Куван®

• русский
• қазақша

• Скачать инструкцию медикамента

Саудалық атауы

Куван®

Халықаралық патенттелмеген атауы

Сапроптерин

Дәрілік түрі

Еритін таблеткалар, 100 мг

Құрамы

Бір таблетканың құрамында

белсенді зат - 100 мг сапроптерин дигидрохлориді (77 мг сапроптеринге баламалы),

қосымша заттар: маннитол E421, сусыз кальций фосфаты, кросповидон, аскорбин қышқылы (E300), натрий стеарилфумараты, рибофлавин (E101).

Сипаттамасы

Дөңгелек, бір жағында «177» жазуы бар, ақ дерлік түстен ақшыл сары түске дейінгі таблеткалар. Таблеткалардың беткейінде мәрмәрлікке жол беріледі.

Фармакотерапиялық тобы

АІЖ аурулары мен зат алмасуының бұзылуын емдеуге арналған түрлі препараттар .

АТХ коды A16AX07

Фармакологиялық қасиеттері

Фармакокинетикасы

Сіңірілуі

Сапроптерин ерітілген таблетканы оральді енгізгеннен кейін сіңіріледі, қандағы ең жоғарғы концентрациясына (Cmax) ашқарынға қабылдағаннан кейін 3-4 сағаттан соң жетеді. Сапроптериннің сіңірілу жылдамдығы мен дәрежесіне тағам әсер етеді. Сапроптериннің сіңірілуі құрамында май көп жоғары калориялы ас ішкеннен кейін артады. Ашқарынға пайдаланғанмен салыстырғанда, қабылдағаннан кейін 4-5 сағаттан кейінгі орташа алғандағы қандағы ең жоғарғы концентрациясы 40-85%-ға жоғары. Ішке қабылдағаннан кейін адам үшін биожетімділігі белгісіз.

Биоөзгерісі

Сапроптерин дигидрохлориді негізінен бауырда дигидробиоптерин мен биоптеринге метаболизденеді. Сапроптерин дигидрохлориді табиғи 6R-BH4-тің синтетикалық аналогы болғандықтан, метаболикалық циклы да, соның ішінде 6R-BH4 регенерациясы да ұқсас болады деп күтуге болады.

Шығарылуы

Ауыз арқылы қабылдағанда негізінен нәжіспен, азғантай бөлігі несеппен шығарылады.

Фармакодинамикасы

Әсер ету механизмі

Гиперфенилаланинемия (ГФА) – қандағы фенилаланин деңгейінің патологиялық жоғарылауы кезінде диагностикаланатын ауру, әдетте бұған себеп фенилаланингидроксилаза ферментін (фенилкетонурия жағдайында, ФКУ) 6R-тетрагидробиоптериннің (6R -BH4) биосинтезіне немесе регенерациясына қатысатын ферменттерді кодтайтын (BH4 жеткіліксіз болған жағдайда) гендердегі аутосомдық-рецессивті мутациялар болып табылады. BH4 жеткіліксіздігі – бұл BH4 биосинтезіне немесе рециклингіне қатысатын бес ферменттің біреуін кодтайтын гендердегі мутациялармен немесе делециялармен байланысты аурулардың тобы. Екі жағдайдада фенилаланин тирозин аминқышқылына тиімді өзгере алмайды, бұл қандағы фенилаланин деңгейінің артуына алып келеді.

Сапроптерин фенилаланин, тирозин және триптофан гидроксилазаларының кофакторы болып саналатын табиғи 6R-BH4-тің синтетикалық аналогы болып табылады.

Куванды® BH4-ке сезімтал ФКУ бар емделушілерде қолдануға негіз ақаулы фенилаланингидроксилаза белсенділігінің артуы, соған орай фенилаланиннің ары қарай жинақталуын болдырмау немесе азайту үшін оны тамақтануда қолданған кезде фенилаланинге төзімділігі мен қандағы фенилаланин деңгейінің төмендетуге немесе ұстап тұруға жеткілікті тотығу метаболизмінің ұлғаю немесе қалпына келу қажеттілігі болып табылады. Куванды® BH4 жеткіліксіздігі бар емделушілерде қолдануға негіз жеткіліксіз BH4 деңгейін алмастыруда және сол арқылы фенилаланингидроксилаза қызметін қалпына келтіруге негізделген.

