Панадол® (таблетки, 500 мг)
Инструкция
-
русский
-
қазақша
Саудалық атауы
Панадол®
Халықаралық патенттелмеген атауы
Парацетамол
Дәрілік түрі
Үлбірлі қабықпен қапталған 500 мг таблеткалар
Құрамы
Бір таблетканың құрамында
белсенді зат - 500 мг парацетамол,
қосымша заттар: жүгері крахмалы, желатинделген крахмал (еритін), повидон (К 25), калий сорбаты, тальк, стеарин қышқылы, тазартылған су. Үлбірлі қабықтың құрамы: гидроксипропилметилцеллюлоза 15 CPS, триацетин.
Сипаттамасы
Фармакотерапиялық тобы
Анальгетиктер. Басқа да анальгетик-антипиретиктер. Анилидтер. Парацетамол
АТХ коды N02BE01
Фармакологиялық қасиеттері
Фармакокинетикасы
Парацетамол асқазан-ішек жолынан тез және іс жүзінде толығымен сіңеді. Қан плазмасындағы ең жоғары концентрациясына 30-60 минуттан соң жетеді. Емдік дозада қабылдағанда жартылай шығарылу кезеңі 1-4 сағатты құрайды. Организмнің барлық сұйықтығында біркелкі таралады. Плазма ақуыздарымен байланысуы құбылмалы, препарат 20-дан 30% дейін жедел уыттану жағдайында байланысады. Емдік дозада қабылдағанда препараттың 90-100% бірінші күні ішінде несеппен шығарылады. Парацетамолдың негізгі мөлшері бауырдағы конъюгациядан кейін, 5% - өзгермеген түрде шығарылады.
Фармакодинамикасы
Парацетамол – анальгетик-антипиретик. Гипоталамустағы простагландиндер синтезін бәсеңдету арқылы ауыруды басатын және ыстықты түсіретін әсер береді.
Шеткергі тіндердегі простагландиндер синтезіне бөгегіш әсерінің болмауы онда асқазан-ішек жолы шырышты қабығына жағымсыз әсерлерінің болмауына себепші болады. Осыған байланысты шеткергі тіндердегі простагландиндер синтезін бәсеңдету қажет етілмейтін пациенттерге, мысалы сыртартқыда асқазан-ішектен қан кету болғанда немесе егде жастағы пациенттерде қолданған дұрыс болады.
Қолданылуы
- бас ауыруында, бас сақинасында, тіс ауыруында, тіс жұлғаннан немесе басқа да стоматологиялық араласулардан кейінгі ауыруында, буындар мен бұлшықеттердің ауыруында, вакцинациядан кейінгі қызба мен ауыруда, тамақ ауыруында, ауырумен жүретін етеккірде, остеоартрит кезіндегі ауыруда, жоғары температураны түсіруде.
Қолдану тәсілі мен дозалары
Ересектер (егде жастағыларды қоса) және 12 жастағы және одан асқан балаларға: 500-1000 мг (1-2 таблетка) қажеттілігіне қарай әрбір 4-6 сағат сайын. Қабылдаулар аралығы – кем дегенде 4 сағат. Ең жоғары тәуліктік доза – 4000 мг (8 таблетка).
Балалар (6-11 жас): 250-500 мг (1/2 - 1 таблетка) қажеттілігіне қарай әрбір 4-6 сағат сайын. Қабылдаулар аралығы – кем дегенде 4 сағат.
Ең жоғары тәуліктік доза баланың дене салмағына 60 мг/кг құрайды, 24 сағат ішінде бір реттік дозаларға бөлінген 10-15 мг/кг құрайды. Бір реттік дозаны 24 сағат ішінде 4 рет қана қабылдауға болады.
Дәрігердің тағайындауынсыз және қадағалауынсыз ең ұзақ қолданылуы - 3 күн.
Егер симптомдары сақталатын болса, дәрігерге қаралу қажет.
Көрсетілген дозасынан асырмау керек.
Құрамында парацетамол бар басқа препараттармен бір мезгілде қабылдамау керек.
