Ламивудин и зидовудин (150 мг/300 мг, Страдекс Шасан Лимитед)

• русский
• қазақша

• Скачать инструкцию медикамента

Саудалық атауы

Ламивудин және зидовудин

Халықаралық патенттелмеген атауы

Жоқ

Дәрілік түрі

Үлбірлі қабықпен қапталған таблеткалар, 150 мг/300 мг

Құрамы

Бір таблетканың құрамында

белсенді заттар: 150.00 мг ламивудин, 300 мг зидовудин,

қосымша заттар: микрокристалды целлюлоза, натрий крахмалының гликоляты (Приможель), повидон (К-30), сусыз коллоидты кремний, тазартылған тальк, магний стеараты,

қабықтың құрамы: Опадрай ақ қабық (Y-1-7000): гидроксипро-пилметилцеллюлоза 2910/гипромеллоза 5 сP, титанның қостотығы (Е171), полиэтиленгликоль 400 (Mакрогол).

Сипаттамасы

Ақтан ақ дерлік түске дейінгі, үлбірлі қабықпен қапталған, сопақша пішінді, бір жақ бетінде "LZ" өрнегі және басқа жақ бетінде сындыру сызығы бар таблеткалар.

Фармакотерапиялық тобы

Вирустарға қарсы тікелей әсер ететін препараттар. АИТВ-инфекциясын емдеуге арналған вирусқа қарсы препараттар біріктірілімі. Зидовудин және ламивудин.

АТХ коды J05АR01

 

Фармакологиялық қасиеттері

Фармакокинетикасы

Ламивудин және зидовудин асқазан-ішек жолынан (АІЖ) жақсы сіңеді. Ересектерде ішке қабылдағаннан кейін ламивудиннің биожетімділігі 80–84%, зидовудиндікі 60–70% құрайды.

Ашқарынға қабылдағанда 150 мг ламивудин + 300 мг зидовудин жекелей қолданған кездегі 150 мг ламивудинге және 300 мг зидовудинге баламалы болып шықты.

150 мг ламивудин + 300 мг зидовудиннің «концентрация-уақыт» қисығы астындағы ауданы (AUC∞) және жартылай шығарылу кезеңі, препараттың тамақпен бірге немесе ашқарынға қолданғанына байланыссыз, бірдей болды. Алайда препаратты тамақпен бірге қолданғанда ең жоғары концентрациясының (Cmax) сіңу жылдамдығы және ең жоғары концентрацияға жету уақыты (tmax) баяулады, яғни препараттың организмге сіңуіне көп уақыт қажет болды. Жоғарыдағыны есепке алар болсақ, препарат тамақпен бірге де, сондай-ақ ашқарынға да қолданылуы мүмкін.

Ламивудиннің және зидовудиннің 150 мг/300 мг бір реттік дозасын ішке қабылдағаннан кейін ламивудиннің және зидовудиннің ең жоғары концентрациялары, сәйкесінше, 0,75 (0,50–2,00) сағ. және 0,50 (0,25–2,00) сағ. соң байқалды және, сәйкесінше, 1,6 мкг/мл (32%) және 2,0 мкг/мл (40%) құрады. AUC үшін мәндері, сәйкесінше, 6,1 мкг·сағ./мл (20%) және 2,4 мкг·сағ./мл (29%) құрады.

Ламивудин емдік дозалар ауқымында фармакокинетикасының дозаға байланыстылығын және қан плазмасының негізгі ақуызы альбуминмен байланысының шектеулі екендігін көрсетті (зертханалық жағдайларда қан сарысуында альбумин 36%-дан аз).

Зидовудиннің қан плазмасы ақуыздарымен байланысуы 34-38% құрайды.

Ламивудин және зидовудин орталық жүйке жүйесіне (ОЖЖ) және жұлын-ми сұйықтығына (ЖМС) гематоэнцефалдық бөгет (ГЭБ) арқылы өтеді. Пероральді қабылдаудан кейін 2–4 сағаттан соң ликвордағы және қан сарысуындағы ламивудин мен зидовудин концентрациясы арасындағы қатынас, сәйкесінше, 0,12 және 0,5 құрайды.

Ламивудинмен метаболизмдік дәрілік өзара әрекеттесу ықтималдылығы, бауырлық метаболизмнің мардымсыз (5-10%) және плазма ақуыздарымен байланысуының әлсіздігіне байланысты, төмен болып табылады. Ламивудин организмнен көбіне өзгермеген күйінде бүйрек арқылы шығарылады. Ламивудиннің жартылай шығарылу кезеңі 5–7 сағатты құрайды. Ламивудиннің шығарылуы бүйрек функциясына байланысты.

