Лактулоза-Тева

• русский
• қазақша

• Скачать инструкцию медикамента

Саудалық атауы

Лактулоза-Тева

Халықаралық патенттелмеген атауы

Лактулоза

Дәрілік түрі

Шәрбат 66,7 г/100 мл 200 мл

Құрамы

100 мл ерітіндінің құрамында

белсенді зат – 132,00 г 50% лактулоза.

Сипаттамасы

Мөлдір, түссіз немесе аздап қоңырқай-сары тұтқыр сұйықтық.

Фармакотерапиялық тобы

Іш жүргізетін дәрілер. Осмостық іш жүргізгіштер. Лактулоза

АТХ коды А06АD11

Фармакологиялық қасиеттері

Фармакокинетикасы

Ішке қабылдағанда лактулозаның сіңуі төмен. Лактулоза өзгермеген күйінде жуан ішекке дейін жетеді, мұнда ол ішек флорасымен төмен молекулалы органикалық қышқылдарға дейін ыдырайды. 25-50 г немесе 40-75 мл дозаларда толық метаболизденеді; бұдан жоғары дозаларда бүйрек арқылы өзгермеген күйінде ішінара шығарылады.

Фармакодинамикасы

Жуан ішек саңылауында лактулоза ішек флорасының көмегімен төмен молекулалы органикалық қышқылдарға дейін ыдырайды. Бұл қышқылдар жуан ішек саңылауында рН төмендеуіне және осмостық әсер ету арқылы ішек ішіндегісінің көлемі ұлғаюына ықпал етеді. Бұл ішектің жиырылып қозғалуын стимуляциялайды және нәжістің консистенциясын қалыпты етеді. Нәтижесінде іштің қатуы жойылып, жуан ішектің физиологиялық ырғағы қалпына келеді.

Бауыр энцефалопатиясында немесе бауыр (пре)комасында емдік әсері келесі механизмдермен түсіндіріледі: ацидофильді бактериялардың (мысалы, лактобацилла) көбеюі салдарынан протеолизистік бактериялардың өсуінің басылуы, жуан ішектің ішіндегі заттардың тотығуы арқылы иондық түрдегі аммиактың қармалуы, жуан ішек ішіндегісінің pH мәнінің төмендеуі және осмостық әсердің салдарынан ішектің босауы, сондай-ақ азотты қосылыстардың бактериялық метаболизмінің өзгеруі нәтижесінде ақуыздың жасушаішілік синтезі үшін аммиактың утилизациялануы.

Лактулоза-Тева пребиотикалық зат ретінде бифидобактериялар мен лактобацилалар сияқты пайдалы бактериялардың өсуін күшейтеді, клостридий және ішек таяқшасы сияқты патогендік бактериялардың өсуін бәсеңдетеді. Бұл ішек флорасының өте жағымды тепе-теңдігін қамтамасыз ете алады.

Қолданылуы

• іш қатуда (жуан ішектің физиологиялық ырғағын реттеу)

• бауыр энцефалопатиясында (бауыр комасын немесе прекомасын емдеуде және профилактикасында)

Қолдану тәсілі және дозалары

Шәрбатты сұйылтпай немесе сұйылтып қабылдауға болады. Бір реттік дозаны ауызда ұзақ уақыт ұстамай, бірден жұтқан жөн. Препаратты қолдану тәсілін пациенттің жекелей қажеттіліктеріне қарай таңдайды.

Егер препаратты бір рет қабылдау ұсынылған болса, онда тәуліктік дозаны ұдайы бір ғана уақытта, мысалы таңғы астан кейін қабылдау керек. Іш жүргізетін дәрілерді қабылдау кезеңінде жеткілікті мөлшерде, күніне 1.5-2.0 л сұйықтық немесе 6-8 стаканға дейін су ішу ұсынылады.

Іш жүргізетін әсері 2-10 сағаттан кейін білінуі мүмкін.

Іш қатуды емдеу үшін

Тәуліктік дозаны өлшеуіш қалпақшаны пайдалана отырып, бір рет немесе екі ретке бөліп қабылдауға болады. Ем басталғаннан кейін бірнеше күннен соң емдік тиімділігіне қарай демеуші дозаға көшуге болады. Емдiк әсерiнiң дамуы үшін 2-3 күн қажет етілуі мүмкін.

Ересектерде бауыр комасын және прекомасын емдеу үшін

Доза бiртiндеп жоғарылатылуы тиіс.

Препарат тәулігіне 3-4 рет 7,5-15 мл-ден (5-10 г лактулозаға сәйкес келеді) тағайындалады. Содан соң күніне 2-3 рет жұмсақ нәжіс пайда болғанша дозаны тәулігіне 3-4 рет 30-45 мл дейін (20-30 г лактулозаға сәйкес келедi) бiртiндеп арттырады.

