Ко - Эксфорж® (5 мг/160 мг/ 12,5 мг)

МНН: Амлодипин, Валсартан, Гидрохлоротиазид
Производитель: Новартис Фармасьютика С.А.
Анатомо-терапевтическо-химическая классификация: Валсартан, амлодипин и гидрохлоротиазид
Номер регистрации в РК: № РК-ЛС-5№021323
Информация о регистрации в РК: 23.04.2015 - 23.04.2020

Инструкция

Саудалық атауы

Ко-Эксфорж®

Халықаралық патенттелмеген атауы

Жоқ

Дәрілік түрі

Үлбірлі қабықпен қапталған 5 мг/160 мг/12.5 мг және 10 мг/160 мг/12.5 мг таблеткалар

Құрамы

Бір таблетканың құрамында

белсенді заттар: 6.94 мг немесе 13.87 мг амлодипин бесилаты (5.00 мг немесе 10.00 мг амлодипинге баламалы), 160.00 мг валсартан, 12.50 мг гидрохлоротиазид

қосымша заттар: микрокристалды целлюлоза; кросповидон; коллоидты сусыз кремнийдің қостотығы; магний стеараты

қабықтың құрамы: негізгі жабық ақ қоспа*(5 мг/160 мг/12.5 мг және 10мг/160мг/12.5мг дозалар үшін), негізгі жабын сары қоспа**(10мг/160мг/12.5мг доза үшін), негізгі жабын қызыл қоспа ***(10мг/160мг/12.5мг доза үшін),

*гипромеллоза (гидроксипропилметилцеллюлоза), титанның қостотығы (Е 171), полиэтиленгликоль 4000 (макрогол 4000), тальк

**гипромеллоза (гидроксипропилметилцеллюлоза), темірдің сары тотығы (Е172), полиэтиленгликоль 4000 (макрогол 4000), тальк

*** гипромеллоза (гидроксипропилметилцеллюлоза), темірдің қызыл тотығы (Е172), полиэтиленгликоль 4000 (макрогол 4000),тальк

Сипаттамасы

Сопақша пішінді, екі жақ беті дөңес, ақ түсті үлбірлі қабықпен қапталған, бір жақ бетінде ойығы, «NVR» өрнегі және басқа жақ бетінде «VCL» өрнегі бар таблеткалар (5мг/160мг/12.5мг доза үшін).

Сопақша пішінді, екі жақ беті дөңес, бозғылт-сары түсті үлбірлі қабықпен қапталған, бір жақ бетінде ойығы, «NVR» өрнегі және басқа жақ бетінде «VDL» өрнегі бар таблеткалар (10мг/160мг/12.5мг доза үшін)

Фармакотерапиялық тобы

Ренин-ангиотензин жүйесіне әсер ететін препараттар. Ангиотензин ІІ aнтагонистері басқа препараттармен біріктірілімде. Ангиотензин ІІ aнтагонистері басқа да біріктірілімдер. Валсартан, амлодипин және гидрохлоротиазид.

АТХ коды C09D X01

Фармакологиялық қасиеттері

Фармакокинетикасы

Амлодипиннің, валсартанның және гидрохлоротиазидтің фармакокинетикасы дозаға байланысты сипатқа ие.

Амлодипин

Сіңірілуі: амлодипинді жеке емдік дозаларда ішке қабылдағаннан кейін плазмада ең жоғары концентрацияға 6-12 сағаттан соң жетеді. Абсолюттік биожетімділігінің мәндері есеп бойынша 64% бен 80% шегінде болады. Тамақтану амлодипиннің биожетімділігіне ықпалын тигізбейді.

Таралуы: таралу көлемі шамамен 21 л/кг құрайды. In vitro зерттеулер айналымдағы амлодипиннің шамамен 97,5%-ы плазма ақуыздарымен байланысатынын көрсетті.

Биотрансформациясы: амлодипин бауырда қарқынды түрде (шамамен 90%-ы) метаболизденіп, инертті метаболиттер түзеді.

Шығарылуы: амлодипиннің плазмадан шығарылуы жартылай шығарылу кезеңі шамамен 30-дан 50 сағатқа дейінді құрайтын екі фазалы сипатта болады. Тепе-тең плазмалық концентрацияларға ұзақ қолданудан кейін 7-8 күн ішінде жетеді. Өзгермеген амлодипиннің он пайызы және амлодипин метаболиттерінің 60%-ы несеппен бірге шығарылады.

Валсартан

Сіңірілуі: валсартанды жекелей ішке қабылдағаннан кейін плазмада ең жоғары концентрацияға 2-4 сағаттан соң жетеді. Абсолюттік биожетімділігінің орташа шамасы 23% құрайды. Тамақтану валсартанның экспозициясын (AUC өлшемі бойынша) шамамен 40%-ға және ең жоғары шектегі плазмалық концентрациясын (Cmax) шамамен 50%-ға төмендетеді, алайда дозаны қабылдаған соң 8 сағат өткеннен кейін плазмалық концентрациясы препаратты тамақпен бірге және ашқарынға қабылдаған топтағы көрсеткіштерге ұқсас болды. Бірақ AUC көрсеткішінің осы төмендеуі валсартанның да емдік әсерінің клиникалық тұрғыдан маңызды төмендеуімен қатар жүрмейді, демек, тамақпен де, сонымен қатар онсыз да қабылдауға болады.

Таралуы: көктамыр ішіне қолданғаннан кейін валсартанның тепе-тең жағдайдағы таралу көлемі 17 литрге жуықты құрайды, бұл валсартанның тіндерде таралуының жоғары еместігін көрсетеді. Валсартан қан сарысуының ақуыздарымен, негізінен сарысулық альбуминмен елеулі дәрежеде (94-97%) байланысады.

Биотрансформациясы/метаболизмі: валсартан елеулі биотрансформацияға ұшырамайды, өйткені дозаның тек 20%-ға жуығы метаболиттер түрінде шығарылады. Гидроксиметаболит қан плазмасында төмен концентрацияларда (валсартанның AUC мәні 10%-дан төмен) анықталды. Осы метаболит фармакологиялық тұрғыдан инертті.

Шығарылуы: валсартан ыдыраудың мультиэкспоненциальді кинетикасын көрсетеді (Т½α <1сағ. және T½ß ретімен 9 сағ). Валсартан көбіне нәжіспен бірге (дозаның 83%-ға жуығы) және несеппен бірге (дозаның 13%-ға жуығы), негізінен, өзгермеген күйінде шығарылады. Көктамыр ішіне енгізгеннен кейін вальсартанның плазмалық клиренсі сағатына 2 л-ге жуықты құрайды, ал бүйректік клиренсі сағатына 0,62 л құрайды (жалпы клиренсінің 30%-ы). Валсартанның жартылай шығарылу кезеңі 6 сағатты құрайды.

Гидрохлоротиазид

Сіңірілуі: Пероральді түрде қабылдағаннан кейін гидрохлоротиазидтің сіңуі тез жүреді (Tmax - 2 сағатқа жуық). Дозалардың емдік ауқымында AUC орташа шамасы дозаға байланысты және дозаға пропорциональді түрде өседі. Тамақпен бірге қабылдаған кезде гидрохлоротиазидтің жүйелік жетімділігінің ашқарынға қабылдаумен салыстырғанда артуы да, сонымен қатар төмендеуі де байқалды. Осы әсердің шамасы мардымсыз және клиникалық аздаған маңызға ие. Гидрохлоротиазидтің абсолюттік биожетімділігі препаратты пероральді түрде қабылдаудан кейін 70% құрайды.

