Мимпара (30 мг)

• русский
• қазақша

• Скачать инструкцию медикамента

Саудалық атауы

Мимпара

Халықаралық патенттелмеген атауы

Цинакальцет

Дәрілік түрі

Үлбірлі қабықпен қапталған 30 мг, 60 мг, 90 мг таблеткалар

Құрамы

Бір таблетканың құрамында

белсенді зат – 30 мг (33.06 мг), 60 мг (66.12 мг) немесе 90 мг (99.18 мг) цинакальцет (гидрохлорид түрінде)

қосымша заттар: желатинделген крахмал, микрокристалды целлюлоза, повидон, кросповидон, кремнийдің коллоидты қостотығы, магний стеараты

үлбірлі қабық құрамы: опадрай II жасыл (лактоза моногидраты, гипромеллоза, титанның қостотығы Е171, триацетин, индигокармин алюминий лагы Е132, темірдің сары тотығы Е172), опадрай мөлдір (гипромеллоза, макрогол), карнауб балауызы.

Сипаттамасы

Сопақша пішінді, екі беті дөңес, бір жағында «AMG» деп таңбаланған және екінші жағында «30», «60» немесе «90» дозалануы көрсетілген ашық-жасыл түсті үлбірлі қабықпен қапталған таблеткалар.

Фармакотерапиялық тобы

Қалқанша маңы безі ауруларын емдеуге арналған гормондар. Антипаратиреоидты гормондар. Басқа да антипаратиреоидты препараттар. Цинакальцет

АТХ коды H05BX01

Фармакологиялық қасиеттері

Фармакокинетикасы

Сіңуі

Мимпара препаратын ішу арқылы қабылдағаннан кейін цинакальцет қан плазмасындағы ең жоғары концентрациясына шамамен 2-6 сағаттан соң жетеді. Цинакальцетті аш қарынға қабылдау кезіндегі әртүрлі зерттеулер нәтижелерін салыстыру негізінде анықталған абсолютті биожетімділігі шамамен 20-25% артты. Мимпара препаратын тамақпен бірге қабылдағанда цинакальцет биожетімділігі шамамен 50-80% артады. Қан плазмасындағы цинакальцет концентрациясының осылай жоғарылауы тамақтағы май мөлшеріне байланыссыз байқалды.

200 мг-ден жоғары дозалануында нашар ерігіштігінен болуы ықтимал қанық сіңуі байқалады.

Таралуы

Жоғары таралу көлемі білінеді (шамамен 1000 литр), бұл ауқымды таралуын көрсетеді. Цинакальцет плазма ақуыздарымен шамамен 97% байланысып, ең төмен деңгейде эритроциттерде таралады.

Сіңуден кейін, цинакальцет концентрациясының төмендеуі шамамен 6 сағат бастапқы жартылай шығарылу кезеңімен және 30-дан 40 сағатқа дейінгі түпкілікті жартылай шығарылу кезеңімен екі сатыда жүреді. Цинакальцет концентрациясы тепе-тең жағдайға тым аз жинақталумен 7 күн ішінде жетеді.

Цинакальцеттің фармакокинетикалық параметрлері уақыт өте өзгермейді.

Биологиялық трансформациясы

Цинакальцет көбінесе CYP3A4 және CYP1A2 ферменттері тобымен метаболизденеді (CYP1A2 рөлі клиникалық әдістермен расталмаған). Негізгі айналымдық метаболиттері белсенді емес.

Іn vitro зерттеулерінің деректеріне сай, цинакальцет CYP2D6 тежегіші болып табылады, дегенмен, клиникалық жағдайларда жететін концентрацияларында цинакальцет CYP ферменттерінің, соның ішінде CYP1A2, CYP2C8, CYP2C9, CYP2C19 және CYP3A4 белсенділігін бәсеңдетпейді, сондай-ақ CYP1A2, CYP2C19 және CYP3A4 индукторы болып табылмайды.

Шығарылуы

Дені сау еріктілерге радиоизотопты әдіспен таңбаланған 75 мг дозасын енгізгеннен кейін цинакальцет тез және елеулі тотығу метаболизміне ұшырап, кейіннен конъюгацияланды. Радионуклидтерінің шығарылуы, негізінен, метаболиттерінің бүйрекпен шығарылуы нәтижесінде жүрді. Енгізілген доза несептен шамамен 80%, ал нәжістен 15% табылды.

Дозаға байланыстылығы/байланыссыздығы

Цинакальцеттің «концентрация-уақыт» қисығы астындағы ауданы (AUC) мен Cmax ұлғаюы күніне бір рет 30-дан 180 мг дейін дозалау ауқымында іс жүзінде дозаға байланысты жүреді.

Фармакокинетикалық/фармакодинамикалық өзара әрекеттесулері

Цинакальцет енгізгеннен кейін тез арада паратиреоидты гормон (ПТГ) концентрациясы төмендей бастайды; бұл орайда барынша төмендеуі енгізгеннен кейін шамамен 2-6 сағаттан соң жүреді, бұл цинакальцеттің ең жоғары концентрациясына (Cmax) сәйкес келеді. Сонан соң цинакальцет концентрациясы төмендей бастайды, ал ПТГ концентрациясы доза енгізілгеннен кейін 12 сағаттан соң ұлғаяды, ал артынан ПТГ супрессиясы күніне бір рет дозалау режимінде тәуліктік аралық соңына дейін шамамен сол бір деңгейінде қалады. Мимпара препаратының клиникалық зерттеулерінде ПТГ концентрациясы дозалау аралығының соңында өлшенді.