Зидовудиннің 5'-глюкурониді қан плазмасындағы және несептегі препараттың негізгі метаболиті болып табылады және қабылданған дозаның 50-80%-ға жуығын құрайды, ол бүйректік экскреция жолымен шығарылады. Вена ішіне енгізуден кейін қаннан метаболит - 3'-амино-3'-дезокситимидин табылды.

Органикалық катиондық тасымалдау жүйесі арқылы көбіне > 70% бүйректік клиренсімен бірге, ламивудиннің орташа жалпы клиренсі шамамен 0,32 л/сағ./кг құрайды. Бүйрек функциясының жеткіліксіздігі бар пациенттерге жүргізілген зерттеулер бүйрек дисфункциясының ламивудиннің шығарылуына ықпал ететіндігін көрсетеді. Дозаны төмендету креатинин клиренсі ≤50 мл/мин болатын пациенттер үшін қажет болады.

Зидовудинді вена ішіне пайдаланып жүргізілген зерттеулерде, оның плазмадағы жартылай шығарылуының орташа ақырғы кезеңі 1,1 сағатты, ал орташа жалпы клиренсі 1,6 л/сағ./кг құрады. Зидовудиннің бүйректік клиренсі 0,34 л/сағ./кг есептеліп, бүйректердегі шумақтық сүзілісті және белсенді өзекшелік секрецияны көрсетеді. Зидовудиннің концентрациясы бүйрек функциясының жеткіліксіздігі өршіген пациенттерде жоғары болады.

Фармакодинамикасы

Ламивудин және зидовудин АИТВ-1 және АИТВ-2 кері транскриптазасының іріктелген тежегіші болып табылады. Ламивудин жасушалар өсіріндісінде АИТВ репликациясын бәсеңдетуге қатысты зидовудиннің синергисі болып табылады. Ламивудин және зидовудин жасушаішілік киназалармен 5М-трифосфатқа (ТФ) дейін біртіндеп метаболизденеді. Ламивудин-ТФ және зидовудин-ТФ АИТВ кері транскриптазасы үшін субстраттар және осы ферменттің бәсекелес тежегіштері болып табылады. Препараттың вирустарға қарсы белсенділігі көбіне вирустық ДНҚ тізбегіне монофосфорлы түрде енуімен жүзеге асырылады, соның нәтижесінде тізбектер үзіледі. Ламивудин және зидовудин трифосфаттарының адам жасушаларының ДНҚ-полимеразаларына едәуір аз ұқсастығы бар.

Ламивудинді және зидовудинді қолдану бұрын антиретровирустық ем қабылдамаған пациенттерде зидовудинге резистенттіліктің дамуын баяулатады.

Ламивудинге АИТВ резистентілікке вирустық кері транскриптазаның белсенді аймағына жақын орналасқан M184V амин қышқылының өзгерулері тартылады. M184V мутациялары ламивудинге сезімталдықты азайтады. Зидовудинге резистентті вирустық штаммдар бір мезгілде ламивудинге төзімділік танытқанда зидовудинге сезімтал болуы мүмкін.

M184V RT тән айқаспалы резистенттілік антиретровирустық дәрілер класының – нуклеозидтік тежегіштер аясында шектеледі. Ламивудин мен зидовудин арасында айқаспалы резистенттілік байқалған жоқ.

Қолданылуы

- ересектерде және 12 жастан асқан балаларда АИТВ-инфекциясын емдеу үшін біріктірілген антиретровирустық ем құрамында

Қолдану тәсілі және дозалары

Емдеуді АИТВ-инфекциясын емдеу тәжірибесі бар дәрігер жүргізуі тиіс.

Таблетканы таблетканы сумен ішіп тұтастай жұтқан жөн. Ламивудин мен зидовудинді тамақ ішуге қарамай қабылдай беруге болады.

Дозаны төмендету немесе азайту, сондай-ақ Ламивудин мен зидовудин компоненттерінің біреуін тоқтату қажет болған жағдайларда ламивудиннің және зидовудиннің жеке препараттарын қолдануға болады.

Ересектерге және 12 жастан асқан және дене салмағы 30 кг-ден жоғары болатын балаларға тәулігіне екі рет бір таблеткадан тағайындайды.

Бүйрек функциясының жеткіліксіздігінде қолдану

Бүйрек функциясының жеткіліксіздігі бар пациенттерде қандағы ламивудин мен зидовудин концентрациялары олардың элиминациясы салдарынан жоғарылайды. Бүйрек функциясы бұзылған (креатинин клиренсі минутына 50 мл-ден азырақ) пациенттерге бірқатар жағдайларда ламивудин мен зидовудин дозасын жекелей таңдау қажет болғандықтан, ламивудиннің және зидовудиннің жеке препараттарын тағайындау ұсынылады.

