Листрэлла

МНН: Левоноргестрел, Этинилэстрадиол
Производитель: Sun Pharmaceutical Industries Ltd
Анатомо-терапевтическо-химическая классификация: Левоноргестрел и эстроген
Номер регистрации в РК: № РК-ЛС-5№021541
Информация о регистрации в РК: 23.07.2015 - 23.07.2020

Инструкция

Саудалық атауы

Листрэлла

Халықаралық патенттелмеген атауы

Жоқ

Дәрілік түрі

Таблеткалар

Құрамы

Бір таблетканың құрамында

белсенді заттар: 0.150 левоноргестрел, 0.030 этинилэстрадиол (микронизирленген) ,

қосымша заттар:

лактоза моногидраты, желатинделген крахмал, аралас қызғылт-сары бояғыш, “күн батар түстес” сары FCҒ (110), лактоза моногидраты (сүттен алынған), магний стеараты

Сипаттамасы

Дөңгелек, екі жақ беті дөңес, бір жағында «708» өрнегі бар және екінші жағы тегіс ашық қызғылт-сары таблеткалар

Фармакотерапиялық тобы

Жыныс гормондары және жыныс жүйесінің модуляторлары. Жүйелі пайдалануға арналған гормональді контрацептивтер. Прогестагендер мен эстрогендер (бекітілген біріктірілімдер). Левоноргестрел және эстрогендер

АТХ коды G03A A07

 

Фармакологиялық қасиеттері

Фармакокинетикасы

Этинилэстрадиол және левоноргестрел асқазан-ішек жолынан тез және толық дерлік сіңіріледі.

Этинилэстрадиол - Этинилэстрадиол асқазан-ішек жолынан тез және толық сіңеді, препарат қан плазмасындағы ең жоғары концентрациясына 1,5 сағаттан соң жетеді. Абсолютті биожетімділігі жүйе алдындағы конъюгациядан және бауыр арқылы «алғаш» өтуден соң 60% құрайды. «Концентрация-уақыт» қисығы астындағы аудан және Cmax уақыт өте келе мардымсыз артуы мүмкін. Қан плазмасы ақуыздарымен этинилэстрадиолдың байланысу дәрежесі 98,8% дейін құрайды, плазма альбуминімен ғана байланысады. Этинилэстрадиол аш ішектің шырышты қабығында да, бауырда да жүйе алдындағы конъюгацияға ұшырайды. Этинилэстрадиолдың тікелей конъюгаттарының ішек флорасымен гидролизінің нәтижесінде қайтадан кері сіңірілуі мүмкін этинилэстрадиол түзіледі (энтеробауыр қайта айналымы). Этинилэстрадиол метаболизмінің негізгі жолы Р-450 цитохромы жүйесінде гидроксилденіп, негізгі 2-ОН-этинилэстрадиол және 2-метокси-этинилэстрадиол метаболиттерінің түзілуі болып табылады. 2-ОН-этинилэстрадиол әріқарай химиялық белсенді метаболиттерге дейін метаболизденеді. Этинилэстрадиол қан плазмасынан 25 сағатқа жуық жартылай шығарылу кезеңімен (Т½) шығарылады, плазмалық клиренсі сағатына 10-30 л шегінде ауытқиды. Этинилэстрадиол конъюгаттары мен оның метаболиттері несеппен және нәжіспен шығарылады, препараттың шамамен 40% несеппен және 60% нәжіспен шығарылады.

Левоноргестрел. Ішке қабылдағаннан кейін левоноргестрел асқазан-ішек жолынан тез және толық сіңеді. Биожетімділігі шамамен 100% құрайды. Левоноргестрел бауыр арқылы «алғаш» өту кезінде метаболизмге ұшырамайды. Қан плазмасында левоноргестрел ЖГБГ (жыныс гормондарын байланыстыратын глобулинмен) және альбуминмен елеулі дәрежеде байланысады. Метаболизм, негізінен, 4-3-оксо-тобының ыдырауымен және 2α, 1β және 16β қалыптарында гидроксилденуімен жүзеге асады, одан кейін конъюгация жүреді. Қанда айналатын метаболиттердің көпшілігі 3α, 5β-тетрагидро-левоноргестрел сульфаттары болып табылады. Препарат экскрециясы, негізінен, глюкуронидтер түрінде жүреді. Бастапқы левоноргестрелдің аздаған мөлшері 17β-сульфат түрінде айналады. Метаболизм клиренсі елеулі жекеше өзгергіштікке бейім, оны емделуші әйелдерде ішінара байқалатын левоноргестрел концентрациясындағы елеулі айырмашылықтармен түсіндіруге болады.

Левоноргестрел плазмадағы препараттың тепе-тең концентрациясы жағдайларында орташа T½ мәнімен 24 сағат шығарылады. Левоноргестрел және оның метаболиттері, негізінен, несеппен 60% және 40% нәжіспен шығарылады.

Фармакодинамикасы

Листрэлла препаратының контрацептивтік әсері гонадотропинді бәсеңдету арқылы әртүрлі механизмдердің өзара әрекеттесуіне негізделген, оның негізгі нәтижесі овуляцияның бәсеңдеуі болып табылады, басқа да әсерлері жатыр мойнынан бөлінетін шырыштағы (бұл шәуһеттің жатырға өтуін қиындатады) және эндометрийдегі (бұл имплантация ықтималдығын азайтады) өзгерістерді қамтиды. Ішуге арналған біріктірілген контрацептивтерді пайдалану кезінде дұрыс және тұрақты қабылдағанда жүктілік ықтималдығы жылына 0.1 % құрайды, дегенмен де, ішуге арналған ұрықтануға қарсы дәрілердің барлық типтері үшін әдеттегі қабылдау жағдайларында жүктілік ықтималдығы жылына 5% құрайды. Контрацепция әсері оларды қолдану жағдайларының тиянақты қадағалануына байланысты, егер бір немесе одан көп таблетка қабылдауды өткізіп алса, әдетте, жүкті болу ықтималдығы артады.

