Липофундин МСТ/ЛСТ 20%
Инструкция
-
русский
-
қазақша
Саудалық атауы
Липофундин МСТ/ЛСТ 20%
Халықаралық патенттелмеген атауы
Жоқ
Дәрілік түрі
Көктамырішілік инфузияға арналған 20% эмульсия
Құрамы
1000 мл эмульсияның құрамында
белсенді заттар:
соя бұршағының майы 100,0 г
орташа тізбекті триглицеридтер 100,0 г
қосымша заттар: глицерин, жұмыртқа лецитині, натрий олеаты,
ά-токоферол, инъекцияға арналған су.
Алмастырылмайтын май қышқылдарының мөлшері:
Линол қышқылы 48,0-58,0 г/л
a-линолен қышқылы 5,0-11,0 г/л
Жалпы калориялылығы 7990 кДж/л (=1908 ккал/л)
Теориялық осмолярлылығы 380 мОсм/л
Қышқылдылығы немесе сілтілілігі, 7,4 рНқа титрация < 0,5 ммоль/л
рН 6,5-8,5
Сипаттамасы
Қабаттардың көзге көрінбейтін кезеңдік бөлінуімен, сүт сияқты ақ түсті судағы май типті эмульсия.
Фармакотерапиялық тобы
Плазманың орнын басатын және перфузиялық ерітінділер. К/і енгізуге арналған ерітінділер. Парентеральді қоректенуге арналған препараттар. Май эмульсиялары.
АТХ коды В05ВА02
Фармакологиялық қасиеттері
Фармакокинетикасы
Сіңуі
Биосіңімділігі: Липофундин МСТ/ЛСТ 20% көктамыр ішіне енгізілуіне байланысты препарат компоненттерінің биосіңімділігі 100% құрайды.
Қан сарысуындағы триглицеридтердің ең жоғары концентрациясын анықтауда – дозалау, инфузия жылдамдығы, метаболизмдік статус және емделушіге қатысты (ашығу дәрежесі) жеке факторлар бірінші кезекті мәнге ие. Әдетте нұсқаулыққа сай енгізгенде және триглицеридтердің концентрациясын дозалау жөнінде нұсқауларды сақтағанда 4 ммоль/л-ден аспайды.
Таралуы
Орташа тізбекті май қышқылдарының альбуминмен байланысу дәрежесі ұзын тізбекті май қышқылдарының байланысу дәрежесіне қарағанда төмен; сонда да, дозалау жөніндегі нұсқауға сай енгізгенде май қышқылдарының екі түрі де плазма альбуминімен толық дерлік байланысады. Сондықтан дозалау жөніндегі нұсқауларды орындаған жағдайда, орташа тізбекті май қышқылдары да, ұзын тізбекті май қышқылдары да гематоэнцефалдық бөгет арқылы өтпейді және жұлын сұйықтығына өтпейді.
Қазіргі таңда плацентарлық бөгет арқылы ауысуы немесе емшек сүтіне өтуі жөнінде қандай да бір ақпарат жоқ.
Метаболизмі
Инфузиядан кейін триглицеридтер энергия өндіру мақсатындағы физиологиялық реакцияларға, биологиялық белсенді молекулалар синтезіне, глюконеогенез бен липидтердің қайта синтезіне қатысатын глицеринге және май қышқылдарына гидролизденеді.
Шығарылуы
Липофундин МСТ/ЛСТ 20% препаратының плазмадан жартылай шығарылу кезеңі 9 минутқа жуықты құрайды.
Триглицеридтердің немесе бос май қышқылдарының бүйректік шығарылуы болмайды, одан да басқа бұның Липофундин МСТ/ЛСТ 20% нутритивті әсер ету себебіне байланысты болмағаны жөн.
Табиғи қоректік заттар енгізілетіндіктен, препаратты енгізген кезде жеделдетілген диурез немесе гемодиализ есебінен қарқынды шығарылуды қажет ететін улану болады деп күтпеген жөн.
