Морфина гидрохлорид (1%, 1 мл)

• русский
• қазақша

• Скачать инструкцию медикамента

Саудалық атауы

Морфин гидрохлориді

Халықаралық патенттелмеген атауы

Жоқ

Дәрілік түрі

Инъекцияға арналған 1% ерітінді

Құрамы

1 мл ерітіндінің құрамында

белсенді зат - 100% затқа шаққанда 8,6 мг морфин гидрохлориді,

қосымша заттар: 0,1 М хлорсутек қышқылының ерітіндісі, инъек­­цияға арналған су.

Сипаттамасы

Мөлдір, түссіз немесе сәл сарғыш немесе қоңырқай реңді сұйықтық.

Фармакотерапиялық тобы

Анальгетиктер. Апиындар. Табиғи апиын алкалоидтары. Морфин.

АТХ коды N02A A01

Фармакологиялық қасиеттері

Фармакокинетикасы

Тері астына және бұлшықет ішіне енгізген кезде жүйелік қан ағысына тез сіңеді. Дозаның үлкен бөлігі метаболизденіп, глюкуронидтер мен сульфаттар түзеді. Гистогематикалық, соның ішінде гематоэнцефалдық, плацентарлы бөгеттер арқылы өтеді (ұрықта тыныс алу орталығын басуы мүмкін), ана сүтіне түседі. Жартылай шығарылу кезеңі 2-3 сағатты құрайды. 90%-ы метаболиттер түрінде көбіне бүйректер арқылы, қалған бөлігі өтпен бірге шығарылады, аздаған мөлшері барлық сыртқы секреция бездерімен бөлініп шығады. Бауыр және бүйрек қызметтері бұзылған кезде, сондай-ақ егде жастағы емделушілерде жартылай шығарылу кезеңі артуы мүмкін.

Фармакодинамикасы

Апиынды анальгетик. Айқын анальгетикалық әсер береді. Әсер ету механизмі орталық жүйке жүйесінің апиындық рецепторларының әр түр тармақтарының (дельта-, мю- и каппа-) стимуляциясымен жүзеге асады. Дельта-рецепторлардың қозуы анальгезияны; мю-рецепторлар- супраспинальді анальгезияны, эйфорияны, физикалық тәуелділікті, тыныстың тарылуын, кезеген жүйке орталығының қозуын; каппа-рецепторлар - жұлын анальгезиясын, тыныштандырғыш әсерді, миозды жүзеге асырады.

Афференттік жолдың орталық бөлігінде ауыру импульстарының нейронаралық берілуін басады, ауырудың эмоционалдық білінісін төмендетеді, тәуелділіктің (физикалық және психикалық) пайда болуына мүмкіндік беретін эйфорияны тудырады. Ауыру орталықтарының қозғыштығын төмендете отырып, шокқа қарсы әсер етеді. Жоғары дозаларда тыныштандырғыш белсенділік танытады, ұйықтататын әсер береді. Шартты рефлекстерді тежейді, орталық жүйке жүйесінің жинақталыс қабілетін төмендетеді, депримирлеуші дәрілердің әсерін потенциялайды. Термореттеу орталығының қозғыштығын азайтады, вазопрессиннің бөлініп шығуын стимуляциялайды. Қантамыр тонусына ықпалын тигізбейді. Тыныс алу орталығын басады, жөтелу орталығының қозғыштығын төмендетеді, кезеген жүйке орталығын қоздырып, брадикардияның пайда болуын туындатады, көзді қимылдататын жүйке нейрондарын стимуляциялайды, қарашықты тарылтады (миоз). Сопақша мидың триггерлі аймағының хеморецепторларын стимуляциялауы және жүректің айнуы мен құсуды индукциялауы мүмкін. Құсу орталығын басады, сондықтан морфин гидрохлоридінің дозасын қайталап қолдану және морфин гидрохлоридінен кейін енгізілетін құстыратын дәрілер құсуды болдырмайды. Ішкі ағзалардың тегіс бұлшықеттерінің: Одди сфинктерінің, қуықтың, асқазанның антральді бөлігінің, ішектің, өт шығару жолдарының, бронхтардың тонусын арттырады. Ішектің жиырылуын әлсіретеді, ас жентегінің қозғалуын баяулатады, іш қатудың пайда болуына мүмкіндік береді.

