Октреотид-депо (30 мг)

• русский
• қазақша

• Скачать инструкцию медикамента

Саудалық атауы

Октреотид-депо

Халықаралық патенттелмеген атауы

Октреотид

Дәрілік түрі

Бұлшықет ішіне енгізу үшін әсері ұзартылған суспензия дайындауға арналған 10,0 мг, 20,0 мг немесе 30,0 мг лиофилизат 2 мл еріткішпен жиынтықта (Маннит, 0,8% 2 мл инъекцияға арналған ерітінді)

Құрамы

Бір құтының ішінде

белсенді зат - 10,0 мг, 20,0 мг, 30,0 мг октреотид,

қосымша заттары: DL-сүт және гликоль қышқылдарының сополимері,

D-Маннит, карбоксиметилцеллюлозаның натрий тұзы, полисорбат-80.

Еріткіш: D-Маннит, инъекцияға арналған су.

Сипаттамасы

Лиофилизацияланған ұнтақ немесе кеуекті, таблетка түрінде тығыздалған ақ немесе сәл сарғыш реңді ақ түсті масса.

Еріткіш: түссіз мөлдір сұйықтық

Қалпына келген суспензия: Еріткішті қосқанда және шайқағанда ақ немесе сәл сарғыш реңді ақ түсті гомогенді суспензия түзіледі. Қалпына келген суспензия кемінде 5 минут ішінде ыдырамауы тиіс. Тұрған кезде суспензия шөгеді, бірақ сілкігенде қайта суспензиялануы оңай. Суспензия № 0840 инесі арқылы еккішке еркін өтуі тиіс.

Фармакотерапиялық тобы

Гипоталамо-гипофизарлық гормондар және олардың аналогтары. Гипоталамус гормондары. Өсуді баяулататын гормондар. Октреотид.

АТХ коды Н01СВ02

Фармакологиялық қасиеттері

Фармакокинетикасы

Бұлшықет ішіне қолданғанда октреотид толық сіңеді.

Қандағы емдік концентрациясына шамамен 30 минуттан соң жетеді.

Ақуыздармен байланысуы 65 % жуық. Октреотидтің қан жасушаларымен байланысуы аса мардымсыз. Таралу көлемі - 0,27 л/кг. Октреотид бауырда метаболизденеді.

Жалпы клиренсі 160 мл/мин құрайды. Т1/2 - 100 минутқа жуық. 32% жуығы өзгермеген күйде бүйрекпен шығарылады. Егде жастағы емделушілерде клиренс төмендейді, ал Т1/2 ұзарады. Ауыр бүйрек жеткіліксіздігінде клиренс екі есе төмендейді.

Фармакодинамикасы

Октреотид-депо – соматостатиннің табиғи гормонының туындысы болып табылатын және соған ұқсас фармакологиялық әсерлер иеленетін, бірақ әсер етуі ұзағырақ болатын синтетикалық октапептид. Препарат өсу гормонының (ӨГ), сондай-ақ гастро-энтеро-панкреатиттік эндокринді жүйеде өндірілетін пептидтер мен серотонин сөлінісінің патологиялық жоғарылауын бәсеңдетеді.

Карциноидты ісіктер кезінде Октреотид қолдану қан кернеулерін сезіну және диарея сияқты симптомдар айқындылығының азаюына әкеледі, бұл көп жағдайларда плазмадағы серотонин концентрациясының және 5-гидроксииндолсірке қышқылының несеппен шығарылуының азаюымен қатар жүреді.

Вазоактивті интестинальді пептидтің (ВИПомалар) аса жоғары өндірілуімен сипатталатын ісіктер кезінде Октреотид қолдану ауыр секреторлық диареяның азаюына әкеледі. Бір мезгілде электролиттік теңгерімнің қатарлас бұзылуларының азаюы болады. Кейбір науқастарда ісіктер үдеуінің баяулауы немесе тоқтауы, тіпті оның өлшемдерінің, әсіресе, бауырда метастаздардың азаюы жүреді. Клиникалық жақсаруы, әдетте, плазмадағы вазоактивті интестинальді пептид (ВИП) концентрациясының азаюымен (қалыпты мәндерге дейін баратын) қатар жүреді.

