Лидокаин (раствор для инъекций, 10 мг/мл)

• русский
• қазақша

• Скачать инструкцию медикамента

Саудалық атауы

Лидокаин

Халықаралық патенттелмеген атауы

Лидокаин

Дәрілік түрі

Инъекцияға арналған ерітінді

Құрамы

1 мл ерітіндінің құрамында

белсенді зат – лидокаин гидрохлориді 10 мг;

қосымша заттар: натрий хлориді, натрий гидроксиді 1 М ерітіндісі,  инъекцияға арналған су.

Сипаттамасы

Түссіз немесе аздап боялған мөлдір сұйықтық.

Фармакотерапиялық тобы

Анестетиктер. Жергілікті анестетиктер. Амидтер. Лидокаин.

АТХ коды N01B B02

Фармакологиялық қасиеттері

Фармакокинетикасы

Парентеральді енгізуден кейін лидокаин толық сіңеді. Сіңірілу дәрежесі препарат енгізілген жерге, вазоконстриктордың болуына немесе болмауына байланысты.

Тамыр ішіне енгізуден бөлек, лидокаиннің плазмалық жоғары деңгейлері қабырғааралық жүйкелер блокадасы кезінде байқалады, ал ең төмендері – тері астына енгізгенде. Қан плазмасының ақуыздарымен байланысуы 60-80 % құрайды. Лидокаин плаценталық және гематоэнцефалдық бөгеттер арқылы өтеді.

Лидокаин бауырда жылдам, негізінен тотықтырғыш N-деалкилдену жолымен метаболизденеді. Оның метаболиттерінің өзгермеген қосылыстағы сияқты фармакологиялық және токсикологиялық әсерлері бар, бірақ олардың қуаттылығы аздау. Лидокаиннің енгізілген дозасының 90% жуығы метаболиттер түрінде шығарылады. Енгізілген дозаның шамамен 10% өзгермеген күйде бүйрекпен шығарылады. Жартылай шығарылу кезеңі 1,5-2 сағатты құрайды. Бауыр аурулары бар науқастарда жартылай шығарылу кезеңі ұзағырақ.

Фармакодинамикасы

Лидокаин – жергілікті анестезияға арналған амидтер тобындағы жарғақша тұрақтандырушы дәрі. Ол терінің және шырышты қабықтардың сезімтал жүйке ұштарын тежейді, яғни жүйке жасушаларының тіндік элементтерінің (нейрон, аксон, синапстар) өткізгіштігінің кері бәсеңдеуін туғызады.

Жергілікті анестезиялаушы дәрілердің әсер ету механизмі тітіркендіргіштің түзілуі үшін міндетті болып табылатын иондық ағындарды – нейрондық жарғақшалар арқылы бәсеңдетуге негізделеді.

Лидокаин натрий иондары үшін тітіркендіргіш белсенділендірген өткізгіштіктің транзиторлы жоғарылауын басады және азырақ дәрежеде калий мен натрий иондары үшін баяулаған өткізгіштікті төмендетеді, соның есебінен ол нейрондық жарғақшаларды тұрақтандырады. Лидокаин физиологиялық тітіркендіргішке жауап ретінде болатын деполяризация дәрежесін, сондай-ақ әсер ету потенциалының амплитудасын азайтады, және жүйке өткізгіштігін басады.

Жергілікті анестезиялаушы дәрілер әсер етудің әртүрлі сенсорлық тәсілдерінің арасында ең алдымен ауыруға сезімталдықты басады, ол жылуды сезінудің және тактильді сезімдердің бәсеңдеуімен қатар жүреді. Жергілікті қолданудан кейін сіңірілген Лидокаин орталық жүйке жүйесі тарапынан қозуды немесе депрессияны тудыруы мүмкін. Оның жүрек-қантамыр жүйесіне ықпалы өткізгіштіктің және шеткері вазодилатацияның бұзылуы түрінде білінуі мүмкін.

Қолданылуы

Хирургияда, офтальмологияда, стоматологияда, отоларингологияда жергілікті анестезия үшін (терминальді, инфильтрациялық, өткізгіштік);

- цефалоспориндер тобындағы бактерияға қарсы дәрілерге еріткіш ретінде қолданылады.

Қолдану тәсілі және дозалары

Лидокаинді енгізу осы дәрілік затқа жекелей сезімталдықты анықтау үшін алдын ала сынама жүргізуді талап етеді.

