Медопред

Медопред

Преднизолон

Дәрілік түрі, дозалануы

Вена ішіне және бұлшықет ішіне енгізуге арналған ерітінді, 30 мг/мл

Жыныстық гормондарды және инсулиндерді қоспағанда, жүйелік әсер ететін гормональді препараттар. Жүйелік пайдалануға арналған кортикостероидтар. Жүйелік пайдалануға арналған қарапайым кортикостероидтар. Глюкокортикоидтар. Преднизолон.

АТХ коды Н02АВ06

Организмде глюкокортикостероидтар концентрациясының тез жоғарылауын қажет ететін ургенттік жағдайлар

- шок жағдайлары (күйіктік, жарақаттық, операциялық, уыттық)

- қантамырларды тарылтатын дәрілер, плазманың орнын алмастыратын препараттар және басқа да симптоматикалық ем тиімсіз болғанда

- аллергиялық реакциялар (ауыр жедел түрлері), гемотрансфузиялық шок, анафилаксиялық шок, анафилактоидтық реакциялар

- мидың ісінуі (соның ішінде ми ісіктері аясында немесе хирургиялық араласыммен, сәулелік еммен немесе бас жарақатымен байланысты)

- бронх демікпесі (ауыр түрі), демікпелік статус

- дәнекер тінінің жүйелік аурулары (жүйелік қызыл жегі, ревматоидты артрит)

- бүйрекүсті бездері функциясының жедел жеткіліксіздігі

- тиреоуыттық криз

- жедел гепатит, бауырлық кома

- қабыну құбылыстарының азаюы және тыртықтанып тарылудың алдын алу (қышқылдармен және сілтілермен уланғанда)

Қолдануды бастағанға дейінгі қажетті мәліметтер тізімі

Тіршілік көрсетілімдері бойынша қысқа мерзімдік қолдану үшін жалғыз ғана қарсы көрсетілім төмендегі болып табылады:

- преднизолонға немесе қосымша заттардың кез келгеніне аса жоғары сезімталдық

Ұзақ уақыт емдегенде:

- асқазанның және он екі елі ішектің ойық жара ауруы, эзофагит, гастрит, жедел және жасырын пептикалық ойық жара, ішекке жақын арада жасалған анастомоз, тесілу немесе іріңдеу қаупі бар спецификалық емес ойық жаралы колит, дивертикулит, HbsAg оң реакциясы бар созылмалы гепатит

- паразиттік және табиғаты вирустық, зеңдік немесе бактериялық инфекциялық аурулар (қазіргі таңда өтіп жатқан немесе жақын арада басынан кешірген, жақындағы науқастармен жанасуды қоса) - қарапайым герпес, белдемелі герпес (виремиялық фаза), желшешек, қызылша; амебиаз, стронгилоидоз; жүйелік микоз; белсенді және жасырын туберкулез. Ауыр инфекциялық ауруларда қолдану тек спецификалық емдеу аясында ғана

- вакцина алдындағы және вакцинадан кейінгі кезең (вакцинацияға дейін 8 апта және вакцинациядан кейін 2 апта), БЦЖ екпесінен кейінгі лимфаденит, иммунотапшы жағдайлар (соның ішінде ЖИТС немеме АИТВ жұқтыру)

- жақын арада бастан кешірген миокард инфарктісі (жедел және баяу өрбитін миокард инфарктісі бар науқастарда некроз ошағы таралуы, тыртық тіндер түзілуінің баяулауы және осының салдарынан жүрек бұлшықетінің үзілуі ықтимал), жүрек функциясының ауыр созылмалы жеткіліксіздігі, артериялық гипертензия, гиперлипидемия

- қант диабеті (соның ішінде көмірсуларға толеранттылық), тиреотоксикоз, гипотиреоз, Иценко-Кушинг ауруы, семіздік (III-IV дәрежесі)

- бүйрек және/немесе бауыр функциясының созылмалы ауыр жеткіліксіздігі, нефроуролитиаз

- гипоальбуминемия және оның туындауына бейім ететін жағдайлар

- жүйелік остеопороз, gravis миастения

- жедел психоз, полиомиелит (бульбарлы энцефалит түрін қоспағанда)

- ашық- және жабық бұрышты глаукома

- БЦЖ екпесінен кейінгі лимфаденит

- жүктілік кезеңі.