Таралуы: Таралу және шығарылу кинетикасы жалпы биэкспоненциальді түрде кемитін функция ретінде сипатталады. Болжамды таралу көлемі 4-8 л/кг құрайды. Айналымдағы гидрохлоротиазид сарысу ақуыздарымен (40-70%), көбіне сарысу альбуминімен байланысады. Гидрохлоротиазид сондай-ақ эритроциттерде жиналып, плазмадағы деңгейі шамамен 3 есе жоғарылайды.

Биотрансформациясы/метаболизмі: Гидрохлоротиазид көбіне өзгермеген заттар түрінде шығарылады.

Шығарылуы: Гидрохлоротиазидтің плазмадан жартылай шығарылу кезеңі соңғы фазада орта есеппен 6-15 сағатты құрайды. Қайталап тағайындаған кезде гидрохлоротиазидтің фармакокинетикасы өзгермейді, ал тәулігіне бір рет тағайындағанда жиналуы мардымсыз. Дозаның 95%-дан көбі өзгермеген күйінде несеппен бірге шығарылады.

Амлодипин/валсартан/гидрохлоротиазид

Ко-Эксфорж® препаратын ішке қабылдағаннан кейін дені сау ерікті ересектерде плазмада амлодипин, валсартан және гидрохлоротиазид ең жоғары шектегі концентрациясына, сәйкесінше, 6-8 сағаттан, 3 сағаттан және 2 сағаттан соң жетеді. Амлодипиннің, валсартанның және гидрохлоротиазидтің Ко-Эксфорж® препаратынан сіңу жылдамдығы және дәрежесі оларды жеке қолданған кезде байқалатын мәндеріне баламалы.

Фармакодинамикасы

Ко-Эксфорж® препараты эссенциальді гипертензиясы бар емделушілерде артериялық қысымды бақылау механизмімен бір-бірін толықтырып тұратын гипертензияға қарсы үш зат біріктірілген препарат болып табылады: амлодипин кальций антагонистерінің класына, валсартан ангиотензин II антагонистері препараттарының класына, ал гидрохлоротиазид тиазидтік диуретиктер класына жатады. Осы компоненттер біріктірілімі артериялық қысымды әрбір жеке компонентке қарағанда үлкен дәрежеде азайта отырып, гипертензияға қарсы аддитивтік әсерге ие болады.

Амлодипин

Ко-Эксфорж® препаратының құрамындағы амлодипин компоненті кальций иондарының жүрек және қантамырлық тегіс бұлшықетіне жарғақша арқылы түсуін тежейді. Амлодипиннің гипертензияға қарсы әсер ету механизмі қантамырлардың тегіс бұлшықетін тікелей босаңсытатын әсерімен жүзеге асады, бұл шеткергі қантамырлық кедергінің және артериялық қысымның төмендеуіне әкеледі. Экспериментальді зерттеу нәтижелері амлодипиннің дигидропиридиндік және дигидропиридиндік емес байланысу орталықтарымен байланысатынын көрсетеді. Жүрек бұлшықетінің және қантамырлардың тегіс бұлшықеттерінің жиырылу үдерістері жасушадан тыс кальций иондарының осы жасушаларға спецификалық ион өзектері арқылы ығысуына байланысты.

Артериялық гипертензиясы бар емделушілерде емдік дозаларда енгізгеннен кейін амлодипин қантамырларды кеңейтіп, шалқадан жатқан кезде және түрегеліп тұрған кезде артериялық қысымның төмендеуіне әкеледі. Артериялық қысымның осы төмендеуі жүректің жиырылу жиілігінің немесе созылмалы дозада плазмалық катехоламиндер деңгейінің өзгеруімен қатар жүреді.

Препараттың қан плазмасындағы концентрациясы жастарда да, сонымен қатар егде жастағы емделушілерде де емдік жауаппен өзара байланысты болады.

Артериялық гипертензиясы бар және бүйрек функциясы қалыпты емделушілерде амлодипиннің емдік дозалары бүйректің қантамырлық кедергісінің төмендеуіне, сондай-ақ шумақтық сүзілу жылдамдығының және сүзілу фракциясын немесе протеинуриялар тарапынан өзгеріссіз тиімді бүйректік плазма ағынының артуына әкеледі.

Амлодипин қабылдаған, қарынша функциясы қалыпты емделушілерде кальций өзектерінің басқа да блокаторлары сияқты, жүрек функциясы гемодинамикасының параметрлерін тыныш кезде және дене жүктемесі кезінде (немесе жүрген кезде) өлшеу жалпы алғанда dP/dt көрсеткішіне немесе ақырғы диастолалық қысымға немесе сол жақ қарыншадағы көлеміне елеулі ықпалынсыз, жүрек индексінің аздап жоғарылағанын көрсетті. Гемодинамикалық зерттеулерде амлодипин интактілі жануарларда және адамдарда емдік дозалар шегінде қолданғанда, тіпті адамдарда бета-блокаторлармен бірге біріктіріп қолданғанда, теріс инотроптық әсермен астасқан жоқ.

Амлодипин интактілі жануарларда және адамдарда синустық түйін функциясын немесе жүрекшелік-қарыншалық өткізгіштікті өзгертпейді. Артериялық гипертензиясы немесе стенокардиясы бар емделушілерде амлодипин бета-блокаторлармен біріктіріп қолданылған клиникалық зерттеулерде ЭКГ параметрлері бойынша жағымсыз құбылыстар байқалған жоқ.

Амлодипин созылмалы тұрақты стенокардиясы, вазоспастикалық стенокардиясы және ангиографиялық тұрғыдан айғақталған коронарлық артериялар ауруы бар емделушілерде жағымды клиникалық әсер көрсетті.

Валсартан

Валсартан ангиотензин ІІ рецепторларының пероральді белсенді, күшті әсер ететін және спецификалық антагонисі болып табылады. Ол ангиотензин ІІ белгілі әсеріне жауап беретін АТ1 қосалқы типінің рецепторларына да таңдап әсер етеді. АТ1 рецепторларының валсартанмен бөгелісінен кейін қан плазмасында ангиотензин II жоғары деңгейі бөгелісі жоқ АТ2 рецепторын стимуляциялауы мүмкін, ол, сірә, АТ1 рецептор әсерін теңгереді. Валсартан AT1 қосалқы рецепторларына қатысты айқын ішінара агонистік белсенділік танытпайды және AT2 қосалқы типінің рецепторына қарағанда АТ1 қосалқы типінің рецепторларына өте жоғары (шамамен 20 000 есе) ұқсастығы бар.

Валсартан сондай-ақ ангиотензин I-ні ангиотензин II-ге айналдыратын және брадикининді деградирлейтін киназа ІІ ретінде АӨФ-ті тежемейді. АӨФ-ке әсері және брадикининнің немесе Р затының потенциялануы жоқ болғандықтан, ангиотензин II антагонистерінің жөтелмен байланысу ықтималдығы аз. Валсартанды АӨФ тежегішімен салыстырып жүргізілген клиникалық сынақтарда валсартан қабылдаған емделушілерде құрғақ жөтелдің пайда болу жиілігі АӨФ тежегішін қабылдаған емделушілерге қарағанда едәуір аз (P<0,05) болды (сәйкесінше 7,9%-мен салыстырғанда 2,6%). Сыртартқысында құрғақ жөтелі бар емделушілерге жүргізілген клиникалық зерттеулерде АӨФ тежегіші жәрдемімен емделіп сыналғандардың 68,5%-мен салыстырғанда, АӨФ тежегішімен емдеу кезінде валсартан қабылдап сыналғандардың 19,5%-да және тиазидтік диуретик қабылдап сыналғандардың 19,0%-да жөтел байқалды (P<0,05). Валсартан жүрек-қантамырлық реттеуде өзінің маңыздылығымен белгілі гормонның басқа рецепторларымен немесе ион өзектерімен байланыспайды және оларды бөгемейді.

