Метирон (5 мг) (Тиамазол)

Метирон

Тиамазол

Дәрілік түрі, дозасы

АТХ коды H03BB02

Гипертиреозды емдеу, оның ішінде:

• гипертиреозға арналған консервативті ем, әсіресе кішігірім зобта немесе ол болмағанда

• гипертиреоздың барлық түрлері кезінде хирургиялық араласымға дайындық

• радиоактивті йод препараттарымен, әсіресе гипертиреоздың ауыр түрлерімен ауыратын пациенттердегі жоспарлы емге дайындық

• радиоактивті йод препараттарымен емдеуден кейінгі аралық ем

• құрамында йод бар препараттарды қолдану қажеттілігі туындаған жағдайларда (мысалы, құрамында йод бар рентген-контрасттылы заттар пайдаланылған диагностикалық зерттеулер) анамнезінде субклиникалық гипертиреоз, автономды аденомалар немесе гипертиреоз бар пациенттердегі профилактикалық ем

Қолдануды бастағанға дейін қажетті мәліметтер тізбесі

• әсер етуші затқа немесе қосымша заттардың кез келгеніне аса жоғары сезімталдық

• қан көрсеткіштері тарапынан орташа немесе айтарлықтай айқын бұзылулар (гранулоцитопения)

• гипертиреозбен байланысты емес холестаз

• тиамазолмен немесе карбимазолмен (тиамазолдың ізашары) жүргізілетін еммен байланысты анамнездегі сүйек кемігі функциясының бәсеңдеуі

• тиамазолмен немесе карбимазолмен (тиамазолдың ізашары) жүргізілетін еммен байланысты анамнездегі жедел панкреатит

• жүктілік кезеңінде қалқанша бездің гормондарын бір мезгілде қолдану

Қолдану кезіндегі қажетті сақтандыру шаралары

Тиамазолды анамнезінде аса жоғары сезімталдық реакциялары (мысалы, аллергиялық бөртпе, қышыну) байқалған пациенттерде қолдануға болмайды.

Қалқанша бездің өлшемі едәуір дәрежеде ұлғайған және трахеяның тарылуы байқалатын пациенттерде зобтың ұлғаю қаупіне байланысты дәрілік затпен жүргізілетін емді зобтың ұлғаю қаупіне байланысты қысқа уақыт аралығында ғана жүргізген жөн, бұл ретте пациенттерді мұқият бақылауды қамтамасыз ету қажет.

Басқа дәрілік препараттармен өзара әрекеттесуі

Йод тапшылығы қалқанша бездің тиамазол әсеріне сезімталдығын арттырады, артық йод өз кезегінде қалқанша бездің дәрілік заттың әсеріне сезімталдығын төмендетеді. Тиамазолдың басқа дәрілік заттармен тікелей өзара әрекеттесуі туралы белгісіз. Дегенмен, гипертиреоз кезінде метаболизм жылдамдығы мен басқа дәрілік заттардың организмнен шығарылу жылдамдығы артуы мүмкін екенін ескеру қажет; қалқанша бездің функциясын қалыпқа келтіргенде, жоғарыда аталған параметрлердің өзгеруі түзеледі. Мұндай жағдайларда дәрілік заттардың дозаларын түзету қажет болуы мүмкін.

Пациенттерде гипертиреозды түзету кезінде антикоагулянттардың әсеріне жоғары сезімталдықтың қалыпқа келуі байқалады.

Балалар мен жасөспірімдерде тиамазолдың дәрілік өзара әрекеттесуіне зерттеулер жүргізілмеген.

Арнайы ескертулер

Васкулит

Васкулит симптомдары пайда болған жағдайда дәрілік препаратты қабылдауды тоқтату керек (қажет болған жағдайда). Әдетте, васкулит симптомдары қайтымды және емді тоқтатқаннан кейін жоғалады.

Миелоуыттылық

Тиамазолмен ем қабылдаған пациенттерде 0,3-0,6% жағдайда агранулоцитоз байқалғаны туралы хабарламалар бар, сондықтан дәрілік затты қолдануды бастамас бұрын пациенттерге жоғарыда аталған жағымсыз реакцияның (стоматит, фарингит, дене температурасының жоғарылауы) дамуына байланысты симптомдар туралы хабарлау қажет.