Қолданылуы

- ішуге арналған контрацепция

Қолдану тәсілі және дозалары

Таблеткаларды пішінді ұяшықты қаптамасында көрсетілген тәртіпте күн сайын шамамен белгілі бір уақытта қабылдау керек. Қаптамада 21 таблетка бар. Күнделікті 21 күн қатарынан бір таблеткадан қабылдау керек. Әр келесі қаптамадан таблеткаларды, әдетте, тоқтату қан кетуі болатын 7 күндік үзілістен соң бастау керек.

Тоқтату қан кетуі, әдетте, соңғы таблетканы қабылдаудан кейін 2-ші немесе 3-ші күні басталады, ал ол препараттың келесі қаптамасынан таблеткалар қабылдау басталғанша жалғасуы мүмкін.

Таблеткаларды етеккірдің бірінші күні қабылдай бастау керек. Листрэлла таблеткаларын қабылдауды етеккірдің 2-5 күнінен бастауға болады, бірақ бұл жағдайда препаратты бірінші қолдану циклы кезіндегі алғашқы 7 күн ішінде қосымша гормональді емес (бөгеттік) контрацепция әдістерін бір мезгілде пайдалану ұсынылады.

Егер таблеткалар қабылдауды өткізіп алған жағдайда

Егер кезекті таблетка қабылдануы тиіс уақыттан 12 сағаттан аз өтсе, контрацептивтік қорғаныс төмендемейді. Әйел, ол жөнінде еске түсірген бойда, бірден өткізіп алған таблеткасын қабылдауы тиіс, келесі таблетканы әдеттегі уақытта қабылдау керек.

Егер Сіз жүкті екеніңізді білсеңіз немесе күдіктенсеңіз, Листрэлла қабылдауды бастамаңыз және жалғастырмаңыз.

Жағымсыз әсерлері

Өте жиі

- бас ауыру, бас сақинасын қоса, етеккір арасындағы қан кету/қан аралас бөліністер

Жиі (≥1/100-ден <1/10 дейін)

- денеге салмақ қосу

- сұйықтық іркілісі

- бас ауыру, бас сақинасы, күйгелектік, депрессия, ашушаңдық, либидо өзгеруі, көңіл-күйдің құбылуы, депрессияны қоса, қозу, бас айналу

- жанаспалы линзалар таққанда көздің тітіркенуі, көрудің нашарлауы

- жүрек айну, құсу, іштің ауыруы

- безеу бөртпесі

- жүйесіз қынаптық қан кету, ауырсынулы етеккір, аменорея, гипоменорея, сүт бездерінің аурушаңдығы

- вагинит, кандидозды қоса

Жиі емес (≥1/1000-нан <1/100 дейін) және Сирек (≥1/10000-нан <1/1000 дейін)

- сүт безі обыры, бауыр аденомасы, гепатоцеллюлярлы карцинома, жатыр мойнының обыры

- жүйелі қызыл жегі

- қан сарысуындағы липидтер деңгейінің өзгеруі, гипертриглицеридемияны қоса

- хорея

- отосклероз

- артериялық гипертензия, көктамырлық тромбоэмболия, артериялық тромбоэмболия

- құсу, холелитиаз, панкреатит, тәбеттің өзгеруі (артуы немесе кемуі), іштің шаншуы, іштің кебуі

- түйінді эритема, мультиформалы эритема, хлоазма

- қынаптық секреттің өзгеруі

- ұзақ уақыт жалғасуы мүмкін хлоазма/меланодермия

Сирек

- анафилактикалық/анафилактоидтық реакциялар, есекжемнің сирек жағдайларын қоса, ангионевроздық ісіну, респираторлық симптомдармен және қан айналымының симптомдарымен болатын ауыр реакциялар

- глюкозаға төзімділіктің бұзылуы

- жанаспалы линзалардың жақпауы

- холестаздық сарғаю, түйінді эритема, қызыл және ауырсынулы теріастылық түйіндер

- сарысудағы фолаттар деңгейінің төмендеуі

Өте сирек

- гепатожасушалық карцинома

- жүйелі қызыл жегінің өршуі

- порфирияның өршуі, хореяның өршуі

- көру жүйкесінің невриті ішінара немесе толық көрмей қалуға әкелуі мүмкін, көз көктамырларының тромбозы

- көктамырлардың варикозды кеңеюінің нашарлауы

- панкреатит, ишемиялық колит, өт жолдарының бұзылыстары, өт-тас ауруын қоса

- мультиформалы эритема

- гемолитикалық уремиялық синдром

жиілігі белгісіз

- ішектің қабыну аурулары (Крон ауруы, ойық жаралы колит), гепатожасушалық бұзылулар

БІК пайдаланатын әйелдерде келесі күрделі жағымсыз құбылыстар тіркелген:

­ артериялық және көктамырлық тромбоздар, миокард инфарктісін қоса, инсульт, өтпелі ишемиялық шабуыл, аяқтардағы терең көктамырлардың және кіші жамбас көктамырларының тромбозы, сондай-ақ өкпе артериясының эмболиясы

­ интраэпителиальді цервикальді дисплазия, жатыр мойнының обыры

­ бауыр ісіктері

­ тері және теріасты тіндері тарапынан болатын бұзылулар: хлоазма, түйінді эритема

­ БІК пайдаланушылар арасында сүт безі обырының анықталу жиілігі болымсыз жоғарылаған. Сүт безі обырының 40 жасқа дейінгі әйелдерде сирек кездесуіне байланысты, ондай жағдайлардың қосымша саны сүт безі обырына шалдығудың жалпы қаупіне қарағанда аз. БІК қолданудың себеп-салдарлы байланысы белгісіз.