Егде жастағылар. Цинакальцет фармакокинетикасында науқастардың жас шамасымен байланысты клиникалық мәнді айырмашылықтар білінбеген.

Бүйрек жеткіліксіздігі. Бүйрек жеткіліксіздігі жеңіл, орташа және ауыр дәрежедегі емделушілерде цинакальцеттің фармакокинетикалық бейіні гемодиализ немесе перитонеальді диализ кезінде сау еріктілердегі препараттың фармакокинетикалық бейінімен салыстырмалы.

Бауыр жеткіліксіздігі. Жеңіл дәрежедегі бауыр жеткіліксіздігі цинакальцет фармакокинетикасына байқалымды ықпалын тигізбейді. Бауыр функциясы қалыпты топпен салыстырғанда, цинакальцет AUC орташа көрсеткіштері бауыр функциясы орташа бұзылулары бар топта шамамен екі есе жоғары және ауыр дәрежелі бауыр жеткіліксіздігінде шамамен 4 есе жоғары. Бауыр жеткіліксіздігі орташа және ауыр дәрежелі емделушілерде цинакальцеттің жартылай шығарылуының орташа кезеңі, тиісінше, 33% және 70% ұзарады. Бауыр жеткіліксіздігі цинакальцеттің ақуыздармен байланысу дәрежесіне ықпал етпейді. Дозаларды таңдау тиімділік пен қауіпсіздік параметрлерінің негізінде әркімге жеке жүргізілетіндіктен, бауыр жеткіліксіздігі бар емделушілер үшін дозасын қосымша түзету қажет емес («Қолдану тәсілі және дозалары», «Айрықша нұсқаулар» бөлімдерін қараңыз).

Жынысы: Цинакальцет клиренсі әйелдерде ерлердегіден төмен болуы мүмкін. Дозаларды таңдау әркімге жеке жүргізілетіндіктен, емделушінің жынысына қарай дозаны қосымша түзету қажет емес.

Балалар. Цинакальцет фармакокинетикасы 15 мг ішу арқылы бір рет қабылдағаннан кейін диализде жүрген созылмалы бүйрек ауруы (СБА) бар 12 балада (6-17 жас) зерттелді. AUC және Сmax орташа мәндері (тиісінше, 23.5 нг*сағ./мл (7.22-ден 77.2 дейінгі диапазон) және 7.26 нг/мл (1.80-нен 17.4 дейінгі диапазон), 30 мг препаратты (33.6 нг*сағ./мл (тиісінше, 4.75-тен 66.9 дейінгі диапазон) және 5.42 нг/мл (1.41-ден 12.7 дейінгі диапазон) бір рет ішу арқылы қабылдағаннан кейін дені сау ересектерде жүргізілген бір зерттеуде байқалған шамамен 30% орташа AUC және Сmax.мәндерінің шегінде болды. Балалардағы шектеулі деректерге сүйенгенде, дене салмағы үлкен ересек жастағы балалармен салыстырғанда, дене салмағы аз жасы кіші балалардағы цинакальцеттің белгілі бір дозасының айқындылығы аса зор экспозициясы жоққа шығарылмайды. Қайталама дозаларының фармакокинетикасы балаларда зерттелмеген.

Шылым шегу. Цинакальцет клиренсі шылым шегушілерде, темекі тартпайтындарға қарағанда, жоғары. Бүкіл көрінісі бойынша, бұл CYP1A2 қатысуымен өтетін метаболизм индукциясымен шартталған. Егер емделуші ем кезінде шылым шегуді тоқтатса немесе бастаса, плазмадағы цинакальцет концентрациясы өзгеруі мүмкін және дозасын түзету қажет болуы мүмкін.

Фармакодинамикасы

Әсер ету механизмі

Қалқанша маңы безінің басты жасушаларының беткейінде болатын кальцийге сезімтал рецепторлар паратиреоидты гормон (ПТГ) секрециясының негізгі реттегіштері болып табылады. Цинакальцет осы рецептордың жасушадан тыс кальцийге сезімталдығын арттырып, ПТГ концентрациясын тікелей төмендететін кальцимиметикалық әсерге ие болады. ПТГ концентрациясының азаюы қан сарысуындағы кальций мөлшерінің төмендеуімен қатар жүреді.

ПТГ концентрациясының азаюы цинакальцет концентрациясымен өзара байланысты.

Тепе-тең жағдайға жеткеннен кейін сарысудағы кальций концентрациясы препарат қабылдаулар арасындағы бүкіл үзіліс кезінде тұрақты деңгейде қалады.

