Офтаквикс® (капли глазные, 5 мг/мл, 0.5 мл)

• русский
• қазақша

• Скачать инструкцию медикамента

Саудалық атауы

Офтаквикс®

Халықаралық патенттелмеген атауы

Левофлоксацин

Дәрілік түрі

5мг/мл көз тамшы дәрісі

Құрамы

1 мл ерітіндінің құрамында

белсенді зат - 5,12 мг левофлоксацин гемигидраты

(5,0 мг левофлоксацинге баламалы),

қосымша заттар: натрий хлориді, хлорлы сутегі қышқылы, натрий гидроксиді, инъекцияға арналған су.

Сипаттамасы

Механикалық қосылыстарсыз ашық сарыдан ашық жасылдау-сары түске дейінгі мөлдір ерітінді.

Фармакотерапиялық тобы

Көз ауруларын емдеуге арналған препараттар. Микробқа қарсы препараттар. Левофлоксацин.

АТХ коды S01AX19

Фармакологиялық қасиеттері

Фармакокинетикасы

Көзге тамызғаннан кейін левофлоксацин көз жасы үлбірінде жақсы сақталады. Левофлоксациннің көз жасы үлбіріндегі орташа концентрациясы оны жергілікті қолданғаннан кейін 4 және 6 сағаттан соң, тиісінше, 17,0 мкг/мл және 6,6 мкг/мл құрайды.

Офтаквикс® көз тамшы дәрісіндегі левофлоксациннің орташа концентрациясы сулы ылғалда офлоксациннің орташа концентрациясынан шамамен екі есе жоғары (тиісінше, 1139,9 ± 717,1 нг/мл және 621,7 ± 368,7 нг/мл).

Қолданғаннан кейін 1 сағаттан соң қан плазмасындағы левофлоксациннің орташа концентрациясы – 1-ші тәуліктегі 0,86 нг/мл-ден 15-ші күнгі 2,05 нг/мл-ге дейін. Левофлоксациннің плазмадағы 2,25 нг/мл-ге тең ең жоғары концентрациясы препаратты тәулігіне 8 ретке дейін әр 2 сағат сайын екі күн қолданғаннан кейін 4-ші тәулікте анықталды. Левофлоксациннің ең жоғары концентрациясы 1-ші тәуліктегі 0,94 нг/мл-ден 15-ші тәуліктегі 2,15 нг/мл-ге дейін жоғарылады, бұл левофлоксациннің стандартты дозаларын ішке қабылдағаннан кейінгі концентрациясынан 1000 есе төмен. Биосіңірілуі жоғары – 60-тан 100%-ға дейін.

Фармакодинамикасы

Әсер етуші заты левофлоксацин болып табылатын Офтаквикс® – бұл офлоксациннің рацемиялық субстанциясының солға айналдыратын изомері. Офлоксациннің бактерияға қарсы белсенділігі көбіне солға айналдыратын изомерімен жүзеге асады.

Әсер ету механизмі

Фторхинолондар класының бактерияға қарсы препараты ретінде, левофлоксацин ІІ типті бактериялық топоизомеразаны – ДНҚ-гиразаны және IV топоизомеразаны таңдамалы тежейді. Левофлоксациннің қолайлы нысаналары грамтеріс бактерияларда ДНҚ-гираза, ал грамоң бактерияларда IV топоизомераза болып табылады. Мына микроорганизмдерге қатысты тиімді:

Аэробты грамоңдар: Staphylococcus aureus (MSSA)*, Staphylococcus pneumoniae, Staphylococcus pyogenes,Viridans group streptococci

Аэробты грамтерістер: Escherichia coli, Branhamella (Moraxella) catarrhalis, Haemophilus influenzae, Pseudomonas aeruginosa (жергілікті өсірінділер)

Басқа да микроорганизмдер

Chlamydia trachomatis (хламидиялы конъюнктивиті бар емделушілерді емдеуде микробқа қарсы қатарлас жүйелі ем талап етіледі).

Жүре пайда болған төзімділік мәселе тудыруы мүмкін түрлер

Аэробты грамоң микроорганизмдер: Staphylococcus aureus (MRSA)**, Staphylococcus epidermidis

Аэробты грамтеріс микроорганизмдер: Pseudomonas aeruginosa (ауруханалық штаммдар)

* MSSA = метициллинге сезімтал Staphylococcus aureus штаммдары

** MRSA = метициллинге төзімді Staphylococcus aureus штаммдары

Қолданылуы

• беткейлік бактериялық жұқпаларды емдеу

• көзге жасалған хирургиялық және лазерлік операциялардан кейінгі асқынулардың алдын алу

Қолдану тәсілі және дозалары

Жергілікті - зақымданған бір немесе екі көзге 1-2 тамшыдан алғашқы 2 тәулік ішінде әр 2 сағат сайын тәулігіне 8 ретке дейін, содан кейін келесі 3-5 тәулікте тәулігіне 4 рет. Әдетте емдеу ұзақтығы 5 тәулік құрайды. Кейбір жағдайларда емдеу курсын 2 аптаға дейін ұзартуға болады.

Басқа офтальмологиялық дәрілермен бір мезгілде пайдаланғанда тамызулар арасындағы аралық кем дегенде 15 минут болуы тиіс.