Терминальді анестезия үшін ересектерге шырышты қабыққа 2 мг/кг лидокаинға дейінгі дозада препаратты жағады, анестезия ұзақтығы – 15-30 минут.

Ересектер үшін ең жоғары дозасы – 20 мл.

Өткізгіштік анестезия үшін (оның ішінде иық және сегізкөз өрімдерінде ауыруды басу үшін) 10-20 мл (100-200 мг лидокаин), аяқ-қол саусақтары, мұрынның, құлақтың анестезиясы үшін – 4-6 мл (40-60 мг) препаратты енгізеді. Ересектер үшін препараттың ең жоғары дозасы – 20 мл (200 мг)

Офтальмологияда анестезия үшін тікелей тексеру немесе хирургиялық араласу алдында конъюнктивальді қапқа 2-3 рет 30-60 секунд аралықпен 2 тамшы препараттан инстилляциялау керек.

Балалар. Балаларға арналған дозалары жасына, дене салмағына және физикалық жай-күйіне байланысты азайтылуы тиіс.

Балалар үшін препараттың ең жоғары дозасын ұсыну қиын, өйткені ол жасы мен салмағына қарай өзгеріп отырады. Әдетте доза дене салмағына 3,2-4,3 мг/кг құрайды.

Балаларда вена ішілік анестезия үшін енгізуге бұдан да көбірек сұйылтылған ерітінділерді (яғни 0,25-0,5 %) және 3 мг/кг аспайтын қосынды дозаларды пайдалану ұсынылады.

Жалпы уыттылықтың алдын алу үшін ең әсерлі доза пайдаланылуы тиіс. Кейбір жағдайларда қажетті концентрацияға жету үшін қолжетімді концентрацияларды 0,9% стерильді натрий хлориді ерітіндісімен сұйылту қажет.

Жағымсыз әсерлері

Жүйке жүйесі тарапынан: мазасыздық, ұйқышылдық, бас айналуы, бас ауыруы, ұйқының бұзылуы, сананың шатасуы, комаға дейін естен тану, сезімталдықтың бұзылуы, бұлшықет тартылуы, құрысулар, моторлық бөгеліс, дизартрия, дисфагия; тұрақты анестезия, аяқтардың парезі немесе элегиясы және сфинктерді басқара алмау (мысалы, ат құйрығы синдромы), терінің шаншуы.

Стоматологияда қолданғанда: тіл мен еріннің жансыздануы

Психикалық бұзылыстар: анорексия, ашушаңдық, мазасыздық, елестеулер, депрессия; жоғары дозаларды қолданғаннан кейін – қозу жай-күйі, эйфория.

Көру ағзалары тарапынан: көрудің бұзылуы, нистагм, қайтымды соқырлық, диплопия, көзді алды бұлыңғырлануы, жарықтан қорқу, конъюнктивит.

Есту ағзалары және вестибулярлық аппарат тарапынан: вертиго, естудің бұзылуы, құлақтағы шуыл немесе шыңыл, гиперакузия.

Жүрек-қантамыр жүйесі тарапынан: жоғары дозаларда қолданғанда – аритмия, брадикардия, жүректің өткізгіштігінің баяулауы, жүректің көлденең блокадасы, жүрек қызметінің тоқтап қалуы, шеткері вазодилатация, коллапс; тахикардия, артериялық қысымның жоғарылауы/төмендеуі, жүрек тұсының ауыруы, кернеулер.

Асқорыту жүйесі тарапынан: жүрек айнуы, құсу.

Тыныс алу жүйесі тарапынан: ентігу, ринит, тыныстың тарылуы немесе тоқтап қалуы.

Иммундық жүйе тарапынан: ісінуді қоса, аллергиялық реакциялар, тері реакциялары, есекжем, қышыну, ангионевроздық ісіну, анафилактоидты реакцияларды қоса (оның ішінде анафилаксиялық шок) аса жоғары сезімталдық реакциясы, жайылған эксфолиативті дерматит, иммундық жүйенің бәсеңдеуі, жанаспалы дерматит.

Басқалары: ыстықты, суықты сезіну немесе аяқ-қолдардың жансыздануы, қатерлі гипертермия, ісінулер, әлсіздік, эректильді дисфункция, метгемоглобинемия.