Қолдануға болмайтын жағдайлар

- қауіп факторларымен біріккен немесе оларсыз көктамырлық тромбоэмболия немесе оның сыртартқыда болуы (мысалы, терең көктамырлар тромбозы, өкпе артериясының тромбоэмболиясы)

­ артериялық тромбоэмболия немесе оның сыртартқыда болуы, атап айтқанда, миокард инфарктісі және ми қан айналымының бұзылуы

­ көктамырлық немесе артериялық тромбоздың күрделі немесе көптеген қауіп факторларының болуы

­ сыртартқыда тромбоз хабаршыларының болуы (мысалы, ми қан айналымының өтпелі бұзылуы немесе стенокардия)

­ жүрек-қантамыр аурулары (мысалы, жүрек аурулары, жүрек клапандары және аритмиялар)

­ ауыр артериялық гипертензия

­ микро- немесе макроангиопатия көріністерімен қант диабеті

­ шығу тегі тамырлық көрудің нашарлауы

­ диагностикаланған немесе күдік тудыратын сүт безінің немесе жыныс мүшелерінің гормонға тәуелді қатерлі ісіктер

­ бауырдың күрделі аурулары немесе оның сыртартқыда болуы (функционалдық «бауыр» тестілері көрсеткіштері қалпына түскенше)

­ бауыр ісіктері немесе оның сыртартқыда болуы (қатерсіз немесе қатерлі), панкреатит (немесе оның сыртартқыда болуы)

­ шығу тегі белгісіз қынаптық қан кетулер

­ ошақтық неврологиялық симптоматикасымен бас сақинасы

­ белсенді затқа немесе қосымша заттардың кез келгеніне жоғары сезімталдық

- жүктілік және лактация кезеңі

- галактозаны көтере алмаушылық, лактаза жеткіліксіздігі немесе глюкоза және галактоза мальабсорбциясы синдромы

Дәрілермен өзара әрекеттесуі

Қан сарысуында этинилэстрадиол концентрациясының азаюы құйылған қан кетудің туындау жиілігінің артуына және етеккірдің бұзылуына, сондай-ақ ішуге арналған біріктірілген контрацептив тиімділігінің төмендеуіне әкелуі мүмкін. Олардың әсер ету механизмі аталған заттардың «бауыр» ферменттерінің белсенділігін арттыру қабілетіне негізделуі ықтимал. Ферменттердің ең жоғары индукциясы, әдетте, осы препараттарды қабылдай бастағаннан кейін 2-3 апта өткен соң барып байқалады, бірақ оларды тоқтатқаннан кейін кемінде 4 апта бойы сақталуы мүмкін.

Этинилэстрадиол мен оның өнімдері қан сарысуындағы этинилэстрадиол концентрациясын азайтуы мүмкін заттармен біріккен жағдайда Листрэлланы жүйелі қабылдауға қосымша жүктіліктен сақтанудың гормональді емес әдістерін (мысалы, мүшеқаптар және спермицидтер) қолдану ұсынылады. Осы заттарды ұзақ қолдану қажет болған жағдайда контрацепцияның негізгі әдісі ретінде ішуге арналған біріктірілген контрацептив пайдаланудан бас тарту мүмкіндігін қарастыру керек. Қан сарысуындағы этинилэстрадиол концентрациясын азайтуы мүмкін заттар қабылдауды тоқтатқан соң жүктіліктен сақтанудың гормональді емес әдісін, кем дегенде, 7 күн бойы қолдану ұсынылады.

Бауырдың микросомалық ферменттерінің индукциясына алып келетін заттар қабылдауды тоқтатқаннан кейін ұзақ уақыт баламалы әдісті қолдану ұсынылады, бұл қан сарысуындағы этинилэстрадиол концентрациясының азаюына апарады. Индукцияланатын заттың дозасына, қабылдау ұзақтығына және элиминация жылдамдығына қарай кейде ферменттер индукциясын толық тоқтатуға бірнеше апта керек.

Төменде қан сарысуындағы этинилэстрадиол концентрациясын азайтуы мүмкін заттардың мысалдары берілген:

  • Асқазан-ішек жолының бойымен тағамның тасымалдану, тиісінше, этинилэстрадиолдың сіңірілу уақытын азайтатын кез келген зат.