Қолдану кезіндегі қажетті сақтық шаралары

Бойдың өсуі кезеңінде балаларға ГКС абсолюттік көрсетілімдері бойынша және емдеуші дәрігердің аса мұқият бақылауымен қолданылуы тиіс.

Басқа дәрілік препараттармен өзара әрекеттесуі

Преднизолонның вена ішіне енгізілетін басқа препараттармен фармацевтикалық үйлесімсіздігі болуы мүмкін – оны басқа препараттардан бөлек (вена ішіне болюсті түрде, немесе екінші ерітінді ретінде басқа тамызғыш арқылы) енгізу ұсынылады. Преднизолонның ерітіндісін гепаринмен араластырғанда шөгінді түзіледі.

Преднизолонды мыналармен бір мезгілде тағайындау:

- "бауырлық" микросомальді ферменттердің индукторларымен (фенобарбитал, фенитоин, теофиллин, рифампицин, эфедрин) оның концентрациясының төмендеуіне әкеледі

- диуретиктермен (әсіресе "тиазидтік" және карбоангидраза тежегіштерімен) және В амфотерицинмен организмнен К+ шығарылуының күшеюіне; құрамында натрий бар препараттармен – ісінулерге және артериялық қысымның жоғарылауына әкелуі мүмкін

- В амфотерицинмен жүрек функциясы жеткіліксіздігінің даму қаупі артады

- жүрек гликозидтерімен олардың жағымдылығы нашарлайды және қарыншалық экстрасистолияның даму ықтималдылығы жоғарылайды (гипокалиемияның туындауына байланысты)

- әсері тікелей емес антикоагулянттармен олардың әсері әлсірейді (сирек күшейеді) (дозаны түзетуді қажет етеді)

- антикоагулянттармен және фибринолитиктермен асқазан-ішек жолындағы ойық жаралардан қан кетулердің даму қаупі жоғарылайды

- этанолмен және қабынуға қарсы стероидты емес препараттармен (ҚҚСП) асқазан-ішек жолында эрозиялық-ойық жаралы зақымдардың туындау және қан кетулердің даму қаупі күшейеді (артриттерді емдеген кезде ҚҚСП-пен біріктірілімінде емдік әсерлердің жинақталуына байланысты глюкокортикостероидтардың дозасы төмендетілуі мүмкін)

- парацетамолмен гепатоуыттылықтың даму қаупі артады (бауыр ферменттерінің индукциясы және парацетамолдың уытты метаболитінің түзілуі)

- ацетилсалицил қышқылымен оның шығарылуын жылдамдатады және қандағы концентрациясын төмендетеді (преднизолонды тоқтатқан кезде қанда салицилаттардың деңгейі артады және жағымсыз құбылыстардың даму қаупі ұлғаяды)

- инсулинмен және пероральді гипогликемиялық препараттармен, гипотензиялық дәрілермен олардың тиімділігі азаяды

- D дәруменімен оның ішекте Са2+ сіңуіне ықпалы төмендейді

- соматотроптық гормонмен соңғысының тиімділігін, ал празиквантелмен оның концентрациясын төмендетеді

- М-холиноблокаторлармен (антигистаминдік препараттарды және трициклдік антидепрессанттарды қоса) және нитраттармен көзішілік қысымның жоғарылауына мүмкіндік береді

- изониазидпен және мекселитинмен олардың метаболизмін арттырады (әсіресе "баяу" ацетилаторлардың), бұл олардың плазмалық концентрацияларының төмендеуіне әкеледі. Карбоангидраза тежегіштері және "ілмектік" диуретиктер остеопороздың даму қаупін арттыруы мүмкін

- индометацин, преднизолонды альбуминдермен байланысынан ығыстырып, олардың жағымсыз әсерлерінің даму қаупін арттырады

- АКТГ преднизолонның әсерін күшейтеді

- эргокальциферол және паратгормон преднизолонның әсерінен туындайтын остеопатияның дамуына кедергі жасайды

- циклоспорин және кетоконазол, преднизолонның метаболизмін баяулата отырып, бірқатар жағдайларда оның уыттылығын арттыруы мүмкін

- андрогендерді және стероидтық анаболиялық препараттарды преднизолонмен бір мезгілде тағайындау шеткері ісінулердің және гирсутизмнің дамуына, безеулердің пайда болуына мүмкіндік береді

