Паклитаксел медак (6 мг/мл по 50 мл)

• русский
• қазақша

• Скачать инструкцию медикамента

Саудалық атауы

Паклитаксел медак

Халықаралық патенттелмеген атауы

Паклитаксел

Дәрілік түрі

30 мг/5 мл, 100 мг/16.7 мл, 300 мг/50 мл

инфузия үшін ерітінді дайындауға арналған 6 мг/мл концентрат

Құрамы

1 мл препараттың құрамында

белсенді зат – 6 мг паклитаксел

қосымша заттар – макроголглицеролрицинолеат (кремофор ELP), сусыз лимон қышқылы, сусыз этанол.

Сипаттамасы

Сарғыш түсті мөлдір тұтқыр ерітінді.

Фармакотерапиялық тобы

Ісікке қарсы препараттар.

Өсімдік текті алкалоидтар. Таксандар. Паклитаксел.

АТХ коды: L01CD01

Фармакологиялық қасиеттері

Фармакокинетикасы

Паклитаксел фармакокинетикасы көктамырішілік инфузияның ұзақтығына және енгізілген дозаға байланысты: 135 мг/м2 және 175мг/м2 дозалармен 3 және 24 сағаттық инфузиялар. Паклитаксел дозасын 135 мг/м2-ден 175 мг/м2 дейін арттырғанда Сmax және AUC >∞ көрсеткіштері, тиісінше, 75% және 81% артады. Орташа таралу көлемі 198-ден 688 л/м2 дейін ауытқып отырады, бұл тіндердегі тамырлардан тыс қарқынды таралуын көрсетеді. Жартылай шығарылу кезеңі 3,0-ден 52,7 сағатқа дейін құрайды. Организмнен жалпы клиренсінің орташа мәндері 11,6-дан 24,0 л/сағ./м2 дейін өзгеріп отырады. Қан плазмасында паклитаксел концентрациялары едәуір жоғары болған кезде жалпы клиренсінің азаю үрдісі бар.

Паклитакселдің қан плазмасы ақуыздарымен байланысуы 89-98% құрайды. Емдеудің көп реттік курстарында паклитакселдің жинақталуы байқалмайды.

Өзгермеген препараттың бүйрекпен шығарылуының орташа мәндері 1,3%-дан 12,6% дейін ауытқып, аса қарқынды бүйректік емес клиренсті көрсетеді. Паклитаксел Р450 цитохромы ферменттерімен гидроксилденген метаболиттер түзілгенше метаболизденеді. Бауырлық метаболизм және өт клиренсі паклитакселдің организмнен шығарылуының негізгі механизмі болып табылады.

Фармакодинамикасы

Паклитаксел медак Taxus Baccata өсімдігінен жартылай синтетикалық жолмен алынатын ісікке қарсы табиғи текті препарат болып табылады. Әсер ету механизмі тубулиннің димерлі молекулаларынан алынған микротүтікшелердің «жиналуына» көтермелеу, олардың құрылымын тұрақтандыру және интерфазада динамикалық қайта құрылуын тежеу қабілетімен байланысты, ол жасушалардың митоздық қызметін бұзады.

Қолданылуы

- цисплатинмен біріктірілген химиялық емнің алғашқы желісіндегі (таралған түрі немесе 1 см-ден астам қалдық ісікті лапаротомиядан кейін) және платина препараттарымен стандартты химиялық ем сәтсіздігінен кейінгі химиялық емнің екінші желісіндегі (метастаздық обыр) аналық бездер обырында

- антрациклиндермен және циклофосфамидпен емдеудің ұзартылған режиміне балама ретінде антрациклиндермен және циклофосфамидпен емдеуден кейінгі адъювантты еміндегі (лимфа түйіндерінің зақымдануы болғанда) сүт безі обырында

