Неогриппин

• русский
• қазақша

• Скачать инструкцию медикамента

Саудалық атауы

Неогриппин

Халықаралық патенттелмеген атауы

Жоқ

Шығарылу түрі

Таблеткалар

Құрамы

Бір таблетканың құрамында

белсенді заттар: парацетамол 250,0 мг

аскорбин қышқылы 150,0 мг

кальций глюконаты 50,0 мг

дифенгидрамин гидрохлориді 10,0 мг

рутин 10,0 мг

қосымша заттар: жүгері крахмалы, магний стеараты, тальк, лактоза, кармоизин (Е 122).

Сипаттамасы

Сопақша пішінді және сызықты, жасыл теңбілдері бар қызғылт түсті таблеткалар.

Фармакотерапиялық тобы

Суық тию белгілерін жоюға арналған препараттардың басқа біріктірілімдері.

АТЖ коды R05X

 

Фармакологиялық қасиеттері

Фармакокинетикасы

Парацетамол

Ішке қабылдағанда асқазан-ішек жолынан жылдам сіңіріледі. Адам ағзасында парацетамолдың ажыратылмаған қандағы және плазмадағы деңгейлері арасындағы арақатынас 1-ге жақын. Сілекейде препарат плазмадағы парацетамол мөлшерімен ретке келтірілетін концентрацияларда анықталады. Қан плазмасында ең жоғары деңгейіне 30-60 минуттан соң жетеді. Парацетамол ағза тіндеріне жылдам және тегіс таралады. Парацетамолдың ми тініне өту қабілеті жоғары, онда ол біркелкі таралады. Гипофиздің айрықшалығы бар, ондағы препарат мөлшері, басқа ми құрылымдарына қарағанда, 2-3 есе жоғары. Сонымен қатар парацетамол, салицилаттардан гөрі, ми тінінен жылдамырақ шығарылады. Аспиринмен салыстырғанда, препараттың ыстық түсіретін әсерінің ұзаққа созылмауы осымен байланысты. Ана сүтінде парацетамол мөлшері 1%-дан аспайды. Парацетамолды 10-15 мг/кг дозада тағайындағаннан кейін, әдетте, 30 минут өткенде басталатын емдік әсері 2-4 сағат бойы жалғасады.

Қан плазмасы ақуыздарымен байланысуы қабылданған дозаның 80-15%-ын құрайды. Балалар мен ересектерде таралу көлемінің шамалары елеулі ерекшеленбейді. Препарат плаценталық бөгеттен өтеді.

Шығарылуы, негізінен, бауырдағы биоөзгеріс арқылы қабылданған дозаның 90-95%-ына дейін жүреді. Парацетамол бауырдың микросомалық ферменттерімен метаболизденеді. 80%-ға жуығы глюкурон қышқылымен және сульфаттармен конъюгаттар түзеді, 17%-ға дейіні глютатионмен конъюгацияланатын белсенді метаболиттердің түзілуімен гидроксилденуге ұшырайды. Артық дозаланғанда немесе глютатион жетіспеушілігінде бұл метаболиттер гепатоциттер некрозын туғызуы мүмкін. Баланың жасына қарай парацетамол метаболизмінің сапалық өзгерістері бар. Жаңа туған нәрестелерде және 10-12 жасқа дейінгі балаларда күкірт қышқылымен (сульфаттар), үлкен балаларда (12 жастан кейін) және ересектерде глюкурон қышқылымен (глюкуронидтер) жұп эфирлердің түзілуі басым. Түзілген метаболиттер және парацетамолдың өзі, ересектерге (1,9-2,2 сағат) қарағанда, жаңа туған нәрестелерде баяу (2,65-4,35 сағат) бүйрекпен шығарылады. Жаңа туған нәрестеге препаратты қайталап және бақылаусыз енгізу оның ағзада жинақталуына әкелуі мүмкін. Бүйрек қызметі бұзылғанда және созылмалы бауыр аурулары бар науқастарда парацетамол мен оның метаболиттері шығарылуының іркілуі байқалады.