  • Рифампицин, рифабутин, барбитураттар, примидон, фенилбутазон, фенитоин, дексаметазон, гризеофульвин, топирамат, кейбір протеаза тежегіштері, модафинил сияқты бауырдың микросомалық ферменттерінің индукциясына алып келетін заттар

Этинилэстрадиол басқа да дәрілік заттардың - бауырдың микросомалық ферменттерін тежегіштердің немесе препараттың бауырда конъюгациялануын, әсіресе, глюкурондануын индукциялайтын заттардың алмасуын кедергілеуі мүмкін. Тиісінше, олардың плазмадағы және тіндердегі концентрациясы артуы мүмкін (мысалы, циклоспорин, теофиллин, кортикостероидтар)

Hypericum perforatum, құрамында Шілтерленген шайқурай бар өсімдік тектес дәрілерді Листрэлла препаратымен бір мезгілде қабылдауға болмайды, өйткені бұл контрацептивті әсерінің көп жойылуына әкелуі мүмкін. Осыған орай, құйылған қан кету және қалаусыз жүктілік жағдайлары хабарланды. Бұған препарат метаболизміне қатысатын ферменттердің Hypericum perforatum туындатқан индукциясы себеп болды. Шілтерленген шайқурай қабылдауды тоқтатқаннан кейін индукциялау әсері кемінде 2 апта бойы сақталуы мүмкін.

Кейбір антибиотиктер, контрацептивтік дәрілер тиімсіз болған жағдайлар ампициллин және басқа да пенициллиндер, тетрациклин сияқты антибиотиктерді бір мезгілде қолдану кезінде де анықталды, олардың әсер ету механизмі белгісіз күйде қалады.

Төменде қан сарысуындағы этинилэстрадиол концентрациясын арттыруы мүмкін заттардың мысалдары берілген:

  • Аторвастатин

  • Аскорбин қышқылы (С витамині) және парацетамол (ацетаминофен) сияқты асқазан-ішек жолы қабырғасының сульфатты бәсекелес тежегіштері

  • Индинавир, флуконазол және тролеандомицин сияқты P450 3A4 цитохромының изоферменттерін тежейтін заттар.

Тролеандоминин ішуге арналған біріктірілген контрацептивпен бір мезгілде қабылданған жағдайда бауырішілік холестаздың пайда болу қаупін арттыруы мүмкін.

Басқа дәрілік заттарға БІК әсер етуі

Жыныстық стероидты гормондар қан плазмасында циклоспорин концентрациясын арттырып, бұл уыттану әсерлерінің дамуына әкелуі мүмкін. Бір мезгілде ламотриджин мен БІК қабылдау плазмада ламотриджин концентрациясының төмендеуіне және БІК қолдануды бастаған әйелдерде құрысу ұстамаларын бақылаудың нашарлауына әкелуі мүмкін.

Флунаризин қабылдайтын әйелдерде ішуге арналған біріктірілген контрацептивтер қолданудың галакторея қаупінің жоғарылауына әкелетіні туралы деректер бар.

Ритонавир P450 3A4 цитохромының тежегіші болса да, оны қолданудың қан сарысуындағы этинилэстрадиол концентрациясын азайтатыны туралы деректер бар.

Препараттар арасындағы әлеуетті өзара әрекеттесуді анықтау үшін қатарлас дәрілік препараттардың қосымша бет-парақтарын зерттеу қажет.

Айрықша нұсқаулар

Осы ішуге арналған біріктірілген контрацептивтер қолдану басталғанша жеке және отбасылық сыртартқыны мұқият талдау және қан қысымын өлшеу қамтылатын медициналық тексеруден өту орындалу керек. Сонымен қатар, сүт бездерін, бауырды, аяқ-қолды және жамбас ағзаларын тексеруден өткізу керек. Егер емделушінің өмірінде жыныстық қатынас тұрақты болса немесе сол сияқты басқаша көрсетілімдері болса, жатыр мойнынан жағынды алу керек.

Аталған әрекеттерді ішуге арналған біріктірілген контрацептивтер қолдану кезеңі бойына, кем дегенде, жыл сайын қайталау керек.

Алғашқы қайта тексеруді ішуге арналған біріктірілген контрацептивтер тағайындаудан кейін үш ай өткен соң жүргізген жөн. Әрбір жыл сайынғы қабылдау кезіндегі тексеруде, жоғарыда сипатталғандай, алғашқы қабылдау кезінде өткізілген емшаралар қамтылуы тиіс.

Емделуші әйелдер ішуге арналған контрацептивтердің АИТВ жұқпасын (ЖИТС) және басқа да жыныс жолымен берілетін жұқпаларды (ЖЖБЖ) жұқтырудан қорғамайтыны туралынан хабардар болуы тиіс.

Назар аударыңыз

Ішуге арналған біріктірілген контрацептивтер қабылдаумен бірге шылым шегу күрделі жүрек-қантамырлық жағымсыз әсерлердің даму қаупін арттырады. Аталған қауіп жас ұлғаюымен артады және тартқан темекілер санына байланысты болады, артық тұтынғанда (эпидемиологиялық зерттеулер нәтижелері бойынша күніне 15 немесе одан көп темекі тарту қауіптің едәуір жоғарылауымен байланысты) және 35 жастан асқан әйелдерде ерекше жоғары. Ішуге арналған біріктірілген контрацептивтер қабылдайтын әйелдерге табанды түрде шылым шекпеуге кеңес беріледі. Шылым шегетін 35 жастан асқан әйелдерге қатысты басқа контрацепция әдістерін тағайындау мүмкіндігін қарастыру керек.

Төменде аталған қандай да бір жағдай/қауіп факторы анықталғанда ішуге арналған біріктірілген контрацептивтер қолданудың «пайда/қауіп» арақатынасы әрбір нақты жағдайда таразылануы тиіс. Жасалған талдаудың нәтижелерін БІК қабылдау басталғанша емделуші әйелмен талқылау қажет. Осы жағдайлардың немесе қауіп факторларының ағымы өршіген немесе кез келгені алғаш білінген жағдайда әйелге емдеуші дәрігермен хабарласу ұсынылады. Осыдан кейін емдеуші дәрігер БІК пайдалануды жалғастыру немесе тоқтату шешімін қабылдауы тиіс.

