Конарекс (150 мг)

Конарекс

Флуконазол

Дәрілік түрі, дозасы

Капсулалар, 150 мг

Жүйелі қолдануға арналған инфекцияға қарсы препараттар.

Жүйелі қолдануға арналған зеңге қарсы препараттар.

Триазол туындылары. Флуконазол.

АТХ коды J02AC01

– криптококкты менингит

– кокцидиоидомикоз

– инвазиялық кандидоз

– ауыз қуысының, жұтқыншақтың, өңештің шырышты қабықтарын қоса, шырышты қабықтар кандидозы, кандидуриялар және терінің әрі шырышты қабықтардың созылмалы кандидозы

– ауыз қуысы гигиенасын қадағалау немесе жергілікті емдеу жеткіліксіз болған кездегі ауыз қуысының созылмалы атрофиялық кандидозы (тіс протездерін тағумен байланысты)

– жергілікті ем қолданылмайтын кездегі жедел немесе қайталамалы қынаптық кандидоз

– жергілікті ем қолданылмайтын кандидозды баланит

– дерматомикоздар, оның ішінде табан дерматофитиясы (tinea pedis), тегіс тері дерматофитиясы (tinea corporis), шап дерматофитиясы (tinea cruris), кебек тәрізді теміреткі (tinea versicolor) және терінің кандидозды инфекциялары, жүйелі емдеу қажет болса

– басқа препараттармен емдеуге болмайтын тырнақ дерматофитиясы (онихомикоз)

– қайталануының даму қаупі жоғары пациенттерде криптококкты менингит қайталануының профилактикасы

– қайталануының даму қаупі жоғары АИТВ инфекциясын жұқтырған пациенттерде ауыз қуысының, жұтқыншақтың немесе өңештің шырышты қабықтар кандидозы қайталануының профилактикасы

– жиілігін азайту (жылына 4 немесе одан көп көріністер) үшін қынаптық кандидоз қайталануларының профилактикасы

– ұзаққа созылатын нейтропениясы бар пациенттерде (мысалы, химиялық емнен өткен гемотологиялық қатерлі жаңа түзілімдері бар пациенттерде немесе гемопоэздік дің жасушаларының трансплантациясы жасалған пациенттерде) кандидоздық инфекциялар профилактикасы.

Қолданудың басталуына дейінгі қажетті мәліметтер тізбесі

– флуконазолға, препараттың басқа компоненттеріне немесе құрылымы флуконазолға ұқсас азол заттарына жоғары сезімталдық

– Конарексті тәулігіне 400 мг және одан көп дозада көп рет қолдану кезінде бір мезгілде терфенадин қабылдау

– QT аралығын ұзартатын және CYP3A4 изоферменті көмегімен метаболизденетін цизаприд, астемизол, пимозид, хинидин, амиодарон және эритромицин сияқты препараттармен бір мезгілде қолдану

– Конарекс капсуласы құрамында лактоза бар болғандықтан, галактоза жақпаушылығы, Лапп лактаза тапшылығы, глюкоза-галактоза мальабсорбциясы

– жүктілік және лактация кезеңі

– балалар мен 18 жасқа дейінгі жасөспірімдер (капсула қабығының құрамында балаларда қолдануға тыйым салынған бояғыш бар!).

Қолдану кезіндегі қажетті сақтандыру шаралары

Бастың шашты бөлігінің дерматофитиясы

Препарат тиімділігі жағынан гризеофульвиннен асып түспейді; емдеудің жалпы сәттілігі 20% құрады, осылайша, Конарексті бастың шашты бөлігінің дерматофитиясын емдеуге пайдалануға болмайды.

Криптококкоз

Конарекстің басқа аумақтардың криптококкозын (мысалы, өкпенің және терінің криптококкозын) емдеу тиімділігі туралы дәлелді деректер жеткіліксіз, сондықтан препаратты дозалау жөнінде нұсқаулар беру мүмкіндігі жоқ.

Терең эндемиялық микоздар

Конарекстің паракокцидиоидомикоз, тері-лимфа споротрихозы және гистоплазмоз сияқты эндемиялық микоздардың басқа түрлерін емдеу тиімділігі бойынша дәлелді деректер шектеулі, соның салдарынан дозалауға қатысты қандай да бір нұсқаулар беру мүмкіндігі жоқ.

Бүйрек функциясының бұзылуы

Конарекс бүйрек функциясының бұзылуы бар пациенттерде сақтықпен қолданылу керек.

Бүйрек үсті бездері жеткіліксіздігі

Кетоконазолдың бүйрек үсті бездерінің жеткіліксіздігін туындататыны белгілі, ал оны сирек болса да флуконазол қолдану кезінде де байқауға болады.

Бауыр және өт шығару жолдары функциясының бұзылуы

Конарекс бауыр функциясының бұзылуы бар пациенттерге абайлап тағайындалу керек.

Сирек жағдайларда флуконазол қолдану, ең алдымен, күрделі қатарлас аурулары бар пациенттерде бауырдың уыттылық өзгерістерімен, оның ішінде өліммен аяқталуымен қатар жүрді. Флуконазолмен байланысты гепатоуыттылық жағдайларында жалпы тәуліктік дозасымен, ем ұзықтығымен, пациенттердің жынысымен немесе жасымен қандай да бір айқын өзара байланысы байқалмады. Флуконазол гепатоуыттылығы әдетте қайтымды сипатта болды және емдеуді тоқтатудан кейін басылды.

Флуконазолмен емдеу кезінде бауыр функциясының зертханалық көрсеткіштерінің ауытқулары бар пациенттер бауырдың өте ауыр зақымдануларының дамуынан сақтану мақсатында тұрақты қадағалауда болуы тиіс.