Әдетте, агранулоцитоз тиамазолмен емдеудің алғашқы бірнеше аптасында пайда болады, бірақ ол дәрілік затты қолдануды бастағаннан кейін бірнеше айдан соң, сондай-ақ емдеудің қайталанған курсында дамуы мүмкін. Тиамазолмен емдеу басталғанға дейін және одан кейін қан көрсеткіштерін мұқият бақылау ұсынылады, әсіресе пациентке жеңіл дәрежедегі гранулоцитопения диагнозы қойылған жағдайда.

Егер жоғарыда аталған симптомдар пайда болса, әсіресе емдеудің алғашқы бірнеше аптасында пациент кейіннен қан талдауын жүргізу үшін дереу дәрігерге қаралуы керек. Агранулоцитоз расталған кезде тиамазол қабылдауды тоқтату керек.

Тиамазолды ұсынылған дозаларда қолданған кезде миелоуытты әсерге байланысты басқа жағымсыз реакциялар сирек байқалады. Мұндай реакциялар дәрілік затты жоғары дозада (тәулігіне шамамен 120 мг) қолданған кезде жиі тіркеледі. Мұндай дозаларда дәрілік затты тек айрықша көрсетілімдер (аурудың ауыр түрі, тиреоуытты криз) бойынша қолдану керек. Егер сүйек кемігінің функциясы бәсеңдесе, тиамазолмен емдеуді тоқтатып, қажет болған жағдайда басқа фармакологиялық топтағы антитиреоидты дәрімен емдеу керек.

Жедел панкреатит

Маркетингтен кейінгі кезеңде тиамазолмен немесе карбимазолмен (тиамазолдың ізашары) жүргізілетін ем алған пациенттерде жедел панкреатиттің дамуы туралы хабарламалар бар. Жедел панкреатит пайда болған кезде тиамазолмен емдеуді дереу тоқтату керек. Дәрілік затты қолдану тиамазолмен немесе карбимазолмен (тиамазолдың ізашары) жүргізілетін еммен байланысты анамнезінде жедел панкреатит бар пациенттерде қарсы көрсетілімді болып табылады, себебі дәрілік затты қайта қолданған кезде аурудың жедел қайталануы орын алуы мүмкін (панкреатит симптомдары қысқа уақыт аралығында дамиды).

Бала туу жасындағы әйелдер, жүктілік кезеңі

Тиамазолмен ем алып жүрген бала туу жасындағы әйелдер контрацепцияның сенімді әдістерін қолдануы керек.

Әйелдерде жүктілік кезеңінде дәрілік затты қолданған кезде пайда / қауіп арақатынасын жеке тәртіппен бағалау керек. Әйелдерде жүктілік кезеңінде тиамазолды ең аз тиімді дозада қолдану керек, бұл ретте қалқанша бездің гормондарын бір уақытта қолдануға болмайды. Тиамазолмен емдеу кезінде ананың, шарананың және жаңа туған нәрестенің денсаулық жағдайын мұқият бақылау ұсынылады.

Гипертиреозды бақылау

Тиамазолды жоғары дозада қолданған кезде субклиникалық немесе клиникалық симптомдардың дамуымен қатар жүретін гипотиреоз және зобтың ұлғаюы (қандағы ТТГ концентрациясының жоғарылауына байланысты) байқалуы мүмкін. Сондықтан пациенттерде эутиреоидты метаболизмдік статусқа қол жеткізген жағдайларда дәрілік заттың дозасын төмендетіп, қажет болған жағдайда левотироксинді қосымша қолдану керек. Мұндай жағдайларда тиамазолды толығымен тоқтату және тек левотироксинді қолдануды жалғастыру ұсынылмайды.

Тиамазолды қолданған кезде зобтың ұлғаюы, ТТГ секрециясының тежелуіне қарамастан, левотироксинмен қосымша ем кезінде құбылып отыратын негізгі аурудың салдары ретінде қарастырылуы керек.

