Латопрост
Инструкция
-
русский
-
қазақша
Саудалық атауы
ЛАТОПРОСТ
Халықаралық патенттелмеген атауы
Латанопрост
Дәрілік түрі
0,005% көз тамшы дәрісі, 2,5 мл
Құрамы
1мл ерітіндінің құрамында
белсенді зат - 0,05 мг латанопрост бар,
қосымша заттар: бензалконий хлориді, натрий хлориді, сусыз натрий гидрофосфаты, натрий дигидрофосфаты моногидраты, инъекцияға арналған су.
Сипаттамасы
Көрінетін бөлшектері жоқ мөлдір, түссіз ерітінді
Фармакотерапиялық тобы
Глаукомаға қарсы препараттар мен миотиктер. Простагландин аналогтары. Латанопрост.
АТХ коды S01EЕ01
Фармакологиялық қасиеттері
Фармакокинетикасы
Латанопрост мөлдір қабық арқылы жақсы өтеді, бұл орайда латанопросттың биологиялық белсенді түрі – латанопрост қышқылына дейін гидролизденуі жүреді. Сулы ылғалдағы ең жоғарғы концентрациясына жергілікті қолданудан кейін шамамен екі сағат өткенде жетеді. Препарат бірінші кезекте көздің алдыңғы сегментінде, конъюнктивада және қабақтарда таралады. Препараттың тек болымсыз мөлшері ғана көздің артқы сегментіне жетеді. Латанопрост қышқылы іс жүзінде көз тіндерінде метаболизденбейді, метаболизмі негізінен бауырда жүреді. Латанопрост қышқылының жартылай шығарылу кезеңі 17 минутты құрайды. Негізгі метаболиттері - 1,2-динор- және 1,2,3,4,-тетранор-метаболиттер биологиялық белсенділікке ие емес немесе әлсіз ие болады және негізінен несеппен шығарылады.
Фармакодинамикасы
F2α простагландині аналогы Латанопрост (Латопрост препаратының белсенді заты) FP рецепторлардың селективті агонисі болып табылады және увеосклералық ағып шығу жолымен көзішілік қысымды төмендетеді. Латанопрост сулы ылғалдың өніміне елеулі ықпал етпейді және гематоофтальмиялық бөгетке әсер етпейді. Көзішілік қысымның төмендеуі препаратты енгізгеннен кейін шамамен 3-4 сағат өткенде басталады; барынша жоғары тиімділігі 8-12 сағаттан кейін байқалады. Гипотензиялық әсері 24 сағат бойы жалғасады. Емдік дозада латанопрост көзішілік қан ағысына, жүрек-қан тамыр және тыныс алу жүйесіне әсер етпейді немесе іс жүзінде әсер етпейді. Зерттеулер латанопрост моноем ретінде тиімді болатынын көрсетті, сонымен қатар латанопрост бета-адренэргетиктер (тимолол) антагонистерімен біріккенде белсендірек болатынын көрсеткен зерттеулер де орындалған.
Қолданылуы
-
ашық бұрышты глаукомасы мен офтальмотонусы жоғары емделушілердегі жоғары көзішілік қысымды төмендету
-
көзішілік қысымы жоғары және глаукомасы бар балалардағы жоғары көзішілік қысымды төмендету
Қолдану тәсілі және дозалары
Ересектер (егде науқастарды қоса)
Зақымданған көзге тәулігіне бір рет бір тамшыдан.
Латопростты кешке қарай қолданғанда оңтайлы тиімділігіне қол жеткізіледі. Латопростты қолдану жиілігі тәулігіне бір реттен аспауы тиіс, өйткені едәуір жиі қолданғанда препараттың тиімділігі төмендейтіні анықталған.
Егер бір дозаны қабылдауды өткізіп алса, онда келесі дозаны әдеттегідей енгізе отырып, емдеуді әрі қарай жалғастыру керек.
Ықтимал жүйелі сіңуін төмендету үшін көздің ішкі бұрышындағы көз жасы қапшығын бір минут бойы саусақпен басып тұру керек. Әр тамшыны тамызудан кейін мұны дереу жасау керек.
Көз тамшы дәрісін инстилляциялау алдында жанаспалы линзаларды шығарып алу керек, тамызудан кейін 15 минут өткен соң оларды қайта салуға болады.
Егер біреуден көбірек жергілікті қолданылатын көзге арналған препарат пайдаланылса, оларды кемінде 5 минуттық аралықпен енгізу керек.
8 жастан үлкен балалар
Препаратты ересектерге арналған дозада қолданады.