Емдеуші дәрігер бауыр үшін ауыр зардаптарға тән симптомдар (астения, анорексия, үнемі жүрек айну, құсу және сарғаю) туралы пациенттерді хабарландыруы тиіс. Флуконазол қабылдауды дереу тоқтату керек, ал пациент дәрігерге қаралу керек.

Жүрек-қантамыр жүйесі

Кейбір азолдарды, оның ішінде флуконазолды қабылдау кезінде электрокардиограммада QT аралығының ұзару жағдайлары орын алды. Флуконазол қабылдаған пациенттерде тіркеуден кейінгі қадағалау барысында QT аралығы ұзаруының және полиморфты қарыншалық тахикардияның өте сирек жағдайлары тіркелді. Осы жағдайлар арасында жүректің құрылымдық ауруы, электролиттік бұзылулар және оқиғаға әсер етуі де мүмкін қатарлас препараттар сияқты көптеген қатарлас қауіп факторлары бар ауыр науқасты пациенттер туралы хабарламалар болды.

Конарекс ықтималды аритмия кезіндегі пациенттерге сақтықпен тағайындалу керек. QT аралығын ұзартатыны және P-450 CYP3A4 цитохромы көмегімен метаболизденетіні белгілі басқа дәрілік препараттарды бір мезгілде қолдану қарсы көрсетілімді.

Галофантрин

Галофантрин ұсынылатын емдік дозасында QT аралығын ұзартады және CYP3A4 субстраты болып табылады. Сондықтан флуконазол мен галофантринді бір мезгілде қолдану ұсынылмайды.

Тері реакциялары

Сирек жағдайларда флуконазолмен емделу кезінде пациенттерде Стивенс- Джонсон синдромы және уытты эпидермалық некролиз сияқты эксфолиативті тері реакциялары дамиды. АИТВ инфекциясын жұқтырған пациенттер көптеген дәрілік препараттарға ауыр тері реакцияларының дамуына бейім болып келеді. Беткейлік зең инфекциясынан емделіп жүрген пациентте флуконазол әсеріне жатқызуға болатын бөртпе білінгенде осы дәрілік препаратпен емдеуді тоқтату керек. Инвазиялық/жүйелі зең инфекциялары бар пациенттерде бөртпе пайда болғанда оларды мұқият қадағалау және буллезді зақымданулар немесе көп пішінді эритема білінгенде флуконазолды тоқтату керек.

Аса жоғары сезімталдық

Анафилаксиялық реакцияның сирек жағдайлары тіркелді.

P-450 цитохромы

Флуконазол CYP2C9 изоферментінің күшті тежегіші және CYP3A4 изоферментінің орташа тежегіші, сондай-ақ CYP2C19 изоферментінің тежегіші болып табылады. Конарексті CYP2C9, CYP2C19 және CYP3A4 изоферменттерімен метаболизденетін емдік диапазоны тар дәрілік препараттармен бір мезгілде қабылдайтын пациенттерге қадағалау жүргізген жөн.

Терфенадин

Тәулігіне 400 мг дозалардан аз флуконазол мен терфенадинді бір мезгілде қолдануды емдеуші дәрігердің мұқият қадағалауымен жүргізген жөн.

Қосымша заттар

Конарекс капсуласының құрамында лактоза бар. Сирек тұқым қуалайтын галактоза жақпаушылығы, Лапп лактаза тапшылығы немесе глюкоза-галактоза мальабсорбциясы бар пациенттерге аталған дәрілік препаратты қабылдауға болмайды.

Басқа дәрілік препараттармен өзара әрекеттесуі

Конарексті келесі препараттармен бір мезгілде қолдану қарсы көрсетілімді

Цизаприд: флуконазол мен цизапридті бір мезгілде қолданғанда жүрек тарапынан жағымсыз реакциялар, оның ішінде көп пішінді қарыншалық пароксизмалық тахикардия жағдайлары болуы мүмкін. Тәулігіне 1 рет 200 мг флуконазол мен тәулігіне төрт рет 20 мг цизапридті бір мезгілде қолдану қандағы цизапридтің плазмалық концентрацияларының айқын жоғарылауына және QT аралығының ұзаруына әкеледі. Оларды бір мезгілде қолдану қарсы көрсетілімді.

Терфенадин: зеңге қарсы азол дәрілері мен терфенадинді бір мезгілде қолданғанда QT аралығының ұзаруы нәтижесінде жүрек аритмиялары туындауы мүмкін. Флуконазолды тәулігіне 200 мг дозада терфенадинмен қолдану QT аралығының ұзаруын туғызбады, флуконазолды тәулігіне 1 рет 400 мг және 800 мг дозада қолданғанда терфенадиннің плазмалық концентрацияларының едәуір жоғарылауы болды. Терфенадин мен флуконазолды тәулігіне 400 мг-ден бастап одан көп дозаларда бір мезгілде қолдану қарсы көрсетілімді. Терфенадин мен флуконазолды тәулігіне 1 рет 400 мг-ден аспайтын дозаларда бір мезгілде қолдану да қарсы көрсетілімді. Тәулігіне 400 мг-ден аспайтын дозаларда терфенадин мен флуконазолды бір мезгілде қолдануды мұқият бақылаумен жүргізген жөн.

Астемизол: флуконазол мен астемизолды бір мезгілде қолдану астемизол клиренсінің төмендеуіне әкелуі мүмкін. Астемизолдың жоғары плазмалық концентрациялары QT аралығының ұзаруына және сирек жағдайларда көп пішінді қарыншалық пароксизмалық тахикардияның туындауына әкелуі мүмкін. Оларды бір мезгілде қолдану қарсы көрсетілімді.

Пимозид: флуконазол мен пимозидті бір мезгілде қолдану пимозид метаболизмінің тежелуіне әкелуі мүмкін. Пимозидтің жоғары плазмалық концентрациялары QT аралығының ұзаруына және сирек жағдайларда көп пішінді қарыншалық пароксизмалық тахикардияның туындауына әкелуі мүмкін. Оларды бір мезгілде қолдану қарсы көрсетілімді.