Фармакодинамикасы
Липофундин МСТ/ЛСТ 20% препараты парентеральді қоректендірудің бір бөлігі ретінде, энергиямен және көп қанықпаған («алмастырылмайтын») май қышқылдарымен қамтамасыз етуге арналған. Осы мақсатта Липофундин МСТ/ЛСТ 20% препаратында орташа тізбекті триглицеридтер, ұзын тізбекті триглицеридтер (соя бұршағының майы), фосфатидтер (жұмыртқа лецитині) және глицерин бар.
Орташа тізбекті триглицеридтер ұзын тізбекті триглицеридтерге қарағанда жылдамырақ гидролизденеді, қан айналымынан жылдамырақ шығарылып, түгел тотығады. Сондықтан олар, әсіресе мысалы липопротеиндер липазасының тапшылығы, липопротеин липазасы кофакторларының тапшылығы, карнитин тапшылығы және тасымалдаудың карнитинге тәуелді жүйесінің бұзылуы жағдайы сияқты ұзын тізбекті триглицеридтердің пайдаланылуы және/немесе ыдырауы бұзылғанда қуаттың өте маңызды субстраттары болып табылады.
Қанықпаған май қышқылын жеткізу үшін тек ұзын тізбекті триглицеридтер ғана жауап береді, сондықтан оларды препарат құрамына бірінші кезекте алмастырылмайтын май қышқылдарының тапшылығын емдеу және оның алдын алу үшін, және тек екінші кезекте ғана қуат көзі ретінде енгізеді.
Фосфатидтер, өзінің триглицеридтер эмульгаторы қызметіне қоса, жасушалық мембрана компоненті болып табылады және олардың сұйық күйде болуын қамтамасыз етеді, сондай-ақ олардың биологиялық қызметін сақтайды.
Қан үшін эмульсияны изотониялық ету мақсатында қосылған глицерин глюкоза мен липидтер метаболизмінде физиологиялық делдал болып табылады: ол энергия өндіру үшін гликолиз арқылы метаболизденеді немесе глюкоза, гликоген және триглицеридтер синтезіне пайдаланылады.
Қауіпсіздігіне жүргізілген фармакологиялық зерттеулерде белгілі бір субстраттар пероральді жолмен қабылданғанда сол күйінде қалатын жоғарыда көрсетілген нутритивті әсерлерден басқа, қандай да бір анық өзара әрекеттесулер байқалмады.
Қолданылуы
- парентеральді қоректендіруді қажет ететін науқастарды алмастырылмайтын май қышқылдарымен қамтамасыз етуге.
Қолдану тәсілі және дозалары
Липофундин МСТ/ЛСТ 20% препараты көктамыр ішіне енгізуге арналған.
Май эмульсиялары амин қышқылының ерітінділерімен және көмірсулармен бір мезгілде енгізілген жағдайларда, Y-пішінді жалғағыш немесе айналып өту коннекторы мүмкіндігінше емделушіге жақынырақ жерге орналасуы тиіс.
Қолданар алдында эмульсияда кезеңдік қабаттардың түзілген-түзілмегенін көзбен тексеріп қарау қажет. Шайқап араластырғаннан кейін ол біркелкі болмаса, сондай-ақ құты бүлінсе, эмульсияны пайдалануға болмайды.
Енгізер алдында эмульсия температурасы бөлме температурасына жеткізілуі тиіс.
Қолданар алдында шайқап араластыру керек!
Құтыны ашқаннан кейін ішіндегі зат дереу пайдаланылуы тиіс!
Эмульсия тек бір рет қолдануға ғана арналған.
Препараттың қалған мөлшерін утилизациялау қажет.
Дозасы
Ең жоғары тәуліктік доза инфузияның жағымдылығын мұқият бақылай отырып, дозаны біртіндеп арттырғаннан кейін ғана енгізілуі мүмкін.