Жағымсыз әсерлері
Өте жиі (≥1/10):
- нұрлы қабық пигментациясының күшеюі, конъюнктиваның болымсыз гиперемиясы, көздің тітіркенуі (ашуы, қышуы, бөгде денені сезіну), кірпіктің жуандауы және ұзаруы, олардың санының артуы, пигментациялар
Жиі (≥1/100, <1/10):
- мөлдір қабықтың көп жағдайларда симптомсыз өтетін нүктелік эпителиальді транзиторлы эрозиялары, блефарит, көзде ауырсынуды сезіну
Жиі емес (≥1/1000, <1/100):
- қабақтардың ісінуі, көздің құрғауы, кератит, бұлдырап көру, конъюнктивит
- тері бөртпесі
Сирек (≥1/10,0000, <1/1000):
- ирит/увеит, макулярлы ісіну, мөлдір қабықтың ісінуі мен эрозиялары, периорбитальді ісіну, кірпік өсу бағытының бұзылуы, бұл көзге тітіркендіргіш әсер етумен қатар жүруі мүмкін, дистихиаз (дұрыс өсіп тұрған кірпік артынан өсетін кірпіктердің қосымша қатары)
- демікпе, бронх демікпесі ағымының нашарлауы, жедел демікпе ұстамалары және ентігу
- қабақ терісінің қараюы
Өте сирек (<1/10,000):
- осы ауруы бар емделушілердегі стенокардия ағымының нашарлауы
- кеуденің ауыруы
Белгісіз (қолда бар деректермен бағалана алмайды)
- бас айналуы, бас ауыруы
- жүрек соғуының жиілеуі
- миалгия, артралгия
- герпестік кератит
Балалардағы жағымсыз әсерлері ересектердегідей болған. Едәуір жиі жағымсыз әсерлері назофарингит пен гипертермия болды.
Қолдануға болмайтын жағдайлар
- Латопросттың қандай да бір компонентіне (соның ішінде сыртартқыдағы) аса жоғары сезімталдық
- 8 жасқа дейінгі балалар
Дәрілермен өзара әрекеттесуі
Латопрост моноем ретінде де, мысалы бета-адреноблокаторлар (тимолол) сияқты көзішілік қысымды төмендететін басқа препараттармен біріктіргенде де тиімді. Латопрост адреномиметиктермен (дипивалил адреналин), ішетін карбоангидраза тежегіштерімен (ацетазоламид) біріктіріп қолданғанда аддитивті, холиномиметиктермен (пилокарпинмен) біріктіріп қолданғанда жоқ дегенде ішінара аддитивті әсер етеді. Біріктірілген емді тағайындағанда әртүрлі көз тамшы дәрілерін кемінде бес минуттық аралықпен енгізу керек.
Көзішілік қысымның парадоксальді жоғарылауы мүмкін болғандықтан екі немесе одан да көп простагландиндерді, простагландин аналогтарын пайдалану ұсынылмайды. Препараттардың өзара әрекеттесуін зерттеу тек ересектерде жүргізілді.
Айрықша нұсқаулар
Латопрост құрамында бензалконий хлориді бар, ол жанаспалы линзалармен абсорбциялануы мүмкін. Бензалконий хлориді көздің тітіркенуін туындатуы мүмкін.
Латопростты жиі және ұзақ пайдалану көзі құрғайтын емделушілерді немесе мөлдір қабық кемістіктері болған жай-күйлерде тығыз бақылауды қажет етеді.
Латопрост нұрлы қабық пигментациясын күшейтуі мүмкін, ол нұрлы қабық стромасы меланоциттерінде меланин құрамының артуы есебінен көз түсінің біртіндеп өзгеруімен қатар жүреді. Емдеуді бастауға дейін көз түсінің қайтымсыз өзгеретіні туралы емделушіні хабардар ету керек. Әдетте қарашықтың айналасында орналасатын қоңыр пигментация шеткергі жақтарға қарай концентрациялы жайылады және бүкіл нұрлы қабық немесе оның бір бөлігі едәуір қанық қоңыр түске айналуы мүмкін. Нұрлы қабық түсінің өзгеруі көп жағдайларда баяу өрбиді және клиникалық тұрғыда байқалмай қалуы мүмкін. Бір немесе екі көздегі түстің өзгеруі негізгі ретінде қоңыр түсі басым болатын қоңыр-көгілдір, қоңыр-сұр, сары-қоңыр және қоңыр-жасыл сияқты нұрлы қабықтың түсі аралас науқастарда анықталады. Көзі гомогенді көгілдір емделушілерде өзгеріс байқалмаған, ал көзі гомогенді сұр, жасыл және қоңыр емделушілерде өзгерістер өте сирек байқалған. Клиникалық зерттеулер барысында пигменттің трабекулярлы торға немесе көздің алдыңғы камерасының қандай да бір басқа бөлігіне жинақталуы анықталмаған.
Нұрлы қабығы пигментациясының күшеюіне қарамастан науқастарда көзішілік қысымның төмендеуі байқалған. Осылайша, Латопростпен емдеу нұрлы қабығының пигментациясы күшейетін науқастарда жалғастырылуы мүмкін. Бұл науқастар ұдайы тексеруден өтулері тиіс және клиникалық жағдайға байланысты емдеу тоқтатылуы мүмкін.
