Орнизол

• русский
• қазақша

• Скачать инструкцию медикамента

Саудалық атауы

Орнизол

Халықаралық патенттелмеген атауы

Орнидазол

Дәрілік түрі

Үлбірлі қабықпен қапталған таблеткалар

Құрамы

Бір таблетканың құрамында

белсенді зат: 500 мг орнидазол;

қосымша заттар: микрокристалды целлюлоза, повидон, тальк, натрий крахмалгликоляты, кальций стеараты, лактоза моногидраты, қаптауға арналған «Opadry ΙΙ White» қоспасы (құрамында: триацетин, гипромелоза, лактоза моногидраты, титанның қостотығы (Е 171), полиэтиленгликоль (макрогол).

Сипаттамасы

Сопақша пішінді, екі беті дөңес, таблетканың бір жағында сызығы және екінші жағында «КМП» деген жазуы бар, үлбірлі қабықпен қапталған ақ түсті таблеткалар.

Фармакотерапиялық тобы

Бактерияға қарсы басқа да препараттар. Имидазол туындылары.

Орнидазол.

АТХ коды J01ХD03

Фармакологиялық қасиеттері

Фармакокинетикасы

Ішке қабылдағаннан кейін орнидазол жылдам сіңеді. Ең жоғары концентрациясына қабылдағаннан кейін 3 сағаттан соң жетеді. Плазма ақуыздарымен 15 %-дан аз байланысады. Биожетімділігі – 90 %. Препарат гематоэнцефалдықты қоса, гистогематикалық бөгеттер арасынан оңай өтеді, ағза сұйықтықтары мен тіндеріне жақсы енеді. Бауырда метаболизденеді.

Көбінесе бүйрекпен метаболиттер түрінде (қабылданған дозаның 4 %-ға жуығы өзгеріссіз күйде шығарылады), 22 %-ы ішекпен шығарылады. Жартылай шығарылу кезеңі 12-14 сағат құрайды.

Фармакодинамикасы

Орнидазол – протозойға қарсы және бактерияға қарсы дәрі. Trichomonas vaginalis, Entamoeba histolytica, Giardia lamblia (Giardia intestinalis), сондай-ақ кейбір: Bacteroides, Clostridium spp., Fusobacterium spp. сияқты анаэробты бактерияларға және анаэробты кокктарға қатысты белсенді.

Әсер ету механизмі бойынша орнидазол – нитротопты қалпына келтіруге және ферридоксиндер тобы ақуыздарының нитроқосылымдармен өзара әрекеттесуін катализдеуге қабілетті ферменттік жүйелері бар микроорганизмдерге қатысты таңдамалы белсенділігі бар ДНҚ-тропты препарат. Препарат микроб жасушасына енгеннен кейін оның әсер ету механизмі нитротопты микроорганизм нитроредуктазаларының ықпалымен қалпына келтіру және қалыптасып үлгерген нитроимидазол белсенділігімен жүзеге асады. Қалпына келу өнімдері ДНҚ-мен кешендер түзіп, оның деградациясын тудырады, ДНҚ-ның репликация және транскрипция үдерістерін бұзады. Бұдан басқа, препараттың метаболизм өнімдерінің цитоуытты қасиеттері бар және жасушалық тыныс алу үдерістерін бұзады.

Қолданылуы

- трихомониаз (Trichomonas vaginalis туғызған әйелдер мен ерлердегі несеп-жыныс жұқпалары),

- амебиаз (Entamoeba histolytica туғызған барлық ішек жұқпалары, соның ішінде амебалық дизентерия, амебиаздың барлық ішектен тыс түрлері, әсіресе амебалық бауыр абсцессі);

- лямблиоз,

- хирургиялық араласулар кезінде анаэробты бактериялар тудыратын жұқпалардың алдын алу

- H. Pylori эрадикациясы сызбаларында (протондық помпа тежегіштерімен, бактерияға қарсы басқа дәрілермен, висмут тұзы препараттарымен біріктірілімде).

Қолдану тәсілі мен дозалары

Орнизол тамақтанудан кейін ішке қабылданады.

Трихомониазда. 5 күн бойы тәулігіне 2 рет (таңертең және кешкілік) 1 таблеткадан.

Қайта жұқпалану мүмкіндігін болдырмау үшін, жыныстық жұптасы да осындай емдеу курсынан өтуі тиіс.

Дене салмағы 20 кг-ден көп балаларға арналған тәуліктік доза дене салмағына 25 мг/кг құрап, бір қабылдауға тағайындалады.

Амебиаз. Болжамды емдеу сызбалары: амебалық дизентериямен науқастарды 3 күндік емдеу курсы және амебиаздың барлық түрлерін 5-10 күндік емдеу курсы.