- иммуногистохимиялық зерттеулер нәтижелері бойынша 3+ деңгейіндегі HER-2 гиперэкспрессиялары болғанда және антрациклинге қарсы көрсетілімдері бар пациенттерде, сондай-ақ құрамында антрациклин бар стандартты химиялық ем тиімсіз немесе мүмкін болмаған кездегі монотерапияда антрациклиндермен (антрациклин көрсетілген пациенттерде) немесе трастузумабпен біріктірілген алғашқы желідегі сүт безінің жергілікті жайылған немесе метастаздық обырында

- радикальді операция және/немесе сәулелі ем жүргізу мүмкін болмағанда цисплатинмен біріктірілген өкпенің кең таралған ұсақ жасушалы емес обырында

- липосомалық антрациклиндермен емдеудің алғашқы желісі тиімсіз болғанда ЖИТС-пен астасқан Капоши саркомасында.

Қолдану тәсілі және дозалары

Аналық бездер обырын химиялық емдеудің цисплатинмен біріктірілген алғашқы желісі.

Инфузия ұзақтығына қарай Паклитаксел медактың екі дозасы ұсынылады:

- Паклитаксел медак 175мг/м2 көктамыр ішіне 3 сағаттан астам уақыт бойы енгізуге тағайындалып, кейіннен циклдар арасындағы үш апта үзіліспен 75мг/м2 дозадағы цисплатин енгізіледі.

- 135мг/м2 дозадағы Паклитаксел медак 24 сағаттық инфузия түрінде, кейіннен циклдар арасындағы үш апта үзіліспен 75 мг/м2 дозадағы цисплатин енгізіледі.

Аналық без обырын химиялық емдеудің екінші желісі.

Паклитаксел медактың ұсынылатын 175 мг/м2 дозасы циклдар арасындағы үш апталық үзіліспен 3 сағат бойы енгізіледі.

Сүт безі обырының адъювантты химиялық емі:

Паклитаксел медактың ұсынылатын 175 мг/м2 дозасы антрациклиндермен және циклофосфамидпен емдеуден кейін 4 цикл бойы үш апталық үзіліспен 3 сағат бойы енгізіледі (АС режимі).

Сүт безі обырын химиялық емдеудің алғашқы желісі:

50 мг/м2 доза доксорубицинмен біріктіріп енгізгенде Паклитаксел медакты доксорубициннен кейін 24 сағаттан соң енгізу қажет. Паклитаксел медактың ұсынылатын дозасы 220 мг/м2 құрайды және циклдар арасындағы 3 апталық үзіліспен 3 сағаттан астам уақыт бойы көктамырішілік инфузия түрінде енгізіледі. Трастузумабпен біріктірілгенде Паклитаксел медактың ұсынылатын дозасы 175 мг/м2 құрайды және циклдар арасындағы 3 апталық үзіліспен 3 сағаттан астам бойы көктамыр ішіне енгізіледі. Трастузумабпен біріктірілген Паклитаксел медак инфузиясын трастузумабтың алғашқы дозасын енгізгеннен кейін келесі күні немесе, егер трастузумабтың алдыңғы дозасының көтерімділігі жақсы болса, тура трастузумабтың демеуші дозасын енгізген бойда жүргізген жөн.

Сүт безі обырын химиялық емдеудің екінші желісі:

Паклитаксел медактың ұсынылатын дозасы 175 мг/м2 құрайды және циклдар арасындағы 3 апталық үзіліспен 3 сағаттан астам уақыт бойы көктамырішілік инфузия түрінде енгізіледі.

Өкпенің ұсақ жасушалы емес жайылған обыры:

Паклитаксел медактың ұсынылатын дозасы 175 мг/м2 құрайды және 3 сағаттан астам уақыт бойы көктамырішілік инфузия түрінде енгізіліп, кейіннен циклдар арасындағы 3 апта үзіліспен 80 мг/м2 дозадағы цисплатин енгізіледі.

ЖИТС-пен астасқан Капоши саркомасын емдеу:

Паклитаксел медактың ұсынылатын дозасы 100 мг/м2 құрайды және әр 2 апта сайын 3 сағаттан астам уақыт бойы көктамырішілік инфузия түрінде енгізіледі. Паклитаксел медактың кейінгі дозалары жекеше көтерімділігіне сәйкес тағайындалуы тиіс.