Анальгетикалық әсері тері астына және бұлшықет ішіне енгізгеннен кейін 5-15 минуттан соң пайда болады; 4-5 сағатқа созылады.

Қолданылуы

• қарқындылығы күшті ауыру синдромында, соның ішінде қатерлі жаңа түзілімдерде, миокард инфарктісінде, ауыр жарақаттарда

• операцияға дайындағанда

• операциядан кейінгі кезеңде.

Қолдану тәсілі және дозалары

Дозалау тәртібі әр адамға жекелей. Әдеттегідей, ересектерге тері астына және бұлшықет ішіне 1 мл-ден (10 мг морфин гидрохлориді), көктамыр ішіне баяу – 0,5-1 мл-ден (5-10 мг морфин гидрохлориді).

Дозаны егде жастағы емделушілерде және психикалық жағдайы бұзылған емделушілерде; бауыр және бүйрек қызметінің жеткіліксіздігі бар науқастарда төмендету керек. Морфин онкологиялық ауруларда таңдап алынатын апиын болып табылады. Тиісті дозаны ауырудың күштілігіне байланысты әрбір 12-24 сағат сайын тағайындайды.

Тері астына енгізген кезде ересектер үшін ең жоғары доза: бір реттік – 2 мл (20 мг морфин гидрохлориді), тәуліктік – 5 мл (50 мг морфин гидрохлориді).

2 жастан асқан балаларға тері астына енгізу олардың жастарына байланысты мынандай: екі жастағы балалар үшін бір реттік доза 0,1 мл (1 мг морфин гидрохлориді), тәуліктік – 0,2 мл (2 мг морфин гидрохлориді); 3-4 жас: бір реттік доза - 0,15 мл (1,5 мг), тәуліктік – 0,3 мл (3 мг); 5-6 жас: бір реттік доза – 0,25 мл (2,5 мг), тәуліктік – 0,75 мл (7,5 мг); 7-9 жас: бір реттік доза – 0,3 мл (3 мг), тәуліктік – 1 мл (10 мг); 10-14 жас: бір реттік доза 0,3-0,5 мл (3-5 мг), тәуліктік – 1-1,5 мл (10-15 мг).

Жағымсыз әсерлері

Жоғары дозаларда қолданғанда эйфория және бұлшықеттің сіресуі пайда болуы мүмкін.

• ұзақ уақыт қолданғанда – брадикардия немесе тахикардия, жүрек ырғағының бұзылуы, ортостатикалық гипотензия

• тыныстың тарылуы

• седативтік немесе қоздырғыш әсер (әсіресе егде емделушілерде)

• делирий

• елестеулер

• бассүйекішілік қысымның жоғарылап, ми қан айналымының бұзылуына ұласуы

• гипотермия

• бас ауыру

• көңіл-күйдің өзгеруі

• қарашықтың тарылуы

• жүректің айнуы, құсу

• іш қатулар

• ауыз ішінің құрғауы

• өт жолдарының тарылып, кейін өт энзимдері деңгейінің артуына ұласуы

• несеп ағынының бұзылуы немесе қуықасты безінің аденомасында және уретра стенозында осы жағдайдың үдеуі

• аллергиялық реакциялар (ауыр жағдайларда – анафилактикалық шокқа және Квинке ісінуіне дейін)