Салдарлы гиперпаратиреоз

Алты айға созылған үш клиникалық зерттеуде (салыстырмалы-жасырын, плацебо-бақыланатын) салдарлы гиперпаратиреоздың бақыланбайтын түрі бар, диализде жүрген бүйрек жеткіліксіздігінің терминалдық сатысындағы емделушілер (1136 емделуші) қамтылды. Демографиялық сипаттамалар және бастапқы деректер диализде жүрген салдарлы гиперпаратиреозы бар емделушілер қауымына тән болды. Үш клиникалық зерттеудегі интактылы паратиреоидты гормон (иПТГ) концентрациясының орташа бастапқы көрсеткіштері цинакальцет және плацебо топтарында, тиісінше, 733 және 683 пг/мл (77.8 және 72.4 пмоль/л) құрады. Зерттеуге алынар алдында 66% емделуші D витаминін, ал > 90% емделуші фосфаттарды байланыстыратын препараттарды қабылдады. Цинакальцет қабылдайтын емделушілерде, стандартты ем алған плацебо тобындағы және нәтижелері 3 зерттеуде сәйкес болған емделушілермен салыстырғанда, сарысудағы кальций мен фосфор, кальций-фосфор (Ca × P) туындысы, иПТГ концентрациясының едәуір төмендеуі білінді. Осы зерттеулердің әрқайсысында, плацебо тобындағы 4%, 7% және 6% емделушімен салыстырғанда, цинакальцет алған 41%, 46% және 35% емделуші (емделушілердің иПТГ концентрациясымен пропорциясы ≤ 250 пг/мл (≤ 26.5 пмоль/л)) бастапқы түпкілікті нүктеге жетті. Цинакальцет тобындағы шамамен 60% емделуші иПТГ концентрациясының ≥ 30% төмендеуіне жетті және осы әсері бастапқы иПТГ концентрацияларының бүкіл ауқымында бірізділікпен байқалды. Ca × P кальций мен фосфордың сарысулық деңгейлерінің орташа төмендеуі, тиісінше, 14%, 7% және 8% құрады.

иПТГ және Ca × P концентрацияларының төмендеуі 12 айлық ем барысында сақталды. Цинакальцет бастапқы иПТГ немесе Ca × P концентрацияларына, диализ режиміне (гемодиализбен салыстырғанда, перитонеальді диализ), диализ ұзақтығына және D витамині қолданылды ма әлде жоқ па, оған қарамастан иПТГ, Ca × P және кальций мен фосфор концентрациясын төмендетті.

ПТГ концентрациясының төмендеуі сүйек метаболизмі маркерлері (спецификалық сүйектік сілтілі фосфатаза, N-телопептидтер, сүйек тінінің және сүйек фиброзы жаңарулары) концентрацияларының мардымсыз төмендеуімен астасты. Каплан-Мейер әдісінің көмегімен 6 және 12 айлық клиникалық зерттеулер қорытындылары бойынша жиналған деректер пулына ретроспективті талдау жүргізілгенде сүйектердің сыну және паратиреоидэктомия көрсеткіштері, бақылау тобымен салыстырғанда, цинакальцет тобында төменірек болды.

Созылмалы бүйрек ауруынан (СБА) және салдарлы гиперпаратиреоздан зардап шегетін, диализде жүрмеген емделушілерге қатысты алдын ала жүргізілген зерттеулер цинакальцеттің ПТГ концентрацияларын бүйрек жеткіліксіздігінің терминалдық сатысындағы және салдарлы гиперпаратиреоз (БЖТС) диагнозы қойылған диализде жүрген емделушілердегіге ұқсас сипатта төмендеткенін көрсетеді. Алайда, диализ алдындағы сатыдағы бүйрек жеткіліксіздігі бар емделушілер үшін емнің тиімділігі, қауіпсіздігі, ұтымды дозалануы және нысаналы мәндері анықталмаған. Осы зерттеулер диализде жүрмеген және цинакальцет алатын СБЖ бар емделушілерде, цинакальцет алатын бүйрек жеткіліксіздігінің терминалдық сатысындағы диализдік емделушілермен салыстырғанда, гипокальциемияның көп даму қаупін көрсеткен, бұл кальцийдің бастапқы төмендеу концентрациясынан және/немесе бүйректің қалдықтық функциясынан болуы мүмкін.

EVOLVE зерттеуі (Жүрек-қантамырлық асқынулар қаупін төмендету үшін цинакальцет гидрохлоридінің қолданылуын бағалау) ГПТ және СБЖ бар 3883 диализдік емделушідегі плацебомен салыстырғанда, цинакальцет гидрохлоридін қолдану кезіндегі жалпы өлім және жүрек-қантамыр асқынулары қаупінің төмендеуі бағаланатын рандомизацияланған салыстырмалы жасырын клиникалық зерттеу түрінде болды. Зерттеу бастапқы мақсатына – жалпы өлім және миокард инфарктісін, тұрақсыз стенокардия себебінен ауруханаға жату мен шеткергі қан айналымының бұзылуын қамтитын жүрек-қантамыр асқынулары қаупінің төмендеуін көріністеуге жетпеген (ЖҚ 0,93; 95% СА: 0,85, 1,02; p = 0,112). Екіншілік талдаудағы бастапқы сипаттамалары бойынша түзетуден кейін алғаш біріккен соңғы нүктеге тән салыстырмалы қаупі 0,88 құрады (95% СА 0,79; 0,97).

Қалқанша маңы безі карциномасы және бастапқы гиперпаратиреоз (ГПТ):

Бір зерттеуде 46 емделуші (қалқанша маңы безі карциномасы диагнозы қойылған 29 және бастапқы ГПТ және ауыр гиперкальциемиясы бар 17 емделуші (паратиреоидэктомия нәтижелер бермеген немесе қарсы көрсетілімді болған) цинакальцетті 3 жасқа дейін алды (қалқанша маңы безі карциномасы бар емделушілер үшін орташа 328 күн және бастапқы ГПТ бар емделушілер үшін 347 күн). Цинакальцет тәулігіне екі рет 30 мг-ден тәулігіне төрт рет 90 мг дейінгі дозаларда қолданылды. Емнің негізгі мақсаты қан сарысуындағы кальций концентрациясын ≥ 1 мг/дл (≥ 0.25 ммоль/л) төмендету болды. Қалқанша маңы безі карциномасы бар емделушілерде кальцийдің орташа концентрациясы 14.1 мг/дл-ден 12.4 мг/дл дейін (3.5 ммоль/л-ден 3.1 ммоль/л дейін) төмендеді, сонымен қатар бастапқы ГПТ бар емделушілердегі сияқты қан сарысуындағы кальций концентрациясы 12.7 мг/дл-ден 10.4 мг/дл дейін (3.2 ммоль/л-ден 2.6 ммоль/л дейін) төмендеген. Қалқанша маңы безі карциномасы бар 29 емделушінің (62%) он сегізінде және бастапқы ГПТ бар 17 емделушінің 15-де (88%) сарысудағы кальций концентрациясының ≥ 1 мг/дл төмендеуіне жетті (≥ 25 ммоль/л).