Паклитаксел медакты қайталап енгізу нейтрофильдер деңгейі 1,5х109/л (Капоши саркомасы бар пациенттер үшін 1х109/л дейін) және тромбоциттер 100х109/л дейін (Капоши саркомасы бар пациенттер үшін 75х109/л дейін) қалпына келгенше жүргізілмеуі тиіс. Айқын нейтропения (7 күн және одан көп уақыт бойы 0,5х109/л-ден аз) немесе айқын шеткергі нейропатия дамыған жағдайда Паклитаксел медак дозасы кейінгі циклдарда 20% (Капоши саркомасы бар пациенттер үшін 25%) азайтылуы тиіс.

Бауыр функциясы бұзылған пациенттер:

Бауыр функциясы жеңіл немесе орташа бұзылулары бар пациенттер үшін Паклитаксел медакты дозалау жөнінде айрықша нұсқаулар жоқ. Ауыр сипатты бауыр патологиясы бар пациенттерде Паклитаксел медак қолданылмайды.

Инфузияға арналған ерітіндіні дайындау

Инфузия жүргізер алдында Паклитаксел медак асептикалық жағдайларда 0,9% натрий хлориді ерітіндісімен немесе 5% глюкоза ерітіндісімен 0,3-1,2 мг/мл концентрацияға дейін сұйылтылуы тиіс.

Дайындалған ерітінділер бөлме температурасында (25оС-ден аспайтын) кемінде 72 сағат бойына (дайындау және құю уақытын қоса) тұрақты болады. Сұйылтылған ерітінділерді, преципитаттар түзілуі мүмкін екеніне орай, тоңазытқышқа салмаған дұрыс.

Дайындалған ерітінділер дәрілік түр құрамында тасымалдаушы-негіздің болуы салдарынан бозаңдануы мүмкін, оның үстіне сүзілгеннен кейін ерітіндінің бозаңдануы сақталады. Паклитаксел медакты құрылмалы жарғақшалық сүзгісі (тесіктерінің өлшемі 0,22 микроннан аспайды) бар жүйе арқылы енгізген жөн.

Кейде, әдетте Паклитаксел медактың 24 сағаттық инфузиясының соңында преципитаттар түзілуі мүмкін. Бұл суперсатурацияға байланысты болады. Преципитаттар түзілу қаупін азайту үшін Паклитаксел медак сұйылтылған соң қанша мүмкін болса, сонша жылдам пайдаланылуы тиіс, сонымен бірге ерітіндінің шамадан тыс тербелуіне және шайқалуына жол бермеген жөн. Қолданар алдында инфузиялық жүйелер «жуылуы» тиіс. Инфузия кезінде ерітіндінің сыртқы түрін жиі тексеру керек, әрі преципитаттар пайда болғанда Паклитаксел медак инфузиясы тоқтатылуы тиіс.

Қолдану кезіндегі сақтандыру шаралары

Паклитаксел медакпен жұмыс істегенде, ісікке қарсы басқа да препараттармен жұмыс істеу кезіндегідей, сақ болу қажет. Ерітінділер дайындаумен осы мақсатта арнайы бөлінген аймақта асептикалық жағдайларды қадағалаумен үйретілген қызметкер айналысуы тиіс. Қорғаныш қолғаптарын пайдалану қажет. Препаратты теріге және шырышты қабықтарға тигізіп алмау керек. Шырышты қабықтарға тигізіп алғада сумен мұқият шайып, теріге тигізіп алғанда сабынды сумен жуу керек. Препаратты ішке тартудан кейін диспноэ, кеуденің ауыруы және жүрек айну пайда болуы мүмкін.

