Кеналог® 40 (Triamcinolone)

• русский
• қазақша

• Скачать инструкцию медикамента

Саудалық атауы

Кеналог® 40

Халықаралық патенттелмеген атауы

Триамцинолон

Дәрілік түрі

Инъекцияға арналған 40 мг/мл, 1 мл суспензия

Құрамы

1 мл суспензияның құрамында

белсенді зат – 40.0 мг триамцинолон ацетониді бар,

қосымша заттар: натрий кармеллозасы, натрий хлориді, бензил спирті, полисорбат 80, инъекцияға арналған су.

Сипаттамасы

Бензил спиртінің жеңіл иісі бар, көзге көрінетін қоспалары және түйіршіктері жоқ дерлік, ақ суспензия

Фармакотерапиялық тобы

Жүйелік пайдалануға арналған кортикостероидтар. Глюкокортикостероидтар

Триамцинолон.

ATХ коды H02AB08

Фармакологиялық қасиеттері

Фармакокинетикасы

120 мг триамцинолон ацетонидін бұлшықет ішіне енгізгеннен кейін 8 сағаттан 10 сағатқа дейінгі уақыт ішінде қан плазмасында 44 және 54 мкг/100 мл арасындағы ең жоғары плазмалық концентрацияға жетеді және қабылдағаннан кейін 72 сағат өткен соң 8,9 мкг/100 мл-ге дейін төмендейді.

Буынішілік инъекциядан кейін үш күннен соң триамцинолон ацетонидиннің сіңуі 58%-дан 67%-ға дейінді құрайды. Буынішілік және бұлшықетішілік инъекциялар арасындағы «концентрация-уақыт» қисығы астындағы аудан (AUC) шамасын салыстыру екі жағдайда да оның түгел сіңетіндігін көрсетеді. Триамцинолон бауырда метаболизденеді. Препараттың 15%-дан азы өзгермеген күйінде несеппен бірге шығарылады. Жергілікті де, сондай-ақ жүйелік енгізген кезде де кортикостероидтар көбіне бауырда метаболизденеді. Триамцинолон ацетонидінің үш метаболиті анықталды және оларды қолданудың үш тәсілі үшін де метаболикалық көрініс бірдей. Триамцинолон ацетонидінің метаболиттеріне 6-бета-гидрокситриамцинолон ацетониді, 21-карбокси-6-бета- гидрокситриамцинолон ацетониді, және 21- карбокситриамцинолон ацетониді жатады.

Триамцинолон ацетонидінің бұлшықет ішіне 40 мг дозасын енгізгеннен кейін несепте енгізілген дозаның 12,5%-ы табылады. Бұлшықет ішіне бір рет 80 мг дозаны енгізгеннен кейін, триамцинолон ацетониді 7-11 күнге дейін несептен табылады. Препараттың фармакокинетикасы дозаға байланысты. Препаратты дене салмағының әр кг-на шаққанда 5 мг дозада қолданған кезде орташа жартылай ыдырау кезеңі 85 минутты, 10 мг/кг дозада қолданғанда 88 минутты құрады. Жалпы клиренсі 5 мг/кг доза үшін сағатына 61,6 л және 10 мг/кг доза үшін сағатына 48,2 л құрайды.

Фармакодинамикасы

Кеналог® 40 қабынуға қарсы, аллергияға қарсы, десенсибилизациялаушы, шокқа қарсы, уыттануға қарсы және иммунодепрессиялық әсер береді. Триамцинолонның негізгі әсері глюкокортикоидтық әсерімен және қабыну реакцияларының бәсеңсуімен байланысты. Глюкокортикоидтардың белсенділігі глюконеогенездің күшеюіне және тіндерде глюкоза утилизациясының азаюына әкеледі. Азоттың теңгеріміне жалпы ықпал етуі, емдәмді, дозаны және емдеу ұзақтығын қоса, басқа факторларға байланысты болса да, протеиннің катаболизмі жылдамдайды, ал тағамдық ақуыздан синтезделуі төмендейді. Препаратты тәулігіне 12–24 мг дозада қолданған кезде теріс азотты теңгерім пайда болуы мүмкін. Триамцинолонның аздаған минералокортикоидтық белсенділігі бар. Кортикостероидтармен емделу кезінде эритроциттер және нейтрофильді гранулоциттердің мөлшері артады, эозинофильді гранулоциттердің және базофилдердің мөлшері азаяды. Лимфоидты тін массалары да азаяды.

