Метоклопрамид (раствор для внутривенного и внутримышечного введения, 5 мг/мл)

• русский
• қазақша

• Скачать инструкцию медикамента

Саудалық атауы

Метоклопрамид

Халықаралық патенттелмеген атауы

Метоклопрамид

Дәрілік түрі

Көктамыр ішіне және бұлшықет ішіне енгізуге арналған ерітінді, 5 мг/мл, 2 мл

Құрамы

Бір ампуланың ішінде

белсенді зат - 10 мг метоклопрамид гидрохлориді,

қосымша заттар: динатрий эдетаты, сусыз натрий сульфиті, натрий хлориді, натрий ацетаты, сірке қышқылы мұзды, инъекцияға арналған су.

Сипаттамасы

Мөлдір түссіз ерітінді

Фармакотерапиялық тобы

АІЖ қызметінің бұзылыстарын емдеуге арналған препараттар

АІЖ моторикасының стимуляторлары. Метоклопрамид

АТХ коды A03FA01

Фармакологиялық қасиеттері

Фармакокинетикасы

Қан плазмасы ақуыздарымен байланысуы  30 %-ға жуық. Плацентарлық және гематоэнцефалдық бөгеттер арқылы өтеді және ананың емшек сүтіне өтеді. Бауырда метаболизмге ұшырайды. Жартылай шығарылу кезеңі 4-6 сағатты, бүйрек қызметінің бұзылуында  14 сағатқа дейін құрайды. Препараттың шығарылуы көбінесе бүйрек арқылы өзгеріссіз және конъюгаттар күйінде 24-72 сағат ішінде жүзеге асырылады.

Фармакодинамикасы

Метоклопрамид  дофаминдік (D2) және серотониндік (5-НТЗ) рецепторлардың спецификалық блокаторы, ми діңінің триггерлік аймағының хеморецепторларын бәсеңдетеді, импульстерді асқазан мен он екі елі ішектің қақпасынан құсу орталығына беретін висцеральді жүйкелердің сезімталдығын әлсіретеді. Гипоталамус және парасимпатикалық жүйке жүйесі арқылы (асқазан-ішек жолының иннервациясы) асқазан-ішек жолының жоғарғы бөлігінің тонусы мен қимыл-қозғалыс белсенділігін (соның ішінде өңештің төменгі сфинктерінің тонусына) реттегіштік және үйлестіруші әсер береді. Асқазан мен ішектің тонусын арттырады, асқазанның босауын жеделдетеді, пилорийлік және эзофагеальді рефлюкске кедергі келтіреді, ішектің перистальтикасын көтермелейді. Өт бөлінісін қалыпқа түсіреді, Одди сфинктерінің түйілуін азайтады. Оның тонусын өзгерпей, өт қабының дискинезиясын басады. Ми қантамырларының тонусына, артериялық қысымға, тыныс алу, сондай-ақ бүйрек пен бауыр қызметіне, қан түзілуіне, асқазан мен ұйқы безінің сөлінісіне әсер етпейді. Пролактин сөлінісін көтермелейді.

Тіндердің ацетилхолинге сезімталдығын арттырады (әсері вагустық иннервацияға тәуелді емес, бірақ холиноблокаторлармен басылады). Альдостерон сөлінісін көтермелей отырып, натрий иондарының іркілуін және калий иондарының шығарылуын күшейтеді.

Асқазан-ішек жолына әсерінің басталуы көктамыр ішіне енгізгеннен кейін 1-3 минуттан соң, бұлшықет ішіне енгізгеннен кейін  10-15 минуттан соң білінеді және асқазан ішіндегісінің шығарылуының жеделдеуімен (енгізу жолына байланысты шамамен 0,5-6 сағат) және құсуға қарсы әсерімен көрініс береді (12 сағатқа созылады).

Қолданылуы

• құсуда, жүрек айнуында, шығу тегі әр түрлі ықылықта (кейбір жағдайларда сәулемен емдеумен немесе цитостатиктерді қабылдаудан туындаған құсу кезінде тиімді болуы мүмкін)

• асқазан мен ішектің атониясы және гипотониясында (атап айтқанда, операциядан кейінгі)

• өт шығару жолдарының дискинезиясында

• рефлюкс-эзофагитте, метеоризмде

• асқазан мен он екі елі ішектің ойық жаралы ауруының өршуінде кешенді ем құрамында

• асқазан-ішек жолына рентгенконтрастылы зерттеулерді жүргізуде перистальтиканы жеделдету үшін

Қолдану тәсілі мен дозалары

Көктамыр ішіне және бұлшықет ішіне.