Валсартанды артериялық гипертензиясы бар емделушілерде қолдану тамырдың соғу ырғағына ықпалын тигізбей-ақ, артериялық қысымды төмендетеді.

Көптеген емделушілерде ішке бір реттік дозаны қабылдағаннан кейін гипотензивтік әсердің басталуы 2 сағат ішінде байқалады, ал артериялық қысым ең жоғары шекте төмендеуіне 4-6 сағат ішінде жетеді. Дозаны қабылдағаннан кейін гипертензияға қарсы әсері 24 сағат бойы сақтылады. Қайталап дозалау режимін сақтағанда кез келген дозаны қолданудан артериялық қысым ең жоғары төмендеуіне, әдеттегідей, 2-4 апта ішінде жетеді және ұзақ емдеген кезде сақталады. Валсартан қабылдауды тез тоқтату "рикошеттік" гипертензиямен немесе басқа да жағымсыз клиникалық құбылыстармен астасқан жоқ.

Валсартан жүрек функциясының жедел жеткіліксіздігі бар (Нью-Йорк кардиологиялық ассоциациясының жіктелімі бойынша II-IV класс) емделушілерде ауруханаға жату санын едәуір төмендететінін көрсетті. АӨФ тежегіштерін немесе бета-блокаторларды қабылдамаған емделушілерде өте үлкен пайдасы байқалды. Валсартан сондай-ақ миокард инфарктісін бастан өткергеннен кейін сол жақ қарынша функциясының жеткіліксіздігі немесе сол жақ қарынша дисфункциясы бар клиникалық тұрғыдан тұрақты емделушілерде жүрек-қантамыр ауруларынан болатын өлім көрсеткіштерінің төмендегенін көрсетті.

Гидрохлоротиазид

Тиазидтік диуретиктер әсерінің негізгі қосымша нүктесі дистальді иілген бүйрек өзекшесі болып табылады. Бүйректің қыртысты затында, тиазидтік диуретикпен байланысуы және натрий (Na+) және хлор (Cl-) иондары реабсорбциясының басылуы үшін дистальді иілген өзекшелерде негізгі орталығы бар сезімталдығы жоғары рецептор орналасқаны белгілі. Тиазидтердің әсер ету механизмі, сірә, осы жүйеде Cl- иондарының байланысқан жері үшін бәсекелесу арқылы Na+ және Cl- тасымалдаудың тежелуіне бағытталған. Нәтижесінде:

- тікелей, натрий мен хлордың шамамен бірдей дәрежеде шығарылуы артады

- жанама, диуретиктің әсер етуі салдарынан, әрі қарай плазмалық ренин белсенділігінің жоғарылауымен, альдостерон секрециясының жоғарылауымен, калийдің несеппен бірге шығарылуының жоғарылауымен және сарысулық калийдің төмендеуімен плазма көлемі азаяды.

Қолданылуы

  • эссенциальді (алғашқы) артериялық гипертензияны емдеуде

Осы біріктірілген препарат артериялық гипертензияның бастапқы емі үшін қолданылмайды.

Қолдану тәсілі және дозалары

Ко-Эксфорж® препаратының ұсынылған дозасы тәулігіне бір таблетканы құрайды.

Артериялық қысымы екі компонентті еммен талапқа сай бақылауға келмейтін емделушілер бірден Ко-Эксфорж® препаратымен біріктірілген емге ауыстырылуы мүмкін.

Валсартанның, амлодипиннің және гидрохлоротиазидтің жеке таблеткаларын қабылдап жүрген емделушілерге қолайлы болуы үшін құрамында осы компоненттер бірдей дозада болатындықтан, Ко-Эксфорж® препаратына ауыстырылуы мүмкін. Ко-Эксфорж® препараты компоненттерінің екі компонентінің кез келген біріктірілімінде дозолимитирлеуші жағымсыз әсерлер байқалатын емделушілер артериялық қысымның осыған ұқсас төмендеуіне қол жеткізу үшін құрамында мұндай компоненттің дозасы аз болатын Ко-Эксфорж® препаратына ауыстырылуы мүмкін.

Доза екі аптадан кейін арттырылуы мүмкін. Ко-Эксфорж® препаратының гипертензияға қарсы ең жоғары әсеріне дозаны өзгерткеннен кейін екі апта ішінде жетеді. Препараттың ең жоғары ұсынылатын дозасы 10мг/320мг/25 мг құрайды.

Ко-Эксфорж® препаратын тамақпен бірге немесе тамақтануға қарамай-ақ, судың аз ғана мөлшерімен ішіп қабылдайды.

Емделушілердің ерекше топтары

Егде жастағы емделушілер (65 жастан асқан)

65 жастан асқан егде жастағы емделушілер үшін бастапқы дозаны түзету қажет емес. Емдеуді амлодипиннің өте төмен жеткілікті дозасынан бастаған жөн. Ко-Эксфорж® препаратындағы амлодипиннің ең аз дозасы 5 мг құрайды.

18 жасқа дейінгі балалар мен жасөспірімдер

Ко-Эксфорж® препараты, қауіпсіздігі және тиімділігі бойынша деректер жоқ болғандықтан, 18 жасқа толмаған емделушілерге ұсынылмды.

Бүйрек функциясының бұзылуы

Құрамында гидрохлоротиазид бар болғандықтан, Ко-Эксфорж® препаратын ануриясы бар емделушілерге қолдануға болмайды және бүйрек функциясының ауыр жеткіліксіздігі бар (шумақтық сүзілу жылдамдығы <30 мл/мин) емделушілерде сақтықпен қолданылуы тиіс. Тиазидтік диуретиктер бүйрек функциясының ауыр жеткіліксіздігінде (шумақтық сүзілу жылдамдығы <30 мл/мин) монотерапия ретінде тиімсіз, бірақ тіпті шумақтық сүзілу жылдамдығы <30 мл/мин емделушілерде ілмектік диуретикпен сақтықпен қолданғанда пайдалы әсер беруі мүмкін. Бүйрек функциясының бұзылуы әлсіз немесе орташа айқын болатын науқастарда Ко-Эксфорж® препаратының дозасын түзету қажет емес.

Бауыр функциясының бұзылуы

Құрамында валсартан, гидрохлоротиазид және амлодипин бар болғандықтан, бауыр функциясының жеткіліксіздігі немесе өт шығару жолдарының обструкциялық бұзылулары бар науқастар Ко-Эксфорж® препаратын қабылдаған кезде аса сақ болғаны жөн. Емдеуді амлодипиннің ең төмен жеткілікті дозасынан бастаған жөн. Ко-Эксфорж® препаратындағы амлодипиннің ең аз дозасы 5 мг құрайды.

Жағымсыз әсерлері

Төменде берілген жағымсыз реакциялар пайда болу жиілігі бойынша жіктелген, сонымен қатар өте көп таралғандары алдымен көрсетілген.