Бауыр функциясының бұзылуында қолдану

Бауыр функциясының жеткіліксіздігінде оның глюкурон қышқылымен байланысуының баяулауы нәтижесінде зидовудиннің жиналып қалуы байқалуы мүмкін. Бауыр функциясы ауыр дәрежеде бұзылған пациенттерде, зидовудиннің дозасын жекелей таңдау мүмкін болуы үшін, ламивудиннің және зидовудиннің жеке препараттарын қолдану ұсынылады.

Гематологиялық жағымсыз әсерлері бар пациенттерде қолдану

Айқын анемияда (гемоглобин деңгейі 9 г/дл-ден аз немесе 5,59 ммоль/л) немесе нейтропенияда (нейтрофилдер саны 1,0×109/л-ден аз) зидовудин дозасын түзету қажет болуы мүмкін. Осы жағымсыз әсерлердің даму ықтималдылығы емдеуді бастағанға дейін сүйек кемігінің қоры төмендеген пациенттерде, әсіресе АИТВ-инфекциясын жұқтырған пациенттерде жоғары. Ламивудин мен зидовудинді тағайындай отырып, ламивудиннің және зидовудиннің дозасын жекелей таңдау мүмкін болмайтындықтан, ламивудиннің және зидовудиннің жеке препараттарын қолдану ұсынылады.

Егде жастағы пациенттерге қолдану

Ламивудинді және зидовудинді егде жастағы адамдарда қолдану жөнінде арнайы деректер жоқ. Алайда егде жастағы пациенттерді емдеген кезде, жасқа байланысты өзгерулерді, мысалы, гематологиялық көрсеткіштердің өзгеруін және бүйрек функциясының бұзылуын ескере отырып, аса сақтық таныту ұсынылады.

Жағымсыз әсерлері

Жағымсыз реакциялар АИТВ-ні емдеу үдерісінде Ламивудин мен зидовудин препаратын тағайындаған кезде және ламивудинді және зидовудинді жеке бөлек тағайындағанда байқалды. Көрсетілген жағымсыз реакциялар әрдайым тікелей ламивудинге/зидовудинге жата бермейтіні анық, немесе АИТВ-ні емдеу үшін пайдаланылатын кең ауқымды препараттарды қолдану нәтижесі, немесе сол аурудың өзінің салдары болып табылады. Ламивудин/зидовудин біріктірілімін тағайындағанда аддитивті уыттылық болмайды.

Көрініс беру жиілігіне сәйкес, жағымсыз реакциялар: өте жиі (>1/10), жиі (>1/100, <1/10), жиі емес (>1/1000, <1/100), сирек (>1/10, 000 және <1/1000), ете сирек (<1/10, 000) деп белгіленеді.

Ламивудинге реакциялар

Жиі

• бас ауыру, ұйқысыздық

• жөтел, мұрынның бітелуі

• суықтау

• гиперлактатемия

• жүректің айнуы, құсу, іштің жоғарығы бөлімінің ауыруы, диарея

• бөртпе, алопеция

• артралгия, бұлшықет бұзылулары

• әлсіздік, қажығыштық, қызба

Жиі емес

• анемия, нейтропения, тромбоцитопения

• бауырлық ферменттер (АСТ, АЛТ) белсенділігінің өтпелі жоғарылауы

Сирек

• сүт қышқылды ацидоз

• шелмайдың қайта таралуы/жиналуы, вирустарға қарсы препараттармен біріктірілген емді қоса, мультифакторлы этиологияға иеленген

• сарысулық амилаза белсенділігінің жоғарылауы, панкреатит (препаратты қабылдаумен байланысы анықталған жоқ)

• рабдомиолиз

• гепатит

• Квинке ісінуі

Өте сирек

• эритроцитарлы аплазия

• шеткері нейропатия, парестезия жүргізілген еммен байланысы анықталған жоқ)

Зидовудинге реакциялар

Өте жиі

• жүректің айнуы

- бас ауыру

Жиі

• анемия (гемотрансфузия қажет болуы мүмкін), нейтропения және лейкопения; бұл жағдайлар зидовудиннің жоғары дозаларын (тәулігіне 1200-1500 мг) қолданғанда және АИТВ-инфекциясы ауыр дәрежеде болатын пациенттерде (әсіресе емдеуді бастағанға дейін сүйек кемігінің қоры төмендеген пациенттерде), көбіне CD4 жасушалар саны 100/мм3 деңгейінен төмен болғанда дамиды; мұндай жағдайларда препарат дозасын төмендету немесе оны тоқтату қажет етілуі мүмкін. Нейтропенияның даму жиілігі емнің басында сарысудағы нейтрофилдер саны, гемоглобин және B12 дәруменінің мөлшерінің төмендігі байқалған пациенттерде жоғарылайды.