Оның ағзадан шығарылуының жартылай кезеңі 1,5-2 сағат құрайды. Ол бүйрек, бауыр қызметінің айқын бұзылулары бар науқастарда және егде емделушілерде ұзаруы мүмкін. 24 сағаттан соң дозаның 85-90%-ы глюкоронидтер мен сульфаттар түрінде, ал 3%-ы өзгермеген күйде несеппен шығарылады. Балалардағы гепатоуыттылық әсер ықтималдығы, ересектерден гөрі, төмен. Басқа фармакокинетикалық әсерлері ересектер мен балаларда ерекшеленбейді.

Аскорбин қышқылы (С витамині)

Аскорбин қышқылы асқазан-ішек жолында жақсы сіңеді және ағза тіндерінде оңай таралады. Аскорбин қышқылының биоқорытылуы 70%-ға жуық құрайды. Аскорбин қышқылының плазмалық концентрациясы зат асқазан-ішек жолына белгілі бір шамаға дейін түскенде жоғарылайды. Бұл препаратты күн сайын 90-150 мг дозада күнделікті қабылдағанда жүреді. Ағзадағы аскорбин қышқылының қоры дені сау адамда 1,5 г құрайды. Аскорбин қышқылының биоөзгерісі бауырда жүреді. Ол дегидроаскорбин қышқылына дейін қайтымды тотығады, бейтарап болып саналатын аскорбат-2-сульфатқа және несеппен бөлініп шығатын қымыздық қышқылына дейін ішінара метаболизденеді. Аскорбин қышқылы ағза қажеттілігінен асып кететін дозада несеппен шығарылады.

Кальций глюконаты

Негізінен аш ішекте сіңеді. Препараттың асқазан-ішек жолында биоқорытылуы төмен. Бұл көбінесе емдәмге және аш ішектің жай-күйіне байланысты болса да, түскен кальцийдің шамамен бір бөлігі жұтылады. Кальций тапшылығында және жоғары физиологиялық қажеттіліктер кезеңінде, мысалы балалар жасында немесе жүктілік пен емшек емізгенде сіңуі жоғарылаған. Сарысудағы жалпы кальцийдің 50%-ы иондалған кальций болып табылады, 5%-ы анион кешендерінде болады және 45%-ы ақуыздармен байланысқан. Жұтылмаған кальцийдің 20%-ы несеппен және 80%-ы нәжіспен шығарылады. Нәжіспен сіңірілмеген кальций ретінде шығарылады, ал оның сіңірілген бөлігі өтпен және панкреатикалық сөлмен бөлініп шығады. Мардымсыз мөлшерлері термен, шашпен және тырнақпен жоғалады.

Дифенгидрамин гидрохлориді (димедрол)

АІЖ-да жылдам сіңеді. Биожетімділігі 50%-ға жуық. Негізінен бауырда, ішінара өкпе мен бүйректе белсенді метаболизденеді. Плазмалық концентрациясының жоғары шегіне ішке тағайындалғаннан кейін 1-4 сағаттан соң жетеді. Препарат ағзаның барлық тіндеріне (бәрінен көбірек өкпеге, көкбауырға, бүйрекке, бауырға, миға және бұлшықеттерге) жақсы өтеді. Тәулік ішінде ағзадан глюкурон қышқылымен конъюгацияланған метаболиттері несеппен түгел шығарылады, мардымсыз мөлшері өзгермеген күйде бөлініп шығады. Дифенгидрамин плацента арқылы өтіп, емшек сүтінен табылады. Препарат плазма ақуыздарымен 98-99%-ға дейін жоғары дәрежеде байланысады. Ағзадан жартылай шығарылу кезеңі – 4-10 сағат. Препараттың толық шығарылуы тағайындалғаннан кейін 24 сағаттан соң жүзеге асады. Бауыр жеткіліксіздігінде дозаны азаю жағына қарай реттеу қажет.

Рутин (Р витамині)

Биофлавоноидтар – өсімдік тектес полифенол қосылымдарының алуан түрлі тобы. Асқазан-ішек жолынан жылдам сіңеді. Ағза тіндерінде несеппен бөлініп шығатын фенол қышқылдарына айналады. Ішінара флавоноидтар өзгермеген күйде немесе глюкурон және күкірт қышқылды конъюгаттар түрінде бөлініп шығады.