Жергілікті реакциялар: енгізілген жерде, 1 минут ішінде анестезия әсерінің өсуімен жоғалатын жеңіл күйдіруді сезіну, тромбофлебит, гиперемия.

Спинальді немесе эпидуральді анестезияда арқаның, аяқтың ауыруы

артериялық гипотониямен, дефекацияның бұзылуымен, өздігінен несеп шығуымен, импотенциямен және бұтаралық сезімталдықты жоғалтумен (осы әсерлерінің мүмкіндігі жоғары дозаны қолданғанда немесе эпидуральді кеңістікке енгізуге арналған доза жұлын кеңістігіне өтіп кеткенде лидокаинді кездейсоқ жұлын аралығына енгізген жағдайда артады,) қатар жүретін ішінара/толық жұлын блокадасы байқалуы мүмкін. Жекелеген жағдайларда осындай араласымнан кейін қимыл, сенсорлық және/немесе вегетативті функциялардың қалпына келуі баяу жүреді (бірнеше айдан кейін) немесе толық қамтылмайды.

Қолдануға болмайтын жағдайлар

- препарат компоненттеріне, басқа да амидті жергілікті анестезиялайтын дәрілерге жоғары сезімталдық, анамнезінде лидокаинге эпилепсия түріндегі құрысулардың болуы

- ауыр брадикардия, ауыр артериялық гипотензия, кардиогенді шок, созылмалы жүрек жеткіліксіздігінің ауыр түрлері (ІІ-ІІІ дәрежесі), синусты түйін әлсіздігі синдромы, Вольф-Паркинсон-Уайт синдромы, Адамс-Стокс синдромы, ІІ және ІІІ дәрежедегі AV (AV) блокада, гиповолемия,

- бауыр/бүйрек функциясының ауыр бұзылыстары

- порфирия, миастения,глаукомамен науқастарға ретробульбарлы енгізу

- жүректің сол жақ қарыншасының лықсуының азаюымен (қалыптан 35 % кем) миокард инфарктісінен кейін алғашқы үш ай ішінде пациенттерге қолдануға болмайды; қан ұюының бұзылуы, антикоагулянтты ем

- инъекция орнының инфекциясы; жанаспайтын пациенттерге қолдануға болмайды; сол жақ қарынша функциясының айтарлықтай төмендеуі

- жүктілік, лактация кезеңі

- 15 жасқа дейінгі балалар

- эпилепсия түріндегі құрысулар

Дәрілермен өзара әрекеттесуі

Лидокаинді хлорпромазин, петидин, бупивакаин, хинидин, дизопирамид, амитриптиллин, имипрамин, нотриптилин сияқты препараттармен біріктіріп қолданған жағдайда лидокаиннің қан плазмасындағы концентрациясы төмендейді.

Аритмияға қарсы препараттар (оның ішінде амиодарон, верапамил, дизопирамид, аймалин) – кардиодепрессивті әсері күшейеді (QT аралығы ұзарады, ал сирек жағдайларда AV-блокада немесе қарыншалар фибрилляциясы дамуы мүмкін); амиодаронмен бір мезгілде қолдану құрысулардың дамуына әкелуі мүмкін.

Новокаин, новокаинамид, прокаинамид – орталық жүйке жүйесі қозуы, сандырақтау, елестеулер болуы мүмкін.

Кураре тәрізді препараттар – миорелаксация күшейеді (тыныс алу бұлшықеттері салдануы мүмкін).

Этанол лидокаиннің тыныс алуды бәсеңдететін әсерін күшейтеді.

Вазоконстрикторлар (эпинефрин, метоксамин, фенилэфрин) лидокаиннің сіңуінің баяулауына ықпал етеді және соңғысының әсерін ұзартады.

Циметидин лидокаиннің бауыр клиренсін төмендетеді (микросомальді тотығудың тежелуі салдарынан төмендеу), оның концентрациясын және уытты әсерінің даму қаупін жоғарылатады. Сондай-ақ циметидин лидокаинмен өзара әрекеттескенде синергиялық әсерге ие болады.

Гуанадрель, гуанетидин, микамаламин, триметафан – спинальді және эпидуральді анестезия үшін біріктіріп қолданғанда айқын артериялық гипотензия және брадикардия қаупі артады.