- эстрогендер және құрамында эстроген бар пероральді контрацептивтер преднизолонның клиренсін төмендетеді, бұл оның әсер ету айқындылығының күшеюімен қоса жүруі мүмкін

- митотан және бүйрекүсті бездері қыртысы функциясының басқа тежегіштері преднизолонның дозасын арттыру қажеттілігіне себепші болуы мүмкін

- вирустарға қарсы тірі вакциналармен бір мезгілде қолданғанда және иммунизацияның басқа да түрлерінің аясында вирустардың белсенділену және инфекциялардың даму қаупін арттырады

- психоздарға қарсы дәрілер (нейролептиктер) және азатиоприн преднизолонды тағайындағанда катарактаның даму қаупін арттырады

- антитиреоидтық препараттармен бір мезгілде қолданғанда преднизолонның клиренсі төмендейді, ал тиреоидтық гормондармен – жоғарылайды.

Арнайы ескертулер

Емдеуді бастар алдында (емдеу үдерісінде жағдайдың ургенттілігіне байланысты мүмкін болмағанда) науқас ықтимал қарсы көрсетілімдерді анықтау тұрғысында тексерілуі тиіс. Клиникалық тексеру жүрек-қантамыр жүйесін зерттеуді, өкпені рентгенологиялық зерттеуді, асқазанды және он екі елі ішекті, несепті бөліп шығару жүйесін, көру мүшелерін; қан формуласын, қан плазмасындағы глюкоза және электролиттер мөлшерін қамтуы тиіс.

Преднизолонмен емдеу кезінде (әсіресе ұзаққа созылатын) окулистің бақылауы, артериялық қысымды, су-электролиттік теңгерім жағдайын, сондай-ақ шеткері қан көрінісін және қан глюкозаның деңгейін бақылау қажет.

Жағымсыз құбылыстарды азайту мақсатында организмге К+ түсуін (диета, калий препараттары) арттыру керек. Тағам ақуыздарға, дәрумендерге бай болуы, май, көмірсулар және ас тұзының мөлшерлері шектелуі тиіс.

Препараттың әсері гипотиреозы және бауыр циррозы бар науқастарда күшейеді.

Препарат бұрыннан бар эмоциональді тұрақсыздығын немесе психоздық бұзылуларды күшейтуі мүмкін. Анамнезінде психоз көрсетілсе, преднизолондың жоғары дозаларын дәрігердің қатаң бақылауымен тағайындайды.

Демеуші ем кезіндегі күйзеліс жағдайларында (мысалы, хирургиялық операциялар, жарақат немесе инфекциялық аурулар) глюкокортикостероидтарға қажеттіліктің жоғарылауымен байланысты препараттың дозасына түзету жүргізу керек. Күрт тоқтатқанда, әсіресе мұның алдында жоғары дозаларды қолданған жағдайда, «тоқтату» синдромы (анорексия, жүректің айнуы, мәңгіру, бұлшықет-қаңқа жайылған ауыруы, жалпы әлсіздік) дамуы, сондай-ақ преднизолон тағайындау себебінен ауру өршуі мүмкін.

Преднизолонмен емдеу кезінде тиімділігі (иммундық жауап) төмендейтін болғандықтан вакцинацияны жасамау керек.

Интеркурренттік инфекцияларды, сепсистік жағдайларда және туберкулезде преднизолонды тағайындай отырып, бактерицидтік әсері бар антибиотиктермен бір мезгілде ем жүргізу қажет.

Сүйек-буын жүйесіне рентгенологиялық бақылау (омыртқаның, қол ұшы сүйектерінің суреттері) керек.

Преднизолон 11- және 17-оксикетокортикостероид метаболиттерінің мөлшерін арттырады.

Склеродермиялық бүйректік криз (жедел склеродермиялық нефропатия)

Жүйелік склеродермиясы бар пациенттер преднизолонды тәуліктік 15 мг және одан көбірек дозада күн сайын қабылдағанда, артериялық гипертензиямен және диурездің төмендеуімен бірге склеродермиялық бүйректік криздің (өліммен аяқталуы мүмкін) даму жағдайлары жиілігінің артуы байқалатындықтан, сақтық таныту қажет. Артериялық қысымды және бүйрек функциясын (қан плазмасындағы креатинин концентрациясы) белгіленген тәртіппен бақылау керек. Бүйректік кризге күдіктенгенде артериялық қысымды өте мұқият бақылау қажет.

