Пантоспей (таблетки, 40 мг)

Пантоспей

Пантопразол

Дәрілік түрі, дозасы

Ішекте еритін қабықпен қапталған таблеткалар, 40 мг

Ас қорыту жолы және зат алмасу. Қышқылдылығы бұзылуымен байланысты ауруларды емдеуге арналған препараттар. Ойық жараға қарсы препараттар және гастроэзофагеальді ауруды (GORD) емдеуге арналған препараттар. Протонды сорғы тежегіштері. Пантопразол

ATХ коды: А02BC02

Ересектер мен 12 жастан асқан жасөспірімдер:

• рефлюкс-эзофагитте.

Ересектер:

• Helicobacter pylori (H. pylori) ойық жаралы ауруы қоздырғышын толық жою үшін Н.pylori туындатқан ойық жара ауруы бар пациенттерде қажетті бактерияға қарсы емдеумен біріктірілімде

• асқазан мен он екі елі ішектің ойық жаралы ауруында

• Золлингер-Эллисон синдромында және тұз қышқылының патологиялық жоғары дәрежеде түзілуімен басқа да жай-күйлерде.

Қолдануды бастағанға дейін қажетті мәліметтер тізбесі

• белсенді затқа, басқа да орын басатын бензимидазолдарға, препараттың қосымша заттарының кез келгеніне жоғары сезімталдық

• атазанавирмен, нелфинавирмен, құрамында рилпивирин бар препараттармен бір мезгілде қолдану

• жүктілік және лактация кезеңі

• 12 жастан кіші балалар мен жасөспірімдер.

Басқа дәрілік препараттармен өзара әрекеттесуі

Пантопразолдың басқа дәрілік заттардың сіңуіне ықпалы: Пантоспей кейбір дәрілік заттардың, мысалы зеңге қарсы препараттардың (кетоконазол, итраконазол, позаконазол) және эрлотиниб сияқты дәрілік заттардың әсерін төмендетуі мүмкін.

Микофенолат мофетилі: ағзаларды ауыстырып салған кезде пантопразол микофенолат мофетилімен бір мезгілде қолданғанда сақ болу қажет, себебі оның әсері азаюы мүмкін.

АИТВ-ға қарсы дәрілік препараттар (атазанавир, рилпивирин, нелфинавир, саквинавир): Пантоспеймен бір мезгілде қолдануға болмайды, өйткені АИТВ қарсы осы дәрілік препараттардың тиімділігін төмендетуі мүмкін, саквинавирмен біріктіру саквинавирдің уыттылығын арттырады.

Қан ұюын төмендететін препараттар (фенпрокоумон және варфарин)

Қан ұюын төмендететін препараттармен (варфаринмен, фенпрокоумонмен) бір мезгілде қолданғанда қан ұюының зертханалық көрсеткіштері төмендеуі мүмкін және қатты қан кету дамуы мүмкін (тіпті өліммен аяқталуы мүмкін).

Клопидогрел: клиникалық маңызды әсер көрсетпейді, клопидогрелдің дозасын түзету қажет емес.

Метотрексат: Пантоспей препараты метотрексаттың (обырды немесе псориазды емдеуге арналған препарат) әсерін күшейтуі мүмкін, сондықтан метотрексаттың үлкен дозаларын тағайындаған кезде дәрігер Пантоспей препаратын қабылдауды тоқтатуы мүмкін.

Пантоспей препаратының әсерін күшейтетін немесе азайтатын препараттар: Флувоксамин Пантоспей препаратының әсерін күшейтуі, ал рифампицин мен шайқурай препараттары (шілтерленген шайқурай) оның әсерін азайтуы мүмкін.

Арнайы ескертулер

Бауыр жеткіліксіздігі: бауырдың ауыр жеткіліксіздігі кезінде, емдеу кезеңінде, әсіресе пантопразолды ұзақ қолданғанда, бауыр ферменттерінің деңгейі жоғарылауы мүмкін.

