Натрия хлорид, раствор для инфузий 0,9%

• русский
• қазақша

• Скачать инструкцию медикамента

Саудалық атауы

Натрий хлориді

Халықаралық патенттелмеген атауы

Жоқ

Дәрілік түрі

Инфузияға арналған 0,9 % 200мл және 400 мл ерітінді

Құрамы

1 л препараттың құрамында

белсенді зат: натрий хлориді - 9,0 г,

қосымша заттар: 1 М хлорлы сутек қышқылының ерітіндісі 5,0-7,0 рН дейін, инъекцияға арналған су.

Сипаттамасы

Түссіз, мөлдір сұйықтық.

Фармакотерапиялық тобы

Плазма алмастырғыш және перфузиялық ерітінділер.

Су-электролитті теңгерімге әсер ететін ерітінділер. Электролиттер

АТХ коды В05ВВ01

Фармакологиялық қасиеттері

Фармакокинетикасы

Натрий иондарының концентрациясы - 142 ммоль/л (плазма) және 145 ммоль/л (интерстициальді сұйықтық), хлорид концентрациясы - 101 ммоль/л (интерстициальді сұйықтық). Бүйрекпен шығарылады.

Фармакодинамикасы

Натрий хлоридінің изотониялық ерітіндісі көп мөлшерде қолданғанда организмнің әр түрлі патологиялық жағдайларында натрий тапшылығын толықтырады, осмостық қан қысымы мен жасушааралық сұйықтықтың қалпына келуіне ықпал етеді, уытсыздандырушы әсер береді. Зат алмасу үдерістерін көтермелейді, бауырдың уыттануға қарсы қызметін жақсартады, диурезді арттырады. Ерітінді ретінде аз мөлшерде қолданғанда жоғарыда көрсетілген әсерлер байқалмайды.

Натрий хлориді қан плазмасы (0.5 %-ға жуық) мен организмнің тін сұйықтықтары құрамында болады. Ол қан плазмасы мен жасушадан тыс сұйықтықтың осмостық қысымын демеуші негізгі органикалық емес компонент болып табылады.

Қолданылуы

• эндогенді және экзогенді уыттануда

• сусыздануда

• гипохлоремиялық алколозда

• дәрілік препараттарды еріту мен сұйылтуда

• жараларды, көз конъюнктивасын, құрсақ және плевральді қуыстарды, қынапты, қуықты шаю, таңғыш материалды ылғалдау үшін

Қолдану тәсілі және дозалары

Натрий хлориді изотониялық ерітіндісін көбіне көктамырішіне тамшылатып енгізеді. Енгізу алдында препараты бар құтыны 35-37°С-ге дейін жылытады. Енгізетін ерітінді көлемі науқастың жағдайына, сондай-ақ сұйықтықты жоғалтуына, натрий иондары мен хлорға байланысты анықталады. Инфузия жылдамдығы жеке таңдалады. Көктамырға 0,9 % изотониялық натрий хлориді ерітіндісінің салыстырмалы түрде аз ғана мөлшерін құярда оны сорғалатып енгізуге болады.

Ерітіндінің үлкен көлемін енгізу қажет болғанда оны емделушілердің дене салмағы 70 кг болғанда 500-600мл/сағ дейінгі жылдамдықта тамшылатып енгізеді. Сұйықты көп жоғалтқанда, улануда тәулігіне натрий хлориді изотоникалық ерітіндісін 3000 мл дейін құюға болады. Натрий хлориді 0,9 % ерітіндісін тері астына, бұлшықет ішіне, қуыстарға, ректальді енгізуге болады. Натрий хлориді изотониялық 0,9 % ерітіндісін сондай-ақ жараны және шырышты қабықтарды шаюға қолданады.

Жағымсыз әсерлері

Изотониялық ерітіндінің үлкен мөлшерін пайдаланғанда болуы мүмкін

- бас ауыруы, бас айналу, мазасыздық, әлсіздік

- көзден жас ағу, тершеңдік, қызба

- тахикардия, артериялық гипертензия

- жүрек айну, құсу, диарея

- ацидоз

- гипергидратация

- гипокалиемия

Сыртқа және жергілікті қолданғанда осы уақытқа дейінгі жағымсыз әсерлері анықталмаған.