• гиперлактатемия

• бас айналу

• құсу, іш тұсының ауыруы, диарея

• ауыр ферменттері мен билирубин белсенділігінің жоғарылауы

• миалгия

• дімкәстік

Жиі емес

• тромбоцитопения, панцитопения (сүйек кемігінің гипоплазиясымен бірге)

• диспноэ

• метеоризм

• бөртпе, қышыну

• миопатия

• қызба, жайылған ауыру, астения

Сирек

• эритроцитарлы аплазия

• сүт қышқылды ацидоз

• - шелмайдың қайта таралуы/жиналуы (вирустарға қарсы препараттармен біріктірілген емді қоса, мультифакторлы этиологияға иеленген)

- мазасыздық, депрессия

• ұйқысыздық, парестезиялар, ұйқышылдық, ойлау шапшаңдығының төмендеуі, құрысулар

• кардиомиопатия

• жөтел

• ауыз қуысының шырышты қабығының пигментациясы, дәмнің бұзылуы

• панкреатит

• стеатозбен айқын гепатомегалия

• тырнақтардың және тері жабындарының пигментациясы

• есекжем

• қатты тершеңдік

• несептің жиі бөлініп шығуы

• гинекомастия

• суықтау, кеуде қуысының ауыруы, тұмау тәрізді симптомдар

Өте сирек

• апластикалық анемия

Препараттың болжамды жағымсыз реакциялары жөнінде ұсыну дәрілік заттың пайда/қаупі арақатынасына үздіксіз мониторингті жүзеге асыруға мүмкіндік беретін өте маңызды сәт болып табылады. Медицина қызметкерлері кез келген болжамды жағымсыз реакциялар жөніндегі ақпаратты нұсқаулықтың соңында көрсетілген байланысқа, сондай-ақ ақпарат жинайтын ұлттық жүйе арқылы ұсынғаны жөн.

Қолдануға болмайтын жағдайлар

- ламивудинге, зидовудинге немесе препараттың қандай да болсын қосымша компонентіне жоғары сезімталдық

- ауыр дәрежедегі нейтропения (нейтрофилдер саны 0,75-тен аз x 109/л) немесе анемия (гемоглобин деңгейі 7.5 г/дл-ден аз немесе 4.65 ммоль/л)

- шеткері нейропатия

- бүйрек функциясының бұзылуы (креатинин клиренсі < 50 мл/мин)

- жүктілік және лактация кезеңі

- 12 жасқа дейінгі және дене салмағы 30 кг-ден аз балалар

Дәрілермен өзара әрекеттесуі

Препараттың құрамында ламивудин және зидовудин бар болғандықтан, ол оның компоненттерінің әрқайсысына тән кез келген өзара әрекеттесуге түсуі мүмкін. Клиникалық зерттеулерде зидовудин мен ламивудин арасында клиникалық тұрғыдан маңызды өзара әрекеттесулер байқалған жоқ.

Зидовудин ең бірінші кезекте глюкуронилтрансфераза (UGT) ферменттерімен метаболизденеді; UGT ферменттерінің индукторларымен немесе тежегіштерімен бірге қолдану зидовудиннің экспозициясын өзгертуі мүмкін. Ламивудин бүйрек арқылы шығарылады. Ламивудиннің несептегі белсенді бүйректік секрециясы органикалық аниондардың ақуыз-тасымалдаушылары арқылы жүреді; ламивудинді органикалық аниондардың ақуыз-тасымалдаушысының тежегіштерімен немесе нефроуытты препараттармен бірге қолдану ламивудиннің экспозициясын арттыруы мүмкін.

Ламивудин және зидовудин P450 цитохромының (CYP 3A4, CYP 2C9 немесе CYP 2D6 сияқты) ферменттерінің жәрдемімен елеулі дәрежеде сіңбейді, сондай-ақ олар осы ферментті жүйені тежемейді немесе белсендірмейді. Сондықтан протеазаның антиретровирустық тежегіштерімен, нуклеозидтік емес және Р450 ірі ферменттерімен метаболизденетін басқа да препараттармен өзара әрекеттесуі неғайбыл.

Өзара әрекеттесулеріне зерттеулер ересектердің ғана қатысуымен жүргізілді. Төменде берілген тізімді толық тізім ретінде қарастырмаған жөн, бірақ ол зерттелген класты көрсетеді.