Энергияны қажетсінуге байланысты, келесі дозалар ұсынылады:
Ересектер және мектеп жасындағы балалар:
Тәулігіне дене салмағының әр кг-на шаққанда 1-2 г май, ол тәулігіне дене салмағының әр кг-на шаққанда 5-10 мл мл Липофундин МСТ/ЛСТ 20% препаратына сәйкес келеді.
Жаңа туған нәрестелер:
Тәулігіне дене салмағының әр кг-на шаққанда 2-3 (4 г-ға дейін) г май, ол тәулігіне дене салмағының әр кг-на шаққанда 10-15 (20-ға дейін) мл Липофундин МСТ/ЛСТ 20% препаратына сәйкес келеді.
Триглицеридтерді және майды шығару қабілеті, атап айтқанда шала туған нәрестелерде және дене салмағы төмен жаңа туған нәрестелерде толық шамада емес, сондықтан көрсетілген дозалау шектері бірдей емес, триглицеридтер мен май деңгейлерін ұдайы бақылап отыру қажет.
Сәби шақтағы және мектеп жасына дейінгі балалар:
Тәулігіне дене салмағының әр кг-на шаққанда 1-3 г май, ол тәулігіне дене салмағының әр кг-на шаққанда 5-15 мл мл Липофундин МСТ/ЛСТ 20% препаратына сәйкес келеді.
Инфузия жылдамдығы
Инфузия жылдамдығы барынша төмен болуы тиіс.
Алғашқы 15 минутта инфузия жылдамдығы сағатына дене салмағының әр кг-на шаққанда 0,05 - 0,1 г майдан аспауы тиіс, ол сағатына дене салмағының әр кг-на шаққанда 0,25- 0,5 мл Липофундин МСТ/ЛСТ 20% препаратына сәйкес келеді.
Инфузияның ең жоғары жылдамдығы сағатына дене салмағының әр кг-на шаққанда 0,15 г майдан аспауы тиіс, бұл сағатына дене салмағының әр кг-на шаққанда 0.75 мл Липофундин МСТ/ЛСТ 20% препаратына сәйкес келеді.
Тиісінше, тамшы жылдамдығы минутына дене салмағының әр кг-на шаққанда 0.25 тамшыдан аспауы тиіс.
Бұл дене салмағы 70 кг емделуші үшін Липофундин МСТ/ЛСТ 20% инфузиясының ең жоғары жылдамдығы сағатына 50 мл-ге жуық немесе минутына 18 тамшы болуы тиіс екендігін көрсетеді.
Инфузия жылдамдығы жүдеу емделушілерде және балаларда төмендетілуі тиіс.
Инфузия жылдамдығын таңдауда Липофундин МСТ/ЛСТ 20% препаратының тәуліктік дозасы 24 сағат бойы үздіксіз енгізілуі, бірақ тәулігіне 16 сағаттан кем болмауы тиіс.
Май эмульсиялары шеткергі көктамырлар арқылы енгізуге жарайды және шеткергі көктамырларға толыққанды парентеральді тамақтанудың бір бөлігі ретінде бөлек енгізілуі мүмкін.
Қолдану ұзақтығы
Толық парентеральді қоректендіру аясында Липофундин МСТ/ЛСТ 20% негізінен 1-2 аптаға тағайындалады. Егер майлы эмульсияларды пайдаланумен парентеральді қоректендіру әрі қарай көрсетілімде болса, онда тиісті зертханалық бақылау жүргізген кезде мерзімі бұдан да ұзағырақ уақытқа созылуы мүмкін.
Жағымсыз әсерлері
Төменде жүйелі түрде болып тұратын және Липофундин МСТ/ЛСТ 20% препаратын қолданумен байланысты болуы мүмкін жағымсыз әсерлер берілген.
Препаратты тиісінше қолданған жағдайда олар өте сирек (<1/10.000) болады
-
гиперкоагуляция
-
аллергиялық реакциялар
-
гиперлипемия, гипергликемия, метаболизмдік ацидоз, кетоацидоз
Бұл жағымсыз әсерлердің жиілігі дозаға байланысты және абсолютті немесе салыстырмалы артық дозаланған жағдайларда артуы мүмкін. Препаратты дозаға, мониторингке және алдын ала сақтандыруға қатысты дұрыс пайдаланған жағдайда да осы жағымсыз әсерлердің жиілігі өте төмен (<1/10.000).
