Нео-Энтеросептол®

• русский
• қазақша

• Скачать инструкцию медикамента

Саудалық атауы

Нео-Энтеросептол®

Халықаралық патенттелмеген атауы

Лоперамид

Дәрілік түрі

2 мг капсулалар

Құрамы

Бір капсуланың құрамында:

белсенді зат - лоперамид гидрохлориді 2,0 мг,

қосымша заттар: лактоза моногидраты, магний стеараты,

капсула қабығының құрамы: титанның қостотығы (Е 171), натрий лаурилсульфаты, желатин, қызыл кошениль А (Е 124), бриллиантты көк (Е 133).

Сипаттамасы

Ақ түсті мөлдір емес корпусы және қызыл түсті мөлдір емес қақпақшасы бар №2 қатты желатинді капсулалар.

Капсуланың ішіндегісі - ақ түсті ұнтақ.

Фармакотерапиялық тобы

Диареяға қарсы препараттар. Асқазан-ішек жолының моторикасын төмендететін препараттар. Лоперамид.

АТХ коды А 07DА03

Фармакологиялық қасиеттері

Фармакокинетикасы

Ішке қабылдағанда жылдам сіңеді. Қабылдағаннан кейін бір сағаттан соң лоперамидтің 85%-ы асқазан-ішек жолында, 5 %-ы бауырда, 0,04%-ы мида анықталады. Қан плазмасындағы ең жоғары концентрациясына 2,5 сағаттан соң жетеді. Препараттың 97%-ға жуығы қан плазма ақуыздарымен байланысады. Гемато-энцефалдық бөгет арқылы өтпейді. 40% көлемінде сіңгеннен кейін бауырда метаболизденеді және конъюгаттар түрінде өтпен шығарылады. Жартылай ыдырау кезеңі – 17-40 сағат. Лоперамид 5% көлемінде метаболиттер түрінде несеппен, 25% -ы нәжіспен шығарылады. Препараттың жартылай шығарылу кезеңі 9-14 сағатты құрайды. Бауырдың қалыпты қызметінде қан плазмасындағы және несептегі лоперамид деңгейі төмен, ал бауыр жеткіліксіздігінде оның қан плазмасындағы мөлшері артуы мүмкін.

Фармакодинамикасы

Лоперамид - Нео-Энтеросептолдың® белсенді заты, ішек қабырғасының апиынды рецепторларымен байланысады, ацетилхолин мен простагландиндердің босап шығуын тежеп, соның арқасында ішек перистальтикасын және оның ішіндегісінің жылжуын баяулатады, судың және электролиттердің сіңірілу уақытын арттырып, сөлініске қарсы әсерін тигізеді. Препарат анальді сфинктер тонусын арттырады, бұл нәжістің дұрыс ұсталып тұруына, үлкен дәретке қысылуды азайтуға ықпал етеді. Лоперамид иондардың ішекте тасымалдануын реттейтін кальмодулин ақуызын байланыстырады, морфинге ұқсас әсерінен айрылған, бұл оны басқа апиынды антагонистерден ерекшелейді.

Қолданылуы

- жедел және созылмалы диареяны симптоматикалық емдеуде

- илеостомасы бар емделушілерде үлкен дәретті реттеуде

Қолдану тәсілі және дозалары

Капсуланы ішке, шайнамай, сумен ішіп қабылдайды.

Жедел диарея

Ересектер үшін бастапқы доза 2 капсуланы (4 мг) құрайды. Мұнан әрі 1 капсуладан (2 мг) сұйық үлкен дәрет жағдайында әрбір дефекация актісінен кейін қабылдайды.

Ең жоғары тәуліктік доза 16 мг (8 капсула) аспауы тиіс.

Келесі күні нәтижесіне сәйкес дозалау реттелуі тиіс, ең жоғары тәуліктік доза бірінші күннің дозасынан аспауы тиіс.

Созылмалы диареяда

Бастапқы тәуліктік доза ересектер үшін 2 капсуланы (4 мг) құрайды. Бұл доза артынан әдетте үлкен дәрет жиілігі тәулігіне 1-2 ретті құрайтындай етіп, жекелей түзетіледі, ал оған тәулігіне 1-ден 6 капсулаға дейінгі демеуші доза кезінде қол жеткізіледі.

Үлкен дәреттің қалыпқа түскені байқалғанда немесе ол 12 сағаттан артық болмаған кезінде препарат қабылдауды тоқтатады.