Фармакодинамикасы

Парацетамол гематоэнцефалдық бөгет арқылы жақсы өтеді. Оның бұл үдерістердің шектік деңгейін азайту арқылы орталықтан ауыруды басатын және қызу түсіретін әсері осымен, жылу реттеу және гипоталамустағы ауыру орталықтарына простагландиндер синтезін кедергілейтін простагландинсинтетаза энзимін бөгеу жолымен әсер етуімен байланысты. Бұл олардың дене температурасының төмендеуіне әкелетін жылу реттеу орталықтарына әсер етуін жояды. Қызба ахуалдарында дененің жылу жоғалтуы тамырлар кеңеюінің және шеткергі қан ағымы қарсыласуының жоғарылауы нәтижесінде арта түседі. Бұдан басқа, парацетамолдың ауыруды басатын әсері ауырудың пайда болуына жауапты брадикининге сезімтал хеморецепторлардағы импульстерді шеткергі бөгеумен байланысты. Жедел қабыну салдарынан микроциркуляцияның, бәрінен бұрын қылтамырлық қан айналымының бұзылуы жүреді. Бұл қан жүретін тамырлардың бойында орналасқан ауырсыну рецепторлары сезімталдығының өзгеруіне әкеледі.

Басқа қабынуға қарсы стероидты емес дәрілер сияқты, парацетамолдың ыстық түсіретін әсері дененің қалыпты емес, қызулы температурасын төмендетумен жүзеге асады.

Қабыну тіндерінде жасушалық пероксидазалар парацетамолдың циклооксигеназаға әсерін бейтараптандырады, бұл қабынуға қарсы әсердің толық дерлік жоқ екенін білдіреді.

Аскорбин қышқылы (С витамині) ағзадағы тотығу-тотықсыздану реакцияларының көптеген түрлеріне қатысады. Ең маңызды өкілдері L-аскорбин қышқылы және оның тотыққан түрі – дегидроаскорбин қышқылы болып табылады. Аталған қосылымдардың негізгі қасиеті – антиоксиданттық. Аскорбин қышқылы липидтер, ақуыздар және жасушаның басқа құрамдастарының асқын тотықты тотығу үдерістерін тежейді, оны зақымдалудан осылай қорғайды. С витамині қандағы интерферон концентрациясын жоғарылатады. С витаминінің жарғақша тұрақтандырғыш әсері және оның иммундық түрлендіргіш әсері осымен байланысты. С витамині лейкоциттерге олардың фагоцитарлық белсенділігін арттыра отырып жиналуға қабілетті, бұл микробқа қарсы және вирусқа қарсы қорғанысты күшейтеді. Аскорбин қышқылы бүйрек үсті бездерінің қыртысындағы кортикоидтық гормондардың биосинтезін белсенділендіреді, сонысымен стрестер тұсында ағзаның дағдылану үдерістерін көтермелейді.

Асқазан-ішек жолының патологиясы аскорбин қышқылының қорытылуын кедергілейді. С витаминінің тапшылығында суық тию ауруларының даму қаупі жоғарылайды, қандағы холестерин деңгейі арта түседі, қызылиектердің қанағыштығы, қатты қажу, т.б. дамиды.

Рутин – өсімдік гликозиді. Жасушадағы биологиялық маңызды қосылымдардың, ішінара убихинонның құрылым түзуіне пайдаланылатын биофлавоноидтар тобына жатады. Вирустық жұқпа кезінде өткізгіштігі арта түсетін қан тамырлары қабырғаларының нығаюы есебінен қылтамырлық қан кетуді азайтуға қабілетті. Рутин иммундық жүйенің қалыпты деңгейін ұстап тұруға қолайлы әсер етеді.

