Кордафен

• русский
• қазақша

• Скачать инструкцию медикамента

Саудалық атауы

Кордафен

Халықаралық патенттелмеген атауы

Нифедипин

Дәрілік атауы

Қабықпен қапталған 10 мг таблеткалар

Құрамы

Бір таблетканың құрамында

белсенді зат - 10,0 мг нифедипин,

Сипаттамасы

Дөңгелек пішінді, екі беті дөңес, диаметрі 5.8-ден 6.5 мм-ге дейін, сары түсті қабықпен қапталған таблеткалар.

Фармакотерапиялық тобы

Баяу кальций өзекшелерінің іріктеуші бөгегіштері. Дигидропиридин туындылары.

АТХ коды С08СА05

 

Фармакологиялық қасиеттері

Фармакокинетикасы

Сіңуі

Нифедипин ас қорыту жолынан жылдам және толық дерлік (90%) сіңеді. Нифедипинге бауыр арқылы алғашқы өту феномені тән, ішу арқылы қабылданатын дозаның 45-75%-ға жуығы өзгермеген күйде қанға сіңеді, Сmax 0,5-2 сағаттан соң жеткізіледі. Ас ішу нифедипиннің сіңу жылдамдығын азайтады, бірақ сіңірілген препараттың мөлшеріне әсер етпейді. Нифедипиннің биологиялық жетімділігі бауыр циррозы бар науқастарда артады.

Таралуы

Нифедипин қан плазмасының ақуыздарымен 92-98%-ға байланысады. Бауыр немесе бүйрек жеткіліксіздігі бар науқастарда ақуыздармен байланысуы төмендейді. 5%-дан азы гемато-энцефалдық кедергі, фетоплаценталық кедергі арқылы өтеді және емшек сүтімен бөлініп шығады. Препарат жинақталмайды.

Метаболизмі

Препарат бауырда жылдам және толығымен белсенді емес метаболиттерге айналады. Метаболизмі, негізінен, дигидропиридиннің тотығуы және метильді топтағы біреуінің оксиметильденуі, сондай-ақ эфир тобының карбоксильді топқа гидролизденуі жолымен жүзеге асады.

Шығарылуы

Бүйрек және бауыр қызметі қалыпты науқастарда нифедипиннің жартылай шығарылу кезеңі 2-5 сағат құрайды. Нифедипиннің 80%-ға жуығы метаболиттер түрінде несеппен (1%-дан азы өзгермеген күйде), қалған бөлігі өтпен шығарылады.

Бауыр жеткіліксіздігі бар науқастарда препараттың шығарылу кезеңі ұзарады.

Фармакодинамикасы

Кордафен (дигидропиридин туындысы) кальций антагонистерінің тобына жатады. Препарат қан сарысуындағы кальций иондарының концентрациясына әсер етпейді. Препараттың әсер ету механизмі миокард жасушаларына және қан тамырларының тегіс бұлшықетінің жасушаларына кальций иондарының түсуін тежеумен жүзеге асады.

Препарат, миокардтан гөрі, көбіне тамырлардың тегіс бұлшық етінің жиырылуын азайтады.

Қан тамырларын кеңейте отырып, Кордафен тамырлардың шеткергі қарсыласуын, артериялық қан қысымын төмендетеді. Сонысымен миокардтың оттегіні қажетсінуін және стенокардия белгілерін азайтады.

Қолданылуы

- вазоспастикалық стенокардияда (Принцметалл стенокардиясы, варианттық стенокардия)

- артериялық гипертензияда

- Рейно синдромында

Қолдану тәсілі және дозалары

Кордафен таблеткалары ішке қабылдауға арналған.

Ересектер: әдеттегі доза күніне 3 рет 10 мг.

Қажет болған жағдайда дозаны, артериялық қан қысымын бақылаумен, күніне 3 рет 20 мг-ге дейін жоғарылатуға болады. Ең жоғары тәуліктік доза 60 мг құрайды.

Препаратты ас ішуге байланыссыз қабылдауға болады. Таблеткаларды аздаған сұйық мөлшерімен іше отырып, бүтіндей жұту керек.

Жағымсыз әсерлері

Жағымсыз әсердің көрініс беруі препараттың дозасына байланысты.

- бас айналу, бас ауыру

- терінің қышуы, есекжем, экзантема

- беттің қызаруы, ысыну сезімі

- әлсіздік, ұйқышылдық

- жүрек айнуы, ауыз қуысы шырышты қабығының құрғауы, тәбеттің жоғарылауы, диарея немесе іш қатуы; сирек – қызыл иек гиперплазиясы (қанағыштық, ауырғыштық, ісіну), ұзақ уақыт бойы қабылдаған кезде – бауыр қызметінің бұзылуы (бауырішілік холестаз, “бауыр” трансаминаза белсенділігінің жоғарылауы)

- бұлшықет құрысулары, тремор, парестезиялар

- шеткергі ісінулер

- жүйкенің тозуы, құбылмалы көңіл-күй

- рефлекторлы тахикардия, транзиторлы гипотония, стенокардия ұстамасының пайда болуы, миокард инфарктісі, жүрек жеткіліксіздігінің дамуы немесе ушығуы, аритмиялар, қарыншалық аритмия