Нұрлы қабық пигментациясының күшеюі әдетте емдеудің бастапқы жылында кездеседі. Емдеудің екінші және үшінші жылы бұл сирек болады және емдеудің төртінші жылынан кейін байқалмайды.
Нұрлы қабық пигментациясының дәрежесі уақыт өте келе төмендейді. Препаратты тоқтатқаннан кейін коңыр пигмент мөлшерінің әрі қарай артуы байқалмаған, алайда түстің өзгеруі тұрақты болып қалуы мүмкін.
Латопростты қолданғанда қабақ терісінің қайтымды болуы мүмкін қараюы байқалған. Латопрост кірпіктің біртіндеп қараюын, жуандауын және ұзаруын, олардың саны артуын және өсу бағытының бұзылуын туындатуы мүмкін. Бұл өзгерістер емдеуді тоқтатқаннан кейін қайтымды болады.
Макулярлы ісіну, соның ішінде кистоздылары негізінен афакиясы, жалған факиясы, көз бұршағы артқы капсуласының зақымдануы бар нуқастарда немесе макулярлы ісінудің даму қаупінің белгілі факторлары бар емделушілерде кездескен; бұл емделушілерде Латопрост сақтықпен қолданылуы тиіс.
Латопростты неоваскулярлы және іштен туа біткен глаукомада қолдану туралы шектеулі деректер бар және бұл жай-күйде препаратты сақтықпен қолдану ұсынылады.
Латанопрост қарашыққа әсер етпейді немесе болымсыз әсер етеді, бірақ бұл орайда жабық бұрышты глаукоманың жедел ұстамаларында қолдану тәжірибесі жоқ. Осылайша, бұл жай-күйлерде үлкен тәжірибе жинақталғанға дейін латанопростты абайлап қолдану ұсынылады.
Демікпесі бар науқастарда препаратты қолданудың шектеулі тәжірибесі бар. Демікпе мен ентігу асқынған кейбір жағдайлары туралы хабарламалар бар. Сондықтан демікпесі бар науқастарға препаратты абайлап қолдану қажет.
Латопрост сыртартқысында герпестік кератиті бар науқастарда сақтықпен қолданылуы тиіс және Herpes simplex туындатқан кератит жағдайларында және сыртартқысында, әсіресе простагландиндер аналогтарына байланысты қайталанатын герпестік кератиті бар емделушілерде препаратты қолданудан аулақ болу керек.
Жүктілік пен лактация кезеңі
Латопростты жүктілікте қолдану қауіпсіздігі анықталмаған. Жүктілік кезінде препаратты қолдану жүктіліктің өтуіне, ұрыққа және жаңа туған нәрестеге зор қаупі бар. Латопростты жүктілік кезінде қолдануға болмайды.
Латанопрост пен оның метаболиттері емшек сүтіне өтуі мүмкін, сондықтан бұл препаратты бала емізу кезінде қолдануға болмайды, бала емізу тоқтатылуы тиіс.
Дәрілік заттың көлік құралын немесе әлеуетті қаупі бар механизмдерді басқару қабілетіне әсер ету ерекшеліктері
Көз тамшы дәрілерін тамызу бірнеше минут бойы транзиторлы "көз алдының буалдырлануы" сезімін туындатуы мүмкін, мұны автокөлікті жүргізгенде және қозғалатын механизмдермен жұмыс істегенде ескеру қажет.
Артық дозалануы
Симптомдары: көздің тітіркенуі мен конъюнктиваның қызаруы, жағымсыз әсерлерінің күшеюі.
Емі: симптоматикалық.
Шығарылу түрі мен қаптамасы
Алғашқы ашылуы бақыланатын көгілдір түсті бұралып жабылатын қалпақшасы бар пластикалық құтыға 2.5 мл препараттан құйылған. 1 құтыдан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пашкеге салынған.
Сақтау шарттары
Жарықтан қорғалған жерде, 2 °С-ден 8°С-ге дейінгі температурада сақтау керек.
Ашылған құтыны 25оС-ден аспайтын температурада 4 аптадан асырмай сақтау керек.
Балалардың қолы жетпейтін жерде сақтау керек!
Сақтау мерзімі
2 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші
Sun Pharmaceutical Industries Ltd.
Заңды мекенжжайы:
Acme Plaza, Andheri-Kurla Road,
Andheri (E), Mumbai 400 059, Үндістан
Өндірістің орналасқан мекенжайы:
Halol-Baroda Highway,Halol-389 350,Dist.Panchmahal,Gujarat, Үндістан
Тіркеу куәлігі иесінің атауы мен елі
Sun Pharmaceutical Industries Ltd., Үндістан
Қазақстан Республикасының аумағында тұтынушылардан өнімнің (тауардың) сапасы жөніндегі шағымдарды қабылдайтын ұйымның мекенжайы:
050004, Алматы қ-сы, Төлебаев к-сі , 38, 5 қабат
Тел. (727) 250-92-35, факс (727) 250-33-64
sunreports@intelsoft.kz, sunalmaty@intelsoft.kz