Дифенгидрамин гидрохлориді (димедрол) Н1-гистамин рецепторларының бәсекелі бөгегіші. Ол гистаминге қарсы айқын белсенділік иеленеді (ағзаның эндогенді және экзогенді гистаминге реакциясын әлсіретеді). Бұдан басқа, ол жергілікті жансыздандырғыш әсерін тигізеді, тікелей түйілулерді басу әсерінің нәтижесінде тегіс бұлшықетті босаңсытады, вегетативтік жүйке түйіндерінің холинорецепторларын орташа дәрежеде бөгейді. Қылтамырлардың өткізгіштігін азайтады, тіндердің гистаминдік ісінуін және гистамин гипотензиясын болдырмайды, сонысымен тамырлардың өткізгіштігін кемітеді, мұрынның шырышты қабығының ісінуі мен гиперемиясын, тамақтың жыбырлауын, жоғарғы тыныс алу жолдары тарапынан болатын аллергиялық реакцияларды жояды. Димедрол ішке қабылдағанда жақсы сіңеді. Гематоэнцефалдық бөгет арқылы өтеді. Димедролдың маңызды ерекшелігі нейролептикалық заттар ықпалына аздап ұқсайтын тыныштандырғыш әсері болып табылады. Тиісті дозаларда ол ұйықтататын әсерін тигізеді. Бірқалыпты құсуға қарсы дәрі болып та табылады. Димедролдың жүйке жүйесіне әсер етуінде гистамин рецепторларына (мүмкін, мидың Н3-рецепторларына) ықпалымен қатар оның орталық холинолитикалық белсенділігі елеулі мән иеленеді. Димедрол, негізінен, есекжемді, пішен қызбасын, сарысу құю ауруын, геморрагиялық васкулитті (қылтамыр токсикозын), вазомоторлық тұмауратуды, ангионевротикалық ісінуді, қышымалы дерматоздарды, жедел иридоциклитті, аллергиялық конъюнктивиттерді және басқа аллергиялық ауруларды, әртүрлі дәрілерді, соның ішінде антибиотиктерді қабылдаудан болатын аллергиялық асқынуларды емдеу үшін қолданылады. Басқа гистаминге қарсы препараттар сияқты, димедрол сәулелі ауруды емдегенде қолданылады. Бронх демікпесінде димедролдың салыстырмалы түрде белсенділігі аз, дегенмен оны бұл ауру тұсында теофиллинмен, эфедринмен және басқа дәрілік заттармен қосып тағайындауға болады.

Кальций глюконаты кальций иондарының тапшылығын толықтырады, аллергияға қарсы, әлсіз орталық тыныштандырғыш әсерін, қабынуға қарсы, гемостатикалық және дезинтоксикациялық әсерін тигізеді. Кальций иондары жүйке импульстерінің берілу, қаңқаның және тегіс бұлшықеттерінің жиырылу, жүрек бұлшықетінің қызметі, сүйек тінінің қалыптасу, қан ұю үдерісін жүзеге асыру үшін қажет. Кальций жасушалардың және тамыр қабырғасының өткізгіштігін азайтады, қабыну реакцияларының дамуын болдырмайды, ағзаның жұқпаларға қарсыласуын жоғарылатады және фагоцитозды едәуір күшейте алады (натрий хлоридін қабылдағаннан кейін төмендейтін фагоцитоз кальцийді қабылдағаннан кейін артады). Көктамыр ішіне енгізгенде вегетативтік жүйке жүйесінің симпатикалық бөлігін көтермелейді, бүйрек үсті бездерінің адреналин бөлуін күшейтеді, орташа диуретикалық әсерін тигізеді.

Қолданылуы

- суық тию аурулары кезінде ыстық түсіретін дәрі

- миалгия, невралгиялар, бас ауыру кезінде ауыруды басатын дәрі.

Қолдану тәсілі және дозалары

Ішке қолданылады. Ересектерге күніне 3 рет тамақтанудан кейін 2 таблеткадан.

Дәрігердің тағайындауынсыз 3 күннен артық қабылдамайды.

Жағымсыз әсерлері

- тері бөртпесі, тері гиперемиясы, сирек - анафилактикалық шок

- ауыр бүйрек немесе бауыр жеткіліксіздігі

- ауыздың кеберсуі, жүрек айну, құсу, диарея, іш қату, эпигастрий ауырулары, асқазан түйілулері, асқазан-ішек жолы шырышты қабығының тітіркенуі

- бас ауыру, шаршау сезімі, ұйқышылдық, үлкен дозаларды ұзақ уақыт қолданғанда – ОЖЖ қозғыштығының жоғарылауы, ұйқының бұзылуы, уақыт пен кеңістікте бағдардан жаңылу, делирий, жадының қысқа мерзімді нашарлауы, зейіннің әлсіреуі