Қан айналымының бұзылуы

Кез келген БІК пайдалану, БІК пайдаланбайтын әйелдердегі осы көрсеткішпен салыстырғанда, көктамыр тромбоэмболиясының (КТЭ) жоғары даму қаупімен байланысты. Қолда бар деректер бойынша, БІК пайдаланбайтын әйелдер арасындағы КТЭ жиілігі 100000 емделуші-жылына 5-10 адамнан келеді. КТЭ қаупінің жоғарылауы БІК қолданған алғашқы жылдың ішінде ең көп мәнге ие болады. Қауіптің осылай жоғарылауы 100000 жүктілікке 60 жағдайдан бағаланатын жүктілікпен байланысты КТЭ қаупіне қарағанда азырақ. КТЭ 1-2% жағдайда өліммен аяқталады. Жалпы, құрамында левоноргестрел мен 50 мкг-ден аз этинилэстрадиол бар ішуге арналған біріктірілген контрацептивтер қолдану аясында КТЭ абсолютті қаупі (ауруға шалдығу) препаратты қолданғанда 100000 емделуші-жылына шамамен 20 жағдайдан келеді.

Ішуге арналған контрацептивтер қабылдайтын әйелдерде басқа қан тамырларының, соның ішінде бауыр көктамырлары мен артерияларының, ішек шажырқайының, бүйрек пен көз торлы қабығының тромбозы өте сирек кездеседі. Осы жағдайлардың БІК пайдаланумен байланысты екені туралы ортақ пікір жоқ.

Мына жағдайларда көктамыр тромбоэмболиясының даму қаупі артады:

­ жас ұлғаюымен

­ ауырлаған отбасылық сыртартқы жағдайында (мысалы, туған аға-інілер, апа-сіңлілер немесе ата-аналардың салыстырмалы жас кездеріндегі көктамыр тромбоэмболиясы). Тұқым қуалайтын бейімділік күдік тудырғанда, ішуге арналған контрацептивтер пайдалану мүмкіндігінің мәселесі шешілгенше емделуші әйелді маманға жолдаған жөн

­ семіздікте (дене салмағының индексі 30 кг/м² астам)

- хирургиялық операция немесе тромбоз қаупін арттыратын жарақат

- таяудағы босанулар немесе жүктіліктің екінші триместріндегі жасанды түсік

- ұзаққа созылған иммобилизация жағдайында (үлкен операциялардан, аяққа жасалған хирургиялық араласулардан немесе ауқымды жарақаттан кейін). Мұндай жағдайларда ішуге арналған контрацептивтер қабылдауды тоқтату ұсынылады (жоспарлы операция жағдайында оның өткізілуінен кемінде 4 апта бұрын). Қозғалыс белсенділігі толық қалпына келгеннен кейін 2 апта өткен соң барып олардың қолданылуын жаңғыртуға болады.

Көктамырлық тромбоэмболия патогенезіндегі көктамырлардың варикозды кеңеюінің және беткейлік көктамырлар тромбофлебитінің болжамды рөліне қатысты ортақ пікір жоқ.

Босанудан кейінгі кезеңде тромбоэмболия қаупінің жоғары екенін ескеру керек.

БІК пайдалану жалпы жедел миокард инфарктісінің (ЖМИ) және ми қан айналымының жедел бұзылуының жоғары даму қаупімен байланысты болды, бұл басқа да, мысалы, шылым шегу, артериялық қысымның көтерілуі және жас шамасы сияқты қауіп факторларының болуына едәуір дәрежеде байланысты (жоғарыдан қараңыз). Осындай асқынулар сирек дамиды. Листрэлла препаратын қабылдаудың ЖМИ даму қаупіне әсері зерттелмеген.

Мына жағдайларда артериялық тромбоэмболияның даму қаупі артады:

- жас ұлғаюымен

­ шылым шегушілерде (тартылған темекілер санының көбеюімен және жас ұлғаюымен, әсіресе, 35 жастан асқан әйелдерде қауіптің әріқарай жоғарылауы байқалады)

­ дислипопротеинемия жағдайында

- семіздікте (дене салмағы индексі 30 кг/м²-ден астам)

- артериялық гипертензия жағдайында

- жүрек клапандарының ауруларында

- жыпылықтағыш аритмияда

- отбасылық сыртартқы болғанда (мысалы, туған аға-інілер, апа-сіңлілер немесе ата-аналардың салыстырмалы жас кездеріндегі артериялық тромбоз). Егер тұқым қуалайтын бейімділік күдік тудырса, кез келген гормональді контрацептивтік дәрілер тағайындау шешімі қабылданғанша емделуші әйелді маманмен кеңесуге жолдаған жөн.

Көктамыр немесе артериялық тромбоз симптомдары қамтуы мүмкін:

­ аяқтың біржақты ауруы және/немесе оның ісінуі

­ сол жақ қолға иррадиацияланатын немесе иррадиациясыз кеуденің кенеттен қатты ауыруы

­ ентігудің кенеттен білінуі

­ жөтелдің кенеттен білінуі

­ кез келген әдеттен тыс қатты және ұзаққа созылатын бас ауыру

­ кенеттен ішінара немесе толық көрмей қалу

­ диплопия

­ түсініксіз сөйлеу немесе афазия

­ бас айналу

­ парциальді құрысу ұстамасымен немесе онсыз құлап қалу

­ дененің бір жағында немесе бір бөлігінде кенеттен пайда болатын әлсіздік немесе сезімталдықты елеулі жоғалту

­ қозғалыс бұзылулары

­ іштеспе синдромы.