- анемия, лейкопения, тромбоцитопения

- тыныс алудың қиындауы, жөтел, өкпенің ісінуі

- мұрын шырышты қабықтарының гиперемиясы, фарингит

Қолдануға болмайтын жағдайлар

- нифедипинге немесе қосымша заттарға асқын сезімталдықта

- қарыншалық тахикардияда

- ауыр жүрек жеткіліксіздігінде

- ауыр артериялық гипотензияда (систолалық АҚ сын. бағ. 90 мм төмен)

- кардиогенді шокта, коллапста

- айқын аорталық немесе субаортальді стенозда

- синустық түйіннің әлсіздік синдромында

- миокард инфарктісінен кейінгі алғашқы 4 аптада

- тұрақсыз стенокардия және стенокардияның ауыр ұстамаларында

- тұқым қуалайтын фруктозаны көтере алмаушылық, Lapp-лактоза ферметінің жетіспеушілігі, глюкоза-галактоза мальабсорбциясы

- жүктілік және лактация кезеңінде

- 18 жасқа дейінгі балалық және жасөспірімдік кезеңде (қауіпсіздік дәлелдері жоқ)

Дәрілермен өзара әрекеттесуі

АӨФ тежегіштері, ангиотензин-II рецепторларының антагонистері, диуретиктер, нитраттар, циметидин (аз дәрежеде ранитидин) үш циклдық антидепрессанттар, ингаляциялық анестетиктер

Кордафенмен қолданғанда гипотензиялық әсер күшейеді.

Празозин және басқадай альфа-адренобөгегіштер

Празозиннің және басқадай альфа-адренобөгегіштердің метаболизмін бәсеңдетеді, соның салдарынан гипотензиялық әсері күшеюі мүмкін.

Бета-бөгегіштер

Кордафенді бета-бөгегіштермен бір мезгілде қолданғанда гипотензия мен жүрек жеткіліксіздігі болуы ықтимал.

Симпатомиметиктер, ҚҚСД, эстрогендер

Симпатомиметиктер, ҚҚСД (бүйректегі простагландиндер синтезінің бәсеңдеуі және ағзадағы Na+ мен сұйықтықтың іркілісі), эстрогендер (ағзадағы сұйықтық іркілісі) Кордафеннің гипотензиялық әсерін төмендетеді.

Нитраттар

Нитраттармен бірге қолданғанда тахикардияның күшейгені байқалады.

Кальций препараттары

Кальций препараттары кальций өзекшелері бөгегіштерінің әсерін азайтуы мүмкін.

Хинидин және Q-Т аралығының ұзаруын туғызатын басқадай дәрілік заттар

Кордафен қан плазмасындағы хинидин концентрациясын төмендетеді, нифедипинді тоқтатқаннан кейін оның қандағы концентрациясы бірден жоғарылауы мүмкін, сондай-ақ кордафенді хинидинмен немесе Q-Т аралығының ұзаруын туғызатын басқадай дәрілік заттармен бірге қолданған кезде Q-Т аралығының мәнді ұзаруының қаупі жоғары.

Амиодарон және хинидин

Баяу кальций өзекшелерінің бөгегіштері амиодарон мен хинидиннің теріс инотропты әсерін күшейтеді.

Оймақгүл гликозидтері

Кордафен қан сарысуындағы оймақгүл гликозидтерінің деңгейін жоғарылатады, сондықтан осы препараттармен емдеудің басында артық дозаланудан аулақ болу үшін гликозидтер концентрациясын бақылауға алу керек.

Теофиллин

Кордафен қан сарысуындағы теофиллиннің деңгейін жоғарылатады.

Тікелей емес антикоагулянттар, құрысуға қарсы дәрілер, ҚҚСД, хинин, салицилаттар, сульфинпиразон

Кордафен ақуыздармен байланысудан кумарин және индандион туындыларын (сонысымен протромбин уақытын ұзартып), құрысуға қарсы дәрілерді, ҚҚСД, хининді, салицилаттарды, сульфинпиразонды ығыстыра алады, соның нәтижесінде олардың плазмалық концентрациясы жоғарылауы мүмкін.

Бауыр ферменттерінің микросомальді индукторлары

Бауыр ферменттерінің микросомальді индукторлары (рифампицин және б.) нифедипиннің концентрациясын төмендетеді.

Винкристин

Кордафен организмнен винкристиннің шығарылуын төмендетеді.

Циметидин, ранитидин және фамотидин

Кордафенмен бірге қолданылған циметидин қан сарысуындағы нифедипин концентрациясын жоғарылатады. Осы өзара әрекеттесу механизмі циметидиннің нифедипин метаболизміне жауап беретін бауырдың Р-450 цитохромының қызметін тежеуімен байланысты. Сонымен қатар, Кордафенді фамотидинмен және ранитидинмен бір мезгілде қолдану нифедипин метаболизміне елеулі ықпалын тигізбейді.

Этил спирті

Этил спирті нифедипиннің биологиялық жетімділігін арттырады.

