Маннитол 200 мл (15%)

• русский
• қазақша

• Скачать инструкцию медикамента

Саудалық атауы

Маннитол

Халықаралық патенттелмеген атауы

Маннитол

Дәрілік түрі

Инфузияға арналған ерітінді 15% 200 мл, 400 мл

Құрамы

1 л препараттың құрамында

белсенді зат - маннитол 150.0 г,

қосымша заттар: натрий хлориді, инъекцияға арналған су.

Сипаттамасы

Иісі жоқ мөлдір түссіз ерітінді.

Фармакотерапиялық тобы

Плазма алмастыратын және перфузиялық ерітінділер.

Көктамыр ішіне енгізуге арналған ерітінділер. Осмодиуретиктер. Маннитол.

АТХ коды В05BС01

Фармакологиялық қасиеттері

Фармакокинетикасы

Маннитол ішке қабылдағанда молекулалары полярлығының жоғарылығынан нашар сіңетін алты валентті спирт, сондықтан оны қолданудың жалғыз тәсілі – парентеральді енгізу (к/і) болып табылады. Маннитолдың таралу көлемі экстрацеллюлярлық сұйықтық көлеміне сай келеді, өйткені ол тек жасуша сыртындағы секторда ғана таралады. Препарат жасуша жарғақшалары және тіндік бөгеттер (мысалы, гематоэнцефалдық, плацентарлық ) арқылы өтпейді

Маннитол бауырда гликоген түзілуімен елеусіз метаболизмге ұшырауы мүмкін.

Маннитолдың жартылай шығарылу кезеңі 100 минутқа жуықты құрайды.

Препарат бүйрек арқылы шығарылады. Маннитолдың шығарылуы өзекшелік реабсорбция және секрецияның елеулі қатысуынсыз шумақтық сүзіліс арқылы реттеледі. Егер көктамыр ішіне 100 г маннитол енгізілсе, онда оның 80 % -ы 3 сағат ішінде несепте анықталады.

Бүйрек жеткіліксіздігі бар емделушілерде маннитолдың жартылай шығарылу кезеңі 36 сағатқа дейін артуы мүмкін.

Фармакодинамикасы

Маннитол плазманың осмолярлығын арттырады, сұйықтықтың тіннен тамыр ағынына ауысуын туындатады. Маннитол күшті несеп айдайтын әсер береді. Маннитолдың диуретикалық әсерінің принципі оның бүйрек шумақтарында жақсы сүзілуіне, бүйрек өзекшелерінің саңылауында жоғары осмостық қысым туындатып (маннитол кері сіңуге аз ұшырайды) және судың реабсорбциясын төмендетуіне байланысты. Нефронның төмен түсетін ілмегінде және жинайтын түтікте қандай да бір дәрежеде әсері сақталғанымен де ол негізінен, проксимальді өзекшелерде әсер етеді. Басқа да осмостық диуретиктерден айрымашылығы маннитол бос судың көп мөлшерін шығаруға қабілетті. Диурез калийдің шығарылуына елеулі әсер етпестен натрий мен хлордың едәуір бөлінуімен қатар жүреді. Маннитолды тағайындаған кезде пайда болатын натрийурез шамасы бойынша, сулысына қарағанда аздау болатынын, мұның кейде гипернатриемияны туғызатынын ескеру керек. Қышқылды-негізді жай-күйге маннитол елеулі әсер етпейді.

Маннитолдың несеп айдағыш әсері бүйрек арқылы сүзілген препараттың мөлшеріне байланысты. Препараттың концентрация деңгейі қаншалықты жоғары және оның енгізу жылдамдығы жоғары болған сайын әсері айқынырақ. Бүйрек шумақтарының сүзгіштік функциясы бұзылған кезде маннитол ерітіндісінің диуретикалық тиімділігі болмауы мүмкін.

Қолданылуы

- ми ісінуінде, бассүйекішілік гипертензиясында

- жедел глаукома ұстамасында

- бүйректің сүзгіштік қабілетінің сақталуымен жедел бүйрек немесе бүйрек-бауыр жеткіліксіздігіндегі олигурияда (біріктірілген ем құрамында)

- барбитураттармен және салицилаттармен уланғандағы қарқынды диурезде

- бүйрек ишемиясын және осыған байланысты жедел бүйрек жеткіліксіздігін болдырмау мақсатында экстракорпоральді қанайналымы бар операцияларда гемолиздің алдын алу үшін.

- үйлеспейтін қанды енгізгеннен болатын трансфузиядан кейінгі асқынуларда

Қолдану тәсілі және дозалары

Маннитолды көктамыр ішіне сорғалатып немесе тамшылатып баяу енгізеді. 15 % маннитол ерітіндісінің емдік дозасы дене салмағының әр кг шаққанда 1,0-1,5 г құрайды. Маннитолдың тәуліктік дозасы 140-180 г-ден аспау керек.