Жағымсыз әсерлері
Өте сирек (<1/10 000)
- анафилаксия, аса жоғары сезімталдық реакциялары, тері бөртпесі, ангионевроздық ісіну, Стивенс-Джонсон синдромын қоса
- тромбоцитопения
- ацетилсалицил қышқылы мен басқа ҚҚСП сезімталдығы жоғары пациенттерде бронх түйілуі (егер бұрын ацетилсалицил қышқылын және қабынуға қарсы стероидты емес препараттарды қабылдағанда тыныс алудың бұзылуы байқалса, препаратты қабылдамаған жөн)
- бауыр функциясының бұзылуы
Жоғарыда аталған жағымсыз реакциялар туындаған кезде, сондай-ақ теріде қабыршықтану, ауыз қуысындағы ойық жаралар түзілуі, тыныс алудың қиындауы, ерін, тіл, тамақ пен беттің ісінуі, гематомалар, қан кетулер немесе препаратқа кез келген басқа да жағымсыз реакциялар пайда болғанда препарат қабылдауды дереу тоқтатып, дәрігерге қаралу керек.
Қолдануға болмайтын жағдайлар
- парацетамолға немесе препараттың кез келген басқа ингредиентіне жоғары сезімталдық
- 6 жасқа дейінгі балаларға
Дәрілермен өзара әрекеттесуі
Ұзақ уақыт бойы қабылдағанда препарат тікелей емес антикоагулянттардың (варфарин және басқа кумариндер) әсерін күшейтеді, бұл қан кетулер қаупін арттырады; бір реттік дозалар елеулі әсер етпейді.
Айрықша нұсқаулар
Құрамында парацетамол бар басқа препараттармен бір мезгілде қабылдамаған дұрыс.
Препаратты қабылдар алдында дәрігердің кеңесі қажет:
- бауырдың созылмалы аурулары бар пациенттерге (қатар жүретін бауыр аурулары парацетамол қабылдағанда бауырдың зақымдану қаупін арттырады)
- бүйректің созылмалы аурулары бар пациенттерге
- варфарин немесе қанды сұйылтуға арналған басқа да препараттарды қабылдайтын пациенттерге
- бас ауыруы тұрақты болып кеткен жағдайда
- глутатион деңгейі төмендеуімен (мысалы, сепсис сияқты ауыр инфекциялармен) қатар жүретін жай-күйлер болған кездегі пациенттерге, бұл метаболизмдік ацидоз туындау қаупін ұлғайтуы мүмкін.
Метаболизмдік ацидоз симптомдары терең, жиі немесе қиын тыныс алу, жүрек айну, құсу, тәбетті жоғалту болып табылады.
Осы симптомдар пайда болған жағдайда дереу дәрігерге көріну керек. Артық дозалану қаупі бауырдың циррозды емес алкогольдік ауыруы бар пациенттерде барынша ықтимал.
Жүктілік және лактация кезеңі
Парацетамолды жүктілік кезінде қолданудың эпидемиологиялық деректері ұсынылатын дозада қабылдағанда жағымсыз әсері жоқ екендігін көрсетіп отыр, алайда препаратты қабылдаудың алдында дәрігермен кеңесу қажет. Парацетамол плацентарлық бөгет арқылы өтеді және емшек сүтіне түседі, бірақ клиникалық елеусіз мөлшерде ғана болады. Қол жетімді жарияланған деректерде препаратты емшекпен қоректендіру кезеңінде қабылдауға қатысты қарсы көрсетілімдер жоқ.
Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері
Автомобиль жүргізу мен механизмдермен жұмыс жасау жөнінде шектеулер жоқ.
Артық дозалануы
Ұсынылған дозадан асып кеткен жағдайда өзін жақсы сезінгеннің өзінде, дереу медициналық көмекке жүгінген жөн, өйткені кейіннен болатын күрделі бауырдың зақымдану қаупі бар.
