Орлифик

Орлифик

Жоқ

Үлбірлі қабықпен қапталған таблеткалар, 0.100 мг/0.020 мг

Бір таблетканың (белсенді таблетка) құрамында

белсенді заттар – левоноргестрел 0.10 мг

этинилэстрадиол 0.02 мг

қосымша заттар: сусыз лактоза, повидон К-30, магний стеараты

қабығы: қызғылт опадрай® II: поливинил спирті, титанның қостотығы (Е171), макрогол 3350, тальк, қызыл алюминий лагы, лецитин (сояның), темірдің қызыл тотығы (Е172), көгілдір алюминий лагы.

Бір таблетканың (плацебо) құрамында

қосымша заттар: сусыз лактоза, повидон К-30, магний стеараты

қабығы: ақ опадрай® II: ішінара гидролизденген поливинил спирті, титанның қостотығы (Е171), макрогол 3350, тальк.

Қызғылт түсті, үлбірлі қабықпен қапталған, дөңгелек пішінді таблеткалар (белсенді таблеткалар).

Жыныс гормондары және жыныс жүйесінің модуляторлары. Жүйелік қолдануға арналған гормональді контрацептивтер. Прогестагендер және эстрогендер (тіркелген біріктірілімдер).

АТХ коды G03AA07

Фармакокинетикасы

Этинилэстрадиол

Орлифик препаратының таблеткасы қабылданғаннан кейін 1-2 сағат ішінде 50 пг/мл-ге жуықты құрайтын ең жоғары сарысулық концентрациясына жетеді. Этинилэстрадиол сарысу альбуминімен жоғары дәрежеде (шамамен 98%-ға), алайда спецификалық емес, байланысады, және жыныс гормондарын байланыстыратын глобулиннің (ЖГБГ) сарысулық концентрациясының жоғарылауын индукциялайды. Этинилэстрадиолдың болжамды таралу көлемінің орташа мәні 2,8–8,6 литр/кг құрайды. Этинилэстрадиол жіңішке ішекте және бауырда жүйеалды конъюгацияға ұшырайды және өзгермеген күйінде бөлініп шықпайды. Оның метаболиттері несеппен және өтпен бірге 4 және 6 арақатынасында бөлініп шығады, мұндайда жартылай шығарылу уақыты 1 тәулікке жуықты құрайды.

Орлифик препаратының таблеткасын ұзақ қабылдаған кезде сарысудағы этинилэстрадиолдың концентрациясы шамамен екі есеге жоғарылайды. Терминальді фазада сарысудан жартылай шығарылу уақытының құбылмалы болуы және күн сайын қабылдау салдарынан, ауруханалық жағдайға шамамен бір аптадан соң жетеді.

Левоноргестрел

Пероральді қабылдаудан кейін левоноргестрел тез және толық сіңеді. Орлифик препаратының таблеткасын қабылдаудан кейін 1,3 сағат ішінде 2,3 нг/мл құрайтын ең жоғары сарысулық концентрацияға жетеді. Биожетімділігі 100%-ға жуықты құрайды.

Левоноргестрел сарысулық альбуминмен және ЖГБГ-мен байланысады.

Левоноргестрел өзіне тән метаболизм жолдары бар стероидтардың қатысуымен толық метаболизденеді.

Левоноргестрелдің сарысудағы концентрациясы екі фазада төмендейді. Терминальді фазадағы жартылай шығарылу уақыты 25 сағатқа жуықты құрайды. Левоноргестрел өзгермеген күйінде бөлініп шықпайды. Оның метаболиттері несеппен және өтпен (нәжістермен) 1-ге 1 арақатынасымен шығарылады. Метаболиттердің жартылай шығарылу уақыты 1 тәулікке жуықты құрайды.

Орлифик препаратының таблеткасын үздіксіз қабылдағанда левоноргестрелдің сарысулық концентрациясы шамамен 3 есеге жоғарылап, тепе-тең жағдайға емдеу циклінің екінші жартысында жетеді.

Фармакодинамикасы

Ішіп қабылданатын біріктірілген контрацептивтің (ІБК) контрацепциялық әсері әртүрлі факторлардың өзара әрекеттесулеріне негізделеді. Осылардың ішінде өте маңыздырағы овуляцияның бәсеңдеуі және эндометриядағы өзгерулер деп саналады.

Пероральді контрацепцияда

Таблетканы күн сайын белгілі бір уақытта, қажет болғанда блистерлі қаптамада көрсетілген ретпен сұйықтықтың аздаған мөлшерімен ішіп қабылдау керек. Препаратты қабылдау үздіксіз болуы тиіс. Препаратты 28 күн бойы үздіксіз бір таблеткадан қабылдайды. Таблетканы келесі қаптамадан қабылдауды мұның алдындағы соңғы таблетканы қабылдағаннан кейін келесі күні бастайды. «Тоқтатудан қан кету», ол әдетте плацебо таблетканы қабылдауды бастағаннан кейін 2-3 күні басталады, препараттың келесі қаптамасындағы таблеткаларды қабылдауды бастағанға дейін жалғасуы мүмкін.

Егер препарат бірінші рет қабылданатын болса

Соңғы ай ішінде гормональді контрацептивтер пайдаланылмаған жағдайда:

Таблеткаларды қабылдауды әйелдегі табиғи циклдің 1-ші күні (яғни оны етеккірлік қан кетуінің бірінші күні) бастаған жөн.