Амлодипин

Жиі (> 1/100, < 1/10)

  • бас ауыру, ұйқышылдық, бас айналу

  • жүрек қағуының жиілеуі

  • ысынулар

  • гиперемия

  • іштің ауыруы, жүректің айнуы

  • ісіну, қажу

Жиі емес (> 1/1000, <1/100)

  • ұйқысыздық, үрейленуді қоса, көңіл-күйдің өзгеруі

  • тремор, гипестезия, дисгевзия, парестезия, естен тану

  • көрудің бұзылуы, диплопия

  • тиннит

  • артериялық гипотензия

  • ентігу, ринит

  • құсу, диспепсия, ауыз ішінің құрғауы, іш қату, диарея

  • алопеция, гипергидроз, қышыну, бөртпе, пурпура, тері түсінің бұзылуы, фотосезімталдық

  • арқаның ауыруы, бұлшықеттің түйілулері, миалгия, артралгия

  • несептің бөлініп шығуының бұзылыстары, никтурия, поллакиурия

  • гинекомастия, эректильді дисфункция

  • астения, ауыру, дімкәстік, кеуденің ауыруы

  • дене салмағының төмендеуі немесе жоғарылауы

Өте сирек (˂1/10 000)

  • тромбоцитопения, лейкопения

  • аллергиялық реакциялар

  • гипергликемия

  • шеткергі нейропатия, бұлшықет гипертониясы

  • аритмия, брадикардия, жүрекшелер фибрилляциясы, қарыншалық пароксизмальді тахикардия, миокард инфарктісі

  • васкулит

  • жөтел

  • панкреатит, гастрит, қызылиектердің гиперплазиясы

  • гепатит, сарғаю

  • ангионевротикалық ісіну, есекжем, мультиморфтық эритема, Стивенс-Джонсон синдромы

  • бауыр ферменттері деңгейінің артуы (көбіне холестазбен байланысты)

Валсартан

Клиникалық зерттеулерден, постмаркетингтік тәжірибеден және зертханалық деректерден алынған жағымсыз әсерлер әрі қарай пайда болу жиілігіне сай берілген.

Постмаркетингтік тәжірибеден және зертханалық деректерден алынған барлық жағымсыз әсерлерге белгілі бір жиілікті қолдану мүмкіндігі жоқ болғандықтан, бұл жағымсыз әсерлер «белгісіз» жиілік ретінде жіктеледі.

Жиі емес (> 1/1000, <1/100)

  • бас айналу (вертиго)

  • жөтел

  • іштің ауыруы

  • қажу

Белгісіз

  • гемоглобиннің төмендеуі, гематокриттің төмендеуі, нейтропения, тромбоцитопения

  • аса жоғары сезімталдық реакциясы, сарысулық ауруды қоса

  • қанда калий деңгейінің жоғарылауы

  • васкулит

  • бауыр функциясы көрсеткіштерінің бұзылулары, қанда билирубин деңгейінің жоғарылауын қоса

  • ангионевротикалық ісіну, буллезді дерматит, бөртпе, қышыну

  • миалгия

  • бүйрек функциясының жеткіліксіздігі және бауыр функциясының бұзылуы, қанда креатинин деңгейінің жоғарылауы

Төменде берілген жағдайлар да гипертониядан зардап шегіп жүрген емделушілерде, осы жағдайлардың зерттелетін дәрілік затпен өзара байланысына қарамай-ақ, клиникалық сынақ кезінде байқалды: ұйқысыздық, жыныстық құштарлықтың төмендеуі, фарингит, ринит, синусит, жоғарғы тыныс жолдарының жұқпалары, вирустық жұқпалар.

Гидрохлоротиазид

Өте жиі (≥ 1/10)

  • гипокалиемия, қанда липидтер деңгейінің жоғарылауы (негізінен жоғары дозаларды қабылдағанда)

Жиі (> 1/100, < 1/10)

  • гипонатриемия, гипомагниемия, гиперурикемия, тәбеттің төмендеуі

  • ортостатикалық гипотензия, оған алкоголь, ауыруды басатын немесе седативтік дәрілер қабылдау түрткі болуы мүмкін

  • жүректің жеңіл айнуы, құсу

  • есекжем және бөртпенің басқа да түрлері

  • эректильді дисфункция

Сирек (>1/10000, <1/1000)

  • тромбоцитопения, кейде пурпурамен

  • гиперкальциемия, гипергликемия, глюкозурия және диабеттік метаболизмдік статустың нашарлауы

  • ұйқының бұзылулары

  • бас ауыру, бас айналу, депрессия және парестезия

  • көрудің бұзылуы, әсіресе емнің алғашқы аптасы ішінде

  • аритмия

  • асқазан-ішек жайсыздығы, іш қату, диарея

  • холестаз немесе сарғаю

  • фотосенсибилизация

Өте сирек (≥ 1/10)

  • лейкопения, агранулоцитоз, сүйек кемігі функциясының бәсеңдеуі және гемолитикалық анемия

  • некроздық васкулит, аса жоғары сезімталдық реакциялары – респираторлық дистресс синдромы, пневмонитті және өкпе ісінуін қоса

  • гипохлоремиялық алкалоз

  • панкреатит

  • уытты эпидермальді некролиз, терілік қызыл жегі типті реакциялар, терілік қызыл жегі реактивациясы

Белгісіз

  • апластикалық анемия

  • жабық бұрышты глаукома

  • мультиморфтық эритема

  • бұлшықет түйілулері

  • бүйрек функциясының жедел жеткіліксіздігі, бүйрек функциясының бұзылулары

  • қызба, астения

Қолдануға болмайтын жағдайлар

  • амлодипинге, валсартанға, гидрохлоротиазидке, басқа да сульфонамид туындыларына немесе қосымша заттардың кез келгеніне жоғары сезімталдық

  • жүктілік және бала емізу

  • билиарлы цирроз және холестаз

  • анурия

  • тұқым қуалайтын ангионевротикалық ісіну немесе бұдан бұрын АӨФ тежегіштерімен, ангиотензин II рецепторларының антагонистерімен емдеу аясында ісіну

  • 2 типті қант диабеті бар емделушілерде ангиотензин рецепторларының антагонистерін, соның ішінде валсартанды, немесе ангиотензин-өзгертуші фермент (АӨФ) тежегіштерін алискиренмен бір мезгілде қолдану

Дәрілермен өзара әрекеттесуі

Амлодипин

Ко-Эксфорж® препаратының құрамында амлодипин болғандықтан, келесі потенциальді өзара әрекеттесулер орын алуы мүмкін:

Симвастатин: 10 мг амлодипиннің көп реттік дозасын 80 мг симвастатинмен біріктіріп қолдану, тек симвастатинді ғана қолданумен салыстырғанда, симвастатиннің экспозициясының 77%-ға артуына әкелді. Амлодипин қабылдап жүрген емделушілерде симвастатинді тәулігіне 20 мг дозаға дейін шектеу ұсынылады.

CYP3A4 тежегіштері: дилтиаземнің 180 мг тәуліктік дозасын 5 мг амлодипинмен біріктіріп емдеу гипертониялық ауруы бар егде жастағы емделушілерде амлодипиннің жүйелік экспозициясының 1,6-есе артуына әкелді. Дегенмен, CYP3A4 күшті тежегіштері (мысалы, кетоконазол, итраконазол, ритонавир) амлодипиннің концентрациясын дилтиаземге қарағанда үлкен дәрежеде арттыруы мүмкін. Сондықтан амлодипинді CYP3A4 тежегіштерімен біріктіріп қолданғанда сақтық танытқан жөн.

Грейпфрут шырыны

Амлодипиннің экспозициясы, CYP3A4 тежелетін болғандықтан, грейфрут шырынымен бр мезгілде қолданғанда ұлғаюы мүмкін. Дегенмен, дені сау жиырма еріктіге 240 мл грейпфрут шырынын 10 мг амлодипиннің бір реттік дозасымен бірге қолдану амлодипиннің фармакокинетикасына елеулі әсерін көрсеткен жоқ.

CYP3A4 индукторлары: CYP3A4 индукторларының амлодипинге қатысты сандық әсерлері жөнінде ақпарат жоқ. Амлодипинді CYP3A4 индукторларымен біріктіріп қолданғанда талапқа сай клиникалық әсері тұрғысында емделушілерді бақылаған жөн.

Монотерапия кезінде амлодипин келесі препараттармен бірге қауіпсіз қолдануға болатындығын көрсетті: тиазидтік диуретиктер, бета-блокаторлар, АӨФ тежегіштері, ұзақ әсерлі нитраттар, сублингвальді нитроглицерин, дигоксин, варфарин, аторвастатин, силденафил, маалокс (алюминий гидроксиді, магний гидроксиді, симетикон), циметидин, қабынуға қарсы стероидық емес препараттар, антибиотиктер, пероральді гипогликемиялық дәрілер.