28 аптаға созылатын плацебо бақыланатын зерттеуде қан сарысуындағы жалпы түзетілген (> 11.3 мг/дл (2.82 ммоль/л), бірақ ≤ 12.5 мг/дл (3.12 ммоль/л)) кальций концентрациясының негізінде паратиреоидэктимия өткізуге арналған критерийлерге сәйкес келетін алғашқы ГПТ бар, бірақ паратиреоидэктомиядан өте алмаған 67 емделуші қамтылған. Цинакальцеттің бастапқы дозасы күніне екі рет 30 мг құрап, қан сарысуындағы жалпы түзетілген кальций концентрациясының қалыпты ауқымын сақтап тұру үшін титрленді. Цинакальцет қабылдаған емделушілердің айтарлықтай көп саны, плацебо қабылдаған емделушілермен салыстырғанда (тиісінше, 0%-мен салыстырғанда 75.8% және 5.9%-бен салыстырғанда 84.4%), қан сарысуындағы кальцийдің жалпы орташа түзетілген ≤ 10.3 мг/дл (2.57 ммоль/л) концентрациясына және қан сарысуындағы кальций концентрациясының ≥ 1 мг/дл (0.25 ммоль/л) төмендеуіне жетті.

Қолданылуы

• Диализде жүрген бүйрек жеткіліксіздігінің терминалдық сатысындағы (БЖТС) емделушілердегі салдарлы гиперпаратиреоз (ГПТ). Мимпараны фосфаттарды байланыстыратын препараттар және/немесе D витамині қамтылатын біріктірілген ем құрамында да тағайындауға болады.

• Емделушілердегі гиперкальциемия (айқындылығын азайту мақсатында), мынадай аурулардан туындайды:

• қалқанша маңы бездерінің карциномасы;

• бастапқы гиперпаратиреоз, егер кальцийдің сарысулық концентрацияларына қарамастан (қабылданған емдеу стандартымен сәйкес), паратиреоидэктомия клиникалық тұрғыда қолданымсыз немесе қарсы көрсетілімді болса.

Қолдану тәсілі және дозалары

Салдарлы гиперпаратиреоз

Ересектер және егде жастағылар (> 65 жас)

Ересектерге ұсынылатын Мимпара препаратының бастапқы дозасы күніне бір рет 30 мг құрайды. Мимпара дозасын түзетуді ең жоғары 180 мг дозаға дейін әр 2-4 апта сайын (тәулігіне бір рет) жүргізген жөн, осы орайда диализдегі емделушілерде иПТГ концентрациясы бойынша анықталатын ПТГ 150-300 пг/мл ауқымындағы (15.9-31.8 пмол/л) нысаналы концентрациясына жетеді. ПТГ концентрацияларын анықтау Мимпара препаратын қабылдағаннан кейін 12 сағат өткен соң барып жүргізілуі тиіс. ПТГ концентрациясын бағалағанда қазіргі замандық нұсқауларды ұстанған дұрыс.

ПТГ концентрацияларын анықтауды ем басталғаннан немесе Мимпара препаратының дозасын түзеткеннен кейін 1-4 аптадан соң жүргізген жөн. Демеуші дозасын қабылдағанда ПТГ концентрациясына шамамен 1-3 айда бір рет мониторинг жасалуы тиіс. ПТГ концентрацияларын анықтау үшін иПТГ немесе биоинтактілі ПТГ (биПТГ) мөлшерін пайдалануға болады; Мимпара препаратымен ем иПТГ және биПТГ арасындағы қатынасты өзгертпейді.

Дозаны түзету кезінде қан сарысуындағы кальций концентрациясына, соның ішінде Мимпара препаратымен ем басталғаннан немесе дозасын түзеткеннен кейін 1 аптадан соң жиі мониторинг жасау қажет. ПТГ нысаналы концентрациясына жеткенде қан сарысуындағы кальций концентрациясы шамамен айына бір рет бағалануы тиіс. Егер қан сарысуындағы кальций концентрациясы қалыпты ауқымнан төмен азайып кетсе, қатарлас емнің түзетілуін қоса, тиісті шаралар қабылдау қажет («Айрықша нұсқаулар» бөлімін қараңыз).

Балалар және жасөспірімдер

Мимпара, қауіпсіздігі мен тиімділігі туралы деректер болмауына орай, балалар мен жасөспірімдерде қолданылмайды («Айрықша нұсқаулар» бөлімін қараңыз).