Кортикостероидтар қабыну үдерісінің қызару, ауырғыштық, жергілікті дене температурасының жоғарылауы, ісіну сияқты бастапқы белгілеріне, сондай-ақ өте кештеу болатын асқынуларға, фибробласттардың пролиферациясын және коллагеннің жиналып қалуын қоса, жол бермейді немесе бұларды басады.

 

Қолданылуы

• аллергиялық реакцияларда: маусымдық, жыл бойғы аллергиялық ринитті, бронх демікпесін, атопиялық және жанаспалы дерматитті, дәрілік заттарға аллергиялық реакцияны, сарысу құю ауруын және көмейдің жұқпалы емес жедел ісінуін, анафилактикалық реакциялардың кеш сатыларына жол бермеуді қоса

• ревматизмдік ауруларда: ауыр ревматоидты артрит (ревматизмге қарсы баяу әсер ететін препараттармен біріктіріп), жедел подагра, спецификалық емес жедел шор буынданатын спондилит, бурсит, эпикондилит, жарақаттанудан кейінгі остеоартроз, псориаздық артрит және остеоартриттегі синовит

• дерматологиялық ауруларда: буллезді герпес түріндегі дерматит, эксфолиативті дерматит, мультиформалы эритеманың ауыр түрі, псориаздың ауыр түрі, себореялы дерматиттің ауыр түрі, экзема, атопиялық дерматит, дискоидты жегі, жанаспалы дерматит, ошақтық алопеция, сулы бөртпе және әртүрлі жедел және созылмалы дерматоздар

• көз ауруларында: аллергиялық конъюнктивит, көздің мөлдір қабығының аллергиялық маргинальді ойық жарасы, алдыңғы сегменттің қабынуы, хориоретинит, диффуздық артқы увеит және хориоидит, белдемелі герпес, көз күлдіреуігі, ирит және иридоциклит, кератит, ретробульбарлы неврит және симпатикалық офтальмия

• эндокринді жүйе ауруларында: бүйрекүсті безі қыртысының алғашқы және салдарлы жеткіліксіздігі, бүйрекүсті безі қыртысының іштен туа болған гиперплазиясы, обырмен байланысты гиперкальциемия, іріңді емес тиреоидит, Аддисон ауруы

• асқазан-ішек ауруларында: аймақтық энтерит (Крон ауруы) және ойық жаралы колиттің өршу кезеңі

• респираторлық ауруларда: аспирациялық пневмонит, өкпе эмфиземасы, бериллиоз, Леффлер синдромы, лимфогранулематоз және диссеминирленген туберкулез

• туберкулезді менингит, өршу сатысындағы жайылған склероз (аурудың өршу ұзақтығын азайтады, бірақ аурудың үдеуін тоқтатпайды).

Қолдану тәсілі және дозалары

Көктамыр ішіне енгізуге болмайды!

Дозалануы ауруға және науқастың жауап реакциясына байланысты әр адамға жекелей белгіленеді. Емдеу үдерісі кезінде жағдайды бақылап отыру үшін кортикостероидтардың төмен дозаларын қолданған, және қажет болғанда, мүмкіндігінше, дозалар біртіндеп төмендетілуі тиіс.

Жергілікті енгізуде доза буынның өлшеміне, ауру сипатына және емделушінің жауап реакциясына сәйкес белгіленуі тиіс. Екі-үш апта ішінде емдік нәтижеге қол жеткізіледі. Алайда соңғы оң әсерге дейін ұзақтығы алты аптадан асатын ем қажет етіледі.

Бұлшықет ішіне қолданылуы

Кеналог® 40 бұлшықет ішіне 40 мг-нан 80 мг-ға дейінгі дозаларда енгізуге болады.

Ересектер және 12 жастан асқан балалар үшін ұсынылатын бастапқы доза 40 мг құрайды.

Қажет болған кезде 100 мг-нан 120 мг-ға дейінгі бір реттік доза қолданылуы мүмкін.

Бұлшықет ішіне енгізу үшін ұсынылатын бастапқы доза 6 жастан 12 жасқа дейінгі балаларда дене салмағының әр кг-на шаққанда 0,03- 0,2 мг құрайды, енгізу аралығы – 1-7 күн.

Бұлшықет ішіне енгізу

Кеналог® 40 ішу арқылы қабылданатын бастапқы емді жиі алмастыруы мүмкін.

Препаратты бөксе бұлшықетіне терең енгізу керек!

Тұтас алғанда, бұлшықет ішіне енгізілген бір доза 4 – 7 күннен 3 – 4 аптаға дейінгі кезеңге жеткілікті деп күтуге болады. 40 мг-нан 60 мг-ға дейінгі бір реттік доза пішен қызбасы немесе тозаңмен индукцияланған демікпесі бар емделушілерде бүкіл маусым бойы ремиссия симптомдарын тудыруы мүмкін.

Қолданудың бұл әдісі, мысалы, демікпеде жағымды әсерді қамтамасыз етуі мүмкін, бірақ бұл температураның жоғарылауы кортикостероидтарды ұдайы қолдануға тән температураның жоғарылауы сияқты жағымсыз әсерлермен байланысты болуы мүмкін.

Буынішілік қолданылуы

Кеналог® 40 ревматоидті артритте, подагралық артритте (подаграда), псориаздық артритте және остеоартритте ауырсыну мен қабынуды азайту үшін буын ішіне енгізіледі.

Емделушілерге симптоматикалық жақсарудан кейін буындарға шамадан тыс салмақ түсіруге болмайтыны ескертілуі тиіс. Буынішілік инъекцияларды бірнеше рет енгізу буынның ауыр бұзылуларын және сүйек некрозын тудыруы мүмкін.

Әдеттегідей Кеналог® 40 буынішілік дозалары ересектерде ұсақ буындар үшін 5 мг-нан 10 мг-ға дейінді және ірі буындар үшін 20 мг-нан 60 мг-ға дейінді құрайды. Алайда инъекцияға 6 мг-нан 10 мг-ға дейінгі дозалар ұсақ буындар үшін және 40 мг доза ірі буындар үшін тиімді қолданылады. Бірнеше буындарға енгізілетін инъекцияларда жиынтық доза 80 мг триамцинолон ацетонидінен аспауы тиіс. Бұлшықетішілік енгізулер арасындағы аралық 1 аптадан аз болмауы тиіс.

Кеналог® 40 ұсынылатын бастапқы дозасы 12 жастан 18 жасқа дейінгі балалар үшін 2,5 мг-нан 40 мг-ға дейінді құрайды. Клиникалық реакцияларына байланысты, кейінгі дозалар арттырылуы мүмкін.

Кеналог® 40 препаратын бурситте және тендосиновитте ауыруын жеңілдету үшін жергілікті қолдануға болады. Сіңірлердің үзілу қаупіне байланысты, сіңірлердің өзіне емес, сіңірлер мен сіңірлердің қабығы арасындағы қуысқа енгізген кезде сақ болған жөн. Дозасы буынның немесе синовиальді кеңістіктің үлкен-кішілігіне және қабыну дәрежесіне байланысты болады.

Патологиялық өзгеру аймағына/ошағына тікелей қолданылуы

Патологиялық өзгеру аймағына тікелей енгізілетін инъекциялық Кеналог® 40 дозасы, зақымданған аймаққа байланысты тиісті мөлшерлерге бөлінген, 5 мг-нан 10 мг-ға дейінді құрайды.

Ұсынылатын бастапқы дозасы 12 жастан 18 жасқа дейінгі балалар үшін 2,5 мг-нан 40 мг-ға дейінді құрайды. Клиникалық реакцияларға байланысты, кейінгі дозалар арттырылуы мүмкін. Әдетте, патологиялық өзгерулердің үлкен аудандары бірнеше инъекцияларды қажет етеді, және аз дозаларда – инъекция жасалатын орында. Әдетте әрбір 2-3 апта сайын екі-үш инъекция жеткілікті. Патологиялық өзгерістер аймағына инъекцияны псориаз және ошақтық алопеция сияқты ауқымды зақымданған орындарға тікелей жасауға болады.

Балалар

Ауыр көрсетілімдер жоқ болған кезде 6 жасқа дейінгі балаларға Кеналог® 40 бұлшықетішілік инъекция түрінде, сондай-ақ 12 жасқа дейінгі балаларда буынішілік инъекция түрінде немесе патологиялық өзгерістер аймағына тікелей инъекция түрінде қолдану ұсынылмайды.

Емдеу кезінде сәбидің өсуін және дамуын мұқият бақылап отыру қажет.

Бүйрек қызметінің бұзылуы

Дозаны түзету қажет емес.