Қалыпты ТТГ деңгейіне жету эндокриндік орбитопатияның даму немесе нашарлау қаупін мейлінше азайту үшін өте маңызды болып табылады. Алайда, жоғарыда аталған асқыну көбінесе қалқанша без ауруының ағымына қарамастан пайда болады, бұл тиісті емдеу режимін өзгертуге негіз болмайды, сонымен қатар тиісті түрде жүргізілетін емге жағымсыз реакция ретінде қарастырылмауы керек.

Антитиреоидты дәрілермен емделген пациенттерде қосымша абляция жүргізуді қажет етпейтін кеш гипотиреоз сирек кездеседі. Мүмкін, бұл жағдай антитиреоидты дәрілерді қолданумен байланысты жағымсыз реакция болып табылады, бірақ негізгі аурумен байланысты қалқанша бездің паренхимасындағы қабыну және деструктивті процестерге байланысты.

Тиамазолмен жүргізілетін ем аясында гипертиреозға байланысты патологиялық жоғарылаған энергия шығыны азаяды, нәтижесінде пациенттер дене салмағының жоғарылауын сезінуі мүмкін (әдетте дұрысырақ). Пациенттерге клиникалық жағдай жақсарған сайын энергия теңгерімі қалыпқа келетіні туралы хабарлау керек.

Қосымша заттар

Метирон препаратының құрамында лактоза бар, сондықтан галактозаға төзбеушілікпен, лактаза жеткіліксіздігімен немесе глюкоза-галактоза мальабсорбциясымен сипатталатын сирек тұқым қуалайтын аурулары бар пациенттерге бұл препаратты қабылдауға болмайды.

Метирон препаратының бір таблеткасында 1 ммольден аз натрий (23 мг) бар, яғни іс жүзінде «құрамында натрий жоқ».

Жүктілік немесе лактация кезінде

Бала туу жасындағы әйелдер

Бала туу жасындағы әйелдер емдеу кезінде контрацепцияның сенімді әдістерін қолдануы керек.

Жүктілік

Жүктілік кезеңінде әйел мен шаранада ауыр асқынулардың дамуын болдырмау мақсатында гипертиреозды тиісті түрде емдеу керек.

Тиамазол адамда плацентарлы бөгет арқылы өте алады.

Тиамазолды әйелдерде жүктілік кезеңінде, әсіресе жүктіліктің I триместрінде және жоғары дозаларда қолдану туа біткен ақаулардың пайда болуымен қатар жүруі мүмкін деп болжануда.

Келесі аномалиялар туралы хабарланды: туа біткен тері аплазиясы, бассүйек-бет даму ақаулары (хоан атрезиясы, бет дисморфизмі), омфалоцеле, өңеш атрезиясы, омфаломезентериялық түтіктің аномалиясы және қарыншааралық қалқаның ақауы.

Тиамазолды жүктілік кезеңінде әйелдерде пайда/қауіп арақатынасын мұқият жеке бағалағаннан кейін және тек ең аз тиімді дозада қолдануға болады, бұл ретте қалқанша бездің гормондарын бір уақытта қолдануға болмайды. Тиамазолмен емдеу кезінде ананың, шарананың және жаңа туған нәрестенің денсаулық жағдайын мұқият бақылау ұсынылады.

Лактация

Тиамазол емшек сүтімен бөлінеді. Емшек сүтіндегі тиамазол концентрациясы әйелдің қан сарысуындағы дәрілік зат концентрациясының деңгейіне жетуі мүмкін, сондықтан еметін балада гипотиреоздың даму қаупі бар.

Әйелдерде бала емізу кезеңінде тиамазолды тек төмен дозада қолдануға болады (тәуліктік доза 10 мг-нан аспауы керек), бұл ретте қалқанша бездің гормондарын бір уақытта қолдануға болмайды.

Еметін балада қалқанша бездің функциясын үнемі бақылап отыру қажет.

Препараттың көлік құралын және қауіптілігі зор механизмдерді басқару қабілетіне әсер ету ерекшеліктері

Тиамазол көлік құралдарын және қауіптілігі зор механизмдерді басқару қабілетіне әсер етпейді.