- ұйқы безінің инсулярлық аппараты қызметінің бәсеңдеуі (гипергликемия, глюкозурия)

- жоғары дозаларда қолданғанда - гипероксалурия және кальций оксалатынан несеп тастарының түзілуі, бүйректің гломерулярлық аппаратының зақымдалуы

- несеп шығарудың қиындауы (әсіресе, қуық асты безі үлкейген ерлерде)

- қылтамырлар өткізгіштігінің төмендеуі және тіндер трофикасының нашарлауы, тромбоз, дозалануынан асып кеткенде: артериялық қысымның көтерілуі, микроангиопатияның дамуы, миокардиодистрофия

- тыныс алу жолы сөлдерінің жоғары тұтқырлығы

- тромбоцитоз, тромбоцитопения, глюкозо-6-фосфатдегидрогеназа тапшылығымен тікелей байланысты гемолитикалық анемия, гиперпротромбинемия, эритропения, нейтрофильді лейкоцитоз, гипокалиемия

- зат алмасудың бұзылуы, ыстықты сезіну, үлкен дозаларды ұзақ уақыт қолданғанда – натрий мен сұйықтық іркілісі, мырыш, мыс алмасудың бұзылуы

- дене температурасының жоғарылауымен қосылған тері бөлінісінің төмендеуі, сексуалдық дисфункция, глаукома кезінде жай-күйдің төмендеуі

- гиперкальциемия (жүрек айну, құсу, диарея, брадикардия) бүйрек жеткіліксіздігі бар немесе D витаминін бір мезгілде қабылдайтын емделушілерде ішке қабылдағаннан кейін байқалуы мүмкін

Емделуші барлық, соның ішінде жоғарыда аталмаған жағымсыз әсерлер жөнінде емдеуші дәрігерге хабарлап, препаратты қабылдауды тоқтату керектігі туралы ескертілуге тиіс.

Қолдануға болмайтын жағдайлар

- препараттың құрамдас бөліктеріне жоғары жекеше сезімталдық

- асқазан мен он екі елі ішектің ойық жаралы ауруы

- асқазан-ішектен қан кету

- бауыр немесе бүйрек қызметінің айқын бұзылулары

- қан құйылуларға бейім қан аурулары

- бүйрек-тас ауруы (немесе осы аурудың сыртартқыда болуы)

- 18 жасқа дейінгі балалық және жасөспірімдік кезең,

- жүктілік, лактация кезеңі

Дәрілермен өзара әрекеттесуі

Парацетамол. Пробенецид, изониазид, циметидин, ранитидин, пропранолол парацетамолдың жартылай шығарылу кезеңін ұзартып, клиренсін азайтады. Бауыр ферменттерінің индукциясын туындататын препараттармен (салициламид, барбитураттар, эпилепсияға қарсы препараттар, үш циклды антидепрессанттар, алкоголь, рифампицин) бірге қолданғанда парацетамолдың уытты метаболиттерінің деңгейі жоғарылайды. Хлорамфениколмен бір мезгілде қолданғанда соңғысының жартылай шығарылу кезеңі ұзарып, уыттылығы артады. Ішу арқылы қабылданатын антикоагулянттармен бір мезгілде қолданғанда протромбин уақыты ұзарады, қан кету қауіптілігі артады. Доксорубицинмен бір мезгілде қолдану бауыр қызметінің бұзылу қаупін жоғарылатады. Метоклопрамид пен домперидол парацетамолдың сіңірілуін күшейтіп, ал холестирамин оны азайтады.

Кальций глюконаты. Кальцийдің сіңірілмейтін кешендерінің түзілуі мүмкін екендіктен, эстрамустиннің, этидронаттың, мүмкін, басқа бисфосфонаттардың, фенитоиннің, хинолондардың, ішу арқылы қабылданатын тетрациклин антибиотиктерінің және фтор препараттарының сіңірілуін азайта алады. Неогриппин таблеткалары мен жоғарыда аталған препараттарды қабылдау арасындағы аралық, кем дегенде, 3 сағат құрауға тиіс.

D витамині мен оның туындыларын бір мезгілде тағайындау кальцийдің сіңуін арттырады.