Бауыр қызметінің бұзылуы

Бауыр қызметінің ауыр жеткіліксіздігінде емдеуді ұсынылатын әдеттегі дозаның жартысынан бастаған жөн, өйткені бұл емделушілерде кортикостероидтардың әсері күшеюі мүмкін.

Инъекцияларға арналған ерітіндіні дайындау

Жергілікті енгізу үшін инъекцияға арналған ерітіндіні дайындау үшін препаратты инъекцияға арналған сумен немесе 0,9% натрий хлориді ерітіндісімен сұйылту керек. Инъекция алдында, триамцинолон 1-2% лидокаин гидрохлориді ерітіндісімен немесе 1% прокаин гидрохлориді ерітіндісімен сұйылтылуы мүмкін. Кеналог® 40 құрамында консервант бар ерітінділермен немесе жергілікті анестетиктермен араластырылмауы тиіс. Ерітінді дереу пайдаланылуы, ал пайдаланылмаған үлесі жойылуы тиіс. Жергілікті бұлшықет атрофиясын болдырмау үшін препарат бөксе бұлшықетіне терең енгізілуі тиіс.

Пайдаланар алдында ампуланы жақсылап сілку керек.

Жағымсыз әсерлері

Жиі (≥1/100 –ден <1/10-ға дейін)

• тамақтың қарлығуы, тітіркенуі және құрғауы (ішу арқылы қолданылатын кортикостероидтық ингаляторларды пайдаланғаннан кейін)

• ауыз ішінің құрғауы

• безеуге ұқсас бөртпелер, гематомалар, экхимоздар, беттің қызаруы, атрофия, шаштың шамадан тыс өсуі, жараның нашар жазылуы, терлеудің күшеюі, стрийлер, телеангиоэктазиялар және терінің жұқаруы

• миопатия, остеонекроз, остеопороз (сүйек тінінің өте күшті жоғалуы емдеудің алғашқы 6 айы ішінде байқалады)

• организмде натрийдің іркілуі гипокалиемияға, бүйрекүсті безі қызметінің бәсеңсуіне, Кушинг синдромына, балалардың бойы өсуінің баяулауына, қант диабетіне, гипогликемияға алып келеді

• еттеккір оралымның бұзылуы және вазомоторлы симптомдар

Жиі емес (≥1/1,000 –нан <1/100-ге дейін)

• жалпы холестерин, ТТЛП холестерині және триглицеридтер деңгейінің жоғарылауы

• бас ауыру, бассүйекішілік қатерсіз гипертензия (мидың жалған ісігі)

• артқы капсула асты катарактасы, глаукома, көру жүйкесінің зақымдануы және көру жүйкесінің ісінуі (мидың жалған ісігімен байланысты)

• он екі елі ішектің пептикалық ойық жарасы және асқазан-ішектік қан кету

• ауыз-жұтқыншақ кандидозы

• седативтік әсер, депрессия, ұйқысыздық, тұлғалық өзгеру, мания

Сирек (≥1/10,000 –нан <1/1,000-ға дейін)

• агранулоцитоз, лимфопения, моноцитопения

• өкпе туберкулезі

• порфирия

• елестеулер (олар емдеудің алғашқы немесе екінші аптасында пайда болады), психоздар (симптомдары шизофрения, мания немесе делирий арасында өзгеріп отыруы мүмкін)

Өте сирек (<1/10,000), қолда бар деректер негізінде баға берілуі мүмкін емес)

• жүрек қызметінің нашарлауы

• дерматит

• жұқпалардан туындаған сүйектің сепсистік некрозы (әсіресе жүйелік қызыл жегісі және ревматоидты артриті бар емделушілерде)

• асептикалық некроз, терінің жергілікті түссізденуі, тері атрофиясы, сіңірлердің жергілікті жарақаттары

• аллергиялық реакциялар (тері бөртпесі, есекжем, ангионевротикалық ісіну, бронхтың түйілуі, тыныстың тоқтап қалуы және анафилактикалық реакциялар)

Ауыр жағымсыз реакциялар пайда болған кезде емдеу тоқтатылуы тиіс.

Қолдануға болмайтын жағдайлар

• препараттың белсенді затына немесе қосымша компоненттеріне жоғары сезімталдық

• жүйелік зеңдік жұқпалар (парентеральді және ішілетін түрде қолдануға болмайды)

• идиопатиялық тромбоцитопениялық пурпура (бұлшықет ішіне енгізуге болмайды)

• жүктілік және лактация кезеңі

• 6 жасқа дейінгі балалар (бұлшықет ішіне енгізу ұсынылмайды)

• 12 жасқа дейінгі балалар (буын ішіне немесе тікелей патологиялық өзгерістер аймағына/ошағына, егер ауыр көрсетілімдер жоқ болса, енгізуге болмайды)

Қалған қарсы көрсетілімдер салыстырмалы болып табылады және қолданудың жоспарланған ұзақтығының күтілетін нәтижелеріне және енгізу тәсілдеріне байланысты (мысалы, жүйелік немесе жергілікті қолдану):

• белсенді фазадағы қабынулар (кортикостероидтар организмнің жұқпаға реакциясын әлсіретуі және жергілікті немесе жүйелік жұқпаларды, жүйелік зеңді жұқпаларды немесе белсенді жұқпаларды белсенді етуі немесе өршітуі мүмкін, олар микробтарға қарсы дәрілермен емделмейді, сондай-ақ жасырын немесе жазылған туберкулез)

• қант диабеті (осы ауруды бақылау қиындауы мүмкін)

• остеопороз (кортикостероидтармен ұзақ емдеген кезде остеопороздағы жағдайлар, әсіресе егде жастағы емделушілерде, нашарлауы мүмкін; омыртқа коллапсының пайда болу қаупі бар)

• миопатия (сыртартқыда кортикостероидтарды қолданудан проксимальді миопатияның болуы препаратты қолдану үшін қарсы көрсетілім болып табылады, өйткені ол триамцинолонмен тікелей байланысты осы жағымсыз әсердің пайда болуының ерекше қаупі болып табылады. Кортикостероидтарды тоқтатқан кезде миопатия, әдеттегідей, бірнеше айдың ішінде азаяды. Осы жағымсыз әсердің балаларда пайда болу қаупінің өте жоғары екендігі байқалады)

• пептикалық ойық жара (кейде кортикостероидтарды қолдану аясында пайда болуы мүмкін және қан кету немесе тесілу қаупі бар. Аса қауіпті топқа ҚҚСП қабылдап жүрген емделушілер жатады)

• психоз (сыртартқысында параноясы немесе депрессиясы бар емделушілерде препаратты қолдану суицид қаупін арттыруы мүмкін)

• тіндердің регенерациясы (тіндердің баяу регенерациясы жақында ішек анастомозын сала отырып операция жасалған емделушілерде едәуір болуы мүмкін)

• вакцинация (кортикостероидтарды қабылдап жүрген емделушілерге шешекке қарсы вакцинация жасалмағаны жөн. Вакцинацияның басқа түрлерін, неврологиялық асқынулардың немесе антитилогенездің бәсеңдеуі мүмкін екендігін ескеріп, кортикостероидтардың жоғары дозаларын қабылдап жүрген емделушілерге жасамау керек)

Жергілікті қолдануға болмайтын жағдайлар (салыстырмалы):

• импетиго, дерматомикоз және симплекс герпесі

• қарапайым безеулер

• жаңа туған нәрестелер

• розацеа

• гравитациялық ойық жара

Дәрілермен өзара әрекеттесуі

Кортикостероидтарды қабынуға қарсы стероидты емес препараттармен біріктіру пептикалық ойық жара және асқазан-ішектік қан кету қаупін арттырады.

Гипотромбинемияда ацетилсалицил қышқылы препараттарын кортикостероидтармен үйлестіріп қабылдағанда сақ болу қажет.

Кортикостероидтардың, триамцинолон ацетонидін қоса, буынішілік инъекциялары салицилаттың стационарлық сарысулық концентрациясын төмендетеді. Кортикостероидтар мен миорелаксанттарды үлестіріп қабылдау жүйке-бұлшықет блокадасын тудыратын миорелаксанттардың әсерін төмендететіндігі жөнінде мәлімдемелер бар.

Клиникалық зерттеулер бір мезгілде қолданған кезде кортикостероидтардың ішу арқылы қабылданатын антикоагулянттардың әсерін күшейтуі де және әлсіретуі де мүмкін екендігін көрсетті. Фенитоиннің бауырда кортикостероидтардың метаболизмін арттыратынын және триамцинолонның тиімділігін төмендететіндігін көрсетті.