Қалқанша маңы бездерінің карциномасы және бастапқы гиперпаратиреоз

Ересектер және егде жастағылар (> 65 жас)

Ересектерге ұсынылатын Мимпара препаратының бастапқы дозасы 30 мг құрайды, қабылдау жиілігі: тәулігіне екі рет. Мимпара дозасын титрлеуді 2-4 апталық қадаммен, препарат дозасын келесі үлгіде арттырумен жүргізген жөн: қан сарысуындағы кальций концентрациясын қалыпты диапазонның жоғарғы шегіне дейін немесе одан төмен азайту үшін, қажеттілігіне қарай, тәулігіне екі рет 30 мг, тәулігіне екі рет 60 мг, тәулігіне екі рет 90 мг және тәулігіне үш немесе төрт рет 90 мг. Клиникалық зерттеулер барысында қолданылған ең жоғары дозасы тәулігіне төрт рет қабылдау жиілігінде 90 мг құрайды.

Қан сарысуындағы кальций концентрациясы Мимпара препаратының емі басталғаннан немесе дозасын түзетуден кейін 1 аптадан соң анықталуы тиіс. ПТГ нысаналы концентрациясына жеткенде кальцийдің сарысулық концентрациялары әр 2-3 ай сайын бағалануы тиіс. Ең жоғары дозаға дейін титрлеу кезеңі аяқтала келе, қан сарысуындағы кальций концентрациясына әлсін-әлсін мониторинг жасаған жөн; егер қан сарысуындағы кальций концентрациясының клиникалық мәнді төмендеуіне демеуші дозасында жете алмаса, Мимпара препаратымен емдеуді тоқтату мәселесін шешу керек («Фармакодинамикасы» бөлімін қараңыз).

Балалар және жасөспірімдер

Мимпара, қауіпсіздігі мен тиімділігі туралы деректердің болмауына орай, балалар мен жасөспірімдерде қолдануға көрсетілмеген («Фармакокинетикасы» бөлімін қараңыз).

Бауыр жеткіліксіздігі

Бауыр жеткіліксіздігі бар емделушілерде бастапқы дозаны түзету қажет емес. Мимпара препаратын бауыр жеткіліксіздігі орташа және ауыр дәрежедегі емделушілерде абайлап тағайындау керек. Дозаны титрлеу кезеңінде және емді жалғастырғанда емделушіні клиникалық тұрғыда мұқият қадағалау қажет («Айрықша нұсқаулар», «Фармакокинетикасы» бөлімдерін қараңыз).

Қолдану тәсілі

Ішке қабылдауға арналған. Мимпара препаратын тамақтану кезінде немесе ас ішуден соң тез арада қабылдау ұсынылады, өйткені зерттеулер барысында препаратты тамақпен қабылдағанда цинакальцет биожетімділігінің артуы көрсетілген («Фармакокинетикасы» бөлімін қараңыз). Таблеткалар, оларды шайнамай және бөлмей, бүтіндей қабылдану керек.

Жағымсыз әсерлері

Салдарлы гиперпаратиреоз, қалқанша маңы бездерінің карциномасы және

бастапқы гиперпаратиреоз

Плацебо-бақыланатын зерттеулерде және салыстырмалы зерттеулерде Мимпара препаратын алған емделушілердегі деректерге сай, ең көп таралған жағымсыз реакциялар жүрек айну және құсу болды. Емделушілердің көпшілігінде жүрек айну және құсу жеңіл және орташа ауырлық дәрежесінде болды және өтпелі сипат алды. Жағымсыз әсерлер салдарынан емді тоқтатуға, ең алдымен, жүрек айну мен құсу себеп болды.

Әріқарай себеп-салдарлы байланысын талдау нәтижелері бойынша сенімді дәлелдер негізінде плацебо-бақыланатын зерттеулерде және салыстырмалы зерттеулерде Мимпара препаратымен емдеуге байланысты болуы мүмкін деп бағаланған жағымсыз реакциялар тізбеленген: өте жиі (> 1/10); жиі (> 1/100-ден < 1/10 дейін); кейде (> 1/1000-нан < 1/100 дейін); сирек (> 1/10000-нан < 1/1000 дейін); өте сирек (< 1/10000) және жиілігі белгісіз (қолда бар деректер бойынша бағалау мүмкін емес).

Өте жиі

- жүрек айну, құсу

Жиі

- аса жоғары сезімталдық реакциялары1

- анорексия, тәбеттің төмендеуі

- құрысулар2, бас айналу, парестезиялар, бас ауыру

- гипотензия

- жоғарғы тыныс жолдарының жұқпасы, ентігу, жөтел

- диспепсия, диарея, іштің ауыруы, іштің жоғарғы бөлігінің ауыруы, іш қату

- бөртпе

- миалгия, бұлшықеттің түйілуі, арқаның ауыруы

- астения

- гипокальциемия2, гипокалиемия, тестостерон деңгейінің төмендеуі1

Жиілігі белгісіз1

- жүрек жеткіліксіздігі ағымының нашарлауы2, QT аралығының ұзаруы және гипокальциемия салдарынан болатын қарыншалық аритмиялар2.

1 «Жекелеген жағымсыз реакциялар сипаттамасы» бөлімін қараңыз

2 «Айрықша нұсқаулар» бөлімін қараңыз

Жекелеген жағымсыз реакциялар сипаттамасы

Аса жоғары сезімталдық реакциялары

Күнделікті тәжірибеде Мимпара препаратын қолданғанда ангионевротикалық ісіну мен есекжемді қамтитын аса жоғары сезімталдық реакциялары анықталған. Ангионевротикалық ісіну мен есекжемді қоса, жекелеген реакциялардың даму жиілігі қолда бар деректер негізінде бағаланбайды.