Қолданылуы

- фенилкетонуриядан зардап шегетін, бұл тұрғыдағы емдеуге сезімтал ересектер мен 4 жастан асқан балалардағы гиперфенилаланинемияны емдеу үшін

- тетрагидробиоперин тапшылығы бар, бұл тұрғыдағы емдеуге сезімтал ересектер мен 4 жастан асқан балалардағы гиперфенилаланинемияны емдеу үшін

Қолдану тәсілі мен дозалары

Куван® препаратымен емдеуді ФКУ мен тетрагидробиоптерин тапшылығын емдеуде тәжірибесі бар маман жүргізуі және бақылап отыруы тиіс.

Куван® күн сайын бір уақытта, мүмкін болса таңертең, тамақпен бірге бір рет қабылдануы тиіс.

Қандағы фенилаланин деңгейі мен қоректік заттардың тепе-теңдігінің қалыпты бақыланып тұруына кепілдік беру үшін тамақпен бірге түсетін фенилаланин мен жалпы ақуызды мұқият бақылау қажет болады.

ФКУ немесе BH4 тапшылығы салдарынан ГФА созылмалы жағдай болып табылатындықтан, бұл препаратқа сезімталдық бар болса, Куван® ұзақ уақыт қолдануға арналған. Дегенмен, Куванды ұзақ уақыт пайдалануға қатысты шектеулі ғана мәліметтер бар.

Дозалау

Куван® 100 мг таблеткалар түрінде шығарылады. Дене салмағының негізінде есептелген күндізгі дозасы жақын жүздікке дейін дөңгеленуі тиіс. Мысалы, 401 мг-ден 450 мг мг-ге дейінгі есептелген дозасы 400 мг, яғни 4 таблеткаға дейін дөңгеленуі тиіс. Ал 451 мг-ден 499 мг-ге дейінгі дозасы 500 мг, яғни 5 таблеткаға дейін дөңгеленуі тиіс.

ФКУ

ФКУ бар ересектер мен балалар үшін Куванның® бастапқы дозасы күн сайын бір рет дене салмағына 10 мг/кг құрайды. Дозасы әдетте күніне 5-тен 20 мг/кг дейін, дәрігердің анықтауы бойынша фенилаланиннің қалыпты деңгейлеріне жеткенге және ұстап тұрғанға дейін реттеліп отырады.

ВН4 тапшылығы

BH4 тапшылығы бар ересектер мен балалар үшін Куванның® бастапқы дозасы күн сайын бір рет дене салмағына 2-ден 5 мг/кг дейін құрайды. Дозасы тәулігіне 20 мг/кг дейін түзетілуі мүмкін. Емдік әсерін жақсарту үшін жалпы күндізгі дозасын күні бойына 2-3 енгізуге бөлуге болады.

Сезімталдықты анықтау

Балалардағы неврологиялық бұзылыстардың қайтымсыз клиникалық көріністеріның, сондай ақ ересектерде қандағы фенилаланин деңгейінің артуы салдарынан болатын когнитивтік және психиатриялық бұзылыстардың туындауының алдын алу үшін, Куванмен® емдеуді мүмкіндігінше ертерек бастаудың маңызы зор.

Емдеуге сезімталдық Куванды® енгізгеннен кейін қандағы фенилаланин деңгейінің төмендеуінен анықталады. Қандағы фенилаланиннің Куванмен® емдеуге дейінгі және ұсынылған старттық дозада емдеудің 1 аптасынан кейінгі деңгейін анықтау қажет. Егер фенилаланин деңгейі жеткіліксіз төмендегені байқалса, онда Куванның® дозасы, фенилаланин деңгейін бір ай бойы апта сайын мониторингілеуді жалғастыра отырып, күніне 20 мг/кг дейін арттырылуы мүмкін. Бұл кезеңде фенилаланиннің тамақпен енгізілуі тұрақты деңгейде реттеліп отырылуы тиіс.