Бұдан бұрын ішуге арналған біріктірілген контрацептивтерді (ІБК), қынаптық сақинаны немесе трансдермальді бұласырды пайдаланған жағдайда:

Орлифик препаратын қабылдауды бұның алдындағы ІБК белсенді (құрамында әсер етуші заттары бар) соңғы таблетканы қабылдағаннан кейін келесі күні бастау керек, алайда бұның алдындағы ІБК қабылдағаннан кейінгі әдеттегі үзіліс (немесе плацебо қабылдауға көшу) аяқталған соң келесі күннен кешіктірмеген жөн. Қынаптық сақинаны немесе трансдермальді бұласырды қолданған жағдайда Орлифик препаратын қабылдауды оларды алып тастаған күні бастаған дұрыс, бірақ оларды алмастырылғаннан күннен кешіктірмеу керек.

Бұның алдында құрамында тек прогестагендер (мини-пили, инъекциялар, имплантаттар) бар контрацептивтерді пайдаланған, немесе прогестагендер бөліп шығаратын жатырішілік жүйені (ЖІЖ) қолданған жағдайда:

құрамында тек прогестагендер ғана бар мини-пилиді қабылдаудан кез келген күні (имплантатты немесе ЖІЖ пайдаланудан көшу — оны алып тастаған күні, препараттардың инъекциялық түрлерін пайдаланудан — келесі инъекция жоспарланған күні) көшуі мүмкін, алайда аталған барлық жағдайларда таблетканы қабылдаудың алғашқы 7 күні контрацепцияның бөгегіш әдісін қосымша пайдалану ұсынылады.

Алғашқы триместрде жүктілікті тоқтатқаннан кейін:

препаратты қабылдау баяу басталуы мүмкін. Мұндай жағдайда контрацепцияның қосымша шараларының қажеті жоқ.

Босанғаннан кейін немесе екінші триместрде жүктілікті тоқтатқаннан кейін:

босанғаннан кейін немесе екінші триместрде жүктілікті тоқтатқаннан кейін 21–28-ші күні препаратты қабылдауды бастау ұсынылады. Егер таблетканы қабылдауды кеш бастаса, әйелдің препаратты қабылдаған алғашқы 7 күн ішінде бөгегіш әдісті қосымша пайдалануына кеңес берген жөн. Дегенмен, егер жыныстық қатынас болып қойса, ІБК қабылдауды бастар алдында жүктіліктің бар-жоқтығын анықтау немесе етеккірдің алғашқы күнін күту керек.

Егер таблеткаларды өткізіп алған жағдайда

Қаптамадағы соңғы 7 таблетка плацебо болып табылады. Сонымен, осы таблеткалардың біреуін өткізіп алу Орлифик препаратының әсеріне ықпалын тигізбейді. Дегенмен, плацебо қабылдау фазасының байқамай созылып кетуіне жол бермеу үшін, оларды тастау қажет. Төменде берілген нұсқаулар белсенді таблеткаларды (блистерлі қаптамадағы алғашқы 21 таблетка) өткізіп алғанға ғана жатады.

Егер таблетканы қабылдаудың кідіруі 12 сағаттан азды құраса, контрацепциялық әсері төмендемейді. Әйел өткізіп алғанын есіне түсіру бойына, таблетканы қабылдағаны жөн, мұндайда келесі таблетканы әдеттегі уақытында қабылдау қажет.

Егер таблетканың қабылдаудың кідіруі 12 сағаттан астамды құраса, контрацепциялық әсері төмендеуі мүмкін. таблетка қабылдауды өткізіп алған жағдайда негізгі екі қағиданы басшылыққа алуға болады:

1. Белсенді таблеткаларды қабылдауды ешқашан 7 күннен артыққа үзбеген жөн.

2. «Гипоталамус–гипофиз–аналық без» жүйесін адекватты басу үшін таблетканы 7 күн қатарынан қабылдау талап етіледі.

Сондықтан күнделікті іс-тәжірибеде келесі нұсқауларды ұстану қажет:

1-7-ші күні

Әйел таблетканы қабылдауды өткізіп алғанын есіне түсіру бойына, тіпті егер бұл екі таблетканы бір мезгілде қабылдауды көрсетсе де, өткізіп алған таблетканың соңғысын қабылдағаны жөн. Әрі қарай таблетканы әдеттегі уақытта қабылдауы керек. Бұдан басқа, келесі 7 күн бойы контрацепцияның бөгегіш әдістерін қосымша пайдалану, мысалы, презервативті пайдалану қажет. Егер бұның алдындағы 7 күн ішінде жыныстық қатынас болса, жүктіліктің басталуы мүмкін екендігін ескерген жөн. Жүктіліктің басталу қаупі өткізіп алған таблеткалар санының көбеюімен және плацебо қабылдау фазасының жақындауына қарай ұлғаяды.

8-14-ші күні

Әйел таблетканы қабылдауды өткізіп алғанын есіне түсіру бойына, тіпті егер бұл екі таблетканы бір мезгілде қабылдауды көрсетсе де, өткізіп алған таблетканың соңғысын қабылдағаны жөн. Әрі қарай таблетканы әдеттегі уақытта қабылдауы керек. Егер таблетканы алғаш өткізіп алудың алдында бұдан бұрынғы 7 күн ішінде таблеткаларды дұрыс қабылдаса, контрацепцияның қосымша шараларын қажет етудің керегі жоқ. Дегенмен, егер ол 1 таблеткадан көп өткізіп алса, 7 күн бойы контрацепцияның қосымша шараларын пайдалану ұсынылады.