Асқазан-ішектегі жаңа түзілімдер: егер сізде қандай да бір үрей тудыратын симптомдар (мысалы, салмақтың айқын азаюы, қайталанатын құсу, жұтудың бұзылуы, қан құсу, қан аздығы немесе нәжістегі қан) пайда болған жағдайда, сондай-ақ асқазанның ойық жарасына күдіктенгенде немесе ол бар болғанда, сізге қатерлі ісікті жоққа шығару үшін дереу дәрігерге қаралуыңыз керек, өйткені пантопразолмен емдеу симптоматиканы азайтуы және дұрыс диагноз қоюды кешіктіруі мүмкін.

Қабынуға қарсы стероидты емес препараттармен (ҚҚСП) бір мезгілде қолдану, мысалы, ацетилсалицил қышқылы немесе ибупрофен: ҚҚСП қолданудан туындаған асқазан мен он екі елі ішектің ойық жарасының алдын алу үшін 20 мг Пантоспей препаратын қолдану ҚҚСП-мен емдеуді жалғастыруды қажет ететін және асқазан-ішек асқынуларының жоғары даму қаупі бар пациенттерде шектелуі тиіс (егер бұрын асқазан/он екі елі ішектің ойық жарасы немесе асқазан-ішек жолының жоғарғы бөліктерінен қан кетсе, 65 жастан асқан қарт адамдарда).

Басқа препараттармен бір мезгілде қолдану: Пантоспейді басқа препараттармен біріктіріп қолданған кезде осы препараттарды медициналық қолдану жөніндегі нұсқаулықтағы ұсынымдарды ұстану қажет.

Атазанавирмен бір мезгілде қолдану: бір мезгілде қолдану ұсынылмайды, себебі АИТВ-ға (атазанавир) қарсы дәрілік препараттардың тиімділігі төмендеуі мүмкін.

Метотрексатпен бір мезгілде қолдану: ППТ метотрексатпен бір мезгілде қолдану (әсіресе жоғары дозаларда) метотрексаттың әсерін күшейтуі және уытты әсерлерге алып келуі мүмкін, сондықтан бұл жағдайларда дәрігер ППТ уақытша тоқтатуы мүмкін.

B12 дәруменінің сіңуіне әсері: пантопразолды қолдану кезеңінде B12 дәруменінің (цианокобаламин) жеткіліксіз түсуі мүмкін.

Жедел интерстициальді нефрит: ППТ қабылдайтын пациенттерде емдеудің кез келген сәтінде бүйрек функциясының төмендеуіне әкеп соғатын (интерстициальді нефрит) бүйректің жедел зақымдануы дамуы мүмкін, ол әдетте шығу тегі аллергиялық болады. Егер жедел интерстициальді нефрит дамитын болса, Пантоспей препаратын қолдануды тез арада тоқтату және дәрігерге қаралу қажет.

Асқазан түбінің безді полиптері: Пантоспей препаратын қоса, пантопразолды ұзақ қолданған кезде (бір жылдан артық) асқазан түбі аумағында безді полиптер даму қаупі артады. Әдетте олар ешқандай көрініс бермейді, симптоматика бермейді және эндоскопия жүргізген кезде кездейсоқ анықталуы мүмкін.

Жоғары сезімталдық және ауыр тері реакциялары: препараттарды пантопразолмен қолданған кезде ауыр аллергиялық реакциялар байқалды (жалпы және жергілікті/тері), оларға мультиформалы эритеманы, Стивенс-Джонсон синдромын және уытты эпидермальді некролизді жатқызуға болады. Олар дамыған жағдайда дереу дәрігерге қаралу қажет.

Ұзақ емдеу: Ұзақ емделгенде (әсіресе 1 жылдан астам) пациенттер дәрігердің ұдайы бақылауында болуы тиіс.

Бактериялардан туындаған асқазан-ішек инфекциялары: Пантопразолмен емделген кезде асқазан-ішек жолдарының инфекциялық аурулар (мысалы, сальмонелез) дамуы мүмкін.

