Нофлук

• русский
• қазақша

• Скачать инструкцию медикамента

Саудалық атауы

Нофлук

Халықаралық патенттелмеген атауы

Флуконазол

Дәрілік түрі

Инфузияға арналған 2 мг/мл, 100 мл ерітінді

Құрамы

100 мл ерітіндінің құрамында

белсенді зат - 200 мг флуконазол,

қосымша заттар: натрий хлориді, натрий гидроксиді немесе хлорлы сутегі қышқылы, инъекцияға арналған су

Сипаттамасы

Түссіз немесе сәл боялған мөлдір сұйықтық

Фармакотерапиялық тобы

Зеңге қарсы жүйелік қолдануға арналған препараттар.

Триазол туындылары.

АТЖ коды J02A C01

Фармакологиялық қасиеттері

Фармакокинетикасы

Көктамыр ішіне енгізгеннен кейін флуконазол организмнің тіндеріне және сұйықтығына жақсы өтеді. Препараттың сілекейдегі және қақырықтағы концентрациясы оның плазмадағы деңгейіне ұқсас. Зеңдік менингиті бар науқастарда жұлын сұйықтығындағы флуконазолдың мөлшері плазмадағы тиісті деңгейі 80%-ға жетеді. Плазмадағы концентрациясы дозаға тура пропорционалды болады. Күн сайын тәулігіне 1 рет енгізген кезде 4-5-күні тепе-тең 90% концентрацияға жетеді.

Алғашқы күні әдеттегі тәуліктік дозадан екі есе жоғары дозаны қолдану тепе-тең 90% концентрацияға екінші күні жетуге мүмкіндік береді. Таралуының болжаммен алынған көлемі организмдегі судың жалпы көлеміне жақындайды. Плазма ақуыздарымен флуконазолдың аздаған (11-12%) бөлігі байланысады. Жартылай шығарылу кезеңі – ұзақ (30 сағат). Флуконазол организмнен негізінен бүйректер арқылы шығарылады; мұндайда енгізілген дозаның шамамен 80%-ы өзгермеген күйінде шығарылады. Флуконазол клиренсі креатинин клиренсіне тура пропорционал тәуелділікте болады. Шеткергі қанда метаболиттер байқалған жоқ.

Фармакодинамикасы

Флуконазол – Нофлук препаратының әсер етуші заты триазолдарға жатады және зеңге қарсы жүйелік әсер ететін препарат болып табылады. Оған сезімтал саңырауқұлақтарда флуконазол Р450 цитохромға тәуелді энзимдерді бөгеп, саңырауқұлақтардың жасушалық мембраналарында эргостерол синтезінің бұзылуына әкеледі. Андрогендік белсенділігі жоқ. Препарат Candida spp., Cryptococcus neoformans, Microsporum spp., Trichoptyton spp., Blastomyces dermatitidis, Coccidioides immitis және Histoplasma capsulatum болған микоздарда белсенді.

Қолданылуы

- криптококкозда: криптококктік менингитте, өкпелер мен терінің криптококктік жұқпаларында; ЖИТС-ке шалдыққан науқастарда криптококкоздың қайталануының алдын алуға, ағзаларды ауыстырғанда немесе иммунитет тапшылығының басқа да жағдайларында

- денеге жайылған кандидомикозда: кандидемияда, диссеминирленген кандидомикозда және инвазивті кандидозды жұқпалардың басқа түрлерінде (құрсақ қуысының, эндокардтың, көздің, тыныс және несеп шығару жолдарының жұқпалары), соның ішінде цитостатикалық немесе иммунодепрессивтік емдеу курсын қабылдап жүрген науқастарда, сондай-ақ олардың дамуына бейім басқа да факторлар болғанда – емдеуге және алдын алуға

- шырышты қабықтардың кандидомикоздарында: ауыз қуысының, жұтқыншақтың, өңештің және инвазивті емес бронхөкпе жұқпалары, кандидурия, тері-шырышты және созылмалы пероральді атрофиялық кандидозда (тіс протездерін киюге байланысты)

- генитальді кандидозда: қынаптық (жедел немесе созылмалы қайталанатын түрі), баланитте

- қатерлі жаңа түзілімдері бар науқастарда зеңді жұқпалардың алдын алуға, олар цитостатиктермен химиялық емдеу немесе сәулемен емдеу нәтижесінде осындай жұқпаларға бейім.