Қолдануға болмайтын жағдайлар

• тыныс орталығының тежелуі салдарынан тыныс алудың бұзылуы

• бронхтың тарылуына бейімділік

• бауыр қызметінің ауыр жеткіліксіздігі

• бассүйек-ми жарақаты

• бассүйекішілік гипертензия

• инсульт

• кахексия

• эпилепсия жағдайы

• жалпы қатты жүдеу

• этиологиясы анық емес іш ауыруы

• алкогольден жедел ағымды улану

• делирий

• 2 жасқа дейінгі балаларға

• моноаминоксидаза тежегіштерімен бір мезгілде емдеу

• қызба

• морфин гидрохлоридіне жекелей жоғары сезімталдық

• жүктілік

• емшек емізу кезеңі

Дәрілермен өзара әрекеттесуі

Мыналармен бір мезгілде қолданғанда: орталық жүйке жүйесіне депрессиялық әсер ететін басқа да препараттармен бірге – орталық жүйке жүйесінің тежелуі күшеюі мүмкін; бета-адренобөгегіштермен бірге – морфин гидрохлоридінің орталық жүйке жүйесін басатын әсерінің күшеюі; бутадионмен бірге – морфин гидрохлоридінің жинақталып қалуы мүмкін; допаминмен бірге – морфин гидрохлоридінің ауыруды басатын әсерінің азаюы; циметидинмен бірге – тыныс алудың морфин гидрохлоридімен тежелуінің күшеюі; фенотиазин туындыларымен және барбитураттармен бірге – гипотензивтік әсердің күшеюі және тыныс алудың морфин гидрохлоридімен тежелуінің күшеюі. Барбитураттарды (әсіресе фенобарбиталды) немесе есірткілік анальгетиктерді ұзақ уақыт қолдану айқаспалы төзімділікті дамытады. Хлорпромазин морфиннің анальгетикалық, сондай-ақ миотикалық және тыныштандырғыш әсерін күшейтеді.

Налоксон есірткілік анальгетиктерден болған анальгезияны және тыныстың тарылуын жояды. Налорфин есірткілік анальгетиктерден болған тыныс депрессиясын жойып, олардың ауыруды бастын әсерін сақтайды.

Айрықша нұсқаулар

Босану кезінде ауыруды басу үшін қолданбайды, өйткені морфин гидрохлориді плацентарлы бөгет арқылы өтеді және жаңа туған нәрестелерде тыныстың тарылуын туындатуы мүмкін.

Бауыр және бүйрек қызметтері бұзылғанда, гипотиреозда, бүйрекүсті безі қыртысының жеткіліксіздігінде, простата гипертрофиясында, шокта, миастенияда, асқазан-ішек жолының қабыну ауруларында, сондай-ақ 60 жастан асқан емделушілерге сақтықпен қолданады.

Морфин гидрохлориді айқын эйфорияны тудырады. Морфин гидрохлоридін қайталап қолданғанда психикалық және физикалық тәуелділік тез пайда болады (емдеуді бастағаннан кейін 2 - 14 күннен соң). Тоқтату синдромы ұзақ емдеу курсын тоқтатқаннан кейін бірнеше сағаттан соң пайда болуы және ең жоғары шегіне 36-72 сағаттан соң жетуі мүмкін.

Емделу кезеңінде алкоголь қабылдауға болмайды.

Артық дозалану жағдайында тыныс алу қызметінің жеткіліксіздігі респираторлық демеуді және апиын антагонисі – налоксонды енгізуді қажет етеді, бірақ оны есірткіге тәуелді адамдарға қолдану тоқтату синдромының пайда болуына әкеп соқтыруы мүмкін. Демеуші терапия сондай-ақ науқасты шок жағдайынан налоксонды енгізу арқылы шығаруға бағытталған. Енгізілген препараттың мөлшері тыныс алу қызметінің жеткіліксіздігі дәрежесіне және коматозды жағдайдың дәрежесіне байланысты.

Препараттың жоғары дозаларын, әсіресе егде жастағы науқастарда пайдалану, циркуляторлы жеткіліксіздіктің және коматозды жағдайдың пайда болуымен тыныс алу депрессиясына және гипотензияға әкеп соғуы мүмкін. Жағымсыз реакциялардың пайда болуы апиындық рецепторларға жекелей сезімталдыққа байланысты. 2 жастан асқан балаларда құрысулар болуы мүмкін, үлкен дозаларды қолданған кезде бүйрек қызметінің жеткіліксіздігі үдеуі мүмкін. Конвульсиялар балаларда жиі байқалады. Морфин гидрохлоридінің уыттылығы морфинге жекелей сезімталдығына және енгізілген препараттың мөлшеріне байланысты.

