Корвалтаб Экстра

• русский
• қазақша

• Скачать инструкцию медикамента

Саудалық атауы

Корвалтаб Экстра

Халықаралық патенттелмеген атауы

Жоқ

Дәрілік түрі

Үлбірлі қабықпен қапталған таблеткалар

Құрамы

Бір таблетканың құрамында

белсенді заттар: 100 мг гвайфенезин, 3,5 мг доксиламин гидроген сукцинаты, 8,2 мг α-бромизовалериан қышқылының этил эфирі;

қосымша заттар: жалбыз майы, β-циклодекстрин, мальтодекстрин, коповидон, кросповидон, кремнийдің қостотығы (коллоидты гидрофобты), сулы коллоидты кремнийдің қостотығы, магний стеараты; Opadry ІІ White қабығының құрамы: полиэтиленгликоль, поливинил спирті, тальк, титанның қостотығы (Е 171).

Сипаттамасы

Өзіне тән иісі бар, ақ түсті үлбірлі қабықпен қапталған, екі жақ беті дөңес, дөңгелек пішінді таблеткалар.

Фармакотерапиялық тобы

Ұйықтататын және тыныштандыратын басқа препараттар.

АТХ коды N05СМ

Фармакологиялық қасиеттері

Фармакокинетиксы

Гвайфенезин асқазан-ішек жолынан тез (30 минуттан кейін) сіңеді. Көбіне құрамында қышқыл мукополисахаридтер бар тіндерге өтеді. Пероральді түрде енгізуден кейін ең жоғары концентрацияға 1-2 сағаттан соң жетеді, ал емдік концентрациясы 6 сағат бойы сақталады. Гвайфенезиннің жартылай шығарылу кезеңі 1 сағатқа жуықты құрайды. Қақырықпен бірге экскрецияланады және метаболиттер түрінде, сондай-ақ өзгермеген күйінде бүйрек арқылы шығарылады. Қан плазмасында доксиламин гидрогені сукцинаты ең жоғары концентрацияға (Сmах) препаратты қабылдағаннан кейін орта есеппен 2 сағаттан соң (Tmax) жетеді.

Қан плазмасынан доксиламиннің орташа жартылай шығарылу кезеңі (Т½) орта есеппен 10 сағатты құрайды.

Доксиламин гидроген сукцинаты деметилдену және N-ацетилдену жолымен бауырда ішінара метаболизденеді. Жартылай шығарылу кезеңі егде жастағы пациенттерде және бүйрек немесе бауыр функциясының жеткіліксіздігі бар пациенттерде едәуір артуы мүмкін. Молекулалары ыдыраған кезде түзілетін әртүрлі метаболиттер мөлшері жағынан маңызды болып табылмайды, өйткені қабылданған дозаның 60%-ы өзгермеген доксиламин түрінде несептен табылады.

Фармакодинамикасы

Қантамырларды кеңейтетін (коронаролитикалық), седативтік, ұйықтататын дәрі. Жеңіл антиангинальді әсер береді. Орталық жүйке жүйесінің қозғыштығын төмендетуге мүмкіндік жасайды, тыныштандырғыш әсер береді және табиғи ұйқының басталуын жеңілдетеді.

Препараттың құрамына кіретін α-бромизовалериан қышқылының этил эфирі спазмдық, коронаролитикалық және седативтік әсер береді; үлкен дозаларда да ұйықтататын жеңіл әсер береді.

Гвайфенезин анксиолитикалық (үрейленуге қарсы) әсер береді.

Доксиламин гидроген сукцинаты Н1-гистаминдік рецепторлардың блокаторы болып табылады және седативтік, гипногендік және алллергияға қарсы әсер білдіреді.

Қолданылуы

Коронарлық қантамырлардың айқын емес спазмдарында;

нейроциркуляторлық дистония - кешенді ем құрамында;

қатты ашушаңдықпен невроздарда;

қозғыштық ұлғайғанда;

ұйқысыздықтың жеңіл түрінде;

қышынумен қатар жүретін дерматоздарда

Қолдану тәсілі және дозалары

Дозаларын және емдеу курсының ұзақтығын дәрігер әрбір науқас үшін жекелей белгілейді. Ересектерге, әдеттегідей, тамақтануға дейін тәулігіне 2-3 рет 1 таблеткадан тағайындайды. Ұйқысыздықтың жеңіл түрінде ұйқыдан 30 минут бұрын 1-2 таблеткадан тағайындайды.

Жағымсыз әсерлері

Жекелеген жағдайда мынадай жағымсыз әсерлер байқалуы мүмкін:

жүйке жүйесі тарапынан: ұйқышылдық, жеңіл бас айналу;

ас қорыту жолы тарапынан: жүректің айнуы, құсу;

иммундық жүйе тарапынан: аллергиялық реакциялар (соның ішінде тері бөртпесі, қышыну, есекжем).

Көрсетілген құбылыстар дозаны төмендеткен кезде немесе препарат қабылдауды тоқтатқан кезде қайтады.

Препараттың үлкен дозаларын ұзақ уақыт қолданған кезде бромизм дамуы мүмкін.

Диарея, іштің қатуы, ауыздың кеберсуі, аккомодацияның бұзылуы, жүрек қағуының күшеюі.

Күндізгі ұйқышылдық: мұндай әсерлер дамыған кезде дозаны төмендету қажет.