Хинидин: флуконазол мен хинидинді бір мезгілде қолдану хинидин метаболизмінің бәсеңдеуіне әкелуі мүмкін. Хинидин қолданылғанда QT аралығының ұзару жағдайлары және көп пішінді қарыншалық пароксизмалық тахикардияның сирек жағдайлары байқалды. Оларды бір мезгілде қолдану қарсы көрсетілімді.

Эритромицин: флуконазол мен эритромицинді бір мезгілде қолдану кардиоуыттылықтың ықтималды қаупін (QT аралығының ұзаруы, көп пішінді қарыншалық пароксизмалық тахикардия) арттырады және, соның салдары ретінде, жүректен болатын кенет өлім қаупін арттырады.Оларды бір мезгілде қолдану қарсы көрсетілімді.

Конарексті келесі препараттармен бір мезгілде қолдану ұсынылмайды

Галофантрин: CYP3A4 ферментіне тежегіш әсер етуіне орай, флуконазол галофантриннің плазмалық концентрациясын арттыруы мүмкін. Флуконазол мен галофантринді бір мезгілде қолдану ықтималды кардиоуыттылық қаупін (QT аралығының ұзаруы, көп пішінді қарыншалық пароксизмалық тахикардия) арттырады және, соның салдарынан, жүректен болатын кенет өлім қаупін арттырады. Осы біріктірілімнен сақтану керек.

Конарексті келесі препараттармен бір мезгілде қолдану сақ болуды талап етеді

Амиодарон: флуконазолды амиодаронмен бір мезгілде қолдану QT аралығының ұзаруымен қатар жүрді. Сондықтан, егер флуконазолды амиодаронмен, әсіресе, флуконазолдың жоғары дозасында (тәулігіне 800 мг) қолдану қажет болса, сақтық таныту керек.

Конарексті келесі препараттармен бір мезгілде қолдану сақтануды және олардың дозаларын түзетуді талап етеді

Басқа дәрілік препараттардың флуконазолға әсері

Рифампицин: флуконазол мен рифампицинді бір мезгілде қолдану флуконазолдың AUC мәндерінің 25% төмендеуіне және жартылай шығарылу кезеңінің 20% қысқаруына әкеледі. Рифампицинді бір мезгілде қабылдайтын пациенттерде флуконазол дозасын арттыру керек. Флуконазолды тамақпен, циметидинмен, антацидтермен немесе кейіннен сүйек кемігін ауыстырып салу кезінде организмді жаппай сәулелендірумен бірге пероральді қабылдау флуконазол сіңірілуінің клиникалық мәнді нашарлауына әкелмейді.

Гидрохлортиазид: флуконазолмен бір мезгілде гидрохлортиазидті көп рет қолдану қан плазмасында флуконазол концентрациясының 40% жоғарылауына әкеледі. Осындай әсері болғанда бір мезгілде диуретиктер алатын пациенттерде флуконазол қабылдау режимін өзгерту қажет емес.

Флуконазолдың басқа дәрілік препараттарға әсері

Флуконазол P-450 цитохромының CYP2C9 изоферментінің күшті тежегіші және CYP3A4 орташа тежегіші болып табылады. Флуконазол CYP2C19 изоферментін де тежейді. Сонымен қатар, CYP2C9, CYP2C19 және CYP3A4 ферменттері арқылы метаболизденетін және флуконазолмен бір мезгілде қолданылатын басқа құрамдастарының плазмалық концентрациясының жоғарылау қаупі бар. Сондықтан, аталған препараттарды абайлап біріктіру керек, ал пациенттер дәрігердің мұқият қадағалауында болуы тиіс. Флуконазолдың ферменттерді тежеу әсері оның жартылай шығарылу кезеңінің ұзаққа созылуына орай, аталған препаратпен емдеуді тоқтатудан кейін 4-5 күн бойы жалғасады.

Алфентанил: флуконазол (400 мг) мен алфентанилді (вена ішіне 20 мкг/кг) бір мезгілде қолдану, CYP3A4 ферментінің тежелуіне орай, алфентанил AUC10 мәнінің 2 есе артуына әкелуі мүмкін. Алфентанил дозасын түзету қажет болуы мүмкін.

Амитриптилин, нортриптилин: флуконазол амитриптилин мен нортриптилиннің әсерін күшейтеді. 5-нортриптилин және (немесе) S-амитриптилин концентрациясын біріктірілген емдеуді бастар алдында және одан кейін бір аптадан соң өлшеуге болады. Қажет болғанда, амитриптилин немесе нортриптилин дозасын түзету керек.

Амфотерицин В: бір мезгілде флуконазол мен амфотерицин B қолдану келесі нәтижелерді көрсетеді: C. albicans туғызған жүйелі инфекциялар кезіндегі зеңге қарсы әлсіз аддитивтік әсері, Cryptococcus neoformans туғызған бассүйекішілік инфекция кезінде ешқандай өзара әрекеттесу болмауы, Aspergillus fumigatus туғызған жүйелі инфекция кезіндегі екі препарат антагонизмі.

Антикоагулянттар: флуконазолды варфаринмен бір мезгілде қабылдап жүрген пациенттерде протромбин уақытының ұзаруымен байланысты қан кетулер (гематомалар, мұрыннан қан кету, асқазан-ішектен қан кету, гематурия және мелена) тіркелді. Флуконазолмен және варфаринмен қатарлас емдеу кезінде протромбин уақыты 2 есе ұзарады, бұл варфарин метаболизмінің CYP2C9 изоферменті арқылы тежелуінен болуы мүмкін. Кумариндік қатар антикоагулянттарын немесе индандионды флуконазолмен бір мезгілде қабылдайтын пациенттерде протромбин уақытын бақылап отыру және қажет болса антикуоагулянт дозасын түзету керек.

