Лизорез™-10

• русский
• қазақша

• Скачать инструкцию медикамента

Саудалық атауы

Лизорезтм - 2.5, - 5, -10

Халықаралық патенттелмеген атауы

Лизиноприл

Дәрілік түрі

2.5 мг, 5.0 мг, 10 мг таблеткалар

Құрамы

Бір таблетканың құрамында

белсенді зат – 2.85 мг, 5.70 мг, 11.42 мг лизиноприл (2.5 мг, 5.0 мг, 10 мг сусыз лизиноприлге шаққанда),

қосымша заттар: кальций дигидрофосфаты, жүгері крахмалы, натрий крахмалы глюколаты, повидон, тазартылған тальк, магний стеараты, хинолинді сары Е104 (5.0 мг таблетка үшін), бриллиантты көк Е133 (10 мг таблетка үшін).

Сипаттамасы

Жүрек тәрізді пішінді, екі жақ беті дөңес, ақ немесе ақ дерлік (2.5 мг доза үшін), ашық сары (5 мг доза үшін) және ашық көгілдір (10 мг доза үшін) түсті таблеткалар.

Фармакотерапиялық тобы

Ренин-ангиотензин жүйесіне әсер ететін препараттар (Ангиотензин конвертациялаушы фермент (АКФ) тежегіштері). АКФ тежегіштері. Лизиноприл

АТХ коды С09АА03

Фармакологиялық қасиеттері

Фармакокинетикасы

Препаратты ішке қабылдаудан кейін лизиноприлдің 25% жуығы асқазан-ішек жолынан сіңеді. Ас ішу препарат сіңірілуіне әсер етпейді. Сіңірілуі орта есеппен 30%, биожетімділігі 29% құрайды. Ішке қабылдаудан кейін лизиноприл қан плазмасындағы ең жоғары концентрациясына 6-8 сағаттан соң жетеді. Қан плазмасы ақуыздарымен әлсіз байланысады. Лизиноприл организмде биотрансформацияға ұшырамайды. Жартылай шығарылу кезеңі – 12 сағат. Лизиноприл гематоэнцефалдық бөгет арқылы әлсіз өтеді. Ас ішу лизиноприл сіңуіне әсер етпейді. Жедел миокард инфарктісімен пациенттерде лизиноприлдің ішу арқылы биожетімділігі дені сау волонтерлердегісінен ерекшеленбейді. Бүйрек функциясының бұзылуында лизиноприл шығарылуы баяулайды, бірақ бұл шумақтық сүзілісте минутына 30 мл төмен болғанда ғана клиникалық мәнді болады. Лизиноприл гемодиализ кезінде шығарылады.

Фармакодинамикасы

Лизорезтм – ангиотензин конвертациялаушы фермент (АКФ) тежегіштері, ангиотензин I-ден ангиотензин II түзілуін азайтады. Ангиотензин II мөлшерінің төмендеуі альдостерон бөлінуінің тікелей азаюына алып келеді. Брадикинин деградациясын азайтады және простагландиндер синтезін арттырады.

Созылмалы жүрек жеткіліксіздігі бар науқастарда жалпы шеткері тамыр кедергісін, артериялық қысымды, алдыңғы жүктемені, өкпе капиллярларындағы қысымды төмендетеді, минуттық қан көлемінің ұлғаюын және жүктемелерге төзімділіктің артуын туындатады. Артерияларды, веналарға қарағанда, көп дәрежеде кеңейтеді. Кейбір әсерлері тіндік ренин-ангиотензин жүйелеріне әсер етуімен түсіндіріледі. Ұзақ уақыт қолданғанда миокард және резистивті типтегі артерия қабырғалары гипертрофиясының айқындылығы азаяды. Ишемияланған миокардтың қанмен қамтылуы жақсарады. Артериялық гипертензияда әсері ем басталған соң бірінші күндері анықталады, тұрақты әсері 1-2 ай өткенде дамиды. Препаратты күрт тоқтатқанда артериялық қысымның айқын көтерілуі байқалмайды. Артериялық қысымды төмендетуден тыс, лизиноприл альбуминурияны азайтады. Гипергликемиямен науқастарда зақымданған гломерулярлы эндотелий функциясын қалыпқа түсіруге ықпал етеді.

Лизорезтм қант диабетімен науқастарда қандағы глюкоза концентрациясына әсер етпейді және гипогликемия жағдайларының жиілеуіне әкелмейді.