Аббревиатурлар:  = артуы; =төмендеуі; = елеулі өзгерулерсіз;

AUC= Концентрацияның уақытқа байланысты қисығы астындағы аудан;

Cmax = бақыланатын ең жоғары концентрация;

CL/F = препаратты пероральді түрде қабылдаған кезде білінетін клиренсі

Дәл механизмі әзірше түсініксіз болса да, егер зидовудин АИТВ емдеу әдісінің құрамдас бөлігі ретінде пайдаланылса, рибавиринмен байланысты анемияның өршуі жөнінде мәлімделді. Рибавиринді зидовудинмен қатар пайдалану анемия қаупінің жоғарылауына байланысты ұсынылмайды.

Егер анемияның пайда болу қаупі анықталса, антиретровирустық емде біріктірілген режимде зидовудинді алмастыруға көңіл бөлу қажет. Бұл анемияны туындатқан зидовудинді қабылдау тәжірибесі бар пациенттер үшін аса маңызды.

Ламивудин мен кладрибинді бір мезгілде қабылдау ұсынылмайды.

Эмтрицитабиннің Ламивудинмен және зидовудинмен біріктірілімі ұсынылмайды.

Қатар жүргізілетін ем, әсіресе жедел сатысын потенциалды нефроуытты немесе миелосупрессиялық дәрілік препараттар (яғни жүйелік пентамидин, дапсон, пириметамин, ко-тримоксазол, амфотерицин, флуцитозин, ганцикловир, интерферон, винкристин, винбластин және доксорубицин) жәрдемімен емдеу сондай-ақ зидовудинге жағымсыз реакциялар қаупін арттыруы мүмкін. Егер Ламивудин және зидовудин препараты және осы медициналық препараттардың қандай да болсын бірімен қатар емдеу қажет болса, онда бүйрек функциясына мониторингке, қан көрсеткіштеріне ерекше көңіл бөлу қажет, және, егер қажет болса, бір немесе бірнеше заттардың дозасы төмендетілуі тиіс.

Клиникалық зерттеулердің шектеулі деректері котримоксазолмен, аэрозольді пентамидинмен, пириметаминмен және ацикловирмен бірге, профилактика үшін пайдаланылатын дозаларда зидовудинге жағымсыз әсерлердің елеулі жоғарылау қаупін көрсеткен жоқ.

Айрықша нұсқаулар

Ламивудин және зидовудин вирустық жүктемені төмендетеді және CD4+ жасушалар санын арттырады. Ламивудиннің зидовудинмен біріктірілімі, сондай-ақ басқа препараттармен қатар ламивудинмен және зидовудинмен емдеу аурудың өршу және өліммен аяқталу қаупін төмендетеді.

Дозаны жекелей таңдау қажет болғанда ламивудиннің және зидовудиннің жеке препараттарын қолдану ұсынылады. Дәрігерлер осы препараттарды қолдану жөніндегі ақпаратты басшылыққа алғаны жөн.

Оппортунистік инфекциялар: 150 мг/300 мг ламивудин мен зидовудинді қолданып жүрген немесе вирустарға қарсы басқа емнен өтіп жүрген пациенттерде оппортунистік инфекциялар және АИТВ-инфекцияның басқа да асқынулары жалғасуы және өршуі мүмкін. Сондықтан пациент АИТВ-инфекцияларды емдеуге маманданған кәсіби дәрігердің үнемі бақылауында болуы тиіс.

АИТВ-инфекцияның таралуы: пациенттер вирусқа қарсы ем және 150 мг/300 мг ламивудин мен зидовудинді қолдану АИТВ-инфекциясының басқа адамдарға (жыныстық жолмен немесе қан арқылы) жұғу қаупін азайтпайды. Сондықтан сақтандырудың тиісті шаралары жөнінде ұмытпаған жөн.