Валсартан

Ко-Эксфорж® препаратының құрамында валсартан бар болғандықтан, келесі потенциальді дәрілік өзара әрекеттесу байқалуы мүмкін:

Ренин-ангиотензин жүйесін (РАЖ) ангиотензин рецепторларының тежегіштерімен, АӨФ тежегіштерімен немесе алискиренмен қосарлы бөгеу: Валсартанды қоса, ангиотензин рецепторларының тежегіштерін РАЖ-ге әсер ететін басқа препараттармен біріктіріп қолдану, монотерапиямен салыстырғанда, гипотензия, гиперкалиемия жиілігінің артуымен және бүйрек функциясының өзгеруімен байланысты. Ко-Эксфорж® препаратын және РАЖ-ге ықпалын тигізетін басқа да тежегіштерді қабылдап жүрген емделушілерде артериялық қысымды, бүйрек функциясын және электролиттерді мониторингілеу ұсынылады.

Бүйрек функциясының ауыр жеткіліксіздігі бар (шумақтық сүзілу жылдамдығы <30 мл/мин) емделушілерде валсартанды, немесе алискиренмен бірге АӨФ тежегіштерін қоса, ангиотензин рецепторлары тежегіштерін біріктіріп қолдануға жол бермеу қажет.

Валсартанды, немесе алискиренмен АӨФ тежегіштерін қоса, ангиотензин рецепторларының антагонистері қолданылатын біріктірілген емді 2 типті қант диабеті бар емделушілерге қолдануға болмайды.

Калий: Калий қоспаларын, калий жинақтаушы диуретиктерді немесе құрамында калий бар тұз алмастырғыштарды немесе калий деңгейін арттыруға қабілетті басқа препараттарды (мысалы, гепарин) біріктіріп қолдану сақтық танытуды және калий деңгейін жиі бақылауды қажет етеді.

Қабынуға қарсы стероидты емес препараттар (ҚҚСП), ЦОГ-2 селективтік тежегіштерін қоса: ангиотензин II антагонистерін ҚҚСП-пен бір мезгілде қолданғанда гипертензияға қарсы әсерінің әлсіреуі пайда болуы мүмкін.

Бұдан басқа, сұйықтық көлемі азайған емделушілерде (диуретиктерді қабылдап жүрген емделушілерді қоса) ангиотензин II антагонистерін және ҚҚСП біріктіріп қолдану бүйрек функциясы нашарлауының жоғары қаупіне әкеп соғуы мүмкін. Сондықтан емдеудің басында немесе модификациялауда валсартанмен және ҚҚСП-пен біріктіріп емдеген емделушілерде бүйрек функциясын бақылау ұсынылады.

Транспортерлер: адам бауырының тіндерін in vitro зерттеу нәтижелері OATP1B1 бауырлық қармау тасымалдаушысы субстраты және MRP2 бауырлық эффлюкстік тасымалдаушысы субстраты болып табылатындығын айғақтайды. Қармау тасымалдағышының тежегіштері (рифампицин, циклоспорин) немесе эффлюкстік тасымалдаушыны (ритонавир) біріктіріп қолдану валсартанның жүйелік әсерін арттыруы мүмкін.

Валсартанмен монотерапияда келесі препараттармен: циметидин, варфарин, фуросемид, дигоксин, атенолол, индометацин, гидрохлоротиазид, амлодипин және глибенкламидпен клиникалық тұрғыдан маңызды дәрілік өзара әрекеттесу байқалған жоқ.

Гидрохлоротиазид

Ко-Эксфорж® препаратының құрамында гидрохлоротиазид бар болғандықтан, келесі потенциальді дәрілік өзара әрекеттесулер байқалуы мүмкін:

Гипертензияға қарсы басқа да препараттар: Тиазидтер гуанетидин, метилдопа, бета-адреноблокаторлар, вазодилататорлар, кальций өзектерінің блокаторлары, АӨФ тежегіштері, ангиотензин II рецепторларының блокаторлары (АРБ) және рениннің тікелей тежегіштері (РТТ) сияқты аритмияға қарсы басқа да препараттардың гипотензиялық әсерін күшейтеді.

Миорелаксанттар: Гидрохлоротиазидті қоса, тиазидтер миорелаксанттардың, мысалы, кураре туындыларының әсерін күшейтеді.

Калийдің сарысулық деңгейіне ықпал ететін дәрілік препараттар: Диуретиктердің гипокалиемиялық әсері калийуретикалық диуретиктермен, кортикостероидтармен, адренокортикотроптық гормонмен, амфотерицинмен, карбеноксолонмен, G пенициллинмен, салицил қышқылының туындыларымен немесе аритмияға қарсы дәрілермен бірге қолданғанда күшеюі мүмкін.

Натрийдің сарысулық деңгейіне ықпал ететін дәрілік препараттар: Диуретиктердің гипонатриемиялық әсері антидепрессанттар, антипсихотиктер, эпилепсияға қарсы препараттар және т.б. сияқты препараттармен бірге қолданғанда күшеюі мүмкін. Осы препараттарды ұзақ қолданғанда сақтық таныту қажет.

Диабетке қарсы дәрілер: Тиазидтер глюкозаға толеранттылықты өзгертуі мүмкін. Инсулин мен диабетке қарсы пероральді препараттардың дозасын түзету қажет болуы мүмкін.

Оймақгүл гликозидтері: Тиазидтерден туындайтын гипокалиемия немесе гипомагниемия жүректің дигиталистік аритмиясының басталуына мүмкіндік беретін ықтимал жағымсыз құбылыстар ретінде пайда болуы мүмкін.

ҚҚСП және селективтік ЦОГ-2 препараттары: ҚҚСП (мысалы, салицил қышқылының туындылары, индометацин) бірге қолдану Ко-Эксфорж® препаратының тиазидтік компонентінің диурездік және гипотензиялық әсерін әлсіретуі мүмкін. Қатар жүретін гиповолемия бүйрек функциясының жедел жеткіліксіздігін туындатуы мүмкін.

Аллопуринол: Тиазидтік диуретиктерді (гидрохлоротиазидті қоса) біріктіріп емдеу аллопуринолға жоғары сезімталдық реакцияларының пайда болу жиілігін арттыруы мүмкін.

Амантадин: Тиазидтік диуретиктерді (гидрохлоротиазидті қоса) біріктіріп қолдану амантадиннің жағымсыз әсерлерінің пайда болу қаупін арттыруы мүмкін.

Ісікке қарсы препараттар (мысалы, циклофосфамид, метотрексат): Тиазидтік диуретиктерді біріктіріп қолдану цитоуыттық заттардың бүйректік шығарылуын төмендетуі және олардың миелосупрессивтік әсерін күшейтуі мүмкін.

Антихолинергиялық препараттар: Антихолинергиялық препараттар (мысалы, атропин, бипериден) тиазидтік диуретиктердің биожетімділігін жоғарылатуы мүмкін, бұл АІЖ қозғалыс белсенділігінің және асқазанның босау жылдамдығының төмендеуімен байланысты болуы мүмкін. Өз кезегінде, цизаприд сияқты прокинетиктер тиазидтік диуретиктердің биожетімділігін төмендетуі мүмкін.

Ион алмастыратын шайырлар: Холестирамин және колестипол, гидрохлоротиазидті қоса, тиазидтік диуретиктердің сіңуін төмендетеді. Алайда, шайырды қолданудан, ең кемінде, 4 сағат бұрын және қолданудан кейін 4-6 сағат ішінде гидрохлоротиазид қолданылғанда, гидрохлоротиазид пен шайырдың дозаларын реттеу өзара әрекеттесуді потенциальді түрде барынша азайтады.