Егде жаста қолданылуы

Жүйелік кортикостероидтардың таралған жағымсыз әсерлері егде жаста өте күрделі зардаптармен, әсіресе остеопорозбен, гипертониямен, гипокалиемиямен, диабетпен, инфекцияға ұшыраумен және терінң жұқаруымен байланысты болуы мүмкін. Өмір үшін қауіпті реакцияларға жол бермеу үшін мұқият клиникалық бақылау қажет.

Бүйрек функциясының жеткіліксіздігі

Бүйрек және несеп шығару жолдарының жасырын инфекциялық аурулары бар науқастарда преднизолон лейкоцитурияны туындатуға қабілетті, мұның диагностикалық маңызы болуы мүмкін.

Қант диабеті

Қант диабеті бар науқастарда қандағы глюкоза мөлшерін бақылау және қажет болғанда емге түзету енгізу керек.

Педиатрияда қолданылуы

Преднизолонмен ұзақ емдеу кезінде балаларда бойдың өсу және даму динамикасын мұқият бақылау қажет. Емдеу кезеңінде қызылшамен, желшешекпен ауыратын науқастармен қарым-қатынаста болғанда спецификалық иммуноглобулиндерді профилактикалық тұрғыда тағайындайды.

Бүйрекүсті бездері функциясының жеткіліксіздігінде, минералокортикоидтық әсердің әлсіздігі салдарынан, орнын алмастыратын ем үшін преднизолонның минералокортикоидтармен біріктірілімін пайдаланады.

Жүктілік немесе лактация кезінде қолданылуы

Жүктілік

Жүктілік кезінде (әсіресе І триместрде) өмірлік көрсетілімдері бойынша ғана қолданады.

Жүктілік кезеңінде ұзақ емдегенде шаранада өсудің бұзылуы мүмкін екендігі жоққа шығарылмайды. Жүктіліктің ІІІ триместрінде қолданған жағдайда шаранада бүйрекүсті безі қыртысы атрофиясының туындау қаупі бар, ол жаңа туған нәрестеде орнын алмастыратын ем жүргізуді қажет етуі мүмкін.

Емшек емізу

Преднизолон емшек сүтімен аздаған мөлшерде бөлініп шығады. Дегенмен, күніне преднизолонның 40 мг дейінгі дозасының нәрестеде жүйелік әсерлерді туындатуы екіталай. Лактация кезеңінде қолдану қажет болғанда ана үшін емдеудің күтілетін пайдасын және нәресте үшін қаупін мұқият екшеу керек. Емшектегі нәрестені бақылау ұсынылады.

Көлік құралық немесе потенциалды қауіпті механихзмдерді басқару қабілетіне препараттың ықпал ету ерекшеліктері

Препарат автомобильді жүргізу және техникамен жұмыс жасау қабілетіне ықпалын тигізбейді.

Қолдану жөніндегі нұсқаулар

Дозалау режимі

Препараттың дозасын және емдеу ұзақтығын дәрігер аурудың көрсетілімдеріне және ауырлығына байланысты жекелей белгілейді. Медопредті вена ішіне (тамшылатып немесе сорғалатып) немесе бұлшықет ішіне енгізеді. Вена ішіне препаратты әдетте сорғалатып, содан кейін тамшылатып енгізеді.

Бүйрекүсті бездері функциясының жедел жеткіліксіздігінде препараттың бір реттік дозасы 100 - 200 мг, тәуліктік дозасы 300-400 мг құрайды.

Ауыр аллергиялық реакцияларда препаратты 3-16 күн бойы тәуліктік 100-200 мг дозада енгізеді.

Бронх демікпесінде препаратты аурудың ауырлығына және 3-тен 16 күнге дейінгі емдеу курсында 75-тен 675 мг-ге дейінгі кешенді емнің тиімділігіне байланысты енгізеді; ауыр жағдайларда доза емдеу курсында 1400 мг-ге дейін және одан көбірекке арттырылуы және біртіндеп төмендетілуі мүмкін.

Деміпелік статуста Медопредті тәулігіне 500-1200 мг дозада енгізіп, кейіннен тәулігіне 300 мг дейін төмендетеді және демеуші дозаға ауыстырады.