Гематологиялық жағымсыз реакциялар: зидовудин қолданылып жүрген пациенттерде келесі жағымсыз реакциялар: анемия, нейтропения және лейкопения (әдетте нейтропения қатар жүреді) пайда болуы мүмкін. Мұндай реакциялар зидовудиннің жоғары дозаларын (күніне 1200-1500 мг) қабылдап жүрген пациенттерде, тікелей емдеуге дейін организмде сүйек кемігінің аздаған қоры бар және АИТВ асқынған сатылары бар пациенттерде өте жиі байқалады. Сондықтан препаратты қабылдап жүрген мұндай пациенттерде гематологиялық параметрлерді өте мұқият бақылаған жөн. Гематологиялық жағымсыз әсерлер әдетте препаратпен емдеудің бастапқы кезеңдерінде байқалмайды, алайда төрт-алты апта емдегеннен кейін өзін көрсетеді. Асқынған және симптоматикалық АИТВ бар пациенттерге әдетте емдеудің алғашқы үш аптасы ішінде әрбір апта сайын, ал содан кейін айына бір рет талдау жүргізуге қан тапсыру ұсынылады. АИТВ-инфекцияның ерте сатысындағы пациенттерде гематологиялық жағымсыз реакциялар сирек байқалады. Пациенттің жалпы жағдайына байланысты қан талдауы сирек, мысалы, үш айда бір рет жасалуы мүмкін. Зидовудиннің дозасын қосымша түзету ауыр анемия жағдайларында және ламивудин мен зидовудиннің жәрдемімен ем жүргізілуіне байланысты пайда болған сүйек кемігі функциясының бұзылуларында (миелосупрессияларда); немесе бұрын сүйек кемігінің бұзылулары бар, яғни гемоглобин деңгейі 9 г/дл-ден аз (5.59 ммоль/л), немесе нейтрофилдер саны 1.0 x 109/л-ден азды құрайтын пациенттерге тағайындалады. 150 мг/300 мг ламивудин мен зидовудин дозаларын түзету мүмкін болмағанда ламивудиннің және зидовудиннің жеке препараттарын тағайындау қажет. Емдеуші дәрігер осы дәрілік заттарды жекелей қолдану жөніндегі нұсқаулықтармен танысып шыққаны жөн.

Балалар: дозаны нәрестенің салмағын есепке алып таңдау мүмкін болмағандықтан, 12 жасқа толмаған балаларға препаратты қолдануға болмайды. Мұндай жағдайда емдеуші дәрігердің ламивудинді және зидовудинді жекелей қолдану жөніндегі нұсқаулықпен мұқият танысып шыққаны жөн.

Жүктілік кезінде қолдану: препараттың белсенді заттары ДНҚ репликациясын басатын болғандықтан, онда кез келген, әсіресе жүктіліктің алғашқы триместрінде қолдану шарана үшін потенциалды қауіпті туындатады.

Панкреатит: препаратты қолданған кезде пациенттерде панкреатиттің пайда болу жағдайлары өте сирек байқалды. Мұның препаратпен вирусқа қарсы ем жүргізумен немесе АИТВ-инфекциядан пайда болғаны анықталған жоқ. Алайда емдеу панкреатитке қандай да бір белгілер, симптомдар немесе оң зертханалық талдау пайда болған жағдайда дереу тоқтатылады.

Сүт қышқылды ацидоз: зидовудин қабылдап жүрген пациенттерде сирек, бірақ өліммен аяқталуы мүмкін сүт қышқылды ацидоз және стеатоз симптомдары бар айқын гепатомегалия жағдайлары сипатталған. Мұндай аурулар нуклеозидтік аналогтарды қолдануға байланысты пайда болады.

Қанда сүт қышқылының симптоматикалық жоғарылауының ерте белгілеріне ас қорыту бұзылыстарының аздаған симптомдары (жүректің айнуы, құсу және абдоминальді аурулар), спецификалық емес жайсыздық, тәбеттің жоғалуы, салмақтың кемуі, респираторлық симптомдар (терең және/немесе жиі тыныс алу) немесе неврологиялық симптомдар (жүйке жүйесінің тежелушілігін қоса) жатады.

Лактоцидоз өлім деңгейінің жоғарылығымен сипатталады және панкреатитпен, бауыр немесе бүйрек функциясының жеткіліксіздігімен байланысты болуы мүмкін. Сүт қышқылды ацидоз әдетте бірнеше ай емдегеннен кейін пайда болады. Нуклеозидтік аналогтармен емдеу қанда сүт қышқылыны симптоматикалық жоғарылауы және метаболизмдік/сүт қышқылды ацидоз, өршіген гепатомегалиялар пайда болған кезде және аминотрансферазалар белсенділігі күрт артқанда тоқтатылады. Нуклеозидтердің аналогтарын гепатомегалиясы, гепатиті немесе бауыр ауруларының немесе стеатоздың даму қаупінің басқа факторлары бар пациентте (әсіресе семіздікке шалдыққан әйелдерге) тағайындаған кезде сақтық танытқан жөн. Қатар жүретін ауруы – С гепатиті бар және альфа интерферон мен рибавирин қабылдап жүрген пациенттер өте жоғары қауіпке ұшырайды. Қауіп тобындағы пациенттер мұқият дәрігерлік бақылаудан өтуі тиіс.