Қолданылуы

- эссенциальді артериялық гипертензия (монотерапияда немесе

гипертензияға қарсы басқа дәрілермен біріктірілімде)

- қант диабеті кезінде диабеттік нефропатиямен асқынған симптоматикалық, соның ішінде реноваскулярлық артериялық гипертензия (артериялық қысымы қалыпты инсулинге тәуелді пациенттерде және артериялық гипертензиясы бар инсулинге тәуелді емес пациенттерде альбуминурияны төмендету)

- созылмалы жүрек жеткіліксіздігі

- жедел миокард инфарктісін біріктірілген ем құрамында ертерек емдеу

(гемодинамика көрсеткіштері тұрақты алғашқы 24 сағатта бұл көрсеткіштерді демеу үшін және сол жақ қарынша дисфункциясының және жүрек жеткіліксіздігінің профилактикасында)

Қолдану тәсілі және дозалары

Препаратты тәулігіне 1 рет тамақтанудан дейін немесе одан кейін белгілі бір мезгілде, дұрысы, таңертең қабылдау керек.

Эссенциальді гипертензияда гипертензияға қарсы дәрілер қабылдамайтын науқастарға Лизорезтм препараты тәулігіне 10 мг бастапқы дозада тағайындалады. Демеуші доза тәулігіне 20 мг құрайды. Ең жоғары тәуліктік доза - 40 мг. Әсерінің толық дамуы үшін препаратпен 2-4 апталық емдеу курсы қажет болуы мүмкін (бұл дозаны арттырғанда ескерілу керек). Егер препаратты ең жоғары дозада қолдану жеткілікті емдік әсер туындатпаса, гипертензияға қарсы басқа дәріні қосымша тағайындауға болады.

Алдын ала диуретиктер алып жүрген пациенттерде оларды препарат қолдануды бастаудан 2-3 күн бұрын тоқтату керек. Диуретиктерді тоқтату мүмкін болмаса, лизиноприлдің бастапқы дозасы тәулігіне 5 мг-ден аспауы тиіс.

Реноваскулярлы гипертензияда немесе ренин-ангиотензин-альдостерон жүйесінің функциясы жоғарылайтын басқа жай-күйлерде Лизорезтм препараты артериялық қысымды, бүйрек функциясын, қан сарысуындағы калий концентрациясын бақылаумен тәулігіне 2,5-5 мг бастапқы дозада тағайындалады.

Қант диабеті кезінде диабеттік нефропатиямен асқынған артериялық гипертензия

Инсулинге тәуелді емес қант диабеті бар пациенттерде тәулігіне 1 рет 10 мг лизиноприл қолданылады. Диастолалық артериялық қысымды отырған күйде сын. бағ. 75 мм төмен мәнге жеткізу мақсатында, қажет болғанда, дозаны тәулігіне 1 рет 20 мг дейін арттыруға болады. Инсулинге тәуелді қант диабетімен науқастарда диастолалық артериялық қысымды отырған күйде сын. бағ. 90 мм төмен мәнге жеткізу мақсатында дозалау да солай болады.

Бүйрек жеткіліксіздігі бар пациенттерде және гемодиализде жүрген науқастарда бастапқы дозаны креатинин клиренсі деңгейіне қарай белгілейді. Демеуші доза артериялық қысымға қарай белгіленеді (бүйрек функциясын, қандағы калий және натрий деңгейін бақылаумен).

- креатинин клиренсі >30 мл/мин пациенттер (сарысулық креатинин - 3 мг/дл дейін): тәулігіне бір рет 5-10 мг.

- креатинин клиренсі ≥10 мл/мин ≤30 мл/мин пациенттер (сарысулық креатинин ≥3 мг/дл): тәулігіне бір рет 2.5-5 мг.

- креатинин клиренсі <10 мл/мин пациенттер (әдетте гемодиализде жүрген): тәулігіне бір рет 2.5 мг.

Созылмалы жүрек жеткіліксіздігінде: лизиноприлді диуретиктермен және/немесе жүрек гликозидтерімен бір мезгілде қолдануға болады. Мүмкіндігінше, диуретик дозасын лизиноприл қабылдау басталғанша азайту керек. Бастапқы доза тәулігіне 1 рет 2,5-5 мг құрайды, әріқарай оны біртіндеп тәулігіне 5-10 мг дейін (3-5 күннен кейін 2,5 мг) арттырады. Ең жоғары тәуліктік доза – 20 мг.

Жедел миокард инфарктісі (гемодинамика көрсеткіштері тұрақты алғашқы 24 сағатта біріктірілген ем құрамында)

Алғашқы 24 сағатта – ішке 5 мг, артынан 24 сағаттан соң 5 мг, 48 сағаттан соң 10 мг, әріқарай тәулігіне 1 рет демеуші доза, ем ұзақтығы 6 апта.