Қысқа әсер ететін бензодиазепиндер (мидазолам, триазолам): мидазолам мен флуконазолды ішке қабылдаудан кейін мидазолам концентрациясының елеулі жоғарылауы және психомоторлық әсерлер күшеюі байқалады. Бір мезгілде 200 мг флуконазолды және 7,5 мг мидазоламды қолдану мидазолам AUC мәндерінің артуына және жартылай шығарылу кезеңінің 3,7 және 2,2 есе ұзаруына әкеледі. Бір мезгілде 200 мг флуконазолды және 0,25 мг триазоламды триазоламның AUC мәндерінің артуына және жартылай шығарылу кезеңінің 4,4 және 2,3 есе ұзаруына әкеледі. Флуконазол мен триазолам бір мезгілде қолданылғанда триазолам әсерінің күшеюі және ұзаққа созылуы байқалады. Флуконазолды бензодиазепиндермен бір мезгілде қолданған жағдайда, қажет болса, бензодиазепин дозасын азайту керек.

Карбамазепин: флуконазол карбамазепиннің метаболизмін тежейді және қан сарысуында соңғысының концентрациясын 30% арттырады. Карбамазепин уыттылығының даму қаупі бар. Концентрация көрсеткіштеріне немесе әсеріне қарай карбамазепин дозасын түзету қажет болуы мүмкін.

Кальций өзекшелерінің блокаторлары: кальций өзекшелерінің кейбір антагонистері (нифедипин, исрадипин, амлодипин, верапамил және фелодипин) СҮР3А4 ферментімен метаболизденеді. Флуконазол кальций өзекшелері антагонистерінің жүйелі әсерін едәуір арттыруы мүмкін. Препараттардың жағымсыз реакцияларын жиі бақылау ұсынылады.

Целекоксиб: флуконазолмен (тәулігіне 200 мг) және целекоксибпен (200 мг) қатарлас ем кезінде целекоксиб Cmax және AUC 68 және 134 артады. Флуконазолмен біріктіргенде целекоксиб дозасының жартысы қажет болуы мүмкін.

Циклофосфамид: циклофосфамид пен флуконазолдың біріктірілген емі қан сарысуында билирубин мен креатинин деңгейлерінің жоғарылауына әкеледі. Біріктірілімді қан сарысуында билирубин мен креатинин деңгейлерінің жоғарылау қаупі білінгенше пайдалануға болады.

Фентанил: флуконазолды фентанилмен бір мезгілде қабылдаған пациенттерде өліммен аяқталған бір жағдай тіркелді. Оның үстіне, флуконазол фентанилдің элиминациясын елеулі бөгейді. Фентанилдің жоғары концентрациялары тыныс алу жеткіліксіздігіне әкелуі мүмкін. Пациенттерге тыныс тарылуының ықтимал қаупі тұрғысынан мұқият қадағалау жүргізген жөн. Фентанил дозасын түзету қажет болуы мүмкін.

Гидроксиметилглутарил A-редуктаза коферментінің (ГМГ-КоA- редуктаза) тежегіштері: флуконазол CYP3A4 арқылы метаболизденетін аторвастатин мен симвастатин сияқты немесе CYP2C9 арқылы метаболизденетін флувастатин сияқты ГМГ-КоA-редуктаза тежегіштерімен бір мезгілде тағайындалғанда миопатия мен қаңқа бұлшықеттерінің жедел некрозының (рабдомиолиз) даму қаупі артады. Біріктіріп емдеу қажет болса, пациент миопатия мен рабдомиолиз симптомдарының білінуіне қатысты дәрігердің қадағалауында болуы тиіс, сондай-ақ креатинкиназа деңгейіне бақылау жүргізілуі тиіс. Егер креатинкиназа деңгейінің елеулі жоғарылауы байқалса немесе миопатия немесе рабдомиолиз диагнозы қойылса немесе дамуына күмән болса, ГМГ- КоA-редуктаза тежегіштерін қабылдауды тоқтату керек.

Иммунодепрессанттар (циклоспорин, эверолимус, сиролимус және такролимус)

Циклоспорин: флуконазол циклоспориннің концентрациясы мен AUC мәнін едәуір жоғарылатады. Флуконазол (тәулігіне 200 мг дозада) және циклоспорин (тәулігіне 2,7 мг/кг дозада) бір мезгілде қолданылғанда циклоспорин AUC мәнінің 1,8 есе артуы байқалды. Препараттардың бұл біріктірілімін циклоспорин дозасын оның концентрациясына қарай азайта отырып, пайдалануға болады.

Эверолимус: CYP3A4 ферментінің тежелісі салдарынан, флуконазол қан сарысуында эверолимус концентрациясын арттыруы мүмкін.

Сиролимус: флуконазол сиролимустың плазмалық концентрациясын жорамалды түрде сиролимус метаболизмін CYP3A4 пен Р-гликопротеин арқылы бәсеңдету жолымен арттырады. Бұл біріктірілімді сиролимус дозасын әсеріне және концентрация көрсеткіштеріне байланысты түзету кезінде пайдалануға болады.

Такролимус: Ішектегі CYP3A4 ферментінің тежелуі салдарынан, такролимус метаболизмінің тежелісі себепті фуконазол 5 ретке дейін пероральді қолданылғанда қан сарысуында такролимус концентрациясын арттыруы мүмкін. Такролимус вена ішіне қолданылғанда елеулі фармакокинетикалық өзгерістер байқалмады. Жоғары деңгейлері нефроуыттылықпен астасады. Пероральді қолданғанда такролимус дозасын оның концентрациясына қарай азайту керек.