Босанудан кейінгі кезеңде көктамыр тромбоэмболиясының жоғары даму қаупін ескеру керек.

Қан айналымының бұзылуымен байланысты басқа ауруларға қант диабеті, жүйелі қызыл жегі, гемолитикалық-уремиялық синдром, ішектің созылмалы қабыну аурулары (мысалы, Крон ауруы немесе ойық жаралы колит) және орақша - жасушалы анемия жатады.

Ішуге арналған контрацептивтер қолдану кезінде бас сақинасы ұстамаларының жиілігі мен ауырлығы жоғарылаған жағдайда (бұл ми қан айналымы бұзылуының аса ауыр түрлерінің даму хабаршысы болуы мүмкін, инсульт қаупі артады) оларды дереу тоқтату мүмкіндігін қарастыру қажет.

Көктамырлық немесе артериялық тромбозға тұқым қуалайтын немесе жүре пайда болған бейімділікті айғақтайтын биохимиялық параметрлерге белсенділенген С протеиніне (БСП) төзімділік, Лейден V фактор мутациясы, гипергомоцистеинемия, антитромбин III тапшылығы, С протеині тапшылығы, S протеині тапшылығы, антифосфолипидті антиденелердің болуы (кардиолипинге антиденелер, жегілік антикоагулянт) және дислипопротеинемия жатады.

Ісіктер

Жатыр мойны обыры

Кейбір эпидемиологиялық зерттеулерде ұзақ уақыт БІК қабылдаған әйелдерде жатыр мойны обырының жоғары даму қаупі анықталды. Бұдан басқа, осы көрсеткіштің сексуалдық мінез-құлыққа және адам папилломасы вирусы (АПВ) сияқты басқа факторларға қандай дәрежеде байланысты екені әлі анықталмаған. Қалыптан тыс генитальді қан кету жағдайында тиісті диагностика құралдарын қолдану қажет.

Сүт безінің обыры

Сүт безі обырын дамытатын қауіптің анықталған факторларына жас шамасы, семіздік, генетикалық бейімділік, бала тууға қабілетсіздік және кешеуілді алғашқы жүктілік жатады. 54 эпидемиологиялық зерттеулердің мета-талдауында сүт безі обыры дамуының салыстырмалы қаупі (СҚ = 1.24) ішуге арналған біріктірілген контрацептивтер қолданатын әйелдерде, оларды пайдаланбайтын әйелдермен салыстырғанда, аздап жоғары болып шықты. Жоғары қауіп ішуге арналған біріктірілген контрацептивтер қолданудан кейінгі 10 жыл ішінде біртіндеп жоғалады. Аталған зерттеулерде себеп-салдарлы байланыс бары дәлелденбейді. Сүт безі обырын дамытатын қауіптің байқалған жоғарылауын ішуге арналған біріктірілген контрацептивтер қолданған әйелдерде сүт безі обырының ертерек анықталуымен (олардың медициналық тексеруден жиірек өтуіне орай), осы типтегі контрацептивтердің биологиялық әсер етуімен немесе жоғарыда аталған екі фактордың бірігуімен түсіндіруге болады. Сүт безінің обыры 40 жасқа дейінгі әйелдерде сирек кездесетіндіктен ішуге арналған біріктірілген контрацептивтер қолданатын әйелдерде сүт безі обыры жағдайларының саны жағынан көбеюі, сүт безі обырының өмір бойы даму қаупімен салыстырғанда, аз болып шықты. Ішуге арналған біріктірілген контрацептивтер қолданатын әйелдердегі сүт безінің обыры, әдетте, осы контрацептивтерді ешқашан қолданбаған әйелдермен салыстырғанда, клиникалық тұрғыда аз таралған.

Бауыр неоплазиясыауыр аурулары

БІК пайдаланған әйелдерде бауырдың қатерсіз және қатерлі ісіктері тіркелген. Жекелеген жағдайларда бұл ісіктер өмірге қатерлі құрсақ ішіндегі қан кетулерге алып келді. БІК пайдаланатын әйелдерде гепатомегалиямен немесе құрсақішілік қан кету белгілерімен іштің жоғарғы бөлігіндегі қатты ауыру жағдайларында бауыр ісігіне дифференциялық диагностика жасалуы тиіс.

Өте сирек жағдайларда бауыр аденомасына және аса сирек жағдайларда гепатожасушалық карциномаға шалдығу ішуге арналған біріктірілген контрацептив қолданумен байланысты болуы мүмкін. Сірә, қауіп ішуге арналған біріктірілген контрацептивтер қолдану ұзақтығының артуымен жоғарылайды. Бауыр аденомасының жоғарылауы құрсақішілік қан кету нәтижесінде өлімге әкелуі мүмкін. Ішуге арналған біріктірілген контрацептивтер қолдану салдарынан бұрын холестаздан зардап шеккен және жүктілік кезеңінде холестаз дамыған әйелдерде ішуге арналған біріктірілген контрацептивтер қабылдаған жағдайда холестазбен зардап шегу ықтималдығы зор. Ішуге арналған біріктірілген контрацептив қабылдайтын емделушілерді мұқият қадағалау керек және холестаз пайда болған жағдайда оны қабылдауды тоқтату керек.

