МЕТРОНИДАЗОЛ-АКОС
Инструкция
-
русский
-
қазақша
Саудалық атауы
МЕТРОНИДАЗОЛ-АКОС
Халықаралық патенттелмеген атауы
Метронидазол
Дәрілік түрі
Инфузияға арналған ерітінді 5 мг/мл
1 мл құрамында
белсенді зат – метронидазол 5,00 мг,
қосымша заттар: натрий хлориді, лимон қышқылы моногидраты, натрий гидрофосфаты (сусыз динатрий фосфаты), инъекцияға арналған су.
Сипаттамасы
Жасылдау-сары реңді мөлдір сұйықтық
Фармакотерапиялық тобы
Жүйелі пайдалануға арналған бактерияға қарсы препараттар. Бактерияға қарсы басқа да препараттар. Имидазол туындылары. Метронидазол
АТХ коды J01XD01
Фармакологиялық қасиеттері
Фармакокинетикасы
Сіңірілуі – жоғары (биожетімділігі кемінде 80%). Сіңу қабілеті жоғары, өкпені, бүйректі, бауырды, теріні, жұлын сұйықтығын, миды, өтті, сілекейді, амниондық сұйықтық, абсцесс қуысын, қынаптық секретті, ұрық сұйықтығын, емшек сүтін қоса, организмнің көптеген тіндерінде және сұйықтығында бактерицидті концентрацияға жете отырып, гематоэнцефалдық бөгет және плацентарлық бөгет арқылы өтеді. Таралу көлемі: ересектерде – шамамен 0,55 л/кг, жаңа туған нәрестелерде – 0,54-0,81 л/кг.
Ең жоғары концентрациясы (Cmax) дозаға байланысты 6 мкг/мл-ден 40 мкг/мл-ге дейінді құрайды. Ең жоғары концентрацияға жету уақыты – 1-3 сағат. Плазма ақуыздарымен байланысуы – 10-20 %.
Көктамыр ішіне 500 мг 20 минут бойы енгізген кезде қан сарысуындағы ең жоғары концентрация 1 сағаттан кейін – 35,2 мкг/мл, 4 сағаттан кейін – 33,9 мкг/мл, 8 сағаттан кейін – 25,7 мкг/мл; кейінгі енгізу кезіндегі ең төмен концентрациясы – 18 мкг/мл. Ең жоғары концентрацияға жету уақыты – 30-60 минут, емдік концентрация 6-8 сағат бойы сақталады. Өттің түзілуі қалыпты болған кезде метронидазолдың өттегі концентрациясы көктамыр ішіне енгізгеннен кейін плазмадағы концентрациядан едәуір артып кетуі мүмкін. Организмде метронидазолдың 30-60%-ға жуығы гидроксилдену, тотығу және глюкурондану арқылы метаболизденеді. Негізгі метаболиті де (2-оксиметронидазол) протозойға және микробтарға қарсы әсер етеді.
Бауыр функциясы қалыпты болған кездегі жартылай шығарылу кезеңі – 8 сағат (6-дан 12 сағатқа дейін), бауырдың алкогольмен зақымдануында – 18 сағат (10-нан 29 сағатқа дейін), жаңа туған нәрестелерде: жүктіліктің мынадай мерзімінде босанғанда – 28-30 аптасында – шамамен 75 сағат, сәйкесінше, 32-35 аптасында – 35 сағат, 36-40 аптасында – 25 сағат. Бүйрек арқылы 60-80%-ы (20%-ы өзгермеген түрінде), ішек арқылы 6-15%-ы шығарылады. Бүйректік клиренсі – 10,2 мл/мин. Бүйрек функциясы бұзылған науқастарда қайталап енгізгеннен кейін қан сарысуында метронидазолдың жиналып қалуы байқалуы мүмкін (сондықтан бүйрек функциясының жеткіліксіздігі ауыр болатын науқастарда қабылдау жиілігін азайтқан жөн).
Метронидазол және негізгі метаболиттері гемодиализ кезінде қаннан тез шығарылады (жартылай шығарылу кезеңі 2,6 сағатқа дейін қысқарады). Перитонеальді диализде аздаған мөлшерде шығарылады.