β-адреноблокаторлар (мысалы, пропранолол, метопролол) – лидокаиннің бауырдағы метаболизмін баяулатады, лидокаиннің әсерлерін (оның ішінде уытты) күшейтеді және брадикардия мен артериялық гипотензия даму қаупін арттырады. β‑адреноблокаторлар мен лидокаинді бір мезгілде қолданғанда соңғысының дозасын азайту керек. Сондай-ақ лидокаинмен өзара әрекеттескенде β‑адреноблокаторлар синергиялық әсер иеленген; миокардтың жиырылғыштығының жоғарылауына әкелуі мүмкін жүректің өткізгіштігін тежейтін әсері жүреді.

Жүрек гликозидтері – жүрек гликозидтерінің кардиотонустық әсерін әлсіретеді.

Ұйықтататын немесе седативті дәрілік заттар – ұйықтататын немесе седативті препараттардың орталық жүйке жүйесіне бәсеңдететін әсері күшеюі мүмкін.

Есірткілік аналгетиктер (морфин) – есірткілік аналгетиктердің ауыруды басатын әсері, тыныс алудың бәсеңдеуі күшейеді.

Моноаминоксидаза тежегіштері (фуразолидон, прокарбазин, селегилин) – артериялық гипотензияның даму қаупі артады және соңғысының жергілікті жансыздандыратын әсері ұзарады. Моноаминоксидаза тежегіштерімен емдеу кезінде лидокаинді парентеральді қолдануға болмайды.

Антикоагулянттар (оның ішінде ардепарин, далтепарин, данапароид, энотоксапарин, гепарин, варфарин) қан кетудің даму қаупі арттырады.

Наркозға арналған дәрілер – наркозға арналған дәрілердің тыныс алу орталығын бәсеңдететін әсері күшейеді (гексобарбитал, тиопентал натрий вена ішіне).

В полимиксин – тыныс алу функциясын бақылау керек.

Рифампицин – соңғысының қандағы концентрациясы төмендеуі мүмкін.

Пропафенон – орталық жүйке жүйесі тарапынан жағымсыз әсерлерінің ауырлығы артуы және ұзаруы мүмкін.

Прениламин – «пируэт» типті қарыншалық аритмия даму қаупі артады.

Құрысуға қарсы дәрілер, барбитураттар (фенобарбитал) – лидокаиннің бауырдағы метаболизмі жеделдетілуі, қандағы концентрациясы төмендеуі, кардиодепрессивті әсері күшеюі мүмкін.

Изадрин, глюкагон – лидокаин клиренсі артады.

Норэпинефрин, мексилетин – лидокаин клиренсі төмендейді (уыттылығы артады), бауырдағы қан ағымы азаяды.

Ацетазоламин, тиазидті және ілмектік диуретиктер – гипокалиемия туындайтындықтан лидокаиннің әсері төмендейді.

Мидазолам – лидокаиннің қан плазмасындағы концентрациясы артады.

Жүйке-бұлшықеттік берілісті бөгейтін препараттар – бұл препараттардың әсері күшейеді, өйткені олар жүйке импульстарының өткізгіштігін төмендетеді.

Норадреналин – лидокаинмен өзара әрекеттескенде синергиялық әсері бар.

Ацидозда қан плазмасындағы бос лидокаиннің концентрациясы артады және уытты әсерлерінің даму қаупі бар.

Лидокаиннің басқа аритмияға қарсы препараттармен, мысалы, кальций антагонистерімен өзара әрекеттесуінде жүрек өткізгіштігіне тежейтін әсері жүреді, ол миокардтың жиырылғыштығының артуына әкелуі мүмкін.

Бауыр метаболизміне және ферменттердің микросомальді индукциясына әсер ететін дәрілік заттар (мысалы, фенитоин) лидокаиннің тиімділігін төмендетуі мүмкін.

Миорелаксанттарды бір мезгілде қолданғанда (мысалы, суксаметоний) синергиялық әсері болуы мүмкін.

Диазепаммен сақтықпен тағайындау керек.

Эпинефрин (адреналин) білдіретін жүйелі әсерлері жағымсыз болатын: эпинефринге жоғары сезімталдық, артериялық гипертензия, қант диабеті, глаукома немесе қысқа мерзімдік анестезиялайтын әсер қажет жағдайларды қоспағанда, инъекциялық ауыруды басудың барлық түрі үшін лидокаинді эпинефринмен біріктіруге болады (1:50000-1:100000; ex tempore дайындайды, 0,1 % эпинефрин ерітіндісінің 1 тамшысын 5-10 мл лидокаин ерітіндісіне қосады),

Эпинефрин лидокаиннің сіңуінің баяулауына ықпал етеді және оның әсерін ұзартады.

Айрықша нұсқаулар

Лидокаинді қолданар алдында инъекция орнының ісінуі және қызаруымен білінетін препаратқа жекелей сезімталдыққа тері сынамасын жүргізу керек.

Лидокаинді тек медицина қызметкерлері енгізе алады.

Инъекция орнын құрамында ауыр металдар бар дезинфекциялайтын заттармен өңдегенде ауыру және ісіну түрінде жергілікті реакцияның даму қаупі артады.

Лидокаинді қолданғанда міндетті түрде ЭКГ бақылау керек. Синусты түйін қызметі бұзылған жағдайда, P-Q аралығы ұзарғанда, QRS кеңейгенде немесе жаңа аритмия дамыған жағдайда дозаны азарту/препаратты қабылдауды тоқтату керек.

Лидокаинді қолданар алдында жүрек ауруларында қандағы калий деңгейін қалпына келтіру керек (гипокалиемия лидокаиннің тиімділігін төмендетеді).

Жоспарланған субарахноидальді анестезия жасағанда анестезия жасағанға дейін 10 күннен кешіктірмей МАО тежегіштерін қабылдауды тоқтату керек.

Препаратты кездейсоқ интравазальді (әсіресе қантамырлары көп орналасқан жерлерде жергілікті анестезия жасағанда) немесе субдуральді енгізуден аулақ болу үшін сақтық шараларын сақтау керек.

Препараттың жүрек-қантамыр және орталық жүйке жүйесіне (өйткені эпидуральді анестезияға арналған дозалар, әрдайым субдуральдіге арналғаннан жоғары болғандықтан) жүйелі уытты әсерін қатаң бақылау керек; васкуляризацияланған тіндерге енгізгенде аспирациялық сынама жүргізу ұсынылады.

Неврологиялық аурулармен, омыртқа деформациясымен, септицемиямен және ауыр артериялық гипертензиямен науқастарда омыртқа бөлігі маңайына анестезияда айрықша сақтық шараларын сақтау керек.

Төмен дозаларын ретробульбарлы және стоматологиялық енгізуді қоса бас және мойын аумағына енгізу, сондай-ақ жұлдыз тәрізді ганглийді бөгеу үшін қолдану керек, өйткені препараттың жүйелі уытты әсері ретроградты ағын арқылы мидың қан айналымына өтуі мүмкін.

Ретробульбарлы енгізгенде айрықша сақ болу керек, өйткені келесі жағымсыз әсерлері болуы мүмкін: коллапс, ентігу, құрысулар, қайтымды соқырлық.

Лидокаин айқын аритмияға қарсы әсер білдіретін және өзі аритмияның дамуын туындатуы мүмкін аритмогендік фактор ретінде ықпал ететін болғандықтан, препаратты енгізер алдында анамнезін жинау және бұрын аритмияға шағымданған адамдарға препаратты сақтықпен қолдану керек.

Орташа дәрежедегі жүрек жеткіліксіздігімен, орташа дәрежедегі артериялық гипотониямен, толық емес AV-блокадамен, қарыншаішілік өткізгіштіктің бұзылумен, орташа дәрежедегі бауыр және бүйрек функциясының бұзылуымен (креатинин клиренсі 10 мл/минуттан кем), тыныс алу фукциясының бұзылуымен, эпилепсиямен, жүрекке операция жасағаннан кейін, қатерлі гипертермияға генетикалық бейімділікте, әлсіреген науқастарға және егде жастағы пациенттерге сақтықпен және төмен дозаларда қолдану керек.

Лидокаинді бұлшықет ішіне енгізгенде креатининнің концентрациясы жоғарылауы мүмкін, ол жедел миокард инфарктісі диагнозын қойғанда қателесуге әкелуі мүмкін.

Айқын васкуляризацияланған тіндерді жергілікті анестезиялауда (мысалы, қалқанша безге операция жасаған жағдайда мойынды) препараттың қантамырларына түсуінен аулақ болу үшін айрықша сақтық шараларын сақтау керек.