Митохондриялық дисфункция: зертханалық жағдайларда нуклеозидтердің және олардың аналогтарының қандай да бір дәрежеде митохондрияларды зақымдайтыны байқалды. АИТВ-ға теріс талдама алынған, ана жатырындағы және/немесе туғаннан кейін нәрестеге нуклеозидті аналогтарды қолданғанда митохондриялық дисфункция болғаны жөнінде деректер алынды. Препараттың негізгі жағымсыз әсерлеріне: гематологиялық бұзылулар (анемия, нейтропения), метаболизмдік бұзылулар (гиперлактатемия, гиперлипаземия) жатады. Алайда мұндай әсерлер әдетте өтпелі. Сондай-ақ неврологиялық бұзылыстардың кешірек көрініс беретін симптомдары – гипертония, құрысу және пациенттің мінез-құлқының бұзылуы жөнінде деректер алынды. Бұл неврологиялық бұзылыстарға қатысты олардың қысқа мерзімдік немесе тұрақты болып табылатындығы-табылмайтындығы әзірше анықталған жоқ. Аналары нуклеозидтермен немесе олардың аналогтарымен емделген нәрестелерде де (тіпті АИТВ-теріс балаларда да) жатырда жатқан кезінде-ақ митохондриялық дисфункцияның симптомдары мен белгілері пайда болуы мүмкін, сондықтан жаңа туған нәрестелер клиникалық тексерілуден өткізілуі және тиісті белгілер мен симптомдар бар болған жағдайда митохондриялық дисфункцияның даму ықтималдығына зертханалық талдау жүргізілуі тиіс. Алайда жағымсыз реакцияларына қарамастан, АИТВ-нің анасынан нәрестеге тұқым қуалау арқылы жұғуына жол бермеу үшін жүкті әйелдерде антиретровирустық емді қолдану ұсынылады.

Липодистрофия: біріктірілген антиретровирустық ем АИТВ бар пациенттерде теріасты шеліндегі май тіндері көлемінің азаюымен немесе ұлғаюымен қатар жүреді. Қазіргі таңда әрі қарайғы зардаптары жөнінде деректер әзірге белгісіз. Препараттың осы бағыттағы әсер ету механизмдері әзірше анықталған жоқ. Қазіргі таңда висцеральді липоматоздың протеаза (PIs) тежегіштерімен, липоатрофияның кері транскриптазаның нуклеозидтік тежегіштерімен (NRTIs) өзара әрекеттесуі жөнінде тек негізсіз болжамдар ғана бар. Липодистрофия дамуының жоғары қаупі организмнің кейбір егде жас сияқты жекелеген ерекшеліктеріне, және антиретровирустық ем ұзақтығы және қатар жүретін метаболизмдік бұзылулар сияқты дәрілік өзара әрекеттесу факторларына байланысты. Тексерулер жүргізген кезде сондай-ақ пациенттерде майлардың қайта таралуының сыртқы белгілеріне назар аудару ұсынылады. Қан сарысуында липидтердің жеткіліксіздігіне және қандағы глюкоза деңгейіне назар аудару қажет. Липидтік бұзылуларда тиісті медициналық ем жүргізген жөн.

Иммундық қайта белсенділену синдромы: иммунитеті төмендеген, АИТВ жұқтырған пациенттерде біріктірілген антиретровирустық емді (CART) қолданған кезде күрделі клиникалық жағдайларды немесе симптомдардың нашарлауын туындататын симптомсыз немесе қалдық оппортунистік патогенді микроорганизмдерге қабыну реакциялары пайда болуы мүмкін. Әдетте мұндай реакциялар CART жәрдемімен алғашқы бірнеше апталарда немесе айларда байқалады. Оларға мыналар: цитомегаловирустық ретиниттер, диффузды және/немесе ошақтық микобактериялық инфекциялар және Pneumocystis carinii әсерінен туындаған пневмония (пневмоцистоз) жатады. Кез келген қабыну реакцияларына баға беріледі және, қажет болғанда, ем жүргізіледі.

Бауыр аурулары: егер ламивудин АИТВ және В гепатитін бір мезгілде емдеу үшін қолданған жағдайда, В гепатитін емдеу үшін ламивудинді қолдану жөніндегі қосымша ақпарат ламивудиннің нұқсаулығында көрсетіледі.

Зидовудиннің қауіпсіздігі және тиімділігі бауырдың күрделі аурулары бар пациенттерде анықталған жоқ. Созылмалы В немесе С гепатиті бар пациенттерді емдеу үшін біріктірілген антиретровирустық емді қолданған жағдайда пациенттер бауыр тарапынан өліммен аяқталатын күрделі жағымсыз әсерлердің пайда болу қаупіне жатады. В немесе С гепатиттеріне бір мезгілде вирусқа қарсы ем жүргізген жағдайда осы дәрілік заттарды қолдану жөніндегі нұсқаулықпен танысып шығу қажет.