Фармакодинамикасы
Протозойға қарсы және микробтарға қарсы препарат, 5-нитроимидазол туындысы. Әсер ету механизмі анаэробтық микроорганизмдер мен қарапайымдылардың жасушаішілік тасымалдаушы ақуыздардың 5-нитротобының биохимиялық қалпына келуі болып табылады. Қалпына келтірілген 5-нитротоп микроорганизм жасушаларының ДНҚ-мен өзара әрекеттесіп, нуклеин қышқылдарынан синтезін тежейді, бұл бактериялардың қырылуына әкеледі.
Мыналарға қарсы белсенді:
- қарапайымдылар: Trichomonas vaginalis, Entamoeba histolytica, Giardia intestinalis, Lamblia spp.;
- анаэробтық бактериялар: Bacteroides spp. (соның ішінде Bacteroides fragilis, Bacteroides distasonis, Bacteroides ovatus, Bacteroides thetaiotaomicron, Bacteroides vulgatus), Clostridium spp., Eubacter spp., Fusobacterium spp., Peptococcus spp., Peptostreptococcus spp.), Prevotella (соның ішінде Prevotella bivia, Prevotella buccae, Prevotella disiens), Veillonella spp.;
- Gardnerella vaginalis.
Осы штаммдардың ЕТБК 0,125-6,25 мкг/мл құрайды.
Метронидазол амоксициллинмен бірігіп, Helicobacter pylori-ге қатысты белсенділік танытады (амоксициллин метронидазолға резистенттіліктің дамуын басады). Метронидазолға аэробтық микроорганизмдер және факультативтік анаэробтар сезімтал емес, бірақ аралас флора (аэробтар және анаэробтар) болған кезде метронидазол әдеттегі аэробтарға қарсы тиімді антибиотиктермен бірге синергиялық тұрғыдан әсер етеді.
Ісіктердің сәулеге сезімталдығын арттырады, алкогольге сенсибилизацияны тудырады (дисульфирамға ұқсас әсер етеді), репарациялық үдерістерді стимуляциялайды.
Қолданылуы
Метронидазол ерітіндісі оған сезімтал анаэробтық микроорганизмдер әсерінен туындаған инфекциялық-қабыну ауруларында қолданылады:
- ішектен тыс амебиазда (амебалы бауыр абсцесін қоса), ішек амебиазында (амебалы дизентерия)
- сүйек инфекциясында, орталық жүйке жүйесінің инфекциясында, соның ішінде менингитте, ми абсцесінде, бактериялық эндокардитте, пневмонияда, эмпиемада және өкпе абсцесінде
- перитонитте, интраабдоминальді абсцесте, бауыр абцесінде
- эндометритте, эндомиометритте, фаллопий түтіктері мен аналық без абсцесінде, хирургиялық операциялардан кейінгі қынап күмбезінің инфекциясында, жамбас абсцесінде
- тері мен жұмсақ тіндердің инфекцияларында
- сепсисте
- операциядан кейінгі (әсіресе тоқ ішек пен тік ішекке, ректальді аумақ маңына араласымдарда, гинекологиялық және құрсақ қуысындағы ағзаларға операцияларда, аппендэктомияларда)
Қолдану тәсілі және дозалары
Метронидазолды көктамыр ішіне енгізу инфекция барысы ауыр болғанда, сондай-ақ препаратты ішке қабылдау мүмкін болмағанда қолданады.
Ересектер мен 12 жастан асқан балаларға бастапқы доза ретінде 0,5 г көктамыр ішіне тамшылатып (инфузия ұзақтығы – 30-60 минут), әрбір 8 сағат сайын минутына 5 мл жылдамдықпен. Емдеу курсы – 7 күн, бірақ қажет болғанда көктамыр ішіне енгізуді ұзағырақ мерзім бойына жалғастырады. Ең жоғары тәуліктік доза 4 г-ден аспайды. Пациенттің жағдайы жақсарғанда көрсетілімдер бойынша ішке қабылданатын демеуші дозаға ауысады.
12 жасқа дейінгі балаларға метронидазолды сол сызба бойынша бір реттік 7,5 мг/кг дозада тағайындайды.
Егер пациенттің жағдайы пероральді емдеуге келмесе, анықталған анаэробтық инфекцияларды емдеу үшін препаратты көктамыр ішіне тағайындайды:
- ересектерге – әрбір 8 сағат сайын 500 мг.