Қолдануға болмайтын жағдайлар

- кіші шеңберлік қанайналымында іркілістің айқын құбылыстары бар жүректің ауыр жеткіліксіздігі

- анасарка және экстрацеллюлярлық гипергидратацияның басқа да көріністері

- тромбофлебиттер

- гипернатриемия, ацидоз

- ми мен өкпе ісінуі қаупі бар айналымдық бұзылулар

- бүйректің ауыр сипатты аурулары

- жедел сол жақ қарынша жеткіліксіздігі

- глюкокортикостероидтарды үлкен дозада қатар тағайындау

- ацидоз

- гипогликемия

Дәрілермен өзара әрекеттесуі

Натрий хлориді изотониялық 0,9 % ерітіндісін басқа гидрофильді дәрілік препараттармен араластыруға болады.

Айрықша нұсқаулар

Енгізу алдында дәрігер құюға арналған препарат бөтелкесін көзбен шолып қарауға міндетті. Ерітінді мөлдір болуға тиісті, жүзінді бөлшектер немесе тұнбасы болмауы керек. Препарат заттаңбасы болып және қаптамасы саңылаусыз сақталса, бөтелкесінде сызат болмаса ғана пайдалануға жарамды деп саналады. Көзбен қарау нәтижесі және заттаңба деректері (препарат атауы, дайындаушы-кәсіпорын, серия нөмірі, жарамдылық мерзімі) ауру тарихында тіркеледі. Натрий хлориді изотониялық 0,9 % ерітіндісінің көп көлемін ұзақ енгізгенде ең дұрысы қан плазмасындағы электролиттер құрамына бақылау жасау керек. Бүйрек жеткіліксіздігі бар науқастарға ерітіндінің үлкен көлемін сақтықпен тағайындаған жөн.

Балаларда

Емшек жасындағы баланы емдеуде тек су теңгерімін түзету үшін ғана қолданады.

Жүктілік және лактация кезеңі

Жүктілік және лактация кезеңінде қолданылады

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Әсер етпейді.

Артық дозалануы

Инфузия ережелерін бұзғанда ғана байқалады.

Симптомдары: хлоридты ацидоз, гипергидратацияға, калийдің организмнен шығарылуының артуына әкелуі мүмкін.

Емі: көрсетілген жағдайлардың симптомдары пайда болғанда, препаратты енгізуді тоқтату керек.

Сақтау шарттары

25 °С-ден аспайтын температурада сақтау керек.

Тығыз жабылуы сақталған жағдайда препаратты мұздатып қатыру оны қолдануға қарсы көрсетілім болып табылмайды.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Шығарылу түрі және қаптамасы

Резеңке тығынмен тығындалып, алюминий қақпақшамен қаусырылған қанға арналған, шыны бөтелкелерге 200 мл, 400 мл құйылады.

Стационар үшін 200 мл 40 бөтелке және 400 мл 24 бөтелке медицинада қолданылуы жөніндегі мемлекеттік және орыс тілдеріндегі 10 - 15 нұсқаулықпен бірге гофрланған картоннан жасалған аралықтары немесе торлары бар картон жәшіктерге салынады.

Бөтелкеге, топтық ыдысқа заттаңбалық қағаздан жасалған заттаңба немесе өзі желімделетін заттаңба жапсырылады.

Өндіруші

«Несвижск медициналық препараттар зауыты» ААҚ

Беларусь Республикасы, 222603,

Альба кенті, Заводская к-сі, 1

Тел./ факс +375(1770) 62001/62073

Тіркеу куәлігі иесінің атауы мен елі

«Несвижск медициналық препараттар зауыты» ААҚ, Беларусь Республикасы

Қаптаушы ұйымның атауы мен елі

«Несвижск медициналық препараттар зауыты» ААҚ, Беларусь Республикасы

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы:

«ЦентрАзияФарм» ЖШС

050030, Қазақстан Республикасы, Алматы қ.,

Красногвардейский тас жолы, 258 В

Тел 727 385 03 99, 727 385 04 00

e-mail: offis@capharm.kz

 

 

 

 

 

 

5