15-21-ші күні

Әдістің сенімділігі плацебо таблеткаларды қабылдау фазасы жақындағандықтан төмендейді. Дегенмен, таблеткаларды қабылдау сызбасын түзету контрацепциялық әсердің төмендеуіне әлі де жол бермеуі мүмкін. Төменде берілген екі сызбаның кез келгенін орындай отырып, әйел таблетканы өткізіп алар алдында 7 күн бойы барлық таблеткаларды дұрыс қабылдаған жағдайда контрацепцияның қосымша шараларын пайдаланбауы мүмкін. Керісінше жағдайда әйел екі сызбаның алдыңғысын орындауы және кейінгі 7 күн ішінде контрацепцияның қосымша заттарын пайдалануы тиіс.

1. Әйел таблетканы өткізіп алғанын есіне түсіру бойына, тіпті егер бұл екі таблетканы бір мезгілде қабылдауды көрсетсе де, өткізіп алған таблетканың соңғысын қабылдағаны жөн. Әрі қарай препаратты белсенді таблеткалар таусылғанша әдеттегі уақытта қабылдау қажет, содан кейін соңғы қатардағы 7 плацебо таблетканы тастап, бірден келесі блистерлі қаптамадағы таблеткаларды қабылай бастауы керек. Екінші қаптамадағы белсенді таблеткаларды қабылдауды аяқтағанға дейін «тоқтатудан қан кетудің» пайда болуы екіталай, алайда препаратты екінші қаптамадан қабылдау кезеңінде әйелде жағынды қан бөлінділері немесе етеккірге ұқсас ациклді қан кетулер пайда болуы мүмкін.

2. Әйел сондай-ақ басталған блистерлі қаптамадан белсенді таблеткаларды қабылдауды тоқтатуы мүмкін. Мұндай жағдайда, таблеткаларды қабылдауды өткізіп алған күндерді қоса, 7 күн бойы блистерлі қаптаманың соңғы қатарынан плацебо таблеткаларды қабылдауы қажет. Осыдан кейін таблеткаларды қабылдауды жаңа блистерлі қаптамадан бастай отырып, жалғастырған жөн.

Егер әйел таблетка қабылдауды өткізіп алса және соның салдарынан плацебо қабылдау фазасында онда «тоқтатудан қан кету» болмаса, жүктілік басталуы мүмкін екенін ескерген жөн.

Асқазан-ішектік бұзылыстардың пайда болу жағдайларындағы ұсынымдар

Ауыр асқазан-ішектік бұзылыстары (мысалы, құсу немесе диарея) пайда болған жағдайда препараттың сіңуі толық болмауы мүмкін, осыған байланысты контрацепцияның қосымша шаралары қажет болады. Белсенді таблетканы қабылдағаннан кейін 3–4 сағат ішінде құсу пайда болған кезде, мүмкін болғанынша, тезірек жаңа «алмастыратын» таблетканы қабылдағаны жөн. Егер бұл мүмкін болса, жаңа таблетканы оны қабылдайтын әдеттегі уақыттан бастап 12 сағат ішінде қабылдау керек. Егер 12 сағаттан асып кетсе, таблеткаларды өткізіп алуға қатысты нұсқауларды пайдаланған жөн. Егер әйел таблетканы қабылдаудың әдеттегі сызбасын алмастырғысы келмесе, басқа блистерлі қаптамадан қосымша таблетканы (таблеткаларды) қабылдауы керек.

«Тоқтатудан қан кетудің» (етеккір) басталу уақытын қалай ауыстыру немесе өзгерту керек

«Тоқтатудан қан кетуді» кідірту үшін әйел, басталған қаптамадан плацебо таблеткаларды қабылдауды өткізіп, таблеткаларды Орлифик препаратының келесі блистерлі қаптамасынан қабылдай бастауы тиіс. Кідіртуді екінші қаптамадағы белсенді таблеткалар таусылғанша, қажеттілігіне қарай, ұзартуға болады. Кідірту кезінде әйелдерде ациклді етеккірге ұқсас қан кету немесе жағынды қан бөлінділері пайда болуы мүмкін. Плацебо таблеткаларын қабылдау фазасынан кейін Орлифик препаратын жүйелі қабылдауды қайта жаңғыртады.

«Тоқтатудан қан кетуді» аптаның басқа күніне ығыстыру үшін әйелге ағымдағы сызбамен белгіленген күннің орнына плацебо таблеткаларын қабылдаудың алда тұрған фазасын қалағанынша қысқартуға кеңес беруге болады. Аралығы неғұрлым қысқа болса, препараттың келесі қаптамасынан қабылдау аясында әйелде «тоқтатудан қан кетудің» болмау мүмкіндігі соғұрлым жоғары болады, «тоқтатудан қан кетудің» кідіруі кезіндегідей, ациклдік етеккірге ұқсас қан кету немесе жағынды қан бөлінділері болады.

Өте жиі туындайтын жағымсыз реакция бас ауыру болып табылады (Орлифик қабылдап жүргендердің 17–24%-да).