- 8 апталықтан 12 жасқа дейінгі балаларға – әдеттегі тәуліктік доза бір реттік доза түрінде 20-30 мг/кг құрайды немесе әрбір 8 сағат сайын 7,5 мг/кг-ден бөлу керек. Тәуліктік дозасы инфекциялардың ауырлығына орай, 40 мг/кг дейін арттырылуы мүмкін. Емдеу ұзақтығы әдетте 7 күн.
- 8 апталық жасқа дейінгі балаларға – күн сайын бір реттік доза түрінде 15 мг/кг немесе әрбір 12 сағат сайын қабылданатын 7,5 мг/кг-ге бөлу керек.
Гестация мерзімі 40 аптаға дейін болатын жаңа туған нәрестелерде метронидазолдың жиналуы өмірінің алғашқы аптасы ішінде жүруі мүмкін, сондықтан емдеудің бірнеше күні ішінде қан сарысуындағы метронидазол концентрациясына мониторинг жүргізген дұрыс.
Анаэробтық инфекцияларды 7-10 күн бойына емдеу көптеген пациенттер үшін қанағаттанарлықтай болуы тиіс, бірақ клиникалық және бактериологиялық берілген бағаға байланысты, мысалы, ішектен, кіші жамбас ағзаларынан және т.б анаэробтық қоздырғыштармен эндогенді қайта жұқтыру қаупін төндіретін инфекцияларды жою үшін, дәрігер емдеуді ұзарту жөнінде шешім қабылдай алады.
Көктамыр ішіне құюға арналған метронидазолды басқа препараттармен араластыру ұсынылмайды.
Метронидазол негізінен бауырда метаболизденетін болғандықтан, метронидазол клиренсі бауыр функциясы бұзылған пациенттерде азаюы мүмкін. Метронидазолдың айтарлықтай жиналуы бауыр энцефалопатиясы бар пациенттерде байқалуы мүмкін. Қан плазмасында метронидазол концентрациясының өсуі салдарынан, энцефалопатия симптомдары күшеюі мүмкін. Қажет болған кезде тәуліктік дозаны 1/3 дейін азайтуға және тәулігіне бір рет қолдануға болады.
Бүйрек функциясының созылмалы жеткіліксіздігі бар және креатинин клиренсі минутына 30 мл-ден азырақ және/немесе бауыр функциясының жеткіліксіздігі бар науқастарға ең жоғары тәуліктік доза – 1 г-ден артық емес, қабылдау реттілігі – тәулігіне 2 рет.
Жағымсыз әсерлері
Асқазан-ішек жолы тарапынан болатын бұзылыстар: эпигастриядағы ауыру, жүрек айнуы, құсу, диарея, глоссит, стоматит, ауыздағы "металл" дәмі, тәбеттің төмендеуі, анорексия, ауыз қуысы шырышты қабығының құрғауы, іш қатуы, панкреатит (қайтымды жағдайлар), тілдің түсі өзгеруі /"ақ үлпек басқан тіл" (зеңдік микрофлораның өсуіне байланысты).
Иммунды жүйе тарапынан болатын бұзылыстар: ангионевротикалық ісіну, анафилаксиялық шок.
Жүйке жүйесі тарапынан болатын бұзылыстар: шеткері сенсорлық нейропатия, бас ауыруы, құрысулар, бас айналуы, энцефалопатияның және жасөспірімдік мишық синдромының (қимыл үйлесімінің және қозғалыс синергизмінің бұзылуы, атаксия, дизартрия, жүрістің өзгеруі, нистагм, тремор) дамуы туралы хабарланды, олар метронидазолды қабылдауды тоқтатқаннан кейін қайтымды болып табылады, асептикалық менингит.
Психиканың бұзылуы: психоздық бұзылыстар, сананың шатасуын қоса, елестеулер; депрессия, ұйқысыздық, ашушаңдық, қатты қозғыштық.
Көру мүшелері тарапынан болатын бұзылыстар: диплопия, миопия сияқты өтпелі көру бұзылыстары, заттар пішінінің бұлдырлауы, көру өткірлігінің төмендеуі, түс қабылдаудың бұзылуы; көру жүйкесінің нейропатиясы/невриті.
Қан мен лимфа жүйесі тарапынан болатын бұзылыстар: агранулоцитоз, лейкопения, нейтропения, тромбоцитопения.