Ересектерге 10-20 мг дозада тәулігіне 1-3 рет (ең жоғарғы тәуліктік дозасы – 40 мг); 6 жастан 14 жасқа дейінгі балаларға тәулігіне 1-3 рет 5 мг-ден; 2 жастан 6 жасқа дейінгі балаларға тәуліктік дозасы кг дене салмағына 0,5-1 мг құрайды, енгізу жиілігі 1-3 рет.

Цитостатиктермен немесе сәулемен емдеуден болған жүрек айнуы мен құсудың алдын алу және емдеу үшін, препаратты цитостатиктерді немесе сәулелендіруді қолданғанға дейін 30 минут бұрын көктамыр ішіне кг дене салмағына 2 мг дозада енгізеді; қажет болса енгізуді 2-3 сағаттан соң қайталайды.

Рентгенологиялық зерттеу алдында ересектерге зерттеу басталғанға дейін 5-15 минут бұрын көктамыр ішіне 10-20 мг енгізеді.

Клиникалық айқын бауыр-бүйрек жеткіліксіздігі бар науқастарға әдеттегіден екі есе аз дозасын тағайындайды, келесі дозасы науқастың метоклопрамидке жекелей реакциясына тәуелді.

Емдеу мерзімдері клиникалық симптоматикасына және науқастың жай-күйіне байланысты жекелей анықталады.

Жағымсыз әсерлері

Жиі

• ұйқышылдық, қажу, үрейлену, абыржу, депрессия, бас ауыруы, құлақтағы шуыл

• бет бұлшықетінің түйілуі, тризм, тілдің ырғақтық протрузиясы, бульбарлық сөйлеу типі, экстраокулярлық бұлшықеттердің түйілуі (соның ішінде, окулогирлік криз), спастикалық қисық мойын, опистотонус, бұлшықет гипертонусы

• паркинсонизм (гиперкинез, бұлшықет сіресуі  дофаминбөгегіштік әсерінің пайда болуы, балалар мен жасөспірімдерде даму қаупі тәулігіне 0,5 мг/кг дозадан асырған жағдайда артады)

• кешеуілдеген дискинезия, еріксіз тіл қимылдарын қоса, ұрттың томпаюы, бақылауға келмейтін шайнау қимылдары, қол мен аяқтардың бақылауға келмейтін қимылдарын қоса алғанда (егде жастағыларда, бүйректің созылмалы жеткіліксіздігінде)

• жүрек айнуы, метеоризм, іштің қатуы немесе диарея

• бронх түйілуі

• есекжем

Сирек

• тaхикардия немесе брадикардия

• ауыздың құрғауы

• ісінулер (препаратты ұзақ қолданған жағдайларда)

• гинекомастия, галакторея, етеккір оралымының бұзылулары (жоғары дозаларда ұзақ уақыт қабылдағанда)

• мұрынның шырышты қабығының гиперемиясы (жоғары дозаларда қолданғанда)

• несепті ұстай алмау немесе несеп шығарудың жиілеуі

Болуы мүмкін

• емдеудің басындағы агранулоцитоз

Қолдануға болмайтын жағдайлар

• Метоклопрамидке аса жоғары сезімталдық, натрий сульфитіне жоғары сезімталдық, әсіресе бронх демікпесі және басқа да аллергиялық аурулары бар науқастарда

• асқазан-ішек жолынан қан кетулер

• асқазан қақпасының стенозы, ішектің механикалық бітелуі, асқазанның немесе ішектің тесілуі

• феохромоцитома

• глаукома, эпилепсия, экстрапирамидалық бұзылулар, Паркинсон ауруы, соның ішінде депрессиямен және суицидтік ойлармен ОЖЖ аурулары

• пролактинге тәуелді ісіктер

• сүт безі обыры бар науқастарда және нейролептиктермен емдеу немесе артық дозалану аясындағы құсу

• қуатты бұлшықет жиырылулары жазылуға кедергі келтіретіндіктен, АІЖ-на жасалған операциялардан кейін (пилоропластика немесе ішек анастомозы сияқты)

• антихолинергиялық препараттарды бір мезгілде қолдану

• жүктілік (I триместр), лактация кезеңі

• 2 жасқа дейінгі балаларға

Дәрілермен өзара әрекеттесуі

Метоклопрамид ОЖЖ этанолдың әсерін күшейтеді, ұйықтататын дәрілердің тыныштандыратын әсерін, Н2-гистаминоблокаторлармен емдеудің тиімділігін арттырады.