Ерітіндіні ластап алмау үшін тамшылатқыштың ұшын қабақтарға және көз айналасындағы тіндерге тигізіп алмаған жөн.

Бір тамшылатқыш-түбектің ішіндегісі екі көзге де тамызуға жеткілікті.

Жағымсыз әсерлері

Жағымсыз әсерлері науқастардың шамамен 10%-да пайда болуы мүмкін. Жағымсыз әсерлер, әдетте, жеңіл немесе орташа түрде көрініс береді, өткінші сипат алады, әрі әдетте офтальмологиялық белгілермен шектеледі.

Жалпы (1/100 <1/10)

- көздегі ашыту сезімі

- көру өткірлігінің төмендеуі

- шұбалған шырыштың пайда болуы

Сирек (1/1,000 <1/100)

- блефарит, хемоз, конъюнктивалық емізікшелік реакция, қабақтың ісінуі, көздегі жайсыздық, қышу және ауыру, конъюнктиваның, конъюнктива фолликуласының гиперемиясы, көздің құрғауы, қабақтар эритемасы, фотофобия

- бас ауыру

- ринит

Өте сирек (1/10,000, <1/1,000)

- экстра-окулярлы аллергиялық реакциялар, тері бөртпесін қоса

Тіптен сирек (< 1/10,000), (жекелеген хабарламаларды қоса)

- анафилаксия

- көмейдің ісінуі

Қолдануға болмайтын жағдайлар

• белсенді зат - левофлоксацинге, басқа да хинолондарға немесе қандай да бір толтырғышқа жоғары сезімталдық

• 1 жасқа дейінгі балаларға

Дәрілермен өзара әрекеттесулері

Анықталмаған.

Айрықша нұсқаулар

5 мг/мл Офтаквикс® көз тамшы дәрісін субконъюнктивальді түрде енгізуге болмайды. Көз тамшы дәрісін тура көздің алдыңғы камерасына тамызбаған дұрыс.

Жүйелі қолдануға арналған фторхинолондар тіпті бір рет қолданғаннан кейін де аллергиялық реакциялар тудыруы мүмкін. Левофлоксацинге аллергиялық реакция пайда болғанда көз тамшы дәрісін қолдануды тоқтату керек.

Микробқа қарсы барлық дәрілерге қатысты болатындай, Офтаквиксті® ұзақ уақыт қолдану төзімді микроорганизмдердің, соның ішінде зеңдердің өсуіне әкеп соқтырады. Егер жұқпалы көріністер нашарлап кетсе немесе белгілі бір кезең өткенде клиникалық жақсару байқалмаса, препарат пайдалануды тоқтату және баламалы ем тағайындау қажет.

Көздің беткейлік бактериялық жұқпасының белгілері болса, емделушілер жанаспалы линзаларды пайдаланбауы тиіс.

Жаңа туған нәрестелерде мөлдір қабық және гонококк конъюнктивитін емдеу кезіндегі препараттың қауіпсіздігі мен тиімділігі зерттелмеген.

Егде жастағыларда қолдану: Дозалануын өзгерту қажет емес.

Жүктілік және лактация кезеңі

5 мг/мл Офтаквикс® көз тамшы дәрісін, егер ана үшін ықтималды пайдасы емшектегі сәбиге және ұрыққа төнуі мүмкін қауіптен басым болса, жүктілік және бала емізу кезінде қолдануға болады.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Көрудің қандай да бір өткінші бұзылулары жағдайында емделушіге көру қалыпқа келгенше күте тұруға, сосын барып қана автокөлік басқаруға немесе механикалық құрылғыны пайдалануға кеңес беру керек.

Артық дозалану

Көз тамшы дәрісінің бір тамшылатқыш-түбегі ішіндегі левофлоксациннің жалпы мөлшері оны кездейсоқ ішке қабылдап қойғаннан кейін уытты реакциялар тудыру үшін тым аз. 5 мг/мл Офтаквикс® көз тамшы дәрісінің шамадан тыс дозаларын жергілікті қолданғаннан кейін көзді бөлме температурасындағы таза сумен жууға болады.

Шығарылу түрі және қаптамасы

0,5 мл ерітіндідін бұралатын қалпақшасы бар бір реттік полиэтилен тамшылатқыш-түбекте. 10 тамшылатқыш-түбектен алюминий фольга пакетке салады. 1 пакеттен медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапқа салынған.

Сақтау шарттары

25С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Тамшылатқыш-түбектер бар пакетті алғаш ашқаннан кейін 3 ай ішінде пайдалану керек.

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

Сантен АҚ, Финляндия, Tampere, 33720 Niittyhaankatu, 20

Дайчи Санкио Ко. Лтд лицензиясы бойынша, Жапония

Тіркеу куәлігі иесінің атауы және елі

«Сантэн» АҚ, Финляндия

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы:

Қазақстандағы «Cантен» АҚ өкілдігі

Алматы қ., Желтоқсан к-сі, 129/65, 56 пәтер

Телефон нөмірі – 250-39-17

Факс нөмірі – 250-39-17

Электронды поштасы: atlana_kz@rambler.ru