Систолалық артериялық қысымы төмен (120 мм сын. бағ. немесе одан төмен) науқастарда емнің басында немесе жедел миокард инфарктісінен кейін алғашқы 3 тәулік бойына аз доза – 2,5 мг тағайындалу керек. Артериялық қысым төмендеген жағдайда (систолалық артериялық қысым 100 мм сын. бағ. тең немесе одан төмен) 5 мг тәуліктік дозаны, егер қажет болса, 2,5 мг дейін уақытша төмендетуге болады. Артериялық қысымның ұзақ уақыт айқын төмендеу жағдайында (систолалық артериялық қысым 1 сағаттан артық 90 мм сын. бағ. төмен) препаратпен емдеуді тоқтату керек.

Жағымсыз әсерлері

Лизиноприлмен және басқа да АӨФ тежегіштерімен емделу кезінде келесі жағымсыз реакциялар байқалған, олардың жиілігі былайша белгіленді: Өте жиі (≥ 1/10), жиі (≥ 1/100, < 1/10), жиі емес (≥ 1/1.000, < 1/100), сирек (≥ 1/10.000, < 1/1.000), өте сирек (< 1/10.000), белгісіз (қолда бар деректер бойынша жиілігін анықтау мүмкін емес).

Симптомдар кешенінің дамуы хабарланды, келесілерінің біреуін немесе бірнешеуін қоса: қызба, васкулит, миалгия, артралгия/артрит, антинуклеарлы антиденелерге оң тест, эритроциттердің шөгу жылдамдығының жоғарылауы, эозинофилия және лейкоцитоз, бөрту, фотосенсибилизация немесе басқа да тері реакциялары.

Клиникалық зерттеулердің қауіпсіздік деректері балалар қауымындағы гипертензияда лизиноприлдің жалпы жағымды екенін және осы топта қауіпсіздік бейінінің ересек пациенттердегі осындаймен салыстырмалы екенін жорамалдауға мүмкіндік береді.

Қолдануға болмайтын жағдайлар

- лизиноприлге, кез келген қосымша заттарға немесе ангиотензин өзгертуші ферменттің кез келген басқа тежегіштеріне жоғары сезімталдық

- анамнезде ангиотензин өзгертуші фермент тежегіштерімен емдеуден туындайтын ангионевроздық ісінудің болуы

- тұқым қуалайтын немесе идиопатиялық ангионевроздық ісіну

- жүктіліктің екінші немесе үшінші триместрі

- қант диабеті немесе бүйрек жеткіліксіздігі бар пациенттерге (шумақтық сүзіліс жылдамдығы (ШСЖ) < 60 мл/мин/1.73 м2) құрамында әсер етуші зат – алискирен бар препараттармен бір мезгілде тағайындау

- балалар және 18 жасқа дейінгі жасөспірімдерге (5 мг және 10 мг доза үшін)

Дәрілермен өзара әрекеттесуі

Гипотензиялық препараттар

Егер лизиноприл басқа да гипотензиялық препараттармен (мысалы, глицерил тринитраты және басқа нитраттар немесе басқа да тамыр кеңейтетін препараттар) біріктірілімде тағайындалса, қан қысымы аддитивті төмендеуі мүмкін.

Клиникалық сынақтар деректеріне сай, АӨФ тежегіштерін, ангиотензин II рецепторлары блокаторларын немесе алискиренді біріктіріп тағайындау жолымен ренин-ангиотензин-альдостерон жүйесін қосарлы бөгеу, ренин-ангиотензин-альдостерон жүйесіне әсер ететін бір препаратты тағайындаумен салыстырғанда, гипотензия, гиперкалиемия және бүйрек функциясының төмендеуі (жедел бүйрек жеткіліксіздігін қоса) сияқты, жағымсыз реакциялардың жиірек дамуын туындатады.

Диуретиктер

Егер лизиноприлмен емдеуге қосымша диуретик тағайындалса, әдетте, гипотензиялық әсері аддитивті болады.

Диуретиктермен емделіп жүрген пациенттер, әсіресе, диуретик таяуда тағайындалған пациенттер лизиноприл тағайындалғанда қан қысымының шектен тыс түсіп кетуін сезінуі мүмкін. Симптоматикалық гипотензия ықтималдығын лизиноприлмен емделу басталғанша диуретикті тоқтату есебінен азайта түсуге болады.