АІЖ-нан кальцийдің сіңуі тағамның кейбір түрлерін, мысалы, шпинатты, рауғашты, кебектер мен дақылдарды бір мезгілде қабылдағанда азаяды.

Жоғары дозаларда D витаминімен және оның туындаларымен бірге тағайындалғанда кальций верапамилге, мүмкін, кальций өзектерінің басқа бөгегіштеріне болатын реакцияны азайта алады.

Оймақгүл препараттарын алатын науқастарға кальцийдің жоғары дозаларын тағайындау аритмиялардың пайда болу қаупін арттырады.

Тиазид диуретиктері кальцийдің несеппен шығарылуын азайтады. Сондықтан оларды Неогриппин таблеткаларымен бір мезгілде қолданғанда гиперкальциемияның даму қаупін ескеру керек.

Дифенгидрамин гидрохлориді алкоголь, барбитураттар, ұйықтататын дәрілер, апиынды анальгетиктер сияқты заттардың тыныштандырғыш әсерлерін күшейтеді, сондықтан осы препараттарды әсерінің қуаттанып кетпеуі үшін азайтылған дозалауда Неогриппинмен біріктіріп тағайындау қажет.

Аскорбин қышқылы бензилпенициллин мен тетрациклиндердің қандағы концентрациясын жоғарылатады; тәулігіне 1 г дозада этинилэстрадиолдың (соның ішінде ішу арқылы қабылданатын контрацептивтер құрамына кіретін) биожетімділігін арттырады. Темір препараттарының ішекте сіңуін жақсартады (үш валентті темірді екі валентті темірге ауыстырады), дефероксаминмен бір мезгілде қолданғанда темірдің шығарылуын арттырады.

Гепарин мен тікелей емес антикоагулянттар тиімділігін төмендетеді.

Ацетилсалицил қышқылы (АСҚ), ішу арқылы контрацептивтер, жаңа нәрлі шырындар және сілтілі сусын ішу аскорбин қышқылының сіңуі мен қорытылуын азайтады. АСҚ-мен бір мезгілде қолданғанда аскорбин қышқылының несеппен шығарылуы артып, АСҚ шығарылуы азаяды. АСҚ аскорбин қышқылының сіңірілуін шамамен 30% төмендетеді.

Салицилаттармен және қысқа әсер ететін сульфаниламидтермен емдегенде кристаллурияның даму қаупін жоғарылатады, қышқылдардың бүйрекпен шығарылуын баяулатады, сілтілі реакциясы бар препараттардың (соның ішінде алкалоидтардың шығарылуын арттырады), ішу арқылы қабылданатын контрацептивтердің қандағы концентрациясын азайтады.

Өз кезегінде ағзадағы аскорбин қышқылының концентрациясын азайтатын этанолдың жалпы клиренсін ұлғайтады.

Хинолин қатарының препараттары, кальций хлориді, салицилаттар, глюкокортикостероидтар ұзақ уақыт қолданғанда аскорбин қышқылының қорларын тауысады.

Бір мезгілде қолданғанда изопреналиннің хронотропты әсерін азайтады. Ұзақ қолданғанда немесе жоғары дозаларда қолданылғанда дисульфирам-этанолдың өзара әрекеттесуін бұзады.

Жоғары дозаларда мексилетиннің бүйрекпен шығарылуын арттырады.

Барбитураттар мен примидон аскорбин қышқылының несеппен шығарылуын ұлғайтады. Антипсихотикалық ДЗ (нейролептиктер) – фенотиазин туындыларының емдік әсерін, амфетаминнің және үш циклды антидепрессанттардың өзекшелік кері сіңірілуін азайтады.

Рутин. Аскорбин қышқылымен қосылғанда әсері күшейеді. Атап айтқанда, аскорбин қышқылы мен адреналинді тотығудан қорғайды.

Айрықша нұсқаулар

Парацетамол созылмалы бауыр және бүйрек ауруларында, подаграда, асқазан мен он екі елі ішектің ойық жаралы ауруында (сыртартқыда) сақтықпен тағайындалады. Осы мүшелердің функционалдық өзгерістерінің дәрежесі мен сипатын ескеру керек, өйткені бұл науқастарда парацетамолдың жартылай шығарылу уақытының ұзаруы ықтимал. Парацетамол қабылдау фосфор-вольфрам қышқылының көмегімен қандағы несеп қышқылын анықтау және глюкозо-оксидаза-пероксидаза көмегімен гликемияны анықтау нәтижелеріне ықпал етуі мүмкін. Препаратты қабылдағанда және оның әсерінің көрініс беруі барысында алкоголь ішімдіктерін тұтынуға тыйым салынады.