Сезімталдықтың қанағаттанарлық деңгейі қандағы фенилаланин деңгейінің төмендеуі 30 пайыздан астам болса немесе фенилаланиннің емдеуші дәрігер жоспарлаған жекелей деңгейіне жеткенде анықталады. Мұндай жауап дәрежесі белгіленбеген емделушілер тестілік кезеңнің бір айы бойы сезімтал емес деп саналады және Куванмен® ем алмауы тиіс.

Егер Куванға® сезімталдық анықталса, онда дозасын емдеуге сезімталдығына сәйкес, күніне 5-тен 20 мг/кг дейінгі шекте реттеуге болады.

Қандағы фенилаланин мен тирозин деңгейлерін дозасын әр өзгерткен сайын әр бір-екі апта сайын тексеріп отыру және содан кейін жиі мониторингілеу ұсынылады. Куванды® қабылдап жүрген емделушілер құрамында фенилаланин жоқ емдәмді жалғастыруы, сондай-ақ ұдайы тексеруден өтіп тұруы (қандағы фенилаланин деңгейін, бұл заттардың тағаммен түсуі және психомоторлық дамуды мониторингілеу сияқты) тиіс.

Қолдану тәсілі

Сіңірілуін күшейту үшін, таблеткалар күн сайын тамақпен бірге, мүмкіндігінше дәл бір уақытта таңертең қабылдануы тиіс.

Емделушілерге құтының ішінде тұратын ылғал сіңіргіші бар капсула ішке қабылдауға арналмағанын ескерту керек.

Таблеткалардың қажетті мөлшері суы бар стақанға немесе тостағанға салынады және толық ерігенше араластырылады. Бұл бірнеше минутқа созылуы мүмкін. Таблеткаларды тезірек еріту үшін оларды уатуға болады. Ерітіндіде көзге көрінетін кішкентай бөлшектер жүруіне жол беріледі – олар препараттың тиімділігіне әсер етпейді. Ерітіндіні 15-20 минут ішінде ішу қажет.

100 мг-ден аз дозасында бір таблеткасы 100 мл суда ерітілуі тиіс және ерітіндінің жазып берілген мөлшерін енгізу қажет. Ерітіндінің дәл мөлшерін енгізу үшін градуировкасы бар өлшеуіш ыдыс қажет.

Ересектер

Таблеткалардың жазып берілген мөлшерін 120-240 мл суы бар стақанға салады және толық ерігенше араластырады.

Балалар

Таблеткалардың жазып берілген мөлшерін 120 мл суы бар стақанға салады және толық ерігенше араластырады.

Дозасын реттеу

Куванмен® емдеу қандағы фенилаланин деңгейін күтілген емдеу деңгейінен төмендетуі мүмкін.

Фенилаланин деңгейін қажетті емдеу ауқымы шегінде ретке келтіру үшін, сапроптерин дозасын немесе фенилаланиннің тамақпен тұтынылу мөлшерінің өзгеруін таңдау қажет.

Қандағы фенилаланин мен тирозин деңгейлері дозасын әр өзгерткеннен кейін, әсіресе балаларда бір-екі аптадан кейін тексеріліп отыруы тиіс. Емдеуші дәрігердің бақылауымен жиі мониторингілеу қажет.

Егер Куванмен® емдеу кезінде қандағы фенилаланин деңгейін бақылау жеткіліксіз орындалса, емделушінің препаратты мұқият қабылдап жүргенін тексеру, ал емдәмді Куванның® дозасын түзетпес бұрын қайта қарастыру қажет.

Куванмен® емдеуді тоқтату тек дәрігердің қадағалауымен жүргізілуі тиіс. Фенилаланин деңгейі артуы мүмкін болғандықтан, анағұрлым жиі мониторинг қажет болуы мүмкін. Фенилаланин деңгейін күтілетін емдеу ауқымы шегінде ұстап тұру үшін, емдәмді түзету қажет болуы мүмкін.