Құрамында калий бар қоспалар, калий жинақтаушы диуретиктер немесе құрамында калий бар тұз алмастырғыштар

Клиникалық сынақтар барысында сарысулық калий деңгейі қалып шегінде қалса да, кейбір пациенттерде гиперкалиемияның дамуы білінді. Гиперкалиемия дамуының қауіп факторларына бүйрек жеткіліксіздігі, қант диабеті және калий жинақтаушы диуретиктерді (мысалы, спиронолактон, триамтерен немесе амилорид), құрамында калий бар қоспаларды немесе құрамында калий бар тұз алмастырғыштарын бірге қолдану жатады. Құрамында калий бар қоспаларды, калий жинақтаушы диуретиктерді немесе құрамында калий бар тұз алмастырғыштарын, әсіресе, бүйрек функциясы бұзылған пациенттерде бірге қолдану сарысулық калий деңгейінің елеулі жоғарылауына әкелуі мүмкін. Егер лизиноприл әдеттегі диуретиктермен (калий жинақталмайтын) тағайындалса, диуретиктерден болатын гипокалиемияны лизиноприлмен өтеуге болады.

Литий

Литий мен АӨФ тежегіштерін бір мезгілде тағайындау кезінде сарысулық литий концентрацияларының және уыттылығының қайтымды жоғарылауы хабарланған. Тиазидті диуретиктерді бірге тағайындау литиймен уыттанудың даму қаупін арттыруы және АӨФ тежегіштерімен көтеріліп тұрған оны одан әрі арттыруы мүмкін. Лизиноприлді литиймен бірге қолдану ұсынылмайды, бірақ егер осы біріктірілім қажет болса, сарысулық литий деңгейлеріне мұқият мониторинг қажет болады.

Қабынуға қарсы стероидты емес дәрілер (ҚҚСП), тәулігіне ≥ 3 г ацетилсалицил қышқылын қоса

Егер АӨФ тежегіштері ҚҚСП-мен (яғни, қабынуға қарсы ем режиміндегі ацетилсалицил қышқылымен, ЦОГ-2 тежегіштерімен және іріктелмеген ҚҚСП-мен) бір мезгілде тағайындалса, гипотензиялық әсерінің әлсіреуі болуы мүмкін. Бір мезгілде АӨФ тежегіштерін және ҚҚСП қолдану, әсіресе, бүйрек функциясының бұзылуы бұрыннан бар пациенттерде болуы мүмкін жедел бүйрек жеткіліксіздігін және сарысулық калий деңгейінің жоғарылауын қоса, бүйрек функциясының нащарлау қаупінің артуына алып келуі мүмкін. Осы әсерлері, әдетте, қайтымды. Аталған біріктірілімдерді, әсіресе, егде жастағы пациенттерде абайлап тағайындау керек. Пациенттер талапқа сай мөлшерде сұйықтық ішуі тиіс, сондай-ақ біріккен ем басталған соң, сондай-ақ одан әрі жүйелі түрде бүйрек функциясына жүйелі мониторинг өткізу керек.

Алтын

АӨФ тежегіштерін алатын пациенттерде алтын, мысалы, натрий ауротиомалаты инъекциясынан кейін нитритоидты реакциялардың (қызару, жүрек айну, бас айналу және гипотензияны қоса, кейде ауыр вазодилатация симптомдары) жиірек дамуы хабарланды.

Үш циклды антидепрессанттар / Психозға қарсы дәрілер / Анестетиктер

Белгілі бір анестетиктерді, үш циклды антидепрессанттарды және психозға қарсы дәрілерді АӨФ тежегіштерімен бірге қолдану қан қысымының одан әрі төмендеуіне әкелуі мүмкін.

Симпатомиметиктер

Симпатомиметиктер АӨФ тежегіштерінің гипотензиялық әсерін төмендетуі мүмкін.

Диабетке қарсы дәрілер

Эпидемиологиялық зерттеулер АӨФ тежегіштерін және диабетке қарсы дәрілерді (инсулин, ішуге арналған гипогликемиялық дәрілер) бірге қолданудың гипогликемияның даму қаупімен қандағы глюкоза деңгейлерінің елеулі төмендеуін туындатуы мүмкін екенін жорамалдауға мүмкіндік береді. Аталған феномен бүйрек функциясы бұзылған пациенттерде бірге қолданылған алғашқы апталар ішінде жиірек кездеседі.

Плазминогеннің тіндік белсендіргіші

Плазминогеннің тіндік белсендіргішімен бірге қолдану ангионевроздық ісінудің даму қаупін арттыруы мүмкін.