Жағымсыз әсерлері

Өте жиі (> 1/10)

- өліммен аяқталуға дейін апаратын инфекциялар (негізінен несеп шығару және жоғарғы тыныс жолдарының инфекциялары)

- миелосупрессия, нейтропения, анемия, тромбоцитопения, лейкопения, қан кетулер

- аса жоғары сезімталдықтың жеңіл реакциялары (негізінен қан кернеулер және бөрту)

- шеткергі нейропатия

- гипотензия

- жүрек айну, құсу, диарея, мукозиттер

- алопеция

- артралгия, миалгия

Жиі (> 1/100, < 1/10)

- брадикардия

- тырнақтардың және терінің өткінші орташа айқын өзгерістері

- енгізген жердегі реакциялар (ісіну, ауыру, эритема, қатаю, кейде экстравазация теріасты шелінің қабынуын, фиброз және тері некрозының дамуына түрткі болуы мүмкін)

- АСТ, сілтілі фосфатазаның айқын жоғарылауы

Жиілігі аз (> 1/1,000, < 1/100)

- сепсистік шок

- емдеуді талап ететін аса жоғары сезімталдықтың айқын реакциялары (гипотензия, ангионевроздық ісіну, респираторлық дистресс, жайылған есекжем, қалтырау, арқаның, кеуденің ауыруы, тахикардия, абдоминальді ауырулар, аяқ-қолдың ауыруы, терлеу және гипертензия)

- кардиомиопатия, симптомсыз қарыншалық тахикардия, экстрасистолиялы тахикардия, атриовентрикулярлы бөгет, синкопальді жай-күйлер, миокард инфарктісі

- гипертензия, тромбоз, тромбофлебит

- ішек бітелісі, ішектің тесілуі, ишемиялық колит, панкреатит

- қанда билирубин деңгейінің айқын жоғарылауы

Сирек (>1/10000, <1/1000)

- пневмония, перитонит, сепсис

- фебрильді нейтропения

- анафилактикалық реакциялар

- моторлы нейропатия (аздаған дистальді әлсіздікке ауысатын)

- жүрек жеткіліксіздігі

- диспноэ, плевралық жалқық, интерстициальді пневмония, өкпе фиброзы, өкпе эмболиясы, тыныс жеткіліксіздігі

- қышыну, бөртпе, эритема

- астения, қызба, дегидратация, ісіну, дімкәстану

- қан креатининінің көтерілуі

Өте сирек (< 1/10,000)

- жедел миелоидты лейкоз, миелодисплазиялық синдром

- анафилактикалық шок

- анорексия

- сананың шатасуы

- автономды нейропатия (салданған ішек бітелісіне және ортостатикалық гипотензияға ауысатын), ауқымды құрысу ұстамалары, конвульсиялар, энцефалопатия, бас айналу, бас ауыру, атаксия

- көру жүйкесінің зақымдануы және/немесе көру бұзылыстары (жыпылықтаушы скотома), әсіресе, ұсынылуынан артық дозалар алатын пациенттерде

- отоуыттылық, естімей қалу, құлақтың шуылдауы, бас айналу

- жүрекшелер фибрилляциясы, суправентрикулярлы тахикардия

- шок

- жөтел

- мезентериялық тромбоз, жалған жарғақшалы колит, эзофагит, іш қату, асцит, нейтропениялық колит

- бауыр некрозы, өліммен аяқталатын бауыр энцефалопатиясы

- Стивенс-Джонсон синдромы, эпидермалық некролиз, мультиформалы

эритема, эксфолиативті дерматит, везикулярлы бөртпе, онихолизис

(емдеу кезінде пациенттерге қолдары мен табандарына күннен қорғайтын дәрілер жағу ұсынылады)

Белгісіз (жиілігін анықтау мүмкін емес):

- ісіктің ыдырау синдромы

- макулярлы ісіну, фотопсия, шыны тәрізді дененің жүзгінді қосылыстары

- флебит

- склеродермия

- жүйелі қызыл жегі

Паклитаксел медак алатын сүт безінің обырына шалдыққан пациенттерде АС-дан кейін адьювантты ем аясындағы нейроуыттылық симптомдары, аллергиялық реакциялар, артралгиялар/миалгиялар, анемия, инфекциялар, қызба, жүрек айну/құсу, диарея тек АС емін алатын пациенттермен салыстырғанда жиірек кездеседі.