Тиреоуытты кризде тәуліктік 200-300 мг дозада 100 мг-ден енгізеді; қажет болған кезде тәуліктік доза 1000 мг-ге дейін арттырылуы мүмкін. Қолдану ұзақтығы емдік әсеріне байланысты, ол әдетте 6 күнге дейін.

Стандартты емге резистентті шокта емнің бас кезінде Медопредті әдетте сорғалатып енгізеді, содан кейін тамшылатып енгізуге ауысады. Егер 10-20 минут ішінде артериялық қысым жоғарыламаса, препаратты сорғалатып енгізуді қайталайды.

Бір реттік доза 50-150 мг құрайды (ауыр жағдайларда – 400 мг-ге дейін). Препаратты 3-4 сағаттан кейін қайталап енгізеді. Шок жағдайынан шыққаннан кейін артериялық қысым тұрақталғанға дейін тамшылатып енгізуді жалғастырады. Тәуліктік доза 300-1200 мг құрауы мүмкін (кейіннен дозаны төмендетеді).

Бауыр-бүйрек функциясының жедел жеткіліксіздігінде (қатты уланғанда, операциядан кейінгі және босанудан кейінгі кезеңде және басқада) преднизолонды тәулігіне 25-75 мг-ден енгізеді; көрсетілімдері бар болғанда тәуліктік доза тәулігіне 300-1500 мг-ге дейін және одан жоғарыға арттырылуы мүмкін.

Ревматоидты артритте және жүйелік қызыл жегіде препаратты жүйелік қабылдауға қосымша ретінде преднизолонды 7-10 күннен арттырмай тәулігіне 75 -125 мг дозада енгізеді.

Жедел гепатитте преднизолонды 7-10 күн бойы тәулігіне 75 -100 мг дозадан енгізеді.

Қышқылдармен және сілтілермен ас қорыту жолы және жоғарғы тыныс алу жолдары күйіп уланғанда преднизолонды 3-18 күн бойы тәулігіне 75-400 мг дозада тағайындайды.

Вена ішіне енгізу мүмкін емес болғанда Медопредті бұлшықет ішіне сол дозаларда енгізеді. Шиеленіскен жағдайды басу үшін ішке преднизолонның таблеткасын тағайындап, кейіннен дозаны біртіндеп азайтады. Препаратты ұзақ уақыт қабылдағанда тәуліктік дозаны біртіндеп төмендету керек. Ұзаққа созылған емді күрт тоқтатуға болмайды!

Балалар

2-ден 12 айлыққа дейінгі балаларға – тәулігіне 2-3 мг/кг, 1 жастан 14 жасқа дейін – тәулігіне 1-2 мг/кг, б/і, в/і баяу енгізеді (3 минут бойы). Қажет болғанда, осы дозаны 20-30 минуттан кейін қайталауға болады. Бойының өсу кезеңінде балаларға глюкокортикостероидтар тек абсолюттік көрсетілімдер бойынша және емдеуші дәрігердің аса мұқият бақылауымен қолданылуы тиіс.

Енгізу әдісі және жолы

Вена ішіне және бұлшықет ішіне енгізуге арналған.

Қабылдау уақыты көрсетілген қолдану жиілігі

Симптомдары: жоғарыда сипатталған жағымсыз құбылыстар күшеюі мүмкін.

Емі: преднизолонның дозасын азайту қажет. Симптоматикалық ем жүргізу.

Дәрілік препаратты қолдану тәсілін түсіну үшін медицина қызметкеріне кеңес алуға бару ұсынылады.

ДП стандартты қолдану кезінде көрініс беретін жағымсыз реакциялардың сипаттамасы және осы жағдайда қабылдануы керек шаралар

Гипоталамус-гипофиз-бүйрекүсті бездері жүйесінің супрессиясын қоса, болжамды жағымсыз әсерлердің даму жиілігі дозаға, тағайындау уақытына және емдеу ұзақтығына байланысты. Жағымсыз әсерлері біршама ықтимал ең төмен кезең ішінде тиімді ең төмен дозаны қолдану арқылы барынша ең азға жеткізілуі мүмкін.