Ацетилсалицил қышқылы, тромболитиктер, бета-блокаторлар, нитраттар

Лизиноприлді ацетилсалицил қышқылымен (кардиологиялық дозаларда), тромболитиктермен, бета-блокаторлармен және/немесе нитраттармен бірге қолдануға болады.

Айрықша нұсқаулар

Симптоматикалық гипотензия

Симптоматикалық гипотензия асқынбаған гипертензиясы бар пациенттерде сирек дамиды. Мысалы, диуретиктермен ем, тұзды шектейтін диетаның нәтижесінде, диализден өту, диарея немесе құсу кезінде қан көлемі сарқылған пациенттерде немесе ренинге тәуелді ауыр гипертензиясы бар пациенттерде лизиноприлмен емделу кезінде гипотензия зор ықтималдықпен дамиды. Қатарлас бүйрек жеткіліксіздігінің болуымен немесе онсыз жүрек жеткіліксіздігіне шалдыққан пациенттерде симптоматикалық гипотензия байқалды. Ілмекті диуретиктің жоғары дозаларын қабылдайтын жүрек жеткіліксіздігінің ауыр дәрежесіндегі пациенттерде, гипонатриемияда немесе бүйректің функционалдық зақымдануында гипотензияның дамуы ықтималдырақ. Симптоматикалық гипотензияның даму қаупі жоғары пациенттерде лизиноприлмен емдеуді бастау және дозаны түзету қатаң бақылануы тиіс. Бұл қан қысымының шектен тыс төмендеуі миокард инфарктісіне немесе инсультке әкелуі мүмкін ишемиялық жүрек ауруы немесе ми қан айналымының бұзылуы бар пациенттерге де қатысты. Егер гипотензия дамыса, пациентті шалқасынан жатқызып, ал егер қажет болса, вена ішіне физиологиялық ерітінді енгізу керек. Өткінші гипотензиялық реакциялар қан көлемін толықтырудан кейін қан қысымы көтерілген бойда жалғастыруға болатын лизиноприлмен кейіннен емдеуге қарсы көрсетілімді емес.

Қан қысымы қалыпты немесе төмен жүрек жеткіліксіздігі бар кейбір пациенттерде лизиноприлмен емделу кезінде артериялық жүйелі қысым қосымша төмендеуі мүмкін. Осы әсері жорамалды болады, әрі әдетте емдеуді тоқтатуға себеп болмайды. Егер гипотензия симптомдары білінсе, лизиноприлмен емдеуді тоқтату қажет болуы мүмкін.

Жедел миокард инфарктісіндегі гипотензия

Тамыр кеңейтетін препараттармен емделуден кейін әріқарай гемодинамикасының күрделі нашарлау қаупі бар пациенттердегі жедел миокард инфарктісінде лизиноприлмен емді бастауға болмайды. Бұл 100 мм сын. бағ. немесе одан төмен систолалық қан қысымы бар пациенттерге немесе кардиогенді шок күйіндегі пациенттерге қатысты. Инфарктіден кейінгі алғашқы үш тәулік ішінде, егер систолалық қан қысымы 120 мм сын. бағ. немесе одан төмен болса, лизиноприл дозасын азайту керек. Егер систолалық қан қысымы 100 мм сын. бағ. немесе одан төмен болса, демеуші дозаны 5 мг дейін немесе уақытша 2.5 мг дейін азайту керек. Егер гипотензия сақталса (систолалық қан қысымы 1 сағаттан астам уақыт бойы 90 мм сын. бағ. төмен болса), лизиноприлді тоқтату керек.

Аортальді және митральді клапан стенозы / гипертрофиялық кардиомиопатия

Басқа да АӨФ тежегіштері сияқты, лизиноприл қолқа стенозы немесе гипертрофиялық кардиомиопатия сияқты жай-күйлерде митральді клапан стенозы және сол жақ қарыншадан қан ағып шығу жолының обструкциясы бар пациенттерге сақтықпен тағайындалу керек.

Бүйрек функциясының бұзылуы

Бүйрек функциясы бұзылған жағдайда (креатинин клиренсі < 80 мл/мин)

лизиноприлдің бастапқы дозасын пациенттегі креатинин клиренсіне сәйкес, ал артынан организмнің емдеуге жауап реакциясына қарай түзету керек. Осындай пациенттерде калий және креатинин деңгейінің дағдылы мониторингін орындау қажет.

Жүрек жеткіліксіздігі бар пациенттерде АӨФ тежегіштерімен ем басталған соң дамитын гипотензия бүйрек функциясының одан әрі нашарлауына әкелуі мүмкін. Осындай жағдайларда, әдетте, қайтымды болатын жедел бүйрек жеткіліксіздігінің дамуы хабарланды.