Ішуге арналған біріктірілген контрацептивтер қолдану бауыр-жасушалық бұзылулар дамуымен байланыстырылады. Ішуге арналған біріктірілген контрацептивтер қабылдаумен байланысты ондай бұзылуларды ерте анықтау осы препараттарды қабылдауды тоқтатқан жағдайда бауырға уытты әсер ету ауырлығын азайта алады. Бауыр-жасушалық бұзылулар анықталған жағдайда емделуші ішуге арналған біріктірілген контрацептив қолдануды тоқтатып, жүктіліктен сақтанудың гормональді емес әдістеріне көшуі және дәрігермен кеңесуі тиіс.

Бауыр функциясының жедел және созылмалы бұзылулары қалыпты бауыр функциясы қалпына келгенше ішуге арналған біріктірілген контрацептивтер қабылдауды тоқтату қажеттілігін туындатуы мүмкін.

Басқа да жағдайлар

Гиперлипидемияға шалдыққан әйелдер, олар БІК қабылдау шешімін қабылдаған жағдайда, мұқият медициналық бақылауда болуы тиіс. Бақыланбайтын дислипидемиядан зардап шегетін емделушілер үшін жүктіліктен сақтанудың гормональді емес әдістерін қарастыру керек. Ішуге арналған біріктірілген контрацептивтер қабылдайтын емделушілердің шағын пайызынан тұрақты гипертриглицеридемияны бaйқауға болады. Ішуге арналған біріктірілген контрацептивтер қабылдайтын және отбасылық сыртартқысы ауырлаған емделушілерде қан сарысуында триглицеридтер деңгейін жоғарылататын БІК қолдану панкреатиттің даму қаупінің артуына әкелуі мүмкін.

Эстрогендер қабылдағанда қан сарысуындағы тығыздығы жоғары липопротеиндер (ТЖЛ) холестерині деңгейінің жоғарылауы, ал прогестиндер қабылдағанда оның төмендеуі білінеді. Кейбір прогестиндер тығыздығы төмен липопротеиндер (ТТЛ) деңгейін арттырып, гиперлипидемияның бақылануын қиындатуы мүмкін. Ішуге арналған біріктірілген контрацептивтер қабылдаудың түпкілікті әсерлері эстроген мен прогестаген дозалары арасындағы теңгерімге және контрацептивте пайдаланылатын прогестагендердің тектестігі мен жалпы санына байланысты. Ішуге арналған біріктірілген контрацептивті таңдағанда екі гормонның да дозасын ескеру керек.

Жедел немесе созылмалы бауыр жеткіліксіздігі жағдайында Листрэлла препаратын қолдану, бауыр сынамасының көрсеткіштері қалыпты мәндер шектеріне оралғанша тоқтатылуы тиіс. Бауыр функциясы бұзылған науқастарда стероидты гормондар алмасу баяулауы мүмкін.

БІК пайдаланған көп әйелдерде артериялық қысымның аздап көтерілуінің тіркелуімен қатар, АҚ клиникалық мәнді жоғарылауы сирек байқалады. Егер БІК қабылдау кезінде тұрақты және айқын артериялық гипертензиясы дамыса, контрацептив қабылдауды тоқтату және артериялық гипертензияны емдеуді бастау керек. Қажет болған жағдайда, егер гипотензиялық ем нәтижесінде қалыпты АҚ мәндеріне жеткізілсе, БІК қолдануды жаңғыртуға болады.

Мына жағдайлардың жүктілік кезінде де, БІК қабылдау кезінде де пайда болуы немесе өршуі мүмкін екені хабарланған: холестазбен байланысты сарғаю және/немесе қышыну; өт қалтасында тастардың түзілуі; порфирия; жүйелі қызыл жегі; гемолитикалық-уремиялық синдром; Сиденгам хореясы; жүктілер герпесі; отосклероз салдарынан естімей қалу. Алайда, себеп-салдарлы байланыс бар екені дәлелденбеген.

БІК шеткергі инсулинге төзімділікке және глюкозаға төзімділікке ықпал етуі мүмкін. Осыған орай, қант диабетінен зардап шегетін емделуші әйелдер БІК қабылдау кезеңі бойына мұқият бақылануы тиіс.

Левопирл құрамында лактоза моногидраты бар. Сирек тұқым қуалайтын галактозаны көтере алмаушылық аурулары, Лапп лактаза тапшылығы және глюкоза-галактоза мальабсорбциясы бар әйелдерге осы дәрілік препаратты қабылдауға болмайды.

Листрэлла құрамында сахароза бар. Сирек тұқым қуалайтын фруктозаны көтере алмаушылық аурулары, глюкоза-галактоза мальабсорбциясы және сахароза-изомальтаза жеткіліксіздігі бар әйелдер бұл препаратты қабылдамауы тиіс.

Ішуге арналған біріктірілген контрацептивтер қабылдау мен Крон ауруы/ойық жаралы колит ауруының арасында байланыс бары хабарланған.

Көздің зақымданулары

Ішуге арналған біріктірілген контрацептивтер қолдану нәтижесінде торқабық көктамыр тромбозының жағдайлары болады, бұл ішінара немесе толық көрмей қалуға әкелуі мүмкін. Көру нашарлаған, проптоз немесе көздегі қосарлану, көру жүйкесінің ісінуі немесе торқабық тамырларының зақымдануы дамыған белгілер мен симптомдар білінген жағдайда ішуге арналған біріктірілген контрацептивтер қабылдауды тоқтатып, бұзылулар себебін дереу анықтау қажет.