Жағымсыз әсерлері

Жиі

• ауыздың құрғауы, жүрек айну, құсу, гастралгия, іштің ауыруы және іштегі жайсыздық, метеоризм, диспепсия, іштің шаншуы, іш қатту

• қатты қажу, ұйқышылдық, ұйқысыздық, бас ауыру, бас айналу, сананың көмескіленуі/естен тану, құрысулар, тремор

• аллергиялық реакциялар (тері бөртпесі)

• электролиттік бұзылулар

Сирек

• несептің іркілуі

• буллезді бөртпе, Стивенс-Джонсон синдромы, мультиформалы эритема, уытты эпидермальді некролиз

Өте сирек

• гиповолемия

• ішектің салданып бітелуі, уытты мегаколонның жедел түзілуі

• анафилактикалық шок және анафилактоидты реакциялар

Қолдануға болмайтын жағдайлар

- лоперамидке немесе препараттың басқа компоненттеріне жоғары сезімталдық

- ішек бітелуі, мегаколон және уытты мегаколонды қоса, елеулі асқынулардың болжамды пайда болу қаупіне орай, перистальтиканы бәсеңдету дұрыс болмайтын жай-күйлер

- жедел және созылмалы дизентерия және асқазан-ішек жолының басқа да жұқпалары ( оның ішінде Salmonella, Shigella және Campylobacter), антибиотиктерді қолданудан немесе жалған жарғақшалы энтероколит аясында туындаған энтероколит

- дивертикулез

- жедел ойық жаралы колит

- бауырдың ауыр жеткіліксіздігі

- жүктіліктің бірінші триместрі және лактация кезеңі

- 18 жасқа дейінгі балалар мен жасөспірімдер

Дәрілермен өзара әрекеттесуі

Лоперамидтің басқа дәрілік заттармен, осыған ұқсас фармакологиялық қасиеттері бар дәрілерді қоспағанда, фармакокинетикалық өзара әрекеттесуі туралы клиникалық деректер жоқ.

Препаратты атропинмен және басқа м-холинолитикалық дәрілермен, әсерінің өзара күшеюін болдырмау үшін бірге тағайындау ұсынылмайды.

Айрықша нұсқаулар

Диареясы бар емделушілерде сусыздану және электролиттік сарқылу болуы мүмкін. Препаратты қолдану сұйықтықпен және электролиттермен тиісінше орын басушы ем жүргізуге кедергі келтірмейді.

Жедел диареяда, егер симптомдар 48 сағаттан артық немесе созылмалы диарея жағдайында 10 күн сақталатын болса, Нео-Энтеросептолды® пайдалану тоқтатылуы тиіс, ал емделушілер дәрігермен кеңесулері тиіс.

Препаратты жеңіл және орташа ауырлықтағы бауыр жеткіліксіздігі кезінде сақтықпен қолданылады.

Егер емдеу кезінде іш қатулар мен іштің кебуі дамитын болса, препарат қабылдауды тоқтату керек.

Нео-Энтеросептол® қабылдайтын АИВ жұқтырған емделушілер іш кебудің бастапқы белгілері болғанда емдеуді тоқтатулары тиіс.

Жүктілік және лактация кезеңі

Жүкті әйелдердің қатысуымен талапқа сай және қатаң бақыланатын зерттеулер жүргізілмеген. Тератогенді немесе эмбриоуытты әсеріне көрсетілімдердің жоқтығына қарамастан, жүктілік кезінде (II және III триместр) Нео-Энтеросептолды® ана үшін күтілетін пайдасы ұрыққа төнетін ықтимал қауіптен асатын жағдайда ғана тағайындауға болады.

Дәрілік заттардың көлік құралдарын және қауіптілігі зор механизмдерді басқару қабілетіне әсер ету ерекшеліктері

Емдеу кезеңінде жағымсыз әсерлердің даму мүмкіндігін ескере отырып, көлік жүргізуден және жоғары зейін қоюды және психомоторлы реакциялар жылдамдығын қажет ететін қауіптілігі зор қызмет түрлерімен айналысудан бас тарта тұру қажет.

Артық дозалануы

Симптомдары: орталық жүйке жүйесінің бәсеңдеуі (мелшию, қозғалыс үйлесімділігінің бұзылуы, ұйқышылдық, миоз, бұлшықет гипертониясы және брадипноэ), іш қату, несеп шығарудың іркілуі, ішектің бітелуі.

Емі: симптоматикалық, асқазанды шаю, белсенділендірілген көмір қабылдау (препаратты қабылдағаннан кейін 3 сағаттан кеш емес), құстырту қажет. Артық дозалануы кезінде у қайтарғысы ретінде Налоксонды (көктамыр ішіне, 0,4 мг/мл дозада, көп рет, 2-3-минуттық аралықпен) пайдаланады.

Емделуші орталық жүйке жүйесі тарапынан болуы мүмкін кез келген бұзылуды айқындау үшін әрдайым дәрігерлік бақылауда (ең аз дегенде 48 сағат) болуы тиіс.

Шығарылу түрі және қаптамасы

6 капсуладан ПВХ және алюминий фольгадан жасалған пішінді ұяшықты қаптамаға салынған.

3 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынады.

Сақтау шарттары

Құрғақ, жарықтан қорғалған жерде, 25оС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

SPECIFAR S.A.

1, 28-th Octovrio str, 123 51 Афины, Греция

Тіркеу куәлігінің иесі

SPECIFAR S.A.

1, 28-th Octovrio str, 123 51 Афины, Греция

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«КФК Медсервис Плюс» ЖШС

Қазақстан Республикасы, Алматы қ., Маметова к-сі, 54,

тел.: +7 (727) 233 41 54