- тері, табан микоздарында, терінің кандидоздық жұқпаларында, онихомикозда, қабыршақты теміреткіде.

Қолдану тәсілі және дозалары

Емдеуді микологиялық немесе зертханалық зерттеулер нәтижелері алынғанша бастауға болады; алынған нәтижелерге сай әрі қарай арнайы фунгицидтік ем таңдау қажеттілігі пайда болуы мүмкін.

Нофлукті көктамыр ішіне инфузия түрінде тағайындайды (инфузияның ең жоғары жылдамдығы минутына 10 мл).

Көктамырішілік енгізуден ішу арқылы енгізуге ауысу немесе керісінше ауысу тәуліктік дозаны өзгертпей-ақ жүзеге асырылады, яғни тәуліктік доза препаратты енгізу тәсіліне байланысты емес. 100 мл инфузиялық ерітіндіде құрамы 15 ммоль Nа+ және 15 ммоль Сl‾ иондарына сәйкес келетін 0,9 % натрий хлориді ерітіндісінде 200 мг флуконазол бар. Натрийдің немесе сұйықтықтың организмге түсуін шектеуді қажет ететін жағдайларда инфузияның иондық құрамын ескерген жөн.

Нофлуктің тәуліктік дозасы жұқпаның түріне және ауырлығына байланысты. Емдеуді симптомдар толық жоғалғанша және зертханалық көрсеткіштер қалыпқа келгенше жалғастырған жөн. Ерекшелік қынаптың жедел кандидозында, оны емдеу үшін 150 мг Нофлукті бір рет қабылдау жеткілікті. Емдеуді мезгілінен бұрын тоқтату оның қайталануына әкеп соғады. АИВ жұқтырған науқастарда әдетте криптококктік менингит және қайталанатын орофарингеальді кандидоз ұзақ емдеуді қажет етеді.

Ересектерге

• кандидемияда, диссеминирленген және жүйелік кандидозда бастапқы доза алғашқы күні 400 мг, екінші күннен бастап күніне 200-400 мг құрайды. Өмірге қатер төндіретін кандидоз жағдайында тәуліктік доза 800 мг-ге дейін жетуі мүмкін, емдеу ұзақтығы клиникалық көрінісіне байланысты;

• басқа жерге орныққан криптококктік менингитте және криптококктік жұқпаларда алғашқы күні 400 мг, содан кейін күніне бір рет 200-400 мг-нан кем дегенде 6-8 апта тағайындайды;

• Cryptococcus neoformans әсерінен өмірге қатер төндіретін жұқпаларда бір реттік 800 мг құрауы мүмкін, емдеу ұзақтығы клиникалық әсеріне және өсірінді нәтижесіне байланысты;

• АИВ жұқпалары бар науқастарда криптококктік менингиттің қайталануына жол бермеу мақсатында емдеу курсының соңында 200 мг Нофлукты ұзақ уақыт күн сайын қабылдауға көшкен жөн;

• орофарингеальді кандидозда әдеттегі тәуліктік доза 7-14 күн бойы 50-100 мг құрайды. Ауыр иммунитет тапшылығы жағдайларында препаратты өте ұзақ уақытқа тағайындауға болады;

• ауыз қуысының атрофиялық кандидозында әдеттегі доза жергілікті антисептиктерді бір мезгілде қолданған кезде 14 күн бойы 50 мг құрайды;

• басқа жерге орныққан шырышты қабық кандидозында - эзофагитте, инвазивтік емес бронхопульмональді жұқпаларда, уретритте әдеттегі тәуліктік доза – 50-100 мг, емдеу ұзақтығы – 14-30 күн;