Қатар жүретін В гепатиті бар пациенттерде 150 мг/300 мг ламивудин және зидовудин препаратымен емдеуді тоқтатқан кезде бауыр функциясына және В гепатиті вирусы репликациясының маркерлеріне әрі қарай талдау жүргізу ұсынылады. Бұл препаратпен емдеуді күрт тоқтату гепатиттің өршуін туындатуы мүмкін екендігімен байланысты.

Бұрын бауыр аурулары (созылмалы белсенді гепатитті қоса) анықталған пациенттерде біріктірілген антиретровирустық емді қолданған кезде бауыр функциясының бұзылу жиілігі артады, сондықтан мұндай пациенттер стандартты іс тәжірибеге сәйкес тексерілуі тиіс. Мұндай науқастарда бауыр функциясы нашарлағанда препаратпен емдеуді тоқтата тұрған немесе тоқтатқан жөн.

Остеонекроз: остеонекроздың пайда болу себебінің көп факторлы (кортикостероидтарды қолдануды, алкогольді пайдалануды, күрделі иммунодепрессияны, дене салмағы индексінің жоғары болуын және т.б. қоса) екендігіне қарамастан, АИТВ ауруы өршіген және/немесе біріктірілген антиретровирустық ем (CART) ұзаққа созылған пациенттерде ішінара остеонекроздың пайда болу жағдайлары білінді. Пациенттер буындарында ауыру және қиындықтар бар болғанда, сондай-ақ қимыл-қозғалыс қиындаған жағдайда кәсіби мамандарға қаралғандары жөн.

Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері

Автомобильді басқару және техникамен жұмыс жасау қабілетіне Ламивудиннің және зидовудиннің ықпалы етуіне арнайы зерттеулер жүргізілген жоқ. Препараттың фармакологиялық қасиеттері мұндай ықпал етудің төмен болуы мүмкін екендігін айғақтайды. Пациенттің клиникалық жағдайына, сондай-ақ жағымсыз әсерлерінің сипатына назар аударған жөн.

Артық дозалануы

Симптомдары: Ламивудин мен зидовудиннің тіркелген біріктірілімінің артық дозалану жағдайлары жөнінде мәлімдемелер жоқ. Сонымен бірге ламивудинмен және зидовудинмен бөлек жедел артық дозаланудың салдарлары жөніндегі шектеулі деректер ғана бар. Осы жағдайлардың бірде-біреуі өліммен аяқталған жоқ, және барлық пациенттердің жағдайы қалыпқа келді. Қандай да болсын спецификалық белгілер немесе симптомдар айтылған жоқ.

Емі: уыттану белгілерін дер кезінде анықтау үшін пациенттің жағдайын бақылау және стандартты демеуші ем жүргізу ұсынылады. Ламивудин диализ жәрдемімен шығарылатын болғандықтан, артық дозаланған кезде гемодиализді үздіксіз қолдануға болады. Гемодиализдің және перитонеальді диализдің организмнен зидовудинді шығарған кездегі тиімділігі аз, бірақ оның метаболиті глюкуронидтің элиминациясын жылдамдатады.

Шығарылу түрі және қаптамасы

Үлбірлі қабықпен қапталған таблеткалар, 150 мг/300 мг.

Тығыздығы жоғары полиэтилен контейнерге 60 таблеткадан салынған. 1 контейнер медициналық қолдану жөнінде мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Құрғақ, жарықтан қорғалған жерде, 30 С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

Strides Shasun Limited

S-No. 36/7, Suragajakkanahalli, Indlavadi Cross, Anekal Taluk, Bangalore – 562 106, Үндістан.

Тіркеу куәлігінің иесі

Strides Shasun Limited, Үндістан

Тұтынушылардан өнім (тауар) сапасы жөніндегі шағымдарды Қазақстан Республикасы аумағында қабылдайтын ұйымның атауы және мекенжайы:

Попов Т.А. ЖК,050004, Қазақстан Республикасы, Алматы қ., Абылай Хан к-сі 30-35, Тел.: +7 7713009907, e-mail: popovakz@gmail.com

Қазақстан Республикасы аумағында тіркеуден кейін дәрілік заттың қауіпсіздігін бақылауға жауапты ұйымның атауы, мекенжайы және байланыс жасау деректері

Попов Т.А. ЖК,050004, Қазақстан Республикасы, Алматы қ., Абылай Хан к-сі 30-35, Тел.: +7 7713009907, e-mail: popovakz@gmail.com