Қолдануға болмайтын жағдайлар

- паклитакселге немесе препарат құрамына кіретін басқа да компоненттерге, әсіресе полиоксиэтилденген майсана майына (макроголглицеролрицинолеат) аса жоғары сезімталдық реакциялары

- нейтропения (нейтрофильдер cаны 1,5х109/л-ден аз және Капоши саркомасында 1х109/л-ден аз)

- Капоши саркомасы кезіндегі ауыр сипатты қатарлас инфекциялық аурулар

- жүктілік және лактация кезеңі

- 18 жасқа дейінгі балаларға

- бауыр функциясының ауыр бұзылулары

Дәрілермен өзара әрекеттесуі

Циметидин паклитаксел клиренсіне ықпалын тигізбейді.

Аналық бездер обырын химиялық емдеудің алғашқы желісінде Паклитаксел медакты цисплатиннің алдында енгізу ұсынылады. Егер Паклитаксел медак цисплатиннің алдында енгізілсе, оның қауіпсіздік бейіні паклитаксел монотерапиясы кезіндегісімен сәйкес келеді. Паклитаксел медак цисплатиннен кейін енгізілгенде пациенттерде едәуір терең миелосупрессияның даму қаупі жоғарылайды, паклитаксел клиренсі шамамен 20% төмендейді. Палитаксел медакпен және цисплатинмен ем алатын пациенттерде, монорежимде гинекологиялық карциномаларды цисплатинмен емдеген кездегідей, бүйрек жеткіліксіздігінің даму қаупі артады.

Паклитаксел медак пен доксорубицинді қысқа уақыт аралығымен енгізгенде доксорубицин мен оның белсенді метаболиттерінің шығарылуы төмендеуі мүмкін, сондықтан Паклитаксел медак сүт безінің метастаздық обырын алғаш емдегенде доксорубициннен кейін 24 сағаттан соң енгізілуі тиіс.

Белгілі әлеуетті CYP3А4 тежегіші – кетоконазолды бір мезгілде тағайындау Паклитаксел медак шығарылуын бәсеңдетпейді, сондықтан осы екі дәрілік затты дозаларын түзетпей-ақ бір мезгілде тағайындауға болады.

Паклитаксел медакты CYP2C8 және CYP3А4 ферменттерінің тежегіштері болып табылатын дәрілік заттармен (мысалы, эритромицин, флуоксетин, гемфиброзил) немесе CYP2C8 және CYP3А4 ферменттері индукторларымен (мысалы, рифампицин, карбамазепин, фенитоин, фенобарбитал, эфавиренз, невирапин) бір мезгілде тағайындаған кезде сақтық таныту талап етіледі.

Капоши саркомасы бар пациенттерде нелфинавир мен ритонавир қабылдаған кезде (бірақ, индинавирді емес) Паклитаксел медак жүйелік клиренсі едәуір төмендеген. Сондықтан Паклитаксел медак қатарласқан ем ретінде протеаза тежегіштерін алатын пациенттерде абайлап тағайындалуы тиіс.

Полиоксиэтилденген майсана майы поливинилхлоридті (ПВХ) контейнерлерден ди-(2-этилгексил) фталаттың (ДЭГФ) экстракциясын тудыруы мүмкін, экстракция деңгейі уақыттың және ерітінді концентрациясының артуымен жоғарылайды. Сондықтан Паклитаксел медак ерітіндісінің дайындау, оларды сақтау және енгізу құрамында ПВХ жоқ ыдыстарды және жабдықтарды пайдаланумен атқарылуы тиіс.

Айрықша нұсқаулар

Паклитаксел медакпен емдеу ісікке қарсы химиялық препараттармен жұмыс істеу тәжірибесі бар дәрігердің бақылауымен жүргізілуі тиіс. Аса жоғары сезімталдық реакциялары дамыған жағдайда шұғыл жәрдем көрсету үшін тиісті құрал-жабдықтар қолжетімді болуы тиіс.