• дерматофиттерден болған табан микоздарында, сондай-ақ тері кандидозында аптасына бір рет 150 мг-нан немесе күн сайын 50 мг-нан тағайындайды. Әдетте, емдеу курсы 2-4 аптаны құрайды, алайда табан микоздарында емдеу 6 аптаны қажет етуі мүмкін;

• тері кандидозында аптасына бір рет 150 мг-нан немесе күн сайын 50 мг-нан тағайындайды. Емдеу курсы 2-4 аптаны құрайды;

• қабыршақты теміреткіні емдеу үшін ұсынылатын тәуліктік доза 2-4 апта бойы 50 мг немесе 2 апта бойы аптасына бір рет 300 мг құрайды, үшінші аптада қосымша бір реттік 300 мг доза қажет етілуі мүмкін. Жекелеген жағдайларда бір реттік 300-400 мг доза жеткілікті болады;

• онихомикоздарды емдеу үшін аптасына бір рет 150 мг қабылдау керек; емдеуді тырнақтың зақымданған бөлігі сауына түгел алмасқанша жалғастырған жөн. Әдетте, ол үшін 3-6 ай, бас бармақтың тырнақ пластинкасының өсуі үшін 6-12 ай қажет болуы мүмкін. Тырнақ пластинкасының өсу жылдамдығы жас ұлғайған сайын баяулайды;

• қынаптық жедел кандидозды емдеу үшін ішке 150 мг тағайындалады;

• қайталанатын қынаптық кандидоз жағдайында емдеу курсын қайталау керек, яғни кейінгі 4-12 ай ішінде препаратты айына бір рет 150 мг-нан енгізу керек;

• кандидоздық баланитті емдеу үшін бір реттік 150 мг доза тағайындалады;

• АИВ жұқтырған науқастарда орофарингеальді кандидоздың алдын алу мақсатында емдеу курсының соңында препаратты ұзақ уақыт әрбір апта сайын 150 мг-нан тағайындайды;

• иммундық супрессия жағдайларында кандидоздық профилактиканы күн сайын 50-400 мг-дық дозалармен жүргізеді. Жүйелік жұқпалар қаупі жоғары болғанда, мысалы ауыр және ұзаққа созылған нейтропения жағдайында әдеттегі доза 400 мг құрайды. Препаратты пайда болуы мүмкін нейтропениядан бірнеше күн бұрын, ал нейтрофилдер саны 1000/мм³-ге дейін артқаннан кейін Нофлукпен емдеуді тағы бір апта бойы жалғастырады.

Балаларға жаңа туған кезінен бастап

Дозасы және курс ұзақтығы, ересектердегідей, клиникалық көрінісіне және микологиялық зерттеу нәтижелеріне байланысты әр емделушіге жекелей белгіленеді. Балаларға ересектерге рұқсат етілген ең жоғары дозадан артық дозада тағайындауға болмайды.

• шырышты қабықтардың кандидозында алғашқы күні дене салмағының әр кг-на шаққанда 6 мг-нан, әрі қарай күніне 3 мг-нан;

• жүйелік кандидозда немесе криптококктік жұқпаларда аурудың ауырлығына байланысты күніне 6-12 мг/кг қажет етіледі;

Бүйрек қызметі бұзылған балаларға редукцияланған тәуліктік доза ересектерге арналған сызбадағыдай есептеледі (төмендегіні қараңыз).

Туғаннан бастап 4 апталыққа дейінгі нәрестелер

Өмірінің алғашқы екі аптасында препаратты жаңа туған нәрестенің организмінен флуконазолдың баяу шығарылуына байланысты, әрбір үшінші күні, яғни әрбір 72 сағат сайын тағайындаған жөн. Өмірінің үшінші және төртінші аптасында осы дозаны күнара, яғни әрбір 48 сағат сайын тағайындайды.

Егде жастағы кісілерге

Бүйрек қызметі қалыпты болғанда әдеттегідей дозаларды тағайындайды. Бүйрек қызметі төмендеп, креатинин клиренсі < 50 мл/мин болған кезде, дозаны төмендету қажет (төмендегіні қараңыз).