Глюкагономаларда Октреотид-депо қолдану көпшілік жағдайларда көшпелі некроздаушы бөртпенің байқалымды азаюына алып келеді. Октреотид-депо глюкагономалар кезінде жиі байқалған қант диабетінің айқындылығына қандай да бір елеулі ықпал көрсетпейді, әрі әдетте инсулинге немесе ішуге арналған қант төмендететін препараттарға деген қажеттіліктің төмендеуіне әкелмейді. Диареядан зардап шегетін науқастарда Октреотид оның азаюын туындатады, бұл денеге салмақ қосумен қатар жүреді. Октреотид қолданғанда плазмадағы глюкагон концентрациясының тез төмендеуі жиі білінеді, дегенмен ұзақ емделгенде бұл әсер сақталмайды. Сонымен қатар симптоматикалық жақсару ұзақ уақыт тұрақты күйде қалады.

Гастриномалар/Золлингер-Эллисон синдромында монотерапия ретінде немесе H2-рецепторлары блокаторларымен біріктіріліп қолданылған Октреотид-депо асқазанда қышқыл өндірілуін азайтып, клиникалық жақсаруға әкелуі мүмкін, соның ішінде диареяға да қатысты болады. Басқа да симптомдардың, соның ішінде ысынулардың айқындылығы азаяды. Кейбір жағдайларда плазмадағы гастрин концентрациясының төмендеуі болады.

Инсулиномалары бар науқастарда Октреотид-депо қандағы иммунореактивті инсулин деңгейін азайтады (бұл әсер қысқа мерзімді – 2 сағатқа жуық болуы мүмкін). Операция жасалатын ісіктері бар науқастарда Октреотид-депо операция алдындағы кезеңде нормогликемияның қалпына келуін және сақталуын қамтамасыз етуі мүмкін. Операция жасалмайтын қатерсіз және қатерлі ісіктері бар науқастарда гликемияны бақылау қандағы инсулин деңгейінің бір мезгілде ұзаққа созылатын төмендеуінсіз де жақсаруы мүмкін.

Жүре пайда болған иммундық тапшылық синдромы (ЖИТС) бар науқастардағы рефрактерлі диарея кезінде Октреотид қолдану микробқа қарсы және/немесе диареяға қарсы дәрілермен талапқа сай емдеумен бақыланбайтын диареядан зардап шегетін шамамен 1/3 науқаста нәжістің толық немесе ішінара қалыпқа келуіне әкеледі.

Ұйқы безіне операция жасалатын науқастарда Октреотид қолдану операция кезінде және одан соң операциядан кейінгі типтік асқынулар (мысалы, панкреатиттік жыланкөздер, абсцесстер, сепсис, операциядан кейінгі жедел панкреатит) жиілігін азайтады.

Бауыр циррозы бар науқастарда өңеш пен асқазанның варикозды кеңейген көктамырларынан қан кетулерде спецификалық емдеумен (мысалы, склероздаушы еммен) біріктірілген Октреотид-депо қолдану қан кетудің және ерте қайталанатын қан кетудің тиімдірек тоқтатылуына, трансфузия көлемінің азаюына және 5-күндік тірі қалудың жақсаруына әкеледі. Препарат ВИП және глюкагон сияқты вазоактивті гормондарды бәсеңдету арқылы ағзадағы қан ағымын азайтады.

Қолданылуы

Асқазан-ішек жолының (АІЖ) және ұйқы безінің эндокринді ісіктерін емдеуде

- карциноидты синдром құбылыстары бар карциноидты ісіктер

- инсулиномалар

- ВИПомалар

- гастриномалар (Золлингер-Эллисон синдромы)

- глюкагономалар (операция алдындағы кезеңде гипогликемияны бақылау , сондай-ақ демеуші ем үшін)

- соматолибериномалар (өсу гормоны рилизинг-факторының аса жоғары өндірілуімен сипатталатын ісіктер)

Қуық асты безінің гормонға төзімді обырын емдеуде

- хирургиялық немесе дәрі-дәрмектік кастрация аясындағы біріктірілген ем құрамында

Операциядан кейінгі жедел панкреатит дамуының алдын алуда

- құрсақ қуысына жасалатын ауқымды хирургиялық операцияларда және торакоабдоминальді араласуларда (соның ішінде асқазан, өңеш, тоқ ішек, ұйқы безінің обыры, бауырдың алғашқы және салдарлы ісіктік зақымдануы себепті).