Әсіресе, сыртартқысында жүктілер хлоазмасы болған әйелдерде хлоазма дамуы мүмкін. Хлоазманың дамуына бейімділігі бар әйелдер БІК қабылдау кезінде күн астында болудан және ультракүлгінді сәулеге шалдығудан аулақ болу керек.

БІК қабылдау кезінде ауыр депрессия дамыған әйелдерге препарат қабылдауды тоқтату керек. Препарат қабылдау мен осы симптомдардың дамуы арасындағы байланыстың бар-жоғын анықтау үшін емделушіге баламалы контрацепция әдісі ұсынылуы тиіс. Бұрын ауыр депрессия көріністерінен зардап шеккен әйелдер мұқият қадағалауда болып, депрессиялық жағдай симптомдары жаңғырған жағдайда БІК пайдалануды тоқтатуы тиіс.

Тиімділіктің төмендеуі

Таблеткалар қабылдауды өткізіп алу, құсу/диарея және өзге дәрілік заттарды бір мезгілде қабылдау жағдайында ішуге арналған контрацептивтер тиімділігі төмендеуі мүмкін.

Етеккір оралымының бұзылуы

Барлық ішуге арналған біріктірілген контрацептивтерді қабылдау кезінде, әсіресе, осы дәрілерді пайдаланған алғашқы айдың ішінде жүйесіз қан кетулерді (қан аралас бөліністер немесе құйылған қан кетулер) байқауға болады. Осылайша, кез келген жүйесіз қан кетулерге клиникалық бағалау препаратқа дағдылану кезеңінен кейін шамамен 3 етеккір оралымы бойына жүргізілуі тиіс.

Егер жүйесіз қан кету алдыңғы жүйелі оралымдардан соң пайда болса, осы жай-күйдің гормональді емес себептерін қарастырып, қатерлі үдеріс немесе жүктіліктің бар-жоғын анықтау мақсатында тиісті тексеруден өткізу қажет. Егер бұл құбылыстар жоққа шығарылса, ішуге арналған біріктірілген контрацептивтер қолдануды жалғастырып немесе басқа препаратқа ауысып, кінәратты ықтималды түрде жоюға болады.

Кейбір әйелдерде препаратты қабылдағаннан кейін, әсіресе, осындай құбылыстар бұрын болса, аменорея (овуляцияның болмауына ұласуы ықтимал) немесе олигоменорея байқалуы мүмкін.

Кейде «тоқтату қан кетуі» препарат қабылдаудағы үзіліс кезінде мүлде байқалмауы мүмкін. Егер таблеткалар нұсқаулықтарға сәйкес дәл қабылданса, жүкті болу ықтималдығы аз. Сонымен бірге, егер препарат қабылдаудағы алғашқы үзіліске дейін қолдану жөніндегі нұсқаулықтар қадағаланбаса және егер «тоқтату қан кетуі» болмаған немесе екі «тоқтату қан кетуі» қатарынан болмаған болса, БІК қолдануды жалғастыруға дейін жүктіліктің бар-жоғын анықтау қажет.

Зертханалық зерттеулер

Контрацептивтік стероидты гормондарды қабылдау бауыр функциясының, қалқанша бездің, бүйрек үсті бездері мен бүйректің биохимиялық көрсеткіштерін, плазманың тасымалдағыш ақуыздарының концентрациясын (мысалы, кортикостероид-байланыстырушы глобулин, липидтік/липопротеиндік фракциялар), көмірсу алмасу көрсеткіштерін, коагуляция мен фибринолизді қамтитын кейбір зертханалық тестілердің нәтижелеріне ықпал етуі мүмкін. Байқалатын өзгерістер, әдетте, референсті мәндер шегінде қалады.

Осы дәрілік зат жүктілік кезінде ұрықтың дамуы ақауларының білінуіне әкеледі.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Листрэлла препараты автокөлік басқару және қозғалмалы механизмдермен жұмыс істеу қабілетіне ықпал етпейді немесе елеусіз ықпал етеді.

Артық дозалануы

Симптомдары: ішуге арналған ұрықтануға қарсы дәрілік заттармен артық дозалану симптомдары жүрек айнуын, құсу, сүт бездерінің аурушаңдығын, бас айналуын, іштің ауыруын, ұйқышылдық/шаршауды қамтуы мүмкін; қан кету кідірісі болуы мүмкін.

Емі: арнайы у қайтарғысы қарастырылмаған. Симптоматикалық ем.

Шығарылу түрі және қаптамасы

Алюминий фольгадан және поливинилхлоридті үлбірден жасалған пішінді ұяшықты қаптамада 21 таблеткадан.

Пішінді 1 қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салады.

Сақтау шарттары

25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

Sun Pharmaceutical Industries Ltd.

Өндірістің орналасқан мекенжайы:

Halol-Baroda Highway, Halol-389 350, Gujarat, Үндістан

Тіркеу куәлігі иесінің атауы және елі

Sun Pharmaceutical Industries Ltd., Үндістан

Қаптаушы-ұйымның атауы мен елі

Sun Pharmaceutical Industries Ltd., Үндістан

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын ұйымның мекенжайы:

050004, Алматы қ., Төлебаев к-сі, 38, 5 қабат

Тел. (727) 250-92-35, факс (727) 250-33-64

regulatory.kz@sunpharma.com

Прикрепленные файлы

157595771477976398_ru.doc 128 кб
175875221477977601_kz.doc 168.5 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники