Клоназепам (2 мг) (Clonazepam)

КЛОНАЗЕПАМ

Клоназепам

2 мг таблеткалар

Бір таблетканың құрамында

белсенді зат – клоназепам 2 мг,

қосымша заттар: картоп крахмалы, күріш крахмалы, натрий карбоксиметилкрахмалы (А типі), желатин, полисорбат 80, натрий лаурилсульфаты, тальк, магний стеараты, лактоза моногидраты

Дөңгелек пішінді, екі беті жайпақ, ақтан ашық крем түстіге дейінгі, таблетканы төрт бөлікке бөлетін крест тәрізді сызығы бар, шеттері бүтін, сызатсыз таблеткалар

Жүйке жүйесі. Эпилепсияға қарсы препараттар. Бензодиазепин туындылары.

Клоназепам

АТХ коды N03АЕ01

Фармакокинетикасы

Клоназепам асқазан ішек жолдарынан жақсы сіңеді. Ішке қабылдағанда биожетімділігі 90% құрайды. Препараттың бір реттік дозасын ішке қабылдағанда қан сарысуындағы ең жоғары концентрациясы 1-4 сағаттан кейін бақыланады.

Клоназепам қан ақуыздарымен шамамен 85% байланысады. Препарат гематоэнцефалдық және плацентарлық тосқауыл арқылы, сондай-ақ ана сүтіне өтеді. Таралу көлемі 1,8-4,4 л/кг құрайды. Клоназепам бауырда фармакологиялық белсенді емес метаболиттерге дейін метаболизмге ұшырайды. Жартылай шығарылу кезеңі 20-60 сағатты құрайды. Негізінен, метаболиттер түрінде несеппен шығарылады. Препараттың қабылданған дозасының 0,5% азы өзгермеген түрде бүйрекпен шығарылады.

Фармакодинамикасы

Клоназепам бензодиазепин туындылары тобына жатады. Орталық жүйке жүйесінің көптеген құрылымына - ең алдымен лимбиялық жүйеге және гипоталамусқа, яғни эмоционалдық қызметті реттеуге байланысты құрылымға әсер етеді. Барлық басқа да бензодиазепиндер сияқты, ол ми қыртысы, гипокамп, мишық, жұлын бағанына және орталық жүйке жүйесінің басқа құрылымдарының ГАМК-эргиялық нейрондарының тежегіш әсерін күшейтеді. Осының салдары әр түрлі топтағы: норадренергиялық, холинергиялық, допаминергиялық және серотонинергиялық нейрондардың белсенділігінің азаюы болып табылады. Бензодиазепиндердің спецификалық байланысу бөліктері бары, оның ГАМК-А рецепторларынан және хлорлық өзекшелерден тұратын кешенмен байланысы бар ақуыз құрылымды жасушалық жарғақшадан тұратыны анықталған. Клоназепамның әсер етуі эндогенді тежегіш нейромедиаторлар болып табылатын осы рецептордың гамма-аминомай қышқылына (ГАМК) тектестігі артуына әкеп соқтыратын ГАМК-ергиялық рецептор сезімталдығының модуляциясына байланысты. Бензодиазепиндік рецептордың немесе ГАМК-А-ның белсенділенуінің салдары хлор өзегі арқылы нейрон ішінде хлор иондарының тасымалдануы болып табылады, ол жасушалық жарғақшаның гиперполяризациясына, соның нәтижесінде нейрон белсенділігінің (яғни нейромедиаторлардың босап шығуы) бәсеңдеуіне әкеп соқтырады. Клиникалық тұрғыдан клоназепамның құрысуға қарсы, анксиолитикалық, тыныштандыратын және айқындығы орташа ұйықтатқыш әсері бар, қаңқа бұлшықеттерінің тонусын төмендетеді. Клоназепам құрысудың басталу шегін жоғарылатады және жайылған құрысу ұстамаларының пайда болуына жол бермейді. Жайылған құрысу ұстамаларының, сондай-ақ парциальді құрысу ұстамаларының ағымына қолайлы әсер етеді.

Сәбилердегі, балалардағы және ересектердегі эпилепсия мен құрысулардың барлық клиникалық формалары атипиялық абсанстарды қоса, көбінесе абсанстар (petit mal); бастапқы немесе салдарлы жайылған тонико-клоникалық құрысулар (grand mal), тоникалық немесе клоникалық құрысулар; қарапайым немесе күрделі парциальді (ошақтық) ұстамалар; миоклоникалық құрысулардың түрлі формалары, миоклонус және онымен байланысты қимыл функциясының бұзылыстары.