-
ұйқышылдық
-
гипертензия немесе гипотензия
-
диспноэ, цианоз
-
жүректің айнуы, құсу
-
бас ауыру, қан кернеу/эритема, дене температурасының жоғарылауы, терлеудің күшеюі, қалтырау
-
төс артының және бел тұсының ауыруы
-
майдың артық жүктемелік синдромы (төменді қараңыз)
Бұл жағымсыз реакциялар туындаған жағдайда, немесе ересектерде қандағы триглицеридтер деңгейінің ұлғаюы 3 ммоль/л-ден астамға және балаларда 1.7 ммоль/л-ден астамға ұлғайған жағдайда Липофундин МСТ/ЛСТ 20% препаратын енгізуді дереу тоқтатқан жөн, немесе қажет болған жағдайда азайтылған дозада жалғастыру керек.
Препарат енгізуді жаңғыртқанда, емделуші мұқият бақылауда болуы тиіс, әсіресе инфузияның бас кезінде; бұл кезде қандағы триглицеридтер деңгейін қысқа уақыт аралығы сайын өлшеп отыру қажет.
Липофундин МСТ/ЛСТ 20% қолдану амин қышқылдарын және глюкозаны қолдануды қоса есептегенде толыққанды парентеральді қоректенудің әрдайым бір бөлігі болуы тиіс. Жүректің айнуы, құсу, тәбеттің жоғалуы және гипергликемия – парентеральді қоректендіру кезіндегі жағдаймен байланысты симптомдар және кейде парентеральді қоректенумен астасуы мүмкін.
Майдың артық жүктемелік синдромы
Триглицеридтерді шығару қабілетінің бұзылуы «майдың артық жүктемелік синдромына» әкеп соғуы мүмкін, бұл артық дозаланудан болуы мүмкін. Метаболизмдік артық жүктеме белгілерінің пайда болу мүмкін екендігін бақылау қажет. Оның себебі генетикалық сипатта (жекелей ерекшеленетін метаболизм) болуы мүмкін, немесе май метаболизмі ағымдағы немесе бұрынғы аурулардан туындауы мүмкін. Бұл синдром сондай-ақ ауыр гипертриглицеридемия кезінде туындауы мүмкін, тіпті ұсынылатын енгізу жылдамдығында да, сондай-ақ емделушінің клиникалық жағдайының кенеттен өзгеруіне байланысты, мысалы, бүйрек қызметі бұзылғанда немесе жұқпасында да туындауы мүмкін.
Майдың артық жүктемелік синдромы гиперлипемиямен, қызбамен, майдың өтіп кетуімен, сарғаюмен немесе сарғаюсыз гепатомегалиямен, спленомегалиямен, анемиямен, лейкопениямен, тромбоцитопениямен, коагуляцияның бұзылуымен, гемолизбен және ретикулоцитозбен, бауыр қызметі көрсеткіштерінің қалыптан ауытқуымен және комамен сипатталады. Әдеттегідей, бұл симптомдар май эмульсияларын енгізуді тоқтатқаннан кейін жойылады.
Майдың артық жүктемелік синдромы белгілері пайда болғанда Липофундин МСТ/ЛСТ 20% препаратын енгізуді дереу тоқтату керек.
Емделуші нұсқаулықта көрсетілмеген басқа жағымсыз әсерлерді байқаған жағдайда емдеуші дәрігерді хабардар етуі қажет.