Жағымсыз әсерлері

Өте жиі

• диарея (жоғарғы дозаларды қолданғанда)

• екі күннен кейін қайтатын, Лактулоза-Тева қабылдаудың алғашқы күндері болатын жүректің айнуы, құсу, іштің ауыруы, метеоризм

Жиі емес

• су-электролиттік теңгерімінің бұзылуы

• құрысулар

• бас ауыру, бас айналу

• аритмиялар

• миалгия

• қатты қажу

• гипернатриемия (бауыр энцефалопатиясында).

Қолдануға болмайтын жағдайлар

• лактулозаға жоғары сезімталдық

• асқазан-ішектің жедел қабыну аурулары

• ішек бітелісі, асқазан-ішек жолының тесілуі немесе тесілу қаупі

• аппендицитке күдіктің болуы

• ректальді қан кетулер (диагностикаланбаған)

• колостома, илеостома

• су-электролиттік теңгерімінің бұзылуы

• галактоземия

• галактозаның жақпаушылығы, Лапп лактазаның тапшылығы синдромы немесе глюкоза мен галактоза мальабсорбциясы синдромы

• жүктілік және лактация кезеңі

Дәрілермен өзара әрекеттесуі

Лактулоза-Тева препаратымен мыналарды бір мезгілде қолданғанда:

• диуретиктер, кортикостероидтар, Б амфотерицин – калийдің жоғалуы күшейеді

• жүрек гликозидтері – гликозидер әсері күшейеді

• босап шығуы жуан ішектегі pH-қа байланысты дәрілік заттар (5-аминосалицил қышқылы препараттары сияқты) – жуан ішектегі pH-тың төмендеуі нәтижесінде олардың белсенділігі жойылуы мүмкін.

Айрықша нұсқаулар

Препаратты қабылдағаннан кейін бірнеше күн ішінде емдік әсері жеткіліксіз болған жағдайда дәрігерге қайта қаралу қажет. Лактулоза-Теваны лактоза жақпайтын пациенттерге сақтықпен тағайындау керек. Лактулоза-Тева қант диабетінде сақтықпен тағайындалғаны жөн. Бауыр прекомасын және комасын емдеуде қолданылатын Лактулоза-Тева дозасы әдетте аса жоғары болғандықтан, оны қант диабетімен ауыратын пациенттерге тағайындағанда лактулоза мөлшерін ескеру қажет болуы мүмкін.

Лактулозаны 6 айдан аса қабылдап жүрген егде жастағы және әлсіз науқастарда қандағы электролиттер концентрациясын жүйелі анықтап отыру керек. Диарея пайда болған жағдайда емді тоқтатады.

Басқа дәрілік заттарды қабылдағаннан кейін 2 сағат ішінде лактулозаны қабылдауға болмайды.

Балаларға іш жүргізгіш дәрілерді тек ерекше жағдайларда ғана және медициналық бақылаумен қолданады. Емдеудің нәтижесінде дефекация рефлексінің бұзылуы мүмкін екендігін ескерген жөн.

Бауыр энцефалопатиясы бар 18 жасқа дейінгі балаларға қолдану қауіпсіздігі мен тиімділігі анықталмаған.

Дәрілік заттардың көлікті және қауіптілігі зор механизмдерді басқару қабілетіне әсер ету ерекшеліктері

Лактулоза-Тева автомобильді немесе қауіптілігі зор механизмдерді басқару қабілетіне әсер етпейді.

Артық дозалануы

Симптомдары: іш тұсының ауыруы, диарея, электролиттік теңгерімінің бұзылуы.

Емі: препараттың дозасын төмендету немесе тоқтату, қажет болса - электролиттік теңгерімді түзету.

Шығарылу түрі және қаптамасы

Бұрап жабылатын қақпағы бар полиэтилен құтыларға препарат 200 мл-ден құйылған.

1 құты өлшеуіш стақанмен және медициналық қолдану жөніндегі мемлекеттік және орыс тіліндегі нұсқаулықпен бірге картон қорапқа салынған.

Сақтау шарттары

25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Құтыны ашқаннан кейін препаратты 12 ай ішінде қолдануға болады.

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецептісіз

Өндіруші

«Фрезениус Каби Австрия ГмбХ», Австрия

Қаптаушы

«Меркле ГмбХ», Германия

Тіркеу куәлігінің иесі

«ратиофарм ГмбХ», Германия

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

“ратиофарм Қазақстан” ЖШС, 050040, Алматы қ., Әл-Фараби д-лы, 19, Нұрлы тау БО, 1Б, 603 кеңсе. Телефон: (727)3110915, Факс: (727) 3110734, e-mail: Safety.Kazakhstan@tevapharm.com

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның мекенжайы

“ратиофарм Қазақстан” ЖШС, 050040, Алматы қ., Әл-Фараби д-лы, 19, Нұрлы тау БО, 1Б, 603 кеңсе. Телефон: (727)3110915, Факс: (727) 3110734, е-mail: Dina.Baimakova@tevapharm.com