Қолдану тәсілі және дозалары

Октреотид-депоны бөксе бұлшықетіне тек терең бұлшықет ішіне (б/і) енгізу керек. Қайталанған инъекциялар кезінде оң және сол жақтарды кезектестірген жөн. Суспензияны тура инъекцияның алдында әзірлеу керек. Инъекция жасалған күні препараты бар құты мен еріткіші бар ампуланы бөлме температурасында ұстауға болады.

АІЖ және ұйқы безінің эндокринді ісіктерін емдеуде

Октреотидті т/а енгізу ауру көріністерінің талапқа сай бақылануын қамтамасыз ететін емделушілерде Октреотид-депоның ұсынылатын бастапқы дозасы әр 4 апта сайын 20 мг құрайды. Октреотидті т/а енгізуді Октреотид-депо алғаш енгізілгеннен кейін тағы 2 апта бойы жалғастырған жөн.

Бұрын т/а Октреотид алмаған емделушілерде оның тиімділігін және жалпы көтерімділігін бағалау мақсатында емдеуді салыстырмалы қысқа уақыт кезеңі ішінде (шамамен 2 апта) нақ осы тәулігіне 3 рет 0,1 мг дозадағы Октреотидті т/а енгізуден бастау ұсынылады. Осыдан кейін ғана Октреотид-депо жоғарыда ұсынылған сызба бойынша тағайындалады.

Октреотид-депомен 3 ай бойы емделген жағдайда аурудың клиникалық көріністері мен биологиялық маркерлерінің талапқа сай бақылануы қамтамасыз етіледі, Октреотид-депо дозасын әр 4 аптада тағайындалатын 10 мг дейін азайтуға болады. Октреотид-депомен 3 ай бойы емделгеннен кейін ішінара ғана жақсаруға жетудің сәті түскен жағдайларда препарат дозасын әр 4 апта сайын 30 мг дейін арттыруға болады. Октреотид-депомен емделу аясында жекелеген күндері АІЖ және ұйқы безі эндокринді ісіктеріне тән клиникалық көріністердің күшеюі мүмкін. Бұл жағдайларда Октреотид-депомен емделу басталғанша қолданылған дозада Октреотидті қосымша т/а енгізу ұсынылады. Мұны, ең алдымен, плазмадағы октреотид емдік концентрацияларға жетпеген емделудің алғашқы 2 айында жүзеге асыруға болады.

Қуық асты безінің гормонға төзімді обырын емдеуде

Октреотид-депоның ұсынылатын бастапқы дозасы 3 ай ішінде әр 4 апта сайын 20 мг құрайды. Әріқарай дозаны сарысудағы ПСА концентрациясы динамикасын, сондай-ақ клиникалық симптомдарды есепке ала отырып түзетеді. Егер 3 ай емделгеннен кейін талапқа сай клиникалық және биохимиялық әсерге жетудің сәті түспесе (ПСА төмендеуі), дозаны әр 4 аптада енгізілетін 30 мг дейін арттыруға болады.

Октреотид-депомен емделу мынадай сызба бойынша тағайындалатын дексаметазон қолданумен үйлестіріледі: 1 ай бойы тәулігіне 4 мг, сосын 2 апта бойы тәулігіне 2 мг, сосын тәулігіне 1 мг (демеуші доза).

Бұрын дәрі-дәрмектік антиандрогенді ем жүргізілген науқастарды октреотид-депомен және дексаметазонмен емдеу гонадотропин-рилизинг гормоны (ГнРГ) аналогын қолданумен үйлестіріледі. Осы орайда ГнРГ аналогының инъекциясы (депо түрлері) 4 аптада 1 рет жасалады.

Октреотид-депо алатын емделушілерге ПСА концентрациясын анықтауды ай сайын жүргізген жөн.