Гипотензия және/немесе жүрек жеткіліксіздігі ағымының нашарлауы

Қауіпсіздік жөніндегі постмаркетингтік бақылаулар барысында цинакальцет қабылдайтын жүрек жеткіліксіздігі бар емделушілерде гипотензияның жекелеген идиосинкразиялық жағдайлары және/немесе жүрек жеткіліксіздігі ағымының нашарлауы тіркелген: осы жағдайлардың даму жиілігін қолда бар деректер негізінде бағалау мүмкін емес.

QT аралығының ұзаруы және гипокальциемия салдарынан болатын қарыншалық аритмиялар

Күнделікті тәжірибеде Мимпара препаратын қолданғанда QT аралығының ұзаруы және гипокальциемия салдарынан туындаған қарыншалық аритмиялар жағдайлары анықталған. Алайда ондай бұзылулардың даму жиілігі қолда бар деректер негізінде бағаланбайды («Айрықша нұсқаулар» бөлімін қараңыз).

Балалар

Мимпара препаратын педиатриялық тәжірибеде қолдану қарсы көрсетілімді. Балаларда Мимпара препаратының тиімділігі мен қауіпсіздігі зерттелмеген. Педиатриялық емделушілердегі клиникалық зерттеуде ауыр гипокальциемиясы бар емделушінің өлім жағдайы тіркелген («Айрықша нұсқаулар» бөлімін қараңыз).

Қолдануға болмайтын жағдайлар

• препараттың белсенді компонентіне немесе «Құрамы» бөлімінде аталған кез келген басқа компоненттеріне жоғары сезімталдық.

• 18 жасқа дейінгі балалар

Дәрілермен өзара әрекеттесуі

Басқа дәрілік препараттардың цинакальцетке ықпалы

Цинакальцет CYP3A4 изоферментімен ішінара метаболизденеді. 200 мг кетоконазолды (CYP3A4 тежегіші) күніне екі рет бір мезгілде қабылдау цинакальцет концентрациясының шамамен 2 есе жоғарылауына әкелді. CYP3A4 тежегіштерін (мысалы, кетоконазол, итраконазол, телитромицин, вориконазол, ритонавир) немесе индукторларын (мысалы, рифампицин) бір мезгілде қабылдау қажет болса, Мимпара дозасын түзету немесе препаратты тоқтату қажет болады («Айрықша нұсқаулар» бөлімін қараңыз).

Іn vitro тәжірибелері өткізу кезінде алынған деректер цинакальцеттің CYP1A2 изоферментімен іщінара метаболизденетінін көрсетеді. Шылым шегу CYP1A2 белсенділігін көтермелейді. Цинакальцет клиренсінің шылым шегушілерде темекі тартпайтындарға қарағанда, 36-38% жоғары болған. CYP1A2 тежегіштерінің (флувоксамин, ципрофлоксацин) цинакальцеттің плазмалық концентрацияларына ықпал етуі зерттелмеген. Егер емделуші ем кезінде шылым шегуді бастаса немесе тоқтатса әлде CYP1A2 тежегіштерін бір мезгілде қабылдауды бастаса немесе тоқтатса, дозаны түзету қажет болуы мүмкін.

Кальций карбонаты. Кальций карбонатын (бір реттік 1500 мг дозасы) бір мезгілде қолдану цинакальцет фармакокинетикасын өзгертпеген.

Севеламер. Севеламерді бір мезгілде қолдану (күніне үш рет 2400 мг) цинакальцет фармакокинетикасына ықпалын тигізбеген.

Пантопразол. Пантопразолды (күніне бір рет 80 мг) бір мезгілде қолдану цинакальцет фармакокинетикасын өзгертпеген.

Цинакальцеттің басқа дәрілік препараттарға ықпалы

P450 2D6 изоферментімен (CYP2D6) метаболизденетін дәрілік препараттар: Цинакальцет CYP2D6 тежегіші болып табылады. Цинакальцет пен көбінесе CYP2D6 изоферментімен метаболизденетін емдік ауқымы тар препараттарды (мысалы, флекаинид, пропафенон, метопролол, дезипрамин, нортриптилин, кломипрамин) біріктіріп қолдану осы дәрілік препараттардың дозаларын талапқа сай түзетуді талап етуі мүмкін («Айрықша нұсқаулар» бөлімін қараңыз).

Дезипрамин. 90 мг цинакальцет дозасын күніне бір рет көбінесе CYP2D6 арқылы метаболизденетін үш циклды антидепрессант - 50 мг дезипраминмен бір мезгілде қабылдау CYP2D6 метаболизмі белсенді емделушілерде дезипрамин экспозициясы деңгейін едәуір (3.6 есе) арттырды (90 % сенім аралығы 3.0, 4.4).

Варфарин. Цинакальцетті бірнеше рет ішу арқылы қабылдау варфарин фармакокинетикасына немесе фармакодинамикасына ықпал етпеген (протромбин уақыты және VII фактор белсенділігі өлшенген).

Емделушілерде препаратты бірнеше рет қабылдағаннан кейін R- және S-варфарин фармакокинетикасына цинакальцет әсерінің болмауы және ферменттер аутоиндукциясының болмауы цинакальцеттің адамдағы CYP3A4, CYP1A2 немесе CYP2C9 индукторы емес екенін көрсетеді.