Бүйрек қызметі төмендегенде (ересектер және балалар)

Дозалар бүйрек қызметінің бұзылу дәрежесіне байланысты азайтылуы тиіс. Бір күндік емдеу курсында (қынаптық кандидоз жағдайында) дозаны өзгертпейді.

Қалған жағдайларда емдеуді қаныққан дозадан, яғни 50-400 мг препаратты ішуден бастаған жөн, әрі қарай, креатинин клиренсіне байланысты, дозаны немесе қабылдау жиілігін келесі сызба бойынша есептейді:

Жағымсыз әсерлері

Жиі >1/100 – <1/10

- бас ауыру

- жүректің айнуы, құсу, іштің ауыруы, диарея

- тері бөртпелері

- бауыр ферменттері (АЛАТ, АСАТ, сілтілік фосфатаза) белсенділігінің жоғарылауы

Жиі емес >1/1000 – <1/100

- анемия, эозинофилия

- дәмнің бұзылуы, бас айналу, парестезия, ұйқышылдық, құрысулар, діріл

- ауыз ішінің құрғауы, ас қорытудың бұзылуы, іштің желденуі, іш қатулар

- бауыр қызметінің бұзылуы, холестаз, сары ауру, гепатит, билирубин деңгейінің жоғарылауы

- терінің қышуы, гипергидроз

- бұлшықеттің ауыруы

- шаршау, көңіл-күйінің бұзылуы, әлсіздік, температураның жоғарылауы

Сирек >1/10000 – <1/1000

- анафилактикалық реакция, эксфолиативті дерматит, Стивенс-Джонсон синдромы, денеге жайылған жедел экзантематозды пустулез

- қарыншалардың жыпылықтауы/жыбырлауы, QT аралығының ұзаруы

- гепатоуыттылық, өлім-жітімнің сирек жағдайларын қоса есептегенде, бауыр қызметінің жеткіліксіздігі, гепатоцеллюлярлы некроз, гепатоцеллюлярлы зақымдану

- анорексия

- ұйқысыздық

АИВ жұқтырған науқастарда жағымсыз әсерлер басқа науқастарға (13%) қарағанда жиі (21 %) кездеседі, алайда жағымсыз әсерлердің сипаты ұқсас.

Постмаркетингтік зерттеулер:

- асқын сезімталдық реакциялары (Квинке ісінуі, уытты эпидермальді некролиз)

- лейкопения (нейтропения және агранулоцитоз), тромбоцитопения

- гиперхолестеринемия, гипертриглицеридемия, гипокалиемия

- гепатит, бауырдың дәрілерден зақымдануы

- алопеция

Қолдануға болмайтын жағдайлар

- препараттың кез келген компонентіне және сыртартқыда триазолдың басқа туындыларына жоғары сезімталдық

- терфенадинмен, цизапридпен, астемизолмен, эритромицинмен бір мезгілде қабылдау

- QT аралығын ұзартатын препараттармен (пимозид, хинидин) бір мезгілде қабылдау

- жүректің ауыр сырқаттары

- жүктілік және лактация кезеңі

Дәрілермен өзара әрекеттесуі

Цизаприд (цизапридпен және флуконазолмен емді бір мезгілде қабылдап жүрген науқастарда, «torsade de pointes» ұстамаларын қоса есептегенде, жүрек-қантамыр жүйесі қызметінің бұзылулары білінді.

Терфенадин (CYP 3A4 ферментінің субстраты). Терфенадинді және триазол туындыларын бірге қолданған кезде ырғақтың ауыр бұзылулары білінді, олар QT аралығының ұзаруымен қатар жүрді. Флуконазол 400 мг және одан жоғары дозада қанда терфенадин концентрациясын сөзсіз арттырады.

Астемизол (CYP 3A4 ферментінің субстраты). Астемизолдің артық дозалануы QT аралығының ұзаруымен, жүректің ауыр аритмияларымен, «torsade de pointes» ұстамасын қоса есептегенде, немесе жүректің тоқтап қалуымен қатар жүреді. Жүрекке ауыр, кейде өлім-жітімдік жағымсыз реакцияларды тудыратын болғандықтан, астемизолды флуконазолмен бірге қолдануға болмайды.