Бір мезгілде жүргізілетін тұмауға қарсы вакцинация мен иммунодепрессивтік ем (кортикостероидтармен) вакцинаға иммундық реакцияны нашарлатады. Кортикостероидтармен емдеу қант диабеті бар емделушілерде қандағы глюкоза деңгейінің артуына әкеп соғады, мұндайда инсулин дозасын арттыру қажет етілуі мүмкін. Фенобарбиталды және кортикостероидтарды біріктіріп қолдану қан плазмасында кортикостероидтардың деңгейінің және оның емдек әсерінің төмендеуіне әкеп соғуы мүмкін. Гипокалиемияның пайда болу қаупі, егер қан плазмасында калий деңгейін төмендететін симпатомиметиктермен және теофиллинмен, және организмнен калийдің шығарылуына мүмкіндік беретін диуретиктермен бір мезгілде қолданылса, жоғарылауы мүмкін; гипокалиемия сондай-ақ жүрек гликозидтерінің әсерін күшейтуі мүмкін.

Эстрогендер, ішілетін контрацептивтерді қоса, бауырда кортикостероидтардың метаболизмін төмендетіп, сонысымен олардың әсерін күшейтуі мүмкін.

Айрықша нұсқаулар

Кеналог® 40 көктамыр ішіне енгізуге болмайды!

Глюкокортикоидтармен (соның ішінде триамцинолонмен) емдеген кездегі асқынулар дозаға және емдеу ұзақтығына байланысты болғандықтан, әрбір жеке жағдайда дозаға және емдеу ұзақтығына, сондай-ақ тәуліктік немесе үзіліспен емдеу мүмкіндігіне қатысты пайда/қаупіне баға беру қажет. Кортикостероидтарды қабылдап жүрген және стресске ұшыраған емделушілер тез әсер ететін кортикостероидтарды қабылдауы тиіс, олардың дозасын стресс жағдайына дейін, стресс кезінде және одан кейін арттыру керек.

Бүйрекүсті безі қызметінің жеткіліксіздігі емдеуді тоқтатқаннан кейін бірнеше ай бойы сақталуы мүмкін; сондықтан стресс кезеңінде орнын алмастыратын ем қажет болуы мүмкін.

Кортикостероидтар жұқпалардың белгілерін жасыруы және оған төзімділікті төмендетуі мүмкін. Кортикостероидтармен емдеу жасырын туберкулезі және оң Манту сынамасы бар емделушілерде туберкулездің пайда болу қаупін арттыруы мүмкін. Кортикостероидтарды туберкулездің үдеген немесе диссеминирленген түрлерінде қолдануды туберкулезге қарсы химиялық емдеу курсы аясында міндетті түрде жүргізген жөн. Кортикостероидтар желшешек немесе қызылша сияқты вирустық жұқпалардың әсер етуі нәтижесінде ауыр немесе жасырын жұқпалардың пайда болу қаупін арттыруы мүмкін.

Кортикостероидтарды қабылдап жүрген емделушілерге вакцинация жасауға болмайды.

Кортикостероидтарды, көздің мөлдір қабығының тесілуі мүмкін екендігіне байланысты, көздің герпестік зақымы бар емделушілерге сақтықпен қолдану қажет.

Кортикостероидтар психикалық бұзылыстарға себепші болуы мүмкін: эйфорияға, ұйқысыздыққа, көңіл-күйдің құбылуына, психоздың айқын біліністеріне дейін ұласатын тұлға мінез-құлқының өзгерулеріне және ауыр депрессияға. Кортикостероидтар сондай-ақ осыған дейін болған көңіл-күйдің тұрақсыздығын немесе психозға тенденциясын күшейтуі мүмкін.

Кортикостероидтарды спецификалық емес ойық жара колиті, дивертикулиті, жақын арада болған ішек анастомозы, белсенді немесе жасырын пептикалық ойық жарасы, бүйрек қызметінің жеткіліксіздігі, гипертониялық ауруы, остеопорозы және миастениясы бар емделушілерге сақтықпен қолданған жөн. Желшешек вирусын жұқтыру қаупі желшешекпен ауырмаған емделушілерде, егер олар кортикостероидтарды қабылдап жүрсе, артады.

Мұндай науқастар жұқпа жұқтырғандармен қарым-қатынаста болмағаны жөн.