D витамині: Гидрохлоротиазидті қоса, тиазидтік диуретиктерді D витаминімен немесе кальций тұздарымен бірге қолдану кальцийдің сарысулық деңгейінің жоғарылауын күшейтуі мүмкін.

Циклоспорин: Циклоспоринді қолданып қатар емдеу гиперурикемия және подагралық асқынулар қаупін арттыруы мүмкін.

Кальций тұздары: Тиазидтік диуретиктерді қатар қолдану кальцийдің өзекшелік реабсорбциясын арттыра отырып, гиперкальциемияға әкеп соғуы мүмкін.

Диазоксид: Тиазидтік диуретиктер диазоксидтің гипергликемиялық әсерін күшейтуі мүмкін.

Метилдопа: Гидрохлоротиазидті және метилдопа препараттарын қатар қабылдағанда гемолитикалық анемияның дамуы жөнінде әдеби деректер бар.

Алкоголь, барбитураттар немесе есірткілік заттар: Тиазидтік диуретиктерді алкогольмен, барбитураттармен немесе есірткілік заттармен қатар қолдану ортостатикалық гипотензияны күшейтуі мүмкін.

Прессорлық аминдер: Гидрохлоротиазид прессорлық аминдерге, мысалы, норадреналинге жауапты төмендетуі мүмкін. Осы әсердің клиникалық маңыздылығы бір мәнді емес және оларды қолдануды жоққа шығару үшін жеткіліксіз.

Валсартан-гидрохлоротиазид

Ко-Эксфорж® препаратының құрамында екі компонент (валсартан және/немесе гидрохлоротиазид) бар болғандықтан, келесі дәрілік өзара әрекеттесулер байқалуы мүмкін:

Литий: Литий препараттары мен АӨФ тежегіштерін, ангиотензин ІІ антагонистерін немесе тиазидтерді біріктіріп қолдану кезінде уаыттылық пен литийдің сарысулық концентрациясының қайтымды жоғарылауы тіркелді. Бүйректік литий клиренсі тиазидтермен төмендейтін болғандықтан, литий уыттылығының қаупі Ко-Эксфорж® препаратын қолданған кезде қосымша ұлғаюы мүмкін. Осылайша, біріктіріп қолдану кезінде сарысудағы литий концентрациясына мұқият мониторинг ұсынылады.

Айрықша нұсқаулар

Натрий деңгейі төмендеген және/немесе айналымдағы қан көлемі (АҚК) азайған емделушілер

Асқынбаған орташа және ауыр дәрежедегі артериялық гипертензиясы бар емделушілерге жүргізілген бақыланатын зерттеулер шегінде, ортостатикалық гипотензияны қоса, айқын артериялық гипотензия валсартан/гидрохлоротиазид (320/25мг) қабылдаған емделушілердің 1,8%-мен, амлодипин/валсартан (10/320мг) қабылдаған емделушілердің 0,4%-мен, және гидрохлоротиазид/амлодипин (25/10мг) қабылдаған емделушілердің 0,2%-мен салыстырғанда, Ко-Эксфорж® препаратының (10/320/25мг) ең жоғары дозасын қабылдаған емделушілердің 1,7%-да байқалды.

Симптоматикалық артериялық гипотензияның дамуы сирек жағдайларда Ко-Эксфорж® препаратымен емдеуді бастағаннан кейін натрий және/немесе АҚК жұтаңдығы ауыр дәрежеде болатын емделушілерде, мысалы, диуретиктерді жоғары дозаларда қабылдап жүрген емделушілерде болуы мүмкін. Ко-Эксфорж® препаратымен емдеуді натрий және/немесе АҚК деңгейінің мұның алдындағы төмендеуін түзеткеннен кейін ғана мұқият медициналық бақылаумен бастаған жөн.

Ко-Эксфорж® препаратын қабылдаған кезде айқын артериялық гипотензия дамыған жағдайда емделушіні шалқасынан жатқызып, қажет болғанда, физиологиялық ерітіндімен көктамырішілік инфузия жүргізу керек. Артериялық қысым тұрақтағаннан кейін де емдеу жалғастырылуы мүмкін.

Бүйрек функциясының бұзылуы

Құрамында гидрохлоротиазид бар болғандықтан, Ко-Эксфорж® препаратын бүйрек функциясының ауыр жеткіліксіздігі бар (шумақтық сүзілу жылдамдығы <30 мл/мин) емделушілерде сақтықпен қолдану қажет. Тиазидтік диуретиктер бүйректің созылмалы ауруы бар емделушілерде азотемияны туындатуы мүмкін. Тиазидтік диуретиктер бүйрек функциясының ауыр жеткіліксіздігінде (шумақтық сүзілу жылдамдығы <30 мл/мин) монотерапия ретінде тиімді емес, бірақ ілмектік диуретиктермен абайлап біріктіріп қолданғанда тіпті шумақтық сүзілу жылдамдығы <30 мл/мин болатын емделушілерге пайдалы әсерін тигізуі мүмкін. Бүйрек функциясының елеусіз және орташа бұзылулары бар емделушілерде Ко-Эксфорж® препаратының дозасын түзету қажет емес.

Бүйрек функциясының ауыр жеткіліксіздігі бар (шумақтық сүзілу жылдамдығы <30 мл/мин) емделушілерде, валсартанды қоса, ангиотензин рецепторларының тежегіштерін, немесе алискирені бар АӨФ қолдануға жол бермеу қажет.

Бүйрек артериясының стенозы

Ко-Эксфорж® препараты, бүйрек артериясының екі жақты стенозы және жалғыз бүйрек артериясының стенозы бар емделушілерде артериялық гипертензияны емдегенде, мұндай емделушілерде қан мочевинасының және сарысулық креатинин деңгейлері жоғарылауы мүмкін болғандықтан, сақтықпен қолданылуы тиіс.

Бүйрек трансплантациясы

Ко-Эксфорж® препаратын бүйрегі жақында трансплантацияланған емделушілерде қолдану тәжірибесі жоқ.

Бауыр функциясының бұзылуы

Валсартан, негізінен, өзгермеген күйінде өтпен бірге шығарылады, сол кезде амлодипин бауырда қарқынды түрде метаболизденеді. Құрамында валсартан, гидрохлоротиазид және амлодипин бар болғандықтан, Ко-Эксфорж® препаратын бауыр функциясының жеткіліксіздігі немесе өт шығару жолдарының обструктивті бұзылулары бар емделушілерге тағайындағанда аса сақтық танытқан жөн.

Ангионевротикалық ісіну

Тыныс жолдарының обструкциясына және/немесе беттің, еріннің, жұтқыншақтың және/немесе тілдің ісінуіне әкелетін көмейдің және дауыс саңылауының ісінуін қоса, ангионевротикалық ісіну валсартанмен ем қабылдаудан өткен емделушілерде байқалды; осы емделушілердің кейбіреулерінде бұрын басқа препараттарды, соның ішінде АӨФ тежегіштерін қолданған кезде ангионевротикалық ісіну байқалды. Егер емделушілерде ангионевротикалық ісіну дамыса, Ко-Эксфорж® препаратын дереу тоқтатқан жөн, мұндайда Ко-Эксфорж® препараты қайтадан тағайындалмауы тиіс.

Жүрек функциясының жеткіліксіздігі/инфарктіден кейінгі жағдай

Жалпы алғанда, амлодипинді қоса, кальций өзектерінің блокаторларын жүрек функциясының ауыр іркілген жеткіліксіздігі (Нью-Йорк кардиологиялық ассоциациясының жіктелімі бойынша III-IV функциональді класс) бар емделушілерде сақтықпен пайдаланылуы тиіс.