Күнделікті тіршілік мәселелеріне байланысты болатын жүйке ширығуы және мазасыздық жай-күйлерінде дәрілік препаратты қолдануға болмайды.

Асқынуды болдырмау үшін препаратты қатаң түрде дәрігер тағайындауымен қабылдау керек.

Клоназепам препаратын дәрігер ұсынымына сай қабылдау керек.

Күдік болған жағдайда дәрігермен кеңесу керек.

Таблеткалардағы крест тәрізді сызық таблетканы 2 немесе 4 бірдей бөлікке бөлуге мүмкіндік береді.

Ересектер

Бастапқы бірінші тәуліктік дозасы 1 мг аспауы тиіс. Препаратты тәулігіне бірдей уақыт аралығымен 2-3 рет бөліп қабылдайтын дозада тағайындау керек. Дозаны пациенттің препаратқа реакциясына қарай әрбір 3 күн сайын 0,5 мг-дан 1 мг дейін әдетте тәулігіне 4-тен 8 мг дейінді құрайтын демеуші доза анықталғанша біртіндеп ұлғайту керек.

Емнің 2-4 аптасы бойына қол жеткізілуі тиіс ең жоғары тәуліктік демеуші доза 20 мг аспауы тиіс.

Балалар

1-ден 5 жасқа дейінгі балалардағы бастапқы доза тәулігіне 0,25 мг құрайды,

үлкен балаларда - тәулігіне 0,5 мг.

Демеуші доза:

- 1-ден 5 жасқа дейін: тәулігіне 1-2 мг;

- 6-дан 16 жасқа дейін: тәулігіне 2-4 мг.

Тәуліктік дозаны бірдей уақыт аралығымен қолданылатын 3 немесе 4 бөлікке бөлу керек.

Оңтайлы дозалауды анықтау уақытына дейін балалар құрамында әсер етуші заты 0,5 мг дозадағы таблеткаларды қабылдауы тиіс.

Бүйрек және (немесе) бауыр функциясы бұзылған пациенттер

Дозалауды дәрігер зақымданған ағзаның жеткіліксіздігі дәрежесіне қарай жеке анықтайды.

Егде жастағы пациенттер

Егде жастағы пациенттер әсіресе орталық жүйке жүйесіне бәсеңдететін әсер беретін дәрілік заттарға сезімтал. Осы жас тобында құлауға және жарақаттарға әкелуі мүмкін ориентацияның және қимыл үйлесімінің бұзылуы жиі байқалатынына байланысты бұл пациенттер үшін Клоназепам дәрілік препаратының ұсынылған бастапқы дозасы 0,5 мг/тәул аспауы тиіс.

Егер ем уақытында пациентке препарат әсері тым күшті немесе тым әлсіз болып көрінсе, ол дәрігерге қаралуы тиіс.

Емнің ұзақтығы

Емнің ұзақтығы пациенттің жай-күйіне байланысты. Егер клоназепамды бірнеше күн бойына қолданудан кейін жақсару бақыланбаса дәрігерге қаралу керек.

Қолдану тәсілі

Таблеткаларды аз мөлшердегі сумен іше отырып, ішке қабылдау керек.

Дәрігер емді барынша тиімділігі аз дозаны қолданудан, оларды біртіндеп әрбір 3 күн сайын тиісті емдік әсерге немесе ең жоғары тәуліктік дозаға жеткен кезге дейін ұлғайта отырып бастауы тиіс.

Егер препаратты бірдей дозаларда қолдану мүмкін болмаса, үлкен дозасын ұйықтар алдында қабылдау керек.

Тиімді демеуші доза анықталғаннан кейін препаратты бір реттік тәуліктік дозада ұйықтар алдында қабылдауға болады.

Препаратты дәрігер бақылауымен, біртіндеп тоқтату керек. Клоназепамды қолдануды күрт тоқтату тоқтату синдромын туындатуы мүмкін. Әсіресе ұзақ уақыт бойы жүргізілген емнің немесе препараттың үлкен дозаларын талап ететін емнің күрт тоқтатылуы ерекше қауіпті болып табылады. Тоқтату синдромы онда айқынырақ болады. Препаратты біртіндеп тоқтатуды дәрігер әрбір пациент үшін жеке анықтауы тиіс.

Егер препарат дәл тағайындалған уақытында қабылданбаса, оны мүмкіндігінше тез қабылдау керек (егер препаратты кезекті қабылдау уақытына дейін әлі уақыт жеткілікті болса) немесе препаратты ретімен қабылдауды жалғастыра беру керек.

Жіберіп алғанның орнын толтыру мақсатымен екі еселік доза қабылдауға болмайды.

Иммундық жүйе тарапынан болатын бұзылыстар

Бензодиазепиндерді қолданғанда аллергиялық реакциялар және анафилаксияның өте сирек жағдайлары туралы хабарламалар бар.

Эндокриндік жүйе тарапынан болатын бұзылыстар

Екіншілік жыныстық белгілердің (толық емес мерзімінен бұрынғы пубертат) пайда болуымен балаларда қайтымды мерзімінен бұрын жыныстық дамудың жекелеген жағдайлары сипатталған.

Психиканың бұзылуы

Зейін қоюдың бұзылуы, мазасыздық, сананың шатасуы, бағдардан адасу байқалды. Пациенттердегі депрессия Клоназепам дәрілік препаратын қабылдаудан, сондай-ақ негізгі аурудан да туындауы мүмкін. Келесі парадоксальді реакциялар байқалды: қозу, ашушаңдық, озбырлық, ажитация, күйгелектік, өшпенділік, мазасыздық, ұйқының бұзылуы, қорқынышты түстер көру, түрлі-түсті түстер көру, психоздық бұзылыстар, жаңа ұстама түрлерінің дамуы. Мұндай жағдайда дәрілік препаратты қолданудан күтілетін пайданың жағымсыз әсерлердің ықтимал туындау қаупіне арақатынасын бағалау қажет. Қосымша тиісті дәрілік затты қолдану қажет болуы мүмкін немесе, кейбір жағдайларда Клоназепам препаратымен емді тоқтату керек.

Сирек жағдайларда либидоның жойылуы байқалуы мүмкін.

Жүйке жүйесі тарапынан болатын бұзылыстар

Ұйқышылдық, реакцияның баяулауы, бұлшықет гипотониясы, бас айналуы, атаксия және қимыл үйлесімінің бұзылуы. Бұл жағымсыз әсерлер салыстырмалы түрде жиі байқалады, әдетте өтпелі болып табылады және әдетте, емдеу үдерісінде немесе дозаны төмендеткенде өз бетімен жоғалады. Оларды емнің басында дозаны баяу ұлғайта отырып, ішінара алдын алуға болады.

Сирек жағдайларда бас ауыруы байқалды. Жайылған ұстамалар өте сирек байқалды.

Әсіресе ұзақ емдегенде немесе жоғары дозаларды қолданғанда дизартрия, қимыл үйлесімінің төмендеуі және жүрістің бұзылуы (атаксия), сондай-ақ нистагм сияқты қайтымды бұзылыстар байқалуы мүмкін. Антероградты амнезия бензодиазепинді емдік дозаларда қабылдаған пациенттерде туындауы мүмкін, бұл ретте оның туындау қаупі жоғарырақ дозаларды қолданғанда өседі. Есте сақтаудың бұзылуы нашар мінез-құлықпен байланысты болуы мүмкін. Эпилепсияның белгілі бір түрлерінде ұзақ емдеу құрысулар жиілігінің ұлғаюына әкелуі мүмкін.

Көру ағзалары тарапынан болатын бұзылыстар

Әсіресе ұзақ емдегенде немесе жоғары дозаларды қолданғанда қайтымды көру бұзылыстары (диплопия) байқалуы мүмкін.

Жиі: нистагм.

Жүрек тарапынан болатын бұзылыстар

Жүрек тоқтауын қоса, жүрек жеткіліксіздігі туралы хабарлар бар.

Тыныс алу жүйесі, көкірек қуысы және көкірек ортасы ағзалары тарапынан болатын бұзылыстар

Тыныс алудың бәсеңдеуі әсіресе клоназепамды вена ішіне енгізгенде туындауы мүмкін. Бұл әсер бұрын болған тыныс алу жолдарының бітелуі, мидың зақымдануы немесе тыныс алу орталығына бәсеңдететін әсер беретін дәрілік заттарды бір уақытта қабылдаумен шиеленісуі мүмкін. Әдетте, бұл әсерден пациенттің жекелей қажеттіліктеріне байланысты дозаны мұқият таңдай отырып, құтылуға болады.