Бүйрек артериясының екі жақты стенозы немесе жалғыз бүйрек артериясының стенозы бар кейбір пациенттерде, әдетте, лизиноприлді тоқтатқанда қайтымды болатын қан мочевинасы мен сарысулық креатинин деңгейінің жоғарылауы байқалды. Бұл, әсіресе, бүйрек жеткіліксіздігі бар пациенттерде ықтималды. Егер реноваскулярлы гипертензия да бар болса, ауыр гипотензия мен бүйрек жеткіліксіздігінің даму қаупі артады. Ондай пациенттерде емдеуді қатаң медициналық қадағалаумен, мұқият титрлеумен төмен дозалардан бастау керек. Диуретиктермен емдеу жоғарыда сипатталған жай-күйлердің дамуына ықпал ететін фактор болуы мүмкін екендіктен, лизиноприлмен емделген алғашқы апталар ішінде диуретиктерді тоқтатып, бүйрек функциясын бақылап отыру керек.

Бұрыннан бар вазоренальді гипертензияның айқын белгілерінсіз кейбір гипертоник пациенттерде, әсіресе, лизиноприл диуретикпен бір мезгілде тағайындалған жағдайларда, әдетте, жеңіл дәрежеде және өтпелі болатын қан мочевинасы деңгейінің және сарысулық креатинин деңгейінің жоғарылауы білінді. Осындай жай-күйдің бұрыннан бүйрек функциясының бұзылуы бар пациенттерде даму ықтималдығы аса зор. Диуретик және/немесе лизиноприл дозасын азайту және/немесе тоқтату қажет болуы мүмкін.

Жедел миокард инфарктісінде лизиноприлді 177 микромоль/литрден асатын сарысулық креатинин концентрациясының негізінде айқындалған бүйрек дисфункциясы және/немесе 500 мг/24 сағаттан асатын протеинурия белгілері бар пациенттерге тағайындауға болмайды. Егер лизиноприлмен емделу кезінде бүйрек дисфункциясы дамыса (сарысулық креатинин концентрациясы 265 микромоль/литрден артық болса және/немесе емнің басталуына дейінгі деңгеймен салыстырғанда, екі есе жоғарыласа), лизиноприлді тоқтату шешімін қабылдау керек.

Жоғары сезімталдық/Ангионевроздық ісіну

Сирек жағдайларда, лизиноприлді қоса, АКФ тежегіштерімен ем алған пациенттерде бет, аяқ-қол, ерін, тіл, жұтқыншақ және/немесе көмейдің ангионевроздық ісінуінің дамуы хабарланды. Осы симптомдар емнің кез келген уақытында дамуы мүмкін. Ондай жағдайларда симптомдардың толық регрессиясына дейін пациенттерді қадағалаумен лизиноприлді дереу тоқтатып, тиісті ем тағайындалу керек. Егер тіпті тыныс алу бұзылысының белгілерінсіз тілдің ісінуі ғана білінсе, ондай пациенттерге ұзақ уақыт қадағалау қажет болуы мүмкін, өйткені гистаминге қарсы препараттармен және кортикостероидтармен емдеу жеткіліксіз болуы ықтимал.

Көмейдің немесе тілдің ангионевроздық ісінуінен туындайтын өте сирек өліммен аяқталу жағдайлары хабарланған. Тіл, жұтқыншақ немесе көмейдің ісінуі бар пациенттерде, әсіресе, егер анамнезде тыныс алу жолдарының интубациясы туралы ақпарат бар болса, тыныс алу жолдарының обструкциясы дамуы мүмкін. Ондай жағдайларда адреналин енгізуді және тыныс алу жолдарының өткізгіштігін қалыпқа келтіруді қоса, төтенше шараларды шұғыл өткізу қажет. Пациент симптомдардың толық және тұрақты регрессиясына дейін қатаң медициналық қадағалауда болуы тиіс.

АӨФ тежегіштерін қабылдайтын қара нәсілді пациенттерде, ақ нәсілді пациенттермен салыстырғанда, ангионевроздық ісінудің даму қаупі аса жоғары.

Анамнезінде АӨФ тежегіштерімен емделуге байланыссыз ангионевроздық ісіну бар пациенттерде АӨФ тежегіштерімен емделу кезінде осы жай-күйдің жоғары даму қаупі болады.