Аскорбин қышқылы әртүрлі зертханалық тестілердің (глюкоза, билирубин мөлшерін және бауыр трансаминазалары белсенділігін, қан плазмасындағы ЛДГ-ны анықтау) нәтижелерін бұрмалай алады. Аскорбин қышқылын гипероксалатуриясы бар емделушілерге абайлап тағайындайды.

Кальций глюконатын бүйрек жеткіліксіздігі бар емделушілерге немесе D витаминінің жоғары деңгейімен байланысты ауруларда, саркоидоз сипатты сырқаттарда сақтықпен қолдану қажет.

Неогриппинді ұзақ уақыт қолдануға (7 тәуліктен артық) кеңес берілмейді. Барлық, соның ішінде жоғарыда аталмаған жағымсыз (әдеттен тыс) әсерлер жөнінде емдеуші дәрігерге хабарлаған дұрыс. Өзіндік хал-ахуал жақсармаған жағдайда препаратты қабылдауды тоқтатып, дәрігерге қаралу керек. Егер емделушіні хирургиялық араласу күтіп тұрса, ол дәрігерге препаратты қабылдап жүргені жөнінде ертерек ескертуге тиіс. Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Анықталмаған

Артық дозаланғанда

Белгілері: жүрек айну, құсу, іштің ауырулары, тершеңдік, тері жабындарының бозаруы, тахикардия. Жеңіл уланғанда - құлақтың шыңылдауы. Ауыр улануда - ұйқышылдық, құрысулар, анурия, қан кетулер, тыныс алудың үдемелі салдануы, респираторлық ацидоз. Гиперкальциемияның нышандары анорексияны, жүрек айнуын, құсуды, іш қатуды, іштің ауыруларын, бұлшықет әлсіздігін, сананың нашарлауын, полиурияны, нефрокальцинозды, кальциурияны және күрделі жағдайларда жүрек аритмиясы мен команы қамтиды.

Уланудан күдіктенгенде дереу дәрігерлік көмекке жүгіну қажет.

Емі: жылдам асқазанды шаю, тұзды іш жібіткіштер, белсенділендірілген көмір қабылдап, әріқарай ішке N-ацетилцистеин немесе метионин тағайындау. Бұл қандағы парацетамол мөлшерінің қалыптануына және оның асқазан-ішек жолынан шығарылуына әкеледі. Аталған ем токсикологиялық бөлімде жүргізіледі. Емдеу мекемесі жағдайларында - қарқынды диурез, гемодиализ жүргізу, құрысу синдромы дамығанда – құрысуға қарсы препараттарды көктамыр ішіне енгізу.

Парацетамолмен уланған кездегі у қайтарғы - ацетилцистеин. Сарқылуды болдырмай, жасушалардың тотығу-тотықсыздану үдерістеріне қатысатын жасушаішілік глютатион синтезінің жоғарылауына ықпал етеді, осылайша, зиянды заттарды уытсыздандырады.

Шығарылу түрі және қаптамасы

10 таблеткадан поливинилхлоридті үлбірден және баспалы лакталған алюминий фольгадан жасалған пішінді ұяшықты қаптамаға салады.

2 пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салады.

Сақтау шарттары

Құрғақ, жарықтан қорғалған жерде, 25°С-ден аспайтын температурада сақтау керек.

Балалрдың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды

Босатылу шарттары

Рецепт арқылы

Өндіруші

«Kwality Pharmaceuticals (PVT) Ltd.» (Үндістан), «Деново Импекс» ЖШС қаптаған, Қазақстан Республикасы

Тіркеу куәлігінің иесі және қаптаушы

«Деново Импекс» ЖШС, Қазақстан

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы:

Қазақстан Республикасы, Алматы қ., Өтеген батыр к-сі, 13

Тел.: (7272) 771998 E-mail: denovokz@rambler.ru