Этинилэстрадиолды/левоноргестрелді қолдану аясында келесі жағымсыз әсерлер тіркелді:

Жиі (≥1/100-ден <1/10 дейін)

- дене салмағының артуы

- бас ауыру, басыңқы көңіл-күй, көңіл-күйдің өзгеруі

- жүректің айнуы, іштің ауыруы

- сүт безінің жоғары сезімталдығы және аурушаңдығы

Жиі емес (≥1/1000-нан <1/100 дейін)

- сұйықтықтың іркілуі

- бас сақинасы

- либидоның төмендеуі, сүт безінің ұлғаюы

- бөртпе, есекжем

- құсу, диарея

Сирек (< 1/1 000)

- препаратқа аса жоғары сезімталдық

- жанаспалы линзалардың жақпаушылығы

- дене салмағының кемуі

- либидоның жоғарылауы

- сүт безінен бөлінділер, қынаптық бөлінділер

- түйіндік эритема, мультиформалы эритема

ІБК қабылдаған әйелдерде «Пайдалану кезіндегі арнайы нұсқаулар және сақтандыру шаралары» бөлімінде сипатталған келесі күрделі жағымсыз құбылыстар байқалды:

- веналардың тромбоэмболиясы;

- артериялардың тромбоэмболиясы;

- гипертензия;

- бауыр ісіктері;

- Крон ауруы, ойық жаралы колит, эпилепсия, бас сақинасы, эндометриоз, жатыр миомасы, порфирия, жүйелік қызыл жегі, жүктілік герпесі, Сиденгам хореясы, гемолитико-уремиялық синдром, холестаздық сарғаю.

ІК қабылдағандарың арасында сүт безі обыры жиілігінің аздап жоғарылағаны байқалды. Сүт безінің обыры 40 жасқа толмаған әйелдерде сирек пайда болатындықтан, оның санының көбею жағдайлары сүт безі обырының пайда болатын жалпы қаупіне қатысы бойынша мардымсыз болып табылады.

Тұқым қуалайтын ангионевроздық ісінулері бар әйелдерде экзогендік эстрогендер ангионевроздық ісіну симптомдарын индукциялауы немесе күшейтуі мүмкін.

- веноздық тромбоз немесе оның анамнезде болуы (тереңдегі веналардың тромбозы, өкпе артерияларының тромбоэмболиясы)

- артериялық тромбоз немесе оның анамнезде болуы (мысалы, миокард инфарктісі)

- тромбоздан бұрынғы патология немесе оның анамнезде болуы (мысалы, ишемиялық шабуыл, стенокардия)

- ми қан айналымының бұзылуы немесе оның анамнезде болуы

- веноздық немесе артериялық тромбоздың ауыр немесе көптеген факторларының болуы:

• қантамырлық патологияға асқынған қант диабеті

• ауыр гипертензия

• ауыр дислипопротеинемия

- веноздық немесе артериялық тромбозға туа біткен немесе жүре пайда болған бейімділік, мысалы, белсендірілген С протеиніне резистенттілік, антитромбин III жеткіліксіздігі, С протеинінің жеткіліксіздігі, S протеинінің жеткіліксіздігі, гипергомоцистеинемия және антифосфолипидтік антиденелердің болуы (кардиолипинге антиденелер, жегілік антикоагулянт) сияқты

- ауыр гипертриглицеридемиялы панкреатит немесе немесе оның анамнезде болуы

- функциональді бауырлық сынамалар көрсеткіштері қалыптан ауытқығанда бауырдың ауыр зақымдануы немесе оның анамнезде болуы

- бүйрек функциясының ауыр бұзылуы немесе бүйрек функциясының жедел жеткіліксіздігі

- бауырдың ісіктері (қатерсіз немесе қатерлі) немесе анамнезде болуы

- жыныс гормондарына тәуелді диагностикаланған немесе күмәнді қатерлі жаңа түзілімдер (мысалы, жыныс ағзаларының немесе сүт бездерінің ісіктері)

- генезі айқын емес қынаптық қан кету

- анамнезде ошақтық неврологиялық симптоматикамен қатар жүретін бас сақинасы

- әсер етуші затқа немесе қосымша заттардың біреуіне аса жоғары сезімталдық

Басқа дәрілік заттардың Орлифик препаратына ықпалы

Потенциалды дәрілік өзара әрекеттесуді анықтау мақсатында қатарласқан кез келген дәрілік заттарды қолдану жөніндегі ақпаратты әрдайым зерттеген жөн.

Ішуге арналған контрацептивтер мен басқа дәрілік заттардың өзара әрекеттесуі ациклді етеккірге ұқсас қан кетулерге және/немесе контрацепцияның тиімсіздігіне себеп бола алады.

Бауырлық метаболизм

Бауыр ферменттерінің индукторлары болып табылатын дәрілік заттармен (фенитоин, барбитураттар, примидон, карбамазепин, рифампицин, бозентан және АИТВ емдеуге арналған ритонавир, нелфинавир, сондай-ақ окскарбазепин, топирамат, фелбамат, гризеофулвин сияқты препараттар және шілтерлі шайқурай негізді өсімдік препараттары сияқты) өзара әрекеттесуі мүмкін. Бауыр ферменттерінің индукциясы жыныс гормондарының клиренсін күшейтуі мүмкін. Ферменттер ең жоғары индукциясына әдетте 10 күннен соң жетеді және содан кейін дәрілік емді тоқтатқаннан кейін ең кемінде 4 апта бойы сақталуы мүмкін.

Ішектік-бауырлық айналым

Белгілі бір антибиотиктерді (мысалы, пенициллиндерді, тетрациклиндерді) бір мезгілде қолданғанда эстрогендердің ішек-бауырлық айналымы төмендеп, әрі қарай этинилэстрадиолдың сарысулық концентрациясының азаюына ұласуы мүмкін.