Паклитаксел медак енгізілер алдында барлық пациенттер кортикостероидтармен, гистаминге қарсы препараттармен және Н2 рецепторларының антагонистерімен премедикациядан өтуі тиіс, мысалы:

* Капоши саркомасы бар пациенттер үшін 8-20 мг

** гистаминге қарсы баламалы препарат (мысалы, хлорфенирамин)

Паклитаксел медак олар біріктіріп тағайындалған жағдайда цисплатин алдында енгізілуі тиіс.

Препарат енгізу кезінде, экстравазация ықтималдығына орай, енгізген жерде инфильтрат пайда болуы тұрғысынан ұқыпты қарап тексеруге кеңес беріледі.

Енгізген жердегі реакциялар көктамыр ішіне тағайындағанда жергілікті ісінудің, ауырудың, эритема мен қатаюдың дамуына апарады. Кейде экстравазация теріасты шелінің қабынуына алып келеді. Кейде экстравазациямен байланысты тері қабыршақтанған жағдайлар сипатталған. Тері жабындарының депигментациясы орын алады. Паклитаксел басқа жерлерге енгізілгеннен кейін дамитын алдыңғы экстравазация орындарындағы тері реакциялары сирек сипатталған. Эстравазацияны спецификалық емдеу түрі жоқ. Кейде енгізген жердегі реакциялар ұзақ уақыт енгізген кезде-ақ басталды, сондай-ақ 7-10 күн аралығы өткенде дамыды.

Диспноэ, гипотензия, ангионевроздық ісіну және жайылған есекжем түрінде өтетін аса жоғары сезімталдықтың ауыр реакциялары сирек байқалады (талапқа сай премедикациядан өткен 1%-дан аз пациентте). Аса жоғары сезімталдық реакцияларының алғашқы белгілерінде Паклитаксел медак инфузиясы дереу тоқтатылуы тиіс. Симптоматикалық ем басталуы тиіс, бұл орайда Паклитаксел медакты пациентке одан әрі тағайындауға болмайды.

34% пациентке (барлық емдеу курстарының 17%-ы) емдеу қажет болмаған және паклитакселді тоқтатуға әкелмеген жеңіл аллергиялық реакцияларды, негізінен, қан кернеулері мен бөртулерді өткерген.

Миелосупрессия (алғашқы кезекте нейтропения) дозаны шектейтін уыттылық болып саналады. Қан талдау Паклитаксел медакпен емдеу кезінде мұқият бақылануы тиіс. Пациенттер нейтрофильдер деңгейі > 1,5х109/л (КС бар пациенттер үшін ≥ 1х109/л) және тромбоциттер деңгейі > 100х109/л (КС бар пациенттер үшін > 75х109/л) қалпына келмейінше Паклитаксел медак алмауы тиіс. Анемия айқындылығы мен даму жиілігінің гемоглобиннің бастапқы көрсеткіштерімен байланысы бар.

Жүрек өткізгіштігінің айқын бұзылулары Паклитаксел медакпен монорежимде емделгеннен кейін сирек байқалады. Егер пациенттерде емделу кезінде жүрек өткізгіштігінің анық бұзылулары дамыса, тиісінше емдеуді бастау қажет, ал кейіннен Паклитаксел медак енгізілгенде жүрек қызметін тұрақты бақылап отыру қажет. Паклитаксел медак енгізілген кезде артериялық қысымның төмендеуі немесе көтерілуі, брадикардия байқалады; әдетте олар симптомсыз өтеді және қандай да бір емді талап етпейді. Өмірлік маңызды қызметтер көрсеткіштерін, әсіресе Паклитаксел медак инфузиясының алғашқы сағатында жиі бақылау ұсынылады. Өкпенің ұсақ жасушалы емес обырына шалдыққан науқастарда айқын жүрек-қантамырлық асқынулар сүт бездерінің немесе аналық бездерінің обыры бар науқастардағыдан жиірек байқалады.