Магний деңгейінің төмендеуі: Пантопразол тобының препараттарын 3 айдан астам, көбінесе бір жыл бойы қабылдаған пациенттерде шаршау, құрысулар, сананың тұмандануымен бірге психикалық бұзылыстар, зейін қоюдың бұзылуы, қабылдаудың бұзылуы, ойлау және эмоциялар, бас айналу және жүрек ырғағының бұзылуы сияқты күрделі көріністермен қандағы магний деңгейінің айқын төмендеуі байқалды, бұлар байқамай пайда болуы мүмкін. Осы симптомдар пайда болған кезде, сіз тез арада дәрігерге қаралуыңыз керек, өйткені магний препараттарымен тексеру және емдеу қажет болуы мүмкін, әсіресе Пантоспеймен бір мезгілде сіз дигоксинді немесе қандағы магний деңгейін төмендететін басқа да препараттарды (мысалы, несеп айдайтын) қабылдасаңыз.

Ортан жіліктің, білезіктің және омыртқаның сыну қаупі: Пантопразолмен ұзақ уақыт емделгенде (1 жылдан астам), пациенттерде ортан жіліктің, білезіктің және омыртқаның сыну жағдайлары елеусіз жиілеуі мүмкін, көбінесе егде жастағы адамдарда, себебі оларда сүйектерде кальций мөлшері төмен (остеопороз). Мұндай жағдайларда пациенттер D дәрумені мен кальцийді жеткілікті мөлшерде қабылдаулары тиіс.

Жүйелі қызыл жегі: пантопразолмен бірге препараттарды қабылдайтын пациенттерде жүйелі қызыл жегі (ЖҚЖ) даму жағдайлары немесе оның терідегі түрі (жаңа ауру және бұрыннан бар аурудың асқынған түрінде) байқалды. Көп жағдайда бұл ауру терідегі түрінде байқалды және жастан кәріге дейінгі әртүрлі жастағы пациенттерде жедел емес түрде дамыды (үздіксіз пантопразолмен емдегеннен кейін бірнеше апта ішінде немесе жылдар бойы). Көп жағдайда бөртпе пайда болды, алайда кейде буындардың қабынуы және қан талдауында қан жасушаларының бір немесе бірнеше түрінің жеткіліксіздігі байқалды. Пантоспей препаратын ұзақ негізсіз қолданудан аулуқ болу керек. Қызыл жегінің симптомдары пайда болған кезде препаратты қабылдауды дереу тоқтатып, дәрігерге қаралу қажет. Жай-күйлерінің жақсаруы әдетте препаратты қабылдауды тоқтатқаннан кейін 4-12 аптадан соң ғана білінеді. Мұндай жағдайларда қан зерттеулерінің нәтижелері де жоғары болуы мүмкін.

Зертханалық зерттеу нәтижелеріне әсері: тез өсіп келе жатқан (нейроэндокринді) ісіктерге тексеру жүргізген кезде Пантоспей препаратымен емдеуді тексеру жүргізілгенге дейін кемінде 5 күн бұрын тоқтата тұру керек және кейде Пантоспей препаратының тексеру көрсеткіштеріне әсері салдарынан оларды Пантопразолмен емдеу тоқтатылғаннан кейін 14 күннен кейін қайталауға тура келеді.

ТГК (тетрагидроканнабинол) несеп талдауы нәтижелеріне әсері: натрий пантопразолы ТГК (сорадағы) несеп талдауының жалған оң нәтижесін туғызуы мүмкін.

Балаларда қолдану: қауіпсіздігі мен тиімділігі бойынша деректердің жеткіліксіздігіне байланысты 12 жастан кіші балалар мен жасөспірімдерде Пантоспей препаратын қолдану ұсынылмайды.

Қолдану жөніндегі нұсқаулар

Дозалау режимі

12 жастан асқан балалар мен ересектердегі рефлюкс-эзофагит

Ұсынылатын доза 40 мг Пантоспей препаратының күніне бір таблеткасын құрайды. Жекелеген жағдайларда, әсіресе басқа емге ешқандай реакция болмаса, доза арттырылуы мүмкін (күніне 40 мг-ден 2 таблеткаға дейін). Рефлюкс-эзофагитті емдеу үшін әдетте 4 апта қажет етіледі. Егер бұл жеткіліксіз болса, емдеуді әдеттегідей тағы да келесі 4 апта бойы жалғастырады.