Тролеандомицин ІБК-мен қатар тағайындалғанда бауырішілік холестаз қаупін арттыруы мүмкін.

Қажетті әрекеттер

Жоғарыда берілген класқа жататын дәрілік заттардың кез келгенімен немесе жекелей әсер ететін заттарымен (рифампицинді қоспағанда, бауыр ферменттерінің индукторлары-препараттары) қысқа мерзімдік емдеу барысында әйелдер ІБК қабылдауға қосымша контрацепцияның бөгегіш әдістерін уақытша (яғни дәрілік заттармен емдеу кезінде және оны тоқтатқаннан кейін 7 күн бойы) пайдалануы қажет.

Егер әйел рифампицин қабылдаса, рифампицинмен емдеудің бүкіл кезеңі ішінде және оны тоқтатқаннан кейін 28 күн бойы ІБК қабылдауға қосымша контрацепцияның бөгегіш әдісін пайдаланғаны жөн.

Әсер етуші заты бауыр ферменттерінің индукторлары болып табылатын препараттармен ұзақ ем қабылдап жүрген әйелдерге гормональді емес контрацепцияның басқа сенімді әдісін пайдалану ұсынылады.

Егер басталған блистерлі қаптамадағы ІБК таблеткалары қатарласқан дәрілік заттармен емдеу аяқталған сәтке дейін таусылып қалса, плацебо таблеткаларды қабылдауды өткізеді және бірден келесі қаптамадағы ІБК белсенді таблеткаларын қабылдауға көшеді.

Орлификтің басқа дәрілік заттарға ықпалы

Ішуге арналған контрацептивтер кейбір басқа әсер еуші заттардың метаболизміне ықпалын тигізуі мүмкін. Соған сәйкес, олардың плазмалық және тіндік концентрациялары жоғарылауы (мысалы, циклоспоринді қатар пайдаланғанда) немесе төмендеуі (мысалы, ламотриджинді қатар пайдаланғанда) мүмкін.

Зертханалық зерттеулер

Контрацепциялық стероидтарды қолдану кейбір зертханалық зерттеулердің нәтижелеріне, соның ішінде бауырдың, қалқанша бездің, бүйрекүсті бездерінің және бүйректің функцияларының көрсеткіштеріне, ақуыздардың (тасымалдаушы): мысалы кортикостероидтарды байланыстыратын глобулиндердің плазмалық деңгейіне, липидтердің/липопротеиндердің фракцияларына, көмірсулық метаболизм параметрлеріне, сондай-ақ коагуляция және фибринолиз параметрлеріне ықпалын тигізуі мүмкін. Әдетте зертханалық көрсеткіштердің өзгерулері қалыпты мәннің шегінен шықпайды.

Төменде берілген патологиялардың/қауіп факторларының кез келгені болған кезде ІБК қолдану мен оның ықтимал қаупі арасындағы арақатынасты, препарат қабылдауды бастау шешімін қалай қабылдайтынын пациентпен талқылай отырып, әр әйелде жекелей анықтау қажет. Осы патологиялардың кез келгені өршіген, асқынған немесе алғаш пайда болған кезде әйел дәрігерге қаралуы тиіс, ол ІБК-ні тоқтатудың керек екендігін-еместігін шешеді.

Қан айналудың бұзылулары

Эпидемиологиялық зерттеулер нәтижелеріне сәйкес, құрамында эстрогендер мөлшері аз (<50 мкг этинилэстрадиол) ішуге арналған контрацептивтерді қабылдап жүрген пациенттерде веноздық тромбоэмболия (ВТЭ) жиілігі жылына 100 000 әйелге шаққанда 20-дан 40 жағдайға дейінді құрайды, алайда прогестаген типіне байланысты бұл көрсеткіш өзгеруі мүмкін. Салыстыру үшін, ІБК қабылдап жүрген пациенттерде ВТЭ жиілігі жылына 100 000 әйелге шаққанда 5–10 жағдайды құрайды. Ішуге арналған кез келген біріктірілген контрацептивті (ІБК) пайдалану, оларды пайдаланбайтындармен салыстырғанда, венозды тромбоэмболияның (ВТЭ) пайда болу қаупін арттырады.

ІБК қаупінің өте елеулі жоғарылауы әйелдің ішуге арналған біріктірілген контрацептивті қабылдауының алғашқы жылы ішінде байқалады. ІБК қабылдау аясында ВТЭ қаупі жүктілік кезіндегіге қарағанда аз дәрежеде жоғарылайды, мұндайда ол 100 000 жүктілікке шаққанда 60 жағдайды құрайды. 1-2% жағдайда ВТЭ өліммен аяқталады.

Құрамында 30 мкг этинилэстрадиолмен бірге левоноргестрел бар ішуге арналған біріктірілген контрацептивтерді қабылдау аясында ВТЭ жалпы абсолютті қаупі (пайда болу жиілігі) жылына қолданған 100 000 әйелге шаққанда шамамен 20 жағдайды құрайды.

Сондай-ақ эпидемиологиялық зерттеулерде ІБК пайдалану мен миокард инфарктісінің, транзиторлы ишемиялық шабуыл және инсульттің пайда болу қаупінің жоғарылауы арасында байланыс бар екені көрінді.