Ересектерге 50-100 г препараттан диурез деңгейі 30-50 мл/сағ кем болмайтын жылдамдықпен енгізеді.

Әдеттегі 0,25 – 0,5 г/кг балалар дозасы 2-6 сағат ішінде енгізіледі. Балалар үшін ең жоғары тәуліктік доза 2,0 г/кг немесе дене беткейінің әр 1 м2 60 г құрайды. Балалар үшін маннитолдың енгізу жылдамдығы мен дозасы емделушінің жай-күйінің ауырлығына байланысты жеке таңдалады. Ми ісінуінде, бассүйекішілік жоғары қысымда немесе глаукомада – 1-2 г/кг немесе 30-60 минут бойына\дене беткейінің 1 м2 - 30-60 г. Дене салмағы төмен балаларда немесе әлсіреген емделушілерде 500 мг/кг жеткілікті доза болып табылады. Балалардағы улану жағдайында дене салмағына әр 2 г/кг көктамырішілік инфузия жүргізеді немесе дене беткейінің 1 м2 60 г енгізеді.

Ересектерге улану жағдайында диурезді 100-500 мл/сағ деңгейінде демеуші инфузия жылдамдығымен 50-200 г енгізеді. Ересектерге арналған ең жоғары доза – 24 сағат бойына дене салмағының әр кг-на 6 г дейінді құрайды.

Қуық асты безінің трансуретральді резекциясы кезінде гемолиздің және гемоглобинемияның алдын алу үшін, жүрек-өкпе жүйесінде тамырларды шунттау кезінде немесе экстракорпоральді қан айналымымен операция жүргізгенде доза (құрғақ ұнтақ) дене салмағының әр кг шаққанда 500 мг құрайды.

Экстракорпоральді қан айналымын пайдалану арқылы операция жүргізгенде тікелей перфузия алдында Маннитолды 20-40 г дозада енгізеді.

Тұрақты инфузия жасардың алдында осмостық диуретикке реакцияны анықтау мақсатымен олигоуриясы бар емделушілерге маннитолдың сынама дозасын 3-5 минут бойы көктамыр ішіне (дене салмағының әр кг шаққанда 200 мг-ден) тамшылатып енгізу керек. Егер 3 сағат ішінде диурез жылдамдығының сағатына 50 мл-ге дейін артуы болмаса, Маннитол тағайындаған тиімсіз. Егер сынама дозаға реакция алынған болса, онда диурез жылдамдығын сағатына 100 мл-ден жоғары деңгейде демеу үшін 1-2 сағаттан кейін маннитол ерітіндісін (12,5-25 г) енгізуді қайталау керек.

Маннитолды ұзақ уақыт бойы қолдану ұсынылмайды.

Жағымсыз әсерлері

Жиі

- бас ауыруы

- ауыз кеберсуі

- шөлдеу

- жүрек айнуы және құсу

- терінің құрғауы

Сирек

- төс артының ауыруы

- тахикардия

- тері бөртпесі

- тромбофлебит

- бұлшықет әлсіздігі, құрысулар, елестеулер, сусыздану нәтижесінде артериялық қысымның төмендеуі

- су-электролиттік алмасудың бұзылуы (айналымдағы қан көлемінің артуы, гипонатриемия, гиперкалиемия)

Көктамыр ішіне жылдам енгізуде

- бас ауыруы

- жүрек айнуы және құсу

- шөлдеу

- қызба

- кеуденің ауыруы

- тыныстың бұзылуы

Қолдануға болмайтын жағдайлар

- препарат компоненттеріне аса жоғары сезімталдық

- 12 сағаттан астам ануриямен, сүзілу үдерісінің бұзылуы бар бүйрек жеткіліксіздігінің ауыр түрі

- геморрагиялық инсультте, субарахноидальді қан құйылуда (бас сүйегін тесу кезіндегі қан кетулерден басқада)

- жедел сол жақ қарыншалық жеткіліксіздік кезіндегі өкпе ісінуі

- қалпына келмейтін жүрек-қан тамыр жеткіліксіздігі

- ауыр дәрежелі дегидратация

- гипокалиемия, гипонатриемия, гипохлоремия

- жарақаттан кейінгі бассүйекішілік қысымның қан құйылу қаупі бар жоғарылауы

Дәрілермен өзара әрекеттесуі

Препаратты жүрек гликозидтерімен бір уақытта қолдану гипокалиемияға байланысты олардың уыттылық әсерін күшейтуі мүмкін. Препарат салуретиктердің, карбоангидраза тежегіштерінің және басқа да диуретикалық препараттардың несеп айдайтын әсерін қуаттандырады. Басқа диуретиктермен бір уақытта қолдану олардың әсерін күшейтеді. Неомицинмен бірге қолданғанда ото- және нефроуыттылық даму қаупі жоғарылайды.