Қолдануға болмайтын жағдайлар
-
жұмыртқа немесе соя ақуызына, соя бұршақтарының өнімдеріне немесе арахиске, немесе препараттың кез келген басқа белсенді немесе қосымша заттарына асқын сезімталдық
-
ауыр гиперлипемия
-
қан коагуляциясының ауыр бұзылулары
-
бауыр қызметінің ауыр жеткіліксіздігі
-
бауырішілік холестаз
-
жедел тромбоэмболия
-
май эмболиясы
-
өмір үшін маңызды қызметтерге қатер төнетін тұрақсыз гемодинамикалық жағдай (шок және коллапс жағдайы)
-
тұрақсыз метаболизмдік жағдайлар (мысалы, жарақаттанудан кейінгі ауыр жағдайлар, қалпына келмейтін қант диабеті, ауыр сепсис, метаболизмдік ацидоз)
-
миокард инфарктісінің немесе инсульттің жедел кезеңі
-
орнын алмастыратын бүйректік ем болмағандағы бүйрек қызметінің ауыр жеткіліксіздігі (олигурия немесе анурия)
-
су-электролиттік теңгерімнің реттелмеген, мысалы, гипокалиемия және гипотониялық дегидратация сияқты бұзылулары
-
жүрек қызметінің қалпына келмейтін жеткіліксіздігі
-
өкпенің жедел ісінуі
-
гипергидратация
Дәрілермен өзара әрекеттесуі
Липофундин МСТ/ЛСТ 20%, электролиттер немесе басқа да препараттардың концентраттары үшін тасымалдағыш ерітінді ретінде пайдаланылмауы тиіс.
Басқа инфузиялық ерітінділермен бақылаусыз араластырмау керек, өйткені бұл жағдайда ұзақ уақыт аралығында май эмульсиясының талапқа сай тұрақтылығына кепілдік берілуі мүмкін емес.
Парентеральді қоректендіру препараттары үшін біріктіру режимі тек ерітінділердің фармацевтикалық үйлесімділігі бақыланатын болған жағдайда ғана пайдаланылады.
Құрамында спирт бар инъекциялық немесе инфузиялық ерітінділермен ешбір жағдайда араластыруға болмайды.
Гепарин қан ағынына липопротеинлипазаның қысқа мерзімдік босап шығуын туындатады. Бұл басында плазма липолизінің ұлғаюына әкелуі мүмкін, ал содан соң триглицеридтердің клиренсінің қысқа мерзімге азаюына әкелуі мүмкін.
Соя бұршағының майында К1 витаминінің табиғи құрамы бар. Алайда Липофундин МСТ/ЛСТ 20% құрамында ол соншалықты төмен, бұл кумарин дериваттарымен ем алып жүрген емделушілердегі коагуляция үдерісіне елеулі ықпалын тигізе алмайды. Сонда да, бір мезгілде антикоагулянттармен ем алып жүрген емделушілерде коагуляция статусын бақылау қажет.
Айрықша нұсқаулар
Липофундин МСТ/ЛСТ 20% препаратын енгізу кезінде қан сарысуындағы триглицеридтер деңгейін бақылау керек. Инфузияны бастар алдында май метаболизмінің бұзылғанына күдікті емделушілерде триглицеридтердің сарысудағы концентрациясы ересектерде 3 ммоль/л-ден астам және балаларда 1.7 ммоль/л-ден астам болғанда ашқарында липемияның бар-жоқтығы анықталуы тиіс.
Липидтерді енгізгеннен кейін 12 сағаттан соң гипертриглицеридемия да май метаболизмінің бұзылғанын көрсетеді.
Емделушідегі метаболизмдік жағдайға қарай қысқа мерзімдік гипертриглицеридемия туындауы немесе қандағы глюкоза деңгейі ұлғаюы мүмкін. Егер май эмульсиясын енгізу кезінде қан плазмасындағы триглицеридтер концентрациясы ересектер мен балалар үшін аталған шектегі мәннен астамға артса, онда препараттың енгізу жылдамдығын төмендету керек. Егер триглицеридтер деңгейі бәрібір жоғары дәрежеде жоғары дәрежеде сақталып қалса, онда енгізуді плазмадағы триглицеридтер концентрациясы қалыпқа келгенше тоқтата тұру керек.