ІБК қабылдау аясында басқа қантамырлар - бауырлық, мезентериальді қантамырлар, бүйрек веналары және артериялары, сондай-ақ көздің торқабығы қантамырлары тромбозының жағдайлары тіркелді. Осы асқынулардың гормональді контрацептивтерді пайдаланумен байланысының бар-жоқтығына бірыңғай пікір жоқ.

Веноздық және артериялық тромбоз/тромбоэмболиялардың немесе ми қан айналымы бұзылуларының симптомдарына мыналар жатуы мүмкін:

- әдеттен тыс ауыру және/немесе бір жақ аяқтың ісінуі

- кеуденің кенеттен қатты ауыруы, оның сол жақ қолға жайылуы

- кенеттен ентігу

- кенеттен пайда болған жөтел

- кез келген түсініксіз күшті және ұзаққа созылған бас ауыру

- алғаш пайда болған бас сақинасы немесе оның өршуі

- көрудің кенеттен ішінара немесе толық жоғалуы

- диплопия

- анық сөйлемеу немесе афазия

- вертиго

- есінен айырылу, ол парциальді эпилепсиялық ұстамамен қатар жүруі мүмкін

- әлсіздік немесе дененің бір жағында немесе бір бөлігінде кенеттен пайда болатын өте айқын ұюы

- қимыл-қозғалыстың бұзылулары

- іштеспе

ІБК қабылдау аясында веноздық тромбоэмболиялық асқынулар қаупі жоғарылайды:

- жастың ұлғаюымен

- ерте жасында аға-інілерінде, апа-қарындастарында немесе ата-аналарында болған веноздық тромбоэмболияның отбасылық анамнезде болуы. Егер осындай асқынулардың пайда болуына тұқым қуалайтын бейімдідікке күдік бар болса, кез келген ІБК пайдалану жөнінде шешім қабылдамас бұрын әйелді маманнан кеңес алуға жіберген жөн.

- қозғалыс ұзақ уақыт шектелген, ауқымды операциялық араласым, аяқта кез келген хирургиялық араласым жасалған жағдайда немесе ауыр жарақаттарда. Мұндай жағдайларда таблетка қабылдауды (жоспарлы операциялық араласым жағдайынан ең кемінде төрт апта бұрын) тоқтату және оны қимыл-қозғалыс толық қалпына келгеннен кейін қайта жаңғырту ұсынылады. Егер ІК дер кезінде тоқтатылмаса, тромбозға қарсы ем жүргізудің мақсатқа сәйкестігін қарастырған жөн.

- семіздік (дене салмағы индексінің 30 кг/м2-ден көбірек болуы)

- веноздық тромбоздың пайда болуында немесе өршуінде веналардың варикоздық кеңеюі мен беткейлік тромбофлебиттің маңызы талқылануда.

ІБК қолдану аясында артериялық тромбоэмболияның немесе ми қан айналымы бұзылуының қаупін келесі қауіп факторлары ұлғайтады:

- жастың ұлғаюы

- шылым шегу (егер 35 жастан асқан әйел ІБК қабылдағысы келсе, ол шылым шегуді табанды түрде тастауы керек).

- дислипопротеинемия

- гипертония

- бас сақинасы, әсіресе ошақты неврологиялық симптоматикамен қатар жүретін

- жүрек клапандарының зақымдануы

- жүрекшелер фибрилляциясы

Вена аурулары қаупінің күрделі бір факторының немесе артериялар аурулары қаупінің көптеген факторларының болуы да қарсы көрсетілімдер болып табылады. Сондай-ақ антикоагулянтты ем жүргізу мүмкіндігіне көңіл бөлген жөн. ІБК қабылдап жүрген пациенттердің назарын тромбоз симптомдары ықтимал пайда болатын жағдайда дәрігерге қаралу қажеттігіне аудару керек. Тромбозға күдіктенген немесе ол айғақталған жағдайда ІБК қабылдауды тоқтатқан жөн. Антикоагулянттармен (кумариндермен) емдеудің тератогенділігін ескеріп, контрацепцияның альтернативті сенімді әдістерін пайдалану керек.

Босанудан кейінгі 6 апталық кезең ішінде тромбоэмболия қаупінің ұлғаятынын ескерген жөн.

Қантамырлар тарапынан жағымсыз құбылыстардың пайда болуымен қатар жүрген басқа аурулар қант диабеті, жүйелік қызыл жегі, гемолитико-уремиялық синдром, ішектің созылмалы қабыну аурулары (Крон ауруы немесе ойық жаралы колит), сондай-ақ орақжасушалы анемия болды.

ІБК қолдану аясында бас сақиансы көріністері жиілігінің немесе ауырлығының артуы (ми қан айналымы бұзылуының ықтимал ізашарлары) осы топтың препараттарын дереу тоқтатуға себеп бола алады.

Ісіктер

Кейбір эпидемиологиялық зерттеу нәтижелері ІБК-ні ұзақ қолдану аясында жатыр мойны обырының даму қаупінің ұлғайғанын айғақтайды, алайда осы нәтижелерге жыныстық мінез-құлық сипатының және адамның папилломавирусы (HPV) инфекцияларының болуы сияқты басқа да бұрмаланған факторлардың қандай дәрежеде ықпалын тигізгені анық емес күйінде қалып отыр.

