Нирсип

• русский
• қазақша

• Скачать инструкцию медикамента

Саудалық атауы

Нирсип

Халықаралық патенттелмеген атауы

Ципрофлоксацин

Дәрілік түрі

Инфузияға арналған ерітінді 200мг/100мл

Құрамы

100 мл ерітіндінің құрамында

Белсенді зат: 200 мг ципрофлоксацин,

қосымша заттар: натрий хлориді, динатрий эдетаты, лимон қышқылының моногидраты, сүт қышқылы, натрий гидроксиді, инъекцияға арналған су.

Сипаттамасы

Сәл бозғылт-сарғыштау реңді, мөлдір, түссіз ерітінді.

Фармакотерапиялық тобы.

Микробқа қарсы препараттар – хинолон туындылары. Фторхинолондар.

АТХ коды J01MA02

Фармакологиялық қасиеттері

Фармакокинетикасы

Биожетімділігі 70%-ға жуықты құрайды, қан плазмасы ақуыздарымен байланысуы – 20-40%, қандағы ең жоғарғы концентрациясына жету уақыты TCmax – 60 минут. Көктамырішілік 200 мг және 400 мг инфузиядан кейінгі С max - сәйкесінше 2.1 және 4.6 мкг/мл. Таралу көлемі – 2-3 л/кг. Таралуы: тері, жұмсақ тіндер, сүйектер, құрсақ қуысы мен кіші жамбас ағзалары, тыныс алу жүйесі, несеп, сілекей, өт, қуықасты безі сөлінісі, гематоэнцефалдық және плаценталық бөгеттер арқылы жақсы өтеді, емшек сүтімен бөлініп шығады. Нейтрофилдердегі концентрациясы қан сарысуындағыға қарағанда 2-7 есе жоғары. Жұлын сұйықтығына азғантай мөлшерде, қабыну жоқ кезде 6-10%, қабыну кезінде – 14-37% енеді. Бауырда препараттың дәл өзі сияқты осындай микробқа қарсы белсенділігі бар гидроксилденген метаболиттер түзе отырып, 15-30% метаболизденеді. Жартылай шығарылу кезеңі T1/2 4 сағат (дозасына байланыссыз). Бүйрекпен - 75-90% (өзгеріссіз күйде), 4%-ға жуығы – өтпен шығарылады. Бүйректің созылмалы жеткіліксіздігінде T1/2- 12 сағатқа дейін.

Фармакодинамикасы

Нирсип фторхинолондар тобының кең ауқымды әсері бар микробқа қарсы препараты, ол бактериялардың маңызды ферменті және бактериялық ДНҚ-ның дупликация, транскрипция және репликация үдерістерінің негізгі катализаторы болып табылатын ДНҚ-гиразаны (II-IV типті топоизомеразаны) тежейді.

Нирсип грамоңдарға қатысты – тек бөліну кезеңінде ғана және пенициллиндерге, цефалоспориндерге және (немесе) аминогликозидтерге резистентті штаммдарды қоса, тыныштық және бөліну кезеңіндегі грамтеріс патогентерге қатысты белсенді.

Грамтеріс бактериялардың көпшілігіне қатысты тиімділігі жоғары: Pseudomonas aeruginosa, Haemophilus influenzae, Escherichia coli, Klebsiella, Morganella morganii, Proneus mirabilis, Pr. vulgaris, Vibrio enterocolitica, Yersinia enterocolitica, Shigella spp., Salmonella spp., Neisseria meningitidis, Neisseria gonorrhoeae.

Staphylococcus spp-ге қатысы, Enterococcus spp., Campylobacter spp., Legionella spp., Mycoplasma spp., Chlamydia spp., Mycobacterium spp штаммдарының кейбіріне қатысты белсенді.

Ципрофлоксацинге Ureaplasma urealyticum, Clostridium difficile, Nocardia asteroids, Bacteroides fragalis резистентті.

Қолданылуы

- ортаңғы отитте, синуситте, мастоидитте

- пневмонияда, бронхопневмонияда, жұқпалы плевритте, эмпиемада, өкпе абсцесінде, жұқпаланған бронхоэктаздарда, созылмалы бронхиттің асқынуы және муковисцидозбен науқастардағы өкпе жұқпаларында

- перитонитте, құрсақішілік абсцестерде, холангитте, холециститте, өт қабының эмпиемасында

- жедел және созылмалы пиелонефритте, простатитте, циститте, уретритте, эпидидимитте

- сальпингиттерде, эндометриттерде, жамбас ағзалары мен тіндердің қабыну аурулары

- гонореяда (уретральді, ректальді және фарингеальді)

- жұқпаланған ойық жараларда, абсцестерде, жұқпаланған күйіктерде

- жедел және созылмалы остеомиелитте, септикалық артриттерде

- септицемияда, соның ішінде иммунитеті төмендеген науқастарда

- іш сүзегінде, бактериялық диареяда, тырысқақта

Қолдану тәсілі мен дозалары

Нирсиптің инфузиясын жұқпаның түріне, ауырлығына, сондай-ақ науқас бүйрегінің жағдайына байланысты тікелей көктамырға 200 мг/сағ жылдамдықпен, тәулігіне 2 рет 8-12 сағат аралықпен 200 - 400 мг енгізіледі. Инфузия ұзақтығы 200 мг дозада 30 минуттан кем емес және 400 мг дозада 60 минут. Бір реттік 500 мг дозасын асқынбаған жедел гонореяны емдеу үшін қолдануға болады.