Коматозды жағдай қарашықтың тарылуымен, тыныс алу депрессиясымен білінеді, ол артық дозалануды болғанын айғақтауы мүмкін. Қарашықтың кеңеюі гипоксияның пайда болғанын дәлелдейді. Артық дозаланғаннан кейінгі өкпенің ісінуі өліммен аяқталудың жалпы себебі болып табылады. Респираторлы депрессия препаратты жұлын ішіне енгізген кезде жиі білінуі мүмкін.

Жүктілік және лактация кезеңі

Препаратты жүктілік және емшек емізу кезеңінде қолдануға болмайды.

Педиатрияда қолданылуы

Препаратты 2 жасқа дейінгі балаларға қолдануға болмайды.

Дәрілік заттың көлік құралын немесе қауіпті механизмдерді басқару қабілетіне ықпал ету ерекшеліктері

Морфин гидрохлоридімен емдеу кезеңінде автокөлікті басқаруға және психомоторлы реакциялардың шапшаңдығын қажет ететін қауіпті қызмет түрлерімен айналысуға болмайды.

Артық дозалануы

Симптомдары: өте ерте білінетін және қауіпті белгілер – тыныс орталығы қызметінің тежелуі.

Емі: жалпы жандандырғыш шаралар, антагонистерді және апиындық рецепторлардың агонист-антагонистерін (налоксон, налорфин) тағайындау. Морфин гидрохлоридімен уланған кезде арнайы у қайтарғысы налоксон (көктамыр ішіне дене салмағының әр кг-на шаққанда 0,01 мг-нан, қажет болған жағдайда – әрбір 20-30 минут сайын, содан кейін бұлшықет ішіне тыныс алу қалпына келгенше 2 сағаттық үзіліспен). Трансфузиялық ем, оксигенотерапия, перитонеальді диализ жүргізіледі. Науқастың есі бар болса белсенділендірілген көмірді ішкізуге болады. Аналептиктерді қолдануға болмайды.

Шығарылу түрі және қаптамасы

Шыны ампулаларда 1 мл-ден.

Поливинилхлоридті үлбірден және алюминий фольгадан жасалған пішінді ұяшықты қаптамада 5 ампуладан. Пішінді ұяшықты 20 қаптама медицинада қолданылуы жөнінде мемлекеттік және орыс тілдеріндегі нұсқаулықпен және кесетін керамикалық дискімен немесе ампулалық керамикалық пышақпен бірге картон қорапқа салынған.

Сақтау шарттары

Жарықтан қорғалған жерде 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Қаптамасында көрсетілген жарамдылық мерзімі өткеннен кейін қолдануға болмайды.

Дәріханадан босатылу шарттары

Рецепт арқылы

Өндіруші

«Харьков фармацевтикалық кәсіпорны «Здоровье народу» ЖШҚ.

Украина, 61013, Харьков қ-сы, Шевченко к-сі, 22.

Тіркеу куәлігінің иесі

«Харьков фармацевтикалық кәсіпорны «Здоровье народу» ЖШҚ.

Украина, 61013, Харьков қ-сы, Шевченко к-сі, 22.

Тұтынушылардан өнім (тауар) сапасы жөніндегі шағымдарды Қазақстан Республикасы аумағында қабылдайтын ұйымның мекенжайы

Мекенжайы: «Харьков фармацевтикалық кәсіпорны «Здоровье народу» ЖШҚ

Украина, 61013, Харьков қ-сы, Шевченко к-сі, 22.

Телефон: (057) 757 43 36

Факс: (057) 757 43 36

Электронды поштасы: office@zn.kharkov.ua