Бүйрек, бауыр қызметі бұзылған емделушілерде және егде жастағы емделушілерде Октреотид-депо дозалану режимін түзету қажет емес.

Операциядан кейінгі жедел панкреатиттің алдын алу үшін

Октреотид-депо препараты 10 немесе 20 мг дозада ұсынылатын операциялық араласудан 5 күн бұрын және 10 күннен кешіктірмей бір рет енгізіледі.

Суспензияны әзірлеу және препарат енгізу ережелері

• Препарат тек бұлшықет ішіне енгізіледі.

• Б/і инъекцияға арналған суспензияны тура енгізер алдында қоса берілген еріткіш көмегімен әзірлейді.

• Препаратты үйретілген медициналық мамандар ғана дайындауы және енгізуі тиіс.

• Инъекцияның алдында еріткіші бар ампуланы және препараты бар құтыны тоңазытқыштан алып, бөлме температурасына дейін жеткізу қажет (30-50 минут керек болады).

• Октреотид-депосы бар құтыны қатаң түрде тігінен ұстаңыз. Құтыға жайлап тықылдатып, лиофилизатты түгел құтының түбіне түсіріңіз.

• Еккіші бар қаптаманы ашыңыз, еріткішті сору үшін 1,2 мм х 50 мм өлшемді инені еккішке жалғаңыз.

• Еріткіші бар ампуланы ашып, еріткіші бар ампуланың ішіндегісін түгел еккішке жинаңыз, 3,5 мл дозаға еккішті орнатыңыз.

• Ішінде лиофилизат бар құтыдан пластик қақпақшасын шешіңіз. Құтының резеңке тығынын спиртті тампонмен зарарсыздандырыңыз. Лиофилизат бар құтыға резеңке тығынның ортасынан инені енгізіп, инені құтының ішіндегісіне тигізіп алмай, құтының ішкі қабырғасымен еріткішті абайлап енгізіңіз. Құтыдан еккішті суырыңыз.

• Құты еріткіш лиофилизатты толық сіңіріп алғанша және суспензия түзілгенше қозғалмаған күйде қалуы тиіс (шамамен 3-5 минут). Одан кейін, құтыны төңкерместен, құтының қабырғалары мен түбінде құрғақ лиофилизат бар-жоғын тексеру керек. Лиофилизаттың құрғақ қалдықтары табылса, толық сіңіріліп болғанша құтыны қалдырыңыз.

• Құрғақ лиофилизат қалдықтарының жоқ екеніне көз жеткізгеніңізден кейін, құтының ішіндегісін біртекті суспензия түзілгенше 30-60 секундтай айналдыра абайлап араластырған жөн. Құтыны төңкермеңіз және сілкімеңіз, бұл үлпектердің шөгуіне және суспензияның жарамсыз болып қалуына әкелуі мүмкін.

• Инені құтыға резеңке тығын арқылы тез енгізіңіз. Сосын құтыны 45 градусқа бұрыштап еңкейтіп, ине қиығын төмен түсіріңіз, суспензияны толығымен еккішке баяу жинаңыз. Жинаған кезде құтыны төңкермеңіз. Препараттың шағын мөлшері құты қабырғасында және түбінде қалуы мүмкін. Құты қабырғасындағы және түбіндегі жұмсалған қалдық есептеледі.

• Суспензияны жинағаннан кейін қызғылт сауытты инені жасыл сауытты инемен (0,8 х 40 мм) алмастырыңыз, еккішті ұқыпты төңкеріп, еккіштен ауасын шығарыңыз.

• Октреотид-депо суспензиясын әзірлегеннен кейін дереу енгізген жөн.

• Октреотид-депо суспензиясы ешқандай өзге дәрілік затпен бір еккіште араластырылмауы тиіс.

• Спиртті тампон көмегімен инъекция орынын зарарсыздандырыңыз. Инені бөксе бұлшықетіне терең енгізіңіз, сосын тамырдың зақымданбағанына көз жеткізу үшін еккіш поршенін сәл кері тартыңыз. Суспензияны, еккіш поршенін жібермей басып тұрып, бұлшықет ішіне баяу енгізіңіз.

• Қан тамырына түсіп кеткенде инъекцияның орынын және инені ауыстыру керек.

