіншісі артқы жағында орналасқан) және қалпақшаның пластмассалы қаусырылатын ұшына бекітілген бромбутил каучуктен жасалған тығыздағыш дискілі ұштықпен (қақпақ) жабдықталған.

1 еккіш-қалам, еккіш-қаламға арналған 1 арнайы бір реттік ине және теріні өңдеуге арналған залалсыздандырғыш сүрткі 2 пакетті пішінді ұяшықты қаптамаға салынады.

Пішінді ұяшықты 1 қаптаманы медицинада қолданылуы жөнінде мемлекеттік және орыс тілдеріндегі нұсқаулықпен бірге картон қорапқа салады.

Сақтау мерзімі және шарттары

2 °С-ден 8 °С-ге дейінгі температурада сақтау керек.

Дайындалған ерітіндісі бар еккіш-қаламды (CLEARCLICK) бірден пайдалану мүмкін болмағанда, оны 24 сағаттан асырмай 2 °С-ден 8 °С-ге дейінгі температурада сақтауға болады.

Балалардың қолы жетпейтін жерде сақтау керек.

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

МСД Интернешнл ГмбХ (Сингапурдағы филиалы), Сингапур

Қаптаушы

Шеринг-Плау Лабо Н.В., Бельгия

Тіркеу куәлігінің иесі

Шеринг-Плау Сентрал Ист АГ, Швейцария

Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы

Қазақстандағы Шеринг-Плау Сентрал Ист АГ компаниясының өкілдігі, Алматы қ., Достық д-лы, 38, «Кең дала» бизнес орталығы, 5 қабат

Тел. +7 (727) 330-42-66, +7 (727) 259-80-84

Факс +7 (727) 259-80-90

эл. поштасы:

dpoccis2@merck.com, pharmacovigilance.ukraine&cis@merck.com

Қосымша

ПегИнтрон® препаратының еккіш-қаламын (CLEARCLICK) пайдалануға арналған нұсқау

Бұл нұсқауда бір реттік еккіш-қалам (CLEARCLICK) көмегімен өз бетімен инъекцияны қалай жасау керек екені түсіндіріледі. Нұсқауды мұқият оқып шығып, оны қадамдық қадағалауыңызды өтінеміз. Дәрігер немесе мейірбике Сізге еккіш-қаламды (CLEARCLICK) қалай пайдаланатынын айтып береді. Егер Сіз еккіш-қаламды қалай пайдалану керектігін түсінгеніңізге сенімсіз болсаңыз, инъекция жасауға әрекеттенбеңіз. Әр еккіш-қалам тек бір рет пайдалануға арналған.

Дайындық

• Жарық жақсы түсетін, таза тегіс жұмыс беткейін, мысалы, үстел табыңыз.

• Еккіш-қаламды тоңазытқыштан шығарыңыз. Жарамдылық мерзімінің өтпегеніне көз жеткізу үшін қаптамасында басып жазылған жарамдылық мерзімінің өту күнін тексеріңіз. Препаратты жарамдылық мерзімі өткеннен кейін пайдаланбаңыз.

• Еккіш-қаламды картон қаптамасынан шығарып алыңыз.

• Еккіш-қаламды тегіс таза беткейге қойып, оны бөлме температурасына дейін (бірақ 25 0C-ден асырмай) жылытып алыңыз. Бұл 20 минутқа дейін созылуы мүмкін.

• Өзіңіздің қолыңызды сабынды жылы сумен мұқият жуыңыз. Жұқпа қаупін азайту үшін Сіздің жұмыс беткейіңізді, қолыңызды және инъекция жасалатын жерді таза ұстауыңыз маңызды.

Сізге қаптамада болатын мына материалдар қажет:

• еккіш-қалам (CLEARCLICK)

• ине ("алмалы-салмалы ине")

• спирт сіңдірілген 2 сүрткі

1. Ерітіндіні әзірлеу

• Еккіш-қаламды жинау дискісін төмен қаратып тік ұстаңыз.

• Дискіні көрсеткішпен 1 санына бұрыңыз (1 суретті қараңыз). Сіз "сырт" еткен дыбысты ести аласыз.