Екі тиісті антибиотиктермен біріктіре отырып ересектерде H. pylori ойық жара ауруы қоздырғыштарын толық жою

Н.pylori туындатқан асқазан мен он екі елі ішектің ойық жарасы бар пациенттерде қоздырғышты жою препараттардың біріктірілімімен жүргізіледі.

H. pylori жою үшін препаратқа сезімталдығына байланысты мына біріктірілімдер ұсынылуы мүмкін:

a) тәулігіне 2 рет 40 мг Пантоспей + тәулігіне 2 рет 1000 мг амоксициллин + тәулігіне 2 рет 500 мг кларитромицин

б) тәулігіне 2 рет 40 мг Пантоспей + тәулігіне 2 рет 400-500 мг метронидазол (немесе 500 мг тинидазол) + тәулігіне 2 рет 250-500 мг кларитромицин

в) тәулігіне 2 рет 40 мг Пантоспей + тәулігіне 2 рет 1000 мг амоксициллин + тәулігіне 2 рет 400-500 мг метронидазол (немесе 500 мг тинидазол).

H. pylori бактерияларын жою үшін біріктірілген ем кезінде Пантоспейдің екінші таблеткасын кешкі асқа дейін 1 сағат бұрын қабылдаған жөн.

Емдеу ұзақтығы әдетте 7 күнді құрайды, қажет болған жағдайда дәрігер емдеу ұзақтығын екі аптаға дейін арттыра алады.

Ересектерде асқазанның ойық жаралы ауруын емдеу

Ұсынылатын доза 40 мг Пантоспейдің күніне бір таблеткасын құрайды. Жекелеген жағдайларда доза арттырылуы мүмкін (күніне 2 таблеткаға дейін), әсіресе, емдеудің басқа түріне клиникалық жақсару болмаған жағдайда. Асқазанның ойық жарасын емдеу үшін әдетте 4 апта қажет. Егер бұл жеткіліксіз болса, емдеу, әдетте келесі 4 аптаға дейін созылады.

Ересектердегі он екі елі ішектің ойық жаралы ауруын емдеу

Ұсынылатын доза 40 мг Пантоспей препаратының күніне бір таблеткасын құрайды. Жекелеген жағдайларда доза арттырылуы мүмкін (күніне 2 таблеткаға дейін), әсіресе емнің басқа түріне клиникалық жақсару болмаған жағдайда. Он екі елі ішектің ойық жарасын емдеу үшін әдетте 2 апта қажет. Егер бұл уақыт жеткіліксіз болса, емделуге әдетте тағы 2 апта қажет болуы мүмкін.

Золлингер-Эллисон синдромы және асқазандағы қышқылдың жоғары дәрежеде өндірілуімен қатар жүретін ересектердегі басқа да аурулар

Золлингер-Эллисон синдромы бар және асқазанда қышқылдың жоғары өндірілуімен басқа да аурулармен ауыратын пациенттерді ұзақ емдегенде, Пантоспей препаратын 80 мг дозада (40 мг Пантоспей 2 таблетка) қабылдау ұсынылады. Бұдан әрі, қажет болған жағдайда дәрігер дозаны арттыруы немесе азайтуы мүмкін (клиникалық әсерге байланысты). Күніне 80 мг-нан жоғары дозада дозаны күніне екі қабылдауға бөлу керек. Қажет болған жағдайда дәрігер уақытша пантопразол дозасын 160 мг-нан артық тағайындай алады. Золлингер-Эллисон синдромын және асқазанда қышқылдың жоғары өндірілуімен басқа да ауруларды емдеу ұзақтығы шектелмейді және оны дәрігер жеке таңдайды.

Айрықша топтағы пациенттер

Балалар: Пантоспей препараты тиімділігі мен қауіпсіздігі бойынша деректердің жеткіліксіздігіне байланысты 12 жасқа толмаған балалар мен жасөспірімдерге ұсынылмайды.

Егде жастағы пациенттер: дозаны түзету қажет емес.