Жаңа туған сәбилер мен нәрестелерде майлы эмульсия енгізу кезінде билирубин альбуминнен бөлініп кетуі мүмкін, бұл негізінен ұзын тізбекті триглицеридтердің ушықтыруы арқылы жүреді.
Гипокалиемия және гипотониялық дегидратация сияқты су-электролиттік теңгерімнің бұзылуы парентеральді қоректендіруді бастар алдында қажетті мөлшердегі сұйықтық пен электролиттерді енгізу арқылы түзетілуі тиіс.
Липофундин МСТ/ЛСТ 20% препаратын қолдану кезінде қандағы электролиттер деңгейін, сұйықтық теңгерімін немесе дене салмағын, қышқыл-сілтілік теңгерімді, қандағы глюкоза деңгейін, ал ұзақ уақыт енгізу кезінде - гемограмманы, коагуляция статусын және бауыр қызметін ұдайы бақылап отыру қажет.
Липофундин МСТ/ЛСТ 20% препараты компоненттерінің біріне асқын сезімталдық реакциялары (мысалы, соя бұршақтары майында немесе жұмыртқа лецитинінде ақуыз іздері болуы салдарынан) өте сирек, алайда оларды аса сезімтал емделушілер үшін толығымен жоққа шығару мүмкін емес. Аллергиялық реакциялар белгілері, мысалы қызба, діріл, бөртпе, диспноэ пайда болған жағдайда препаратты енгізу тоқтатылуы тиіс.
Артық дозалану майдың артық жүктемесі синдромының туындауына әкеп соғуы мүмкін.
Бүйрек жеткіліксіздігі, қант диабеті, панкреатит, бауыр қызметінің жеткіліксіздігі, гипотиреоз (гипертриглицеридемия бар болғанда), өкпе аурулары және сепсис сияқты май метаболизмінің бұзылуымен байланысты жағдайдағы емделушілерге ерекше көңіл бөлу керек. Анемиясы және май эмболиясы қаупі бар науқастарға май эмульсиясын к/і енгізгенде сақ болған жөн.
Липидтер билирубинге, лактатдегидрогеназаға, оттегімен қанығуға талдаулар, гемоглобин деңгейін өлшеу сияқты біршама зертханалық тесттердің көрсеткіштеріне әсер етуі мүмкін. Бұл жағдай қан үлгісін липидтерді қан ағынынан шығару алдында алған жағдайда болады. Көптеген емделушілерде липидтер инфузия аяқталғаннан кейін 5-6 сағат ішінде шығарылады.
Қуатпен май эмульсияларының жәрдемімен ғана қамтамасыз ету метаболизмдік ацидозды туындатуы мүмкін. Ацидоздың пайда болуына бір мезгілде көмірсулар енгізу арқылы жол бермеуге болады. Сондықтан май эмульсияларын енгізуді көмірсулардың немесе құрамында көмірсулары бар амин қышқылы ерітіндісінің қажетті мөлшерін бір мезгілде енгізумен біріктіру ұсынылады.
Е витамині коагуляция факторы синтезінде К витаминінің әсеріне ықпал етуі мүмкін. Бұны қан коагуляциясы бұзылған немесе К витаминінің тапшылығы болуы мүмкін емделушілерге қатысты ескерген жөн.
Липофундин МСТ/ЛСТ 20% препаратының құрамында литрге шаққанда 1 ммольден азырақ натрий (23 мг) бар, яғни оның құрамында «натрий жоқ» дерлік.
Сүзгілерді қолданған кезде, олар май молекулаларын өткізе алатындай болуы тиіс.
Май эмульсияларын Y-жалғағыш арқылы басқа ерітінділермен немесе айналып өту коннекторымен бірге енгізер алдында, осы ерітінділердің, әсіресе дәрілік препараттар қосылатын осы ерітінділерді бір мезгілде енгізген жағдайда осы ерітінділердің үйлесімділігін тексеру қажет. Құрамында екі валентті электролиттері, мысалы кальций бар, бірге енгізілетін ерітінділерге ерекше көңіл бөлген жөн.
