Кларисан®

• русский
• қазақша

• Скачать инструкцию медикамента

Саудалық атауы

Кларисан®

Халықаралық патенттелмеген атауы

Лоратадин

Дәрілік түрі

10 мг таблеткалар

Құрамы

Бір таблетканың құрамында

белсенді зат – 10.03 мг лоратадин

(100% затқа шаққанда 10.0 мг),

қосымша заттар: лактоза моногидраты, микрокристалды целлюлоза, картоп крахмалы, кальций стеараты.

Сипаттамасы

Тегіс беткейлі, түсі ақ немесе ақ дерлік таблеткалар. Таблетканың бір жағында ойығы, екінші жағында ойығы және крест түріндегі фирмалық логотипі бар.

Фармакотерапиялық тобы

Жүйелі әсер ететін антигистаминді препараттар.

Жүйелі әсер ететін басқа да антигистаминді препараттар. Лоратадин

АТХ коды R06AX13

Фармакологиялық қасиеттері

Фармакокинетикасы

Ішке қабылдағаннан кейін лоратадин асқазан-ішек жолында жылдам сіңеді. Лоратадин Р450 3А4 цитохромы және аз дәрежеде Р450 2D6 цитохромы арқылы белсенді метаболит дезлоратадинге метаболизденеді.

Лоратадин мен дезлоратадиннің қан плазмасындағы ең жоғары концентрациясына жету уақыты тиісінше 1-1,5 және 1,5-3,7 сағатты құрайды.

Тамақтану лоратадин мен дезлоратадиннің ең жоғары концентрациясына (Тmax) жету уақытын шамамен 1 сағатқа ұзартады, бірақ оның мәніне және препараттың клиникалық әсеріне ықпал етпейді.

Ең жоғары концентрациясы созылмалы бүйрек жеткіліксіздігі немесе бауырдың алкогольмен зақымдануы бар науқастарда ұлғаяды.

Лоратадин қан плазмасы ақуыздарымен (97-99%) жақсы байланысады, оның белсенді метаболиті дезлоратадин - 73-76%-ға байланысады

Лоратадин мен оның белсенді метаболитінің биожетімділігі қабылданған дозаға пропорционалды.

Препараттың 40%-ға жуығы несеппен және 42%-ы – нәжіспен шығарылады. Лоратадиннің жартылай шығарылу кезеңі орташа алғанда 8,4 сағатты (3-тен 20 сағатқа дейін өзгеріп отырады), ал дезлоратадиндікі – 28 сағатты (8,8-ден 92 сағатқа дейін) құрайды.

Лоратадин мен дезлоратадиннің жартылай шығарылу кезеңі бауыр патологиясы кезінде бауырдың зақымдану дәрежесіне пропорционалды ұлғаяды.

Ересектер мен егде емделушілерде лоратадин мен оның метаболиттерінің фармакокинетикалық параметрлерінде айырмашылықтар жоқ. Лоратадин мен оның белсенді метаболиті емшек сүтіне өтеді. Созылмалы бүйрек жеткіліксіздігі бар емделушілерде гемодиализ лоратадин мен оның белсенді метаболитінің фармакокинетикасына әсер етпейді.

Фармакодинамикасы

Шеткергі Н1-гистаминді рецепторлардың селективті блокаторы аллергияға қарсы, қышынуға қарсы, антиэкссудативті әсер етеді. Аллергияға қарсы әсері препаратты қабылдағаннан кейінгі алғашқы 30 минут ішінде дамиды, ең жоғары шегіне 8-12 сағат ішінде жетеді және 24 сағатқа созылады. Емдік дозада қабылдағанда орталық жүйке жүйесіне әсер етпейді, антихолинергиялық және тыныштандыратын әсері байқалмайды, психомоторлық реакциялар жылдамдығына ықпал етпейді.

Аллергиялық реакциялар дамуының алдын алады және оның ағымын жеңілдетеді.

Қылтамырлардың өткізгіштігін және тіндер ісінуінің алдын алады, гистаминнің әсерінен туындайтын тегіс бұлшықеттердің жоғары дәрежеде жиырылу белсенділігін төмендетеді.

Қолданылуы

• созылмалы және/немесе маусымдық аллергиялық риниттің және аллергиялық тері аурулары симптомдарын жеңілдету үшін.

Қолдану тәсілі және дозалары

Ішке, тамақтанғанға дейін 15-30 минут бұрын.

Ересектер мен 12 жастан асқан балаларға: 10 мг (1 таблетка) тәулігіне

1 рет.

6-дан 12 жасқа дейінгі балаларға: дене салмағы > 30 кг - 10 мг (1 таблетка) тәулігіне 1 рет,

дене салмағы ≤ 30 кг - 5 мг (½ таблетка) тәулігіне 1 рет.