Сәбилер мен кіші жастағы балаларда, әсіресе психикалық бұзылыстары бар адамдарда Клоназепам сілекей мен бронхтан бөлінетін сұйықтық секрециясының күшеюін туындатуы мүмкін.

Сондықтан тыныс алу жолдарының өткізгіштігін демеп тұруға аса көңіл бөлу керек.

Асқазан-ішек жолы тарапынан болатын бұзылыстар

Мыналар сирек байқалды: жүрек айнуы, асқазан-ішек және эпигастральді симптомдар.

Тері және тері асты тіндері тарапынан болатын бұзылыстар

Сирек жағдайларда мыналар туындауы мүмкін: есекжем, қышыну, бөртпе, өтпелі шаштың түсуі, пигментацияның өзгеруі және ангионевроздық ісіну.

Қаңқа-бұлшықет және дәнекер тін тарапынан болатын бұзылыстар

Бұлшықет әлсіздігі салыстырмалы түрде жиі туындайды және әдетте өтпелі сипатқа ие, әдетте, емдеу үдерісінде немесе дозаны төмендеткенде өз бетімен кетеді. Дозаны емнің басында баяу ұлғайта отырып, бұл жағымсыз әсердің дамуын ішінара алдын алуға болады.

Бүйрек және несеп шығару жолдары тарапынан болатын бұзылыстар

Сирек жағдайларда несепті ұстау алмау туындауы мүмкін.

Жыныс ағзалары және сүт безі тарапынан болатын бұзылыстар

Сирек жағдайларда эректильді дисфункция туындауы мүмкін.

Жалпы бұзылыстар және енгізген жердегі реакция

Шаршау (қажу) салыстырмалы түрде жиі туындайды және әдетте өтпелі сипатқа ие, әдетте, емдеу үдерісінде немесе дозаны төмендеткенде өз бетімен кетеді. Дозаны емнің басында баяу ұлғайта отырып, бұл жағымсыз әсердің дамуын ішінара алдын алуға болады.

Парадоксальді реакциялар оның ішінде ашушаңдық байқалды. («Психиканың бұзылуы» қар.).

Манипуляциядан кейінгі жарақаттар, уыттану және асқынулар

Бензодиазепин қабылдаған пациенттерде құлау және сындырып алу туралы хабарламалар бар. Қауіп егде жастағы адамдарда, сондай-ақ седативті заттарды (оның ішінде алкогольдік сусындар) бір уақытта қабылдайтын адамдарда ұлғаяды.

Зертханалық және инструменттік деректер

Сирек жағдайларда тромбоциттер мөлшерінің төмендеуі байқалуы мүмкін. Басқа бензодиазепиндердегі сияқты, қан көрінісі өзгеруінің сирек жағдайлары және бауыр сынамаларының нәтижелеріне ықпалы туралы хабарланды.

Тәуелділік және тоқтату симптомдары.

Асқынбаған порфириясы бар пациенттерде қолданылатын Клоназепам эпилепсия ұстамаларына сирек түрткі болды.

Педиатриялық популяция

Педиатриялық пациенттерге тән жағымсыз әсерлер жағдайында мына бөлімдерде келтірілген ақпаратпен танысу керек: «Эндокриндік жүйе тарапынан болатын бұзылыстар», «Тыныс алу жүйесі, көкірек қуысы және көкірек ортасы ағзалары тарапынан болатын бұзылыстар».

Кейбір пациенттерде Клоназепам препаратын қолдану уақытында басқа да жағымсыз әсерлер туындауы мүмкін. Жоғарыда аталған немесе кез келген бұл нұсқаулықта көрсетілмеген басқа жағымсыз құбылыстар пайда болған жағдайда олар туралы дәрігерге хабарлау керек.

- бензодиазепиндерге немесе препараттың қандай да бір компонентіне жоғары сезімталдық

- тыныс алудың ауыр жеткіліксіздігі

- түнгі апноэ ұстамалары, балаларда жұтынудың бұзылуы

- бауырдың ауыр жеткіліксіздігі

- миастения

- жедел порфирия

- жабық бұрышты глаукома

- алкогольмен, есірткілік анальгетиктермен және ұйықтатқыш дәрілік заттармен улану

- сыртартқысындағы дәріге тәуелділік

- тұқым қуалайтын галактоза жақпаушылығы, Lapp-лактаза ферменті тапшылығы, глюкоза-галактоза мальабсорбциясы

- жүктілік және лактация кезеңі

Дәрігерге соңғы уақытта қабылданып жүрген барлық дәрілік препараттар туралы, тіпті рецептісіз босатылатындары туралы да хабарлауы керек.