Педиатрияда қолданылуы
Липофундин МСТ/ЛСТ 20% препараты жаңа туған нәрестелер мен балаларды парентеральді қоректендіру үшін қолданылады.
Жүктілік және лактация
Қазіргі таңда Липофундин МСТ/ЛСТ 20% препаратын жүктілік кезінде қолдану жөнінде нақты клиникалық деректер жоқ. Сондай-ақ клиникаға дейінгі репродуктивтік зерттеулер жөнінде қажетті деректер де жоқ. Қолда бар деректер жүктілікке, эмбриональді дамуға, босануға немесе босанғаннан кейін ұрықтың дамуына тікелей немесе тікелей емес зиянды әсерін көрсетпейді.
Парентеральді қоректендіру жүктілік кезінде қажет болуы мүмкін, алайда Липофундин МСТ/ЛСТ 20% препаратын тағайындаған кезде сақ болған жөн.
Липофундин МСТ/ЛСТ 20% препаратын емшек емізетін әйелдерге қолдану тәжірибесі жоқ. Сондай-ақ Липофундин МСТ/ЛСТ 20% препаратының емшек сүтіне өтетін-өтпейтіні де белгісіз. Осы препаратты жануарларға қолдану жөнінде де тиісті деректер жоқ. Жалпы алғанда, парентеральді түрде қоректенетін әйелдердің емшек емізуіне кеңес берілмейді.
Дәрілік заттың көлікті немесе қауіпті механизмдерді басқару қабілетіне ықпал ету ерекшеліктері
Деректер жоқ.
Артық дозалануы
Симптомдары: триглицеридтерді шығару қабілеті бұзылған емделушілерге Липофундин МСТ/ЛСТ 20% препаратын ұзақ енгізгенде майдың артық жүктемелік синдромы туындауы мүмкін («Жағымсыз әсерлер» тарауын қараңыз). Құрамында орташа тізбекті триглицеридтер бар май эмульсиясының едәуір артық дозалануы, әсіресе көмірсуларды енгізу бір мезгілде жүргізілмеген жағдайда, метаболизмдік ацидозға әкеп соғуы мүмкін.
Емі: бұл жағдайларда препаратты енгізуді тоқтату қажет. Басқа емдік шаралар емделушінің өзіне тән ерекше симптомдарына және олардың ауырлық дәрежесіне байланысты. Егер симптомдар бәсеңдегеннен кейін енгізу қайта жаңғыртылса, онда инфузия жылдамдығын емделушінің жағдайын жан-жақты бақылай отырып, біртіндеп арттырған жөн.
Шығарылу түрі және қаптамасы
Резеңке тығынмен нығыздап тығындалған және үстінде сұр түсті пластик қондырмасы бар алюминий қалпақшамен қаусырылған мөлдір шыны құтыда препарат 100 мл, 250 мл және 500 мл-ден.
10 құтыдан медицинада қолданылуы жөнінде мемлекеттік және орыс тілдеріндегі нұсқаулықпен бірге картон қорапқа қапталған.
Сақтау шарттары
Балалардың қолы жетпейтін жерде сақтау керек!
Жарықтан қорғалған жерде, 250С-ден аспайтын температурада сақтау керек. Мұздатып қатыруға болмайды! Кездейсоқ мұздатып қатырып алған жағдайда құтыны жою керек!
Дәріханадан босатылу шарттары
Рецепт арқылы
Сақтау мерзімі
2 жыл
Қаптамасында көрсетілген жарамдылық мерзімі өткеннен кейін пайдалануға болмайды.
Тіркеу куәлігінің иесі
B.Braun Melsungen AG, Германия
Өндіруші
B.Braun Melsungen AG, Германия
Тұтынушылардан өнім (тауар) сапасы жөніндегі шағымдарды Қазақстан Республикасы аумағында қабылдайтын ұйымның мекенжайы
«Б.Браун Медикал Қазақстан» ЖШС
Алматы қ-сы, Абай к-сі 151/115
Телефон: +7 727 334 02 17
Факс: +7 727 334 02 18