Айрықша нұсқаулар

Жүрек қызметінің жеткіліксіздігінде, әсіресе сол жақ қарынша жеткіліксіздігінде (өкпе ісінуі даму қаупіне байланысты) Маннитолды тез әсер ететін «ілмектік» диуретиктермен үйлестіру керек. Жүрек қызметінің жеткіліксіздігінде (тек «ілмектік» диуретиктермен біріктірілімде) және энцефалопатиясы бар гипертониялық кризде қолданылуы мүмкін. Инфузия кезінде бүйрек функциясын, сондай-ақ маннитол аккумуляциясынан аулақ болу үшін диурезді бақылау керек.

Артериялық қысымды, электролиттер концентрациясын (калий ионы, натрий ионы) және қан сарысуындағы қантты бақылау керек. Препаратты қайта енгізу қандағы су-электролиттік теңгерім көрсеткіштерін бақылаумен жүргізілуі тиіс.

Маннитол бауыр циррозы және асциті бар науқастарда азотемияда тиімсіз.

Маннитол ерітіндісін енгізуде бастапқыда жасушадан тыс сұйықтық көлемі артатынын және гипонатриемия дамитынын ескеру керек.

Препаратты енгізуде бас ауыруы, құсу, бас айналуы, көрудің бұзылуы пайда болған жағдайда енгізуді тоқтату керек және субдуральді және субарахноидальді қан кету сияқты асқынулар дамуын болдырмау керек.

Жүрек гликозидтерімен бір уақытта қолдану оймақгүл препараттарымен уланудың және гипокалиемия қаупін жоғарылатуы мүмкін.

Басқа диуретиктермен бір уақытта қолдану олардың әсерін күшейтеді.

Препаратты 20 оС–ден төмен температурада сақтағанда кристалдану жағдайы болуы мүмкін, кристалданған жағдайда ерітіндіні су моншасында 50 °-ден 70 °С–ге дейін кристалдары жойылғанша шамалы қыздыру керек, ал дәл енгізер алдында 36 °С дене температурасына дейін салқындатады.

Педиатрияда қолданылуы

Балалар мен жасөспірімдерге препаратты тек өмірлік көрсетілім бойынша ғана тағайындайды. Препаратты балалар мен жасөспірімдерде қолдануға болмайтыны туралы деректер жоқ.

Жүктілік және лактация кезеңі

Препаратты жүктілікте және лактация кезеңінде қолдануға болмайтыны туралы деректер жоқ. Жүктілік және лактация кезеңінде препаратты ана денсаулығы үшін болжамды пайдасы ұрыққа немесе сәбиге төнетін зор қауіптен артық болатын жағдайларда ғана сақтықпен қолдануға болады.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препарат автомашина жүргізу немесе техникамен жұмыс істеу сияқты қызмет түрлерін орындау қарастырылмаған стационарлық жағдайларда қолданылады.

Артық дозалануы

Симптомдары: сусыздану белгілері (жүрек айнуы, құсу, елестеулер), бұлшықет әлсіздігі, құрысулар, естен тану.

Емі: препаратты енгізуді тоқтату керек. Симптоматиялық ем жүргізу.

Шығарылу түрі және қаптамасы

200 мл және 400 мл препараттан бір немесе екі портты полипропиленді контейнерде.

Контейнерлерді медицинада қолданылуы жөнінде мемлекеттік және орыс тілдеріндегі контейнер санына тең болатын мөлшерде нұсқаулықпен бірге картон қорапқа қаптайды.

Сақтау шарттары

Жарықтан қорғалған жерде, 25 ºС-ден аспайтын температурада сақтау керек.

Мұздатып қатыруға болмайды!

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«НУР-МАЙ ФАРМАЦИЯ» ЖШС, «AYAT pharm» инфузиялық ерітінділер зауыты, Қазақстан Республикасы, Алматы қ., Жетісу ауд., Первомайский ш.а., Қапшағай көш., 17 үй.

Тіркеу куәлігінің иесі

«НУР-МАЙ ФАРМАЦИЯ» ЖШС, «AYAT pharm» инфузиялық ерітінділер зауыты Қазақстан Республикасы, Алматы қ., Жетісу ауд., Первомайский ш.а., Қапшағай к-сі, 17 үй.

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы:

«НУР-МАЙ ФАРМАЦИЯ» ЖШС, «AYAT pharm» инфузиялық ерітінділер зауыты Қазақстан Республикасы, Алматы қ., Жетісу ауд., Первомайский ш.а., Қапшағай к-сі, 17 үй, тел/факс: (727) 2603974.