• Клоназепамның орталық жүйке жүйесіне бәсеңсіту әсерін апиынды ауыруды басатын препараттар, жалпы анестезияға арналған (анестетиктер) препараттар, психотроптық препараттар, антидепрессанттар, антигистаминдік препараттар, орталықтық әсері бар қан қысымын төмендететін препараттар күшейтеді.

• Бензодиазепиндермен бір уақытта қолданылатын бауырда метаболизденетін препараттар олардың әсерін күшейтуі (дисульфирам, циметидин, эритромицин, кетоконазол, ритонавир) мүмкін немесе олардың әсерін (рифампицин, фенобарбитал, фенитоин, примидон, карбамазепин) әлсіретуі мүмкін.

• Клоназепаммен емдеу уақытында алкоголь қабылдау орталық жүйке жүйесіне бәсеңсітетін әсерін күшейтеді, психомоторлық қозу, озбыр мінез-құлық сияқты парадоксальдық реакциялар дамуына алып келуі мүмкін. Бұдан басқа алкоголь клоназепамның тыныштандыратын әсерін қозғалыс координациясын бұзуға және естен тануға дейін жеткізіп күшейтеді.

• Клоназепам қаңқа бұлшықеттерін босаңсытатын дәрілермен бірге қабылданғанда соңғысының әсерін ұзартады және күшейтеді.

• Клоназепамды III кластық антиаритмиялық препаратпен – амиодаронмен бір уақытта қолданғанда бензодиазепиндерге тән (мысалы, қозғалыс координациясы бұзылыстары) уыттылықтың күшеюін туындатуы мүмкін.

• Клоназепам құрысуға қарсы басқа препараттармен, әсіресе гидантоинмен немесе фенобарбиталмен бір уақытта қолданылғанда орталық жүйке жүйесі функциясының бәсеңдеуімен байланысты жағымсыз әсерлердің күшеюін туындатуы мүмкін.

• Натрий вальпроатымен –эпилепсиялық статустар туындағаны байқалған.

• Темекі шегу клоназепам әсерінің әлсіреуіне алып келуі мүмкін.

Клоназепам препаратын қолданғанда ескерілуі тиіс бензодиазепиндермен және басқа да ұйықтататын препараттармен емдеуде бақыланатын әсерлерге қатысты жалпы ақпараттар.

Эпилепсияға қарсы дәрілерді бірнеше көрсетілім бойынша қабылдаған пациенттерде суицидтік ойлар мен мінез-құлық туралы хабарланды. Эпилепсияға қарсы препараттар бойынша деректердің метаанализі де суицидтік ойлар мен мінез-құлық қаупінің аздап жоғарылауын көрсетті. Бұл қауіптің механизмі белгісіз және қолда бар деректер клоназепам үшін қауіптің ұлғаю мүмкіндігін жоққа шығармайды.

Сондықтан пациенттерге суицидтік ойлар және мінез-құлық белгілерін қадағалауы керек және тиісті ем қарастыру керек. Пациенттерге (және пациенттердің күтушілеріне) суицидтік ойлар және мінез-құлық белгілері пайда болса медициналық көмекке жүгінуге кеңес беру керек.

Депрессия және/немесе өз-өзіне қол жұмсау тарихы бар пациенттер мұқият қадағалауда болуы тиіс.

Клоназепамды созылмалы өкпе жеткіліксіздігі бар немесе бүйрек немесе бауыр функциясы нашарлаған пациенттерде, сондай-ақ егде жастағы адамдарда немесе әлсіреуге байланысты сақтықпен пайдалану керек. Бұл жағдайларда дозасы әдетте төмендетілуі тиіс.

Толеранттылық

Бензодиазепиндерді немесе әсері осыған ұқсас препараттарды, оның ішінде клоназепамды, бірнеше апта бойына ұдайы қолдану олардың әсерінің тиімділігі азаюына алдып келуі мүмкін.