Гемодиализде жүрген пациенттердегі анафилактоидты реакциялар

Гидравликалық өткізгіштігі жоғары жарғақшалар көмегімен диализден өткен және бір мезгілде АӨФ тежегіштерін алған пациенттерде анафилактоидты реакциялар дамуы хабарланды. Не диализдің басқа типін, не гипертензиялық препараттардың басқа класын таңдау керек.

Тығыздығы төмен липопротеиндер аферезі кезіндегі анафилактоидты реакциялар

Сирек жағдайларда декстран сульфатының көмегімен тығыздығы төмен липопротеиндер аферезі кезінде АӨФ тежегіштерін алған пациенттерде өмірге қатерлі анафилактоидты реакциялар дамыды. Ондай реакциялардан әр аферез жүргізуді бастар алдында АӨФ тежегіштерін уақытша тоқтату арқылы сақтанудың сәті түсті.

Десенсибилизация

Гипосенсибилизация кезінде (мысалы, hymenoptera venom қатысты) АӨФ тежегіштерін алған пациенттерде анафилактоидты реакциялар дамыды. Сол пациенттерде АӨФ тежегіштерін уақытша тоқтатқанда бұл реакцияларды болдырмаудың сәті түсті, бірақ анафилактоидты реакциялар препараттар кездейсоқ тағайындалғанда қайта дамыды.

Бауыр жеткіліксіздігі

АӨФ тежегіштері холестаздық сарғаюдан басталып, шұғыл типті бауыр некрозына дейін үдейтін және кейде өліммен аяқталатын синдромның дамуымен өте сирек байланыстырылды. Осы синдром механизмі соңына дейін түсіндірілмеген. Лизиноприл алатын пациенттерге сарғаю дамығанда немесе бауыр ферменттері деңгейінің айқын жоғарылауында лизиноприл қабылдауды тоқтатып, медициналық жәрдемге жүгінген жөн.

Нейтропения/ Агранулоцитоз

АӨФ тежегіштерін алған пациенттерде нейтропения, агранулоцитоз және анемияның дамуы хабарланды. Бүйрек функциясы қалыпты және басқа асқындырушы факторлары жоқ пациенттерде нейтропения сирек дамиды. Нейтропения және агранулоцитоз АӨФ тежегіштерін тоқтатудан кейін регрессияланатын қайтымды реакциялар болып табылады. Лизиноприл тамырларының коллагенді аурулары бар пациенттерде, иммунодепрессанттармен, аллопуринолмен немесе прокаинамидпен емделгенде немесе, әсіресе, егер пациентте бүйрек функциясының бұзылуы бұрыннан болса, осы асқындырушы факторлар бірігуінде аса сақтықпен қолданылу керек. Осы пациенттердің кейбіреуінде сирек жағдайларда антибиотиктермен қарқынды емделуге берілмейтін ауыр инфекциялар дамыды. Егер лизиноприл ондай пациенттерге тағайындалса, лейкоцитарлық формуланың мерзімдік мониторингін орындау қажет, сонымен қатар пациенттерге олардың инфекцияның кез келген белгілері туралы дәрігерге хабарлауы тиістігі туралы нұсқау беру керек.

Ренин-ангиотензин-альдостерон жүйесін қосарлы бөгеу

АӨФ тежегіштерін, ангиотензин II рецепторлары блокаторларын немесе алискиренді бір мезгілде қолданудың гипотензия, гиперкалиемия және, жедел бүйрек жеткіліксіздігін қоса, бүйрек функциясы төмендеуінің даму қаупін арттыратынын растайтын деректер бар. Сондықтан АӨФ тежегіштерін, ангиотензин II рецепторлары блокаторларын немесе алискиренді біріктіріп қолдану арқылы жүргізілетін ренин-ангиотензин-альдостерон жүйесін қосарлы бөгеу ұсынылмайды.

Егер қосарлы бөгеу абсолютті қажет болып саналса, ол тек маманның қадағалауымен және бүйрек функциясына, электролиттер деңгейі мен қан қысымына жүйелі мониторинг жасау шартымен орындалу керек.

Диабеттік нефропатиясы бар пациенттерде АӨФ тежегіштері мен ангиотензин II рецепторлары блокаторларын бір мезгілде қолдануға болмайды.

Нәсіл ерекшеліктері

АӨФ тежегіштерін қабылдайтын қара нәсілді пациенттерде, басқа нәсіл өкілдерімен салыстырғанда, ангионевроздық ісінудің даму қаупі аса жоғары.

Басқа да АӨФ тежегіштері сияқты, лизиноприлдің қара нәсілді пациенттердегі тиімділігі, басқа нәсіл өкілдерімен салыстырғанда, аз болуы мүмкін, бұл қара нәсілді пациенттер қауымында рениннің төмен деңгейлерінің көбірек таралуынан болуы ықтимал.