• Ине бітеліп қалса, оны диаметрі осындай басқа инемен ауыстырыңыз.

• Қайталанатын инъекцияларда сол және оң жақтарды кезектестіру керек.

Жағымсыз әсерлері

Жағымсыз реакциялар пайда болу жиілігіне қарай былайша ұсынылған: өте жиі (≥1/10); жиі (≥1/100,  1/10); кейде (≥1/1000, 1/100); сирек (=≥1/10000, 1/1000); өте сирек (1/10000), жекелеген хабарламаларды қоса.

Өте жиі

- бас ауыру

Жиі

- іштің түйіліп ауыруы, іштің кебуі, іш қату, диарея

- тері астына енгізілген жағдайда болатын жергілікті реакциялар (ауыру, ісіп кету, қызару, тітіркену және ашыту)

- гипотиреоз, қалқанша без қызметінің бұзылуы

- бас айналу, диспноэ, астения

Кейде

- брадикардия, тахикардия, холецистит, шаштың түсуі

Сирек

- аллергиялық бөрту, қышыну

- жүрек айну, құсу, өт қабында тас түзілуі (Октреотид-депо ұзақ уақыт қолданылғанда), холецистит, билиярлы сладж, стеаторея (майдың нәжіспен көп бөлінуі мүмкін болса да, Октреотид-депомен ұзақ уақыт емдеудің сіңу бұзылуы салдарынан (мальабсорбция) тамақтану тапшылығының дамуына әкелуі мүмкін екеніне көрсетілімдер жоқ), жедел ішек бітелісін еске салатын құбылыстар: іштің үдемелі кебуі, эпигастрий аумағындағы айқын ауыру, құрсақ қабырғасының ширығуы, бұлшықеттік «қорғаныс».

Өте сирек

- анафилактикалық реакциялар

- гипогликемия, гипергликемия

- ентігу

- жедел панкреатит, анорексия, жиі нәжіс, холестазсыз жедел гепатит, гипербилирубинемия, сілтілі фосфатазаның, гаммаглютамилтрансферазаның, трансаминазалардың жоғарылауы, тромбоцитопения, гиперкалиемия

- артериялық гипертензия (ұзақ уақыт қолданғанда)

Егер бөлме температурасындағы ерітінді пайдаланылса немесе көбірек концентрацияланған ерітіндінің аз көлемі енгізілсе, жергілікті реакциялар айқындылығын азайтуға болады.

Жағымсыз әсерлері жөніндегі постмаркетингтік хабарламалар

- анафилаксия, аллергиялық реакциялар, уртикарлы бөртпе

- жедел панкреатит, жедел гепатит, холестатикалық гепатит, холестаз, өттің төгілуі, холестатикалық сарғаю

- аритмия

Қолдануға болмайтын жағдайлар

- октреотидке немесе препараттың басқа компоненттеріне жоғары сезімталдық.

Сақтықпен:

- холелитиаз

- қант диабеті

- жүктілік және лактация

Дәрілермен өзара әрекеттесуі

Октреотид циклоспориннің сіңуін азайтады, циметидиннің сіңуін баяулатады. Бір мезгілде қолданылатын диуретиктер, бета-адреноблокаторлар, «баяу» кальций өзекшелерінің блокаторлары, инсулин, ішуге арналған гипогликемиялық препараттардың дозалану режимін түзету қажет.

Октреотид пен бромокриптин бір мезгілде қолданылғанда соңғысының биожетімділігі артады.

Р450 цитохромы жүйесінің ферменттерімен метаболизденетін және емдік дозалар ауқымы тар препараттарды сақтықпен тағайындау керек.

Айрықша нұсқаулар

ӨГ секрециялайтын гипофиз ісіктерінде Октреотид-депо алатын науқастарды мұқият қадағалау қажет, өйткені көру өрісінің тарылуы сияқты күрделі асқынулар дамитын ісіктер өлшемдерінің ұлғаюы мүмкін. Мұндай жағдайларда емдеудің басқа әдістерін қолдану қажеттілігін қарастыру керек.