Қолдану жөніндегі нұсқаулар

Тиамазол карбимазолдың белсенді метаболиті болып табылады, алайда 1 мг тиамазол 1 мг карбимазолға баламалы емес. Мұны тиамазолмен жүргізілетін емнің басында немесе карбимазолмен жүргізілетін емнен тиамазолмен емдеуге ауысқанда ескеру қажет. Дәрілік затты дозалау бойынша төмендегі ұсынымдарды назарға алу керек

Дозалау режимі

Ересектер

Әдетте, емдеу басында тиамазолдың тәуліктік дозасы аурудың ауырлығына және организмге келіп түсетін йод мөлшеріне байланысты 10-40 мг құрайды. Көптеген жағдайларда қалқанша без гормондарының синтезін тежеу дәрілік затты 20-30 мг бастапқы тәуліктік дозада қолданған кезде байқалуы мүмкін. Ауыр емес жағдайларда толық тежейтін дозаны қабылдау қажет емес, сондықтан анағұрлым төмен бастапқы дозалар қолданылады Ауыр жағдайларда тиамазолдың бастапқы тәуліктік дозасы 40 мг жетуі мүмкін.

Дәрілік заттың дозасы пациенттің метаболизмдік статусына байланысты қандағы қалқанша без гормондарының концентрациясын ескере отырып жеке таңдалады.

Демеуші ем кезінде келесі емдеу нұсқаларының бірін қолдану ұсынылады.

• гипотиреоздың дамуын болдырмау мақсатында левотироксинмен біріктірілімде 5-20 мг тәуліктік дозадағы тиамазол;

• 2,5-10 мг тәуліктік дозадағы тиамазолмен монотерапия.

Йодты қолданумен байланысты гипертиреоз кезінде тиамазолды анағұрлым жоғары дозада қолдану қажет болуы мүмкін.

Балалар мен жасөспірімдер

3-17 жас аралығындағы балалар мен жасөспірімдерде қолдану

3-17 жастағы балалар мен жасөспірімдерге арналған бастапқы дозаны дене массасын ескере отырып, таңдау керек. Әдетте, емдеудің басында тиамазолдың тәуліктік дозасы 2 немесе 3 дозаға бөлінген 0,5 мг/кг құрайды. Дәрілік заттың демеуші дозасын пациенттің емге деген реакциясына байланысты төмендетілуі және тәулігіне бір рет тағайындалуы мүмкін. Гипотиреоздың дамуын болдырмау мақсатында левотироксинді қосымша пайдалану қажеттілігі туындауы мүмкін.

Тиамазолдың жалпы тәуліктік дозасы 40 мг аспауы керек.

2 жастағы және одан кіші балаларда қолдану

Тиамазолды 2 жастағы және одан кіші балаларда қолдану қауіпсіздігі мен тиімділігі анықталмаған, сондықтан дәрілік затты осы жас тобындағы пациенттерде пайдалану ұсынылмайды.

Гипертиреоздың консервативті емі

Емнің мақсаты пациенттің эутиреоидты метаболизмдік статусына және дәрілік затты шектеулі пайдалану кезеңінен кейін ұзақ ремиссияға қол жеткізу болып табылады. Таңдалған ем курсына байланысты бір жылдан кейін пациенттердің ең көп дегенде 50% - ында ремиссияға қол жеткізілуі мүмкін. Ремиссия көрсеткіштері айтарлықтай өзгереді, оның нақты себептері белгісіз. Ықтимал негізгі факторлар: гипертиреоздың типі (иммуногендік немесе иммуногендік емес), емнің ұзақтығы, тиамазолдың дозасы, сондай-ақ йодтың организмге келіп түсу көзі (диета немесе дәрігердің тағайындауы бойынша йод препараттарын қабылдау).

Гипертиреоздың консервативті емінде дәрілік затты қолдану ұзақтығы, әдетте, 6 айдан 2 жылға дейінгі (орта есеппен 1 жыл) мерзімді құрайды. Ремиссияға жету ықтималдығы емнің ұзақтығына байланысты статистикалық тұрғыдан сенімді түрде артады.