Бауыр жеткіліксіздігі бар пациенттер: бауырдың ауыр жеткіліксіздігі кезінде 40 мг Пантоспей препаратын қолдану ұсынылмайды. Пантопразолмен біріктіріп емдеудің тиімділігі мен қауіпсіздігі бойынша деректердің болмауына байланысты Пантоспей препараты бауырдың орташа және ауыр жеткіліксіздігі кезінде H. pylori бактериясын жою үшін біріктірілген ем құрамында қолданылмауы тиіс.

Бүйрек жеткіліксіздігі бар пациенттер: бүйрек функциясы бұзылған пациенттерде дозаны түзету қажет емес. Пантопразолмен біріктірілген емнің тиімділігі мен қауіпсіздігі бойынша деректердің жоқтығына байланысты, Пантоспей препараты бүйрек функциясы бұзылған пациенттерде H. pylori бактериясын жою үшін біріктірілген ем құрамында қолданылмауы тиіс.

Енгізу әдісі мен жолы

Пантоспей таблеткаларын тамақтанға дейін бір сағат бұрын, судың аздаған мөлшерімен ішке қабылдау керек. Таблеткаларды шайнауға немесе ұсақтауға болмайды.

Артық дозаланған жағдайда қабылдануы тиіс шаралар

Симптомдары: белгісіз.

Емі: симптоматикалық, демеуші ем. Препарат гемодиализ жағдайында толық шығарылмайды.

Тоқтату симптомдары қаупінің болуын көрсету

Қолданылмайды.

Дәрілік препаратты қолдану тәсілін түсіндіру үшін медициналық қызметкерге кеңес алуға жүгіну жөніндегі нұсқаулар.

Препаратты дәрігердің тағайындауы бойынша қолдану керек.

ДП стандартты қолданған кезде көрініс беретін жағымсыз реакциялар сипаттамасы және осы жағдайда қабылдануы тиіс шаралар

Жиі (1%-дан артық, бірақ 10%-дан аз пациентте кездеседі):

• асқазан түбінің безді полиптері (қатерсіз)

Жиі емес (0,1%-дан артық, бірақ 1%-даз аз пациентте кездеседі):

• бас ауыруы, бас айналу, ұйқының бұзылыстары (ұйқысыздық, ұйқышылдық)

• диарея, жүрек айнуы/құсу, іштің кебуі, іш қату, ауыздың кеберсуі, іштің ауыруы және жайсыздық

• бауыр ферментінің жоғарылауы (трансаминазалар, γ-GT)

• сүйектердің сынуы, бұлшықет тіндері жасушаларының бұзылуы (рабдомиолиз)

• астения, шаршау және жалпы дімкәстік

• бөртпе, қышыну, экзантема, дерматоз

Сирек (0,01%-дан артық, бірақ 0,1%-дан аз пациентте кездеседі)

• аса жоғары сезімталдық (анафилаксиялық реакцияларды және анафилаксиялық шокты қоса), жүйелі қызыл жегі

• липидтер (триглицеридтер, холестерин) деңгейінің жоғарылауы

• салмақтың өзгеруі, дәм сезу бұзылыстары

• депрессия (және онымен байланысты барлық асқынулар)

• көрудің нашарлауы/ анық көрмеу

• билирубиннің жоғарылауы (өт пигменті), қандағы гранулоциттер мөлшерінің артуы

• күйіктен болған күлдіреуіктерге ұқсайтын тез өршитін, қатты қышитын, терідегі бозғылт-қызғылт күлдіреуіктер (есекжем), терінің терең қабаттарының және теріасты тіндерінің тығыз, асимметриялық, ауыртпайтын ісінуі (ангионевроздық ісіну) 

• буындардың ауыруы, бұлшықеттердің ауыруы, сүт бездерінің ауырсынып ұлғаюы және тығыздалуы

• дене температурасының жоғарылауы, шеткері ісінулер немесе жайылған ісінулер.

Өте сирек (0,001% - дан артық, бірақ 0,01% - дан аз пациентте кездеседі):

• қан жасушаларының барлық үш негізгі түрлерінің (эритроциттер, лейкоциттер және тромбоциттер) санының азаюы

• кеңістікте бағдарлай алмау (және осыған байланысты асқынулар).