Жұқпа жұқтырғандармен қарым-қатынаста болған жағдайда белсенділігі төмен иммунизация жүргізу ұсынылады. Кортикостероидты емдеу курсы жалғастырылған балалардың өсуін және дамуын мұқият бақылап отыру қажет. Кортикостероидтардың әсері бауыр циррозы немесе гипотиреозы бар науқастарда күшейеді.

Кортикостероидтармен буынішілік инъекциялар жасау жергілікті әсерлерге қосымша, жүйелік жағымсыз әсерлерді тудыруы мүмкін.

Қабынған немесе тұрақсыз буындарға кортикостероидтармен буынішілік инъекцияларды жасамаған жөн. Буынішілік инъекцияларды тағайындар алдында буын сұйықтығы септикалық үдерістің бар-жоқтығын анықтау үшін зерттелуі тиіс. Ауырсынудың ұлғаюы, жергілікті ісіну, қимыл-қозғалыстың шектелуі, температураның жоғарылауы және дімкәстік септикалық артрит болуы ықтималдығын көрсетеді. Септикалық артрит білінген және сепсис анықталған жағдайда бактерияларға қарсы емді бастау қажет.

Бүйрекүсті безі қыртысының дәрі-дәрмектің салдарынан болуы мүмкін жеткіліксіздігі дозаны біртіндеп төмендету арқылы азайтылуы мүмкін. Осы типтің жеткіліксіздігі емді тоқтатқаннан кейін бірнеше айға созылуы мүмкін. Төменде көрсетілген зертханалық көрсеткіштер кортикостероидтармен емдеу кезеңінде өсуі мүмкін: лейкоциттер деңгейі (>20 000/мм3) қабыну немесе жаңа түзілімдер белгілерінсіз; қандағы глюкоза, холестерин, триглицеридтер, тығыздығы төмен липопротеидтер деңгейі. Триамцинолон ацетониді қандағы глюкоза деңгейін арттыруы мүмкін, бұл глюкозурияның немесе қант диабетінің пайда болуына себепші болуы мүмкін. Триамцинолонмен емдеу кезінде несепте 17-кетостероид және 17-гидроксистероид деңгейінің төмендеуі салдарлық немесе бүйрекүсті безі супрессиясына әкеп соқтыруы мүмкін.

Барлық кортикостероидтар кальцийдің экскрециясын арттырады.

Кеналог® 40 компоненттерінің кейбіреулері жөнінде арнайы ақпарат

1 мл Кеналог® 40 (1 ампула) құрамында 9,9 мг бензил спирті бар. Препаратты шала туған немесе жаңа туған нәрестелерге, сондай-ақ 3 жасқа дейінгі балаларға қолдануға болмайды, өйткені уытты және анафилактоидты реакцияларға әкеп соғуы мүмкін.

Аталған дәрілік затта 1 ммольден аз (23 мг) натрий бар, бұл «құрамында натрий жоқ» деген мәнді білдіреді.

Дәрілік заттың көлікті немесе қауіптілігі зор механизмдерді басқару қабілетіне ықпал ету ерекшеліктері

Кеналог® 40 автокөлікті басқару және механизмдермен жұмыс жасау қабілетіне ықпалын тигізбейді.

Артық дозалануы

Симптомдары: өте жоғары дозалары бірнеше апта қабылданғаннан кейін Иценко-Кушинг синдромына себепші болуы мүмкін.

Емі: симптоматикалық.

Арнайы у қайтарғысы жоқ. Препаратты күрт тоқтатудан абай болу керек. Организмнен Кеналог® 40 шығаруды тездету үшін гемодиализ тиімсіз.

Шығарылу түрі және қаптамасы

Мөлдір шыныдан жасалған ампулада 1 мл-ден. Пішінді ұяшықты қаптамада 5 ампуладан.

Пішінді 1 қаптамадан медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынған.

Сақтау шарттары

80С-ден 250С-ге дейінгі температурада сақтау керек. Мұздатып қатыруға болмайды. Тік қалыпта сақтау керек. Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші

КРКА, д.д., Ново Место, Словения

Шмарьешка 6, 8501 Ново место, Словения

Тіркеу куәлігінің иесі

КРКА, д.д., Ново место, Словения

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

«КРКА Казахстан» ЖШС, ҚР, 050059, Алматы, Әл-Фараби д-лы, 19, 1 б секция, 2-ші қабат, 207 кеңсе

тел.: +7 (727) 311 08 09

факс: +7 (727) 311 08 12

info.kz@krka.biz