Өте жиі

- инфекцияларға жоғары сезімталдық, бұрыннан бар инфекциялардың өршуі, жасырын инфекциялардың белсенділенуі және преднизолонның иммуносупрессорлық және қабынуға қарсы әсері салдарынан инфекция симптомдарының бүркемеленуі

- эозинофилдер және лимфоциттер санының төмендеуі

- бұрыннан бар аурулардың бүркемеленуіне немесе өршуіне әкелетін иммуносупрессорлық және қабынуға қарсы әсер

- преднизолонды ұзақ уақыт пероральді түрде қолданғанда бүйрекүсті бездері функциясының жеткіліксіздігі (гипоталамустың тежелуімен басталатын және бүйрекүсті бездері қыртысының нағыз атрофиясымен аяқталатын), бүйрекүсті бездері функциясының жеткіліксіздігі салдарынан тоқтату синдромы (бас ауыру, жүректің айнуы, бас айналу, анорексия, әлсіздік, эмоциональді жағдайдың өзгерулері, апатия және күйзеліс жағдайларына адекватты емес реакция, инсулинге сезімталдығы төмен «стероидты қант диабеті», қант диабетінен азап шегіп жүрген пациенттерде қандағы қант деңгейінің жоғарылауы (100%). Өсу гормоны секрециясының бұзылулары және өсу гормонына сезімталдықтың төмендеуі нәтижесінде бой өсудің кідіруі

- көзішілік қысымның жоғарылауы (пероральді препаратпен ем қабылдап жүрген пациенттердің 40%-на дейін), препаратпен пероральді түрде ұзақ уақыт емделіп жүрген пациенттердің 30%-ында катаракта

- өкпе обырынан азап шегіп жүрген пациенттерде өкпе абсцессі (12%).

- арқаның ауыруы, қимыл-қозғалыстың төмендеуі, қатты ауыру, омыртқалардың компрессиялық сынулары және омыртқа биіктігінің төмендеуі, жілік сүйектерінің сынулары сияқты симптомдары бар остеопороз.

Жиі

- лейкоциттер және тромбоциттер санының жоғарылауы

- физиологиялықтан жоғары пероральді дозаларды (әдетте тәулігіне 50 мг-ден көбірек) ұзақ уақытқа тағайындағанда май жиналудың өзгеруін (ай тәріздес бет, орталық семіру, «бұқа өркеш») қоса, Кушинг синдромы, калийдің орнына натрийді ұстап қалу салдарынан гипокалиемия, бала туа алатын жастағы әйелдерде аменорея, ішке қабылданатын жоғары дозалармен емдегенде холестерин, триглицеридтер және липопротеин деңгейлерінің жоғарылауы

- эйфория, депрессия, кортикостероидтармен индукцияланған психоз

- гипертензия (натрийді ұстап қалу салдарынан, бұл сұйықтықтың іркілуіне әкеледі), жүрек функциясының іркілген жеткіліксіздігінің өршуі (натрийді ұстап алу нәтижесінде)

- туберкулездің даму қаупінің жоғарылауы

- ауыз қуысының кандидозы, колитте, илеитте, дивертикулитте симптомдардың күшеюі

- шырышты қабықтардың зеңдік инфекциясы, созылулар, безеу бөртпесі, көгерулердің пайда болуы, дерматит, экхимоз, бет эритемасы, атрофия, гирсутизм, жараның баяу жазылуы, қатты терлеу, телеангиэктазиялар және терінің жұқаруы, терінің бұрыннан бар ауруларының бүркемеленуі немесе нашарлауы

- түнгі полиурия

Жиі емес

- аллергиялық реакциялар

- пероральді аз дозалармен емдегенде қант диабеті (<1%), пероральді төмен дозалармен емдегенде холестерин, триглицеридтер және липопротеиндер деңгейлерінің жоғарылауы

- ұйқысыздық, көңіл-күйдің құбылуы, жеке бастың өзгерулері, маниакальді синдром және елестеулер

- тыныс алу бұлшықеттерінің миопатиясы

- асқазанның ойық жарасы немесе тоқ ішектің ойық жарасы, асқазан-ішектік қан құйылулар (0,5%), асқазанның, ішектің тесілулері

- сүйектінінің асептикалық некрозы

- кальций мен фосфат экскрециясының жоғарылауы салдарынан несеп тастары, жыныс гормондары секрециясының бұзылулары (етеккірдің бұзылуы, гирсутизм, импотенция), васкулит

Сирек

- қанның ұюы салдарынан тромбоз қаупі

- қалқанша без функциясының өзгерулері

- церебральді безгекте кома жағдайы созылуы мүмкін, кем ақыл

- көздің герпестік инфекциясымен бір мезгілде көздің мөлдір қабығы бұзылуының жоғары қаупі (осы инфекцияны бүркемелейтін болғандықтан), глаукома (препаратпен пероральді түрде ұзақ емдеу).