Алфентанил (CYP 3A4 ферментінің субстраты) 400 мг флуконазолды және 20 мкг/кг алфентанилді көктамыр ішіне бірге енгізген кезде, алфентанилдің AUC мәні 50 %-ға артты, ал клиренсі 55 %-ға төмендеді, бұл CYP 3A4 ферментінің тежелуі салдарынан болуы мүмкін. Алфентанилді және флуконазолды бірге қолданған кезде препараттар дозасын түзету қажет болуы мүмкін.

Амитриптилин Флуконазол амитриптилиннің әсерін күшейтеді. Флуконазолды және нортриптилинді (амитриптилиннің белсенді метаболиті) бірге қолданған кезде қан плазмасында нортриптилин концентрациясының артқаны байқалды. Қан плазмасындағы амитриптилин деңгейін бақылау қажет және амитриптилин дозасын түзету қажет етілуі мүмкін.

Бензодиазепиндер (әсер етуі қысқа, CYP 3A4 ферментінің субстраттары)

7,5 мг мидазоламды және 400 мг флуконазолды ішу арқылы бірге қабылдаған кезде мидазолам концентрациясының және оның психомоторлы әсерлерінің едәуір артқаны білінді. 100 мг флуконазолды және 0,25 мг триазоламды бірге қолдану триазоламның AUC және жартылай шығарылу кезеңінің артуына әкеледі. Триазоламның дозасын түзету қажет етілуі мүмкін. Егер флуконазол қабылдап жүрген науқастарға бензодиазепиндерді қолдану қажет етілсе, бензодиазепиннің дозасын төмендету және науқастарды мұқият бақылап отыру қажет.

Кальций өзекшелерінің бөгегіштері (кальций антагонистері) (CYP 3A4 ферментінің субстраты) Кальцийдің кейбір антагонистері (дигидропиридин туындылары: нифедипин, израпидин, никардипин, амлодипин және фелодипин) CYP 3A4 ферментімен метаболизденеді. Флуконазолмен бірге қолданған кезде қанда кальций антагонистері артуы және олардың жүйелік әсері жоғарылауы мүмкін.

Целекоксиб (CYP 2C9 ферментінің субстраты).

Флуконазолмен бірге қолданған кезде целекоксибтің Сmax және AUC артады. Осы препараттарды бірге қолданған кезде целекоксибтің дозасын 50%-ға төмендету қажет.

Циклоспорин (CYP 3A4 ферментінің субстраты) Флуконазол қан плазмасында циклоспориннің концентрациясына ықпалын тигізбейді. Сондықтан препаратты және циклоспоринді бірге қолданған кезде қан плазмасында циклоспориннің деңгейін мезгіл-мезгіл бақылап отырған жөн.

ДиданозинДиданозинді және флуконазолды бірге қолдану диданозиннің фармакокинетикасына және тиімділігіне ықпалын тигізген жоқ. Осыған қарамастан, флуконазолдың тиімділігін жүйелі түрде тексеріп отырған жөн. Диданозинді қолданғанға дейін флуконазолмен емдеу курсын жүргізген дұрыс.

Галофантрин (CYP 3A4 ферментінің субстраты) CYP 3A4 ферментін бөгейтін препараттар қан плазмасында галофантрин концентрациясының артуына әкеп соғуы мүмкін.

ГМГ-КоА-редуктаза тежегіштері (CYP 2C9 немесе CYP 3A4 ферментінің субстраты)

Флуконазолды CYP 3A4 ферментімен (мысалы, симвастатин, аторвастатин) немесе CYP 2C9 ферментімен (флувастатин) метаболизденетін ГМГ-КоА-редуктаза тежегіштерімен бірге қосып қолданған кезде миопатияның пайда болу қаупі артады. Флувастатиннің және флуконазолдың өзара әрекеттесуіне байланысты флувастатиннің концентрация-уақыт қисығы астындағы аудан 200%-ға артуы мүмкін. Флуконазолды ГМГ-КоА-редуктаза тежегіштерімен бірге қолданғанда сақ болу қажет. Мұндай жағдайда ГМГ-КоА-редуктаза тежегішінің дозасын төмендету ұсынылады. Миопатияның немесе қаңқа бұлшықеттерінің жедел некрозының (рабдомиолиз) белгілерін анықтау үшін науқасты бақылауға алу және қан плазмасында креатинкиназа деңгейін жүйелі түрде тексеріп отыру қажет. Егер креатинкиназа деңгейі едәуір артса немесе миопатия немесе рабдомиолиз белгілері білінсе, ГМГ-КоА-редуктаза тежегіштерімен емдеу курсын тоқтату керек.