Гвайфенезинді көп мөлшерде ұзақ уақыт бойы қабылдаған пациенттердің қуығында немесе бүйректерінде тастардың түзілгені жөнінде сирек мәлімдемелер бар.

Жағымсыз жанама реакциялар пайда болған жағдайда дәрігерден кеңес алған жөн.

Қолдануға болмайтын жағдайлар

- препарат компоненттеріне немесе антигистаминдік препараттарға жоғары сезімталдық

- бүйрек және бауыр функциясының ауыр бұзылулары, бауырлық порфирия - пациенттің анамнезінде немесе отбасылық анамнезінде жабық бұрышты глаукоманың болуы

- несеп іркілісінің қаупі бар уретроспастикалық бұзылыстары

- жүрек функциясының ауыр жеткіліксіздігі

- депрессия және орталық жүйке жүйесінің қызметінің бәсеңдеуімен қатар жүретін басқа да бұзылыстар

- 18 жасқа дейінгі балаларға

Дәрілермен өзара әрекеттесуі

Препаратты орталық жүйке жүйесінің қызметін бәсеңдететін басқа дәрілік заттармен бір мезгілде қолданғанда әсерлері өзара күшеюі, сондай-ақ этанолдың әсер етуі күшеюі мүмкін. Алкоголь қабылдау аясында препараттың әсері күшейеді.

Препаратты мыналармен біріктіріп қолданған жағдайда ескерген жөн:

- атропинмен және атропин тәрізді дәрілік заттармен (имипраминді антидепрессанттармен, паркинсонға қарсы антихолинергиялық препараттармен, атропинді спазмолитикалық дәрілік заттармен, дизопирамидпен, фенотиазинді нейролептиктермен) – несептің іркілуі, іш қату, ауыздың кеберсуі сияқты жағымсыз әсерлер туындауы мүмкін;

- антидепрессанттармен, морфин туындыларымен (ауыруды басатын дәрілермен және жөтелді емдеу үшін қолданылатын дәрілермен), нейролептиктермен; барбитураттармен, бензодиазепиндермен, гипертензияға қарсы орталық әсері бар дәрілермен – орталық жүйке жүйесінің бәсеңдеуі күшеюі мүмкін.

Айрықша нұсқаулар

Препаратты қабылдаған кезде спирт ішімдіктерін пайдалануға жол бермеген жөн.

Бас айналудың туындау қаупіне байланысты, егде жастағы пациенттерге сақтықпен қолданған жөн.

Препаратпен емдеу кезінде түнгі апноэ синдромы (тыныс алудың тоқтап қалу санының және ұзақтығының артуы) өршуі мүмкін.

Жекелеген жағдайларда несеп түсінің өзгеруі байқалуы мүмкін.

Препаратты пациенттердің мына санаттарына сақтықпен қолданған жөн:

• демікпе, шылым шегу, созылмалы бронхит және эмфизема себептерінен созылмалы немесе үздіксіз жөтелі бар;

• бүйрек функциясы бұзылған;

• гравис миастениясы бар;

• жедел асқазан-ішек бұзылыстары бар.

Жүктілік немесе емшек емізу кезеңінде қолданылуы.

Жүкті әйелдерге және емшек емізу кезеңіндегі әйелдерге препаратты тағайындамайды.

Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері

Емделу кезінде автомобильді басқаруды немесе психомоторлы реакциялардың жылдамдығын қажет ететін басқа механизмдермен жұмыс жасауды тоқтата тұрған жөн.

Артық дозалануы

Симптомдары: ұйқышылдық, әлсіздік, бас айналу, вертиго, асқазан-ішектік бұзылыстар және антихолинергиялық әсерлердің белгілері: қозу, қарашықтың ұлғаюы, аккомодацияның салдануы, ауыздың кеберсуі, беттің және мойынның қызаруы, гипертермия, синустық тахикардия болуы ықтимал. Өте жоғары дозалар қозу, сананың шатасуы және тыныстың тарылуы сияқты симптомдарды туындатуы мүмкін.

Емі: препарат қабылдауды тоқтату, асқазанды шаю және симптоматикалық ем жүргізу. Спецификалық антидоты жоқ.

Шығарылу түрі және қаптамасы

Лакталған баспалы алюминий фольгадан және алюминий фольгадан жасалған пішінді ұяшықты қаптамада 10 таблеткадан.

Пішінді ұяшықты 1 немесе 2 қаптама медициналық қолдану жөнінде мемлекеттік және орыс тілдеріндегі нұсқаулықпен бірге тұтынушыларға арналған картон қорапшаға салынған.

Сақтау шарттары

Түпнұсқалық қаптамасында 25ºС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Дәріханалардан босатылу шарттары

Рецепт арқылы

Өндіруші/ Тіркеу куәлігінің ұстаушысы.

«Фарма Старт» ЖШҚ,

Украина, Киев қ., И. Лепсе бул., 8.

Қазақстан Республикасы аумағында тұтынушылардан дәрілік заттардың сапасына қатысты шағымдарды қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы:

«Ацино Каз» ЖШС,

Қазақстан Республикасы, 050010, Алматы қ., Бегалин к-сі, 136 А

Телефон: 8 (717-2) 91-61-51

Факс: 8 (717-2) 91-61-51

Байланыстағы тұлға: Цой Л.С.

E-mail: lyubov.tsoy@acino.swiss