Өте сирек

- кетоацидоз және гиперосмолярлық кома, жасырын гиперпаратиреоздың көрініс беруі, порфирияның жылдам дамуы

- ісік лизисінің синдромы

- жасырын эпилепсияның көрініс беруі, мидың жалған ісігі (бас ауыру, көздің айқын көрмеуі және көрудің бұзылулары сияқты симптомдары бар бассүйекішілік катерсіз гипертензия)

- экзофтальм (препаратпен ұзақ уақыт пероральді емдеуден кейін)

- жүректің минуттық көлемінің төмендеу қаупі жоғарылайтын кардиомиопатия, гипокалиемия салдарынан аритмия

- жоғары дозалармен ұзақ емдеуден кейін панкреатит

- эпидермальді некролиз, Стивен-Джонсон синдромы

Белгісіз (қолда бар деректер негізінде баға беру мүмкін емес).

- склеродермиялық бүйректік криз*

- жүрек қағысының баяулауы

*Әртүрлі популяциялар ішінде склеродермиялық бүйректік криздің туындауы құбылып отырады. Өте жоғары қауіп диффуздық склеродермиясы бар пациенттерде білінеді. Ең төмен қауіп склеродермиясы шектелген пациенттерде (2%) және ювенильді склеродермиясы (1%) бар пациенттерде білінді.

Жағымсыз дәрілік реакциялар туындаған жағдайда медицина қызметкеріне, фармацевтикалық қызметкерге немесе, дәрілік препараттардың тиімді еместігі туралы мәлімдемелерді қоса, дәрілік препараттарға жағымсыз реакциялар (әсерлер) жөнінде деректердің ақпараттық базасына тікелей хабарлау керек

Қазақстан Республикасы Денсаулық сақтау министрлігі Медициналық және фармацевтикалық бақылау комитеті «Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметттер

Дәрілік препараттың құрамы

1 мл ерітіндінің құрамында

белсенді зат - 30 мг преднизолон фосфаты (33 мг натрий фосфаты преднизолон түрінде),

қосымша заттар: никотинамид, динатрий эдетаты, натрий метабисульфиті, фенол, натрий гидроксиді, тазартылаған су.

Сыртқы түрінің, иісінің, дәмінің сипаттамасы

Түссіз немесе сарғыш түсті мөлдір ерітінді.

Шығарылу түрі және қаптамасы

І типті янтарь шыны ампулаларға препарат 1 мл-ден құйылған.

Пішінді ұяшықты қаптамаға 5 ампуладан салынған.

Пішінді ұяшықты 2 қаптама медициналық қолданылуы жөнінде қазақ және орыс тілдеріндегі нұсқаулықпен бірге картон қорапшаға салынған.

2 жыл.

Жарамдылық мерзімі өткеннен кейін қолдануға болмайды!

25°С-ден аспайтын температурада, түпнұсқалық қаптамасында сақтау керек.

Мұздатып қатыруға болмайды!

Балалардың қолы жетпейтін жерде сақтау керек!

Рецепт арқылы

Өндіруші туралы мәліметтер

«Медокеми Лтд»

48 Iapetou Street, Agios Athanassios Industrial Area, 4101 Agios Athanassios, Limassol, Cyprus (Лимассол, Кипр)

tel.: 357-25-867600

fax.: 357-25-560863

e-mail: office@medochemie.com

Тіркеу куәлігінің ұстаушысы

«Медокеми Лтд»

1-10 Constantinoupoleos Street, 3011, Limassol, Cyprus (Лимассол, Кипр)

tel.: 357-25-867600

fax.: 357-25-560863

e-mail: office@medochemie.com

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Медокеми Лтд» Қазақстан Республикасындағы өкілдігі

050010 Алматы қ., Қазыбек би к-сі 41, кеңсе 1

телефон/факс 8(727) 321-05-05

e-mail: kazakhstan@medochemie.com