Ішу арқылы қабылданатын антикоагулянттар, кумарин туындылары (CYP 2C9 ферментінің субстраты) Флуконазол варфаринмен бірге бір мезгілде қолданылған кезде протромбинді уақытты арттырады. Қан кету түріндегі асқынулар (гематомалар, мұрыннан, асқазан-ішектен қан кетулер, гематурия, мелена) білінуі мүмкін. Антикоагулянттарды және флуконазолды қабылдап жүрген науқастарда протромбин уақытын жүйелі бақылап отыру қажет.

Лозартан (CYP 2C9 ферментінің субстраты) Флуконазол лозартанның белсенді метаболитке айналуын тежейді, ол ІІ ангиотензин рецепторларымен бірге антагонизміне үлкен дәрежеде жауап береді. Лозартанды флуконазолмен біріктіріп қолданған кезде лозартанның концентрациясы артады, белсенді метаболиттің концентрациясы төмендейді. Сондықтан осы препараттарды біріктіріп қолданған кезде науқасты бақылауға алу және артериялық қысымын жүйелі түрде тексеріп отыру қажет.

Ішу арқылы қабылданатын біріктірілген контрацептивтік дәрілер Сау әйелдерге жүргізілген зерттеулерде 50 мг флуконазолды қабылдау ішу арқылы қабылданатын біріктірілген контрацептивтік дәрілердің әсер етуші заттарының деңгейіне ықпалын тигізген жоқ.

200 мг флуконазол этинилэстрадиолдың және левоноргестрелдің концентрация/уақыт қисығы астындағы ауданды (AUC), тиісінше, 40%-ға және 24 %-ға арттырды. Флуконазолды осындай дозада қайталап қолданған кезде ішу арқылы қабылданатын біріктірілген контрацептивтік дәрілердің әсеріне ықпалын тигізбейді.

Фенитоин (CYP 2C ферментінің субстраты) Көктамыр ішіне 200 мг флуконазолды және 250 мг фенитоинды бірге енгізген кезде фенитоинның AUC мәнінің 75 %-ға, ал ең жоғары концентрацияның 128 %-ға артқаны байқалды. Осы препараттарды біріктіріп қолдану қажет болған кезде фенитоин деңгейін жүйелі бақылап отыру, фенитоин дозасы артық дозаланбауы үшін оны төмендеткен жөн.

Преднизолон (CYP 3A4 ферментінің субстраты) Бүйректі алмастырғаннан кейін преднизолон қабылдаған бір емделушіде флуконазолмен үш айлық емдеуді аяқтаған кезде Аддисон ауруының кризисі байқалды. Флуконазолды тоқтату CYP 3A4 ферментінің белсенділігін арттыруы мүмкін. Флуконазолмен және преднизолонмен біріккен емдеу курсын жалғастырған науқастар, бүйрекүсті безі қабығы қызметінің жеткіліксіздігі қаупіне байланысты, дәрігердің бақылауында болуы тиіс.

Рифабутин (CYP 3A4 ферментінің субстраты) Флуконазолды және рифабутинді біріктіріп қолданған кезде қан плазмасындағы рифабутиннің концентрациясы артады. Рифабутин мен флуконазолды бірге қабылдаған науқастарда увеит байқалды. Рифабутин мен флуконазол қабылдап жүрген науқастардың жағдайын ұдайы бақылап отыру қажет.