Октреотид-депомен ұзақ емнен өтетін емделушілерде қалқанша без қызметін бақылап тұру керек.

Октреотид қолдану кезінде брадикардия жөнінде сирек хабарламалар түскен. Осыған орай, бета-блокаторлар, кальций өзектерінің блокаторлары сияқты препараттар немесе су-электролит теңгерімін бақылау үшін қолданылатын препараттар дозаларын ретке келтіру қажеттілігі туындауы мүмкін.

Октреотид-депоны ұзақ уақыт бойы алатын 10-20% науқаста өт қабында тастар пайда болуы мүмкін, сондықтан келесі нұсқауларды назарға алу керек.

Октреотид-депомен өт қабында тас түзілуіне қатысты емдеу кезінде науқастарды жүргізу жөніндегі нұсқаулар.

• Октреотид-депо тағайындалғанша науқастар өт қабын бастапқы ультрадыбыстық зерттеуден өткізуі тиіс;

• Октреотид-депомен емделу кезінде, дұрысы, 6-12 ай аралықтармен өт қабын қайталанатын ультрадыбыстық зерттеулерден өткізу керек;

• Егер тастар емнің басталуына дейін-ақ табылса, өт тастарының болуымен байланысты болжамды қатермен салыстырмалы түрде Октреотид-депомен емделудің әлеуетті артықшылықтарын бағалау қажет. Бұрыннан бар өт-тас ауруының ағымына немесе болжамына Октреотид-депоның қандай да бір кері ықпалы жөнінде деректер жоқ.

Октреотид-депомен емделу үдерісінде өт қабында тас түзілетін науқастарды жүргізу.

а) Өт қабының симптомсыз тастары.

Октреотид-депо қолдануды пайда/қауіп арақатынасын бағалауға сәйкес тоқтатуға немесе жалғастыруға болады. Кез келген жағдайда бақылауды, қажет болса, оны жиілетіп, жалғастыра беруден басқа бір шара қабылдау қажеттілігі жоқ.

б) Клиникалық симптоматикасы бар өт қабының тастары.

Октреотид-депо қолдануды пайда/қауіп арақатынасын бағалауға сәйкес тоқтатуға немесе жалғастыруға болады. Кез келген жағдайда науқасты клиникалық көріністері бар өт-тас ауруының басқа жағдайларындағы сияқты емдеу керек. Дәрі-дәрмекпен емдеуде тастар толық жоғалып кеткенше ультрадыбыстық бақылаумен өт қышқылдары препараттарының біріктірілімін (мысалы, тәулігіне 7.5 мг/кг дозадағы хенодезоксихол қышқылын сондай дозадағы урсодезоксихол қышқылымен үйлестіріп) қолдану қамтылады.

Инсулиномалары бар науқастарда Октреотид-депомен емделу аясында гипогликемия айқындылығы мен ұзақтығының артуы болуы мүмкін (бұл, инсулин сөлінісіне қарағанда, ГР және глюкагон сөлінісін бәсеңдетуші ықпалының едәуір айқын болуымен, сондай-ақ инсулин сөлінісіне тежегіш әсер ету ұзақтығының аз болуымен байланысты). Мұндай науқастарды Октреотид-депомен емдеудің басында, сондай-ақ препарат дозасын әр өзгерткен сайын ұқыпты қадағалау керек. Октреотид-депоны жиірек енгізу арқылы қандағы глюкоза концентрациясын төмендетіп көруге болады.

Бауыр циррозы бар науқастарда өңеш пен асқазанның варикозды кеңейген көктамырларынан қан кетулер кезінде инсулинге тәуелді қант диабетінің даму қаупі жоғары, сондай-ақ қант диабетінен зардап шегетін науқастарда инсулинге қажеттілік өзгерістері болуы мүмкін; сондықтан осы жағдайларда қандағы глюкоза концентрациясын жүйелі бақылау қажет.

I типті қант диабеті бар науқастарда Октреотид-депо инсулинге қажеттілікті төмендетуі мүмкін. Қант диабетінсіз және 2 типті қант диабеті бар науқастарда ішінара сақталған инсулин сөлінісінде Октреотид-депо енгізу қандағы глюкозаның постпрандиальді жоғарылауына әкелуі мүмкін.