Лозартан: флуконазол лозартанның, лозартанмен емделу кезінде орын алатын ангиотензин II рецепторлары антагонизмінің көп бөлігіне жауап беретін лозартанның оның белсенді метаболитіне (Е-3174) метаболизденуін тежейді. Пациенттер артериялық қысымын үнемі бақылап отыруы тиіс.

Метадон: флуконазол қан сарысуында метадон концентрациясын арттыруы мүмкін. Метадон дозасын түзету қажет болуы мүмкін.

Қабынуға қарсы стероидты емес препараттар (ҚҚСП): флуконазолмен бір мезгілде тағайындағанда, флурбипрофен монотерапиясымен салыстырғанда, флурбипрофен Cmax және AUC 23% және 81% артады. Осыған ұқсас, флуконазол ибупрофеннің рацемиялық қоспасымен (400 мг) бір мезгілде тағайындалғанда, соңғысының монотерапиясымен салыстырғанда, фармакологиялық белсенді изомерінің (S -(+) - ибупрофен) Cmax пен AUC мәндері 15% және 82% артады.

Флуконазол CYP2C9 арқылы метаболизденетін басқа ҚҚСП (мысалы, напроксен, лорноксикам, мелоксикам, диклофенак) жүйелі әсерін арттыруы мүмкін. ҚҚСП-мен байланысты жағымсыз әсері мен уыттылығына жиі мониторинг өткізу ұсынылады. ҚҚСП дозасын түзету қажет болуы мүмкін.

Фенитоин: флуконазол фенитоиннің бауырлық метаболизмін тежейді. Флуконазолды 200 мг дозада және фенитоинді 250 мг дозада бір мезгілде вена ішіне көп рет қолдану фенитоин AUC24 мәнінің 75% және Cmin мәнінің 128% артуына алып келді. Бір мезгілде қолданғанда фенитоиннің уыттылық көріністерін болдырмау үшін қан сарысуында фенитоин концентрациясының деңгейлері тексерілуі тиіс.

Преднизон: флуконазолмен және преднизонмен ұзақ уақыт емделген пациенттер флуконазол қабылдауды тоқтатудан кейін бүйрек үсті бездері қыртысы жеткіліксіздігінің дамуы тұрғысынан бақылануы тиіс. Рифабутин: флуконазолмен бір мезгілде қолдану қан сарысуында рифабутин AUC шамасының 80% дейін артуына алып келеді. Флуконазолды рифабутинмен бір мезгілде қабылдаған пациенттерде увеит дамыған жағдайлар тіркелді. Осындай біріктірілімді қолданғанда пациентnердің жай-күйін рифабутиннің уыттылық көріністерінің симптомдары тұрғысынан мұқият бақылау қажет.

Саквинавир: флуконазол CYP3A4 ферментінің қатысуымен жүретін саквинавирдің бауырлық метаболизмінің тежелуіне, сондай-ақ P-гликопротеин тежелісіне орай, ферменттердің қатысуымен саквинавир AUC және Cmax мәндерін, тиісінше, шамамен 50% және 55% арттырады. Саквинавирмен/ритонавирмен өзара әрекеттесуі зерттелмеді және айқынырақ білінуі мүмкін. Саквинавир дозасын түзету қажеттілігі туындауы мүмкін.

Сульфонилмочевина препараттары: флуконазол пероральді сульфонилмочевина препараттарын (мысалы, хлорпропамид, глибенкламид, глипизид, толбутамид) бір мезгілде қабылдағанда қан плазмасынан жартылай шығарылу кезеңін ұзартады. Қан глюкозасын жиі бақылау және сульфонилмочевина дозасын тиісінше азайту ұсынылады.

Теофиллин: флуконазолды 14 күн бойы 200 мг дозада қабылдау теофиллин клиренсінің орташа жылдамдығының 18% төмендеуіне әкеледі. Флуконазол мен теофиллинді жоғары дозаларда қабылдап жүрген пациенттерді немесе теофиллиннің уытты әсер ету қаупі жоғары пациенттерді теофиллиннің артық дозалану симптомдарын дер мезгілінде анықтау мақсатында мұқият қадағалау қажет; олар пайда болғанда емді тиісті үлгіде өзгерту керек.

Қабіршөп алкалоиды: флуконазол қабіршөп алкалоидының (мысалы, винкристин және винбластин) плазмалық деңгейлерін жоғарылатуы және CYP3A4 тежеу әсеріне орай нейроуыттылыққа әкелуі мүмкін.

А дәрумені: транс-ретиной қышқылымен (A дәруменінің қышқылды түрі) және флуконазолмен біріктірілген емнен толық өткен пациенттегі бір клиникалық жағдай сипаттамасында идиопатиялық бассүйекішілік гипертензия түрінде ОЖЖ тарапынан жағымсыз әсерлер дамуы тіркелді, ол флуконазолды тоқтатудан кейін басылды. Бұл біріктірілімді пайдалануға болады, бірақ ОЖЖ тарапынан жағымсыз реакциялардың туындау қаупін есте сақтау керек.

Вориконазол (CYP2C9, CYP2C19 және CYP3A4 тежегіші): пероральді вориконазолды (1-ші күні әр 12 сағат сайын 400 мг, одан кейін 2,5 күн бойы әр 12 сағат сайын 200 мг) және пероральді флуконазолды (1-ші күні 400 мг, одан кейін 4 күн бойы әр 24 сағат сайын 200 мг) бір мезгілде қолдану вориконазол концентрациясының және AUC мәнінің, тиісінше, орта есеппен 57% (90% C1: 20%, 107%) және 79% (90% CI: 40%, 128%) артуына әкелді. Вориконазол мен флуконазолды кез келген дозада бір мезгілде тағайындау ұсынылмайды. Вориконазолды флуконазолдан кейін бірден қолданған жағдайда вориконазол қолданумен байланысты жағымсыз реакцияларға мониторинг өткізу ұсынылады.