Аурудың ремиссиясына қол жеткізілмегенде және белгілі бір емдік шараларды жүргізу мүмкіндігі болмағанда немесе олар орынсыз деп саналатын жағдайларда, тиамазолды гипертиреозды ұзақ мерзімді емдеу үшін ең төменгі дозада монотерапия ретінде немесе төмен дозада левотироксинмен біріктірілімде қолдануға болады.

Зобы үлкен және трахеясы тарылған пациенттерде тиамазолды пайдаланбаған жөн немесе дәрілік затпен жүргізілетін емді қысқа уақыт аралығына ғана жүргізу керек, себебі тиамазолды ұзақ уақыт бойы қолдану зобтың өсуіне байланысты болуы мүмкін. Мұндай жағдайларда пациенттерге ерекше мұқият мониторинг жүргізу қажет (қандағы тиреотропты гормонның (ТТГ) концентрациясын, трахея саңылауының өлшемін бақылау), сонымен қатар қалқанша без гормондарын бір мезгілде қолдану орынды болып табылады.

Операциялық араласымға дайындық

Тиамазолмен қысқа мерзімді ем кезінде хирургиялық араласымға дайындық кезеңінде (шамамен 3-4 апта, жекелеген жағдайларда анағұрлым ұзақ) пациенттерде эутиреоидты метаболизмдік статусқа қол жеткізуге болады, нәтижесінде операцияны жүргізумен байланысты қауіптер төмендейді.

Хирургиялық араласымды пациент эутиреоз жағдайына жеткенде жасау керек, себебі өзге жағдайда қалқанша без гормондарын қосымша пайдалануда қажеттілік туындауы мүмкін. Тиамазолмен жүргізілетін емді операциядан бір күн бұрын тоқтатуға болады.

Тиамазолды қолданған кезде қалқанша бездің тіндері анағұрлым борпылдақ болып, қалқанша бездің тінінен қан кету үрдісі байқалады, сондықтан хирургиялық араласымға дайындық кезеңінде йод препараттарын операцияға дейін соңғы он күн ішінде жоғары дозада қосымша қолдану (Пламмер йодотерапиясы) орынды болуы мүмкін.

Радиоактивті йод препараттарымен жоспарлы емге дайындық

Ауыр гипертиреоз кезінде радиоактивті йод препараттарымен емді бастамас бұрын пациенттерде эутиреоидты метаболизмдік статусқа қол жеткізу керек, себебі кейбір жағдайларда радиоактивті йод препараттарымен жүргізілген емнен кейін алдын ала дайындығы жоқ пациенттерде тиреоуытты криздің даму жағдайлары тіркелген.

Ескертпе: тиомочевина туындылары қалқанша без тінінің радиоактивті сәулеленуге сезімталдығын төмендетуі мүмкін, сондықтан автономды аденомаларды радиоактивті йод препараттарымен жоспарлы ем кезінде алдын-ала емдеу жүргізу қажет, оның мақсаты паранодулярлық тіндердің белсенділігін төмендету болып табылады.

Радиоактивті йод препараттарымен емдеуден кейінгі аралық ем

Емдеу ұзақтығы мен дәрілік заттың дозасы пациенттің клиникалық статусының ауырлығын және радиоактивті йод препараттарымен ем жүргізгеннен кейін әсер дамығанға дейінгі болжамды уақыт кезеңін ескере отырып, жеке тәртіппен белгіленеді (шамамен 4-6 ай).

Құрамында йод бар препараттарды пайдалана отырып, диагностикалық зерттеулер жүргізу кезінде гипертиреоздың даму қаупі бар пациенттерде профилактикалық ем

Әдетте, 10-20 мг тәуліктік дозада тиамазолды және/немесе 1,0 г тәуліктік дозада перхлоратты шамамен 10 күн бойы қолданады (мысалы, бүйрекпен шығарылатын радиоконтрасттылы дәрілерді пайдаланғанда). Емнің ұзақтығы құрамында йод бар препараттардың организмде болатын уақытына байланысты.

Пациенттердің ерекше топтары

Бауыр жеткіліксіздігі бар пациенттер

Бауыр жеткіліксіздігі бар пациенттерде тиамазолдың плазмалық клиренсі төмендейді, сондықтан мұндай пациенттерде дәрілік затты ең аз тиімді дозада пайдаланған жөн, бұл ретте пациенттерді мұқият бақылауды қамтамасыз ету қажет.