Диазепамның, тетрациклиннің, ампициллиннің, парацетамолдың, ацетилсалицил қышқылының, леводопаның, этанолдың сіңуін арттырады; дигоксин мен циметидиннің сіңуін баяулатады.

Нейролептиктермен бір мезгілде қолданғанда экстрапирамидалық симптомдардың даму қаупі арта түседі.

Метоклопрамидтің әсері антихолинэстеразалық дәрілерді әлсіретуі мүмкін.

Метоклопрамид үшциклдық антидепрессанттардың, моноаминооксидаза (МАО) тежегіштерінің және симпатомиметикалық дәрілердің әсерін үдетеді.

Айрықша нұсқаулар

Шығу тегі вестибулярлық құсу кезінде тиімсіз.

Метоклопрамидті қолдану аясында бауыр қызметінің және қан плазмасындағы альдостерон және пролактин концентрацияларын анықтаудың зертханалық көрсеткіштері нәтижелерінің бұрмалануы мүмкін.

Жағымсыз әсерлерінің көпшілігі емдеуді бастағаннан 36 сағат ішінде туындайды және тоқтатқаннан кейін 24 сағат ішінде басылады. Емдеу мүмкіндігінше қысқа мерзімді болуы тиіс.

Препаратпен емдеу кезінде алкоголь қабылдау ұсынылмайды.

Жүктілік және лактация кезеңі

Препарат жүктіліктің I триместрінде қарсы көрсетілімді. Әйелдерге жүктіліктің II және III триместрінде Метоклопрамидті тек қатаң өмірлік көрсетілімдер бойынша тағайындайды.

Метоклопрамид препаратымен емдеу кезінде бала емізуді тоқтата тұру керек.

Сақтықпен

Бүйрек/бауыр жеткіліксіздігі, бронх демікпесі, артериялық гипертензия, егде жастағыларға.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препаратты қолдану кезеңінде жоғары зейін шоғырландыруды, жылдам психикалық және қимыл-қозғалыс реакциясын қажет ететін қауіптілігі зор қызмет түрлерінен (көлік құралын жүргізу) бас тарту керек.

Артық дозалануы

Симптомдары: гиперсомния, бағдарсыздық және экстрапирамидалық бұзылыстар. Әдетте, симптоматикасы препаратты қабылдауды тоқтатқаннан кейін 24 сағат ішінде жойылады.

Емі: қажет болса холиноблокаторлармен және паркинсонға қарсы дәрілермен ем жүргізіледі.

Шығарылу түрі мен қаптамасы

Көктамыр ішіне және бұлшықет ішіне енгізуге арналған 5 мг/мл ерітінді.

2 мл-ден сындыруға арналған түрлі-түсті сақинасы немесе түрлі-түсті нүктесі немесе кертігі бар түссіз шыны ампулада. Ампулаға бір, екі немесе үш түрлі-түсті сақина және/немесе екі өлшемді штрих-код, және/немесе әріптік-сандық кодын жазады, немесе қосымша түрлі-түссіз сақинасыз, екі өлшемді штрих-кодсыз, әріптік-сандық кодсыз болады.

5 ампуладан поливинилхлоридті үлбір мен алюминий фольгадан немесе полимер үлбірден жасалған немесе фольгасыз және үлбірсіз пішінді ұяшықты қаптамада.

1 немесе 2 пішінді ұяшықты қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картоннан жасалған пәшкеде.

Сақтау шарттары

Жарықтан қорғалған жерде, 25С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Қаптамасында көрсетілген жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

«ФармФирма «Сотекс» жабық акционерлік қоғамы, Ресей

141345, Мәскеу обл., Сергиево-Посадский муниципальді ауданы, Березняков елді мекені, Беликово кенті, 11-ші үй

Тел./факс: (495) 956-29-30.

Тіркеу куәлігінің иесі

«ФармФирма «Сотекс» жабық акционерлік қоғамы, Ресей

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«ФармФирма «Сотекс» жабық акционерлік қоғамы, Ресей

141345, Мәскеу обл., Сергиево-Посадский муниципальді ауданы, Березняков елді мекені, Беликово кенті, 11-ші үй

Тел./факс: (495) 956-29-30.