Жағымсыз әсерлері

Куванды® клиникалық зерттеулер кезінде сапроптерин дигидрохлоридін қабылдап жүрген (күніне 5-тен 20 мг/кг дейін) 579 емделушінің 35%-ға жуығы препараттың жағымсыз әсерлерін сезінген. Бас ауыруы мен ринорея (тұмау) анағұрлым жиі көрсетілген.

Куванды® негізгі клиникалық зерттеулерден төмендегі жағымсыз әсерлер анықталған.

Жағымсыз әсерлерінің жиілігі мына түрде жіктелген: Өте жиі (>1/10) және Жиі (>1/100 - <1/10). Әр топта жағымсыз әсерлер күрделілігінің азаю тәртібімен келтірілген.

Өте жиі

- бас ауыруы

- ринорея

Жиі

- жұтқыншақ пен көмейдің ауыруы, мұрынның бітуі, жөтел

- диарея, құсу, іштің ауыруы

- гипофенилаланинемия

Қосымша ақпарат

Препаратпен емдеуді тоқтатқанда қандағы фенилаланин деңгейі препаратпен емдеуге дейін анықталған деңгейлерден жоғары артуы мүмкін.

Жоғары сезімталдықтың біразғантай жағдайлары (бөртпені қоса) маркетингтен кейінгі кезеңде байқалған.

Қолдануға болмайтын жағдайлар

- сапроптеринге немесе толтырғыштарының біреуіне жоғары сезімталдық

Дәрілермен өзара әрекеттесуі

Сақтықпен пайдаланылатын біріктірілімдері.

Дигидрофолатредуктаза тежегіштерінің бір мезгілде енгізілуі (мысалы, метотрексат, триметоприм) зерттелмесе де, мұндай медициналық өнімдер BH4 метаболизміне әсер етуі мүмкін. Мұндай препараттарды Куванмен® емдеу кезінде пайдалану анағұрлым мұқият қадағалау мен бақылауды қажет етуі мүмкін.

BH4 – бұл азот тотығы синтазасының кофакторы. Куван® препаратын NO классикалық донаторларын (мысалы, глицеринтринитрат, изосорбид-динитрат, натрий нитропруссиді, молсидомин), 5 типті фосфодиэстераза тежегіштері мен миноксидилді қоса, азот тотығының (NO) метаболизміне немесе әсеріне ықпал ету арқылы қантамырлардың кеңеюін туғызатын дәрілік заттармен бір мезгілде қолданғанда сақ болу керек.

Куванды® леводопамен емделіп жүрген емделушілерге тағайындағанда сақ болу керек. Леводопа мен сапроптеринді BH4 тапшылығы бар емделушілерде бір мезгілде қолданғанда құрысулардың, олардың қайталануының, қатты ашушаңдық пен қозғыштықтың пайда болған жағдайлары байқалған.

Айрықша нұсқаулар

Куванмен® емделіп жүрген емделушілер фенилаланин қабылдауға тыйым салатын емдәмді ұстануды жалғастыруы және ұдайы клиникалық тексерулерден (қандағы фенилаланин мен тирозин деңгейлерін, фенилаланиннің тағаммен түсуін мониторингілеу және психомоторлық дамуды бақылау сияқты) өтіп тұруы тиіс.

Фенилаланин-тирозин-дигидрокси-L-фенилаланин (DOPA) метаболикалық тізбегі қызметінің тұрақты немесе ауық-ауық бұзылуы ағзадағы ақуыздар тапшылыған немесе нейромедиаторлардың жеткіліксіз синтезделуіне алып келуі мүмкін. Сәбилік кезеңде фенилаланин мен тирозин деңгейлерінің ұзақ уақыт жеткіліксіз болуы жүйке жүйесі дамуының бұзылуымен байланысты болуы мүмкін. Қандағы фенилаланин мен тирозин деңгейі мен қоректік заттар теңгерімін қалыпты бақылауда ұстауды қамтамасыз ету үшін, Куван® препаратымен емдеу кезінде фенилаланин мен ақуыздардың тамақпен бірге түсуін мұқият бақылау ұсынылады.

Қатарлас ауруларда дәрігермен кеңесу қажет, өйткені қандағы фенилаланин деңгейі артуы мүмкін.