Бүйрек функциясы РААЖ белсенділігіне тәуелді емделушілерде (мысалы, жүрек функциясының ауыр іркілген жеткіліксіздігі бар емделушілерде) АӨФ тежегіштерінің немесе ангиотензин рецепторлары антагонистерінің жәрдемімен емдеу олигуриямен және/немесе үдемелі азотемиямен, және сирек жағдайларда бүйрек функциясының жеткіліксіздігімен және/немесе өліммен аяқталумен астасты. Жүрек функциясының жеткіліксіздігі бар немесе инфарктіден кейінгі жағдайдағы емделушілердің жай-күйіне баға беруге бүйрек функциясының жай-күйіне баға беру де қамтылуы тиіс.

Жедел миокард инфарктісі бар емделушілер

Стенокардияның өршуі және жедел миокард инфарктісі, әсіресе коронарлық артериялардың ауыр обструкциялық ауруы бар емделушілерде, амлодипин қабылдауды бастағаннан кейін немесе дозасын арттырғаннан кейін дамуы мүмкін.

Аортальді және митральді клапандар стенозы, обструктивтік гипертрофиялық кардиомиопатия

Қантамырларды кеңейтетін басқа да препараттар сияқты, амлодипинді аортальді немесе митральді клапандардың стенозы немесе обструктивтік гипертрофиялық кардиомиопатиясы бар емделушілерде қолданған кезде аса сақтық қажет.

Сарысудағы электролиттер теңгерімінің өзгерулері

Гидрохлоротиазид

Калий қоспаларымен, калий жинақтайтын диуретиктермен, құрамында калий бар ас тұзын алмастырушылармен немесе қандағы калий концентрациясын арттыруға қабілетті басқа да дәрілік препараттармен (гепарин және т.б.) бір мезгілде қолдану гиперкалиемияға әкеп соғуы мүмкін және сақтықпен жүзеге асырылуы тиіс. Тиазидтік диуретиктер гипокалиемияның басталуын жылдамдатуы немесе бұрыннан бар гипокалиемияны өршітуі мүмкін. Тиазидтік диуретиктерді калийдің күшті жоғалуымен қатар жүретін жағдайлары, мысалы, нефропатиясы, және бүйрек функциясының преренальді (кардиогендік) бұзылулары бар емделушілерде сақтықпен қолданған жөн. Егер гипокалиемия клиникалық белгілермен (мысалы, бұлшықет әлсіздігі, парез немесе ЭКГ өзгерулері) қатар жүрсе, Ко-Эксфорж® препаратын қолдануды тоқтату қажет. Тиазидтік препараттармен емдеуді бастаудан бұрын гипокалиемияны және қатар жүретін гипомагниемияны түзету ұсынылады. Сарысудағы калий және магний концентрацияларының деңгейін мезгіл-мезгіл бақылау қажет. Тиазидтік диуретиктерді қабылдап жүрген барлық емделушілерде электролиттер, әсіресе калий деңгейлерін бақылауды қамтамасыз ету қажет.

Тиазидтік диуретиктер гипонатриемия мен гипохлоремиялық алкалоздың басталуын жылдамдатуы немесе бұрыннан бар гипонатриемияны өршітуі мүмкін. Гипонатриемия жекелеген жағдайларда неврологиялық симптомдармен (жүректің айнуымен, бағдардан айырылудың өршуі, апатия) байқалады. Натрийдің сарысулық концентрациясын жүйелі түрде мониторингілеуді қамтамасыз ету ұсынылады.

Амлодипин – Валсартан - Гидрохлоротиазид

Ко-Эксфорж® препаратына жүргізілген бақыланатын зерттеулерде гипокалиемия жиілігі (сарысулық калий <3,5 мэкв/л) орташа және ауыр артериялық гипертензиясы бар емделушілерде Ко-Эксфорж® препаратының ең жоғары (10/320/25мг) дозасын қолданғанда бастапқыдан кейінгі кез келген уақыт аралығында гидрохлоротиазид/амлодипиндегі (25/10мг) 24,5%-бен, валсартан/гидрохлоротиазидтегі (320/25мг) 6,6%-бен және амлодипин/валсартандағы (10/320мг) 2,7%-бен салыстырғанда 9,9%-ды құрады. Бір емделуші (0,2%) емдеуді Ко-Эксфорж® препараты мен гидрохлоротиазид/амлодипин топтарында гипокалиемияның пайда болуына байланысты тоқтатты. Гиперкалиемияның (сарысулық калий >5,7мэкв/л) пайда болу жиілігі екі компонентті емдегі 0,2-0,7%-бен салыстырғанда Ко-Эксфорж® препаратында 0,4% құрады.

Ко-Эксфорж® препаратына жүргізілген бақыланатын зерттеулерде 320 мг дозадағы валсартанның және 25 мг дозадағы гидрохлоротиазидтің сарысулық калийге қарама-қарсы әсерлері көптеген емделушілерде бір-бірімен шамамен теңгерілді. Басқа емделушілерде екі әсердің бірі басым болды. Болуы мүмкін электролиттік теңгерімсіздікті анықтау мақсатында, тиісті аралықтарда сарысулық электролиттерді мезгіл-мезгіл өлшеп отыру қажет.

Жүйелі қызыл жегі

Гидрохлоротиазидті қоса, тиазидтік диуретиктердің жүйелі қызыл жегіні өршітуі немесе белсенді етуі мүмкін екендігі жөнінде мәлімдемелер бар.

Басқа да метаболизмдік бұзылыстар

Гидрохлоротиазидті қоса, тиазидтік диуретиктер глюкозаға толеранттылықты өзгертуі, сондай-ақ қан сарысуында холестерин мен триглицеридтер концентрациясын жоғарылатуы мүмкін.

Басқа да диуретиктер сияқты, гидрохлоротиазид сезімтал емделушілерде несеп қышқылы клиренсінің төмендеуіне байланысты, қан сарысуында несеп қышқылының деңгейін арттыруы және гиперурикемияны тудыруы немесе өршітуі, сондай-ақ подаграны күшейтуі мүмкін.

Тиазидтік диуретиктер кальцийдің несеппен бірге шығарылуын төмендетеді және кальций метаболизмі бұзылмағанда қан сарысуында кальций деңгейін жоғарылатуы мүмкін. Гидрохлоротиазид қан сарысуында кальций концентрациясын арттыруы мүмкін болғандықтан, оны гиперкальциемиясы бар емделушілерде абайлап қолдану қажет. Тиазидтік диуретиктерді тоқтатуға жауап бермейтін айқын гиперкальциемия немесе ≥12 мг/дл, тиазидтерге тәуелді емес қатар жүретін гиперкальциемиялық үдерісті айғақтауы мүмкін. Тиазидтік емді ұзақ қабылдаған, гиперкальциемиясы және гипофосфатемиясы бар бірнеше емделушілердің қалқанша безінде патологиялық өзгерулер анықталды. Гиперкальциемия байқалған жағдайда диагнозды нақтылау мақсатында қосымша тексерулер жүргізу қажет болады.

Жалпы бұзылулар

Аллергиясы және демікпесі бар емделушілерде гидрохлоротиазидке аса жоғары сезімталдық реакциялар болуы мүмкін.

Жедел жабық бұрышты глаукома

Гидрохлоротиазид (сульфаниламид) жедел транзиторлық миопияға және жедел жабық бұрышты глаукомаға әкеп соғатын идиосинкразиялық реакциямен астасады. Симптомдары көру жітілігінің төмендеуін немесе көздің ауыруын қамтиды және, әдеттегідей, препаратты қабылдаудан кейін бірнеше сағаттан бірнеше аптаға дейінгі аралық ішінде пайда болады. Емделмеген жедел жабық бұрышты глаукома көздің қайтымды емес көрмей қалуына әкеп соғуы мүмкін.