Мұрынжұтқыншақтағы менингококк тасымалдағыштығында бір рет 500–750 мг.

Емдеу курсы жұқпаның ауырлығына, клиникалық динамикасына және бактериологиялық талдау мәліметтеріне байланысты.

Тыныс алу жолдарының жұқпалары – жұқпаның ауырлығына және емделушінің жай-күйіне байланысты тәулігіне екі рет 200 мг немесе тәулігіне бір рет 400 мг.

Несеп шығару жолдарының жедел, асқынбаған жұқпалары – тәулігіне екі рет 100 мг.

Әйелдердегі цистит (менопаузаға дейін) – тәулігіне бір рет 100 мг.

Несеп шығару жолдарының асқынған жұқпалары – тәулігіне екі рет 200 мг.

Экстрагенитальді гонорея –тәулігіне 2 рет 100 мг.

Асқынбаған жедел гонорея – бір рет 100 мг.

Басқа жұқпаларды «Қолданылуы» бөлімінен қараңыз - жұқпаның ауырлығына және емделушінің жай-күйіне байланысты тәулігіне екі рет 200 мг немесе тәулігіне бір рет 400 мг.

Жедел жұқпалардағы әдеттегі емдеу курсы 5-7 күнді құрайды, бірақ қайталанатын созылмалы жұқпаларды емдеуде емдеу курсы 10-14 күнді құрайды.

Сүйек тіндерінің жұқпаларын 4-6 апта бойы емдеуді қажет етеді. Креатинин клиренсі 20 мл/минут және одан да аз науқастарды емдеуде әдеттегі дозасының жартысы қолданылады.

Жағымсыз әсерлері

- анемия, тромбоцитопения, эозинофилия, лейкопения

- тахикардия, аритмия, артериялық қысымның төмендеуі, QT аралығының ұзаруы

- бас ауыруы, бас айналуы, әлсіздік, шаршағыштық, сананың шатасуы, ұйқысыздық, мазасыздық, көңіл-күйдің өзгерістері, бағдарсыздық, елестеулер, көрудің бұзылуы, құрысулар, діріл

- жүрек айнуы, құсу, анорексия, ауыздың металл татуы, диспепсия, іштің ауыруы, диарея, дисбактериоз, жалғанжарғақшалы колит

- терінің қышуы, тері бөртпесі, васкулит, есекжем, Стивенс-Джонсон синдромы, Лайел синдромы, Квинке ісінуі

- транзиторлық артралгия, тендовагинит, миалгия

- гинекомастия

- интерстициальді нефрит, өтпелі кристаллурия, несептің күңгірттенуі

- сілтілік фосфатаза, лактатдегидрогеназа, бауыр трансаминазалары деңгейінің артуы, қан плазмасы креатининінің транзиторлық артуы

- инъекция орнының ауыруы, флебит

- Өте сирек – тромбоцитоз, гемолитикалық анемия

Қолдануға болмайтын жағдайлар

- ципрофлоксацинге немесе басқа фторхинолондарға аса жоғары сезімталдық

- балалар мен 18 жасқа дейінгі жасөспірімдер

- жүктілік және лактация кезеңі

- тизанидинді бір мезгілде қабылдау (артериялық қысымның айқын төмендеуі, ұйқышылдық қаупі)

- бұрын жүргізілген хинолиндермен емдеу кезіндегі сіңірлердің зақымдалуы.

Дәрілермен өзара әрекеттесуі

К витаминінің антагонистері мен Нирсипті бір мезгілде тағайындағанда қанның ұйыту жүйесінің жағдайын бақылауға алу қажет. Глюкокортикостероидтармен бір мезгілде тағайындағанда, әсіресе егде жастағы адамдарда сіңірлердің үзілу қаупі артады.

Несепті сілтілейтін препараттармен тағайындағанда (карбоангидраза тежегіштері, цитраттар, натрий бикарбонаты), кристаллурия мен нефроуытты әсерлерінің қаупі ұлғаяды.Қабынуға қарсы стероидты емес препараттар нитроимидазол мен метилксантиндер туындыларымен тағайындағанда нейроуытты әсерлерінің даму қаупі артады.