Зидовудин: флуконазол зидовудиннің Cmax және AUC мәндерін, тиісінше, 84% және 74% арттырады, бұл оны пероральді қолданғанда зидовудин клиренсінің шамамен 45% төмендеуі себебінен болады. Зидовудиннің жартылай шығарылу кезеңі флуконазолмен біріктірілген емнен кейін шамамен 128% ұзарады. Осы біріктірілімді қабылдап жүрген пациенттер зидовудин қабылдаумен байланысты жағымсыз реакцияларды анықтау мақсатында қадағалануы тиіс. Зидовудин дозасын азайту қажет болуы мүмкін.

Азитромицин: флуконазол және азитромицин арасында елеулі фармакокинетикалық өзара әрекеттесу анықталмады.

Пероральді контрацептивтер: флуконазол 50 мг дозасының гормондар деңгейіне ешқандай елеулі әсері байқалмады, ал тәуліктік 200 мг дозасында этинилэстрадиол мен левоноргестрел AUC (концентрация-уақыт қисығы астындағы ауданы) 40% және 24% ұзарды. Осылайша, флуконазолды жоғарыда көрсетілген дозаларында көп рет қолдану ұрықтануға қарсы біріктірілген пероральді препараттардың тиімділігіне әсерін көрсетпейді.

Ивакафтор: муковисцидоз кезінде жарғақшаішілік өткізгіштік реттегіші генінің стимуляторы (CFTR) - ивакафтормен бір мезгілде қолдану ивакафтордың әсер ету деңгейін 3 есе, ал гидроксиметил-ивакафтордың (M1) әсер ету деңгейін 1,9  есе арттырады. Флуконазол мен эритромицин сияқты CYP3A орташа тежегіштерін бір мезгілде қабылдап жүрген пациенттерге ивакафтор дозасын тәулігіне 1 рет 150 мг дейін азайту ұсынылады.

Арнайы сақтандырулар

Жүктілік

Обсервациялық зерттеулер нәтижелері жүктіліктің бірінші триместрі кезінде флуконазол қабылдаған әйелдерде өздігінен болатын түсіктердің жоғары қаупін көрсетті.

Кокцидиоидомикозды емдеу үшін флуконазолды жоғары дозаларда (күніне 400-800 мг) үш ай бойы немесе одан көп уақыт қабылдаған аналардың жаңа туған нәрестелерінде көптеген даму ақауларының (брахицефалия, құлақ қалқандары дисплазиясын, алдыңғы еңбектің шектен тыс ұлғаюын, сан сүйегінің қисаюын, иық-шынтақ синостозын қоса) жағдайлары сипатталды. Осы жағдайлардың флуконазол қабылдаумен өзара себеп-салдарлы байланысы анықталмады.

Конарекс, күтілетін пайдасы қаупінен едәуір асып кететін жағдайларды қоспағанда, жүктілік кезінде стандартты дозаларда және қысқа мерзімді емдеу үшін пайдаланылмауы тиіс.

Конарексті, өмірге қатері зор инфекция жағдайларын қоспағанда, жоғары дозаларда және/немесе ұзақ уақыт қолдану үшін жүктілік кезінде пайдалануға болмайды.

Лактация кезеңі

Конарекстің емшек сүтіндегі концентрациялары оның қан плазмасындағы концентрациясынан төмен. Флуконазолдың 150 мг немесе одан аз стандартты дозасын бір рет қабылдаудан кейін бала емізуді жалғастыруға болады.

Бірақ көп рет қолдану немесе флуконазолдың үлкен дозасын қабылдаудан кейін бала емізуге кеңес берілмейді.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Конарекстің көлік құралын немесе аса қауіпті механизмдерді басқару қабілетіне әсер етуіне зерттеу жүргізілмеді. Конарекс қабылдау кезінде пациенттер бас айналуын немесе құрысу ұстамаларын сезінуі мүмкін, сондықтан осы симптомдардың кез келгені туындағанда автокөлік құралдарын басқармау және механизмдермен жұмыс істемеу керек.

Қолдану жөніндегі нұсқаулар

Капсулалар ішке қабылдауға арналған. Капсулалар бүтіндей жұтылады.

Емді өсірінділер сеппесінің және басқа зертханалық зерттеулердің нәтижелерін алуға дейін бастауға болады. Алайда, осы зерттеулердің нәтижелері белгілі болғанда инфекцияға қарсы емді тиісті үлгіде өзгерту қажет.

Зеңге қарсы дәрілерді талапқа сай пайдалануға қатысты ресми жетекшілік қағидаларын ескеру қажет.

Конарекстің тәуліктік дозасы зең инфекциясының сипаты мен ауырлығына байланысты.

Флуконазолды қайталап қабылдау қажет болатын инфекциялардан емдеуді белсенді зең инфекциясының клиникалық немесе зертханалық көрсеткіштер белгілерінің жоғалуына дейін жалғастырған жөн. Емдеу кезеңінің жеткіліксіздігі зең инфекциясының қайталануына әкелуі мүмкін.

Криптококкты менингит

Бірінші күні әдетте 400 мг тағайындалады, артынан емдеуді тәулігіне 200-400 мг дозада, ең болмағанда, 6-8 апта жалғастырады, өмірге қатерлі жағдайда тәуліктік дозаны 800 мг дейін арттыруға болады.

Қайталанулар қаупі жоғары пациенттерде криптококкты менингит қайталануларының алдын алуға арналған демеуші ем

Емдеуші дәрігер белгілеген уақыт кезеңі бойына тәулігіне 200 мг тағайындалады.

Кокцидиоидомикоз

Тәулігіне 200-400 мг тағайындалады, емдеу курсы пациенттің жай-күйіне қарай 11-24 ай немесе одан ұзақ уақытқа созылады; инфекциялардың кейбір түрлерін емдеу үшін, әсіресе, менингит кезінде препаратты тәулігіне 800 мг дозада қолдану мақсатқа сай болуы мүмкін.