Айрықша нұсқаулар

Кордафен препаратпен емделе бастаған немесе препараттың дозасын көбейткен немесе онымен ұзақ уақыт емделген науқастарда ишемиялық жүрек ауруының белгілерін күшейтуі соның ішінде жедел миокард инфарктінің белгілерін туындатуы мүмкін, бұл оның миокардтың қанмен қамтылуын төмендететін аритмогенді әсерімен, сондай-ақ инотропты болымсыз теріс ықпалымен байланысты болуы ықтимал.

Бета-бөгегіштермен емделген науқастарда, тоқтату синдромы пайда болатындықтан және коронарлық жеткіліксіздік белгілері күшейетіндіктен осы дәрілермен емдеуді кенеттен үзбеген жөн (Кордафенмен емдеу басталғанша).

Кордафенді жүрек жеткіліксіздігі немесе қолқаның тарылуы бар науқастарда (әсіресе, бета-бөгегіштерді алатын, өйткені Кордафен орын алған жүрек жеткіліксіздігінің көрінісін жеделдетіп жіберуі мүмкін) митрильді стенозда, гипертрофиялы кардиомиопатиямен, айқын брадикардияда және тахикардияда, мидың қанайналымының ауыр бұзылуларымен, бауыр және бүйрек жеткіліксіздігімен, жүрек гликозидтерін қабылдап жүрген емделушілерге және егде жастағы адамдарға абайлап қолдану керек.

Кордафен, шеткергі қарсыласуды кеміте отырып, гипотонияны туғызуы ықтимал. Сондықтан, емдеудің бастапқы кезеңінде және препараттың дозасын әр арттырудан кейін артериялық қысымды бақылау керек.

Кордафеннің жылдам босап шығатын түрін гипертониялық сырқатты және тәулігіне 60 мг-ден асатын дозадағы препаратты қолдану қажет болатын басқа ауруларды ұзақ уақыт емдеу үшін қолданбау керек.

Ұзақ уақыт қолданғанда төзімділіктің және тоқтату синдромының дамуы мүмкін.

Егер Кордафенмен емделу барысында емделушіге жалпы жансыздандырудың астында хирургиялық араласу қажет болса анестезиологды бұл препаратты қабылдап жүргенін ескерту қажет.

Бауыр және/немесе бүйрек қызметінің бұзылулары бар науқастарда препаратты жоғары дозаларда қолданудан қашық болу керек.

Бауырдың ұлғаю және өттің іркілу жағдайлары кездесті. Кордафеннің үлкен дозаларын қабылдағанда бауыр трансаминазалары белсенділігінің артуы, бауырішілік холестаздың пайда болуы мүмкін. Бауыр циррозы бар науқастарда Кордафеннің шығарылу уақыты 7 күнге дейін ұзаруы ықтимал.

Зертханалық тестілер

Кордафен, кальций антагонистері тобының басқа препараттары тәрізді, тромбоциттер агрегациясын in vitro төмендетеді. Кейбір науқастарда препарат қан кету уақытын ұзартты, бұл тромбоциттер жасушалы қабығының кальций иондары тасымалын тежеуімен байланысты болуы ықтимал.

Кордафенді қабылдайтын науқастарда жалған оң Кумбс реакциясы, гемолитикалық анемия болуы мүмкін.

Дәрілік заттың көлік құралдарын немесе қауіптілігі зор механизмдерді басқару қабілетіне әсер ету ерекшеліктері

Артериялық қысымды түсіріп жіберетіндіктен Кордафен көлік құралдарын басқару және механикалық құрылғыларды іске қосу қабілетін шектеуі мүмкін.

Артық дозалануы

Белгілері: препараттың жағымсыз әсерлерінің күшеюі, оның ішінде – гипотония, брадикардия, ауыр жағдайларда - коллапс.

Емі: белгісіне қарай ауыр түрде уланған кезде асқазанды шаю, белсенділендірілген көмір тағайындалады. У қайтарғысы кальций тұзы болып табылады. Гемодиализ тиімсіз.

Шығарылу түрі және қаптамасы

10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамаға салады.

5 пішінді қаптамадан медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салады.

Сақтау шарттары

Құрғақ, жарықтан қорғалған жерде, 25°С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін препаратты қолдануға болмайды.

Дәріханалардан босатылу шарттары

Рецепт арқылы

Өндіруші

«ПОЛЬФАРМА» АҚ фармацевтикалық зауыты

Пельплиньска к-сі 19, 83-200 Старогард Гданьски, Польша

Тіркеу куәлігінің иесі

«Химфарм» АҚ, Қазақстан

Тұтынушылардан өнім (тауар) сапасы туралы түскен шағымдарды Қазақстан Республикасы аумағында қабылдайтын ұйымның атауы және мекенжайы:

«Химфарм» АҚ, Шымкент қаласы, ҚАЗАҚСТАН РЕСПУБЛИКАСЫ,

Рашидов көшесі, н/ж, т/ф: 560882

Телефон: 7252 (561342)

Факс: 7252 (561342)

Электронды поштасы: standart@santo.kz