Жөтел

АӨФ тежегіштерін пайдалану кезінде жөтелдің дамуы хабарланды. Жөтелдің өнімсіз, тұрақты болуы және емді тоқтатудан кейін қайталануы тән. Жөтелдің дифференциациялық диагностикасында АӨФ тежегіштерімен индукцияланған жөтел ескерілу керек.

Хирургиялық араласу/ Анестезия

Операциялық араласу жасалатын және гипотензияны туындататын препараттар қолданылатын анестезия алатын пациенттерде лизиноприл рениннің компенсаторлық лықсуы салдарынан ангиотензин II түзілуін бөгеуге қабілетті. Егер гипотензия осы механизм нәтижесінде дамыса, оны қан көлемін көбейту көмегімен түзетуге болады.

Гиперкалиемия

Лизиноприлді қоса, АӨФ тежегіштерімен ем алған кейбір пациенттерде сарысулық калий деңгейлерінің артуы байқалған. Гиперкалиемия дамуының қауіп тобына бүйрек жеткіліксіздігі, қант диабеті бар пациенттер және калий жинақтаушы диуретиктерді, құрамында калий бар қоспаларды немесе құрамында калий бар тұз алмастырғыштарды, сондай-ақ сарысулық калий деңгейлерінің артуымен астасатын басқа препараттарды (мысалы, гепарин) бір мезгілде қабылдайтын пациенттер кіреді. Егер жоғарыда аталған дәрілер мен лизиноприлді бір мезгілде қолдану қажет болып саналса, сарысулық калий деңгейлеріне жүйелі мониторинг жасаған жөн.

Қант диабеті бар пациенттер

Диабетке қарсы ішуге арналған препараттар немесе инсулин алатын қант диабеті бар пациенттерде АӨФ тежегіштерімен емделудің алғашқы айларының ішінде қандағы глюкоза деңгейіне қатаң бақылау қажет.

Литий

Литий мен лизиноприлді бірге қолдану ұсынылмайды.

Жүктілік

АӨФ тежегіштерін жүктілік кезінде тағайындауға болмайды. Егер АӨФ тежегіштерін қолдану аса маңызды болса, жүктілікті жоспарлайтын пациент әйелдер жүктілік кезінде қолдану үшін қауіпсіздік деңгейі дәлелденген баламалы гипотензиялық препараттар қабылдауға көшуі тиіс.

Жүктілік анықталғанда АӨФ тежегіштерімен емделуді дереу тоқтатып, егер қажет болса, баламалы ем тағайындау керек.

Дәрілік заттың көлік құралдарын және механизмдерді басқару қабілетіне әсер ету ерекшеліктері

Автокөлікті немесе аса қауіпті механизмдерді басқару кезінде сақтық шарасын қадағалау қажет.

 

Артық дозалануы

Симптомдары: артериялық қысымның айқын төмендеуі, ауыз кеберсуі, ұйқышылдық, несеп шығару іркілісі, іш қату, мазасыздық, қатты ашушаңдық.

Емі: симптоматикалық ем, натрий хлоридінің 0,9% ерітіндісін вена ішіне енгізу, ал егер мүмкін болса, вазопрессорлар қолдану, артериялық қысымды, сулы-электролит теңгерімін бақылау. Гемодиализ қолдануға болады.

Шығарылу түрі және қаптамасы

ПВХ үлбірінен және алюминий фольгадан жасалған пішінді ұяшықты қаптамаға 14 таблеткадан салады.

Пішінді ұяшықты 1 қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Сақтау шарттары

Құрғақ, жарықтан қорғалған жерде, 250С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

Плетхико Фармасьютикалз Лтд

A.Б. Роуд, Манглия - 453 771, Индор (М.П.),Үндістан

Тіркеу куәлігінің ұстаушысы

«Plethico Laboratories Pvt. Ltd.»

38, Industrial Estate, Pologround, Indore – 452015, (M.P.), Үндістан

Қазақстан Республикасы аумағында тұтынушылардан өнім (тауар) сапасына қатысты шағымдар қабылдайтын және дәрілік зат қауіпсіздігін тіркеуден кейін қадағалауға жауапты ұйымның мекенжайы

«Метабол Қазақстан» ЖШС, 100009, Қарағанды қ., Ермеков к-сі, 110/2

тел.: +7(212)48-16-44, факс +7(212)48-17-44

электронды пошта: e-mail: metabolkz@mail.ru, metabolcompany@mail.ru