Бүйрек жеткіліксіздігі бар пациенттер

Бүйрек жеткіліксіздігі бар пациенттерде тиамазолдың фармакокинетикасы туралы деректер шектеулі, сондықтан мұндай пациенттерде дәрілік затты ең аз тиімді дозада қолдану керек (дозаны аса сақтықпен жеке тәртіппен түзету ұсынылады), бұл ретте пациенттерді мұқият бақылауды қамтамасыз ету қажет.

Егде жастағы пациенттер

Егде жастағы пациенттерде тиамазол организмде жинақталады деп күтілмейді, алайда мұндай пациенттерде дәрілік заттың дозасын аса сақтықпен жеке тәртіппен түзету ұсынылады, бұл ретте пациенттерді мұқият бақылауды қамтамасыз ету қажет.

Енгізу әдісі және жолы

Таблеткаларды шайнамай, жеткілікті мөлшерде су іше отырып, тұтастай жұтып қою керек.

Гипертиреоз емінің бастапқы кезеңінде тиамазолдың жоғары тәуліктік дозасын бірнеше қабылдауға бөлуге болады, бұл ретте дәрілік затты күн ішінде белгілі бір уақыт аралығында қабылдау керек.

Тиамазолдың тәуліктік дозасын таңертең тамақтану кезінде немесе одан кейін бір рет қабылдауға болады.

Артық дозалау жағдайында қабылдау қажет болатын шаралар

Дәрілік затпен артық дозалану метаболизм жылдамдығының төмендеуінің тиісті симптомдары бар гипотиреоздың дамуымен және кері байланыс механизмі бойынша гипофиздің алдыңғы бөлігінің белсенуімен қатар жүреді, бұл кейіннен қалқанша без көлемінің ұлғаюына әкеледі. Пациентте эутиреоидты метаболизмдік статусқа жеткен кезде жоғарыда аталған өзгерістердің пайда болуын болдырмау мақсатында тиамазол дозасын төмендету және қажет болған жағдайда левотироксинді қосымша қолдану қажет.

Тиамазолды жоғары дозада кездейсоқ қабылдаумен байланысты жағымсыз әсерлер белгісіз.

Дәрілік препараттың қолдану тәсілін түсіндіру үшін медициналық қызметкер кеңесіне жүгіну жөніндегі нұсқаулар

Дәрілік препаратты қолдану туралы сұрақтар туындаған жағдайда дәрігермен немесе фармацевтпен кеңесу керек.

Дәрілік препаратты стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар

Қан және лимфа жүйесі тарапынан: жиі емес - агранулоцитоз (жағдайлардың 0,3-0,6% -ында тіркеледі; ем басталғаннан кейін бірнеше аптадан бірнеше айға дейінгі мерзімде байқалуы мүмкін, көп жағдайда ол өздігінен жоғалады, бірақ кейбір жағдайларда дәрілік затты қолдануды тоқтату қажет болуы мүмкін); өте сирек - тромбоцитопения, панцитопения, жайылған лимфоаденопатия.

Эндокриндік жүйе тарапынан: өте сирек - инсулиндік аутоиммунды синдром (қандағы глюкоза деңгейінің айтарлықтай төмендеуі байқалады).

Жүйке жүйесі тарапынан: сирек - дәм сезудің бұзылуы (дисгевзия, агеузия) дәрілік затты тоқтатқаннан кейін жоғалып кетуі мүмкін, бірақ кейбір жағдайларда олар бірнеше аптадан кейін ғана жоғалады; өте сирек - неврит, полиневропатия.

Қантамырлар тарапынан: белгісіз - васкулит.

Асқазан-ішек жолы тарапынан: өте сирек - сілекей бездерінің жедел ісінуі; белгісіз - жедел панкреатит.

Бауыр және өт шығару жолдары тарапынан: өте сирек - холестаздық сарғаю, уытты гепатит (әдетте, дәрілік затты тоқтатқаннан кейін жоғарыда аталған жағымсыз реакциялардың симптомдары жоғалады; тиамазолмен емдеу кезінде клиникалық көіріністелмейтін холестаз симптомдарын гипертиреозға байланысты бұзылулармен саралау қажет, мысалы, қанда γ-глутамилтрансфераза мен сілтілі фосфатаза немесе оның сүйек изоферменті деңгейлерінің жоғарылауы).