Инвазиялық кандидоз

Бірінші күні әдетте 800 мг тағайындалады, артынан емдеуді тәулігіне 400  мг дозада жалғастырады; кандидемияны емдеу ұзақтығы қан өсіріндісінің алғашқы теріс нәтижелерінен кейін және кандидемияның белгілері мен симптомдары басылған соң 2 аптаға созылады.

Шырышты қабықтар кандидозы

Ауыз қуысының, жұтқыншақтың шырышты қабықтар кандидозында бірінші күні әдетте 200-400 мг тағайындалады, ал артынан емдеуді тәулігіне 100-200 мг дозада жалғастырады; емдеу ұзақтығы 7-21 күнге созылады (ремиссияға жетуге дейін), иммундық тапшылығы ауыр пациенттер үшін барынша ұзақ ем жүргізуге болады.

Өңеш кандидозында бірінші күні әдетте 200-400 мг тағайындалады, ал артынан емдеуді тәулігіне 100-200 мг дозада жалғастырады, емдеу ұзақтығы 14-30 күнге созылады (ремиссияға жетуге дейін); иммундық тапшылығы ауыр пациенттер үшін барынша ұзақ ем жүргізуге болады.

Кандидурияда тәулігіне 200-400 мг тағайындалады; емдеу ұзақтығы 7- 21 күн күнге созылады; иммундық тапшылығы ауыр пациенттер үшін барынша ұзақ ем жүргізуге болады.

Терінің және шырышты қабықтардың созылмалы кандидозында тәулігіне 50-100 мг тағайындалады; емдеу ұзақтығы 28 күнге дейін созылады, бірақ инфекцияның түрі мен ауырлығына қарай немесе иммундық жүйе функциясының бұзылуында ұзартуға болады.

Ауыз қуысы гигиенасын қадағалау немесе жергілікті емдеу жеткіліксіз болған кездегі ауыз қуысының созылмалы атрофиялық кандидозында (тіс протездерін тағумен байланысты) тәулігіне 50 мг тағайындалады; емдеу курсы 14 күнге созылады.

Қайталануының даму қаупі жоғары АИТВ инфекциясын жұқтырған пациенттерде ауыз қуысы, жұтқыншақ немесе өңеш шырышты қабықтары кандидозының қайталану профилактикасы

Иммунитет тапшылығы ауыр пациенттер үшін емдеуші дәрігер белгілеген уақыт кезеңі ішінде тәулігіне 100-200 мг немесе аптасына 3 рет 200 мг тағайындалады.

Генитальді кандидоз

Қынап кандидозында (жергілікті ем қолдануға болмайтын кездегі жедел немесе қайталамалы) бір реттік 150 мг дозада тағайындалады.

Кандидозды баланитте (жергілікті ем қолдануға болмайтын) бір реттік 150 мг дозада тағайындалады.

Қынап кандидозы қайталануларының (жылына 4 немесе одан да көп көріністер) жиілігін төмендету профилактикасы:

Әрбір үшінші күні 150 мг (1-ші, 4-ші және 7-ші күн), яғни жалпы пациент үш доза алады, артынан аптасына 1 рет 150  мг демеуші емге ауысады; демеуші емге арналған емдеу курсы 6 айға созылады.

Дерматомикоздар

Табан дерматофитиясы (tinea pedis), тегіс тері дерматофитиясы (tinea corporis), шап дерматофитиясы (tinea cruris) және терінің кандидозды инфекцияларында, жүйелі емдеу қажет болғанда аптасына 1 рет 150 мг немесе тәулігіне 1 рет 50 мг тағайындалады; емдеу ұзақтығы 2-4 аптаға созылады, бірақ табан дерматофитиясын (tinea pedis) емдеу үшін 6 аптаға дейін қажет болуы мүмкін.

Кебек тәрізді теміреткіде (tinea versicolor): аптасына бір рет 300-400 мг тағайындалады; емдеу курсы 1-3 аптаға созылады немесе күніне 1 рет 50 мг; емдеу курсы 2-4 аптаға созылады.

Басқа препараттармен емдеуге болмайтын тырнақ дерматофитиясында (онихомикоз) аптасына бір рет 150 мг тағайындалады; емдеу курсы зақымданған тырнақтың сау тырнақпен толық алмасуына дейін; аяқ башпайлары тырнақтарының зақымдануында 6-12 ай бойы; тырнақтардың өсу жылдамдығы әркімде өте өзгеше және пациенттің жасына байланысты; созылмалы тырнақ инфекциясы жазылған соң тырнақ пластиналарының деформациясы сақталуы мүмкін.

Ұзаққа созылған нейтропениясы бар пациенттерде (химиялық емнен өткен гемобластоздары бар пациенттер немесе гемопоэздік дің жасушаларының трансплантациясы жасалған пациенттер) кандидозды инфекциялар профилактикасы

Тәулігіне 200-400 мг тағайындалады; емдеуді күтілген нейтропенияның басталуынан бірнеше күн бұрын бастау және нейтрофилдер саны 1000 жасуша/ мм3 жоғары көтерілгенше нейтропениядан қалыпқа келуден кейін 7 күн бойы жалғастыру керек.

Егде жастағы пациенттер

Дозаны бүйрек функциясын ескере отырып, түзету қажет; бүйрек жеткіліксіздігінің белгілері болмағанда, препарат әдеттегі дозада тағайындалады.

Бүйрек жеткіліксіздігі

Бір рет қабылдағанда дозаны түзету қажет емес. Бүйрек функциясының бұзылуы бар пациенттерде флуконазолды көп рет қолдану қажет болса, тиісті көрсетілімі үшін ұсынылатын тәуліктік дозасына қарай, бастапқы доза 50-400 мг құрайды. Одан кейін Конарекстің тәуліктік дозасының екпінді дозасы (көрсетілімге қарай) келесі кестеге сәйкес белгіленеді:

Жүйелі диализде жүрген пациенттер әр сеанстан соң препаратты 100% ұсынылатын дозада қабылдау қажет; диализ жоқ күндері пациенттер креатинин клиренсінің шамасына байланысты препараттың аз дозасын қабылдау керек.