1 сурет

• ЕККІШ-ҚАЛАМДЫ АРАЛАСТЫРУ ҮШІН СІЛКІМЕҢІЗ. Ішіндегісін араластыру үшін еккіш-қаламды абайлап екі рет аударыңыз. (2 суретті қараңыз).

2 сурет

• «Терезеге» қараңыз (суретті қараңыз). Қолданар алдында ерітінді мөлдір және түссіз болуы тиіс. Ішінде бірнеше көпіршік болуы мүмкін, бірақ бұл қалыпты болып есептеледі. Егер түсі өзгерген немесе ішінде бөгде бөлшектер болса, ерітіндіні пайдаланбаңыз.

• Инені жалғау

  • Дискіні көрсеткішпен 2 санына бұрыңыз (3 суретті қараңыз). Сіз "сырт" еткен дыбысты ести аласыз.

  3 сурет

  • Спирт сіңдірілген сүрткімен Сіз ине жалғағыңыз келетін еккіш-қаламның жоғарғы жағын сүртіңіз (4 суретті қараңыз).

  4 сурет

  • Инені ("алмалы-салмалы инені") еккіш-қаламға жалғауға дейін ине қалпақшасынан сары қағазын алып тастаңыз (5 суретті қараңыз)

  5 сурет

  • Еккіш-қаламды тік қалпында ұстап, инені тура төменге бағыттап қатты басыңыз (6 суретті қараңыз). Инеге басқанда Сіз жай дыбыс естисіз.

  6 сурет

  • Ине қалпақшасын алып тастаңыз. Инеден сұйықтық сәл ағып шығуы мүмкін (7 суретті қараңыз). Бұл қалыпты болып есептеледі.

• сурет

• Дозаны белгілеу

  • Дискіні көрсеткішпен Сізге тағайындалған дозаға бұрыңыз (8 суретті қараңыз). Жинау кезінде сырт еткен дыбыстар ести аласыз.

  Ескертпе: дискіні бұру кезінде иненің қорғаныс тетігі автоматты түрде КӨТЕРІЛЕДІ (9 суретті қараңыз). Инъекцияны енгізер алдында Сіз дискіні кез келген дозаны таңдап, бұруыңызға болады.

  8 сурет

  Көтерілу!     9 сурет

  Сіз енгізуге дайынсыз

  • Іш (құрсақ қуысы) немесе сан аумағынан инъекция енгізетін жер таңдаңыз. Кіндік және бел аумағынан аулақ болыңыз. Егер Сіздің дене бітіміңіз өте арық болса, Сіз инъекцияға тек санды пайдалануға тиіссіз. Сіз препарат енгізілетін жерді әр жолы ауыстырып тұруға тиіссіз. Терінің тітіркенуі, қызаруы, қанталау, жұқпа немесе тыртық, стрия немесе түйін бар тері аумағына ПегИнтрон® енгізбеңіз.

  • Инъекция салатын жер терісін спирт сіңдірілген жаңа сүрткімен сүртіңіз. Терінің кебуін күте тұрыңыз.

  • Сіз инъекция үшін тазалаған аумақтың тері қатпарын жиырыңыз.

  • 10 суретте көрсетілгендей, теріге еккіш-қаламды тығыз қысып салыңыз. Қорғаныс тетігі препаратты инеге енгізуге мүмкіндік беріп, автоматты түрде кері жылжиды.

  • Еккіш-қаламды 15 секундтай теріде тығыздап ұстаңыз.

  Ескертпе: Сіздің дозаңызға қарай еккіш-қалам 10 секунд ішінде сырт етеді. Қосымша 5 секунд дозаның толық енгізілуіне кепілдік береді.

  • Ескертпе: Сіз еккіш-қаламды теріден алған бойда иненің қорғаныс тетігі сол тұста бөгеліп қалады.

  10 сурет: Санға инъекция салу

  Инъекцияға арналған материалдарды жою

  Еккіш-қалам, ине және инъекцияға арналған барлық материалдар бір рет пайдалануға арналған және инъекциядан соң жойылуы тиіс. Пайдаланылған еккіш-қаламды қауіпсіздік үшін жабық контейнерге тастаңыз. Өз дәрігеріңізден немесе фармацевтіңізден тиісті контейнер туралы сұраңыз.