Диабетке қарсы ішу арқылы қолданылатын дәрілер, сульфонилмочевина туындылары (CYP 2C ферментінің субстраты)

Флуконазол мен сульфонилмочевина туындыларын (хлорпропамид, глибенкламид, глипизид және толбутамид) бірге қолданған кезде дені сау адамдарда сульфонилмочевина туындыларының жартылай шығарылу кезеңінің ұлғайғаны байқалды. Осы препараттарды бірге қолданған кезде гипогликемияның пайда болуы мүмкін екендігін ескеру қажет, сондықтан қандағы глюкозаны, және сульфонилмочевина туындылары дозасының тиісінше азаюын жиі тексеріп отыру керек.

Такролимус және сиролимус (CYP 3A4 ферментінің субстраттары) Такролимус пен флуконазолды бірге қолданған кезде қан плазмасында такролимус концентрациясының артқаны және нефроуыттылықтың күшейгені білінді. Флуконазол сиролимустың плазмалық концентрациясын арттырады. Флуконазолмен және такролимуспен немесе сиролимуспен бір мезгілде ем қабылдап жүрген науқастарға мұқият бақылау жасау қажет.

Теофиллин 14 күн бойы тәулігіне 200 мг флуконазол қабылдау теофиллиннің клиренсін 18 %-ға төмендетеді. Сондықтан теофиллиннің жоғары дозаларын флуконазолмен бірге қолданған кезде науқастың жағдайын бақылауға алу қажет, ал артық дозалану немесе теофиллиннен уыттану белгілері пайда болған кезде теофиллин дозасын төмендету қажет.

Триметрексат Флуконазол триметрексаттың метаболизміне кедергі жасайды, ол қан плазмасында триметрексат концентрациясының артуына әкеп соғады. Осы препараттарды біріктіріп қолдану қажет болған жағдайда триметрексаттың деңгейін жүйелі түрде бақылап отыру және науқастағы триметрексаттың уыттылық белгілерін тексеру қажет.

Зидовудин Фармакокинетикалық екі сынақта флуконазолды зидовудинмен біріктіріп қолданған кезде зидовудиннің концентрация/уақыт қисығы астындағы ауданның 20%-ға және 74 %-ға артқаны білінді. Сондықтан қан плазмасындағы зидовудиннің деңгейін бақылау және оның дозасын өзгерту керек.

QT аралығын ұзартатын препараттар: жекелеген жағдайларда флуконазолдың QT аралығын ұзартып, жүректің ауыр аритмияларын тудыратындығы білінді. Сондықтан QT аралығын ұзартатын препараттарды қабылдап жүрген науқастарға флуконазолды қолдануға болмайды.

Б амфотерицин: in vitro және in vivo зерттеу деректері бойынша азолдар мен Б амфотерицин арасында қарама-қайшылықтар байқалады, бірақ мұның клиникалық маңызы белгісіз.

Сүйек кемігін ауыстырар алдында ас, циметидин, антацидтік дәрілер қабылдау, жаппай сәулелендіру флуконазолдың ішу арқылы қабылданатын түрінің сіңуіне ықпалын тигізген жоқ.

Айрықша нұсқаулар

Жекелеген жағдайларда негізгі ауыр ауруға Норфлукты қолданған кезде өлім-жітімге дейін әкеп соғатын ауыр гепатоуыттылық байқалды. Алайда препараттың қолданылған дозасының емдеу ұзақтығымен, науқастың жынысымен немесе жасымен байланысын анықтауға мүмкіндік болмады. Нофлуктың гепатоуыттылық әсері емдеуді тоқтатқаннан кейін әдетте қайтымды. Норфлукпен емдеу кезінде науқастарда бауыр қызметінің тесттері өзгеруі мүмкін, оларды бақылап отыру қажет. Егер емдеуді жалғастырса, емдеуден күтілетін пайданы бауыр қызметінің уыттанудан болған жеткіліксіздігінің пайда болу қаупімен салыстыру қажет. Бауыр ауруларының белгілері пайда болған кезде Нофлукпен емдеу курсын тоқтату қажет.

Нофлукпен емдеу курсын бастар алдында электролиттік теңгерімнің бұзылуын (гипокалиемия, гипомагниемия, гипокальциемия) түзету қажет.