Бауыр мен өт шығару жолдары тарапынан болатын бұзылыстар: "бауыр" ферменттері (аспартатаминотрансфераза, аланинаминотрансфераза, сілтілік фосфатаза) белсенділігінің жоғарылауы, холестаздық немесе кейде сарғаюмен қатар жүретін аралас гепатиттің дамуы және бауырдың гепатоцеллюлярлық зақымдануы; басқа бактерияға қарсы дәрілермен біріктірілімде метронидазолмен ем қабылдап жүрген пациенттерде бауыр трансплантациясын жүргізу талап етілетін бауыр жеткіліксіздігінің даму жағдайлары байқалды.
Тері мен тері асты тіндері тарапынан болатын бұзылыстар: бөртпе қышыну, тері гиперемиясы, есекжем, пустулезді тері бөртпесі, Стивенс-Джонсон синдромы, уытты эпидермальді некролиз.
Бүйрек және өт шығару жолдары тарапынан болатын бұзылыстар: несепте метронидазолдың суда еритін метаболитінің болуымен негізделген несептің қоңырқай-қызылдау түске боялуы, дизурия, полиурия, цистит, несепті ұстай алмау, кандидоз.
Жалпы бұзылыстар және енгізу орнындағы бұзылу: қызба, мұрын бітелуі, артралгия, әлсіздік, тромбофлебит (ауыру, гиперемия немесе енгізу орнындағы ісіну).
Зертханалық және аспаппен алынған деректер: Т тісшесінің электрокардиограммада жалпаюы.
Қолдануға болмайтын жағдайлар
- метронидазолға немесе 5-нитроимидазолдың басқа да туындыларына аса жоғары сезімталдық
- лейкопения (соның ішінде сыртартқыда)
- гранулоцитопения
- дисульфираммен, алкогольмен біріктіріп қабылдау
- орталық жүйке жүйесінің органикалық зақымдануы (соның ішінде эпилепсия)
- бауыр функциясының жеткіліксіздігі (үлкен дозаларды тағайындаған жағдайда)
- жүктілік (I триместр)
- лактация кезеңі
Дәрілермен өзара әрекеттесуі
Көктамыр ішіне енгізуге арналған метронидазолды басқа дәрілік заттармен араластыруға болмайды!
Әсері тікелей емес антикоагулянттар әсерін күшейтеді, бұл протромбин түзілу уақытының артуына әкеледі. Метронидазолды қабылдау кезінде және оны тоқтатқаннан кейін 8 күн ішінде пероральді антикоагулянттың дозасын түзету ұсынылады.
Дисульфирам сияқты, этанолдың жақпаушылығын туындатады. Дисульфираммен бір мезгілде қолдану әртүрлі неврологиялық симптомдардың дамуына әкелуі мүмкін (әр тағайындалу аралығы – 2 аптадан кем болмау керек). Осы екі препараттың біріктірілуіне жол бермеу қажет.
Циметидин метронидазолдың метаболизмін тежейді, бұл оның қан сарысуындағы концентрациясының жоғарылауына және жағымсыз құбылыстардың даму қаупінің ұлғаюына әкеп соғуы мүмкін.
Бауырда микросомальді тотығу ферменттерін көтермелейтін препараттарды (фенобарбитал, фенитоин) бір мезгілде тағайындау метронидазол элиминациясын жеделдетуі мүмкін, соның нәтижесінде оның плазмадағы концентрациясы төмендейді.
Литий препараттарымен бір мезгілде қабылдауда соңғысының плазмадағы концентрациясы жоғарылауы және уыттану белгілері дамуы мүмкін.
Деполяризацияланбайтын миорелаксанттармен (векуроний бромиді) біріктіру ұсынылмайды.
Сульфаниламидтер метронидазолдың микробқа қарсы әсерін күшейтеді.
Этиологиясы аралас анаэробты-аэробты инфекцияларды емдеуде Метронидазолдың инфузияға арналған ерітіндісін және пенициллиндер, цефалоспориндер, аминогликозидтер, фторхинолондар тобының бактерияға қарсы препараттарын, сондай-ақ клиндамицин, хлорамфеникол және ванкомицинді бір уақытта тағайындауға болады.
Метронидазолды және циклоспоринді біріктіріп қабылдағанда соңғысының қандағы концентрацияларының жоғарылағаны байқалады.