Сүт безінің метастаздық обырын химиялық емдеудің алғашқы желісінде Паклитаксел медакты доксорубицинмен немесе трастузумабпен біріктіріп қолданғанда жүрек қызметін ерекше бақылау қажет. Осы біріктірілімде Паклитаксел медакпен емдеу жоспарланатын пациенттер сыртартқысын, клиникалық тексерілу, ЭКГ, эхокардиография және/немесе миокардты сканирлеуді қоса, жүрек қызметін алдын ала тексеруден өткізуі тиіс. Жүрек қызметі бүкіл емделу кезеңі ішінде (мысалы, әрбір 3 ай сайын) бақылануы тиіс. Мониторинг жүрек қызметінің бұзылуы дами бастаған пациенттерді анықтауға көмектесуі мүмкін, ал емдеуші дәрігер жүректің вентрикулярлы қызметін зерттеу жиілігіне қатысты шешім қабылдаған кезде антрациклиндердің жиналып қалған дозасын (мг/м2) тиянақты бағалауы тиіс. Егер тексеруде жүрек қызметінің нашарлауы анықталса, тіпті егер ол клиникалық көрініс бермесе де, жүрек жеткіліксіздігінің, соның ішінде қайтымсыз түрінің даму қаупіне орай, емдеуші дәрігер емдеуді әріқарай жалғастырудан болатын пайда мен қауіп арақатынасын мұқият бағалауы тиіс. Егер ем жалғастырылса, жүрек қызметіне бақылау, мысалы, емдеудің әр 1-2 циклында жиі жүргізілуі тиіс.

Шеткергі нейропатия жиі білінсе де, айқын симптомдар сирек дамиды. Ауыр жағдайларда барлық кейінгі циклдар ішінде Паклитаксел медак дозасын 20% (Капоши саркомасы бар пациенттер үшін 25%) азайту ұсынылады. Химиялық емдеудің алғашқы желісі ретінде Паклитаксел медакты цисплатинмен біріктірілген 3 сағаттық инфузия түрінде алған, өкпенің ұсақ жасушалы емес обыры бар және аналық бездер обырына шалдыққан науқастарда айқын нейроуыттылық тек Паклитаксел медак немесе кейіннен цисплатиннің енгізілуімен циклофосфамид алған науқастардағыдан жиірек дамиды. Жалпы, нейроуыттылық, көбінесе шеткергі нейропатия симптомдары жиірек білінеді, әрі паклитаксел цисплатинмен біріктірілгенде 175 мг/м² паклитакселдің (85% пациент, 15% - ауыр патологиясы бар) 3 сағаттық инфузиясынан кейін, 24 сағат ішінде 135 мг/м2 паклитаксел енгізумен салыстырғанда, қатты айқын болады (тиісінше, 25% және 3%). Шеткергі нейропатия алғашқы курс ішінде туындап, кейінгі енгізулер кезінде үдеп кетеді. Шеткергі нейропатия сирек жағдайларда паклитакселмен емдеуді үзуді талап етеді. Әдетте тоқтатқаннан кейін бірнеше ай ішінде жағдай жақсарып, симптомдар басылады. Паклитакселмен емдеу салдарынан бұрын болған нейропатия препаратты тағайындауға қарсы көрсетілім болып табылмайды.

Бауыр жеткіліксіздігі бар пациенттерде уыттанудың, атап айтқанда, III-IV дәрежелі миелоуыттылықтың жоғары даму қаупі болуы мүмкін. Паклитаксел уыттылығының оны бауыр функциясы жеңіл бұзылған пациенттерге 3 сағаттық инфузия түрінде тағайындағанда арта түсетіні туралы деректер жоқ. Паклитаксел медак ұзаққа созылатын инфузиялар түрінде тағайындалғанда орташа айқын және айқын бауыр жеткіліксіздігі бар пациенттерде миелосупрессия байқалуы мүмкін. Пациенттерде терең миелосупрессияның дамуы мұқият бақылануы тиіс. Бауыр жеткіліксіздігі айқын пациенттер Паклитаксел медакпен ем алмауы тиіс.