Ципрофлоксациннің әсері тікелей әсер ететін антикоагулянтпен (варваринмен) бір мезгілде тағайындағанда күшеюі мүмкін.

Құрамында алюминий мен магний бар диданозиннің шайнайтын таблеткаларынан кейін ципрофлоксациннің биожетімділігі азаяды.

Құрамында алюминий Al3+, кальций Ca2+ немесе магний Mg2+ иондары бар минералды антацидтік препараттар немесе темір бар препараттар мен Нирсипті қабылдаулар аралығы кемінде 2 сағатты құрауы тиіс. Бұл шарт сақталмаған жағдайда ципрофлоксацин әсерінің тиімділігі төмендейді. Тағам өнімдері ерімейтін кешендер түзе отырып, ципрофлоксациннің сіңуін төмендетеді (бұл препараттарды тағайындау уақытының аралықтары 2 сағаттан кем болмауы тиіс).

Ципрофлоксацин бір мезгілде тағайындағанда, глибенкламидтің, пробеницидтің, циметидиннің, фуросемид пен метотрексаттың сарысудағы концентрацияларын арттыруы мүмкін. Препарат теофиллин клиренсін 25%-ға төмендетеді (бір мезгілде қолданғанда теофиллиннің дозасын азайтады). Өзекшелік сөліністі бөгейтін препараттар плазмадағы ципрфлоксацин концентрациясын арттырады.

Ципрофлоксацин мына инфузиялық ерітінділермен: 0.9% натрий хлориді ерітіндісімен, Рингер ерітіндісімен, 5% фруктоза ерітіндісімен, 5% декстроза ерітіндісімен үйлесімді. Гепаринмен араластыруға болмайды (шөгінді түзілу қаупі).

Айрықша нұсқаулар

Препаратпен емдеу кезінде, дисульфирам тәрізді реакцияның даму мүмкіндігін ескере отырып, алкоголь ішімдіктерін пайдалануға болмайды.

Нирсипті бауыр, бүйрек жеткіліксіздігі және жедел порфириясы бар емделушілерге сақтықпен тағайындау керек.

Тері фотосенсибилизациясы болуы мүмкін болғандықтан, емдеу кезінде тікелей күнмен сәулеленуден қорғану керек.

Нирсипті қабылдап жүрген науқастар кристаллурияны болдырмас үшін, сұйықтық мөлшерін жеткілікті пайдалануы тиіс.

Ципрофлоксациннің орталық жүйке жүйесіне көтермелегіштік әсері салдарынан, Нирсипті орталық жүйке жүйесінің аурулары ОЖЖ бар (ми қантамырларының атеросклерозы, эпилепсия) науқастарға сақтықпен тағайындау қажет. ОЖЖ көтермеленуін тудыруы немесе уытты әсер беруі мүмкін.

Ципрофлоксацин мен басқа фторхинолондар теофиллин мен кофеин клиренсін төмендетеді

Сіңірлердің ауыруы пайда болғанда немесе тендовагиниттің бастапқы белгілерінде емдеуді тоқтату керек.

Дәрілік заттардың көлік құралдарын жүргізуге және қауіптілігі зор механизмдерді басқару қабілетіне әсер ету ерекшеліктері

Препарат психомоторлық реакциялардың жылдамдығын төмендетеді, оны көлік құралдарын басқарған кезде және зейін шоғырландыруды қажет ететін механизмдермен жұмыс жасағанда ескеру қажет.

Артық дозалануы

Симптомдары: сананың шатасуы, ұйқышылдық, мәңгіру, бағдарсыздық, бас айналуы, құсу, жүрек айнуы.

Емі: арнайы у қайтарғысы жоқ. Емі - симптоматикалық. Гемодиализ және перитонеальді диализ жүргізу ұсынылады.

Шығарылу түрі мен қаптамасы

100 мл препараттан инфузияға арналған арнайы қалпақшамен тығындалған полиэтилен құтыда. Әр құтыны полиэтилен пакетке қаптайды.

1 құтыдан мемлекеттік және орыс тілдеріндегі медицинада қолданылуы жөніндегі нұсқаулықпен бірге картоннан жасалған пәшкеге салады.

Сақтау шарттары

Құрғақ, жарықтан қорғалған жерде, 30 °С-ден аспайтын температурада сақтау керек. Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды

Дәріханалардан босатылу шарттары

Рецепт арқылы

Өндіруші

«Nirma Limited», Үндістан

(Healthcare Division) Sachana, Gujarat 382150, India

Тіркеу куәлігінің иесі

«Nirma Limited», Үндістан

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«КазЕвроФарм» ЖШС

Алматы қ-сы, Құрманғазы к-сі 48 «а», 9 кеңсе

Индексі 050000

Телефон нөмірі (727) 2729871, 2615141

Факс нөмірі (727) 2614466

Электронды поштасы Info@kazeuropharm.com