Мидазолам. Цинакальцет (90 мг) пен CYP3A4 және CYP3A5 субстраты - ішуге арналған мидазоламды (2 мг) бір мезгілде қолдану мидазолам фармакокинетикасына әсер етпейді. Бұл деректер цинакальцеттің, циклоспорин мен такролимусты қоса, кейбір иммунодепрессанттар сияқты CYP3A4 және CYP3A5 изоферменттерімен метаболизденетін дәрілік препараттар класының фармакокинетикасына ықпал етпейтінін көрсетеді.

Айрықша нұсқаулар

Сарысулық кальций. Қан сарысуындағы кальцийдің қалыпты диапазонның ең аз шегінен төмен концентрациясында (альбумин түзетілуімен) Мимпара препаратымен ем жүргізуге болмайды.

Балаларды қоса, Мимпара препаратын қабылдаған емделушілерде өмірге қатер төндіретін құбылыстар мен гипокальциемиямен байланысты өлім жағдайы тіркелген. Гипокальциемия көріністері парестезия, миалгия, тетания және құрысуларды қамтуы мүмкін. Сарысулық кальций концентрациясының төмендеуі QT аралығын да ұзартып, соның салдары ретінде қарыншалық аритмиялардың дамуына әкелуі мүмкін. Цинакальцет қабылдаған емделушілерде QT аралығының ұзару және гипокальциемия салдарынан қарыншалық аритмияның даму жағдайлары тіркелген («Жағымсыз әсерлері» бөлімін қараңыз). QT аралығы ұзаруының басқа да қауіп факторлары бар емделушілерді емдеуде, мысалы, QT ұзаруының туа біткен синдромы диагностикаланған емделушілерде немесе, қолда бар деректер бойынша, QT аралығын ұзартатын дәрілік препараттар қабылдаған емделушліерде сақ болу керек.

Цинакальцет қан сарысуындағы кальций концентрациясын төмендететіндіктен гипокальциемияның дамуына қатысты мұқият мониторинг өткізу қажет («Қолдану тәсілі және дозалары» бөлімін қараңыз). Сарысулық кальцийді Мимпара препаратының емі басталғаннан немесе дозасын түзеткеннен кейін 1 апта ішінде анықтау керек. Демеуші дозасы белгіленген соң қан сарысуындағы кальцийді шамамен айына бір рет анықтау керек. Сарысулық кальций 8,4 мг/дл-ден (2.1 ммоль/л) төмен азайғанда және/немесе гипокальциемия симптомдары дамығанда мынадай шаралар ұсынылған:

Мимпара препаратын қабылдаған және диализде жүрген СБА бар емделушілер арасында шамамен 30% емделушіде қан сарысуындағы кальций концентрациясы кем дегенде бір рет 7.5 мг/дл-ден төмен (1.875 ммоль/л) болды. Мимпара препараты СБА диагнозы қойылған диализдегі емес емделушілерге қолдануға болмайды. Алдын ала жүргізілген зерттеулер Мимпара препаратын қабылдайтын және диализде жүрмеген СБА диагнозы қойылған емделушілерде диализдегі, сондай-ақ Мимпара препаратын қабылдайтын СБА бар емделушілермен салыстырғанда, кальцийдің бастапқы төмендеу концентрациясынан және/немесе бүйректің қалдықтық функциясынан болуы мүмкін гипокальциемияның даму қаупінің артуын (сарысулық кальций концентрациясы < 8.4 мг/дл [2.1 ммоль/л]) көрсетті.

Құрысулар. Клиникалық зерттеулерде құрысулар Мимпара препаратын алған 1.4% емделушіде және плацебо тобындағы 0.7% емделушіде болды. Құрысу ұстамаларының пайда болуына қатысты хабарланатын айырмашылықтар себебі түсініксіз болса да, қан сарысуындағы кальций концентрациясы едәуір азайғанда құрысу шегі төмендейді.

Гипотензия және/немесе жүрек жеткіліксіздігі ағымының нашарлауы. Постмаркетингтік бақылау зерттеулері барысында цинакальцет қабылдаған жүрек жеткіліксіздігі бар емделушілерде гипотензияның жекелеген идиосинкразиялық жағдайлары және/немесе жүрек жеткіліксіздігі ағымының нашарлауы тіркелді, олардың цинакальцетпен байланысы толық жоққа шығарылмайды және қан сарысуындағы кальций концентрациясының төмендеуінен болу мүмкін. Клиникалық зерттеулер деректері гипотензияның цинакальцет алған 7% емделушіде және плацебо алған 12% емделушіде, ал жүрек жеткіліксіздігінің цинакальцет немесе плацебо алған 2% емделушіде пайда болуын көрсетті.

Жалпы сақтандыру шаралары. ПТГ концентрациясының иПТГ талдауы нәтижелері бойынша жоғарғы қалып шегінен шамамен 1.5 құрайтын концентрациясынан төмен созылмалы бәсеңдеуінде сүйектің адинамиялық ауруы дамуы мүмкін. Егер ПТГ концентрациясы Мимпара қабылдайтын емделушілерге ұсынылатын ауқымнан төмен азайса, препараттың және/немесе D витаминінің дозасын азайту немесе қабылдауды тоқтату керек.