Бауыр жеткіліксіздігі

Бауыр функциясының бұзылуы бар пациенттерде флуконазол қолдану жөніндегі ақпарат жеткіліксіз, бауыр дисфункциясы бар пациенттерге препаратты сақтықпен қолдану керек.

Артық дозалану жағдайында қажет болатын шаралар

Симптомдары: елестеулермен және параноидты мінез-құлықпен қатар жүрген препараттың жағымсыз реакцияларының күшеюі.

Емі - симптоматикалық (оның ішінде демеуші шаралар және асқазанды шаю).

Флуконазол негізінен несеппен шығарылады, сондықтан жеделдетілген диурез препараттың шығуын жылдамдатуы мүмкін.

3 сағатқа созылатын гемодиализ сеансы плазмадағы флуконазол деңгейін шамамен 50% төмендетеді.

Дәрілік препараттың қолдану тәсілін түсіндіру үшін медициналық қызметкер кеңесіне жүгіну жөніндегі ұсынымдар

Препаратты қолдануды дәрігердің қадағалауымен жүзеге асырған жөн.

ДП стандартты қолдану кезінде көрініс беретін жағымсыз реакциялар сипаттамасы және осы жағдайда қабылдау керек шаралар (қажет болса)

Жиі ( ≥1/100-ден <1/10 дейін)

- бас ауыру

- жүрек айну, құсу, іштің ауыруы, диарея

- қандағы аланинаминотрансфераза (АЛТ), аспартатаминотрансфераза (АСТ), сілтілік фосфатаза деңгейінің жоғарылауы

- бөртпе

Жиі емес (≥1/1,000-нан ≤1/100 дейін)

- анемия

- тәбет төмендеуі

- ұйқысыздық, ұйқышылдық

- құрысулар, бас айналу, парестезия, дәм сезудің бұзылуы

- вертиго

- іш қату, диспепсия, метеоризм, ауыздың кеберсуі

- холестаз, сарғаю, билирубин деңгейінің жоғарылауы

- қышыну, дәрілік бөртпе (тұрақты дәрі-дәрмектік бөртпені қоса), есекжем, қатты терлеу

- миалгия

- қатты қажу, дімкәстану, астения, қызба

Сирек ( ≥1/10,000-нан ≤1/1,000 дейін)

- агранулоцитоз, лейкопения, нейтропения, тромбоцитопения

- анафилаксия

- гипертриглицеридемия, гиперхолестеринемия, гипокалиемия

- тремор

- көп пішінді қарыншалық пароксизмалық тахикардия, QT аралығының артуы

- бауыр жеткіліксіздігі, гепатоцеллюлярлы некроз, гепатит, гепатоцеллюлярлы зақымданулар

- уытты эпидермалық некролиз, Стивенс-Джонсон синдромы, жедел жайылған экзантематозды пустулез, эксфолиативті дерматит, ангионевроздық ісіну, беттің ісінуі, алопеция (шаштың түсуі).

Жағымсыз дәрілік реакциялар туындағанда медициналық қызметкерге, фармацевтикалық қызметкерге немесе, дәрілік препараттар тиімсіздігі туралы хабарламаларды қоса, дәрілік препараттарға жағымсыз реакциялар (әсерлер) бойынша ақпараттық деректер базасына тікелей хабарлау керек

«Қазақстан Республикасы Денсаулық сақтау министрлігі Тауарлар мен көрсетілетін қызметтердің сапасы мен қауіпсіздігін бақылау комитеті Дәрілік заттар мен медициналық бұйымдарды сараптау ұлттық орталығы» ШЖҚ РМК

http://www.ndda.kz

Қосымша мәліметтер

Дәрілік препарат құрамы

Бір капсуланың құрамында:

белсенді зат - 150 мг флуконазол,

қосымша заттар: лактоза моногидраты, микрокристалды целлюлоза, желатинделген жүгері крахмалы, коллоидты кремнийдің қостотығы, магний стеараты, натрий лаурилсульфаты,

капсула қабығының құрамы: титанның қостотығы Е 171, хинолинді сары Е 104, күн батар түстес сары Е 110, желатин.

Өзіне тән әлсіз иісі бар құрамында ақтан ақ дерлік түске дейінгі ұнтақ бар өлшемі 0 қанық-сары капсулалар.

Шығарылу түрі және қаптамасы

ПВХ үлбірінен және алюминий фольгадан жасалған пішінді ұяшықты қаптамаға 1 капсуладан салады.

Пішінді 2 қаптамадан медициналық қолдану жөніндегі қазақ және орыс тілдеріндегі нұсқаулықпен бірге картон қорапшаға салынады.

Жарамдылық мерзімі

4 жыл

Жарамдылық мерзімі өткеннен кейін қолдануға болмайды.

250С-ден аспайтын температурада сақтау керек.

Балалардың қолы жетпейтін жерде сақтау керек.

Рецепт арқылы

Өндіруші

PHARMATHEN S.A.

Dervenakion 6, Pallini 15351, Attikis, Греция

Тіркеу куәлігінің ұстаушысы

WELFAR HEALTHCARE LIMITED

TMS House, Cray Avenue, Орпингтон BR5 3QB, Ұлыбритания

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы

«WELFAR-KAZAKHSTAN» ЖШС (ВЭЛФАР-ҚАЗАҚСТАН)

Қазақстан Республикасы, Алматы қ., 2 Қастек к-сі,14 үй.

Телефон/Факс: +7 727 352 71 36

E-mail: info@welfar.kz