Қатерлі гипертермияға бейім науқастарда амидтер тобының анестетиктерін қолданудың қауіпсіздігі күмәнді, сондықтан осындай жағдайларда оларды қолданудан аулақ болу керек.

Лидокаинді қан айналымы жеткіліксіздігімен, гиповолемиямен, артериялық гипотензиямен, бауыр және бүйрек жеткіліксіздігімен пациенттерге қолданғанда айрықша сақ болу керек.

Есірткі қолданатын орталық жүйке жүйесінің бұзылыстары бар пациенттерге сақтықпен тағайындайды, өйткені жүрек-қантамыр жүйесі тарапынан кенеттен жағымсыз әсерлер пайда болуы мүмкін. Ұзақ уақыт қолданғанда қандағы электролиттер деңгейін мониторлау керек. Құрысуға бейім, шок жағдайындағы пациенттерге, гипоксияда сақтықпен қолдану керек.

Глаукомасы бар науқастарға лидокаин ерітінділерін ретробульбарлы енгізуге тыйым салынады.

Жүктілік немесе емшек емізу кезеңінде қолдану.

Препарат плацентарлық бөгет арқылы өтеді және шаранада брадикардия туындатуы мүмкін, сондықтан оны жүктілік кезінде тағайындау ұсынылмайды. Препаратты лактация кезеңінде қолдану қажет болса, емшек емізуді тоқтату керек. 

Дәрілік заттың көлік құралдарын немесе қауіптілігі зор механизмдерді басқару қабілетіне ықпал ету ерекшеліктері

Препарат орталық жүйке жүйесінің функциясына әсер етеді, сондықтан лидокаинді қолданғаннан кейін көлік құралын немесе қауіптілігі зор механизмдерді басқармау керек.

Артық дозалануы

Симптомдары: мимикалық бұлшықеттерінің құрысуы қаңқа бұлшықеттерінің тонус-клонустық құрысуларына ауысуымен, диспноэ, тіпті жүрек тоқтауына дейін брадикардия, коллапсқа дейін артериялық қысымның айқын төмендеуі, бас айналуы, жүрек айнуы, құсу.

Емі: науқас өмірлік маңызды көрсеткіштерді мониторингілеумен горизонтальді қалыпта болуы тиіс, тыныс алу жолдарының өткізгіштігін бақылау және оттегін енгізу, орталық жүйке жүйесі тарапынан бұзылыстарда – бензодиазепиндер (мысалы, диазепам) немесе әсері аса қысқа (мысалы, тиопентал) немесе қысқа (мысалы, фенобарбитал) барбитураттар енгізу, жүрек-қантамыр жүйесі тарапынан – атропин енгізу. Гемодиализ тиімсіз. Жүрек тоқтағанда – шұғыл жүрек массажы.

Шығарылу түрі және қаптамасы

3.5 мл препараттан түтік тәрізді түссіз, мөлдір шыныдан жасалған, сындыру сақинасы немесе сындыру нүктесі бар немесе оларсыз ампулаларға құйылады.

Ампулаларға өздігінен желімделетін заттаңбалар, немесе заттаңбалық немесе жазу қағазынан дайындалған заттаңбалар жапсырылады.

5 ампуладан ПЭТФ/ПВХ үлбірден жасалған пішінді ұяшықты қаптамаға салынады.

2 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Ампулаларда сындыру сақинасы немесе сындыру нүктесі жоқ болса, қорапшаға ампулалық скарификатор немесе ампулалық керамикалық пышақ, немесе кесетін керамикалық диск салынады.

Сақтау шарттары

Түпнұсқалық қаптамасында, 25оС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

“Лекхим-Харьков” жеке акционерлік қоғамы

Украина, 61115, Харьков обл., Харьков қ., Северин Потоцкий к-сі, 36-үй

Тіркеу куәлігінің иесі

“Лекхим-Харьков” жеке акционерлік қоғамы

Украина, 61115, Харьков обл., Харьков қ., Северин Потоцкий к-сі, 36-үй

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері

«L-Фарма» ЖШС, 050061,  Алматы қ, Тастақ-1 ықшам ауд.,  3-үй. Тел/факс (727) 374-88-75, (727) 374-88-72