Метронидазолды және амиодаронды бір мезгілде қолданғанда QT аралығының ұзаруы және torsade de pointes жөнінде мәлімделді. Амиодаронды метронидазолмен біріктіріп қолданғанда ЭКГ-де QT аралығына мониторинг жасау мақсатқа сай болуы мүмкін. Амбулаториялық түрде ем қабылдап жүрген пациенттер torsade de pointes екендігін көрсететін, бас айналу, жүрек қағуының жиілеуі немесе естен тану сияқты симптомдар пайда болғанда дәрігерге қаралу керектігіне кеңес берген жөн.
Метронидазолды бір мезгілде қолдану бусульфанның плазмалық концентрациясын едәуір арттыруы мүмкін. Олардың өзара әрекеттесу механизмі сипатталмаған. Плазмада бусульфан деңгейінің өсуімен байланысты ауыр уыттылық және өлім қаупі бар болғандықтан, оны метронидазолмен бір мезгілде қолдануға жол бермеген жөн. Метронидазол карбамазепиннің метаболизмін басуы және осының салдарынан оның плазмалық концентрациялары жоғарылауы мүмкін.
Жекелеген жағдайларда кейбір антибиотиктер ішекте стероидты конъюгаттардың бактериялық гидролизіне әсер ете отырып, пероральді контрацептивтердің тиімділігін төмендетуі мүмкін және осылайша конъюгацияланбаған стероидтардың қайта сіңуін төмендетеді, соның нәтижесінде плазмалық белсенді стероидтар төмендейді. Бұл әдеттен тыс өзара әрекеттесу стероидты конъюгаттардың өтпен бірге бөлініп шығуының деңгейі жоғары болатын әйелдерде байқалауы мүмкін. Ампициллин, амоксициллин, тетрациклин, сондай-ақ метронидазолды қоса, әртүрлі антибиотиктерді қолданумен байланысты пероральді контрацептивтердің тиімсіздік жағдайлары белгілі.
Метронидазолды такролимуспен бір мезгілде қолдану соңғысының қандағы концентрациясының өсуіне әкелуі мүмкін. Бауыр метаболизмінің такролимуспен басылуының ықтимал механизмі CYP 3А4 жәрдемімен өтті. Әсіресе такролимусты қабылдау режиміне тұрақтандырылған пациенттерде метронидазолмен емдеуді тоқтатқаннан кейін қандағы такролимус деңгейін және бүйрек функциясын жиі бақылаған және дозаны тиісінше түзеткен жөн. Метронидазол фторурацилдің клиренсін азайтады, бұл соңғысының уыттылығын арттыруы мүмкін.
Айрықша нұсқаулар
Сақтықпен: ісінудің пайда болуына бейім гемопоэзы бұзылған пациенттерге және глюкокортикостероидтарды қабылдап жүрген науқастарға; бүйрек/бауыр функцияларының жеткіліксіздігі; неврологиялық асқынулардың даму қаупімен байланысты шеткері және орталық жүйке жүйесінің белсенді созылмалы немесе ауыр аурулары бар пациенттер. Аномальді неврологиялық симптомдар препаратты пайдаланғаннан кейін бірнеше сағаттан соң, емдеу кезінде немесе оны тоқтатқаннан кейін пайда болуы мүмкін. Аномальді неврологиялық симптомдардың пайда болуы емдеуді әрі қарай жалғастыру мүмкіндігін анықтау үшін пайда/қаупі арақатынасына тезірек баға беруді қажет етеді. Орталық жүйке жүйесі тарапынан симптомдар, әдеттегідей, метронидазолды қолдануды тоқтатқаннан кейін бірнеше күннен бірнеше айға дейін қайтымды болады.
Атаксия, бас айналу және неврологиялық статустағы кез келген нашарлау пайда болғанда науқасты емдеуді тоқтату қажет болады.
Емделу кезеңінде этанол қабылдауға болмайды (дисульфирамға ұқсас реакциялар: іштің түйіліп ауыруы, жүректің айнуы, құсу, бас ауыру, бетке кенеттен қан тебу дамуы мүмкін) .
18 жасқа дейінгі балаларда және жасөспірімдерде амоксициллинмен біріктіріп қолдану ұсынылмайды.