Куванды® ұзақ уақыт пайдалану туралы мәліметтер шектеулі.

Сапроптеринді құрысуларға бейім емделушілерде пайдаланғанда сақ болу ұсынылады. Мұндай емделушілерде құрысулар пайда болған жағдайлар, сондай-ақ, олардың өршуі туралы хабарланған.

Педиатрияда қолданылуы

4 жасқа толмаған балаларды емдеуде Куванды® арнайы зерттеу жүргізілген жоқ.

Егде жастағы емделушілер

Куван® препаратын егде жастағы емделушілерге қолданудың қауіпсіздігі мен тиімділігі анықталмаған.

Бүйрек немесе бауыр жеткіліксіздігі

Куванның® бүйрек және бауыр жеткіліксіздігі бар емделушілерде қауіпсіздігі мен тиімділігіне зерттеулер жүргізілген жоқ.

Жүктілік және лактация

Куван® препаратының жүктілік кезеңіндегі әсері туралы клиникалық мәліметтер жоқ. Жануарларға жасалған сынақтардан препараттың жүктілікке, эмбрионның/ұрықтың дамуына, босануға және босанудан кейінгі кезеңге тікелей немесе жанама теріс әсерлері анықталған жоқ.

Ананың қанындағы фенилаланин деңгейі жүктілікке дейінгі және жүктілік кезінде қатаң бақылануы тиіс. Жүктілікке дейін және жүктілік кезінде бақылаудың болмауының ана мен бала үшін жағымсыз салдарлары болуы мүмкін. Емделушілердің бұл тобы үшін бірінші таңдау фенилаланинді жүктілікке дейін және жүктілік кезінде дәрігердің қадағалауымен де қабылдауға тыйым салатын емдәм болып табылады. Куванды® тек қатаң емдәм болған кезде қандағы фенилаланиннің айтарлықтай төмендеуі байқалмаса ғана тағайындау керек. Жүкті әйелдерге аса сақтықпен тағайындау керек.

Сапроптерин мен оның метаболиттерінің емшек сүтімен шығарылатыны туралы деректер жоқ. Куванды® бала емізу кезінде тағайындамаған жөн.

Дәрілік заттың көлік құралдарын немесе қауіпті механизмдерді басқару қабілетіне ықпал ету ерекшеліктері

Препараттың автокөлік немесе механизмдерді басқару қабілетіне әсерін зерттеулер жүргізілген жоқ.

Артық дозалануы

Симптомдары: ұсынылатын күніне 20 мг/кг дозасынан асатын дозасын енгізгенде, бас ауыруы мен бас айналуы байқалды.

Емі: белгілеріне қарай.

Шығарылу түрі мен қаптамасы

30, 120 таблеткадан тығыздығы жоғары полиэтиленнен жасалған құтыларға салынған. Әр құтыны ылғал сіңіргіш силикагелі және құтыны толтыру және бүтіндігінің бұзылуын болдырмау үшін фармацевтикада қолдануға рұқсат етілген полиэстері бар пакетке салады. Құтыларды ішкі қақпағымен және балалардың ашуынан қорғалған қақпақпен жабады.

1 құтыдан мемлекеттік және орыс тілдеріндегі медицинада қолдану жөніндегі нұсқаулықпен бірге картоннан жасалған пәшкеге салады.

Бастапқы және екіншілік қаптамасында қосымша, препараттың атауы Брайль алфавитін пайдаланып жазылған.

Сақтау шарттары

Құрғақ, жарықтан қорғалған жерде, 25 °C-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Дәріханалардан босатылу шарттары

Рецепт арқылы

Өндіруші

Экселла ГмбХ, Германия

Тіркеу куәлігі иесінің атауы мен елі

Мерк Сероно Европа Лимитед, Ұлыбритания

Қаптаушы ұйымның атауы мен елі

Мерк КгаА және Ко., Австрия

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«Вива Фарм» ЖШС

2-ші Остроумов к-сі, 33

Алматы, 050030, Қазақстан

Тел: +7 727 383 74 63

Факс: +7 727 383 74 63

E-mail: PV@vivapharm.kz