Тіндік ауыр реакциялар салдарынан Паклитаксел медактың артерия ішіне еніп кетуін болдырмау үшін сақтық шарасын қадағалау қажет.

Жалған жарғақшалы колит сирек байқалады. Жалған жарғақшалы колит тіпті бір мезгілде антибиотиктермен емдеу жүргізілмеген пациенттерде білінді. Бұл реакция Паклитаксел медакпен емдеу кезінде немесе ем жүргізілгеннен кейін бірден пайда болған айқын және персистирлеуші диарея жағдайында дифференциальды диагноз қойылғанда ескерілуі тиіс.

Әсер ету бірізділігіне қарамастан, өкпені сәулелендірумен біріктірілген Паклитаксел медак интерстициальді пневмониттің дамуына ықпал етеді.

Капоши саркомасы бар пациенттерде айқын мукозиттер сирек байқалады. Егер мукозит сонда да дамыса, Паклитаксел медак дозасы 25% азайтылуы тиіс.

Осы дәрілік зат құрамында айқын аллергиялық реакциялар тудыратын полиоксиэтилденген майсана майы бар. Паклитаксел медакпен емделу кезінде пациенттер қолдарына және аяқтарына күн сәулесінен қорғайтын заттарды жағып алуы тиіс.

Препарат құрамындағы макроголглицерол рицинолеатының поливинилхлоридпен өзара әрекеттесуі мүмкін екеніне орай, Паклитаксел медакты дайындау, сақтау және енгізу үшін құрамында ПВХ жоқ жабдық пайдаланылуы тиіс.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Паклитаксел медак құрамында этил спирті бар. Препаратта этил спирті бар болғандықтан, көлік құралын немесе қауіптілігі зор механизмдерді басқару қабілеті төмендеуі мүмкін.

Артық дозалануы

Симптомдары: миелосупрессия, шеткергі нейропатия және мукозиттер.

Емі: симптоматикалық. У қайтарғысы белгісіз.

Шығарылу түрі және қаптамасы

5 мл (30 мг), 16.7 мл (100 мг) немесе 50 мл (300 мг) препараттан мөлдір шыны құтыға құйылады.

Құтыны сары түсті (5 мл), жасыл түсті (16.7 мл), сұр түсті (50 мл) қорғағыш қалпақшасы бар алюминий қақпақшамен қаусырылған және инертті фторполимер жабыны бар бромбутил тығынмен тығындайды.

Құтыларға поливинилхлоридтен жасалған қорғаныш жылу ұстайтын үлбір жапсырылған. 1 құтыдан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапқа салады. 10 құтыдан (5 мл) тағы бір картон қорапқа салынады.

Сақтау шарттары

Жарықтан қорғалған жерде 25оС-ден аспайтын температурада сақтау керек.

Жабық құтыларды тоңазытқышта сақтау сәл сілкігенде немесе сілкімей-ақ бөлме температурасына жеткенде оңай еритін преципитаттардың түзілуіне алып келуі мүмкін.

Препарат сапасы өзгермейді.

Егер ерітінді бұлыңғыр күйде қалса немесе егер ерімеген преципитаттар табылса, қолдануға болмайды.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Сұйылтқан соң:

Инфузия үшін дайындалған ерітіндіні 25˚С-ден аспайтын температурада 72 сағаттан асырмай сақтауға болады. Сұйылтылған ерітінділер тоңазытқышта сақталмауы тиіс.

Дәріханалардан босатылу шарттары

Рецепт арқылы

Өндіруші ұйымның атауы және елі

Онкотек Фарма Продукцион ГмбХ, Германия

Тіркеу куәлігінің иесі және қаптаушы:

медак ГмбХ, Германия

Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы:

«медак фарма» ЖШС, Алматы, 050060, Гагарин д-лы 258 В, «Азия» бизнес орталығы, 318 кеңсе, телефон, факс: +7  7273962037, эл.пошта: d.timerbulatov@medac.de