Әсері препаратты қабылдағаннан кейін жарты сағаттан соң байқалады және 24 сағат бойы сақталады.

Бауыр жеткіліксіздігі бар емделушілерге күнделікті қабылдау кезінде ұсынылған дозаның жартысын (ересектерге ½ таблетка немесе 5 мг) немесе толық дозасын (1 таблетка немесе 10 мг) күнара тағайындайды.

Бүйрек жеткіліксіздігі бар және егде жастағы емделушілерге дозаны түзету қажет етілмейді.

Жағымсыз әсерлері

Сирек

• бас ауыруы, қатты шаршағыштық, балалардағы қозғыштық

• ұйқышылдық

• ауыздың кеберсуі, жүрек айнуы, гастрит

• тері бөртпесі

Бірен-саран жағдайлар

• алопеция

• анафилактикалық реакциялар

• бауыр қызметінің бұзылуы

• тахикардия, жүректің қағуы

• бас айналу

Қолдануға болмайтын жағдайлар

• лоратадинге немесе препараттың кез келген басқа компонентіне жоғары сезімталдық

• лактация кезеңі

• 6 жасқа дейінгі балалар

Дәрілермен өзара әрекеттесуі

Эритромицинмен, кетоконазолмен және циметидинмен бірге қолданылғанда лоратадин мен оның қан плазмасындағы белсенді метаболитінің концентрациясы артады, бірақ ол клиникалық көріністермен ілесе жүрмейді.

Айрықша нұсқаулар

Кларисан® ұсынылған дозаларда (тәулігіне 1 рет 10 мг) пайдаланған кезде клиникалық мәнді тыныштандыратын әсер бермейді.

Препарат алкогольдің әсерін күшейтпейді.

Кларисанды® қабылдауды жалған нәтижелер алынуын болдырмас үшін терінің диагностикалық аллергосынамасын жүргізгенге дейін 48 сағат бұрын тоқтату керек.

Бауыр қызметінің ауыр бұзылулары бар емделушілерге лоратадин клиренсінің азаюы мүмкін болғандықтан бастапқы аз доза (ұсынылатын бастапқы доза тәулігіне 1 рет 5 мг немесе 10 мг-ден күнара) тағайындалуы тиіс.

Препарат құрамында лактоза бар, сондықтан тұқым қуалайтын галактозаны көтере алмаушылығы, Lapp лактаза тапшылығы немесе глюкоза-галактоза мальабсорбциясы бар емделушілерге ұсынылмайды.

Жүктілік және лактация кезеңі

Кларисан® оны пайдаланудың ана үшін пайдасы ұрыққа төнетін қауіптен асып түсетін жағдайларда ғана қолданылады. Препарат емшек сүтіне енеді, сондықтан емдеу кезеңінде бала емізуді тоқтата тұру қажет.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Ұсынылған дозаларда Кларисан® көлік құралын басқару қабілетіне немесе қауіптілігі зор механизмдермен жұмыс істеуге әсер етпейді. Алайда емделушілер препарат артық дозаланған жағдайда ұйқышылдық дамуы ықтималдығы қаупі болуы мүмкін екендігі жайында хабардар болуы тиіс.

Артық дозалануы

Симптомдары: ұйқышылдық, тахикардия, бас ауыруы.

Емi: симптоматикалық және демеуші ем, асқазанды шаю, ұсақталған белсенділендірілген көмірді сумен суспензия түрінде қабылдау. Лоратадин гемодиализ арқылы шығарылмайды. Шұғыл жәрдем көрсетілгеннен соң емделуші дәрігердің бақылауында қалуы тиіс.

Шығарылу түрі

10 таблеткадан поливинилхлоридті үлбірден және алюминий фольгадан жасалған пішінді ұяшықты қаптамада.

1 пішінді қаптама медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.

Тұтынушылар ыдысына арналған немесе гофрланған картоннан жасалған қорапқа пішінді қаптама салуға жол беріледі. Әрбір қорапқа медицинада қолданылуы жөніндегі мемлекеттік және орыс тілдеріндегі бекітілген нұсқаулықтан салынған.

Сақтау шарттары

Құрғақ, жарықтан қорғалған жерде, 30оС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

«Химфарм» АҚ, Қазақстан,

Шымкент қ., Рашидов к-сі, н/ж, т/ф: 560882

Тіркеу куәлігінің иесі

«Химфарм» АҚ, Қазақстан

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«Химфарм» АҚ, Шымкент қ., ҚАЗАҚСТАН,

Рашидов к-сі, н/ж, т/ф: 560882

Телефон нөмірі 7252 (561342)

Факс нөмірі 7252 (561342)

Электронды поштасы standart@santo.kz