Алғашқы ем гидрохлоротиазидті тез арада тоқтату болып табылады. Егер көзішілік қысым бақыланбайтын жағдайда болса, шұғыл терапиялық немесе хирургиялық емдеуді қарастыру қажет. Жедел жабық бұрышты глаукоманың даму қаупінің факторларына сыртартқыдағы сульфаниламидтерге немесе пенициллинге аллергия да жатуы мүмкін.

Ренин-ангиотензин жүйесінің (РАЖ) қосарлы бөгелісі

Ангиотензин рецепторлары антагонистерін, соның ішінде валсартанды АӨФ тежегіштері немесе алискирен сияқты РАЖ бөгейтін басқа дәрілермен біріктіріп қолданғанда сақ болу қажет.

Репродуктивтік жастағы әйелдер

Ренин-ангиотензин-альдостерон жүйесіне (РААЖ) тікелей әсер ететін барлық дәрілік препараттар сияқты, Ко-Эксфорж® препараты жүктілікті жоспарлап жүрген емделуші әйелдерге қолданылмауы тиіс. Жүктілік кезінде РААЖ-ге әсер ететін дәрілік препараттарды тағайындайтын дәрігерлер репродуктивтік жастағы әйелдермен осы дәрілердің потенциальді қаупін талқылауы тиіс.

Жүктілік және лактация кезеңі

Жүктілік

РААЖ-ге тікелей әсер ететін барлық басқа препараттар сияқты, Ко-Эксфорж® препараты жүктілік кезінде қолданылмауы тиіс. Ангиотензин II рецепторы антагонистерінің әсер ету механизмін ескерсек, ұрыққа әсер ету қаупі жоққа шығарылмайды. Екінші және үшінші триместрлерде жүкті әйелдерде АӨФ тежегіштерін (РААЖ-ге әсер ететін препараттардың ерекше класы) қолданудың даму үстіндегі ұрықтың зақымдануына және өліммен аяқталуына әкеп соғуы байқалды. Бұдан басқа, ретроспективтік деректер бойынша, алғашқы триместр ішінде АӨФ тежегіштерін пайдалану даму кемістіктерінің пайда болу қаупімен астасты. Гидрохлоротиазид плацента арқылы өтеді. Жүкті әйелдер валсартанды абайсызда қабылдағанда өздігінен болатын түсік, олигогидрамнион және жаңа туған нәрестелерде бүйрек дисфункциясы жағдайлары байқалды.

Жүкті әйелдерде амлодипинді қолдану жөнінде жеткілікті клиникалық деректер жоқ. Жануарларда амлодипинге жүргізілген зерттеулер ең жоғары ұсынылатын 10 мг дозадан 8 есе артық болатын дозаларда репродуктивтік уыттылық байқалды. Адамдар үшін потенциальді қаупі белгісіз.

Гидрохлоротиазидті қоса, тиазидтік диуретиктердің жатыр ішінде әсер етуі фетальді немесе неонатальді сарғаюмен немесе тромбоцитопениямен астасты, сондай-ақ ересек емделушілерде байқалатын басқа да жағымсыз әсерлермен астасуы мүмкін.

Ко-Эксфорж® препаратымен емдеу кезінде жүктілік анықталған жағдайда емдеуді қысқа мерзім ішінде тоқтатқан жөн.

Лактация кезеңі

Ана сүтіне валсартанның және/немесе амлодипиннің бөлініп шығатын-шықпайтыны белгісіз. Лактациядағы егеуқұйрықтың сүтіне валсартанның бөлініп шыққаны байқалды. Гидрохлоротиазид ана сүтіне бөлініп шығады. Сондықтан бала емізу кезінде әйелдерге Ко-Эксфорж® препаратын қолдану ұсынылмайды.

Фертильділігі

Адамның бала көтеру функциясына амлодипиннің, валсартанның немесе гидрохлоротизидтің әсері жөнінде ақпарат жоқ. Егеуқұйрықтарға жасалған зерттеулер амлодипиннің, валсартанның немесе гидрохлоротиазидтің зерттелген особьтің фертильділігіне қандай да болсын әсерін көрсеткен жоқ.

Көлік құралын немесе басқа да қауіпті механизмдерді басқару қабілетіне дәрілік заттың ықпал ету ерекшеліктері

Автомобильді жүргізгенде және механизмдерді басқарғанда сақтық таныту ұсынылады.

Артық дозалануы

Ко-Эксфорж® препаратының артық дозалану жағдайлары қазіргі таңға дейін байқалған жоқ.

Негізгі симптомдары: бас айналу болатын айқын гипотензия. Амлодипиннің артық дозалануы шеткергі вазодилатацияның өсуін туындатуы мүмкін және рефлекторлы тахикардия болуы мүмкін.

Шокқа және өліммен аяқталуға дейін ұласатын елеулі және ұзаққа созылатын жүйелік гипотензия жөнінде мәлімделді.

Емі: егер препарат жуық арада қабылданған болса, құстыру немесе асқазанды шаю керек. Қабылдану бойына бірден немесе 2 сағат ішінде белсендірілген көмірді пайдаланғанда Ко-Эксфорж® препаратының сіңуі едәуір төмендейді.

Ко-Эксфорж® препаратының артық дозалануынан туындаған клиникалық тұрғыдан маңызды артериялық гипотензия, жүрек және тыныс алу жүйесінің функциясын, айналымдағы қан көлемін және бөлініп шыққан несеп мөлшерін ұдайы бақылауды қоса, жүрек-қантамыр жүйесінің жағдайын белсенді түрде демеуді қажет етеді. Емделушіні аяқтарын көтеріңкіреп жатқызған жөн. Қантамырлық тонусты және артериялық қысымды қалпына келтіру үшін, оны қолдануға қарсы көрсетілімнің жоқтығын есепке ала отырып, вазоконстриктор қолданылуы мүмкін. Кальций өзектерінің бөгелісін қайтару үшін кальций глюконатын көктамыр ішіне енгізу мақсатқа лайық болуы мүмкін.

Валсартан және амлодипин гемодиализдің жәрдемімен шығарылмайды, бұған гидрохлоротиазид клиренсі сияқты диализ жолымен қол жеткізіледі.

Шығарылу түрі және қаптамасы

Поливинилхлорид/поливинилиденхлорид үлбірден және алюминий фольгадан немесе полиамид/алюминий/поливинилхлорид үлбірден және алюминий фольгадан жасалған пішінді ұяшықты қаптаға 14 таблеткадан салынған.

Пішінді 1 немесе 2 қаптамадан медицинада қолданылуы жөнінде мемлекеттік және орыс тілдеріндегі нұсқаулықпен бірге картон қорапшаға салынған.

Сақтау шарттары

Ылғалдан қорғау үшін түпнұсқалық қаптамасында 30С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Препаратты қаптамасында көрсетілген мерзімнен кейін пайдалануға болмайды.

Дәріханалардан босатылу шарттары

Рецепт арқылы

Өндіруші / Қаптаушы

Новартис Фармаcьютика С.А.

Ронда де Санта Мария, 158

08210 Барбера дел Валлес

Барселона, Испания

Тіркеу куәлігінің иесі

Новартис Фарма АГ, Базель, Швейцария

Тұтынушылардан өнім (тауар) сапасы жөніндегі шағымдарды Қазақстан Республикасы аумағында қабылдайтын ұйымның мекенжайы:

050051 Алматы қ., Луганский к-сі, 96

тел.: (727) 258-24-47 

факс: (727) 244-26-51

e-mail: drugsafety.cis@novartis.com

CDS 2014-PSB/GLC-0722-s от 03.12.2014

Прикрепленные файлы

077392901477976494_ru.doc 178 кб
663755571477977655_kz.doc 233 кб

Отправить прикрепленные файлы на почту

Источники

Национальный центр экспертизы лекарственных средств, изделий медицинского назначения и медицинской техники