Кейбір емделушілерде октреотид ішекте майлардың сіңірілуін өзгертіп, қандағы В12 витаминінің деңгейін төмендетуі және Шилинг тестісі көрсеткіштерінің қалып шегінен ауытқуын туғызуы мүмкін.

Жүктілік және лактация кезеңі

Препаратты жүктілік кезінде қолдану тәжірибесі жоқ, мұндай жағдайларда препарат тек нақты көрсетілімдері бойынша тағайындалады. Октреотид-депомен емделу кезінде бала емізуді тоқтату керек.

Педиатрияда қолдану

Октреотид-депоны балаларда қолдану тәжірибесі жоқ.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Октреотид-депоның кейбір жағымсыз әсерлері көлік құралдарын және жоғары зейін шоғырландыру мен психомоторлық реакциялар шапшаңдығын талап ететін басқа механизмдерді басқару қабілетіне кері әсер етуі мүмкін.

Артық дозалануы

Симптомдары: жүректің жиырылу жиілігінің қысқа мерзімді сиреуі, бетке қан «тебу» сезімі, іштің түйіліп ауыруы, диарея, жүрек айну, асқазанның бос қалу сезімі.

Емі: симптоматикалық.

Шығарылу түрі және қаптамасы

0,0100 г, 0,0200 г немесе 0,0300 г октреотидтен резеңке тығындармен тығыз тұмшаланып, алюминий-пластик қалпақшалармен жабылған сыйымдылығы 10 м күңгірт шыны құтыларда.

2 мл еріткіштен (инъекцияға арналған 0,8 % маннит ерітіндісі) ашуға арналған тарту сақинасы немесе сындыру нүктесі бар бейтарап шыны ампулаларда.

Поливинилхлоридті үлбірден жасалған пішінді ұяшықты қаптамаға салынады:

- препараты бар 1 құтыдан;

- еріткіші бар 1 ампуладан;

- жеке пішінді ұяшықты қаптамаға қапталған бір рет қолданылатын сыйымдылығы 5 мл 1 еккіш;

- еккішпен жиынтықта пішінді ұяшықты қаптамаға қапталған жасыл түсті сауыттағы өлшемі 0.8 мм х 40 мм инъекцияға арналған 1 стерильді импортты ине;

- жеке пішінді ұяшықты қаптамаға қапталған қызғылт түсті сауыттағы өлшемі 1.2 мм х 50 мм еріткішке арналған 1 стерильді импортты ине;

- жеке қаптамаға қапталған медицинада қолдануға рұқсат етілген 2 спиртті тампон.

Жиынтық бір инъекцияға есептелген.

1 пішінді ұяшықты қаптама медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады.

Ескертпе: Инъекцияға арналған 0,8 % маннит ерітіндісі дайын дәрілік түрлерді әзірлеуге арналған еріткіш ретінде пайдаланылады және еріту үшін қолданылатын препаратпен жиынтықта қапталады, дербес дәрілік түр ретінде шығарылмайды.

Сақтау шарттары

Құрғақ, жарықтан қорғалған жерде, 2 C-ден 8 C-ге дейінгі температурада сақтау керек.

Балалардың қолы жетпейтін жерде сақтау керек!

Сақтау мерзімі

Лиофилизат - 3 жыл

Еріткіш - 3 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші ұйымның атауы және елі

«Деко» компаниясы» ЖШҚ, Ресей Федерациясы

129344, Мәскеу, Енисей к-сі, 3 үй, 4 корпус

Тіркеу куәлігі иесінің атауы және елі

«Фарм-Синтез» ЖАҚ, Ресей Федерациясы

111024, Мәскеу, Кабельная 2-ші көшесі, 2 үй, 9 құрылыс

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы

«Raifarm» (Райфарм) ЖШС

ҚАЗАҚСТАН РЕСПУБЛИКАСЫ,

Алматы қ., Тимирязев к-сі 42, 15/3 В корпусы.

Телефон нөмірі: 8-(727-2) 66-92-78.

Факс нөмірі: 8-(727-2) 66-92-78

Электронды пошта: lyubov.tsoy@raifarm.com