Өте сирек/бірлі-жарым жағдайларда және т. б. ( 0,001%-дан аз пациентте кездеседі):

• натрий, магний деңгейінің төмендеуі

• магний деңгейінің төмендеуімен бірге кальций деңгейінің төмендеуі, калий деңгейінің төмендеуі

• елестеулер, сананың шатасуы (әсіресе осы жағдайларға бейім пациенттерде немесе егер олар емдеу басталғанға дейін білінсе, осы симптомдардың нашарлауы), күйдіру, шаншу, жыбырлату сезімдерімен сезімталдық бұзылыстары

• сарғаюмен және бауыр жеткіліксіздігімен бірге бауыр жұмысының бұзылуы

• терідегі және шырышты қабықтардағы бөртпелермен бірге жедел уытты-аллергиялық ауру (Стивенс-Джонсон синдромы), ауыр аллергиялық, жиі дәрілік, ауқымды және ашық қызыл түске (Лайелл синдромы) өтетін терідегі үлкен жалпақ көпіршіктердің дамуымен дерматит, терінің өзін-өзі емдейтін жедел ауруы (мультиформалы эритема), терінің күн сәулесіне реакциясы, қызыл жегінің терідегі жеделге жуық түрі

• қандағы тұз мөлшерінің бұзылуына байланысты бұлшықеттің түйілуі

• кейде бүйрек жеткіліксіздігінің дамуымен олардың функциясының төмендеуіне әкелетін бүйректің зақымдануы (интерстициальді нефрит)

• ұзақ уақыт бойы сулы сұйық нәжіс түрінде көрініс беретін жуан ішектің қабыну аурулары

• антибиотиктерді қолданған кезде ішектің флорасының бәсеңдеуіне байланысты дамитын тік ішектің ауыр инфекциялық ауруы

• В12 дәруменінің жеткіліксіздігі (цианокобаламин).

Жағымсыз дәрілік реакциялар туындаған кезде медицина қызметкеріне, фармацевтика қызметкеріне немесе дәрілік препараттардың тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей жүгіну қажет

Қазақстан Республикасы Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитетінің «Дәрілік заттар мен медициналық бұйымдарды сараптау ұлттық орталығы» ШЖҚ РМК http://www.ndda.kz

Қосымша мәліметтер

Дәрілік препараттың құрамы

Бір таблетканың құрамында

белсенді зат - 40 мг пантопразол (натрий пантопразолы сесквигидраты түрінде)

қосымша заттар: сусыз натрий карбонаты, маннитол, натрий кармеллозасы, натрий крахмалының гликоляты А типі, магний стеараты, коллоидты кремнийдің қостотығы

қабығы: пропиленгликоль, темірдің (III) сары тотығы, титанның қостотығы (Е171), гипромеллоза, триэтилцитрат, метакрил қышқылы және этилакрилат сополимері (1: 1)

Сыртқы түрінің иісінің, дәмінің сипаттамасы

Сәл қызғылт сары түсті ішекте еритін қабықпен қапталған, екі жақ беті дөңес, сопақша пішінді таблеткалар.

Шығарылу түрі және қаптамасы

Полиамид/алюминий/поливинилхлоридті - алюминий фольгадан жасалған пішінді ұяшықты қаптамаға 7 таблеткадан салынған.

Пішінді 4 қаптама медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынған.

3 жыл

Жарамдылық мерзімі өткеннен кейін қолдануға болмайды.

25 0С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәлімет

Laboratorios Normon S.A., Ронда де Вальдекарризо, Трес-Кантос, Мадрид, 6-28760, Испания

Тел: +34918065240

Факс +34918065256

электронды пошта: info@normon.com

Тіркеу куәлігінің ұстаушысы

Spey Medical Ltd., Линтон Хаус 7-12 Тависток Сквер, Лондон, WC1H 9LT, Ұлыбритания

Тел: +7 727 300 69 71

электронды пошта: info@spey.eu

Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Cepheus Medical» (Цефей Медикал) ЖШС, 050000, Қазақстан Республикасы, Алматы қ., Панфилов к-сі 98, «OLD SQUARE» БО, 807 кеңсе,

телефон: +7 (727) 300 69 71, +7 777 175 00 99 (тәулік бойы),

электронды пошта: cepheusmedical@gmail.com