Парацетамолдың 10 және одан асатын грамын қабылдағанда ересектерде бауырдың зақымдануы мүмкін. Парацетамолдың 5 және одан асатын грамын қабылдағанда төмендегі қауіп факторлары бар пациенттерде бауыр зақымдануына әкелуі мүмкін:
- карбамазепинмен, фенобарбиталмен, фенитоинмен, примидонмен, рифампицинмен, шілтерлі шайқурай препараттарымен немесе бауыр ферменттерін көтермелейтін басқа да препараттармен ұзақ емдеу;
- алкогольді шамадан тыс тұрақты қабылдау;
- глутатион деңгейінің төмендеуімен қатар жүретін жай-күй (тамақтанудың бұзылуы, муковисцидоз, АИТВ-инфекция, ашығу, жүдеу).
Алғашқы 24 сағатта парацетамолмен жедел улану симптомдары жүрек айну, құсу, асқазанның ауыруы, тершеңдік, тері жабындарының бозаңдануы болып табылады. Бауырдың зақымдануы артық дозаланудан кейін 12-48 сағаттан соң анықталады.
Глюкоза метаболизмінің бұзылуы және метаболизмдік ацидоз туындауы мүмкін. Ауыр уланғанда бауыр жеткіліксіздігі энцефалопатияға, қан құйылуға, гипогликемияға, ми ісінуі мен өліммен аяқталуға үдеп кетуі мүмкін. Өзекшелердің жедел некрозы бар жедел бүйрек жеткіліксіздігі белдің қатты ауыруымен, гематуриямен, протеинуриямен байқалуы және бауырдың ауыр зақымдануынсыз дамуы мүмкін. Сондай-ақ жүрек аритмиясы мен панкреатит байқалған.
Емі: Артық дозаланғанда шұғыл медициналық жәрдем қажет. Пациентті артық дозаланудың ерте симптомдары болмаса да, дереу ауруханаға жеткізу керек. Симптомдар жүрек айну және құсумен шектелуі мүмкін немесе артық дозалану мен ағзалардың зақымдану қаупін көрсетпеуі ықтимал. Белсендірілген көмірмен емдеу парацетамолдың шамадан тыс дозасы 1 сағат ішінде қабылданғанда орынды болмақ. Қан плазмасында парацетамолдың концентрациясын препарат қабылдаудан кем дегенде 4 сағаттан кейін және одан кештеу анықтаған жөн (концентрацияның барынша ерте анықталуы сенімді болып табылмайды).
N-ацетилцистеинмен емдеуді парацетамол қабылдағаннан кейін 24 сағат ішінде жүргізуге болады, алайда осы у қайтарғының ең жоғары әсеріне қабылдаудан кейін 8 сағат ішінде қолданғанда қол жеткізіледі. У қайтарғының тиімділігі осы уақыттан кейін күрт төмендейді. Қажет болғанда пациентке N-ацетилцистеинді ұсынылатын дозаға сәйкес көктамыр ішіне енгізеді. Құспаған кезде ауруханаға шұғыл тасымалдау мүмкін болмағанда метионинді балама ретінде ішу арқылы қолдануға болады.
Шығарылу түрі мен қаптамасы
Поливинилхлоридті үлбірден және алюминий фольгадан жасалған пішінді ұяшықты қаптамаға 6, 8 немесе 12 таблеткадан салынған.
1 (6 немесе 12 таблеткадан) немесе 8 (8 таблеткадан) пішінді ұяшықты қаптамадан қолдану жөніндегі нұсқаулықпен бірге картон қорапқа салынған.
Сақтау шарттары
25ºC-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
5 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецептісіз
Өндіруші ұйымның атауы мен елі
«ГлаксоСмитКляйн Дангарван Лтд», Ирландия
Knockbrack, Dungarvan, County Waterford, Republic of Ireland
Тіркеу куәлігі иесінің атауы мен елі
«ГлаксоСмитКляйн Консьюмер Хелскер», Ұлыбритания
Қаптаушы ұйымның атауы мен елі
Эс.Си. Еврофарм С.А., Румыния
2 Panselelor str, Brasov, county of Brasov, 500419, Romania
Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы
«ГлаксоСмитКляйн Экспорт Лтд» ӨК
Алматы қ., Фурманов к-сі, 273. тел. +7 (727) 258 28 92, (727) 244-69-99, факс +7 (727) 258 28 90 (автомат). Электронды поштасы: kz.safety@gsk.com