Эпидемиологиялық 54 зерттеуді мета-талдау деректері қазіргі таңда ІБК қабылдап жүрген әйелдерде сүт безі обырын диагностикалаудың салыстырмалы қаупінің біршама жоғарылағанын айғақтады (ОР = 1,24). Қауіпті бұлай ұлғаюы ІБК қабылдауды тоқтатқаннан кейін 10 жыл ішінде біртіндеп жоғалады. Сүт безінің обыры 40 жасқа толмаған әйелдерде сирек пайда болатындықтан, ІБК қабылдап жүрген немесе қабылдаған әйелдерде сүт безі обырының диагностикаланған жағдайлары санының артуы, сүт безі обырының пайда болуының жалпы қаупіне қатысы бойынша, мардымсыз болып табылады. Осы зерттеулерде себеп-салдарлық байланысының бар-жоқтығына дәлелдер анықталған жоқ.

Байқалған қауіптің ұлғаюы ІБК қабылдап жүрген әйелдерде обырдың өте ертерек диагностикалануының, ІБК биологиялық әсерлерінің немесе екі фактордың да біріккен әсерінің салдарынан болуы мүмкін. Қашан болсын бір кездері ІБК қолданған әйелдерде, оларды ешқашан қолданбаған әйелдермен салыстырғанда, клиникалық өте ерте сатыларда сүт безі обырының диагностикалануына беталысы қадағаланады.

Сирек жағдайларда ІБК қолдану аясында бауырдың қатерсіз ісіктерінің, ал өте сирек жағдайларда қатерлі ісіктерінің дамығаны байқалды. Жекелеген жағдайларда бұл ісіктері өмір үшін қауіпті құрсақішілік қан кетулерге себеп болды. Егер ІБК қабылдап жүрген әйелдерде іштің жоғарғы бөлігінде қатты ауыру, бауырдың ұлғаюы немесе құрсақішілік қан кетулер белгілері пайда болса, дифференциальді диагностика барысында бауыр ісігі дамуының бар-жоқтығын анықтаған жөн.

Басқа да аурулар

Гипертриглицеридемиясы бар немесе осындайға тұқым қуалайтын бейімділігі бар әйелдерде ІБК қолдану аясында панкреатиттің пайда болу қаупі жоғарылауы мүмкін.

ІБК қабылдаған әйелдердің көбісінде артериялық қысымның аздап жоғарылағаны байқалғанына қарамастан, клиникалық тұрғыдан маңызды жоғарылауы сирек білінді. ІБК-ні дереу тоқтату тек осы сирек жағдайларға ғана негізделген. Егер ІБК қабылдау аясында бұрын тұрақты артериялық гипертензия пайда болған немесе артериялық қысымның жоғарылауын гипертензияға қарсы препараттармен реттеуге келмеген пациенттерде ІБК қабылдауды тоқтатқан жөн. Егер мақсатқа сай келетін болса, АҚ-ны гипертензияға қарсы препараттардың жәрдемімен қалыпқа келтіргеннен кейін ІБК қабылдауды қайта жаңғыртуға болады.

Жүктілік кезінде және ІБК қабылдау аясында ІБК қолданумен байланысы дәлелденбеген келесі аурулардың пайда болуы немесе өршуі байқалды: холестазбен байланысты сарғаю және/немесе қышыну, өт-тас ауруы, порфириялар, жүйелік қызыл жегі, гемолитико-уремиялық синдром, Сиденгам хореясы, жүктілік герпесі, естудің отосклероз салдарынан жоғалуы, басыңқы көңіл-күй.

Бауырдың жедел немесе созылмалы аурулары бауыр функциясының көрсеткіштері қалыпқа келгенше ІБК қабылдауды тоқтату қажет болуы мүмкін. Бұрын жүктілік кезінде немесе жыныс гормондарын қолдану аясында пайда болған холестаздық сарғаюдың және/немесе холестазбен байланысты қышынудың қайталануы ІБК қабылдауды тоқтатуды қажет етеді.

ІБК шеткері инсулинрезистенттілікке және глюкозаға төзімділікке ықпалын тигізбесе де, құрамында төмен дозаларда әсер ететін заттары (этинилэстрадиол < 0,05 мг) бар ІБК қабылдау аясында қант диабеті бар пациенттерде емдеу сызбасын өзгерту қажет емес. Дегенмен, қант диабеті бар пациенттерге әсіресе ІБК қолданудың ерте сатыларында мониторинг жүргізу қажет.

ІБК қабылдау аясында эндогендік депрессияның, эпилепсияның, Крон ауруының және ойық жаралы колиттің өршуі байқалды.

Анамнезінде әсіресе жүктілік хлоазмасы бар әйелдерде хлоазма пайда болуы мүмкін.

Ошақтық гиперпигментациясы бар әйелдердің ІБК қабылдау кезінде күнде болуына немесе ультракүлгін сәулеленуіне жол бермеу қажет.

Таблетканың құрамында лактоза бар. Туа біткен галактоза, лактоза жақпаушылығы немесе глюкоза-галактоза мальабсорбциясы бар пациенттер бұл препаратты қабылдамағандары жөн.

Медициналық тексеру/кеңес беру

Орлифик препаратын қабылдауды бастар алдында немесе қайтадан тағайындар алдында пациенттің толық медициналық анамнезін (соның ішінде отбасылық) жинау және жүктіліктің бар-жоқтығын анықтау қажет болады. Артериялық қысымын өлшеу және, қарсы көрсетілімдерін және арнайы нұсқауларын ескеріп, физикальді тексеру жүргізу қажет. Тексеру мерзімі және сипаты, пациентті жекелей ерекшеліктерін ескере отырып, іс жүзіндегі нұсқауларға негізделуі тиіс.