Лямблиоз. Дене салмағы 35 кг-ден артық балалар мен ересектерге бір рет кешкілік 3 таблетка тағайындалады; дене салмағы 35 кг-ден аз балаларға - тәулігіне дене салмағына 40 мг/кг дозаны бір рет қабылдау. Емдеу ұзақтығы 1-2 күн құрайды.

Анаэробты бактериялар туғызған жұқпалардың алдын алу. Операция алдында препараттың 1-2 таблеткасын, операциядан кейін тәулігіне 2 рет 1 таблеткадан 3-5 күн бойы тағайындайды.

H. Pylori эрадикациясы үшін. Орнизол тәулігіне 2 рет 500 мг-ден, протондық помпа тежегіші стандартты дозада және 500 мг кларитромицин тәулігіне 2 рет 7 күн бойы немесе протондық помпа тежегіші стандартты дозада, 500 мг Орнизол тәулігіне 3 рет, 500 мг тетрациклин тәулігіне 4 рет және 120 мг висмут тұзының препараты тәулігіне 4 рет 7 күн бойы.

Жағымсыз әсерлері

- диспепсия, АІЖ қызметінің бұзылуы (соның ішінде жүрек айну), дәм сезудің бұрмалануы

- аллергиялық реакциялар (тері бөртпесі, қышыну)

Сирек

- полиурия (ангиотензин II-рецепторларын ішінара бөгеуі мүмкін екеніне орай)

- ұйқышылдық, бас ауыру, бас айналу, шаршау, уақытша естен тану, ОЖЖ (атаксия, дизартрия, тремор, құрысулар) және шеткергі жүйкелердің (ашыту сезімі, аяқ-қолдың ұюы, парестезиялар) зақымданулары

- лейкопоэздың бәсеңдеуі

- «бауыр» ферменттері белсенділігінің өзгеруі, аллергиялық реакциялар

Қолдануға болмайтын жағдайлар

- препаратқа немесе имидазолдың өзге туындыларына жоғары сезімталдық

- ОЖЖ аурулары (эпилепсия, мидың зақымдануы, жайылған склероз)

- жүктілік және лактация кезеңі

- 6 жасқа дейінгі балаларға

Дәрілермен өзара әрекеттесуі

Орнизол, имидазолдың өзге туындыларынан ерекшелігі, алкоголмен үйлесімді.

Орнизол кумариндер қатарының ішуге арналған антикоагулянттарының әсерін күшейтеді, векуроний бромидінің миорелаксациялаушы әсерін ұзартады.

Препарат концентрациясы микросомалық ферменттер индукторларымен (фенобарбитал, рифампицин) бір мезгілде қолданғанда төмендейді және бауырдың микросомалық жүйелері тежегіштерімен, атап айтқанда, Н2‑рецепторлардың бөгегіштерімен (циметидинмен) бір мезгілде қолданғанда артады.

Айрықша нұсқаулар

Орнизол бауыр қызметі жеткіліксіздігімен науқастарға (дозасын азайту қажет), қан түзілуі бұзылған науқастарға (лейкопенияның, нейтропенияның даму қаупі зор) сақтықпен тағайындалу керек.

Трихомониазда жыныстық жұптастарды бір мезгілде емдеу ұсынылады.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препарат автокөлік немесе басқа механизмдерді басқару қабілетіне ықпал етуі мүмкін.

Артық дозалануы

Симптомдары: депрессия, шеткергі неврит, құрысу реакциялары, өте сирек – эпилепсия түріндегі құрысулар.

Емі: белгілеріне қарай. Құрысу пайда болғанда диазепам көрсетілген.

Шығарылу түрі және қаптамасы

10 таблеткадан жарықтан қорғайтын қоңыр түсті поливинилхлоридті үлбір мен баспалы лакталған алюминий фольгадан жасалған пішінді ұяшықты қаптамаға салады.

1 пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салады.

Сақтау шарттары

Түпнұсқалық қаптамасында, 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

4 жыл

Дәріханалардан босатылу шарттары

Рецепт арқылы

Өндіруші

«Киевмедпрепарат» ААҚ

Украина, 01032, Киев қ., Саксаганск к-сі, 139

Тіркеу куәлігі иесі

«Киевмедпрепарат» ААҚ, Украина

Қазақстан Республикасы аумағында тұтынушылардан өнім сапасына қатысты шағымдар қабылдайтын ұйымның мекенжайы:

Қазақстан Республикасындағы «Артериум» корпорациясының өкілдігі

050060, Алматы қ., Әл-Фараби даңғылы, 97 үй, 3 подъезд, «54» кеңсе

Тел./факс: 8(727)315-82-09; 8(727)315-82-10;

Е-mail: office@arterium.kz