Тері және теріасты тіндері тарапынан: өте жиі - қышыну, бөртпе, есекжем сияқты әртүрлі дәрежедегі аллергиялық тері реакциялары (көп жағдайда олар елеусіз көріністеледі және әдетте емді жалғастырған кезде жоғалады); өте сирек - терінің аллергиялық реакцияларының ауыр түрлері, соның ішінде жайылған дерматит, алопеция, дәріден туындаған қызыл жегі.

Қаңқа-бұлшықет және дәнекер тін тарапынан: жиі - артралгия (бірте-бірте дамып, бірнеше айлық емнен кейін де пайда болуы мүмкін).

Жалпы бұзылыстар мен енгізу орнындағы бұзылулар: сирек - дәрілік қызба.

Балалар мен жасөспірімдер

Балалардағы жағымсыз реакциялардың пайда болу жиілігі, типі және ауырлығы ересектердегімен салыстырымды болып келеді. Өте сирек жағдайларда ересектерде, сондай-ақ балалар мен жасөспірімдерде жайылған дерматит, соның ішінде Стивенс-Джонсон синдромы сияқты ауыр аса жоғары сезімталдық тері реакцияларының даму жағдайлары байқалды.

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттардың тиімсіздігі туралы хабарламаларды қоса, дәрілік препараттарға болатын жағымсыз реакциялар (әсерлер) жөніндегі ақпараттық дерекқорға тікелей хабарласу керек

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препарат құрамы

Бір таблетканың құрамында

белсенді зат - тиамазол 5 мг, 10 мг,

қосымша заттар: лактоза моногидраты, микрокристалды целлюлоза, жүгері крахмалы, тальк, гипромеллоза, натрий кроскармеллозасы, сусыз коллоидты кремнийдің қостотығы, магний стеараты,

үлбірлі қабықтың құрамы: Опадри® сары 02F22025 (гипромеллоза, титанның қостотығы, макрогол, темірдің сары тотығы, тальк), тазартылған су1.

1 - дайын өнімде жоқ

Сыртқы түрінің, иісінің, дәмінің сипаттамасы

Дөңгелек, екі жақ беті дөңес, екі жағында бөлу сызығы бар, ашық сары түсті үлбірлі қабықпен қапталған таблеткалар (5 мг және 10 мг дозалар).

Шығарылу түрі және қаптамасы

25 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салынады.

2 пішінді ұяшықты қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады.

4 жыл

Жарамдылық мерзімі өткеннен кейін қолдануға болмайды!

25°С-ден аспайтын температурада сақтау керек.

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

«Уорлд Медицин Илач Сан. ве Тидж. А.Ш.»

15 Теммуз Мах., Джами Йолу Джад. № 50, Гюнешли, Багджылар, Стамбул, Түркия

Тел.: +90 212 474 70 50, факс: +90 212 474 09 01

Электрондық пошта: info@worldmedicine.com.tr

Тіркеу куәлігінің ұстаушысы

«УОРЛД МЕДИЦИН ЛТД.»

Бербути көш., 10/ Алмасиани көш., 19-21, 26 кеңсе (корп.II), Тбилиси қ., Грузия

Тел.: + 995 32 2 21 28 12, факс: + 995 32 2 21 28 13

Электрондық пошта: worldmedicine.llc.geo@gmail.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын ұйымның атауы, мекенжайы және байланыс деректері (телефон, факс, электрондық пошта)

«РИН Фарм» ЖШС, Қазақстан Республикасы, Алматы қ., Сүйінбай даңғ., 222Б

Тел./факс: 8 (7272) 529090, электрондық пошта: rin_pharma@mail.ru

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электрондық пошта)

«РИН Фарм» ЖШС, Қазақстан Республикасы, Алматы қ., Сүйінбай даңғ., 222Б

Ұялы телефон: +7 701 786 33 98

Электрондық пошта: pvpharma@worldmedicine.kz