Дәріге тәуелділік

Бензодиазепиндерді немесе әсері осыған ұқсас препараттарды қолдану психикалық және физикалық дәріге тәуелділік дамуына алып келуі мүмкін. Дәріге тәуелділік дамуының қаупі доза мен емнің ұзақтығымен бірге ұлғаяды, және алкогольге тәуелділігі бар пациенттерде, ал сондай-ақ есірткілік және дәрілік заттарға тәуелділігі бар пациенттерде жоғарылай түседі.

Дәріге тәуелділік дамуы жағдайында препаратты қолдануды күрт тоқтату жағдайы тоқтату синдромының туындауына алып келуі мүмкін.

Тоқтату синдромына тән сипаттың белгілері: бас ауыруы, бұлшықет ауыруы, қозу және эмоционалдық ширығу, қимыл- қозғалыс мазасыздығы, сана шатасуы және бағдар жоғалту жай-күйі, ашушаңдық және ұйқысыздық болып табылады.

Ауыр жағдайларда пайда болуы мүмкін: дереализация, тұлғалық бұзылулар, тактильді, акустикалық және жарық гиперестезиясы, «құмырсқа жыбырлағандай» және аяқ-қол ұюын сезіну, елестеулер және құрысу ұстамалары. Жоғарыда көрсетілген симптомдар пайда болған жағдайда дәрігерге көріну керек.

Антероградтық амнезия

Клоназепам препараты, сондай-ақ бензодиазепиндер және осыған ұқсас басқа да препараттар антероградтық амнезия туындатуы мүмкін. Бұндай жай-күй бәрінен бұрын препаратты жиі, әсіресе үлкен дозаларда қабылдағаннан кейін бірнеше сағаттан соң бақыланды. Егер дәрігер препаратты тәулігіне бір рет қабылдауды тағайындаса, Клоназепам дәрілік препаратымен емделген пациенттер амнезия даму қаупін төмендету үшін препаратты ұйықтар алдында қабылдауы тиіс және үздіксіз 7-8 сағат ұйықтайтын жағдайда болуы тиіс.

Парадоксальдық реакциялар

Клоназепам препараты, сондай-ақ бензодиазепиндер және осыған ұқсас басқа да препараттар сияқты қимыл- қозғалыс мазасыздығы, қозу, ашушаңдық, озбырлық, жауығу, түрлі-түсті түстер көру, елестеулер, психоздар, сомнамбулизм, тұлғалық бұзылу, айқын ұйқысыздық сияқты парадоксальдық реакциялар туындатуы мүмкін. Бұл реакциялар егде пациенттерде, болмаса алкогольге тәуелділігі бар пациенттерде елеулі түрде жиі бақыланады.

Бұл симптомдар пайда болған жағдайда дәрігерге қаралу керек.

Депрессияда қолданылуы

Клоназепам дәрілік препаратын қолданар алдында пациент дәрігерге барлық психикалық аурулары туралы мәлімдеуі тиіс. Эндогендік депрессия симптомдары немесе депрессияға байланысты үрейленуі бар пациенттерге дәрігер бір мезгілде бірнеше препарат тағайындауы тиіс. Тек қана Клоназепам препаратын қолдану депрессиясы бар пациенттерде депрессия симптомдарының күшеюіне, оның ішінде суицидтік ойларға соқтыруы мүмкін.

Пациенттердің арнайы топтары

Бұл жастағы топтарда негізінен бағдар жоғалту және қозғалыс координациясының (құлау, жарақаттар) бұзылуы сияқты жағымсыз әсерлері күшеюіне байланысты егде жастағы пациенттер Клоназепамның азырақ дозаларын қабылдауы тиіс.

Бауыр жеткіліксіздігі, созылмалы бүйрек жеткіліксіздігі, созылмалы тыныс алу жеткіліксіздігі, мишық және жұлын атаксиясы немесе порфириясы бар пациенттер Клоназепам препаратын қолданар алдында бұл аурулары туралы дәрігерді хабардар етулері тиіс.

Глаукомасы бар пациенттер Клоназепам препаратымен емделер алдында окулист-дәрігермен кеңесуі тиіс.

Клоназепам, әсіресе, нәрестелер мен кішкене балаларда сілекейдің және тыныс алу жолдарынан бөлінділердің шамадан тыс бөлінуін туындатуы мүмкін. Емдеу уақытында тыныс алу жолдарын бақылау керек.

Психозы бар пациенттерде бензодиазепинді және осыған ұқсас препараттарды қолдану ұсынылмайды.