Тестостерон концентрациясы. Тестостерон концентрациясы бүйрек жеткіліксіздігінің терминалдық сатысындағы емделушілерде қалып шегінен жиі төмен болады. БЖТС бар және диализде жүрген емделушілер қамтылған клиникалық зерттеу деректері ем басталғаннан кейін 6 айдан соң бос тестостерон концентрациясының Мимпара препаратын қабылдайтын емделушілерде орташа 31.3% және плацебо тобындағы емделушілерде 16.3% төмендеуін көрсетті. Осы зерттеудің ұзартылған ашық фазасы Мимпара препаратымен 3 жыл емделу кезеңінде емделушілердегі бос және жалпы тестостерон концентрацияларында әріқарай төмендеу болатынын көрсетпеген. Сарысулық тестостерон концентрациялары төмендеуінің клиникалық мәні анықталмаған.

Бауыр жеткіліксіздігі. Препарат бауыр жеткіліксіздігі орташа және ауыр дәрежелі (Чайлд-Пью жіктемесі бойынша) емделушілерге сақтықпен тағайындалу керек. Қан плазмасындағы цинакальцет концентрациялары 2-4 есе жоғары болуы мүмкін екендіктен, емделу кезінде мұқият мониторинг өткізу қажет («Қолдану тәсілі және дозалары», «Фармакокинетикасы» бөлімдерін қараңыз).

Лактоза. Сирек тұқым қуалайтын галактозаны көтере алмаушылығы, Lapp лактаза тапшылығы немесе глюкоза-галактоза сіңуінің бұзылуы бар емделушілер Мимпара препаратын қабылдамауы тиіс.

Фертильділік, жүктілік және лактация

Жүктілік. Жүктілік кезінде цинакальцеттің қолданылуы жөнінде клиникалық деректер жоқ. Жануарларға жасалған тәжірибелерде буаздық ағымына, туу немесе постнатальді дамуға тікелей тигізетін теріс әсері анықталмаған. Сонымен қатар егеуқұйрықтар мен үй қояндарының буаз ұрғашыларына жасалған тәжірибелер барысында, егеуқұйрықтардағы ұрық дене салмағының кемуін қоспағанда, буаз ұрғашыларда уытты дозаларын пайдаланғанда эмбриоуытты да, тератогенді де әсер етуі анықталмаған. Ана үшін әлеуетті пайдасы ұрыққа төнетін зор қатерді ақтайтын жағдайларды қоспағанда, жүктілік кезінде Мимпара препаратын қолдануға болмайды.

Бала емізу. Қазіргі уақытқа дейін цинакальцеттің емшек сүтіне шығарылу мүмкіндігі зерттелмеген. Цинакальцет қоректендіруші егеуқұйрықтардың емшек сүтіне шығарылады, бұл орайда сүттегі концентрациялардың плазмадағы концентрацияларына арақатынасы жоғары болады. Қауіп/пайда арақатынасын мұқият бағалаудан кейін емшек емізуді немесе Мимпара препаратын қабылдауды тоқтату шешімін қабылдау керек.

Фертильділік. Цинакальцеттің фертильділікке ықпал етуі туралы клиникалық деректер жоқ. Жануарларға жасалған тәжірибелерде фертильділік өзгерістері анықталмаған.

Дәрілік заттың көлік құралын және қауіптілігі зор механизмдерді басқару қабілетіне әсер ету ерекшеліктері

Препараттың көлік құралдарын басқару немесе күрделі механизмдермен жұмыс істеу қабілетіне әсер етуіне қатысты зерттеулер жүргізілмеген. Алайда кейбір жағымсыз реакциялар көлік құралдарын басқару немесе күрделі механизмдермен жұмыс істеу қабілетіне ықпал етуі мүмкін («Жағымсыз әсерлері» бөлімін қараңыз).

Артық дозалануы

Препараттың 300 мг дейінгі (күніне бір рет) дозалары диализде жүрген науқастарға қауіпсіз.

Симптомдары: Мимпара препаратымен артық дозалану гипокальциемияға әкелуі мүмкін.

Емі: препарат қабылдағаннан кейін алғашқы сағаттар ішінде асқазанды шаю, кальций концентрациясына мониторинг жасау (гипокальциемияны дер мезгілінде анықтау үшін). Симптоматикалық және демеуші ем жүргізген жөн. Цинакальцеттің ақуыздармен байланысу дәрежесі жоғары болғандықтан цинакальцет гемодиализ кезінде шығарылмайды, яғни артық дозалану кезінде гемодиализ тиімсіз.

Шығарылу түрі және қаптамасы

Аклар/ПВХ/ПВА және алюминий фольгадан жасалған пішінді ұяшықты қаптамада14 таблеткадан. Пішінді ұяшықты 2 қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон қорапшаға салынады. Әр қорапшаға ұзына бойы түсті жолағы бар алғашқы ашылуының бақылауы - екі мөлдір қорғағыш заттаңба жапсырылады.

Сақтау шарттары

30 ºС-ден аспайтын температурада сақтау керек.

Балалардың қолы жетпейтін жерде сақтау керек.

Сақтау мерзімі

4 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

Амджен Мэньюфэкчуринг Лимитед

Роуд 31, Км 24.6

Джанкос, PR 00777-4060

Пуэрто-Рико

Қаптаушы

АндерсонБрекон (Ұлыбритания) Лимитед

2-7 блок, Вэй Валей Бизнес Парк

Брекон Роуд, Хэй он Вэй

Херефорд, HR3 5PG, Ұлыбритания

Тіркеу куәлігінің иесі

Амджен Европа Б.В.

Нидерланды

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы

«ВИВА ФАРМ» ЖШС

2-ші Остроумов к-сі, 33, Алматы қ., ҚР

тел.: +7 (727) 383 74 63, факс: +7 (727) 383 74 56;

E-mail: viva@vivapharm.kz, pv@vivapharm.kz