Әйелдерге пероральді контрацептивтердің АИТВ (ЖИТС) инфекцияларынан және жыныстық жолмен жұғатын басқа да аурулардан қорғамайтынын ескерту қажет.

Тиімділігінің төмендеуі

ІБК тиімділігі, мысалы, белсенді таблеткаларды қабылдауды өткізіп алған жағдайда, белсенді таблеткаларды қабылдау аясында асқазан-ішек бұзылыстары пайда болғанда немесе басқа дәрілік заттарды қатарластыра қолданғанда төмендеуі мүмкін.

Циклдің жеткіліксіз бақылануы

Кез келген ІБК қолдану аясында әйелдерде ациклдік жұғынды қан бөлінділері немесе етеккір тәрізді қан кетулер, әсіресе қабылдаудың алғашқы айында, пайда болуы мүмкін. Сөйтіп, кез келген жүйелік емес қан кетулерге маңызды баға беру шамамен үш циклге сәйкес келетін бейімделу кезеңінен кейін ғана жүргізілуі мүмкін.

Егер ациклдік қан кетулер сақталса немесе бұрынғы жүйеленген циклдерден кейін пайда болса, гормональді емес сипаттағы патологияның мүмкін екендігін қарап көрген және жүктіліктің немесе обырдың бар-жоқтығын тексерген жөн, оған жатыр қуысынан қырнау алу да қамтылуы мүмкін.

Кейбір әйелдерде плацебо таблеткаларды қабылдау фазасында «тоқтатудан қан кету» пайда болмауы мүмкін. ІБК-ні «Қолдану тәсілі және дозалары» бөлімінде берілген нұсқауларға сәйкес пайдаланғанда, жүктіліктің пайда болуы екіталай. Алайда, егер алғашқы өткізіп алған «тоқтатудан қан кетуге» дейін осы нұсқаулар бұзылса, сондай-ақ осы екі «тоқтатудан қан кету» болмаған жағдайда, ІБК-ні қабылдамас бұрын жүктіліктің бар-жоқтығын анықтап алған жөн.

Жүктілік және лактация кезеңі

Орлифик жүктілік кезінде қолданылмайды.

Егер жүктілік Орлифик препаратын қабылдау кезінде басталса, препарат қабылдауды дереу тоқтатқан жөн. Ауқымды эпидемиологиялық зерттеу нәтижелері аналары жүктілікке дейін ІБК пайдаланған балаларда туа біткен кемістіктердің пайда болу қаупінің ұлғаймағаны айғақталды, ал жүктілік кезінде байқаусызда ІБК қабылдап қойған жағдайда бұл препараттар тератогендік әсер берген жоқ.

ІБК лактацияға ықпалын тигізіп, емшек сүтінің мөлшерін азайтуы және құрамын өзгертуі мүмкін. Осылайша, жалпы, ІБК-ні бала емізетін әйелдерге қолдану внәрестен емшек емуді біржолата толық тоқтатқанған дейін ұсынылмауы мүмкін. ІБК-ні сүтпен бірге қабылдау аясында контрацепциялық стероидтардың және/немесе олардың метаболиттерінің аздаған мөлшері бөлініп шығуы мүмкін. Осы мөлшерлерде олар нәрестеге жағымсыз әсерін тигізуі мүмкін.

Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері

ІБК қолдану аясында механизмдерді басқару және жүргізу қабілетіне ешқандай ықпалы байқалған жоқ.

Артық дозалану салдарынан күрделі жағымсыз әсерлердің пайда болу жағдайлары жөнінде мәлімдемелер түскен жоқ. Біріктірілген пероральді контрацептивтерді қолданудың жалпы тәжірибесіне қарасақ, келесі симптомдар: жүректің айнуы, құсу, және жас әйелдерде қынаптық қан кетулер пайда болуы мүмкін. Антидоттары жоқ, әрі қарай емдеу симптоматикалық.

Шығарылу түрі және қаптамасы

Поливинилхлоридті/поливинилдихлоридті (ПВХ/ПВДХ) үлбірден және алюминий фольгадан жасалған пішінді ұяшықты қаптамаға препарат 21 белсенді таблеткадан және 7 плацебо таблеткадан салынған.

Пішінді ұяшықты 1 (28 таблетка) немесе 3 (84 таблетка) қаптама медициналық қолдану жөнінде мемлекеттік және орыс тілдеріндегі нұсқаулықпен бірге картон қорапшаға салынған.

Түпнұсқалық қаптамасында, 25оС-ден аспайтын температурада, жарықтан қорғалған жерде сақтау керек.

Балалардың қолы жетпейтін жерде сақтау керек!

3 жыл

Жарамдылық мерзімі өткеннен кейін қолдануға болмайды.

Рецепт арқылы

Өндіруші/қаптаушы ұйымның атауы және елі

«Лабораториос Леон Фарма С.А.», г. Леон, Испания

Тіркеу куәлігі иесінің атауы және елі

«Химфарм» АҚ, Шымкент қ., Қазақстан Республикасы

Тұтынушылардан дәрілік заттың сапасы жөніндегі шағымдарды (ұсыныстарды) Қазақстан Республикасы аумағында қабылдайтын және тіркеуден кейін дәрілік заттың қауіпсіздігін бақылауға жауапты ұйымның мекенжайы:

«Химфарм» АҚ, Қазақстан Республикасы, Шымкент қ., Рашидов к-сі, 81, тел/факс: +7 7252 561342 Электронды поштасы infomed@santo.kz