Алкогольдік, есірткілік немесе дәрілік заттарға тәуелділігі бар пациенттер Клоназепам препаратын қолданбас бұрын бұл зиянды әдеттері туралы дәрігерге хабарлауы тиіс. Пациенттердің бұл тобында психикалық және физикалық тәуелділік даму және дағдылану ықтималдығы жоғары болып келеді. Бұл пациенттер Клоназепам дәрілік препаратын тек дәрігердің қатаң бақылауымен ғана қабылдауы тиіс.

Клоназепам дәрілік препаратымен ұзақ емдеу жағдайында дәрігер қанды (жағындымен бірге морфологиялық талдау) және бауырдың функционалдық сынамасын ауық-ауық зерттеуді жүргізуді тағайындауы тиіс.

Препарат құрамында лактоза бар. Клоназепамды лактоза жақпаушылығымен, туа біткен Lapp-лактаза жеткілісіздігімен немесе глюкоза/галактоза сіңірілуінің бұзылуымен байланысты сирек тұқым қуалайтын аурулары бар пациенттерге қолдануға болмайды.

Клоназепам препаратын азық-түлік өнімдерімен және сусындарымен бірге қабылдау

Клоназепаммен ем уақытында және ол аяқталған соң 3 күн бойына ешқандай спирт сусындарын қолдануға болмайды.

Тіпті егер жоғарыда келтірілген ескертулер бұрын бақыланған жағдайларға қатысты болса да дәрігермен кеңесу керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Cимптомдары: ұйқышылдық, бағдар жоғалту жай-күйі, түсініксіз сөйлеу, ал ауыр жағдайларда естен тану, кома.

Клоназепам мен алкогольді, немесе клоназепам және орталық жүйке жүйесін бәсеңдететін басқа да дәрілік препараттарды бір уақытта қолданудан туындаған улану өмірге қауіпті болуы мүмкін.

Емі: мүмкіндігінше жылдамырақ құстыру керек (сананың сақталуы жағдайында) және дәрігерге қаралу керек.

Бұл шаралар сіңбеген препараттың организмнен жылдам шығарылуына немесе оның ас қорыту жолдарынан сіңуін азайтуға бағытталған.

Тыныс алу жолдарының өткізгіштігін, пульсті, қанның артериялық қысымын бақылау керек, ал қажет болғанда пациенттің жай-күйіне қарай тиісті симптолматикалық ем жүргізу керек.

Спецификалық у қайтарғысы флумазенил (бензодиазепинді рецепторлардың антагонисі) болып табылады, ол шұғыл жағдайда вена ішіне енгізілуі мүмкін. Флумазенил клоназепамды ұзақ уақыт қабылдайтын пациенттер үшін көрсетілмеген. Бұл препараттың құрысуға қарсы әлсіз әсері болуына қарамастан, бензодиазепиннің әсер етуін бірден тоқтату, әсіресе сыртартқысында эпилепсиясы бар адамдарда, құрысу ұстамаларын туындатуы мүмкін.

Препаратты ұсынылғаннан үлкен дозада қабылдаған жағдайда дереу дәрігерге қаралу керек.

Шығарылу түрі және қаптамасы

Қызыл сары ПВХ үлбірден және алюминий фольгадан немесе ақ ПВХ/ПЭ/ПВДХ үлбірден және алюминий фольгадан жасалған пішінді ұяшықты қаптамада 30 таблеткадан.

1 пішінді ұяшықты қаптамадан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.

Түпнұсқалық қаптамада, ылғалдан және жарықтан қорғалған жерде 250С-ден аспайтын температурада сақтау керек.

Балалардың қолы жетпейтін жерде сақтау керек!

3 жыл

Жарамдылық мерзімі өткеннен кейін қолдануға болмайды.

Рецепт арқылы

Өндіруші ұйымның атауы және елі

„Польфа” Тархоминск фармацевтикалық зауыты Акционерлік Қоғамы

А.Флеминг к-сі 2, 03-176 Варшава, Польша

Тіркеу куәлігі иесінің атауы және елі

„Польфа” Тархоминск фармацевтикалық зауыты Акционерлік Қоғамы,

Польша

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электрондық поштасы):

«Adalan» ЖШС

Тимирязев к-сі 42, 23 пав., 202 кеңсе, 050057 Алматы қ-сы

Тел. + 727 269 54 59; e-mail: reg@adalan.kz.