Нофлук сирек жағдайларда анафилактикалық реакцияларды тудыруы мүмкін. Қатар жүретін иммундық тапшылығы бар науқастарда ауыр тері реакциясы кездеседі. Терінің беткейлік зеңді жұқпасын емдеуге байланысты бөртпелер пайда болған кезде Нофлукпен емдеуді тоқтату қажет. Егер бөртпе инвазивтік немесе жүйелік микоздан емделген науқаста пайда болса, науқасты ұдайы бақылап отыру қажет, ал теріде күлдіреуік зақымдар немесе көп пішінді экссудативтік эритема пайда болса, препаратпен емдеу курсын тоқтату қажет.

Нофлук QT аралығын ұзартуы мүмкін. Препаратты қолданған кезде QT аралығының ұзаруы, жүрекшелердің жыпылықтауы/жыбырлауы мысалы, жүректің органикалық аурулары, электролиттік теңгерімнің бұзылуы және осындай бұзылулардың пайда болуына мүмкіндік беретін қатар жүргізілетін ем сияқты бірнеше қауіпті факторлары бар. Сондықтан проаритмиялық жағдайдағы осындай емделушілерге Нофлукты абайлап қолданған жөн.

Бүйрек қызметінің жеткіліксіздігі бар болған кезде, креатинин клиренсі минутына 50 мл-ден төмен болғанда, препарат дозасын тиісінше төмендету керек.

Ұрпақ өрбіту жасындағы әйелдер ұзақ емдеу курсы кезінде контрацепцияның сенімді әдісін қолдануы қажет.

Көктамыр ішіне енгізуге арналған флуконазол ерітіндісі мыналармен үйлеседі: 20% глюкоза ерітіндісімен, Рингер ерітіндісімен, глюкозадағы калий хлориді ерітіндісімен, 4,2% натрий бикарбонаты ерітіндісімен, Хартманн ерітіндісімен, аминофузинмен.

Айқын үйлесімсіздік фактісінің байқалмағанына қарамастан, флуконазолды басқа ерітінділермен араластырмау керек.

100 мл инфузиялық ерітіндіде 15 ммоль натрий және хлор иондары бар, оны натрий мен сұйықтықты қабылдауды шектеуді қажет ететін науқастарға препаратты тағайындаған кезде ескерген жөн.

Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері

Препаратты қолданғанда көлікті немесе қауіпті механизмдерді басқарған кезде сақ болу қажет.

Артық дозалануы

Симптомдары: жүректің айнуы, құсу, диарея, ауыр жағдайларда – құрысулар.Емдеу: препаратты тоқтату, асқазанды шаю, симптоматикалық ем жүргізу. Қарқынды диурез бүйрек арқылы шығарылуын арттырады; үш сағаттық гемодиализ плазмадағы концентрациясын 50%-ға төмендетеді.

Шығарылу түрі және қаптамасы

Тығыздығы төмен полиэтиленнен жасалған қақпағы бар тығыздығы төмен полиэтиленнен жасалған құтыда препарат 100 мл-ден.

Дәнекерленген полиэтилен пакеттегі құты медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

Құрғақ, жарықтан қорғалған жерде, 25°С-ден аспайтын температурада сақтау керек.

Мұздатып қатыруға болмайды.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Дәріханадан босатылу шарттары

Рецепт арқылы

Өндіруші

«VMG Pharmaceuticals Pvt. Ltd», Үндістан

Тіркеу куәлігінің атауы және елі

«VMG Pharmaceuticals Pvt. Ltd», Үндістан

Тұтынушылардан өнім (тауар) сапасы жөнінде шағымдарды Қазақстан Республикасы аумағында қабылдайтын ұйымның мекенжайы

«КазЕвроФарм» ЖШС

Алматы қ-сы, Құрманғазы к-сі 48 «а», кеңсе 9

Индекс 050000

Телефон нөмірі: (727) 2729871, 2615141

Факс нөмірі: (727) 2614466

Электрондық поштасы: Info@kazeuropharm.com