Ұзақ уақыт емдегенде қан көрінісін бақылау қажет.
Лейкопенияда ұзақ емдеу мүмкіндігі инфекциялық үдерістің даму қаупіне байланысты болады.
Трепонеманы иммобилизациялауы және Нельсонның жалғаноң тестісіне әкеп соғуы мүмкін.
Несепті күңгірт түске бояйды.
Порфириясы бар пациенттерге метронидазолды қолдану ұсынылмайды.
Метронидазол аэробтық және факультативті анаэробтық микроорганизмдерге қарсы тиімділігі төмен.
Метронидазолды және әсері тікелей емес антикоагулянттарды бір мезгілде қабылдауға жол бермеген жөн, ал олардың біріктіріп тағайындау қажет болғанда протромбин уақытын мұқият бақылау және ұюға қарсы дәрілердің тиісті дозасын белгілеу керек.
Метронидазолды енгізген кезде асептикалық менингит жағдайлары тіркелді. Асептикалық менингит симптомдарының пайда болуы препаратты енгізгеннен кейін бірнеше сағат ішінде жүреді және оны енгізуді тоқтатқаннан кейін толық қайтады.
Метронидазолмен емдеу кезінде кандидозды инфекция симптомдары пайда болуы мүмкін.
Гемодиализде жүрген пациенттерде, метронидазол және метаболиттер диализдің сегіз сағаттық кезеңі ішінде тиімді түрде шығарылады. Метронидазолды гемодиализден кейін қайталап енгізген жөн. Метронидазолдың канцерогенділігі жөнінде мәлімделгендіктен, препарат ұзақ қолдануға ұсынылмайды.
Жүктілік
Препаратты II және III триместрлерде, егер ана үшін болжамды пайдасы шарана үшін ықтимал қаупінен басым болған жағдайда ғана, қолданған жөн.
Көлік құралын немесе қауіпті механизмдерді басқару қабілетіне дәрілік заттың ықпал ету ерекшеліктері
Препараттың жағымсыз әсерлерін ескеріп, көлікті және зейінділікті қажет ететін механизмдермен жұмыс жасағанда сақ болу қажет.
Артық дозалануы
Симптомдары: құрысулар, шеткергі нейропатия, жүректің айнуы, құсу, қимыл үйлесімінің бұзылуы
Емі: симптоматикалық. Өзіне тән антидоты жоқ. Метронидазол гемодиализ жолымен шығарылады.
Шығарылу түрі және қаптамасы
100 мл-ден резеңке тығынмен герметикалық тығындалған, алюминий қалпақшамен немесе пластмасса қақпағы бар біріктірілген алюминий қақпақшамен қаусырылған, сыйымдылығы 100 мл, қызыл сары немесе түссіз шыны құтыларда.
1 құты медициналық қолдану жөнінде мемлекеттік және орыс тілдеріндегі нұсқаулықпен бірге картон қорапшаға салынған.
Сақтау шарттары
Жарықтан қорғалған жерде, 25С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
4 жыл
Жарамдылық мерзімі өткеннен кейін қолдануға болмайды
Дәріханалардан босатылу шарттары
Рецепт арқылы
Өндіруші/Қаптаушы
«Синтез» ААҚ
640008, Ресей Федерациясы, Қорған қ., Конституция даңғылы, 7
Тел./факс (3522) 48-16-89
E-mail: real@kurgansintez.ru
Интернет-сайт: www.kurgansintez.ru
Тіркеу куәлігінің ұстаушысы
"Синтез" ААҚ, Ресей Федерациясы
Тұтынушылардан өнім сапасы жөніндегі шағымдарды Қазақстан Республикасы аумағында қабылдайтын ұйымның мекенжайы
«Deсalog» ЖШС, 050050, Қазақстан Республикасы,
Алматы қ-сы, Глазунов к-сі, 41 А-1
тел. 2944221, тел. 8 7017315218
E-mail: deсalog@nur.kz
Қазақстан Республикасы аумағында дәрілік заттың қауіпсіздігін тіркеуден кейінгі қадағалауға жауапты ұйымның мекенжайы
«Deсalog» ЖШС, 050050, Қазақстан Республикасы,
Алматы қ-сы, Глазунов к-сі, 41 А-1
тел. 2944221, тел. 8 7017315218
E-mail: deсalog@nur.kz